“Davlat bojxona xizmati to‘g‘risida”gi O‘zbekiston Respublikasi Qonuniga muvofiq davlat bojxona xizmati organlari xodimlarining yoki ularning yaqin qarindoshlarining mol-mulkiga xizmat majburiyatlarini bajarishi bilan bog‘liq holda yetkazilgan zararning o‘rnini qoplash tartibini joriy etish maqsadida Vazirlar Mahkamasi qaror qiladi:

1. O‘zbekiston Respublikasi davlat bojxona xizmati organi xodimining yoki uning yaqin qarindoshlarining mol-mulkiga xizmat majburiyatlarini bajarishi bilan bog‘liq holda yetkazilgan zararning o‘rnini qoplash tartibi to‘g‘risidagi nizom ilovaga muvofiq tasdiqlansin.

2. O‘zbekiston Respublikasi Davlat bojxona qo‘mitasi manfaatdor vazirliklar va idoralar bilan birgalikda o‘zlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.

3. Mazkur qarorning bajarilishini nazorat qilish O‘zbekiston Respublikasi Bosh vazirining investitsiyalar va tashqi iqtisodiy aloqalar masalalari bo‘yicha o‘rinbosari E.M. G‘aniyev va O‘zbekiston Respublikasi Davlat bojxona qo‘mitasi raisi M.B. Azimov zimmasiga yuklansin.

1. Mazkur Nizom O‘zbekiston Respublikasi davlat bojxona xizmati organi xodimining (keyingi o‘rinlarda xodim deb ataladi) yoki uning yaqin qarindoshlarining (ota-onalar, aka-ukalar, opa-singillar, er-xotinlar, farzandlar, shuningdek er-xotinlarning ota-onalari, aka-ukalari va opa-singillari) mol-mulkiga xizmat majburiyatlarini bajarishi bilan bog‘liq holda yetkazilgan zararning o‘rnini qoplash tartibini belgilaydi.

2. Xodimning yoki uning yaqin qarindoshlarining mol-mulkiga yetkazilgan zararning o‘rni xodimning o‘z xizmat majburiyatlarini bajarishi vaqtida yetkazilgan taqdirdagina qoplanadi.

Mazkur Nizom davlat bojxona xizmati organlaridan pensiyaga chiqarilgan shaxslarga, agar zarar ularning yoki yaqin qarindoshlarining mol-mulkiga davlat bojxona xizmati organlaridagi xizmat majburiyatlarini bajarishi bilan bog‘liq holda yetkazilgan bo‘lsa, tatbiq etiladi.

3. Mazkur Nizomni amalga oshirish maqsadida xodimning yoki uning yaqin qarindoshlarining mol-mulkiga xizmat majburiyatlarini bajarishi bilan bog‘liq holda yetkazilgan zararning o‘rnini qoplash masalasini o‘rganish bo‘yicha O‘zbekiston Respublikasi Davlat bojxona qo‘mitasi markaziy apparatida, Qoraqalpog‘iston Respublikasi, viloyatlar va Toshkent shahri bo‘yicha bojxona boshqarmalarida, “Toshkent-AERO” ixtisoslashtirilgan bojxona kompleksi, Bojxona instituti va Milliy kinologiya markazida (keyingi o‘rinlarda bojxona organlari deb ataladi) qonunchilik hujjatlarida belgilangan tartibda doimiy faoliyat ko‘rsatuvchi komissiyalar tuziladi.

4. Komissiya tarkibi bojxona organining tegishli xizmatlari xodimlaridan tashkil topadi va bojxona organi rahbari tomonidan tasdiqlanadi.

5. Zarar o‘rnini qoplash bo‘yicha tegishli hujjatlarni yig‘ish va rasmiylashtirish bojxona organlarining Kadrlar boshqarmasi va joylardagi kadrlar bo‘limlari (keyingi o‘rinlarda kadrlar xizmatlari deb ataladi) tomonidan amalga oshiriladi.

6. O‘z mol-mulkiga yetkazilgan zararning o‘rnini qoplash maqsadida xodim yoki uning yaqin qarindoshlari bojxona organi rahbariga bildirgi (ariza) bilan murojaat qiladi.

Ariza u kelib tushgan kunning o‘zida bojxona organi rahbari tomonidan kadrlar xizmatiga yo‘naltiriladi.

7. Mol-mulkka yetkazilgan zararning o‘rnini qoplash haqidagi bildirgi (ariza) kelib tushgan kundan boshlab uch kun muddatda bojxona organining kadrlar xizmati tomonidan tegishli komissiyaga quyidagi hujjatlar taqdim etiladi:

mol-mulkiga yetkazilgan zararning o‘rnini qoplash haqida xodimning bildirgisi yoki uning yaqin qarindoshlarining arizasi;

mol-mulkiga zarar yetkazilgan holatlar bo‘yicha tekshiruv xulosasi;

mol-mulkiga yetkazilgan zarar miqdorini tasdiqlovchi hujjatlar.

8. Komissiya tomonidan hujjatlar ular taqdim etilgan kundan boshlab o‘n besh kun muddatda ko‘rib chiqiladi.

9. Hujjatlarni ko‘rib chiqish natijasi bo‘yicha mol-mulkka yetkazilgan zararning o‘rni qoplanishi yoki uni qoplash rad etilishi to‘g‘risida komissiya qarori qabul qilinadi va bojxona organi rahbari tomonidan tasdiqlanadigan bayon bilan rasmiylashtiriladi.

10. Komissiya qarori uch kun muddatda manfaatdor shaxslarga yetkaziladi.

11. Komissiya raisi va a’zolari zararning o‘rnini qoplash yoki qoplashni rad etish to‘g‘risidagi komissiya qarorining qonuniyligi va to‘g‘ri qabul qilinganligiga mas’ul hisoblanadi.

12. Mol-mulkka yetkazilgan zararning haqiqiy miqdorini aniqlash, bojxona organi tomonidan baholash tashkiloti jalb qilingan holda, mol-mulkiga zarar yetkazilgan shaxsning ishtirokida amalga oshiriladi. Bunda zarar miqdori uning o‘rnini qoplash vaqtida amal qilayotgan bozor narxlaridan kelib chiqqan holda aniqlanadi.

13. Hisob-kitoblar naqd pul ko‘rinishida yoki pul o‘tkazish yo‘li bilan amalga oshiriladi. Zarar natura shaklida, teng qiymatdagi mulkni berish, uni ta’mirlash yoki boshqa ko‘rinishlarda ham qoplanishi mumkin.

Mazkur Nizomda nazarda tutilgan to‘lovlar bojxona organlarining moliya-iqtisodiyot xizmatlari tomonidan amalga oshiriladi.

14. Mol-mulkka yetkazilgan zararning o‘rnini qoplash bo‘yicha tegishli qaror qabul qilinganidan so‘ng, ushbu zararning o‘rni bojxona organlari tomonidan o‘n kun muddatda manfaatdor shaxslarga qoplab berilishi lozim.

15. Mol-mulkka yetkazilgan zararning o‘rnini qoplash bilan bog‘liq xarajatlar O‘zbekiston Respublikasi Davlat budjeti mablag‘lari hisobidan amalga oshiriladi va keyinchalik aybdor shaxslardan undirib olinadi.

16. Xodimning yoki uning yaqin qarindoshlarining mol-mulkiga yetkazilgan zararning o‘rnini qoplagan bojxona organi bu bilan bog‘liq xarajatlarni zarar yetkazilishi uchun aybdor bo‘lgan yuridik va jismoniy shaxslardan qonunchilik hujjatlarida belgilangan tartibda undirish choralarini ko‘radi.

Bunda aybdor shaxslarni topish maqsadida vakolatli organlarga tegishli so‘rovnomalar yuborilishi va qonunchilik hujjatlarida taqiqlanmagan boshqa zarur tadbirlar amalga oshirilishi mumkin.

17. Bojxona organlari moliya-iqtisodiyot xizmatlari tomonidan zararning o‘rni qoplangan kundan boshlab ikki kun muddatda zararning o‘rni qoplanganligini tasdiqlovchi hujjatlar (to‘lov topshiriqnomasi, chiqim kassa orderlari, to‘lov vedomstlari hisob-faktura va boshqalar) nusxalari tegishli bojxona organining yuridik xizmatiga aybdor shaxslardan zarar summasini undirish choralarini ko‘rish uchun taqdim etiladi.

18. Bojxona organlarining yuridik xizmatlari zararning o‘rni qoplanganligini tasdiqlovchi hujjatlar qabul qilingan kundan boshlab o‘n kun muddatda

aybdor shaxslarga nisbatan da’vo (qarshi da’vo) kiritish uchun qonunchilik hujjatlarida belgilangan tartibda zarur hujjatlarni rasmiylashtiradi va ularga nisbatan da’vo (qarshi da’vo) kiritish choralarini ko‘radi;

sudlarda tegishli bojxona organi vakili sifatida ishtirok etadi;

undirishga qaratilgan, lekin undirilmay qolgan mablag‘larni (aybdor jismoniy shaxs vafot etgan, I guruh nogironlik ro‘yxatiga kiritilgan hollarda) mablag‘larni hisobdan chiqarish uchun sud qarorlari yoki boshqa hujjatlarni tegishli bojxona organining moliya-iqtisodiyot xizmatiga taqdim etadi;

o‘z vakolati doirasida zararning o‘rnini qoplash xarajatlarini undirish bilan bog‘liq boshqa tadbirlarni amalga oshiradi.

19. Xodimning yoki uning yaqin qarindoshlarining mol-mulkiga xizmat majburiyatlarini bajarishi bilan bog‘liq holda yetkazilgan zararning o‘rnini qoplash mazkur Nizomning ilovasidagi sxemaga muvofiq amalga oshiriladi.

20. Xodimning yoki uning yaqin qarindoshlarining mol-mulkiga xizmat majburiyatlarini bajarishi bilan bog‘liq holda yetkazilgan zararning o‘rnini qoplash bo‘yicha nizo va kelishmovchiliklar qonunchilik hujjatlarida belgilangan tartibda hal etiladi.

21. Mazkur Nizom talablari buzilishida aybdor bo‘lgan shaxslar qonunchilik hujjatlariga muvofiq javobgar bo‘ladilar.