Respublikada muzey ishlarini yanada rivojlantirish maqsadida Vazirlar Mahkamasi qaror qiladi:

1. Oʻzbekiston Respublikasi Fanlar akademiyasi va Oʻzbekiston Xalq demokratik partiyasi Markaziy Kengashining V.I.Lenin markaziy muzeyining Toshkent filialini va Oybek nomidagi Oʻzbekiston xalqlar tarixi muzeyini tugatib, ularning negizida 1992-yildan boshlab Oʻzbekiston Fanlar akademiyasi huzuridagi Oʻzbekiston tarixi muzeyini tashkil etish haqidagi takliflar qabul qilinsin.

2. Belgilab qoʻyilsinki, Oʻzbekiston tarixi muzeyi ilmiy-tadqiqot muassasasi hisoblanadi. Oʻzbekiston tarixi muzeyi rahbar va ilmiy xodimlar mehnatiga haq toʻlash boʻyicha 1 toifaga kiritilsin.

3. Oʻzbekiston Respublikasi Fanlar akademiyasi huzuridagi yangidan tashkil etilayotgan Oʻzbekiston tarixi muzeyi V.I.Lenin Markaziy muzeyi sobiq Toshkent filialining va Oybek nomidagi Oʻzbekiston xalqlari tarixi muzeyining binolari va mol-mulkini tekinga balansga qabul qilib olsin.

4. Oʻzbekistonning taraqqiyot istiqbolini belgilash qoʻmitasi, Oʻzbekiston Respublikasi fan va texnika davlat qoʻmitasi, Moliya vazirligi 1993-yildan boshlab va keyingi yillarda Oʻzbekiston tarixi muzeyi tomonidan olib boriladigan ilmiy-tadqiqot ishlarini mablagʻ bilan taʼminlash, sobiq Oʻzbekiston xalqlari tarixi muzeyi binosini qayta qurish hamda texnikaviy jihozlash va badiiy bezash vositalaridan foydalangan holda ekspozitsiyalar tashkil etish uchun Oʻzbekiston Respublikasi Fanlar akademiyasiga zarur moliyaviy va moddiy resurslar ajratishni nazarda tutsinlar.

6. Oʻzbekiston Respublikasi Fanlar akademiyasi rahbariyati xodimlarning ishdan boʻshashi bilan bogʻliq masalalarni amaldagi qonunchilikka muvofiq hal etsin.

7. Oʻzbekiston Respublikasi Moliya vazirligi 1992-yilda Vazirlar Mahkamasining rezerv fondidan Oʻzbekiston Respublikasi Fanlar akademiyasiga Oʻzbekiston tarixi muzeyini saqlash uchun 2593,4 ming soʻm, shu jumladan, V.I. Lenin Markaziy muzeyi sobiq Toshkent filialining qarzini qoplash uchun 349,7 ming soʻm ajratsin.