Oʻzbekiston Respublikasi Vazirlar Mahkamasining 2018-yil 23-noyabrdagi “Yaponiya xalqaro hamkorlik banki va Yaponiya tijorat banklari kreditiga xizmat koʻrsatish chora-tadbirlari toʻgʻrisida”gi 951-son qarori hamda Yaponiya xalqaro hamkorlik banki (JBIC) va Yaponiya tijorat banklari kreditlarini jalb qilgan holda respublikamizda zamonaviy axborot-kommunikatsiya texnologiyalarini jadal rivojlantirish uchun shart-sharoitlar yaratish maqsadida, Vazirlar Mahkamasi qaror qiladi:

1. Quyidagilar maʼlumot uchun qabul qilinsin:

Oʻzbekiston Respublikasi Vazirlar Mahkamasining 2018-yil 23-noyabrdagi “Yaponiya xalqaro hamkorlik banki va Yaponiya tijorat banklari kreditiga xizmat koʻrsatish chora-tadbirlari toʻgʻrisida”gi 951-son qarori bilan “Magistral va multiservisli maʼlumotlar uzatish tarmoqlarini kengaytirish” loyihasining magistral tarmoqni optik kanallarini zichlashtirish (DWDM) texnologiyasi va raqamli radiorele qurilmalari texnologiyasini kengaytirish hamda “Kommutatsiya markazlarini IMS (IP Multimedia Subsystem) texnologiyasi boʻyicha takomillashtirish” loyihalarini amalga oshirish nazarda tutilgan;

“Magistral va multiservisli maʼlumotlar uzatish tarmoqlarini kengaytirish” loyihasining raqamli radiorele qurilmalari qismi va “Kommutatsiya markazlarini IMS (IP Multimedia Subsystem) texnologiyasi boʻyicha takomillashtirish” investitsiya loyihalarining umumiy qiymati 38 041,90 ming AQSh dollari ekvivalentini, shu jumladan, 28 488,43 ming AQSh dollari — uskuna va xizmatlarning shartnoma qiymati, 8 537,73 ming AQSh dollari — Oʻzbekiston Respublikasining loyihani amalga oshirishdagi hissasi bojxona imtiyozlari tarzida, 1 015,74 ming AQSh dollari — investitsiya davrida moliyaviy xarajatlar va boshqa sarf-xarajatlar;

“Oʻzbektelekom” AK “Magistral va multiservisli maʼlumotlar uzatish tarmoqlarini kengaytirish” loyihasining raqamli radiorele qurilmalari qismi va “Kommutatsiya markazlarini IMS (IP Multimedia Subsystem) texnologiyasi boʻyicha takomillashtirish” loyihasi boʻyicha tender savdolari gʻolibi — “Toyota Tsusho Corporation” kompaniyasi (Yaponiya) bilan qiymati 3 276 169 298,00 yapon yeni miqdoridagi (28 488 428,68 AQSh dollari ekvivalentida) shartnoma tuzilgan;

Investitsiya loyihasining moliyalashtirish manbai sifatida Oʻzbekiston Respublikasi Hukumati kafolati ostida Yaponiya xalqaro hamkorlik banki (JBIC) va Yaponiyaning tijorat banklari mablagʻlari belgilangan.

2. Quyidagilar:

“Magistral va multiservisli maʼlumotlar uzatish tarmoqlarini kengaytirish” loyihasining raqamli radiorele qurilmalari qismi va “Kommutatsiya markazlarini IMS (IP Multimedia Subsystem) texnologiyasi boʻyicha takomillashtirish” investitsiya loyihalari boʻyicha texnik-iqtisodiy asoslarining asosiy texnik-iqtisodiy parametrlari 1-ilovaga* muvofiq;

“Magistral va multiservisli maʼlumotlar uzatish tarmoqlarini kengaytirish” loyihasining raqamli radiorele qurilmalari qismi va “Kommutatsiya markazlarini IMS (IP Multimedia Subsystem) texnologiyasi boʻyicha takomillashtirish” investitsiya loyihalari boʻyicha Yaponiyaning xalqaro hamkorlik banki (JBIC) kreditini qaytarish boʻyicha prognoz grafigi 2-ilovaga* muvofiq;

“Magistral va multiservisli maʼlumotlar uzatish tarmoqlarini kengaytirish” loyihasining raqamli radiorele qurilmalari qismi va “Kommutatsiya markazlarini IMS (IP Multimedia Subsystem) texnologiyasi boʻyicha takomillashtirish” investitsiya loyihalari boʻyicha Yaponiyaning “Sumitomo Mitsui Banking Corporation” (SMBC) banki kreditini qaytarish boʻyicha prognoz grafigi 3-ilovaga* muvofiq tasdiqlansin.

3. Mazkur qarorning ijrosini nazorat qilish Oʻzbekiston Respublikasi Axborot texnologiyalari va kommunikatsiyalarini rivojlantirish vaziri Sh.M.Sadikov zimmasiga hamda Oʻzbekiston Respublikasi Vazirlar Mahkamasining Telekommunikatsiyalar, IT-texnologiyalar va innovatsion faoliyatni rivojlantirish, axborot xavfsizligini taʼminlash masalalari kotibiyatiga yuklansin.