Oʻzbekiston Respublikasi Prezidentining “Termiz” erkin iqtisodiy zonasini tashkil etish toʻgʻrisida” 2018-yil 18-sentabrdagi PF-5540-son Farmoni ijrosini taʼminlash maqsadida Vazirlar Mahkamasi qaror qiladi:

1. Surxondaryo viloyati hokimligi, Oʻzbekiston Respublikasi Tashqi savdo vazirligi, Investitsiyalar boʻyicha davlat qoʻmitasi, Yer resurslari, geodeziya, kartografiya va davlat kadastri davlat qoʻmitasi, Iqtisodiyot va sanoat vazirligi hamda “Surkhan Global Trade” MChJning:

“Termiz” erkin iqtisodiy zonasiga (keyingi oʻrinlarda “Termiz” EIZ deb ataladi) kiruvchi hududlar chegaralarini ilovaga* muvofiq belgilash;

“Termiz” erkin iqtisodiy zonasi direksiyasining (keyingi oʻrinlarda Direksiya deb ataladi) tashkiliy-huquqiy tuzilmasini qonunchilikda belgilangan tartibda masʼuliyati cheklangan jamiyat shaklida taʼsis etish toʻgʻrisidagi taklifi qabul qilinsin.

2. Quyidagilar “Termiz” EIZning asosiy vazifalari va faoliyati yoʻnalishlari hisoblanadi:

“Termiz” EIZni rivojlantirish davlat dasturlarining toʻliq va oʻz vaqtida bajarilishini taʼminlash;

“Termiz” EIZ hududida alohida huquqiy rejimga rioya etilishini taʼminlash;

Surxondaryo viloyati erkin iqtisodiy zonalar va kichik sanoat zonalarining maʼmuriy kengashi (keyingi oʻrinlarda Maʼmuriy kengash deb ataladi) tomonidan qabul qilingan qarorlarga asosan “Termiz” EIZ qatnashchilarini roʻyxatdan oʻtkazish va ularning reyestrini yuritish, ularga tegishli guvohnomalar berish;

investorlar bilan investitsiyalar kiritish toʻgʻrisida bitimlar tuzish;

“Termiz” EIZ hududida investitsiya loyihalarini amalga oshirish uchun xorijiy va mahalliy investorlarni qidirish va ular bilan ishlash;

belgilangan tartibda tanlab olingan investorlar tomonidan oʻz zimmalariga qabul qilingan majburiyatlarning zarur tarzda bajarilishini tizimli nazorat qilish, keyinchalik natijalarni Maʼmuriy kengashga taqdim etish;

“Termiz” EIZ qatnashchilariga, shu jumladan davlat organlarida ularning manfaatlarini ifodalash yoʻli bilan xizmatlar koʻrsatish;

“Termiz” EIZ hududida infratuzilma obyektlarini tashkil etish va ularning faoliyat yuritish jarayonlarini muvofiqlashtirish;

“Termiz” EIZ hududidagi yer maydonlarini va koʻchmas mulk obyektlarini boshqarish.

3. Belgilansinki, “Surkhan Global Trade” MChJ:

Direksiyaning yagona taʼsischisi hisoblanadi;

“Termiz” EIZ hududida toʻgʻridan toʻgʻri investitsiyalarni, shu jumladan xorijiy investitsiyalarni jalb qilish hisobiga investitsiya loyihalarini amalga oshirishni nazarda tutuvchi faol investitsiya siyosatini amalga oshiradi va muvofiqlashtiradi.

4. Oʻzbekiston Respublikasi Moliya vazirligi Vazirlar Mahkamasining zaxira jamgʻarmasidan Direksiyaga, kelgusi yillarda oʻzini oʻzi moliyalashtirishga oʻtkazish sharti bilan, 2019 — 2021-yillar davrida saqlash xarajatlari uchun asoslangan hisob-kitoblar boʻyicha zarur mablagʻlar ajratilishini taʼminlasin.

5. Surxondaryo viloyati hokimligi:

Oʻzbekiston Respublikasi Iqtisodiyot va sanoat vazirligi, Moliya vazirligi, Investitsiyalar boʻyicha davlat qoʻmitasi, Axborot texnologiyalari va kommunikatsiyalarini rivojlantirish vazirligi, Avtomobil yoʻllari davlat qoʻmitasi, “Oʻzbekenergo” AJ, “Oʻztransgaz” AJ, “Oʻzbekiston temir yoʻllari” AJ bilan birgalikda “Termiz” EIZ hududida muhandislik-kommunikatsiya infratuzilmasini joylashtirish va tashkil etish dasturini bir oy muddatda Vazirlar Mahkamasiga kiritsin;

Direksiyaning oʻz binolari qurilgunga qadar Direksiyani Surxondaryo viloyati Termiz tuman hokimligining binosidan tekin foydalanish huquqi bilan xizmat xonalari bilan taʼminlasin.

6. Oʻzbekiston Respublikasi Investitsiyalar boʻyicha davlat qoʻmitasi, Moliya vazirligi, Iqtisodiyot va sanoat vazirligi bilan birgalikda har yili Oʻzbekiston Respublikasining rivojlanish davlat dasturlarini shakllantirishda belgilangan tartibda ularga “Termiz” EIZning muhandislik-kommunikatsiya va yoʻl-transport infratuzilmasini bosqichma-bosqich rivojlantirish boʻyicha loyihalar kiritilishini nazarda tutsin.

7. Avtomobil yoʻllari davlat qoʻmitasi “Oʻzbekiston temir yoʻllari” AJ, Oʻzbekiston Respublikasi Davlat bojxona qoʻmitasi bilan birgalikda “Termiz” EIZ hududida logistik markazi va bojxona punkti tashkil etish boʻyicha uch oy muddatda Vazirlar Mahkamasiga taklif kiritsin.

8. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari — “Oʻzbekiston temir yoʻllari” AJ boshqaruvi raisi A.J. Ramatov, Oʻzbekiston Respublikasi Bosh vaziri oʻrinbosari — Investitsiyalar boʻyicha davlat qoʻmitasi raisi S.R. Xolmuradov, Oʻzbekiston Respublikasi Bosh vaziri oʻrinbosari — moliya vaziri J.A. Qoʻchqorov zimmasiga yuklansin.