Xalq isteʼmol tovarlari, ayniqsa bolalar uchun tovarlar va badiiy hunarmandchilik buyumlari ishlab chiqarishni rivojlantirishni davlat tomonidan qoʻllab-quvvatlash, korxonalarni zamonaviy texnika va ilgʻor texnologiya bazasida qurish va texnika bilan qayta jihozlashni tugallash, raqobatbardoshli va importning oʻrnini bosuvchi mahsulotlar ishlab chiqarish oʻsishini ragʻbatlantirish, yengil va mahalliy sanoat korxonalari ishini barqarorlashtirish va ularni moliyaviy sogʻlomlashtirish maqsadida Vazirlar Mahkamasi qaror qiladi:

1. 1996 — 1998-yillarda banklarning kreditlari hisobiga qurish, rekonstruksiya qilish, kengaytirish, texnika bilan qayta jihozlash va qoʻshma korxonalar tashkil etish boʻyicha “Oʻzbekyengilsanoat” uyushmasi va “Mahalliy sanoat” korporatsiyasi tomonidan ishlab chiqilgan tarmoqlarni rivojlantirish dasturi 1 va 2-ilovalarga* muvofiq maʼqullansin.

Oʻzbekiston Respublikasining tijorat banklari — “Oʻzsanoatqurilishbank”, “Paxta-bank”, Tashqi iqtisodiy faoliyat milliy banki, “Oʻzbekyengilsanoatbank”ka 1 va 2-ilovalarda nazarda tutilgan obyektlarni qurish, rekonstruksiya qilish va texnika bilan qayta jihozlashni mablagʻ bilan taʼminlash uchun ustuvor tartibda uzoq muddatli kreditlar berish tavsiya etilsin.

Oʻzbekiston Respublikasi Tashqi iqtisodiy faoliyat milliy banki (Azimov) loyihalarning samaradorligi va oʻzini qoplashini tasdiqlovchi ekspertiza asosida “Oʻzbekyengilsanoat” uyushmasi va “Mahalliy sanoat” korporatsiyasiga texnika bilan qayta jihozlash va mazkur qarorga 2-ilovada koʻrsatilgan tashkil etilayotgan qoʻshma korxonalar uchun xorijiy valyutada kredit ajratsin.

2. Xorijiy sarmoyalar boʻyicha agentlik respublika yengil va mahalliy sanoat korxonalarini rekonstruksiya qilish va qurishning loyihalarini keng reklama qilishni, shuningdek ularni amalga oshirishga xorijiy investorlar sifatida banklar, kompaniyalar va xalqaro moliya organlarini faol jalb qilishni oʻz faoliyatining asosiy vazifalaridan biri deb hisoblasin.

“Oʻzbekinvest” kompaniyasi koʻrsatib oʻtilgan loyihalar sugʻurta qilinishini taʼminlasin.

Agentlik va “Oʻzbekinvest” kompaniyasi mazkur bandning qanday bajarilayotganligi toʻgʻrisida yilning har choragida Oʻzbekiston Respublikasi Vazirlar Mahkamasiga axborot bersin.

4. “Oʻzistiqbolstat” davlat qoʻmitasi (Ismoilov) respublikaning 1997-1998-yillarga moʻljallangan investitsiya dasturini shakllantirishda unga yengil va mahalliy sanoat obyektlari kiritilishini nazarda tutsin.

5. Mazkur qarorga 1-ilovada koʻrsatilgan korxonalar obyektlar qurilishi tugallanishi muddatigacha, biroq normativ muddatdan ortiq emas, yer soligʻi toʻlashdan ozod qilinsin.

7. “Oʻzbekyengilsanoat” uyushmasi va “Mahalliy sanoat” korporatsiyasi tizimlarida faoliyat koʻrsatayotgan va ustav jamgʻarmasida xorijiy investorning ulushi kamida 50 foizni tashkil etgan qoʻshma korxonalar, soliqning butun miqdorini xalq isteʼmol tovarlari, birinchi navbatda bolalar uchun tovarlar ishlab chiqarishni rivojlantirish va kengaytirishga qayta investitsiya qilganlari taqdirda, foyda (daromad)dan olinadigan soliqdan ozod qilinsinlar.

9. Pul-kredit siyosati boʻyicha respublika komissiyasi “Oʻzbekyengilsanoat” uyushmasiga pillani mavsumiy xarid qilish uchun 1996-yilda oʻz oborot mablagʻlarini toʻldirishga 200 mln. soʻm miqdorida kredit ajratish masalasini belgilangan tartibda hal etsin.

10. Tijorat banklari (Ibotov, Sayfutdinov, Muhitdinov) va Oʻzbekiston Respublikasi Tashqi iqtisodiy faoliyat milliy banki (Azimov) pilla, tabiiy jun, qand lavlagi xarid qilish uchun ilgari berilgan va qaytarilmagan kreditlar uchun foiz stavkalarini pasaytirish masalasini koʻrib chiqsinlar hamda ularni toʻlash muddatini 1997-yil 1-yanvargacha kechiktirsinlar, “Oʻzbekyengilsanoat” uyushmasi va “Mahalliy sanoat” korporatsiyasining ipakchilik, jun va qandolatchilik tarmoqlari korxonalarini muddati oʻtkazib yuborilgan toʻlovlar boʻyicha penya toʻlashdan ozod qilsinlar.

11. “Oʻzbekyengilsanoat” uyushmasi Oʻzbekiston Respublikasi Davlat mulki qoʻmitasi bilan birgalikda tarmoqning aksiyadorlik jamiyatlari ishtirokida moliya-sanoat guruhi tashkil etish masalasini koʻrib chiqsin va bir oy muddatda belgilangan tartibda Vazirlar Mahkamasiga takliflar kiritsin.

12. “Oʻzbekyengilsanoat” uyushmasi, “Mahalliy sanoat” korporatsiyasi, “Oʻzbeksavdo” uyushmasi, Oʻzbekbirlashuv Oʻzbekiston Respublikasi Moliya vazirligi va Davlat soliq qoʻmitasi bilan kelishgan holda ishlab chiqarishdan olib tashlangan xaridorgir boʻlmagan va kasod tovarlar qoldiqlari narxlarini oʻz daromad manbalari hisobiga arzonlashtirsinlar.

13. Oʻzbekiston Respublikasi Adliya vazirligi ikki hafta muddatda qonunchilikka mazkur qarordan kelib chiquvchi oʻzgartirishlar kiritishga doir takliflarni taqdim etsin.

14. Tegishli vazirliklar, idoralar bir oy muddatda mazkur qarorning qanday bajarilayotganligi toʻgʻrisida axborot bersinlar. Qarorning bajarilishini nazorat qilish Oʻzbekiston Respublikasi Bosh vazirining oʻrinbosarlari M.Z. Usmonov, B.S. Hamidov zimmasiga yuklansin.