Oʻzbekiston Respublikasi Prezidentining “Aholiga davlat xizmatlari koʻrsatishning milliy tizimini tubdan isloh qilish chora-tadbirlari toʻgʻrisida” 2017-yil 12-dekabrdagi PF-5278-son Farmoniga muvofiq hamda fuqarolik holati dalolatnomalarini yozish va notarial organlar sohasida davlat xizmatlari koʻrsatish tizimini yanada takomillashtirish maqsadida Vazirlar Mahkamasi qaror qiladi:

1. Quyidagilar:

Tugʻilganlikni qayd etish boʻyicha davlat xizmati koʻrsatishning maʼmuriy reglamenti 1-ilovaga muvofiq;

Fuqarolik holati dalolatnomalarini yozish organlari tomonidan arxiv hujjatlarini berish boʻyicha davlat xizmati koʻrsatishning maʼmuriy reglamenti 2-ilovaga muvofiq.

Idoraviy notarial arxivlar tomonidan arxiv hujjatlarini berish boʻyicha davlat xizmati koʻrsatishning maʼmuriy reglamenti 3-ilovaga muvofiq;

Adliya organlari va muassasalaridan hamda fuqarolik holati dalolatnomalarini qayd etish organlaridan chiqadigan rasmiy hujjatlarga apostil qoʻyish boʻyicha davlat xizmati koʻrsatishning maʼmuriy reglamenti 4-ilovaga muvofiq tasdiqlansin.

2. Oʻzbekiston Respublikasi Adliya vazirligi davlat xizmatlari koʻrsatish uchun zarur hujjatlar va boshqa hujjatlarning namunaviy shakllari, blankalari ishlab chiqilishini hamda tasdiqlanishini, Davlat xizmatlari markazlarining xodimlari ishtirokida ushbu qaror bilan tasdiqlangan maʼmuriy reglamentlarni amalda qoʻllashning samaradorligi va amalda qoʻllanilishi natijadorligi darajasini oshirishga yoʻnaltirilgan oʻquv seminarlari tashkil etilishi va oʻtkazilishini oʻn kun muddatda taʼminlasinlar.

3. Oʻzbekiston Respublikasi Hukumatining 5-ilovaga muvofiq ayrim qarorlariga oʻzgartirish va qoʻshimchalar kiritilsin.

4. Oʻzbekiston Respublikasi Adliya vazirligi manfaatdor vazirliklar va idoralar bilan birgalikda oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.

5. Mazkur qarorning bajarilishini nazorat qilish Oʻzbekiston Respublikasi adliya vaziri R.Q. Davletov zimmasiga yuklansin.

1. Mazkur Reglament jismoniy shaxslarga (bolaning ota-onasi yoki ulardan biri, alohida holatlarda esa qarindoshlari, qoʻshnilari yoki ota-onasi yoxud ota-onasidan biri vakolat bergan boshqa shaxslar) (keyingi oʻrinlarda ariza beruvchilar deb ataladi) tugʻilganlikni qayd etish boʻyicha davlat xizmati (keyingi oʻrinlarda davlat xizmati deb ataladi) koʻrsatish tartibini belgilaydi.

Ushbu Reglament talablari quyidagi holatlarda:

nikohda boʻlmagan ota-onadan tugʻilgan bolaning tugʻilishini ularning birgalikdagi arizasi (otalikni belgilash) asosida qayd etishda;

topib olingan (tashlab ketilgan) bolaning tugʻilishini qayd etishda;

bolaning tugʻilishini yolgʻiz onaning arizasi asosida qayd etishda;

oʻlik tugʻilgan bolaning tugʻilganligini, hayotining birinchi haftasida oʻlgan (perinatal oʻlim) bolalarning tugʻilganligini, shuningdek, egizaklardan biri oʻlik tugʻilganda yoki hayotining birinchi haftasida (perinatal oʻlim) vafot etganda tirik egizakning tugʻilganligini qayd etishda;

bolaning u yoki bu onadan tugʻilganlik faktini sudning hal qiluv qaroriga asosan qayd etishda tatbiq etilmaydi.

2. Davlat xizmati Davlat xizmatlari markazlari orqali markazlar binosida joylashgan hududiy fuqarolik holati dalolatnomalarini yozish boʻlimlari (keyingi oʻrinlarda FHDY boʻlimlari deb ataladi) tomonidan koʻrsatiladi.

3. Davlat xizmatlari markazlari va FHDY boʻlimlari oʻrtasidagi axborot almashinuvi elektron raqamli imzoni (keyingi oʻrinlarda ERI deb ataladi) majburiy tartibda qoʻllash orqali faqat idoralararo elektron oʻzaro bogʻlanish yordamida amalga oshiriladi.

4. Davlat xizmati koʻrsatish ushbu Reglamentga 1-ilovaga muvofiq sxema boʻyicha amalga oshiriladi.

5. Ariza beruvchi davlat xizmati olish uchun bola tugʻilgan joydagi yoki ota-onasidan birining doimiy yashash joyidagi Davlat xizmatlari markaziga oʻzi kelgan holda murojaat etadi.

6. Davlat xizmatlari markazi xodimi ariza beruvchi nomidan ushbu Reglamentning 2-ilovasiga muvofiq shakldagi soʻrovnomani elektron ravishda toʻldiradi.

7. Soʻrovnomaga quyidagi hujjatlar ilova qilinadi:

tugʻilganlik haqidagi tibbiy maʼlumotnoma;

ota-onalarning shaxsini tasdiqlovchi hujjatlar;

nikoh tuzilganligi haqidagi guvohnoma (maʼlumotnoma).

Bola tugʻilgan kundan boshlab bir oy muddat oʻtkazib yuborilganda — tugʻilish faktini tasdiqlovchi hujjatga qoʻshimcha ravishda qonunchilikda belgilangan tartibda boshqa hujjatlar ham taqdim etiladi.

Ota-onalardan birining shaxsini tasdiqlovchi hujjat boʻlmagan alohida holatlarda ota yoki ona haqida maʼlumotlar nikoh tuzilganligi yoki avvalgi bolalarining tugʻilganligi haqidagi guvohnomalari asosida koʻrsatiladi.

Ota-onaning shaxsini tasdiqlovchi hujjatlar boʻlmaganda bolaning tugʻilganligini qayd etish tibbiyot muassasasining yoki vasiylik va homiylik organining yozma murojaatlariga asosan amalga oshiriladi.

Bola tugʻilgunga qadar uning otasi vafot etgan vaqtdan, ota-onasi nikohi bekor qilinganligidan yoki ota-onasining nikohi sud tomonidan haqiqiy emas deb topilgandan keyin 300 kundan koʻp vaqt oʻtmagan boʻlsa ariza beruvchi tomonidan nikohdan ajralganlik haqidagi guvohnoma, sudning nikohdan ajratish haqidagi qaroridan koʻchirma (nusxa) yoki nikohni haqiqiy emas deb topganligi toʻgʻrisida sudning qonuniy kuchga kirgan qaroridan koʻchirma (nusxa) yoki otasining oʻlimi haqidagi guvohnoma taqdim etiladi.

Oʻzbekiston Respublikasi fuqarosi chet elda tugʻilgan va uning tugʻilganligi konsullik muassasasi tomonidan qayd etilmagan taqdirda belgilangan tartibda legalizatsiya qilingan yoki apostil qoʻyilgan xorijiy davlatning vakolatli organlari tomonidan berilgan bola tugʻilganligini tasdiqlovchi hujjat taqdim etiladi.

8. Soʻrovnomaga zarur maʼlumotlarni rasmiylashtirgandan va kiritgandan soʻng arizachi uni oʻz ERI bilan tasdiqlaydi.

Oʻzi kelib murojaat etgan taqdirda soʻrovnomani ERI bilan tasdiqlash imkoniyati boʻlmagan hollarda tegishli imzolar identifikatsiya qilishning boshqa vositalari (daktiloskopiya, elektron imzo va boshqalar) bilan ham tasdiqlanishi mumkin.

9. Tugʻilganlik haqidagi guvohnoma rasmiylashtirilganligi uchun bazaviy hisoblash miqdorining 15 foizi miqdorida gerb yigʻimi undiriladi.

Davlat xizmati koʻrsatish uchun toʻlov toʻlanganligini tasdiqlash axborot-kommunikatsiya tizimlari orqali amalga oshiriladi.

Toʻlov summasi quyidagi tartibda taqsimlanadi:

20 foizi — Oʻzbekiston Respublikasi Adliya vazirligi huzuridagi Davlat xizmatlari agentligi budjetdan tashqari jamgʻarmasining shaxsiy hisob raqamiga;

15 foizi — tumanlar va shaharlar budjetlari daromadiga;

31 foizi — Oʻzbekiston Respublikasi Adliya vazirligining gʻaznachilik hisob raqamlariga oʻtkaziladi va gerbli guvohnomalar va fuqarolik holati yozuvlari blankalarini tayyorlash bilan bogʻliq xarajatlarni qoplashga, shuningdek, adliya organlari va muassasalarining moddiy-texnika bazasini mustahkamlash va xodimlarini moddiy ragʻbatlantirish tadbirlariga;

34 foizi — Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklarining maxsus tashkil qilinadigan gʻaznachilik shaxsiy hisobvaragʻiga yoʻnaltiriladi va faqat FHDY boʻlimlarining moddiy-texnik bazasini mustahkamlash boʻyicha tadbirlari, xodimlarining uzoq muddat xizmat qilgani uchun ish haqiga ustama haq toʻlash va martaba darajalari uchun qoʻshimchalariga, shuningdek, ularni moddiy ragʻbatlantirishga (lavozim maoshining va mukofotlarning 100 foizi miqdorigacha shaxsiy ustamalar) tadbirlariga sarflanadi.

10. Ariza beruvchi soʻrovnomasida notoʻgʻri maʼlumotlar koʻrsatilishi, hujjatlar toʻliq taqdim etilmaganligi, shuningdek, davlat xizmatlari koʻrsatish uchun toʻlovni toʻlamaslik davlat xizmati koʻrsatishni rad etish uchun asos hisoblanadi.

Davlat xizmatlari koʻrsatishni boshqa asoslar boʻyicha rad etish taqiqlanadi.

11. Ariza beruvchi davlat xizmatidan foydalanishdan uni koʻrsatishning har qanday bosqichida bosh tortish huquqiga ega. Ariza beruvchi davlat xizmatidan foydalanishdan bosh tortganda uning soʻrovnomasi koʻrmasdan qoldiriladi. Bunda, davlat xizmati koʻrsatish uchun toʻlangan mablagʻlar qaytariladi.

12. Davlat xizmatlari markazlari tomonidan soʻrovnoma toʻldirilib, u ariza beruvchining imzosi bilan tasdiqlanganidan soʻng, ota-onalarning shaxsini tasdiqlovchi hujjatlar va nikoh tuzilganligi haqidagi guvohnoma (maʼlumotnoma), tugʻilganlik haqidagi tibbiy maʼlumotnomaning asl nusxalari dalolatnoma tuzgan holda 2 soat mobaynida tegishli FHDY boʻlimlariga taqdim etiladi.

13. FHDY boʻlimlari tugʻilganlikni qayd etish masalasidagi soʻrovnoma va unga ilova qilingan hujjatlarni qabul qilib olganidan soʻng 2 ish kunida hamda qoʻshimcha oʻrganishni talab etgan holatlarda 3 ish kunida Vazirlar Mahkamasining 2016-yil 14-noyabrdagi 387-son qarori bilan tasdiqlangan Fuqarolik holati dalolatnomalarini qayd etish qoidalariga asosan koʻrib chiqadi va natijasiga koʻra bolaga nisbatan tugʻilganlik haqidagi dalolatnoma yozuvini rasmiylashtiradi yoki uni rasmiylashtirishni rad etish toʻgʻrisidagi asoslantirilgan maʼlumotnomani tuzadi.

14. FHDY boʻlimlari 1 soat mobaynida qayd etilgan tugʻilganlik haqida dalolatnoma yozuvi, tugʻilganlik haqida gerbli guvohnoma va Oʻzbekiston Respublikasi Moliya vazirligi huzuridagi budjetdan tashqari Pensiya jamgʻarmasining tuman (shahar) boʻlimiga topshirish uchun tugʻilganlik haqida maʼlumotnoma yoki tugʻilganlik haqidagi dalolatnoma yozuvini rasmiylashtirishni rad etish toʻgʻrisidagi asoslantirilgan maʼlumotnomani ariza beruvchiga yetkazish uchun Davlat xizmatlari markaziga yuboradi.

15. Tugʻilganlik haqidagi dalolatnoma yozuvini rasmiylashtirish quyidagi holatlarda rad etilishi mumkin:

agar tugʻilganlikni qayd etish qonunchilikka zid boʻlsa;

agar taqdim etilgan hujjatlar ularga nisbatan qonun hujjatlarida qoʻyiladigan talablarga muvofiq boʻlmasa;

agar tugʻilganlikni qayd ettirish uchun murojaat qilgan shaxs bunga huquqli boʻlmasa yoki sud tomonidan muomalaga layoqatsiz deb topilgan boʻlsa.

16. Davlat xizmatlari markazi FHDY boʻlimlari tomonidan taqdim etilgan hujjatlarni qabul qilib olgandan soʻng 10 daqiqa mobaynida ariza beruvchini axborot-kommunikatsiya tizimi orqali xabardor qiladi va ariza beruvchiga hujjatlarni qabul qilib olganligi toʻgʻrisida imzolatgan holda taqdim etadi.

Agar ariza beruvchi tugʻilganlikni qayd etish va u bilan bogʻliq boʻlgan hujjatlarni 3 ish kuni davomida Davlat xizmatlari markazidan olib ketmasa, Davlat xizmatlari markazi ushbu hujjatlarni dalolatnoma tuzgan holda tegishli FHDY boʻlimlariga topshiradi va bu haqda ariza beruvchini xabardor qiladi.

17. Davlat xizmatlari markazlari va FHDY boʻlimlari oʻz faoliyatini amalga oshirishi natijasida olingan ariza beruvchilar haqidagi maʼlumotlarning sir saqlanishini taʼminlashi kerak.

18. Oʻzbekiston Respublikasi Adliya vazirligi huzuridagi Davlat xizmatlari agentligi, uning hududiy boshqarmalari va Davlat xizmatlari markazlari ushbu Reglament talablari ijrosi boʻyicha davlat organlari va boshqa tashkilotlarning faoliyati yuzasidan doimiy nazoratni va monitoringni amalga oshiradilar.

19. Ariza beruvchi davlat organlari va boshqa tashkilotlar xodimlarining xatti-harakatlari yuzasidan qonun hujjatlarida belgilangan tartibda shikoyat qilishi mumkin.

20. Ushbu Reglament talablarining buzilishida aybdor boʻlgan shaxslar qonun hujjatlarida belgilangan tartibda javob beradilar.

1. Mazkur Reglament jismoniy shaxslarga (keyingi oʻrinlarda ariza beruvchilar deb ataladi) tuman (shahar) fuqarolik holati dalolatnomalarini yozish boʻlimlari, nikoh uylari, Oʻzbekiston Respublikasi Adliya vazirligi huzuridagi Davlat xizmatlari agentligining Qoraqalpogʻiston Respublikasi, viloyatlar va Toshkent shahar hududiy boshqarmalari fuqarolik holati dalolatnomalarini yozish arxivlari (keyingi oʻrinlarda FHDY organlari deb ataladi) hamda shaharchalar, qishloqlar va ovullar fuqarolar yigʻinlari, Oʻzbekiston Respublikasining konsullik muassasalarida qayd etilgan fuqarolik holati dalolatnoma yozuvlari haqidagi maʼlumotnomalarni berish boʻyicha davlat xizmati (keyingi oʻrinlarda davlat xizmati deb ataladi) koʻrsatish tartibini belgilaydi.

2. Davlat xizmati Davlat xizmatlari markazlari orqali FHDY organlari tomonidan koʻrsatiladi.

3. Davlat xizmatlari markazlari va FHDY organlari oʻrtasidagi axborot almashinuvi elektron raqamli imzoni (keyingi oʻrinlarda ERI deb ataladi) majburiy tartibda qoʻllash orqali faqat idoralararo elektron oʻzaro bogʻlanish yordamida amalga oshiriladi.

4. Davlat xizmati koʻrsatish mazkur Reglamentga 1-ilovaga muvofiq sxema asosida amalga oshiriladi.

5. Ariza beruvchi davlat xizmatidan foydalanish uchun Davlat xizmatlari markaziga oʻzi kelib murojaat etadi.

6. Davlat xizmatlari markazi xodimi ariza beruvchi nomidan ushbu Reglamentning 2-ilovasiga muvofiq shakldagi soʻrovnomani elektron shaklda toʻldiradi.

7. Soʻrovnomaga:

pasport yoki shaxsini tasdiqlovchi boshqa hujjat nusxasi;

ariza beruvchi ishonchnoma asosida harakat qilayotganda — ishonchnoma nusxasi;

ariza beruvchining marhumga qarindoshligini tasdiqlovchi hujjatlari;

ariza beruvchi vasiyatnomaga asosan merosxoʻr boʻlganda — vasiyatnoma va marhumning oʻlimi haqida guvohnoma nusxalari, ariza beruvchi qonuniy vakil boʻlsa — uni tasdiqlovchi hujjat nusxasi ilova qilinadi.

Ariza beruvchi taqdim etgan hujjatlar nusxalari Davlat xizmatlari markazi xodimlari tomonidan ularning asl nusxalaridan olinishi lozim.

8. Soʻrovnomaga zarur maʼlumotlarni rasmiylashtirgandan va kiritgandan soʻng arizachi uni oʻz ERIsi bilan tasdiqlaydi.

Oʻzi kelib murojaat etgan taqdirda soʻrovnomani ERIsi bilan tasdiqlash imkoniyati boʻlmagan hollarda tegishli imzolar identifikatsiya qilishning boshqa vositalari (daktiloskopiya, elektron imzo va boshqalar) bilan ham tasdiqlanishi mumkin.

9. Davlat xizmati koʻrsatilgani uchun bazaviy hisoblash miqdorining 5 foizi miqdorida yigʻim undiriladi.

Davlati xizmati koʻrsatilgani uchun yigʻim toʻlanganligini tasdiqlash axborot-kommunikatsiya tizimlari orqali amalga oshiriladi.

Yigʻim Oʻzbekiston Respublikasi Adliya vazirligi huzuridagi Davlat xizmatlari agentligi budjetdan tashqari jamgʻarmasining shaxsiy hisob raqamiga oʻtkaziladi.

10. Soʻrovnomada notoʻgʻri maʼlumotlarning koʻrsatilishi, soʻrovnomaga ilova qilinishi lozim boʻlgan hujjatlarning taqdim etilmaganligi, shuningdek, davlat xizmatlari koʻrsatish uchun yigʻimni toʻlamaslik davlat xizmati koʻrsatishni rad etish uchun asos hisoblanadi.

Davlat xizmatini koʻrsatishni boshqa asoslar boʻyicha rad etish taqiqlanadi.

11. Ariza beruvchilar davlat xizmatidan foydalanishdan uni koʻrsatishning har qanday bosqichida bosh tortish huquqiga ega. Ariza beruvchi davlat xizmatidan foydalanishdan bosh tortganda uning soʻrovnomasi koʻrmasdan qoldiriladi. Bunda, toʻlangan yigʻim summasi qaytarilmaydi.

12. Soʻrovnoma Davlat xizmatlari markazi xodimi tomonidan toʻldirilib, ariza beruvchining ERIsi bilan tasdiqlangandan soʻng, barcha hujjatlar 10 daqiqa mobaynida tegishli FHDY organiga elektron shaklda yuboriladi.

13. FHDY organi soʻrovnoma tushgan vaqtdan boshlab 1 ish soati mobaynida QR-kod (matrik shtrixli kod) qoʻyilgan maʼlumotnomani rasmiylashtiradi hamda tegishli Davlat xizmatlari markaziga yuboradi.

14. Soʻrovnomada soʻralayotgan maʼlumotlar FHDY organida mavjud boʻlmaganda FHDY organi soʻrovnomani tegishli ravishda Oʻzbekiston Respublikasi Adliya vazirligi huzuridagi Davlat xizmatlari agentligining Qoraqalpogʻiston Respublikasi, viloyatlar va Toshkent shahar hududiy boshqarmalari fuqarolik holati dalolatnomalarini yozish arxivlariga yuboradi va bu haqda Davlat xizmatlari markazlarini elektron tarzda xabardor qiladi. Bunda Davlat xizmatlari markazi ariza beruvchiga axborot-kommunikatsiya tizimi orqali xabar beradi.

Hududiy fuqarolik holati dalolatnomalarini yozish arxivlari soʻrovnoma tushgan kundan boshlab 3 ish kuni mobaynida soʻralayotgan maʼlumotlarni tegishli FHDY organlarida mavjud yoki mavjud emasligini aniqlab, QR-kod (matrik shtrixli kod) qoʻyilgan maʼlumotnomani rasmiylashtiradi hamda tegishli Davlat xizmatlari markaziga yuboradi.

15. Davlat xizmatlari markazi, maʼlumotnoma kelib tushgandan soʻng 10 daqiqa mobaynida uni ariza beruvchining elektron manziliga yuboradi va ariza beruvchini bu haqda axborot-kommunikatsiya tizimi orqali xabardor qiladi. Davlat xizmatlari markazi ariza beruvchining soʻroviga koʻra unga maʼlumotnomani elektron shaklda yoki qogʻoz shaklda muhrini bosib berishi mumkin.

16. Davlat xizmatlari markazlari va FHDY organlari oʻz faoliyatini amalga oshirishi natijasida olingan maʼlumotlarning sir saqlanishini taʼminlaydi.

17. Oʻzbekiston Respublikasi Adliya vazirligi huzuridagi Davlat xizmatlari agentligi, uning hududiy boshqarmalari va Davlat xizmatlari markazlari ushbu Reglament talablari ijrosi boʻyicha davlat organlari hamda boshqa tashkilotlarning faoliyati yuzasidan doimiy nazoratni va monitoringni amalga oshiradi.

18. Ariza beruvchilar davlat organlari va boshqa tashkilotlar xodimlarining xatti-harakatlari yuzasidan qonun hujjatlarida belgilangan tartibda shikoyat qilishlari mumkin.

19. Mazkur Reglament talablarining buzilishida aybdor boʻlgan shaxslar qonun hujjatlarida belgilangan tartibda javob beradilar.

1. Mazkur Reglament jismoniy shaxslarga (keyingi oʻrinlarda ariza beruvchilar deb ataladi) notarial rasmiylashtirilgan hujjatlarning dublikati, notarial harakatlarni roʻyxatga olish reyestr kitobidan koʻchirma, arxiv hujjatlaridan nusxalar va arxiv maʼlumotlarini berish boʻyicha davlat xizmati (keyingi oʻrinlarda davlat xizmati deb ataladi) koʻrsatish tartibini belgilaydi.

2. Davlat xizmati Davlat xizmatlari markazlari orqali Qoraqalpogʻiston Respublikasi Adliya vazirligi, viloyatlar va Toshkent shahar adliya boshqarmalari huzuridagi idoraviy notarial arxivlar (keyingi oʻrinlarda vakolatli organ deb ataladi) tomonidan koʻrsatiladi.

3. Davlat xizmatlari markazlari va vakolatli organ oʻrtasidagi axborot almashinuvi elektron raqamli imzoni (keyingi oʻrinlarda ERI deb ataladi) majburiy tartibda qoʻllash orqali faqat idoralararo elektron oʻzaro bogʻlanish yordamida amalga oshiriladi.

4. Davlat xizmati koʻrsatish ushbu Reglamentga 1-ilovaga muvofiq sxema boʻyicha amalga oshiriladi.

5. Ariza beruvchi davlat xizmati olish uchun Davlat xizmatlari markaziga oʻzi kelgan holda murojaat etadi.

6. Davlat xizmatlari markazi xodimi ariza beruvchi nomidan ushbu Reglamentning 2-ilovasiga muvofiq shakldagi soʻrovnomani elektron shaklda toʻldiradi.

7. Soʻrovnomaga:

pasport nusxasi;

ariza beruvchi ishonchnoma asosida harakat qilayotganda — ishonchnoma nusxasi;

marhum nomidan amalga oshirilgan notarial harakatlar haqida arxiv hujjatlari olinayotganda — marhumning oʻlimi haqida guvohnoma va ariza beruvchining marhumga qarindoshligini tasdiqlovchi hujjatlar;

ariza beruvchi vasiyatnomaga asosan merosxoʻr boʻlganda — vasiyatnoma va marhumning oʻlimi haqida guvohnoma nusxalari, ariza beruvchi qonuniy vakil boʻlsa — uni tasdiqlovchi hujjat nusxasi ilova qilinadi.

Ariza beruvchi taqdim etgan hujjatlar nusxalari Davlat xizmatlari markazi xodimlari tomonidan ularning asl nusxalaridan olinishi lozim.

8. Soʻrovnomaga zarur maʼlumotlarni rasmiylashtirgandan va kiritgandan soʻng arizachi uni oʻz ERIsi bilan tasdiqlaydi.

Oʻzi kelib murojaat etgan taqdirda soʻrovnomani ERIsi bilan tasdiqlash imkoniyati boʻlmagan hollarda tegishli imzolar identifikatsiya qilishning boshqa vositalari (daktiloskopiya, elektron imzo va boshqalar) bilan ham tasdiqlanishi mumkin.

9. Soʻrovnomada ishonchsiz maʼlumotlar koʻrsatilganligi, shuningdek tegishli hujjatlarning toʻliq taqdim etilmaganligi davlat xizmati koʻrsatishni rad etish uchun asos hisoblanadi.

Davlat xizmatlarini koʻrsatishni boshqa asoslar boʻyicha rad etish taqiqlanadi.

10. Ariza beruvchilar davlat xizmatidan foydalanishdan uni koʻrsatishning har qanday bosqichida bosh tortish huquqiga ega. Ariza beruvchi davlat xizmatlaridan foydalanishdan bosh tortganda uning soʻrovnomasi koʻrmasdan qoldiriladi.

11. Soʻrovnoma Davlat xizmatlari markazi xodimi tomonidan toʻldirilib, ariza beruvchining ERIsi bilan tasdiqlangandan soʻng, barcha hujjatlar 10 daqiqa mobaynida vakolatli organga elektron shaklda yuboriladi.

12. Soʻrovnoma tushgandan soʻng vakolatli organ tomonidan quyidagi muddatlar mobaynida arxiv hujjatini berish yoki uni berishni rad etish haqida qaror qabul qilinadi:

a) notarial rasmiylashtirilgan hujjatlarning dublikati — soʻrovnoma kelib tushgandan soʻng 5 ish kuni mobaynida;

b) notarial harakatlarni roʻyxatga olish reyestr kitobidan koʻchirma-soʻrovnoma kelib tushgandan soʻng 2 ish kuni mobaynida;

v) arxiv hujjatlaridan nusxalar — soʻrovnoma kelib tushgandan soʻng 2 ish kuni mobaynida;

g) arxiv maʼlumotnomalari — soʻrovnoma kelib tushgandan soʻng 1 ish kuni mobaynida.

13. Vakolatli organ arxiv hujjatini berish haqida qaror qabul qilingan taqdirda 10 daqiqa mobaynida Davlat xizmatlari markaziga arxiv hujjatlarini berish uchun toʻlanadigan toʻlov summasini koʻrsatgan holda elektron tarzda xabarnoma va arxiv hujjatlarini yuboradi.

14. Arxiv hujjatlarini berish uchun quyidagi miqdorlarda toʻlov undiriladi:

notarial rasmiylashtirilgan hujjatlarning dublikatini berish uchun — bazaviy hisoblash miqdorining 5 foizi miqdorida;

notarial harakatlarni roʻyxatga olish reyestr kitobidan koʻchirma berish uchun — bazaviy hisoblash miqdorining 5 foizi miqdorida;

arxiv hujjatlaridan nusxalar berish uchun — bazaviy hisoblash miqdorining 2 foizi miqdorida;

arxiv maʼlumotnomalari berish uchun — bazaviy hisoblash miqdorining 1 foizi miqdorida.

Gerbli (maxsus) blankalarda notarial rasmiylashtirilgan hujjatlarning dublikatlari berilganda qonun hujjatlariga muvofiq gerb yigʻimi undiriladi.

Davlat xizmatini koʻrsatish uchun toʻlov toʻlanganligini tasdiqlash axborot — kommunikatsiya tizimlari orqali amalga oshiriladi.

15. Toʻlov summasi quyidagi tartibda taqsimlanadi:

20 foizi — Oʻzbekiston Respublikasi Adliya vazirligi huzuridagi Davlat xizmatlari agentligining budjetdan tashqari jamgʻarmasining shaxsiy hisob raqamiga oʻtkaziladi;

qolgan mablagʻlar qonun hujjatlarida belgilangan tartibda taqsimlanadi.

16. Davlat xizmatlari markaziga xabarnoma tushganidan soʻng 10 daqiqa mobaynida uni ariza beruvchining elektron manziliga yuboradi va bu haqda ariza beruvchini axborot-kommunikatsiya tizimi orqali xabardor qiladi.

17. Toʻlov amalga oshirilgandan soʻng, arxiv hujjati elektron yoki qogʻoz shaklda ariza beruvchiga beriladi. Ariza beruvchining soʻroviga asosan hujjatlarga Davlat xizmatlari markazining muhri bosib berilishi mumkin. Notarial tasdiqlangan hujjatlarning dublikatlari ariza beruvchiga faqat qogʻoz shaklda beriladi.

18. Arxiv hujjatlari notarial arxivda mavjud boʻlmasa, koʻrsatilgan xizmatlar uchun ariza beruvchi tomonidan toʻlov amalga oshirilmasa, davlat xizmati koʻrsatishni rad etish uchun asos hisoblanadi.

Davlat xizmatini koʻrsatishni boshqa asoslar boʻyicha rad etish qatʼiyan taqiqlanadi.

19. Davlat xizmatlari markazlari va vakolatli organ xodimlari oʻz faoliyatini amalga oshirishi natijasida olgan ariza beruvchilar haqidagi maʼlumotlarning sir saqlanishini taʼminlashi kerak.

20. Oʻzbekiston Respublikasi Adliya vazirligi huzuridagi Davlat xizmatlari agentligi, uning hududiy boshqarmalari va Davlat xizmatlari markazlari ushbu Reglament talablari ijrosi boʻyicha davlat organlari hamda boshqa tashkilotlarning faoliyati yuzasidan doimiy nazoratni va monitoringni amalga oshiradilar.

21. Ariza beruvchi davlat organlari va boshqa tashkilotlar xodimlarining xatti-harakatlari yuzasidan qonun hujjatlarida belgilangan tartibda shikoyat qilishi mumkin.

22. Ushbu Reglament talablarining buzilishida aybdor boʻlgan shaxslar qonun hujjatlarida belgilangan tartibda javob beradi.

1. Mazkur Reglament jismoniy va yuridik shaxslarga (keyingi oʻrinlarda ariza beruvchilar deb ataladi) Davlat xizmatlari markazlari orqali adliya organlari va muassasalaridan hamda fuqarolik holati dalolatnomalarini qayd etish organlaridan chiqadigan rasmiy hujjatlarga “Apostille” maxsus shtampi (keyingi oʻrinlarda apostil deb ataladi) qoʻyish boʻyicha davlat xizmati (keyingi oʻrinlarda davlat xizmati deb ataladi) koʻrsatish tartibini belgilaydi.

2. Davlat xizmati Davlat xizmatlari markazlari orqali Qoraqalpogʻiston Respublikasi Adliya vazirligi, viloyatlar va Toshkent shahar adliya boshqarmalari (keyingi oʻrinlarda vakolatli organ deb ataladi) tomonidan koʻrsatiladi.

3. Davlat xizmatlari markazlari va vakolatli organ oʻrtasidagi axborot almashinuvi elektron raqamli imzoni (keyingi oʻrinlarda ERI deb ataladi) majburiy tartibda qoʻllash orqali faqat idoralararo oʻzaro elektron bogʻlanish yordamida amalga oshiriladi.

4. Apostil

chet elda Oʻzbekiston Respublikasining elchixonalari yoki konsullik muassasalari tomonidan sodir etilgan hujjatlarga;

tijorat yoki bojxona operatsiyalariga toʻgʻridan-toʻgʻri aloqador boʻlgan hujjatlarga;

pasportga, harbiy biletga qoʻyilmaydi.

5. Apostil qoʻyish masalalari boʻyicha maslahatlar vakolatli organ tomonidan beriladi.

6. Davlat xizmati koʻrsatish mazkur Reglamentga 1-ilovaga muvofiq sxema asosida amalga oshiriladi.

7. Ariza beruvchi davlat xizmati olish uchun Davlat xizmatlari markaziga oʻzi kelgan holda murojaat etadi.

8. Davlat xizmatlari markazi xodimi ariza beruvchi nomidan ushbu Reglamentning 2-ilovasiga muvofiq shakldagi soʻrovnomani elektron shaklda toʻldiradi.

Soʻrovnomaga quyidagi hujjatlar ilova qilinadi:

ariza beruvchining shaxsini tasdiqlaydigan hujjat nusxasi;

xorijiy davlat — xorijiy rasmiy hujjatlarni legallashtirish talabini bekor qiluvchi Konvensiyaning (Gaaga, 1961-yil 5-oktabr) qatnashchisi hududida foydalaniladigan rasmiy hujjat.

Rasmiy hujjatlar apostil qoʻyish uchun asl nusxalarda yoki ariza beruvchining xohishiga koʻra notarial tasdiqlangan nusxalarda qabul qilinadi.

9. Soʻrovnomaga zarur maʼlumotlarni rasmiylashtirgandan va kiritgandan soʻng arizachi uni oʻz ERIsi bilan tasdiqlaydi.

Oʻzi kelib murojaat etgan taqdirda soʻrovnomani ERIsi bilan tasdiqlash imkoniyati boʻlmagan hollarda tegishli imzolar identifikatsiya qilishning boshqa vositalari (daktiloskopiya, elektron imzo va boshqalar) bilan ham tasdiqlanishi mumkin.

10. Davlat xizmatlari markazi xodimi tomonidan barcha hujjatlar skanerlanadi va 10 daqiqa mobaynida idoralararo elektron oʻzaro bogʻlanish yordamida vakolatli organga yuboriladi. Taqdim etilgan hujjatlarning asl nusxasi shu kunning oʻzida Davlat xizmatlari markazi xodimi tomonidan (kuryer yoki buyurtma xatlar orqali) vakolatli organga yetkaziladi.

11. Davlat xizmati koʻrsatish uchun bazaviy hisoblash miqdorining 20 foizi miqdorida yigʻim undiriladi. Toʻlov undirilganligini tasdiqlash axborot-kommunikatsiya tizimlari orqali amalga oshiriladi.

Yigʻimlar summasi quyidagi tartibda taqsimlanadi:

20 foizi — Oʻzbekiston Respublikasi Adliya vazirligi huzuridagi Davlat xizmatlari agentligining budjetdan tashqari jamgʻarmasining shaxsiy hisob raqamiga oʻtkaziladi;

5 foizi — vakolatli organning hisob raqamiga oʻtkaziladi;

qolgan mablagʻlar Oʻzbekiston Respublikasining Davlat budjetiga oʻtkaziladi.

12. Ariza beruvchi tomonidan ushbu Reglamentning 4-bandida nazarda tutilgan hujjatlar taqdim etilganligi, rasmiy hujjatlarda tegishli rekvizitlarning (tartib raqami, sana, imzo, muhr) hech boʻlmaganda bittasi mavjud boʻlmaganligi va davlat xizmatlari koʻrsatish uchun toʻlovning amalga oshirilmaganligi davlat xizmatlari koʻrsatishni rad etish uchun asos hisoblanadi.

Davlat xizmatlari koʻrsatishni boshqa asoslar boʻyicha rad etish taqiqlanadi.

13. Ariza beruvchi davlat xizmatidan foydalanishdan uni koʻrsatishning har qanday bosqichida bosh tortish huquqiga ega. Ariza beruvchi davlat xizmatlaridan foydalanishdan bosh tortganda uning soʻrovnomasi koʻrmasdan qoldiriladi. Bunda, toʻlangan yigʻim summasi qaytarilmaydi.

14. Vakolatli organ apostil qoʻyishni Vazirlar Mahkamasining 2011-yil 17-noyabrdagi 307-son qarori bilan tasdiqlangan Apostil qoʻyish tartibi toʻgʻrisida nizomga asosan amalga oshiradi va natijasi boʻyicha apostil qoʻyish toʻgʻrisida yoki apostil qoʻyishni rad etish toʻgʻrisida 5 ish kuni mobaynida qaror qabul qiladi.

Apostil qoʻyish toʻgʻrisida ijobiy qaror qabul qilingan taqdirda vakolatli organ xodimi taqdim etilgan rasmiy hujjatlarga apostil qoʻyadi.

15. Apostil qoʻyishni rad etish uchun quyidagilar asos boʻladi:

agar rasmiy hujjatdagi mansabdor shaxsning imzosi va (yoki) muhrning bosma izi vakolatli organdagi namunaga muvofiq boʻlmasa;

agar rasmiy hujjatni imzolagan mansabdor shaxs uni imzolash vakolatiga ega boʻlmasa;

qonun hujjatlarida nazarda tutilgan boshqa holatlarda apostil qoʻyish rad etiladi.

Apostil qoʻyishni rad etish yozma xat shaklida amalga oshiriladi.

16. Vakolatli organ apostil qoʻyilgan rasmiy hujjat yoki apostil qoʻyishni rad etish haqidagi xatni taqdim etilgan hujjatlar bilan birga Davlat xizmatlari markaziga (kuryer yoki buyurtma xat orqali) yetkazadi va Markazni bu haqda idoralararo elektron tarzdagi hamkorlik tizimi orqali xabardor qiladi.

17. Davlat xizmatlari markazi apostil qoʻyilgan rasmiy hujjat yoki apostil qoʻyishni rad etish haqidagi xat tushgandan soʻng 1 soat mobaynida ariza beruvchini axborot-kommunikatsiya tizimi orqali xabardor qiladi.

18. Davlat xizmatlari markazi xodimi Apostilni roʻyxatdan oʻtkazish daftariga tegishli yozuvni kiritgan holda apostil qoʻyilgan rasmiy hujjatni yoki apostil qoʻyishni rad etish haqidagi xatni taqdim etilgan hujjatlar bilan birga ariza beruvchiga topshiradi. Bunda ariza beruvchi tomonidan uning shaxsini tasdiqlaydigan hujjat koʻrsatiladi.

19. Davlat xizmatlari markazlari va vakolatli organ oʻz faoliyatini amalga oshirishi natijasida olingan maʼlumotlarning maxfiyligini taʼminlaydi.

20. Oʻzbekiston Respublikasi Adliya vazirligi huzuridagi Davlat xizmatlari agentligi, uning hududiy boshqarmalari va Davlat xizmatlari markazlari ushbu Reglament talablari ijrosi boʻyicha davlat organlari hamda boshqa tashkilotlarning faoliyati yuzasidan doimiy nazoratni va monitoringni amalga oshiradilar.

21. Ariza beruvchilar davlat organlari va boshqa tashkilotlar xodimlarining xatti-harakatlari yuzasidan qonun hujjatlarida belgilangan tartibda shikoyat qilishlari mumkin.

22. Mazkur Reglament talablarining buzilishida aybdor boʻlgan shaxslar qonun hujjatlarida belgilangan tartibda javob berishadi.

1. Vazirlar Mahkamasining “Apostil qoʻyish tartibi toʻgʻrisidagi nizomni tasdiqlash haqida” 2011-yil 17-noyabrdagi 307-son qarorida (Oʻzbekiston Respublikasi QT, 2011-y., 11-son, 90-modda):

a) 3-bandda:

ikkinchi xatboshi quyidagi tahrirda bayon etilsin:

“tegishli hududdagi adliya organlari va muassasalaridan hamda fuqarolik holati dalolatnomalarini qayd etish organlaridan chiqadigan rasmiy hujjatlar boʻyicha — Qoraqalpogʻiston Respublikasi Adliya vazirligi, viloyatlar va Toshkent shahar adliya boshqarmalariga”;

quyidagi mazmundagi uchinchi xatboshi qoʻshilsin:

“sudlardan chiqadigan rasmiy hujjatlar boʻyicha — Oʻzbekiston Respublikasi Oliy sudiga”;

uchinchi, toʻrtinchi va beshinchi xatboshilar tegishincha toʻrtinchi, beshinchi va oltinchi xatboshilar deb hisoblansin.

b) 1-ilovaga quyidagi mazmundagi 2¹-band qoʻshilsin:

“2¹. Adliya organlari va muassasalaridan hamda fuqarolik holati dalolatnomalarini qayd etish organlaridan chiqadigan rasmiy hujjatlar boʻyicha apostil qoʻyish Oʻzbekiston Respublikasi Vazirlar Mahkamasi tomonidan belgilanadigan tartibda Davlat xizmatlari markazlari orqali Qoraqalpogʻiston Respublikasi Adliya vazirligi, viloyatlar va Toshkent shahar adliya boshqarmalari tomonidan amalga oshiriladi”.

2. Vazirlar Mahkamasining 2016-yil 14-noyabrdagi 387-son qarori (Oʻzbekiston Respublikasi QT, 2016-y., 11-son, 104-modda) bilan tasdiqlangan Fuqarolik holati dalolatnomalarini qayd etish qoidalarida:

16-bandning birinchi xatboshisidagi “FHDY organida” soʻzlari “FHDY organi tomonidan bevosita yoki Davlat xizmatlari markazlari orqali” soʻzlari bilan almashtirilsin.

37-banddagi “FHDY organi tomonidan” soʻzlari “FHDY organi tomonidan Davlat xizmatlari markazlari orqali” soʻzlari bilan almashtirilsin.

38-banddagi “FHDY organi tomonidan” soʻzlari “FHDY organi tomonidan Davlat xizmatlari markazlari orqali” soʻzlar bilan almashtirilsin.