Sog‘liqni saqlashda xususiy sektorni qo‘llab-quvvatlash bo‘yicha qabul qilingan kompleks chora-tadbirlar natijasida nodavlat tibbiyot muassasalari sonini yanada ko‘paytirish hamda ular tomonidan ko‘rsatilayotgan tibbiy xizmatlar turlarini kengaytirish uchun zarur shart-sharoitlar yaratildi.

Shu bilan birga, xususiy tibbiyot muassasalarining aholi sog‘lig‘ini muhofaza qilishdagi hissasini oshirish, sog‘liqni saqlash sohasida davlat-xususiy sheriklikni joriy etishning institutsional va huquqiy mexanizmlarini yaratish masalasi hali-hamon dolzarb bo‘lib qolmoqda.

Xususiy sog‘liqni saqlashni yanada rivojlantirish, ushbu sohada davlat-xususiy sheriklikning huquqiy asoslarini yaratish, investitsiyalarni, ayniqsa, chet el investitsiyalarini jalb etishni kengaytirish, shuningdek, aholining yuqori texnologik tibbiy xizmatlar va uskunalardan foydalanish imkoniyatlarini oshirishda nodavlat sektori ishtirokini rag‘batlantirish maqsadida:

1. Sog‘liqni saqlash sohasida davlat-xususiy sheriklik to‘g‘risidagi nizom 1-ilovaga muvofiq tasdiqlansin.

2. Belgilansinki:

a) sog‘liqni saqlash sohasida davlat-xususiy sheriklik loyihalari davlat va xususiy sherik o‘rtasida quyidagi bir yoki bir necha shakllarni birlashtirish orqali amalga oshiriladi:

sog‘liqni saqlash sohasida jamoat infratuzilmasini loyihalashtirish, qurish, rekonstruksiya qilish, yaratish, jihozlash, modernizatsiya qilish, moliyalashtirish, foydalanish va xizmat ko‘rsatish;

sog‘liqni saqlash sohasida tovarlarni yetkazish, ishlarni bajarish va xizmatlar ko‘rsatish;

b) O‘zbekiston Respublikasi Prezidenti va Vazirlar Mahkamasining qarorlarida nazarda tutilgan hollardan tashqari xususiy sherikni tanlab olish tender asosida yoki to‘g‘ridan-to‘g‘ri muzokaralar o‘tkazish orqali amalga oshiriladi;

v) bitimning amal qilish muddati davlat va xususiy sherik tomonidan belgilanadi. Bunda u uch yildan kam bo‘lmasligi va 49 yildan oshmasligi kerak;

g) davlat-xususiy sheriklik loyihalarini amalga oshirishda xususiy sherikka ajratilgan yer uchastkalari, sotib olingan tibbiy va boshqa uskunalar, shuningdek, ular tomonidan qurilgan obyektlar bitimning amal qilish muddati tugagandan so‘ng davlat sherigiga topshiriladi.

3. O‘zbekiston Respublikasi Investitsiyalar va tashqi savdo vazirligi, Moliya vazirligi, Sog‘liqni saqlash vazirligi hamda Tiklanish va taraqqiyot jamg‘armasining (keyingi o‘rinlarda — Jamg‘arma) davlat-xususiy sheriklik loyihalarini amalga oshirish doirasida sog‘liqni saqlash sohasiga investitsiya kiritadigan investorlarni davlat tomonidan qo‘llab-quvvatlash maqsadida jamg‘arma mablag‘lari hisobidan imtiyozli kreditlash (keyingi o‘rinlarda — imtiyozli kreditlash) to‘g‘risidagi taklifiga rozilik berilsin.

Jamg‘arma davlat-xususiy sheriklik shartlari asosida tashkil qilinadigan tibbiyot muassasalarining moddiy-texnik bazasini mustahkamlash uchun O‘zbekiston Respublikasi Prezidentining 2017-yil 6-yanvardagi “Oziq-ovqat, charm-poyabzal va farmatsevtika sanoatida investitsiya loyihalarini moliyalashtirish manbalarini kengaytirish chora-tadbirlari to‘g‘risida”gi PQ-2718-son qaroriga asosan ochilgan kredit liniyalarining tanlanmagan mablag‘lari hisobidan vakolatli tijorat banklariga 10 yil muddatgacha, shu jumladan 3 yillik imtiyozli davrni o‘z ichiga olgan, yillik foiz stavkasi 6 oylik LIBOR plyus 2 foizga teng, umumiy miqdori 150 mln AQSH dollarigacha bo‘lgan kredit liniyalarini ochsin.

4. Belgilab qo‘yilsinki, sog‘liqni saqlash sohasida davlat-xususiy sheriklik loyihalarini amalga oshirish doirasida imtiyozli kreditlash tijorat banklari tomonidan:

faqatgina import qilinadigan zamonaviy tibbiy uskunalar va inventarlarni sotib olish uchun — chet el valyutasida kiritiladigan investitsiya umumiy hajmining 20 foizidan ko‘p bo‘lmagan miqdorda;

3 yillik imtiyozli davrni o‘z ichiga olgan holda, 8 yilgacha bo‘lgan muddatga qayta moliyalashtiruvchi bankning marjasi bilan birga yillik 1,0 foiz miqdorida;

investor tomonidan kiritiladigan investitsiyalar umumiy hajmining 80 foizidan kam bo‘lmagan miqdorida xususiy, shu jumladan xorijiy investitsiya kiritish sharti bilan amalga oshiriladi.

5. O‘zbekiston Respublikasi Sog‘liqni saqlash vazirligi, Moliya vazirligi huzuridagi Davlat-xususiy sheriklikni rivojlantirish agentligi va Adliya vazirligi:

Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari hamda respublika ixtisoslashtirilgan ilmiy-amaliy tibbiyot markazlari bilan birgalikda bir oy muddatda va keyinchalik har yili davlat-xususiy sheriklik shartlari asosida loyihalarni amalga oshirish maqsadida davlat tibbiyot muassasalarining yer uchastkalari, binolari yoki ularning qismlari va xonalari, shuningdek, samarasiz faoliyat ko‘rsatayotgan davlat tibbiyot muassasalari hamda sog‘liqni saqlash sohasida ustuvor yo‘nalishga ega bo‘lgan tibbiy va qo‘shimcha xizmatlar ro‘yxatini shakllantirsin va ular to‘g‘risidagi ma’lumotlarni tegishli ixtisoslashgan veb-saytlarga joylashtirsin;

ikki oy muddatda ilg‘or xalqaro tajribani inobatga olgan holda, sog‘liqni saqlash sohasida davlat-xususiy sheriklik bitimlarining namunaviy shakllarini ishlab chiqsin va tasdiqlasin;

uch oy muddatda sog‘liqni saqlash sohasida, shu jumladan respublika ixtisoslashtirilgan ilmiy-amaliy tibbiyot markazlari ishtirokida amalga oshiriladigan birlamchi ahamiyatga ega bo‘lgan davlat-xususiy sheriklik loyihalarining konsepsiyasini ishlab chiqsin va belgilangan tartibda tasdiqlasin;

2019-yil 15-avgustga qadar davlat-xususiy sheriklik bitimlarini tuzish huquqini beruvchi tender e’lon qilsin.

6. O‘zbekiston Respublikasi Sog‘liqni saqlash vazirligi:

O‘zbekiston Respublikasi Moliya vazirligi huzuridagi Davlat-xususiy sheriklikni rivojlantirish agentligi va respublika ixtisoslashtirilgan ilmiy-amaliy tibbiyot markazlari bilan birgalikda, shu jumladan Sog‘liqni saqlash vazirligi va respublika ixtisoslashtirilgan ilmiy-amaliy tibbiyot markazlarining budjetdan tashqari mablag‘lari, texnik ko‘mak mablag‘lari va qonunchilikda taqiqlanmagan boshqa manbalar hisobidan ekspertlar va konsultantlarni jalb etgan holda davlat-xususiy sheriklik aniq loyihalarining konsepsiyalari, bitimlari hamda tender hujjatlarining ishlab chiqilishini ta’minlasin;

O‘zbekiston Respublikasi Investitsiyalar va tashqi savdo vazirligi bilan birgalikda xorijiy investorlarga davlat-xususiy sheriklik loyihalari to‘g‘risida ma’lumot yetkazilishini, shu jumladan Sog‘liqni saqlash vazirligining rasmiy veb-saytida va “Investitsiya portali”da e’lon berish orqali ta’minlasin;

O‘zbekiston Respublikasi Prezidenti huzuridagi Davlat boshqaruvi akademiyasi, boshqa ta’lim va ilmiy-tadqiqot muassasalari bilan birgalikda bir oy muddatda Toshkent vrachlar malakasini oshirish instituti negizida davlat tibbiyot muassasalari rahbarlari uchun xorijiy investorlarni jalb etish va sog‘liqni saqlash sohasida investitsion faoliyatni boshqarish masalalari bo‘yicha mazkur tibbiyot muassasalarining budjetdan tashqari mablag‘lari hisobidan shartnoma asosida qisqa muddatli malaka oshirish kurslarini tashkil qilsin;

ikki oy muddatda qonun hujjatlariga mazkur qarordan kelib chiqadigan o‘zgartirish va qo‘shimchalar to‘g‘risida O‘zbekiston Respublikasi Vazirlar Mahkamasiga takliflar kiritsin.

7. Quyidagilarga:

O‘zbekiston Respublikasi Bosh vazirining o‘rinbosari A.A. Abduhakimovga — sog‘liqni saqlash sohasida davlat-xususiy sheriklik loyihalarini tayyorlash va amalga oshirish doirasida vazirlik va idoralar faoliyatini samarali muvofiqlashtirish, shuningdek, mazkur qarorning amalga oshirilishini muntazam muhokama qilish;

O‘zbekiston Respublikasi Bosh vazirining o‘rinbosari — moliya vaziri J.A. Qo‘chqorovga — sog‘liqni saqlash sohasida davlat-xususiy sheriklik loyihalarini amalga oshirish uchun zarur bo‘ladigan budjet mablag‘larining hajmini o‘z vaqtida aniqlash;

O‘zbekiston Respublikasi sog‘liqni saqlash vaziri A.K. Shodmonovga — sog‘liqni saqlash sohasida davlat-xususiy sheriklik loyihalarini o‘z vaqtida va sifatli tayyorlash hamda ularni amalga oshirish, loyihalar tashabbuskorlariga zarur bo‘ladigan moliyaviy-iqtisodiy hisob-kitoblar, statistik va boshqa ma’lumotlarni olishda ko‘maklashish;

O‘zbekiston Respublikasi Moliya vazirligi huzuridagi Davlat-xususiy sheriklikni rivojlantirish agentligi direktori G.A. Xoljigitovga — Sog‘liqni saqlash vazirligiga davlat-xususiy sheriklik loyihalarini amalga oshirishda, shu jumladan aniq loyihalarning konsepsiyalari, bitimlari hamda tender hujjatlarini ishlab chiqishda ko‘maklashish yuzasidan shaxsiy javobgarlik belgilansin.

8. O‘zbekiston Respublikasi Prezidentining ayrim hujjatlariga 2-ilovaga muvofiq o‘zgartirish va qo‘shimchalar kiritilsin.

9. Mazkur qarorning ijrosini nazorat qilish O‘zbekiston Respublikasi Bosh vazirining o‘rinbosarlari A.A. Abduhakimov, E.M. G‘aniyev va O‘zbekiston Respublikasi Prezidentining maslahatchisi A.A. Abduvaxitov zimmasiga yuklansin.

1. Ushbu Nizom sog‘liqni saqlash sohasidagi davlat-xususiy sheriklikni amalga oshirish tartibini belgilaydi.

Davlat xaridlari to‘g‘risidagi qonunchilik mazkur Nizom qo‘llaniladigan sohaga kiruvchi munosabatlarga tatbiq etilmaydi.

2. Ushbu Nizomda quyidagi tushunchalardan foydalaniladi:

sog‘liqni saqlash sohasida davlat-xususiy sheriklik — o‘zaro tuzilgan davlat-xususiy sheriklik to‘g‘risidagi bitimi asosida xususiy investitsiyalar va (yoki) boshqaruv tajribasini jalb qilish hamda xatarlar va majburiyatlarni bo‘lishish va (yoki) taqsimlash maqsadida, tibbiy xizmatlar sifatini yaxshilashga, shuningdek, sog‘liqni saqlash sohasida ijtimoiy va infratuzilmaviy muammolarni hal etishga qaratilgan davlat sherigi va xususiy sherik o‘rtasida muayyan muddatga huquqiy rasmiylashtirilgan o‘zaro manfaatli hamkorlik;

imtiyozli toifadagi shaxslar — I va II guruh nogironligi bo‘lgan shaxslar, bolalikdan nogironligi bo‘lgan shaxslar, 1941 — 1945-yillardagi urush oqibatida nogiron bo‘lgan shaxslar va uning qatnashchilari, shuningdek, ularga tenglashtirilgan shaxslar, Chernobil AES falokati oqibatlarini tugatishda ishtirok etgan nogironligi bo‘lgan shaxslar, 1941 — 1945-yillardagi urush davridagi mehnat fronti qatnashchilari, baynalmilalchi-jangchilar, chin yetimlar, yolg‘iz pensionerlar va vakolatli organlarda ro‘yxatda turuvchi kam ta’minlangan oilalar, Sog‘liqni saqlash vazirligi tomonidan tasdiqlangan ro‘yxatga asosan patologiyasi mavjud bo‘lgan 18 yoshga to‘lmagan bolalar hamda ijtimoiy ahamiyatga molik kasalliklarga chalingan shaxslar;

jamoat infratuzilmasi — ko‘char va ko‘chmas mulk, intellektual faoliyatning muhofaza qilinadigan natijalari, intellektual huquqlar yoki ushbu obyektlarning jamlanmasi;

davlat-xususiy sheriklik to‘g‘risidagi bitim obyekti — sog‘liqni saqlash sohasida davlat-xususiy sheriklik loyihasini amalga oshirish doirasida jamoat infratuzilmasi, loyihalashtirish, qurish, rekonstruksiya qilish, tashkil etish, jihozlash, modernizatsiya qilish, moliyalashtirish, foydalanish va xizmat ko‘rsatish hamda sog‘liqni saqlash sohasida davlat-xususiy sheriklik loyihasini amalga oshirish davomida taqdim etiladigan tovarlar, bajariladigan ishlar, ko‘rsatiladigan xizmatlar, shuningdek, tatbiq etiladigan innovatsiyalar;

davlat-xususiy sheriklik to‘g‘risidagi bitim bo‘yicha to‘lovlar — davlat-xususiy sheriklik to‘g‘risidagi bitimiga muvofiq davlat sherigi xususiy sherikka to‘laydigan va (yoki) xususiy sherik davlat sherigiga to‘laydigan to‘lovlar;

g‘olib — boshqa talabgorlarning tender takliflariga nisbatan eng yaxshi shartlarni taklif etgan va tender komissiyasi tomonidan tender g‘olibi deb topilgan talabgor;

aralashish huquqi — davlat-xususiy sheriklik to‘g‘risidagi bitim va (yoki) aralashish huquqi to‘g‘risidagi shartnomada belgilangan muayyan holatlar yuzaga kelganda, davlat sherigi va kreditorning xususiy sherik huquqini olish yoki qabul qilish, xususiy sherik yoki xususiy sherik rahbariyatini o‘zgartirish huquqi;

talabgor — davlat-xususiy sheriklik loyihasini amalga oshirish bo‘yicha qiziqish bildirgan va (yoki) tenderda ishtirok etish uchun ariza (tender arizasi, tender taklifi) taqdim etgan xususiy tadbirkor yoki yuridik shaxs, shu jumladan chet ellik yoki shaxslar guruhi, shu jumladan chet ellik shaxslar guruhi;

zaxiradagi g‘olib — tender komissiyasining qaroriga asosan tender g‘olibining tender taklifidan so‘ng eng yaxshi tender taklifini bergan deb e’tirof etilgan talabgor;

davlat-xususiy sheriklik loyihasi — sog‘liqni saqlash sohasida davlat va ijtimoiy ahamiyatga ega masalalarni yechish maqsadida, investitsiyalar kiritilishini, tovarlar taqdim etilishini, ishlar bajarilishini va xizmatlar ko‘rsatilishini nazarda tutuvchi, davlat sherigi va xususiy sherik tomonidan amalga oshirilishi rejalashtirilgan yoki amalga oshirilayotgan loyiha;

davlat-xususiy sheriklik to‘g‘risidagi bitim — davlat sherigi va xususiy sherik o‘rtasida tuzilgan, tomonlarning huquqlari, majburiyatlari va javobgarligini, xavf-xatar taqsimlanishini, shuningdek, davlat-xususiy sheriklik loyihasini amalga oshirishning boshqa shartlarini belgilovchi yozma shartnoma;

aralashish huquqi to‘g‘risidagi bitim — ma’lum hollarda va shartlarda davlat sherigi, xususiy sherik va (yoki) kreditor (kreditorlar) aralashish huquqini amalga oshirishi mumkinligini belgilovchi davlat sherigi, xususiy sherik va kreditor (kreditorlar) o‘rtasida tuzilgan bitim;

davlat-xususiy sheriklik to‘g‘risidagi bitim tomonlari (keyingi o‘rinlarda — tomonlar) — davlat sherigi va xususiy sherik;

tender komissiyasi — sog‘liqni saqlash sohasida davlat-xususiy sheriklik to‘g‘risidagi shartnomani tuzish huquqi uchun tender o‘tkazish maqsadida tashkil qilingan komissiya;

xususiy sherik — davlat sherigi davlat-xususiy sheriklik to‘g‘risidagi bitimni imzolaydigan shaxs yoki shaxslar guruhi, shu jumladan chet ellik hamda g‘olib tomonidan tashkil etilgan maxsus loyiha kompaniyasi.

3. Sog‘liqni saqlash sohasida davlat-xususiy sheriklik quyidagi prinsiplarga asoslanadi:

jamoat manfaatlarining ustuvorligi;

qonuniylik;

davlat-xususiy sheriklik haqidagi ma’lumotlarning ochiqligi va oshkoraligi, davlat siri va qonun bilan muhofaza qilinadigan boshqa sirlarni tashkil etadigan ma’lumotlar bundan mustasno;

kamsitmaslik, davlat-xususiy sheriklik to‘g‘risidagi bitim tomonlarining teng huquqliligi;

davlat-xususiy sheriklik to‘g‘risidagi bitim bo‘yicha majburiyatlarning tomonlar tomonidan vijdonan bajarilishi;

xavf-xatar va majburiyatlarning davlat-xususiy sheriklik to‘g‘risidagi bitim tomonlari o‘rtasida adolatli taqsimlanishi;

davlat-xususiy sheriklik tomonlari o‘zaro munosabatlarining tortishuv va shartnomaga asoslanishi.

4. Sog‘liqni saqlash sohasida davlat-xususiy sheriklik loyihalari davlat va xususiy sherik o‘rtasida shartnoma asosida quyidagi shakllardan birini yoki bir nechtasini tanlash orqali amalga oshiriladi:

sog‘liqni saqlash sohasida jamoat infratuzilmasini loyihalashtirish, qurish, rekonstruksiya qilish, tashkil etish, jihozlash, modernizatsiyalash, moliyalashtirish, foydalanish va unga xizmat ko‘rsatish;

sog‘liqni saqlash sohasida ishlarni amalga oshirish, xizmatlar ko‘rsatish va tovarlar bilan ta’minlash.

5. Davlat-xususiy sheriklik shartlaridagi tibbiy faoliyat xususiy sherik tomonidan qonun hujjatlarida belgilangan tartibda berilgan litsenziya asosida amalga oshiriladi.

6. Xususiy sherikni tanlab olish tender asosida yoki to‘g‘ridan-to‘g‘ri muzokaralar o‘tkazish orqali amalga oshiriladi, O‘zbekiston Respublikasi Prezidentining va O‘zbekiston Respublikasi Vazirlar Mahkamasining qarorlarida nazarda tutilgan hollar bundan mustasno.

7. Tender o‘tkazish uchun davlat sherigi tomonidan tanlov komissiyasi tuziladi, bunda tanlov komissiyasi tarkibiga O‘zbekiston Respublikasi Sog‘liqni saqlash vazirligi, Moliya vazirligi, Iqtisodiyot va sanoat vazirligi, Investitsiyalar va tashqi savdo vazirligi, Davlat aktivlarini boshqarish agentligi, Moliya vazirligi huzuridagi Davlat-xususiy sheriklikni rivojlantirish agentligi, shuningdek, Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklarining vakillari kiradi.

8. Tender komissiyasi a’zolari soni toq bo‘lishi va kamida yetti kishidan iborat bo‘lishi kerak.

O‘zbekiston Respublikasi Moliya vazirligi huzuridagi Davlat-xususiy sheriklikni rivojlantirish agentligining vakili tender komissiyasi tarkibida maslahat ovozi bilan qatnashadi.

9. Tender komissiyasi, agar majlisda tender komissiya a’zolari umumiy sonining kamida yetmish besh foizi qatnashsa, qaror qabul qilish huquqiga ega bo‘ladi, bunda tender komissiyasining har bir a’zosi faqat bitta ovozga ega bo‘ladi.

Tender komissiyasining qarorlari tender komissiyasining ovoz bergan a’zolari umumiy sonining oddiy ko‘pchiligi tomonidan qabul qilinadi. Ovozlar teng bo‘lib qolgan taqdirda, tender komissiyasi raisining ovozi hal qiluvchi ovoz hisoblanadi. Tender komissiyasining qarorlari bayonnomalar bilan rasmiylashtiriladi va uni tender komissiyasining barcha a’zolari imzolaydilar.

10. O‘zbekiston Respublikasi sog‘liqni saqlash vaziri tender komissiyasining raisi hisoblanadi.

11. Tender komissiyasini faoliyatini tashkil qilish, uning tarkibi, tender komissiyasi a’zolariga qo‘yiladigan talablar tender komissiyasining reglamentiga asosan belgilanadi.

Tender komissiyasining reglamenti O‘zbekiston Respublikasi Sog‘liqni saqlash vazirligi tomonidan tasdiqlanadi.

12. Sog‘liqni saqlash sohasida davlat-xususiy sheriklik loyihasi davlat sherigi va (yoki) xususiy tashabbuskor tashabbusi asosida amalga oshirilishi mumkin.

13. Sog‘liqni saqlash sohasida davlat-xususiy sheriklik loyihasini tayyorlash uchun davlat sherigi va (yoki) xususiy tashabbuskor tomonidan davlat-xususiy sheriklik loyihasi konsepsiyasi ishlab chiqiladi.

14. Davlat-xususiy sheriklik loyihasi konsepsiyasida quyidagi ma’lumotlar ko‘rsatilgan bo‘lishi lozim:

loyihaning nomi;

mazkur Nizomning 4-bandiga muvofiq loyihani amalga oshirish shakli;

loyihaning yakuniy natijalarini e’tiborga olgan holda asoslanishi;

loyihaning amalga oshiriladigan manzili;

loyihani amalga oshirish uchun zarur bo‘lgan, loyiha qamrab oladigan tibbiy muassasalar, shuningdek yer uchastkalari, bino va inshootlar yoki ularning qismlari, davlat tibbiyot muassasalari binolari (xonalari) to‘g‘risidagi ma’lumotlar;

loyihani amalga oshirishning taxminiy reja-jadvali va muddatlari;

jamoat infratuzilmasining texnik-iqtisodiy ko‘rsatkichlari;

rejalashtirilayotgan investitsiyalar hajmi;

loyihaning daromad manbalari;

loyihani amalga oshirishning asosiy xatarlari taqsimlanishi.

15. Davlat-xususiy sheriklik loyihasi konsepsiyasini tasdiqlash quyidagi tartibda amalga oshiriladi:

loyiha qiymati ekvivalentda 1 million AQSH dollarigacha bo‘lganda — davlat sherigi tomonidan;

loyiha qiymati ekvivalentda 1 million AQSH dollaridan yuqori va 10 million AQSH dollarigacha bo‘lganda — Moliya vazirligi huzuridagi Davlat-xususiy sheriklikni rivojlantirish agentligining roziligi asosida davlat sherigi tomonidan;

loyiha qiymati ekvivalentda 10 million AQSH dollaridan yuqori bo‘lganda — O‘zbekiston Respublikasi Vazirlar Mahkamasi tomonidan.

16. Xususiy tashabbus davlat sherigiga davlat-xususiy sheriklik loyihasi konsepsiyasi bilan birga taqdim etiladi.

Xususiy tashabbusni olgan davlat sherigi, o‘ttiz kunda xususiy tashabbusni ma’qullash yoki rad etish to‘g‘risida qaror qabul qiladi.

Xususiy tashabbusni amalga oshirishni rad etish uchun quyidagilar asos bo‘ladi:

xususiy tashabbuskorning mazkur Nizom bilan belgilangan talabgorlarga nisbatan qo‘yilgan talablarga mos kelmasligi;

davlat-xususiy sheriklik to‘g‘risidagi bitim obyektiga davlat sherigining mulkka egalik, xo‘jalik yuritish yoki operativ boshqaruv huquqi bo‘lmasligi;

davlat-xususiy sheriklik to‘g‘risidagi bitim obyektini loyihalash, qurish, rekonstruksiya qilish, yaratish, jihozlash, modernizatsiyalash, moliyalashtirish, foydalanish va xizmat ko‘rsatish zaruriyati bo‘lmasligi.

17. Xususiy tashabbus ma’qullangan taqdirda, davlat sherigi davlat-xususiy sheriklik loyihasi konsepsiyasini besh kunda o‘zining rasmiy veb-saytida va boshqa maxsus veb-saytlarda davlat-xususiy sheriklik loyihasi konsepsiyasini va boshqa talabgorlarga davlat-xususiy sheriklik loyihasini amalga oshirishga o‘z qiziqishlarini ma’lum qilishlari to‘g‘risida taklifini e’lon qiladi.

Agar:

qirq besh kun davomida biror-bir talabgor sog‘liqni saqlash sohasida davlat-xususiy sheriklik loyihasini amalga oshirishga qiziqishini ma’lum qilmagan taqdirda, davlat sherigi tender o‘tkazmasdan to‘g‘ridan-to‘g‘ri va yakuniy muzokaralar o‘tkazadi, O‘zbekiston Respublikasi Moliya vazirligi huzuridagi Davlat-xususiy sheriklikni rivojlantirish agentligi bilan davlat-xususiy sheriklik to‘g‘risidagi bitim loyihasini kelishadi va xususiy tashabbuskor bilan davlat-xususiy sheriklik to‘g‘risidagi bitimni tuzadi;

talabgor sog‘liqni saqlash sohasida davlat-xususiy sheriklik loyihasini amalga oshirishga o‘z qiziqishini bildirgan taqdirda, davlat sherigi tender o‘tkazishga kirishadi.

Tender hujjatlarida xususiy tashabbuskorga g‘olib yoki zaxiradagi g‘olib hisobidan sog‘liqni saqlash sohasida davlat-xususiy sheriklik loyihasi bo‘yicha hujjatlarni tayyorlash xarajatlarini qoplash huquqi berilishi mumkin.

Xususiy tashabbuskorning sog‘liqni saqlash sohasida davlat-xususiy sheriklik loyihasi bo‘yicha hujjatlarni tayyorlash xarajatlarini qoplash, tender hujjatlarida ko‘rsatilgan loyiha umumiy qiymatining bir foizidan oshmagan holda, asoslangan va belgilangan tartibda hujjatlashtirilgan xarajatlari asosida amalga oshiriladi.

18. Davlat sherigi tashabbusi asosida davlat-xususiy sheriklik loyihasi konsepsiyasi tasdiqlangan va belgilangan tartibda davlat-xususiy sheriklik loyihalari reyestriga kiritilgandan so‘ng, davlat sherigi o‘ttiz kun davomida sog‘liqni saqlash sohasida davlat-xususiy sheriklik loyihasini tayyorlash to‘g‘risida qaror qabul qiladi.

Sog‘liqni saqlash sohasida davlat-xususiy sheriklik loyihasini tayyorlash to‘g‘risidagi qarorda quyidagi ma’lumotlar bo‘lishi shart:

loyihani davlat-xususiy sheriklik shartlarida amalga oshirish asosi;

sog‘liqni saqlash sohasida davlat-xususiy sheriklik loyihasining moliyaviy-iqtisodiy samaradorligi ko‘rsatkichlari;

davlat-xususiy sheriklik to‘g‘risidagi bitimga muvofiq xususiy sherik tomonidan loyihalashtirilayotgan, yaratilayotgan, rekonstruksiya qilinayotgan, moliyalashtirilayotgan, foydalanilayotgan yoki xizmat ko‘rsatilayotgan jamoat infratuzilmasining tarkibi va parametrlari;

Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari bilan kelishilgan (xususiy sherikka yer uchastkasi ajratilishi ko‘zda tutilgan davlat-xususiy sheriklik loyihasi bo‘yicha) vakolatli organlar va tashkilotlarning yer uchastkasi tanlash bo‘yicha hujjatlari va xulosalari, yer uchastkasining maydoni va joylashgan joyi;

xususiy sherik tomonidan kiritilishi kutilayotgan investitsiyalar hajmi va O‘zbekiston Respublikasi budjet tizimi budjetidan taxminiy moliyalashtirish hajmi;

davlat va xususiy sheriklar majburiyatlari;

xususiy sherikka taqdim etiladigan davlat yordami;

yakuniy muzokaralar o‘tkazish muddatlari;

davlat-xususiy sheriklik to‘g‘risida bitim obyektidan foydalangan holda taqdim etiladigan xizmatlardan yakuniy iste’molchilarning foydalanish shartlari.

19. Sog‘liqni saqlash sohasida davlat-xususiy sheriklik loyihalari to‘g‘risida ma’lumot, shu jumladan konsepsiyalar, xususiy sheriklarni tanlash mezonlari to‘g‘risida ma’lumot, davlat-xususiy sheriklik to‘g‘risidagi bitimning asosiy qoidalari, sog‘liqni saqlash sohasida davlat-xususiy sheriklik loyihalarini tayyorlash va amalga oshirish jarayonlari to‘g‘risida ma’lumotlar davlat sherigi va O‘zbekiston Respublikasi Moliya vazirligi huzuridagi Davlat-xususiy sheriklikni rivojlantirish agentligining veb-saytlarida e’lon qilinishi shart.

20. Sog‘liqni saqlash sohasida davlat-xususiy sheriklik loyihalarini amalga oshirish uchun ochiq va yopiq tender o‘tkazilishi mumkin. Yopiq tender, davlat-xususiy sheriklik to‘g‘risidagi bitim, davlat sirlari hisoblangan, shuningdek, davlatning mudofaa qobiliyati va xavfsizligini ta’minlashda strategik ahamiyatga ega bo‘lgan obyektga nisbatan tuziladigan holatlarda o‘tkaziladi.

Yopiq tender o‘tkaziladigan holda, tender e’lon berilmasdan o‘tkaziladi, tender qatnashchilariga esa davlat sherigi tomonidan yozma xabarnoma yuboriladi. Davlat sherigi yozma xabarnoma yuborilmagan boshqa shaxslardan takliflarni rad etadi.

Yopiq tender o‘tkazish tartibi O‘zbekiston Respublikasi Vazirlar Mahkamasi tomonidan belgilanadi.

21. Davlat sherigi davlat-xususiy sheriklik to‘g‘risidagi bitimni tuzish huquqi uchun tenderni o‘tkazish reglamentini belgilovchi tender hujjatlarini tayyorlaydi, O‘zbekiston Respublikasi Moliya vazirligi huzuridagi Davlat-xususiy sheriklikni rivojlantirish agentligi bilan kelishadi va tasdiqlaydi.

22. Tender hujjatlarida quyidagilar aks ettirilishi lozim:

talabgorlarning malaka talablariga muvofiqligini tasdiqlovchi hujjatlarga talablar;

davlat-xususiy sheriklik to‘g‘risidagi bitim obyektining joylashgan manzili;

Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari bilan kelishilgan (xususiy sherikka yer uchastkasi ajratilishi ko‘zda tutilgan davlat-xususiy sheriklik loyihasi bo‘yicha) vakolatli organlar va tashkilotlarning yer uchastkasi tanlash bo‘yicha hujjatlari va xulosalari, yer uchastkasining maydoni va joylashgan manzili;

davlat-xususiy sheriklik to‘g‘risidagi bitim obyektining texnik-iqtisodiy ko‘rsatkichlari;

davlat-xususiy sheriklik to‘g‘risidagi bitim obyektini loyihalashtirish, qurish, rekonstruksiya qilish, tashkil etish, jihozlash, modernizatsiyalash, moliyalashtirish, foydalanish va xizmat ko‘rsatish muddatlari;

davlat-xususiy sheriklik to‘g‘risidagi bitim loyihasi;

davlat-xususiy sheriklik to‘g‘risidagi bitim obyekti va xususiy sherik tomonidan ko‘rsatiladigan xizmatlar sifat ko‘rsatkichlari va ularga qo‘yiladigan minimal talablar;

davlat-xususiy sheriklik to‘g‘risidagi bitim ijrosini ta’minlash maqsadida, davlat sherigi tomonidan taqdim etiladigan moliyalashtirish hajmi, mulklar ro‘yxati yoki mulk huquqi;

davlat-xususiy sheriklik to‘g‘risidagi bitim tomonlarining o‘z zimmalariga oladigan xavf-xatarlari;

davlat-xususiy sheriklik loyihalari parametrlari aks etadigan valyutani va ularni taqqoslash va baholash maqsadida yagona valyutaga keltirib, hisob-kitoblarda foydalaniladigan valyuta kursini ko‘rsatish;

tender mezonlari bayoni;

tender so‘rovlari (takliflari)ni taqdim etish tiliga talab;

tender so‘rovlari (takliflari)ning mazmuni, usuli, manzili, tender so‘rovlari (takliflari)ni taqdim etish va amal qilish muddatlari;

tender so‘rovlari (takliflari) bo‘yicha ta’minotni kiritish shartlari;

tender so‘rovlari (takliflari) bo‘lgan konvertlarni ochish jarayoni, manzili, sanasi va vaqti.

23. Davlat sherigi O‘zbekiston Respublikasi Moliya vazirligi huzuridagi Davlat-xususiy sheriklikni rivojlantirish agentligi bilan kelishgan holda, tender hujjatlariga o‘zgartirish va qo‘shimchalar kiritish huquqiga ega. Davlat sherigi tender hujjatlariga o‘zgartirish va (yoki) qo‘shimchalar kiritish to‘g‘risida qaror qabul qilingan kundan boshlab, besh ish kunidan kechiktirmasdan barcha talabgorlarga tender hujjatlariga kiritilgan o‘zgartirish va (yoki) qo‘shimchalar matnini taqdim etadi. Bunda tender so‘rovlari (takliflari)ni taqdim etishning so‘nggi muddati davlat sherigi tomonidan talabgorlar tender so‘rovlari va tender takliflaridagi ana shu o‘zgartish va (yoki) qo‘shimchalarni hisobga olishlari uchun kamida o‘ttiz kunga cho‘ziladi.

24. Tender hujjatlari ular asosida xususiy sherik tanlab olinadigan tender mezonlarini, shu jumladan talablarni o‘z ichiga oladi.

Tender mezonlari turlicha talqin etilmasligi va ularda kamsituvchi qoidalar bo‘lmasligi, shuningdek davlat-xususiy sheriklik to‘g‘risidagi bitim predmeti bilan bog‘langan bo‘lishi kerak. Tenderda, dastlabki malakaviy tanlov bosqichidagi to‘g‘ridan-to‘g‘ri muzokaralarda ishtirok etish uchun, sog‘liqni saqlash sohasida davlat-xususiy sheriklik loyihalarini amalga oshirishdagi qiziqishini ma’lum qilishi uchun talabgor quyidagi mezonlarga mos kelishi shart:

huquqiy layoqatga ega bo‘lish;

to‘lov qobiliyatiga ega bo‘lish;

davlat-xususiy sheriklik to‘g‘risidagi bitim bo‘yicha majburiyatlarni bajarish uchun moliyaviy va (yoki) moddiy, texnik va (yoki) malakali mehnat resurslariga ega bo‘lish;

davlat sherigi bilan manfaatlar to‘qnashuviga olib keluvchi bevosita yoki bilvosita aloqalarda bo‘lmaslik.

25. Qayta tashkil etish, tugatish va (yoki) to‘lovga qobiliyatsizlik tartib-taomili joriy etilgan, shuningdek mulkiga taqiq qo‘yilgan talabgorlarni tenderda ishtirok etishiga yo‘l qo‘yilmaydi.

26. G‘olibni tanlab olish bosqichida foydalaniladigan mezonlar, shu jumladan:

xususiy sherik tomonidan davlat sherigiga to‘lanadigan to‘lov hajmi;

cheklangan narxlar va tariflar;

davlat sherigi, yakuniy iste’molchi tomonidan to‘lanadigan to‘lov hajmi;

davlat-xususiy sheriklik to‘g‘risidagi bitimni bajarishga jalb qilinadigan xususiy sherikning mablag‘ hajmi;

davlat tomonidan xususiy sherikka ko‘rsatiladigan yordam hajmi;

jamoat infratuzilmasini loyihalashtirish, qurish, rekonstruksiya qilish, tashkil etish, jihozlash, modernizatsiyalash, moliyalashtirish, foydalanish va xizmat ko‘rsatish muddatlari;

davlat-xususiy sheriklik to‘g‘risidagi bitimning amal qilish muddatlari;

davlat-xususiy sheriklik to‘g‘risidagi bitimning texnik va texnologik afzalliklari, funksional va innovatsion xarakteristikasi.

27. Tender bir bosqichli yoki ikki bosqichli bo‘lishi mumkin. Tenderning bosqichlari tender hujjatlarida belgilanadi.

28. Umumiy qiymati ekvivalentda 1 mln. AQSH dollarigacha bo‘lgan davlat-xususiy sheriklik loyihalari uchun bir bosqichli tender o‘tkaziladi.

Bir bosqichli tender jarayoni o‘z ichiga quyidagilarni oladi:

tender o‘tkazish to‘g‘risida ommaviy axborot vositalarida hamda davlat sherigi va Moliya vazirligi huzuridagi Davlat-xususiy sheriklikni rivojlantirish agentligining rasmiy veb-saytlarida e’lon qilish;

davlat sherigi tomonidan tender takliflari so‘rovini yuborish;

talabgorlar tomonidan tender takliflarini taqdim etish;

talabgorlarning tender takliflari bo‘yicha konvertlarini ochish;

tender takliflarini baholash;

g‘olibni aniqlash;

g‘olib bilan yakuniy muzokaralar o‘tkazish;

xususiy sherik bilan davlat-xususiy sheriklik to‘g‘risidagi bitimni imzolash.

29. Ikki bosqichli tender jarayoni o‘z ichiga quyidagilarni oladi:

1) dastlabki saralash:

tender o‘tkazish to‘g‘risida ommaviy axborot vositalarida hamda davlat sherigi va Moliya vazirligi huzuridagi Davlat-xususiy sheriklikni rivojlantirish agentligining rasmiy veb-saytlarida e’lon qilish;

davlat sherigi tomonidan dastlabki saralashda qatnashish uchun taklifnoma yuborish;

tender arizalarini yig‘ish va baholash, shu jumladan, talabgorning malakasini tasdiqlovchi hujjatlarni yig‘ish;

dastlabki saralashdan o‘tgan talabgorlar ro‘yxatini shakllantirish.

2) g‘olibni tanlash:

davlat sherigi tomonidan tender takliflari so‘rovini yuborish;

talabgorlar tomonidan tender takliflarini taqdim etish;

talabgorlarning tender takliflari bo‘yicha konvertlarini ochish;

tender takliflarini baholash;

g‘olibni aniqlash;

g‘olib bilan yakuniy muzokaralar o‘tkazish;

xususiy sherik bilan davlat-xususiy sheriklik to‘g‘risidagi bitimni imzolash.

30. Dastlabki saralashda qatnashish uchun arizalarni yig‘ish muddati e’lon chop etilgan sanadan so‘ng o‘ttiz kundan kam bo‘lmasligi kerak.

31. Dastlabki saralashda talabgorlar soni ikkitadan kam bo‘lmasligi lozim.

32. G‘olibni aniqlash bosqichida davlat sherigi dastlabki saralashdan o‘tgan talabgorlarga tender takliflari va davlat-sheriklik to‘g‘risidagi bitim loyihasini taqdim etish bo‘yicha so‘rovnoma yuboradi.

Tender takliflarini taqdim etishning so‘nggi muddati so‘rovnomada ko‘rsatiladi hamda u dastlabki saralashdan o‘tgan talabgorlarga tender takliflari va davlat-xususiy sheriklik to‘g‘risidagi bitim loyihasini taqdim etish bo‘yicha so‘rovnoma yuborilgan sanadan boshlab kamida qirq besh kun bo‘lishi lozim.

33. Bitta tender taklifi mavjud bo‘lganda va tender komissiyasi tender taklifini tender takliflarini taqdim etish to‘g‘risidagi so‘rovnomaga mos deb topganda tender o‘tkazilgan deb topiladi.

34. Talabgor tender takliflari so‘rovida belgilangan shartlarda tender taklifining kafolat ta’minotini taqdim etishi lozim.

35. Talabgorlar tomonidan taqdim etilgan barcha tender takliflari so‘rovnoma talablariga mos kelmaganda tender komissiyasi tender o‘tkazilmagan deb topadi va qaytadan tender e’lon qilishga haqli.

36. Tender komissiyasi g‘olib to‘g‘risidagi ma’lumotni davlat sherigi va Moliya vazirligi huzuridagi Davlat-xususiy sheriklikni rivojlantirish agentligining rasmiy veb-saytlarida e’lon qiladi.

37. Talabgorlarning tenderda qatnashish uchun qilgan xarajatlari, tender natijalaridan qat’i nazar qoplanmaydi, mazkur Nizomning 17-bandida ko‘rsatilgan hollar bundan mustasno.

38. Agar tender komissiyasi g‘olib tomonidan taqdim etilgan ma’lumotlarda nomuvofiqlikni aniqlasa, tender komissiyasi g‘olibni tenderdan chetlatish to‘g‘risida qaror qabul qiladi. G‘olib tenderdan chetlatilgan taqdirda, tender komissiyasi tender g‘olibi sifatida zaxiradagi g‘olibni tayinlaydi.

39. Hech bir talabgor bittadan ortiq tender taklifini berish huquqiga ega emas. Talabgor tender takliflarini taqdim etishning so‘nggi muddatiga qadar xohlagan vaqtda tender taklifini o‘zgartirishi yoki qaytarib olishi mumkin.

40. Davlat sherigi g‘olib bilan tender hujjatlarida bayon qilingan tartib qoidalarda, shartlarda va muddatlarda davlat-xususiy sheriklik to‘g‘risidagi bitimni tuzadi.

41. Agar tanlov hujjatlarida ko‘rsatilgan muddat tugagandan so‘ng, g‘olib davlat-xususiy sheriklik to‘g‘risida bitimni imzolamasa, tender komissiyasi uni tenderdan chetlatish to‘g‘risida qaror qabul qiladi. Zaxiradagi g‘olibni g‘olib deb e’lon qiladi va g‘olibni tenderdan chetlatish to‘g‘risidagi qaror qabul qilingan kundan boshlab 10 kun ichida uni tenderdan chetlatilgan g‘olibga qo‘yilgan shartlar asosida davlat-xususiy sheriklik to‘g‘risida bitim tuzishga taklif qiladi. Agar tender komissiyasi davlat-xususiy sheriklik to‘g‘risida bitim tuzish taklif yuborilgan sanadan boshlab 30 kun ichida zaxiradagi g‘olibdan ijobiy javob olmasa, tenderni o‘tkazilmagan deb tan oladi va takroriy tender e’lon qiladi.

42. Tenderdan chetlatilgan g‘olib tenderda qatnashganligi uchun xarajatlari qoplab berilishini talab qilishga haqli emas.

43. Davlat sherigi xususiy tashabbuskor bilan mazkur nizomning 17-bandida ko‘rsatilgan holatda davlat-xususiy sheriklik to‘g‘risidagi bitim loyihasi O‘zbekiston Respublikasi Moliya vazirligi huzuridagi Davlat-xususiy sheriklikni rivojlantirish agentligi bilan kelishilgan sanadan boshlab oltmish kun ichida tender o‘tkazmasdan davlat-xususiy sheriklik to‘g‘risida bitim tuzadi.

44. Tomonlar tender o‘tkazmasdan to‘g‘ridan-to‘g‘ri muzokaralar o‘tkazish yo‘li bilan davlat-xususiy sheriklik to‘g‘risida bitimni quyidagi hollarda tuzadi:

davlatning mudofaa va xavfsizligini ta’minlash maqsadlarida;

davlat-xususiy sheriklik loyihasini amalga oshirishning zaruriy sharti bo‘lgan intellektual faoliyat natijalarining mutloq huquqlari hamda yer uchastkalari, boshqa ko‘chmas mulk va mol-mulklarga bo‘lgan mutloq huquqlar ma’lum bir shaxsga tegishli bo‘lgan taqdirda;

O‘zbekiston Respublikasi Prezidenti va O‘zbekiston Respublikasi Vazirlar Mahkamasining qarorlarida nazarda tutilgan boshqa hollarda.

45. Davlat-xususiy sheriklik to‘g‘risidagi bitim quyidagi asosiy shartlarni o‘z ichiga olishi lozim:

davlat-xususiy sheriklik to‘g‘risidagi bitimning tomonlari;

davlat-xususiy sheriklik to‘g‘risidagi bitimning predmeti;

tomonlarning majburiyatlari va javobgarligi;

xatarlarning davlat va xususiy sherik o‘rtasida taqsimlanishi;

davlat-xususiy sheriklik to‘g‘risidagi bitimga muvofiq jamoat infratuzilmasining texnik-iqtisodiy ko‘rsatkichlari, shu jumladan loyihalashtirish, qurilish, rekonstruksiya qilish, tashkil etish, jihozlash, modernizatsiya qilish, moliyalashtirish, foydalanish va xizmat ko‘rsatish uchun berilgan yoki talab etiladigan obyektlar bo‘yicha ma’lumotlar, ulardan foydalanish maqsadi va muddatlari;

davlat-xususiy sheriklik loyihasi bilan bog‘liq bo‘lgan ishlar (xizmatlar ko‘rsatish) tartibi va muddatlari;

tomonlarning tegishli infratuzilma va davlat-xususiy sheriklik loyihasi bo‘yicha huquqlari, shuningdek, ularni o‘tkazish tartibi;

davlat-xususiy sheriklik loyihasini amalga oshirish uchun zarur bo‘lgan yer uchastkalarini berish tartibi, yer uchastkalariga taalluqli boshqa shartlar;

tibbiy faoliyatni litsenziyalash tartibi;

xususiy sherik tomonidan taqdim etiladigan tovarlar, ishlar, xizmatlar uchun tariflar, narxlar belgilash va ularni o‘zgartirish shartlari;

tomonlarning o‘z majburiyatlarini bajarish usullari, miqdori va muddatlari;

davlat-xususiy sheriklik to‘g‘risidagi bitimning muddatlari va uni belgilash tartibi;

davlat-xususiy sheriklik to‘g‘risidagi bitim bo‘yicha to‘lov shakllari, miqdorlari, muddatlari va shartlari, shu jumladan davlat-xususiy sheriklik loyihasini amalga oshirish munosabati bilan daromadlarni taqsimlash tartibi;

davlat-xususiy sheriklik to‘g‘risidagi bitimga o‘zgartirish va qo‘shimchalar kiritish tartibi;

davlat-xususiy sheriklik to‘g‘risidagi bitimning bekor qilinishi bo‘yicha asoslar, tartibi va shartlari, muddatidan avval to‘xtatilganda to‘lanadigan to‘lov miqdorlari va tartibi;

aralashish huquqi;

davlat-xususiy sheriklik loyihasining amalga oshirish jarayonini nazorat va monitoring qilish tartibi;

sug‘urta majburiyatlari;

loyiha hujjatlarini ishlab chiqish bo‘yicha majburiyatlar;

taraflarning davlat-xususiy sheriklik to‘g‘risidagi bitim bo‘yicha majburiyatlarni buzganlik uchun javobgarligi;

nizolarni hal qilish tartibi;

O‘zbekiston Respublikasida xodimlarni tanlash va ularning mehnatidan foydalanishda qo‘llaniladigan shartlar;

kafillik va kafolatlar;

xususiy sherikning ulushiga egalik huquqi hamda xususiy sherik va uning affillangan shaxslari mulkiga nisbatan boshqa mulkiy huquqlar bo‘yicha talablar;

maxfiylik;

atamalar va ularning talqini;

qonun hujjatlarida nazarda tutilgan boshqa shartlar.

46. Davlat-xususiy sheriklik to‘g‘risidagi bitim, agar boshqa tartib ko‘zda tutilmagan bo‘lsa, imzolangan vaqtdan boshlab kuchga kiradi.

47. Agar, qonun hujjatlarida yoki davlat-xususiy sheriklik to‘g‘risidagi bitimda boshqa tartib ko‘zda tutilmagan bo‘lsa, davlat-xususiy sheriklik to‘g‘risidagi bitim taraflarning kelishuviga ko‘ra o‘zgartirilishi yoki bekor qilinishi mumkin.

48. Agar quyidagi holatlardan biri sodir bo‘lsa, davlat-xususiy sheriklik to‘g‘risidagi bitim bir tarafning talabiga ko‘ra sudning qarori bilan o‘zgartirilishi yoki bekor qilinishi mumkin:

tomonlardan birining davlat-xususiy sheriklik to‘g‘risidagi bitimni sezilarli darajada buzishi va ushbu holatning davlat-xususiy sheriklik to‘g‘risidagi bitimda ko‘rsatilgan shartlarda va muddatlarda bartaraf etilmasligi;

davlat-xususiy sheriklik to‘g‘risidagi bitim tuzilayotgan paytda tomonlar uchun asos bo‘lgan holatlar sezilarli darajada o‘zgargan taqdirda;

qonunchilikda va davlat-xususiy sheriklik to‘g‘risidagi bitimda ko‘zda tutilgan boshqa holatlarda.

49. Davlat-xususiy sheriklik to‘g‘risidagi bitimda bir tomonlama sudga murojaat qilmasdan bitimni bekor qilish holatlari ko‘zda tutilishi mumkin.

50. Davlat-xususiy sheriklik to‘g‘risidagi bitim uning amal qilish muddati tugaganda to‘xtatiladi. Bitimni muddatidan avval bekor qilishga davlat-xususiy sheriklik to‘g‘risidagi bitimda ko‘zda tutilgan hollarda ruxsat etiladi.

Davlat-xususiy sheriklik to‘g‘risidagi bitimda ko‘zda tutilgan hollarda va tartibda bitim amal qilish muddatidan ilgari bekor qilingan taqdirda tomonlar, kreditor(lar) ikkinchi tomondan kompensatsiya puli olishga haqli.

51. Xususiy sherik quyidagi huquqlarga ega:

sog‘liqni saqlash sohasida davlat-xususiy sheriklik loyihasini amalga oshirish uchun kerakli ma’lumotlarni davlat sherigidan olish;

davlat-xususiy sheriklik to‘g‘risidagi bitim shartlarini o‘zgartirish to‘g‘risida takliflar kiritish;

sog‘liqni saqlash sohasida davlat-xususiy sheriklik loyihasi bo‘yicha davlat sherigi aybi bilan ko‘rilgan zararni qoplab berishni talab qilish;

bitim shartlari davlat sherigi tomonidan buzilgan taqdirda bitimni sud tartibida bekor qilishni talab qilish.

Xususiy sherik O‘zbekiston Respublikasi qonun hujjatlariga va davlat-xususiy sheriklik to‘g‘risidagi bitim shartlariga muvofiq boshqa huquqlarga ham ega bo‘lishi mumkin.

52. Xususiy sherik quyidagi majburiyatlarni bajaradi:

davlat-xususiy sheriklik to‘g‘risidagi bitim talablariga va O‘zbekiston Respublikasi qonunchiligi talablariga qat’iy rioya qilish;

qonun hujjatlarida va davlat-xususiy sheriklik to‘g‘risidagi bitimda nazarda tutilgan javobgarlikni o‘z zimmasiga olish.

Xususiy sherik unga davlat-xususiy sheriklik shartlarida berilgan yer uchastkasini boshqa shaxslarga o‘tkazish huquqiga ega emas.

Xususiy sherik O‘zbekiston Respublikasi qonun hujjatlariga va davlat-xususiy sheriklik to‘g‘risidagi bitimga muvofiq boshqa majburiyatlarga ham ega bo‘lishi mumkin.

53. Davlat sherigi quyidagi huquqlarga ega:

sog‘liqni saqlash sohasida davlat-xususiy sheriklik loyihalarini tayyorlash uchun tashqi maslahatchilarni jalb etish;

davlat-xususiy sheriklik to‘g‘risidagi bitim shartlari bajarilishi to‘g‘risidagi hisobotni xususiy sherikdan har chorakda olish;

davlat-xususiy sheriklik to‘g‘risidagi bitim shartlari bajarilishi monitoringini olib borish va sog‘liqni saqlash sohasida davlat-xususiy sheriklik loyihalarini amalga oshirish natijalarini baholash;

O‘zbekiston Respublikasi qonun hujjatlariga va davlat-xususiy sheriklik to‘g‘risidagi bitim shartlariga rioya etish monitoringini olib borish doirasida aniqlangan qoida buzishlar bartaraf etilishini talab qilish;

xususiy sherikning aybi bilan yuzaga kelgan davlat-xususiy sheriklik to‘g‘risidagi bitim obyekti bo‘yicha zararlar qoplanishini talab qilish;

davlat-xususiy sheriklik to‘g‘risidagi bitim shartlari xususiy sherik tomonidan buzilgan taqdirda bitimni sud tartibida bekor qilishni talab qilish.

Davlat sherigi qonun hujjatlariga va davlat-xususiy sheriklik to‘g‘risidagi bitimga muvofiq boshqa huquqlarga ham ega bo‘lishi mumkin.

54. Davlat sherigi quyidagi majburiyatlarni bajaradi:

tanlov o‘tkazish bilan bog‘liq hujjatlarni tanlov ishtirokchilariga taqdim etish;

davlat-xususiy sheriklik loyihasini amalga oshirish mo‘ljallanayotgan joy va obyekt bilan tanishish uchun tanlov ishtirokchilariga zarur shart-sharoitlarni ta’minlash;

agar davlat-xususiy sheriklik to‘g‘risidagi bitimda nazarda tutilgan bo‘lsa, faoliyatni amalga oshirish uchun mo‘ljallangan mol-mulkni unga egalik qilish va foydalanish uchun xususiy sherikka berish;

davlat-xususiy sheriklik to‘g‘risidagi bitimni amalga oshirishi uchun zarur bo‘lgan litsenziya va ruxsatnomalarni olishda xususiy sherikka ko‘maklashish;

xususiy sherikni davlat-xususiy sheriklik to‘g‘risidagi bitimda ko‘zda tutilgan o‘z investitsiyalari va daromadlarini erkin boshqarish va tasarruf etish yoki aktivlarini va amalga oshiradigan faoliyatini boshqarish va nazorat qilish huquqlarini chegaralamaslik;

xususiy sherikning xo‘jalik faoliyatiga aralashmaslik.

Davlat sherigi qonun hujjatlariga va davlat-xususiy sheriklik to‘g‘risidagi bitimga muvofiq boshqa majburiyatlarga ham ega bo‘lishi mumkin.

55. Davlat sherigi davlat-xususiy sheriklik to‘g‘risidagi bitimda ko‘rsatilgan shartlarda imtiyozli toifadagi va ijtimoiy ko‘makka muhtoj bo‘lgan shaxslarni imtiyozli to‘lov shartlari yoki bepul asosda davolanish uchun xususiy sherikka yuboradi.

56 Davlat-xususiy sheriklik to‘g‘risidagi bitimda nazarda tutilgan davlat-xususiy sheriklik to‘g‘risidagi bitim obyekti joylashgan va (yoki) faoliyatni amalga oshirish uchun zarur bo‘lgan yer uchastkasi, davlat-xususiy sheriklik to‘g‘risidagi bitimida belgilanadigan hamda bitimning amal qilish muddatidan oshmaydigan muddatlarga xususiy sherikka ijaraga taqdim etiladi.

57. Davlat-xususiy sheriklik to‘g‘risidagi bitim tuzilgan kundan boshlab bir kun muddatda davlat sherigi vakolatli organ va tashkilotlarning yer uchastkasini tanlash bo‘yicha ma’lumot va xulosalarini Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklariga yer uchastkasini davlat sherigiga doimiy foydalanish uchun ajratish to‘g‘risida qaror qabul qilish uchun yuboradi.

58. Qoraqalpog‘iston Respublikasi Vazirlar Kengashi, Toshkent shahar va viloyatlar hokimliklari 3 kun muddatda davlat sherigiga yer uchastkasini ajratish to‘g‘risida qaror qabul qiladi va qarorni Qoraqalpog‘iston Respublikasi, Toshkent shahar va viloyatlar yer resurslari va ko‘chmas mulk kadastri davlat korxonasining tegishli tuman (shahar) filialiga yuboradi hamda bu haqda davlat sherigini xabardor qiladi.

58¹. Davlat sherigi unga yer uchastkasi ajratilgan kundan boshlab bir kun ichida yer uchastkasini davlat-xususiy sheriklik bitimi doirasida xususiy sherikka ijaraga berish bo‘yicha ijara shartnomasi imzolanishini ta’minlaydi.

60. Yer uchastkalarini tanlash va taqdim etishga oid hujjatlarni tayyorlash va kelishish bilan bog‘liq xarajatlar yer uchastkasiga doimiy foydalanish huquqi qayd qilinganidan so‘ng kelishuv asosida davlat yoki xususiy sherik tomonidan qoplanadi.

61. Davlat-xususiy sheriklik to‘g‘risidagi bitimning amal qilish muddati tugashi bilan yoki bitim muddatidan oldin bekor qilinganda, xususiy sherik davlat sherigiga davlat-xususiy sheriklik to‘g‘risidagi bitim shartlariga muvofiq yer uchastkasini qaytarishi shart.

62. Davlat sherigi uzoq muddatga maqsadli foydalanish uchun davlat tibbiyot muassasalarining bino va inshootlarini yoki ularning qismlarini, xonalarini berish nazarda tutilgan davlat-xususiy sheriklik to‘g‘risidagi bitim tuzilgan kundan boshlab 1 ish kunida, uni davlat ro‘yxatidan o‘tkazish uchun Davlat aktivlarini boshqarish agentligining Qoraqalpog‘iston Respublikasi, Toshkent shahar va viloyatlar hududiy boshqarmalari qoshidagi Davlat mulkini ijaraga berish markaziga, shuningdek, obyektni balansida saqlovchiga yuboradi.

63. Davlat-xususiy sheriklik to‘g‘risida tuzilgan bitim shartlariga muvofiq, balansda saqlovchi 10 kun muddatda davlat tibbiyot muassasalarining bino va inshootlarini yoki ularning qismlarini, xonalarini xususiy sherikka taqdim etadi, xususiy sherik esa bitimning amal qilish muddati tugashi bilan yoki bitim muddatidan oldin bekor qilinganda, balansda saqlovchiga mazkur obyektlarni davlat-xususiy sheriklik to‘g‘risidagi bitim shartlariga mos holda qaytarishi shart.

64. Davlat tibbiyot muassasalarining bino va inshootlari yoki ularning qismlari, xonalari davlat-xususiy sheriklik to‘g‘risidagi bitim shartlariga muvofiq xususiy sherikka barcha tegishli jihozlari, tibbiy asbob-uskunalari va texnikalari, shuningdek, texnik hujjatlari bilan beriladi hamda qaytariladi.

65. Davlat-xususiy sheriklik to‘g‘risidagi bitimda xususiy sherik tomonidan davlat tibbiyot muassasalarini tibbiy asbob-uskuna va texnikalar bilan jihozlash nazarda tutilishi mumkin.

Xususiy sherik tomonidan xarid qilingan tibbiy asbob-uskuna va texnikalar davlat-xususiy sheriklik to‘g‘risidagi bitimda belgilangan muddatlarda davlat sherigiga foydalanish uchun taqdim etiladi.

66. Davlat tibbiyot muassasalarini jihozlash quyidagi maqsadlarga erishishni ta’minlashi lozim:

davlat tibbiyot muassasasining yuqori texnologiyali tibbiy xizmatlarni joriy etishi uchun investitsiyalarga bo‘lgan ehtiyojini kamaytirish;

yangi turdagi tibbiy xizmat turlarini yo‘lga qo‘yish;

tibbiy xizmatlar sifatini oshirish.

67. Xususiy sherik xarid qilingan tibbiy asbob-uskuna va texnikalarga texnik xizmat ko‘rsatish, ularni sarflash materiallari bilan uzluksiz ta’minlash hamda ularning lozim darajada ishlashi uchun boshqa vazifalarni bajarish bo‘yicha davlat-xususiy sheriklik to‘g‘risidagi bitimda belgilangan majburiyatlarni oladi.

68. Davlat sherigi xususiy sherikka tibbiy asbob-uskuna va texnikalardan foydalanganlik uchun to‘lovni davlat-xususiy sheriklik to‘g‘risidagi bitimda belgilangan shartlarda to‘lash majburiyatini oladi.

69. Davlat tibbiyot tashkilotlari jamoat infratuzilmasi sifatida davlat-xususiy sheriklik to‘g‘risidagi bitimda ko‘zda tutilgan muddatlarda ishonchli boshqaruvga berilishi mumkin.

Bunda, davlat tibbiyot tashkilotining mulki xususiy sherikka vaqtincha egalik qilish va foydalanishga davlat tibbiyot tashkilotining mazkur mulkka nisbatan xo‘jalik yuritish va operativ boshqaruv huquqi bekor qilingan holda beriladi.

70. Xususiy sherik davlat-xususiy sheriklik to‘g‘risidagi bitim asosida davlat tibbiyot muassasasining ishonchli boshqaruvni amalga oshirganligi uchun haq olish va (yoki) xarajatlarini undirish huquqiga ega.

71. Xususiy sherik tibbiyot xodimlarining belgilangan shtat birliklari sonini amaldagi normativlarga muvofiq miqdorda saqlashi va ishonchli boshqaruvga berilgan davlat tibbiyot tashkilotining faoliyat o‘zgartirmasligi shart.

Davlat sherigi davlat tibbiyot muassasasini, shu jumladan, tibbiy va texnik xodimlarini saqlab turish uchun har yili ajratiladigan mablag‘larni davlat-xususiy sheriklik to‘g‘risidagi bitimda belgilangan tartibda xususiy sherikka o‘tkazib berilishini ta’minlaydi.

72. Davlat tibbiyot muassasasi davlat-xususiy sheriklik to‘g‘risidagi bitim asosida ishonchli boshqaruvga berilganda, mulkka nisbatan ishonchli boshqaruv shartnomasini tuzish talab etilmaydi.

73. Davlat-xususiy sheriklik to‘g‘risidagi bitim davlat-xususiy sheriklik loyihasi doirasida loyihalashtirilgan, yaratilgan, rekonstruksiya qilingan, moliyalashtirilgan, foydalanilgan va xizmat ko‘rsatilgan jamoat infratuzilmasiga nisbatan mulk huquqini davlat sherigi yoki O‘zbekiston Respublikasi davlat aktivlarini boshqarish organiga o‘tkazish tartibini belgilaydi.

Davlat-xususiy sheriklik to‘g‘risidagi bitimda jamoat infratuzilmasiga nisbatan mulk huquqi qaysi vaqtda o‘tkazilishi ko‘rsatilgan bo‘lishi shart:

foydalanishga topshirilgandan keyin;

davlat-xususiy sheriklik to‘g‘risidagi bitimning amal qilish muddati yakunida;

davlat-xususiy sheriklik to‘g‘risidagi bitimda ko‘rsatilgan boshqa vaqtda.

74. O‘zbekiston Respublikasi Moliya vazirligi huzuridagi Davlat-xususiy sheriklikni rivojlantirish agentligi va davlat sherigi davlat-xususiy sheriklik to‘g‘risidagi bitim shartlarini bajarilishi bo‘yicha sog‘liqni saqlash sohasida davlat-xususiy sheriklik loyihalarining amalga oshirilishi ustidan monitoringni amalga oshiradi. Xususiy sherik monitoring olib borish maqsadida jamoat infratuzilmasiga kirish va tegishli hujjatlarni ko‘rish uchun imkoniyat yaratib berishga majbur.

75. Davlat sherigi har olti oyda O‘zbekiston Respublikasi Moliya vazirligi huzuridagi Davlat-xususiy sheriklikni rivojlantirish agentligiga davlat-xususiy sheriklik, shu jumladan aralashish huquqi to‘g‘risidagi bitimning barcha taraflari tomonidan imzolangan davlat-xususiy sheriklik loyihasini amalga oshirish to‘g‘risidagi hisobotni taqdim etadi.

Davlat-xususiy sheriklik loyihasini amalga oshirish to‘g‘risidagi hisobot shakli va taqdim etish tartibi Vazirlar Mahkamasi tomonidan tasdiqlanadi.

76. Davlat sherigi zarur hollarda davlat-xususiy sheriklik to‘g‘risidagi bitimga xususiy sherik bilan kelishgan holda xususiy sherik tomonidan imtiyozli narxlarda (yoki bepul) davolanishi shart bo‘lgan imtiyozli qatlam va ijtimoiy yordamga muhtoj shaxslar sonini oshirish bo‘yicha o‘zgartirishlar kiritish huquqiga ega.

77. Bitimning amal qilish davrida davlat sherigi bilan kelishmasdan turib xususiy sherikka ajratilgan tibbiyot muassasasi faoliyati ixtisosligini o‘zgartirish taqiqlanadi.

78. Davlat-xususiy sheriklik to‘g‘risidagi bitim, agar unda boshqacha tartib belgilanmagan bo‘lsa, O‘zbekiston Respublikasi qonunchiligi bilan tartibga solinadi.

O‘zbekiston Respublikasi qonunchiligida boshqacha tartib ko‘zda tutilmagan bo‘lsa, xususiy sherik sog‘liqni saqlash sohasida davlat-xususiy sheriklik loyihasini amalga oshirish bilan bog‘liq boshqa bitimlarga, shu jumladan aralashish huquqi to‘g‘risidagi bitimga nisbatan qo‘llaniladigan huquqlar tanlovida erkin hisoblanadi.

79. Davlat-xususiy sheriklik to‘g‘risidagi bitim, aralashish to‘g‘risidagi bitim yoki davlat-xususiy sheriklik bilan bog‘liq har qanday boshqa bitim yoki shartnomadan kelib chiqadigan har qanday kelishmovchiliklar tegishli bitim taraflari kelishgan nizolarni hal qilish jarayoni orqali hal etiladi.

80. Davlat-xususiy sheriklik to‘g‘risidagi bitimning taraflari qo‘llaniladigan huquqqa muvofiq nizolarni hal qilish mexanizmini, shuningdek, nizoni hal etish uchun tartib-taomil qoidalarni erkin tanlashi mumkin.

81. Ushbu nizom talablarini buzganlikda aybdor shaxslar belgilangan tartibda javobgar bo‘ladi.

2. O‘zbekiston Respublikasi Prezidentining 2017-yil 1-apreldagi “Sog‘liqni saqlash sohasida xususiy sektorni yanada rivojlantirish chora-tadbirlari to‘g‘risida”gi PQ-2863-son qarorida:

a) 8-band quyidagi tahrirda bayon etilsin:

“8. Quyidagilar 2022-yil 1-yanvargacha:

a) aholiga pullik tibbiy xizmatlar ko‘rsatadigan (stomatologiya va kosmetologiya xizmatlaridan tashqari) xususiy tibbiyot muassasalari, jumladan, xorijiy investorlar ishtirokidagi xususiy tibbiyot muassasalari tibbiy xizmatlar qismida, bo‘shaydigan mablag‘larni xususiy tibbiyot muassasalarini zamonaviy tibbiy, muhandislik-texnik uskunalar bilan jihozlash va ularga servis-texnik xizmat ko‘rsatish, tibbiyot maqsadlari uchun ehtiyot qismlar, sarflash materiallari, inventar va boshqa buyumlar xarid qilish, tibbiy xizmatlar ko‘rsatish uchun yangi binolar qurish, mavjud bino va inshootlarni rekonstruksiya qilish va kapital ta’mirlash, shuningdek, aholining ijtimoiy himoyaga muhtoj qatlamlariga bepul tibbiy xizmatlar ko‘rsatishga maqsadli yo‘naltirgan holda, barcha turdagi soliqlar va davlat maqsadli jamg‘armalariga majburiy ajratmalar to‘lashdan;

b) belgilangan tartibda shakllantiriladigan ro‘yxat bo‘yicha yuridik shaxslar tomonidan, shu jumladan lizing shartnomasi asosida olib kelinadigan yangi tibbiyot asbob-uskunalari, butlovchi buyumlar va ularning ehtiyot qismlari hamda sarflash materiallari (stomatologiya va kosmetologiya asbob-uskunalaridan tashqari) bojxona to‘lovlaridan (bojxona rasmiylashtiruvi yig‘imlari bundan mustasno) ozod etilsin.

Ushbu bandning “a” kichik bandida ko‘rsatilgan soliq imtiyozlarini qo‘llash maqsadida, hisobot davri yakunlari bo‘yicha tibbiy xizmatlar (stomatologiya va kosmetologiya xizmatlari bundan mustasno) ko‘rsatish asosiy faoliyat turi hisoblangan yuridik shaxslar xususiy tibbiyot muassasalariga kiradi. Bunda tibbiy xizmatlar ko‘rsatish asosiy faoliyat turi hisoblanganda, yuqorida ko‘rsatib o‘tilgan imtiyozlar boshqa daromadlarga ham joriy etiladi.

O‘zbekiston Respublikasi Sog‘liqni saqlash vazirligi Moliya vazirligi, O‘zbekiston xususiy amaliyot vrachlari uyushmasi bilan birgalikda bir oy muddatda yuqorida qayd etilgan soliq imtiyozlari taqdim etilishi natijasida bo‘shaydigan mablag‘lar hisobidan xususiy tibbiyot muassasalari tomonidan aholining ijtimoiy himoyaga muhtoj qatlamlariga bepul tibbiy xizmatlar ko‘rsatish tartibi to‘g‘risidagi nizomni ishlab chiqsin va tasdiqlasin”;

b) 1-ilovaning 5-bandi o‘z kuchini yo‘qotgan deb hisoblansin.

3. O‘zbekiston Respublikasi Prezidentining 2017-yil 20-iyundagi PQ-3071-son qarori bilan tasdiqlangan Respublika ixtisoslashtirilgan ilmiy-amaliy tibbiyot markazlari — tibbiy xizmatlar ko‘rsatishning tegishli ixtisoslashtirilgan yo‘nalishlari bo‘yicha respublikaning bosh tibbiyot tashkilotlari ro‘yxati quyidagi mazmundagi 14 — 16 bandlar bilan to‘ldirilsin:

“14. Respublika ilmiy-ixtisoslashtirilgan allergologiya markazi.

15. Respublika ixtisoslashtirilgan nefrologiya va buyrak transplantatsiyasi ilmiy-amaliy tibbiyot markazi.

16. Respublika ixtisoslashtirilgan nevrologiya va insult ilmiy-amaliy tibbiyot markazi”.