O‘zbekiston Respublikasi Prezidentining “O‘zbekiston Respublikasi sog‘liqni saqlash tizimini tubdan takomillashtirish bo‘yicha kompleks chora-tadbirlar to‘g‘risida” 2018-yil 7-dekabrdagi PF-5590-son Farmoni ijrosini ta’minlash hamda sog‘liqni saqlash sohasini boshqarishga yuqori malakali xorijiy mutaxassislarni keng jalb qilish maqsadida:

1. O‘zbekiston Respublikasi Vazirlar Mahkamasi, Sog‘liqni saqlash vazirligi va Moliya vazirligining sog‘liqni saqlash sohasiga ilg‘or xorijiy tajribani joriy etish bo‘yicha takliflar tayyorlash va islohotlarni ekspert jihatdan qo‘llab-quvvatlash, shu jumladan quyidagilar uchun mas’ul bo‘lgan O‘zbekiston Respublikasi sog‘liqni saqlash vaziri o‘rinbosari (keyingi o‘rinlarda — sog‘liqni saqlash vaziri o‘rinbosari) lavozimini joriy etish to‘g‘risidagi taklifi ma’qullansin:

xalqaro standartlar va Jahon sog‘liqni saqlash tashkilotining tavsiyalarini implementatsiya qilgan holda sog‘liqni saqlash sohasini kompleks huquqiy tartibga solish;

sog‘liqni saqlashni moliyalashtirish va tashkil etish tizimini takomillashtirish;

majburiy tibbiy sug‘urtani joriy etish;

davlat-xususiy sheriklik va tibbiy turizmdan foydalanishning eng yaxshi amaliyotlarini tatbiq qilish;

sog‘liqni saqlash sohasiga investitsiyalarni keng jalb etish uchun qulay shart-sharoitlar yaratish va raqobat muhiti yaxshilash;

“elektron sog‘liqni saqlash” tizimlarini keng joriy etish.

2. Belgilansinki:

sog‘liqni saqlash vazirining o‘rinbosari lavozimiga O‘zbekiston Respublikasi Prezidenti tomonidan lavozimga tayinlanadigan va lavozimidan ozod etiladigan sog‘liqni saqlash sohasidagi yuqori malakali xorijiy mutaxassis jalb etiladi;

sog‘liqni saqlash vazirining o‘rinbosari bir vaqtda O‘zbekiston Respublikasi Bosh vazirining ijtimoiy rivojlantirish masalalari bo‘yicha o‘rinbosari maslahatchisi hisoblanadi;

sog‘liqni saqlash vaziri o‘rinbosarining faoliyati O‘zbekiston Respublikasi Bosh vazirining ijtimoiy rivojlantirish masalalari bo‘yicha o‘rinbosari tomonidan muvofiqlashtiriladi;

sog‘liqni saqlash vaziri o‘rinbosariga shaxsiy tarjimon, yordamchi, xizmat avtotransporti, xizmat turar joyi beriladi hamda doimiy yashash mamlakatiga borib-kelish uchun xalqaro parvozlarda aviachiptalar qiymati qoplanadi;

Rivojlantirish va sog‘liqni saqlashni boshqarish organlari xodimlarini moddiy rag‘batlantirish jamg‘armasi mablag‘lari sog‘liqni saqlash vaziri o‘rinbosarining ish haqini to‘lash, hududlar bo‘ylab safarlarda transport va xizmat safari, tarjimon, yordamchi yollash, xizmat turar joyi, shuningdek doimiy yashash mamlakatiga borib-kelish uchun xalqaro parvozlarda aviachiptalar xarajatlarini qoplash manbalari hisoblanadi.

3. Sog‘liqni saqlash vaziri o‘rinbosariga ikki nafar yuqori malakali xorijiy mutaxassislardan iborat bo‘lgan guruh biriktirilishi, ularning ta’minoti o‘zlarining mablag‘lari hisobiga amalga oshirilishi ma’lumot uchun qabul qilinsin.

4. O‘zbekiston Respublikasi Vazirlar Mahkamasi bir oy muddatda sog‘liqni saqlash vazirining o‘rinbosari bilan tomonlarning huquqlari, majburiyatlari va mas’uliyatini, maqsadli indikatorlarni, shartnomaning boshqa muhim shartlarini, shuningdek ushbu qarorning 1-bandini amalga oshirishning batafsil mexanizmlarini belgilab beradigan shartnoma tuzsin.

5. O‘zbekiston Respublikasi sog‘liqni saqlash vaziri A.K. Shadmanovga sog‘liqni saqlash vaziri o‘rinbosarining O‘zbekiston Respublikasi Sog‘liqni saqlash vazirligi tashkiliy tuzilmasiga kiruvchi tarkibiy bo‘linmalar va muassasalar bilan o‘zaro samarali hamkorligini tashkil etish uchun shaxsan mas’ul ekanligi ko‘rsatib o‘tilsin.

6. O‘zbekiston Respublikasi Tashqi ishlar vazirligi Sog‘liqni saqlash vazirligining buyurtmanomalari bo‘yicha sog‘liqni saqlash vazirining o‘rinbosariga va unga biriktirilgan xorijiy mutaxassislarga hamda ularning oila a’zolariga ko‘p martalik kirish vizalari konsullik yig‘imlari va boshqa yig‘imlar undirilmasdan belgilangan tartibda rasmiylashtirilishini ta’minlasin.

7. O‘zbekiston Respublikasi Ichki ishlar vazirligi Sog‘liqni saqlash vazirligining buyurtmanomalari bo‘yicha sog‘liqni saqlash vazirining o‘rinbosariga va unga biriktirilgan xorijiy mutaxassislarga hamda ularning oila a’zolariga davlat boji undirilmasdan ko‘p martalik vizalar belgilangan tartibda berilishi va uzaytirilishini, vaqtincha turgan joyi bo‘yicha ro‘yxatga olinishini ta’minlasin.

8. O‘zbekiston Respublikasi Prezidentining “O‘zbekiston Respublikasi Sog‘liqni saqlash vazirligi faoliyatini tashkil etish chora-tadbirlari to‘g‘risida” 2018-yil 7-dekabrdagi PQ-4055-son qaroriga ilovaga muvofiq o‘zgartirish kiritilsin.

9. Mazkur qarorning ijrosini nazorat qilish O‘zbekiston Respublikasi Bosh vazirining o‘rinbosari A.A. Abduxakimov, O‘zbekiston Respublikasi Prezidentining maslahatchisi A.A. Abduvaxitov va O‘zbekiston Respublikasi Prezidenti maslahatchisining birinchi o‘rinbosari B.M. Mavlonov zimmasiga yuklansin.

O‘zbekiston Respublikasi Prezidentining “O‘zbekiston Respublikasi Sog‘liqni saqlash vazirligi faoliyatini tashkil etish chora-tadbirlari to‘g‘risida” 2018-yil 7-dekabrdagi PQ-4055-son qarorida:

a) 7-bandning beshinchi xatboshisi quyidagi tahrirda bayon qilinsin:

“O‘zbekiston Respublikasi Davlat budjeti hisobidan moliyalashtiriladigan Vazirlikning markaziy apparati boshqaruv xodimlarining cheklangan soni 127 nafar, sog‘liqni saqlash hududiy boshqaruv organlari xodimlarining cheklangan soni — 391 nafar etib belgilansin”;

b) 2-ilova matni quyidagi tahrirda bayon etilsin: