Oʻzbekiston Respublikasi Qurolli Kuchlarining boshqaruv organlari, birlashma, qoʻshilma, qism, muassasa va harbiy tuzilmalarini davlat mukofotlari bilan taqdirlash tartibiga yagona yondashuvni taʼminlash, harbiy anʼanalarni mustahkamlash, gʻurur va vatanparvarlik hissini kuchaytirish, harbiy xizmatning nufuzini oshirish, boʻlinmalarni jangovar-xizmat faoliyatda yuksak natijalarni qoʻlga kiritishga ragʻbatlantirish, shuningdek, harbiy xizmatchilarni mustaqillik gʻoyalariga sadoqat va harbiy burchni soʻzsiz bajarish ruhida tarbiyalash maqsadida:

1. Oʻzbekiston Respublikasi Qurolli Kuchlarining boshqaruv organlari, birlashma, qoʻshilma, qism, muassasa va harbiy tuzilmalarini (keyingi oʻrinlarda — harbiy boʻlinmalar) davlat mukofotlari bilan taqdirlash tartibi toʻgʻrisidagi nizom ilovaga muvofiq tasdiqlansin.

2. Belgilab qoʻyilsinki, harbiy boʻlinmalarga topshiriladigan davlat mukofoti shon-sharaf, jasorat va iftixor ramzi hamda Oʻzbekiston Respublikasi Qurolli Kuchlarining har bir harbiy xizmatchisiga Vatani oldidagi uning muqaddas burchi, xalqiga sadoqati, jasorat va qatʼiylikni yodiga tushirishga xizmat qiladi, shuningdek, jangovar-xizmat faoliyatida yuksak natijalarga erishganligi uchun harbiy boʻlinmalarni ragʻbatlantirishning oliy shakli hisoblanadi.

3. Belgilansinki, davlat mukofotlari bilan harbiy boʻlinmalar Vatan va davlat manfaatlarini himoya qilish boʻyicha jangovar harakatlarda, tinchlik va xavfsizlikni saqlash boʻyicha operatsiyalarda harbiy burchni bajarishda shaxsiy tarkibning jasorati va xizmati, namoyon etgan qahramonligi, jasorati, qatʼiyligi va mardligi, aksilterror operatsiyalardagi ishtiroki, jangovar-xizmat vazifalarni bajarish mobaynida koʻrsatgan fidoyiligi, jangovar tayyorgarlik va mamlakatning mudofaa qobiliyatini taʼminlash, favqulodda vaziyatlarning oldini olish va bartaraf etishdagi yuqori koʻrsatkichlari, shuningdek, Oʻzbekiston Respublikasi Qurolli Kuchlarini, harbiy ilm-fanni, mamlakatning mudofaa sanoatini rivojlantirishda qoʻshgan hissasi va yuqori malakali harbiy kadrlarni tayyorlashdagi katta yutuqlari uchun taqdirlanadi.

4. Oʻzbekiston Respublikasi Mudofaa vazirligi, Ichki ishlar vazirligi, Favqulodda vaziyatlar vazirligi, Davlat xavfsizlik xizmati va Milliy gvardiya:

Oʻzbekiston Respublikasi Adliya vazirligi bilan birgalikda bir oy muddatda qonun hujjatlariga mazkur qarordan kelib chiqadigan oʻzgartirish va qoʻshimchalar toʻgʻrisida takliflar kiritsin;

mazkur qarorning mazmun va mohiyatini shaxsiy tarkibga yetkazish boʻyicha keng tushuntirish ishlarini tashkil qilsin.

5. Mazkur qarorning ijrosini nazorat qilish Oʻzbekiston Respublikasining Bosh vaziri A.N. Aripov va Oʻzbekiston Respublikasi Prezidenti huzuridagi Xavfsizlik kengashi kotibi V.V. Maxmudov zimmasiga yuklansin.

1. Mazkur Nizom Oʻzbekiston Respublikasi Qurolli Kuchlarining boshqaruv organlari, birlashma, qoʻshilma, qism, muassasa va harbiy tuzilmalarini (keyingi oʻrinlarda — harbiy boʻlinmalar) Oʻzbekiston Respublikasi davlat mukofotlari (keyingi oʻrinlarda — davlat mukofotlari) bilan taqdirlash tartibini belgilaydi.

2. Harbiy boʻlinmalar “Amir Temur”, “Jaloliddin Manguberdi”, I va II darajali “Shon-sharaf” ordenlari, shuningdek, Oʻzbekiston Respublikasining boshqa mukofotlari bilan taqdirlanishi mumkin.

3. Harbiy boʻlinmalar davlat mukofotlari bilan:

Vatanni himoya qilish boʻyicha janglarda, shu jumladan Davlat chegarasi va davlat manfaatlarini qoʻriqlash va himoya qilishda, tinchlik va barqarorlikni saqlash boʻyicha operatsiyalar hamda aksilterror operatsiyalar vaqtida harbiy burchni ado etishda harbiy boʻlinma koʻrsatgan qahramonligi va xizmatlari;

jangovar harakatlar, tabiiy va texnogen xususiyatga ega boʻlgan favqulodda vaziyatlar yoki ommaviy tartibsizliklar davomida insonlarni qutqarish vaqtida harbiy boʻlinmaning shaxsiy tarkibi koʻrsatgan ommaviy qahramonligi;

tabiiy va texnogen xususiyatga ega boʻlgan favqulodda vaziyatlarning oldini olish va ularning oqibatlarini bartaraf etishda ishtirok etganligi;

jangovar-xizmat vazifalarini bajarish mobaynida shaxsiy tarkib koʻrsatgan mardligi va fidoyiligi, jangovar tayyorgarlikdagi yuqori koʻrsatkichlari;

mudofaa salohiyati va milliy xavfsizlikni mustahkamlash ishida, Qurolli Kuchlarning jangovar shayligini oshirish va Oʻzbekiston Respublikasida huquq-tartibotni taʼminlashdagi ulkan xizmatlari;

Oʻzbekiston Respublikasi Qurolli Kuchlarini rivojlantirishga qoʻshgan ulkan hissasi hamda uning nufuzini xalqaro darajada oshirganligi;

mamlakatning harbiy ilm-fani, mudofaa sanoatini rivojlantirish, shuningdek, yuqori malakali harbiy kadrlarni tayyorlashga qoʻshgan salmoqli hissasi uchun taqdirlanishi mumkin.

4. Harbiy boʻlinmalarni davlat mukofotlari bilan taqdirlash toʻgʻrisidagi qarorlar harbiy xizmat koʻzda tutilgan vazirlik va idoralar (keyingi oʻrinlarda — vazirliklar) rahbarlarining taqdimnomalari asosida Oʻzbekiston Respublikasi Prezidenti tomonidan qabul qilinadi.

5. Boʻysunuvchi harbiy boʻlinmalarni davlat mukofotlari bilan taqdirlash toʻgʻrisidagi tashabbus bilan chiqish vazirliklar rahbarlari, ularning oʻrinbosarlari, birlashmalar komandirlari (qoʻmondonlari)ga va ularga tenglashtirilgan mansabdor shaxslarga yuklanadi.

6. Quyidagilar davlat mukofotiga taqdim qilinadigan harbiy boʻlinmalarning jangovar-xizmat faoliyatini baholashning asosiy mezonlari hisoblanadi:

yuqori darajali jangovar shaylik, qoʻshinlar tayyorgarligi hamda samarali boshqaruv faoliyati;

yuqori kasbiy tayyorlanganlik va harbiy boʻlinmalar harakatining hamjihatligi, shuningdek, jang va turli operatsiyalarni tashkillashtirish hamda olib borish mobaynida shaxsiy tarkibning mahorati va koʻnikmalari;

Oʻzbekiston Respublikasining mustaqilligi, suvereniteti, hududiy yaxlitligi va konstitutsiyaviy tuzumini muhofaza qilish va xavfsizligini taʼminlash vazifalarini birgalikda bajarish masalalarini vazirlik va idoralarning boʻlinmalari, mahalliy davlat hokimiyati organlari bilan hamkorlikda sifatli tashkillashtirish va taʼminlash;

jangovar vaziyatda, tabiiy ofatlar yoki boshqa hollarda odamlar hayoti va sogʻligʻini saqlashga oid harakatlar tezkorligi;

yuqori malakali harbiy kadrlarni tayyorlash, mamlakatning harbiy ilm-fani va mudofaa sanoatini rivojlantirish, shuningdek, harbiy xizmatchilarni mustaqillik gʻoyalariga sadoqat va harbiy burchni soʻzsiz bajarish ruhida tarbiyalash;

Vatan oldidagi harbiy burchni bajarish vaqtida harbiy boʻlinmalarning shaxsiy tarkibi koʻrsatgan qahramonligi, vatanparvarligi, mardligi va qatʼiyligi, shuningdek, mustahkam harbiy intizom va sogʻlom maʼnaviy-axloqiy muhit.

7. Harbiy boʻlinmani davlat mukofoti bilan taqdirlash Oʻzbekiston Respublikasi Prezidenti tomonidan, tarkibiga taqdirlashga tavsiya qilinadigan harbiy boʻlinma kiruvchi vazirlik rahbarining taqdimnomasiga koʻra, mazkur Nizomning ilovasida keltirilgan sxema boʻyicha amalga oshiriladi.

8. Vazirlik rahbarining taqdimnomasiga taqdirlanadigan harbiy boʻlinma toʻgʻrisidagi tarixiy maʼlumotnoma va harbiy boʻlinma faoliyatini xolisona baholash uchun zarur boʻlgan qoʻshimcha maʼlumotlar ilova qilinadi.

9. Taqdimnomada harbiy boʻlinma toʻgʻrisida qisqacha axborot aks ettiriladi, tegishli davlat mukofoti taklif etilib:

Vatanni himoya qilish boʻyicha janglarda, shu jumladan Davlat chegarasi va davlat manfaatlarini qoʻriqlash va himoya qilishda, tinchlik va barqarorlikni saqlash boʻyicha operatsiyalar hamda aksilterror operatsiyalar vaqtida harbiy burchni ado etishda harbiy boʻlinma koʻrsatgan qahramonligi va xizmatlari;

soʻnggi uch yil davomida (tinchlik davrida) shaxsiy tarkibning jangovar tayyorgarlikdagi muvaffaqiyatlari hamda mudofaa salohiyati va milliy xavfsizlikni mustahkamlash, harbiy boʻlinmaning jangovar shayligini saqlash, shuningdek, jamoat huquq-tartibotini taʼminlash boʻyicha vazifalarni bajarishdagi boshqa ulkan xizmatlari;

yuqori malakali harbiy kadrlarni tayyorlash, mamlakatning harbiy ilm-fani va mudofaa sanoatini rivojlantirish, harbiy xizmatchilarni harbiy-vatanparvarlik ruhida tarbiyalashga qoʻshgan hissasining taʼrifi keltiriladi.

Taqdimnoma vazirlikning rasmiy blankida rasmiylashtiriladi va uning rahbari tomonidan imzolanadi.

10. Harbiy boʻlinmaning tarixiy maʼlumotnomasida:

harbiy boʻlinmaning nomi va vazifasi, uning tuzilishi, qayta tuzilishi va rivojlanish tarixi;

shaxsiy tarkibning yurishlar, janglar va operatsiyalardagi ishtiroki;

oʻquv-jangovar va maʼnaviy-maʼrifiy tayyorgarlik, shuningdek, harbiy intizom holati;

harbiy boʻlinma va shaxsiy tarkibning mukofotlari va koʻrsatgan xizmatlari;

harbiy boʻlinma qoʻmondonligi;

harbiy boʻlinmaning muhim sanalari, bayram va yubileylari, shuningdek, uning hayoti va jangovar-xizmat faoliyatidagi boshqa eng ahamiyatli voqealar;

harbiy boʻlinma joylashgan joyi va boʻysunuvining oʻzgarishi koʻrsatib oʻtiladi.

11. Harbiy boʻlinmani taqdirlash haqidagi iltimosnoma instansiya boʻyicha tegishli vazirlik rahbariga yuboriladi, u bir oy muddatda iltimosnomani qoʻllab-quvvatlaydi yoki rad etadi.

Vazirlik rahbari harbiy boʻlinmani davlat mukofoti bilan taqdirlash haqidagi iltimosnomani qoʻllab-quvvatlash yoki rad etish toʻgʻrisidagi qarorni tarkibi har yili u tomonidan belgilanadigan maxsus idoraviy komissiyaning xulosalariga asosan qabul qiladi.

12. Harbiy boʻlinmani davlat mukofoti bilan taqdirlash haqidagi iltimosnoma vazirlik rahbari tomonidan qoʻllab-quvvatlangan taqdirda, materiallar koʻrib chiqish uchun oʻrnatilgan tartibda Oʻzbekiston Respublikasi Prezidenti huzuridagi Xavfsizlik kengashi apparatiga yuboriladi.

13. Harbiy boʻlinmani davlat mukofoti bilan taqdirlash toʻgʻrisidagi materiallar Oʻzbekiston Respublikasi Prezidenti huzuridagi Xavfsizlik kengashi apparatida koʻrib chiqilgandan soʻng, kelishish uchun oʻrnatilgan tartibda Oʻzbekiston Respublikasi Prezidenti huzuridagi Davlat mukofotlari va geraldika boʻyicha komissiyaga yuboriladi.

14. Harbiy boʻlinmaga davlat mukofotini topshirish Oʻzbekiston Respublikasi Prezidenti tomonidan yoki uning koʻrsatmasiga binoan shunday vakolat berilgan shaxs tomonidan belgilangan tartibda amalga oshiriladi.

15. Davlat mukofotlari bilan taqdirlangan harbiy boʻlinmalar oʻz nomlanishlarida ular taqdirlangan davlat mukofotlarining nomlaridan foydalanish huquqiga ega.

Vazirlikning bayrogʻiga ushbu harbiy boʻlinma taqdirlangan orden va medallar hamda ana shu davlat mukofotlarining lentalari qadab koʻyiladi.

Vazirlikning bayrogʻiga qadab qoʻyiladigan davlat mukofoti lentasining eni 10 sm, lentaning bant bilan birgalikdagi uzunligi — 260 sm, popuk (bubon)lar — 20 sm dan, bantning uzunligi — 25 sm.

16. Harbiy boʻlinma taqdirlangan orden va medallar Oʻzbekiston Respublikasining “Davlat mukofotlari toʻgʻrisida”gi Qonunida belgilangan ketma-ketlikda vazirlik bayrogʻining old tomoniga qadaladi. Birinchi davlat mukofoti bayroq matosining yuqori chekkasidan 10 sm pastda, dastasidan 4 sm masofada qadaladi, qolgan davlat mukofotlari dasta boʻylab yuqoridan pastga birin-ketin 5 sm oraligʻida qadaladi. Davlat mukofotlarini vazirlik bayrogʻiga qadash uchun matoga orden yoki medal oʻlchami boʻyicha maxsus ipak astarlar tikiladi.

Harbiy boʻlinma taqdirlangan orden va medallarning lentalari vazirlik bayrogʻining metall uchiga qadab qoʻyiladi.

17. Harbiy boʻlinma taqdirlangan orden va medallar tinchlik va urush davrining barcha sharoitlarida vazirlik bayrogʻi bilan birga saqlanadi.

Davlat mukofotlari va ularning guvohnomalari harbiy boʻlinmalarda belgilangan tartibda saqlanadi.

Vazirlik bayrogʻining matosini taʼmirlash zarurati tugʻilganida orden va medallar vaqtinchalik harbiy boʻlinma shtabining maxfiy-rejim organiga topshiriladi.

18. Bir harbiy boʻlinma boshqa harbiy boʻlinma sifatida qayta tuzilganida davlat mukofotlari va ularning guvohnomalari yangi tuzilgan harbiy boʻlinma ixtiyorida saqlanadi.

Bir harbiy boʻlinma ikki va undan ortiq harbiy boʻlinmalarga qayta tuzilganida davlat mukofotlari va ularning guvohnomalari maxsus idoraviy komissiyaning qaroriga asosan yangi tuziladigan harbiy boʻlinmalardan birining ixtiyorida saqlanadi.

Ikki va undan ortiq harbiy boʻlinmalar birlashtirilib bitta harbiy boʻlinma qayta tuzilganida ushbu harbiy boʻlinmalarning davlat mukofotlari va ularning guvohnomalari yangi tuzilgan harbiy boʻlinma ixtiyorida saqlanadi.

19. Harbiy boʻlinma tugatilganda ushbu harbiy boʻlinma taqdirlangan davlat mukofotlari va ularning guvohnomalari maxsus idoraviy komissiyaning qaroriga muvofiq doimiy saqlash uchun taalluqliligi boʻyicha Oʻzbekiston Respublikasi Qurolli Kuchlari Davlat muzeyiga yoki harbiy xizmat koʻzda tutilgan vazirlik va idoralarning boshqa muzeylariga topshiriladi.

20. Harbiy boʻlinmalarda asosiy tantanali tarixiy voqealarning, shu jumladan davlat mukofotlari bilan taqdirlashlarning hisobini yuritish belgilangan tartibda amalga oshiriladi.

21. Oʻzbekiston Respublikasining bir xil orden, medal va Faxriy yorligʻi bilan takroran taqdirlashga yoʻl qoʻyilmaydi, darajalarga ega boʻlgan davlat mukofotlari bundan mustasno.

22. Darajalarga ega boʻlgan davlat mukofotlari bilan taqdirlash ketma-ketlikda — quyi darajadan yuqori darajaga qarab amalga oshiriladi.

23. Harbiy boʻlinma harbiy xizmatchilari harbiy boʻlinma taqdirlangan davlat mukofotlarining butligini taʼminlash boʻyicha barcha choralarni koʻrishga majburlar.

Harbiy boʻlinma taqdirlangan davlat mukofoti yoʻqolgan taqdirda qonunchilikka muvofiq xizmat surishtiruvi oʻtkaziladi.

24. Davlat mukofotining yoʻqolishi va shikastlanishida aybdor deb topilgan shaxslar qonunchilikda belgilangan tartibda javobgarlikka tortiladi.