Oʻzbekiston Respublikasi Prezidentining “Tovar bozorlarida savdoni yanada erkinlashtirish va raqobatni rivojlantirish chora-tadbirlari toʻgʻrisida” 2018-yil 30-oktabrdagi PF-5564-son Farmoniga muvofiq, shuningdek, pul muomalasini mustahkamlash, naqd puldagi hisob-kitoblarni erkinlashtirish va inkassatsiya xizmati faoliyatini samarali tashkil etish maqsadida Vazirlar Mahkamasi qaror qiladi:

1. Oʻzbekiston Respublikasi Hukumatining ilovaga muvofiq ayrim qarorlariga oʻzgartirishlar kiritilsin.

2. Vazirliklar va idoralar oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsinlar.

3. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari — Oʻzbekiston Respublikasi moliya vaziri J.A. Qoʻchqorov zimmasiga yuklansin.

1. Vazirlar Mahkamasining “Respublikada savdo tushumi inkassatsiya qilishini va nazorat-kassa mashinalaridan foydalanishni tubdan yaxshilash chora-tadbirlari toʻgʻrisida” 1997-yil 11-dekabrdagi 548-son qarorining (Oʻzbekiston Respublikasi QT, 1997-y., 11-12-son, 39-modda) 1-bandi quyidagi tahrirda bayon etilsin:

“1. Belgilansinki:

eng kam oylik ish haqining 20 baravaridan ortiq miqdorda kunlik oʻrtacha naqd pul tushumiga ega boʻlgan xoʻjalik yurituvchi subyektlar naqd pulni har kuni bank kassalariga inkassatsiya xizmatlari orqali yoki mustaqil ravishda topshiradilar;

koʻrsatilgan miqdordan kam naqd pul tushumiga ega boʻlgan xoʻjalik yurituvchi subyektlar naqd pulni bank kassalariga inkassatsiya xizmatlari orqali oʻzlari belgilagan davrlarda yoki mustaqil ravishda topshiradilar;

2. Vazirlar Mahkamasining “Isteʼmol tovarlari bilan ulgurji va chakana savdo qilishni tartibga solishga doir qoʻshimcha chora-tadbirlar toʻgʻrisida” 1999-yil 19-martdagi 125-son qarorining (Oʻzbekiston Respublikasi QT, 1999-y., 3-son, 14-modda) 2-bandi quyidagi tahrirda bayon etilsin:

“2. Belgilansinki:

yuridik shaxslar tomonidan oʻzlari ishlab chiqargan tovarlarni boshqa yuridik shaxslarga va yakka tartibdagi tadbirkorlarga sotish qonunchilikka muvofiq naqd pulda yoki naqd pulsiz tartibda, shuningdek, bank korporativ kartalari orqali amalga oshirilishi mumkin. Bunda, oʻzaro hisob-kitoblar bitta shartnoma doirasida respublikada belgilangan eng kam oylik ish haqining 100 baravarigacha naqd pulda nazorat-kassa mashinalaridan foydalangan holda amalga oshirilishiga ruxsat etiladi;

naqd pul tushumlari belgilangan tartibda inkassatsiya qilinadi (banklarga topshiriladi);

yuridik shaxslar — isteʼmol tovarlari ishlab chiqaruvchilar oʻzlari ishlab chiqargan tovarlarni chakana sotishni oʻz firma doʻkonlari, shu jumladan ishlab chiqarish joyida tashkil etilgan oʻz firma doʻkonlari yoki oʻzlariga tegishli boʻlgan yoxud belgilangan tartibda ijaraga olingan turgʻun savdo shoxobchalari orqali, faqat belgilangan namunalardagi nazorat-kassa mashinalaridan, toʻlovlarni plastik kartochkalar boʻyicha qabul qilish hisob-kitob terminallaridan foydalangan holda amalga oshirishlari mumkin”.

3. Vazirlar Mahkamasining “Naqd pul muomalasini mustahkamlash va tijorat banklarining masʼuliyatini oshirishga doir qoʻshimcha chora-tadbirlar toʻgʻrisida” 2001-yil 22-iyundagi 264-son qarori (Oʻzbekiston Respublikasi QT, 2001-y., 6-son, 31-modda) 5-bandining birinchi xatboshi quyidagi tahrirda bayon etilsin:

“5. Oʻzbekiston Respublikasi Markaziy banki inkassatsiya xizmati faoliyatini takomillashtirish choralarini koʻrsin”.

4. Vazirlar Mahkamasining “Pul mablagʻlarining bankdan tashqari muomalasini yanada qisqartirish chora-tadbirlari toʻgʻrisida” 2002-yil 5-avgustdagi 280-son qarorining (“Oʻzbekiston Respublikasi QT, 2002-y., 8-son, 46-modda) 8-bandidagi “tovarlarni naqd pulga ulgurji sotishga yoʻl qoʻymaslikka, nazorat-kassa mashinalari mavjudligiga, naqd pul mablagʻlari oʻz vaqtida inkassatsiya qilinishiga” soʻzlari “nazorat-kassa mashinalari mavjudligiga va naqd pul mablagʻlarini inkassatsiya qilinishiga (banklarga topshirilishiga)” soʻzlari bilan almashtirilsin.

5. Vazirlar Mahkamasining 2002-yil 26-noyabrdagi 407-son qarori bilan tasdiqlangan Ulgurji va chakana savdo faoliyatini amalga oshirish tartibi toʻgʻrisidagi Nizomda (Oʻzbekiston Respublikasi QT, 2002-y., 11-son, 71-modda):

a) 10-band quyidagi tahrirda bayon etilsin:

“10. Tovarlar tuzilgan shartnomalar asosida va oʻzaro hisob-kitoblarning naqd pulda yoki naqd pulsiz shaklida, shu jumladan plastik kartochkalardan toʻlovlarni qabul qilish boʻyicha hisob-kitob terminallaridan foydalangan holda ulgurji sotilishi mumkin. Bunda, hisob-kitoblar bitta shartnoma doirasida respublikada belgilangan eng kam oylik ish haqining yuz baravari miqdorigacha naqd pulda nazorat-kassa mashinalaridan foydalangan holda amalga oshirilishiga ruxsat etiladi”;

b) 19-bandning beshinchi xatboshisi quyidagi tahrirda bayon etilsin:

“Chakana savdo korxonalari (yakka tartibdagi tadbirkorlar)ga tovarlarni aholiga va xoʻjalik yurituvchi subyektlarga naqd pulda nazorat-kassa mashinalaridan foydalangan holda va hisob-kitoblarning naqd pulsiz shaklida, shu jumladan plastik kartochkalardan toʻlovlarni qabul qilish boʻyicha hisob-kitob terminallaridan foydalangan holda sotishga ruxsat etiladi”;

oltinchi xatboshi chiqarib tashlansin.

yettinchi xatboshi oltinchi xatboshi deb hisoblansin.

6. Vazirlar Mahkamasining 2013-yil 31-iyuldagi 213-son qarori bilan tasdiqlangan avtomototransport vositalarini doimiy va vaqtincha saqlash joylarini tashkil etish va ulardan foydalanish tartibi toʻgʻrisidagi Nizomning (Oʻzbekiston Respublikasi QT, 2013-y., 7-son, 48-modda) 18-bandidagi “inkassatsiya qilinadi” soʻzlari “qonunchilikda belgilangan tartibda inkassatsiya qilinadi (banklarga topshiriladi)” soʻzlari bilan almashtirilsin.

7. Vazirlar Mahkamasining 2017-yil 28-avgustdagi 677-son qarori (Oʻzbekiston Respublikasi QT, 2017-y., 8-son, 187-modda) bilan tasdiqlangan Oʻzbekiston Respublikasi Davlat soliq qoʻmitasi toʻgʻrisidagi Nizomda:

a) 9-band “d” kichik bandining beshinchi xatboshidagi “oʻz vaqtida va toʻliq hajmda inkassatsiya qilinishi” soʻzlari “inkassatsiya qilinishi (banklarga topshirilishi)” soʻzlari bilan almashtirilsin;

b) 10-bandning 3 va 18-kichik bandlaridagi “oʻz vaqtida va toʻla hajmda inkassatsiya qilish” soʻzlari “inkassatsiya qilish (banklarga topshirish)” soʻzlari bilan almashtirilsin.