So‘nggi yillarda respublikada nogironligi bo‘lgan shaxslar va aholining ijtimoiy zaif qatlamiga tibbiy-ijtimoiy yordam ko‘rsatishni kuchaytirishga qaratilgan izchil choralar ko‘rildi.

Shu bilan birga, eshitish va nutqida muammosi bo‘lgan shaxslar uchun axborot resurslari va davlat tezkor operativ xizmatlar bilan aloqa o‘rnatish imkoniyatlarini to‘liq ta’minlash orqali mavjud sharoitlarga moslashtirish tizimini yanada takomillashtirish zaruriyati mavjud.

Eshitish va nutqida muammosi bo‘lgan shaxslarning jamiyatga to‘liq ijtimoiy integratsiyasini ta’minlash, aholining ijtimoiy zaif qatlamiga tibbiy-ijtimoiy yordam ko‘rsatish sohasiga axborot-kommunikatsiya texnologiyalarini joriy etish, shuningdek ushbu toifadagi shaxslarning huquqlari va qonuniy manfaatlarini ishonchli himoya qilish uchun shart-sharoitlar yaratish maqsadida:

1. Favqulodda vaziyatlar vazirligi, Sog‘liqni saqlash vazirligi, Innovatsion rivojlanish vazirligi va Moliya vazirligining 2019-yil 1-iyuldan O‘zbekiston Respublikasi Favqulodda vaziyatlar vazirligi tarkibida yuridik shaxs maqomiga ega bo‘lmagan, Eshitish va nutqida muammosi bo‘lgan shaxslarni ijtimoiy qo‘llab-quvvatlash dispetcherlik xizmatini tashkil etish (keyingi o‘rinlarda — Dispetcherlik xizmati) to‘g‘risidagi taklifi ma’qullansin.

2. Dispetcherlik xizmatining asosiy vazifasi etib eshitish va nutqida muammosi bo‘lgan shaxslar, shuningdek ularning vakillari tomonidan texnik vositalar (video qo‘ng‘iroqlar, matnli xabarlar, maxsus dasturiy ta’minotdan foydalangan holda qo‘ng‘iroqlar va boshqalar) orqali bo‘ladigan murojaatlarga shoshilinch operativ xizmatlarning (101, 102, 103, 104, 1050) kechayu kunduz, tezkor javob berishlarini muvofiqlashtirgan holda ta’minlash belgilansin.

3. Belgilab qo‘yilsinki:

Dispetcherlik xizmati xodimlar tarkibi O‘zbekiston Respublikasi Favqulodda vaziyatlar vazirligiga qo‘shimcha ajratiladigan dastlabki 10 shtat birligi hisobiga to‘ldiriladi (bir nafar serjantlar tarkibidagi harbiy xizmatchi va 9 nafar xizmatchi) va keyinchalik tushadigan xabarlar hamda murojaatlar hajmiga qarab ularning soni 22 nafargacha yetkaziladi;

Dispetcherlik xizmatini dastlabki texnik jihozlash bilan bog‘liq xarajatlari (server uskunalari, kompyuter texnikasi va orgtexnika, dasturiy ta’minot) O‘zbekiston Respublikasi Sog‘liqni saqlash vazirligi huzuridagi Tez tibbiy yordamni rivojlantirish jamg‘armasi mablag‘lari hisobidan qoplanadi;

Dispetcherlik xizmatini joriy ta’minlash va moliyalashtirish O‘zbekiston Respublikasi Favqulodda vaziyatlar vazirligiga davlat budjetidan har yili ajratiladigan mablag‘lar hisobidan amalga oshiriladi.

O‘zbekiston Respublikasi Favqulodda vaziyatlar vazirligiga zarur bo‘lganda Moliya vazirligi bilan kelishilgan holda, mazkur bandning ikkinchi xatboshi talablarini inobatga olib, Dispetcherlik xizmatining belgilangan shtat birligiga o‘zgartirishlar kiritish huquqi berilsin.

4. O‘zbekiston Respublikasi Sog‘liqni saqlash vazirligi:

O‘zbekiston karlar jamiyati bilan birgalikda bir oy muddatda Dispetcherlik xizmatini yuklangan vazifalarni professional darajada bajarishga qodir mutaxassislar bilan to‘ldirish maqsadida O‘zbekiston Respublikasi Favqulodda vaziyatlar vazirligiga imo-ishora tilida so‘zlashadigan mutaxassislar orasidan nomzodlarni taqdim etsin;

uch oy muddatda o‘zlarining budjetdan tashqari mablag‘lari hisobiga eshitish va nutqida muammosi bo‘lgan shaxslarning shaxsiy ma’lumotlari elektron bazasini yaratishni ta’minlasin.

5. O‘zbekiston Respublikasi Favqulodda vaziyatlar vazirligi:

O‘zbekiston Respublikasi Ichki ishlar vazirligi, Sog‘liqni saqlash vazirligi, boshqa manfaatdor vazirlik va idoralar bilan birgalikda ikki oy muddatda Dispetcherlik xizmatining reglamentini tasdiqlasin;

O‘zbekiston Respublikasi Sog‘liqni saqlash vazirligi bilan birgalikda ikki oy muddatda Dispetcherlik xizmatining faoliyati uchun kerakli bo‘lgan texnik jihozlanishini (server uskunalari, kompyuter texnikasi va orgtexnika, dasturiy ta’minot) ta’minlasin;

uch oy muddatda Dispetcherlik xizmati faoliyatining xususiyatlarini inobatga olib, to‘liq faoliyat ko‘rsatishini ta’minlash uchun joylashtirish, jihozlash va boshqa tashkiliy masalalarni hal qilish choralarini ko‘rsin;

O‘zbekiston Respublikasi Axborot texnologiyalari va kommunikatsiyalarini rivojlantirish vazirligi, Innovatsion rivojlanish vazirligi, Ichki ishlar vazirligi va boshqa manfaatdor idoralar bilan birgalikda 2019-yil 1-iyulga qadar eshitish va nutqida muammosi bo‘lgan shaxslarga shoshilinch operativ xizmatlar bilan o‘zaro hamkorlik qilish, shu jumladan mobil aloqa servislaridan foydalanish bo‘yicha bepul xizmat ko‘rsatish imkonini beruvchi axborot tizimini ishlab chiqsin va joriy etsin;

boshqa manfaatdor vazirlik va idoralar bilan birgalikda ikki oy muddatda qonun hujjatlariga ushbu qarordan kelib chiqadigan o‘zgartirish va qo‘shimchalar to‘g‘risida O‘zbekiston Respublikasi Vazirlar Mahkamasiga takliflar kiritsin.

6. O‘zbekiston Respublikasi Prezidenti Administratsiyasi huzuridagi Axborot va ommaviy kommunikatsiyalar agentligi, O‘zbekiston milliy axborot agentligi va O‘zbekiston milliy teleradiokompaniyasi ommaviy axborot vositalarida ushbu qarorning maqsad va vazifalarini yoritish bo‘yicha maqolalar hamda mavzuga oid ko‘rsatuvlarni tashkil etsin.

7. Mazkur qarorning ijrosini nazorat qilish O‘zbekiston Respublikasi Prezidentining maslahatchisi T.A. Xudaybergenov va O‘zbekiston Respublikasi Bosh vazirining o‘rinbosari A.A. Abduhakimov zimmasiga yuklansin.