Oʻzbekiston Respublikasi Prezidentining “Oʻzbekiston Respublikasining 2019-yilga moʻljallangan Investitsiya dasturini amalga oshirish chora-tadbirlari toʻgʻrisida” 2018-yil 19-dekabrdagi PQ-4067-son qarori ijrosini taʼminlash, shuningdek, Andijon, Chirchiq, Buxoro, Samarqand va Toshkent (TS-8) shaharlari markazlashtirilgan issiqlik taʼminoti tizimlarining energiya samaradorligini oshirish va ularni modernizatsiya qilish hamda Xalqaro taraqqiyot assotsiatsiyasi bilan hamkorlikni kengaytirish maqsadida Vazirlar Mahkamasi qaror qiladi:

1. Quyidagilar:

a) Oʻzbekiston Respublikasi va Xalqaro taraqqiyot assotsiatsiyasi (keyingi oʻrinlarda XTA deb ataladi) oʻrtasida 2018-yil 17-mayda “Andijon, Chirchiq, Buxoro, Samarqand va Toshkent (TS-8) shaharlarida markazlashtirilgan issiqlik taʼminoti tizimini rekonstruksiya qilish va energiya samaradorligini oshirish” loyihasini (keyingi oʻrinlarda loyiha deb ataladi) amalga oshirishni moliyalashtirish toʻgʻrisida 2047 yilgacha qoplash muddati, shu jumladan besh yillik imtiyozli davr bilan qiymati 140 mln AQSh dollari boʻlgan kelishuv imzolangani;

b) loyihani amalga oshirishda ishtirok etadigan Andijon, Buxoro, Samarqand, Toshkent viloyatlari va Toshkent shahri hokimliklari, issiqlik taʼminoti tashkilotlari, Oʻzbekiston Respublikasi Uy-joy kommunal xizmat koʻrsatish vazirligi va vazirlik huzuridagi “Kommunxizmat” agentligi bilan 2018-yil 10-oktabrda XTA kreditini qayta kreditlash toʻgʻrisida kelishuv imzolangani;

v) loyihaning umumiy qiymati 220,7 mln AQSh dollarini, shu jumladan:

XTA krediti 140,0 mln AQSh dollarini (markaziy qozonxonalar, issiqlik tizimlari va tarmoqlarini rekonstruksiya va modernizatsiya qilish);

loyihani amalga oshirishda Oʻzbekiston Respublikasining hissasi 34,89 mln AQSh dollari ekvivalentini, shu jumladan soliq va bojxona imtiyozlari koʻrinishida 21,34 mln AQSh dollari ekvivalentini;

Oʻzbekiston Respublikasi Uy-joy kommunal xoʻjaligi vazirligining Oʻy-joy kommunal xoʻjaligini rivojlantirish jamgʻarmasining mablagʻlari 9,65 mln AQSh dollarini (uylarning ichki issiqlik tarmoqlarini qayta tiklash);

xususiy uy-joy mulkdorlari shirkatlarining mablagʻlari va kvartiralar egalarining oʻz mablagʻlari 36,16 mln AQSh dollarini (kvartiralarning ichki issiqlik tarmoqlarini qayta tiklash) tashkil etishi;

g) loyihani amalga oshirish davri 5 yilni (2019 — 2023-yy.) tashkil etishi maʼlumot uchun qabul qilinsin.

2. Belgilansinki:

Oʻzbekiston Respublikasi Uy-joy kommunal xizmat koʻrsatish vazirligi huzuridagi “Kommunxizmat” agentligi loyihaning oʻz vaqtida amalga oshirilishi, XTA kredit mablagʻlaridan maqsadli va samarali foydalanish uchun masʼul ijro etuvchi agentlik hisoblanadi;

loyihani amalga oshirish doirasida bajariladigan ishlar va xizmatlar muvofiqlashtirilishini taʼminlash uchun loyihani amalga oshirish davrida ijro etuvchi agentlik huzurida shtatdagi xodimlari soni 13 kishidan iborat boʻlgan va yagona ijtimoiy toʻlov inobatga olingan holda, XTA krediti hisobidan taʼminlanadigan, zimmasiga XTA talablariga muvofiq loyihaning oʻz vaqtida amalga oshirilishini taʼminlash, kredit mablagʻlaridan foydalanishni nazorat qilish hamda hisobini yuritish vazifasi yuklanadigan Loyihani amalga oshirish guruhi tashkil etiladi.

3. Quyidagilar:

“Andijon, Chirchiq, Buxoro, Samarqand va Toshkent (TS-8) shaharlarida markazlashtirilgan issiqlik taʼminoti tizimini rekonstruksiya qilish va energiya samaradorligini oshirish” loyihasi texnik-iqtisodiy asoslarining asosiy yigʻma koʻrsatkichlari 1-ilovaga* hamda Andijon, Chirchiq, Buxoro, Samarqand va Toshkent shaharlaridagi issiqlik taʼminoti tashkilotlari boʻyicha 1a — 1e-ilovalarga* muvofiq;

“Andijon, Chirchiq, Buxoro, Samarqand va Toshkent (TS-8) shaharlarida markazlashtirilgan issiqlik taʼminoti tizimini rekonstruksiya qilish va energiya samaradorligini oshirish” loyihasi boʻyicha Xalqaro taraqqiyot assotsiatsiyasining kreditini qaytarish va komissiya toʻlovlarini toʻlashning yigʻma prognoz jadvali 2-ilovaga* hamda Andijon, Chirchiq, Buxoro, Samarqand va Toshkent shaharlaridagi issiqlik taʼminoti tashkilotlari boʻyicha 2a — 2e-ilovalarga* muvofiq;

“Andijon, Chirchiq, Buxoro, Samarqand va Toshkent (TS-8) shaharlarida markazlashtirilgan issiqlik taʼminoti tizimini rekonstruksiya qilish va energiya samaradorligini oshirish” loyihasi doirasida Xalqaro taraqqiyot assotsiatsiyasining kreditini qaytarish, shuningdek, Andijon, Chirchiq, Buxoro, Samarqand va Toshkent shaharlaridagi issiqlik taʼminoti tashkilotlari boʻyicha kredit komissiyalari hamda boshqa xarajatlarni toʻlash bilan bogʻliq xarajatlarni qoplash ulushlarining taqsimoti 3-ilovaga* muvofiq tasdiqlansin.

4. Oʻzbekiston Respublikasi Uy-joy kommunal xizmat koʻrsatish vaziri M.X.Saliyev, Andijon (Abduraxmanov), Buxoro (Barnoyev), Samarqand (Turdimov), Toshkent (Ibragimov) viloyatlari va Toshkent shahar (Artikxodjayev) xokimlari zimmasiga:

loyihaning belgilangan muddatlarda samarali amalga oshirilishi, loyihani amalga oshirishga yoʻnaltiriladigan mablagʻlardan maqsadli va samarali foydalanish hamda yakuniy parametrlarga erishish;

loyiha obyektlarida loyiha doirasida xarid qilinadigan uskunalarni oʻrnatish va montaj qilish uchun zarur boʻlgan tegishli maydonchalar hamda binolarning ushbu uskunalar yetkazib berilishidan oldin tayyorlanishini taʼminlash;

Jahon bankining tartib-taomillari va Oʻzbekiston Respublikasi qonun hujjatlariga muvofiq zarur xisobot va hujjatlar oʻz vaqtida tayyorlanishi va taqdim etilishini tashkil etish uchun shaxsiy masʼuliyat yuklansin.

5. Oʻzbekiston Respublikasi Uy-joy kommunal xizmat koʻrsatish vazirligi ushbu qaror bilan tasdiqlangan texnik-iqtisodiy asoslar parametrlariga muvofiq loyiha xududlaridagi uylar ichki issiqlik taʼminoti tizimlarini qayta tiklash uchun zarur boʻlgan mablagʻlar Uy-joy kommunal xoʻjaligini rivojlantirish jamgʻarmasi hisobidan ajratilishini taʼminlasin.

6. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari — Oʻzbekiston Respublikasi Transport vaziri A.J. Ramatov, Bosh vazirning investitsiyalar va tashqi iqtisodiy aloqalar masalalari boʻyicha oʻrinbosari E.M. Ganiyev va Oʻzbekiston Respublikasi Uy-joy kommunal xizmat koʻrsatish vaziri M.X. Saliyev zimmasiga yuklansin.