Iqtisodiyotning moliya sektorini rivojlantirishga xorijiy investitsiyalarni keng jalb qilish hamda zamonaviy biznes markazi, savdo-koʻngilochar va mehmonxona kompleksini tashkil etish yoʻli bilan Toshkent shahrining turizm salohiyatini oshirish maqsadida Vazirlar Mahkamasi qaror qiladi:

1. Toshkent shahar hokimligi, Oʻzbekiston Respublikasi Investitsiyalar boʻyicha davlat qoʻmitasi, Qurilish vazirligi hamda Turizmni rivojlantirish davlat qoʻmitasining “Taşkent Merkez Park Gayrimenkul Yatirim Anonim Şirketi” kompaniyasi (Turkiya Respublikasi) va “UzTur Investment and Development” MChJ (Oʻzbekiston Respublikasi) (keyingi oʻrinlarda investorlar deb ataladi) tomonidan Toshkent shahrida “Tashkent Central Park” koʻp tarmoqli kompleksi qurish loyihasini (keyingi oʻrinlarda loyiha deb ataladi) amalga oshirish toʻgʻrisidagi taklifi maʼqullansin.

2. Investorlar loyihani amalga oshirish doirasida 2019-2020-yillarda oʻz mablagʻlari va jalb qilingan mablagʻlar hisobidan loyiha hujjatlariga muvofiq besh yulduzli mehmonxona, savdo-koʻngilochar markaz, tijorat banki uchun maʼmuriy binolar hamda boshqa inshootlar qurish majburiyatini olganliklari maʼlumot uchun qabul qilinsin.

3. Oʻzbekiston Respublikasi Investitsiyalar boʻyicha davlat qoʻmitasi:

xorijiy investorlar bilan xorijiy investorlar hukuq va majburiyatlari, investitsiyalar hajmi, yangi tashkil etiladigan ish oʻrinlari, taqdim etiladigan imtiyozlar va preferensiyalar hamda boshqa shartlarni qamrab oluvchi investitsiya shartnomasi bir oy muddatda, belgilangan tartibda tuzilishini taʼminlasin;

xorijiy investorlar tomonidan investitsiya shartnomasidan kelib chiquvchi majburiyatlarning ijro qilinishi yuzasidan nazorat oʻrnatsin.

4. Toshkent shahar hokimligi Oʻzbekiston Respublikasi Qurilish vazirligi, Oʻzbekiston Respublikasi Yer resurslari, geodeziya, kartografiya va davlat kadastri davlat qoʻmitasi bilan birgalikda “UzTur Investment and Development” MChJga loyihani amalga oshirish uchun Toshkent shahri, Yunusobod tumanidagi AmirTemur shoh koʻchasi, Shahrisabz va Istiqlol koʻchalari doirasidagi umumiy maydoni 2,5 gektar boʻlgan yer maydoni doimiy foydalanish huquqi asosida belgilangan tartibda ajratilishini taʼminlasin.

5. Loyihani amalga oshirish doirasida investorlar, pudrat va subpudrat tashkilotlariga:

qurilishni “fast-track” uslubida, foydalanishga “tayyor holda topshirish” shartlarida amalga oshirishga;

qurilish uchun olib kelinadigan import tovarlarni omborlarda “bojxona ombori” rejimida joylashtirishga ruxsat berilsin.

6. Loyihani amalga oshirish doirasida 2022-yil 1-yanvarga qadar:

a) investorlar va pudrat tashkiloti:

yagona ijtimoiy toʻlovdan tashqari barcha turdagi soliqlar va davlat maqsadli jamgʻarmalariga majburiy toʻlovlarni toʻlashdan;

investorlar, pudrat va subpudrat tashkilotlarining xorijiy mutaxassislarining ish haqi fondi boʻyicha yagona ijtimoiy toʻlovni toʻlashdan;

belgilangan tartibda shakllantiriladigan roʻyxatlar boʻyicha olib kelinadigan materiallar, xomashyo, uskunalar, texnologik hujjatlar, butlovchi buyumlar va ehtiyot qismlar, shuningdek, metall prokati uchun bojxona toʻlovlari toʻlashdan (bojxona rasmiylashtiruvi yigʻimlaridan tashqari);

belgilangan tartibda tasdiqlanadigan roʻyxatlar boʻyicha “vaqtincha olib kirish” bojxona rejimida olib kelinadigan qurilish texnikasi, mashina va mexanizmlar, transport vositalari davriy bojxona toʻlovlari toʻlashdan;

b) investorlar, pudrat va subpudrat tashkilotlari Oʻzbekiston Respublikasi norezidentlari tomonidan bajariladigan ishlar (koʻrsatiladigan xizmatlar) boʻyicha qoʻshilgan qiymat soligʻini toʻlashdan ozod qilinsin.

7. Oʻzbekiston Respublikasi Davlat soliq qoʻmitasi Davlat bojxona qoʻmitasi bilan birgalikda ushbu qaror bilan berilgan soliq va bojxona imtiyozlari qoʻllanilishining qonuniyligi hamda imtiyozlar qoʻllangan holda import qilingan tovarlardan maqsadli foydalanilishi yuzasidan qatʼiy nazorat oʻrnatsin.

8. Belgilansinki:

investorlar ushbu qarorga muvofiq imtiyozlarni qoʻllagan holda belgilangan tartibda shakllantirilgan roʻyxatlar boʻyicha import qilinadigan tovarlardan maqsadli foydalanilishi uchun shaxsan javob beradilar;

soliq va bojxona imtiyozlarini noqonuniy qoʻllash hamda ushbu qarorga muvofiq berilgan imtiyozlarni qoʻllagan holda belgilangan tartibda shakllantiriladigan va tasdiqlanadigan roʻyxatlar boʻyicha import qilinadigan tovarlardan maqsaddan tashqari foydalanish holatlari aniqlangan taqdirda soliq va bojxona imtiyozlarini qoʻllash natijasida boʻshaydigan mablagʻlar, qonun hujjatlarida nazarda tutilgan jarima sanksiyalarini qoʻllagan, shu jumladan penyalarni hisoblab yozgan holda toʻliq hajmda Oʻzbekiston Respublikasi Davlat budjetiga undiriladi.

9. Toshkent shahar hokimligi Oʻzbekiston Respublikasi Uy-joy kommunal xizmat koʻrsatish vazirligi, “Oʻzbekenergo” AJ, “Oʻztransgaz” AJ hamda “Oʻzbektelekom” AJ bilan birgalikda investorlar mablagʻlari hisobidan loyiha quvvatlariga muvofiq qurilish obyektlariga muhandislik — kommunikatsiya infratuzilmalari (elektr energiyasi, gaz taʼminoti, ichimlik suv, kanalizatsiya, telefon aloqasi va boshqalar) oʻtkazilishini belgilangan tartibda taʼminlasin.

10. Oʻzbekiston Respublikasi Tashqi ishlar vazirligi investorlarning buyurtmanomalariga binoan, loyihani amalga oshirishda qatnashadigan xorijiy mutaxassislarga kirish vizalari konsullik va boshqa yigʻimlar undirilmagan holda rasmiylashtirilishini belgilangan tartibda taʼminlasin.

11. Oʻzbekiston Respublikasi Ichki ishlar vazirligi investorlarning buyurtmanomalariga binoan, loyihani amalga oshirishda qatnashadigan xorijiy mutaxassislarga koʻp martalik vizalar berilishi va muddati uzaytirilishini, shuningdek, ular vaqtincha yashaydigan joyda vaqtinchalik propiska qilinishini va uning muddati uzaytirilishini davlat boji undirmasdan rasmiylashtirishni belgilangan tartibda taʼminlasin.

12. Oʻzbekiston Respublikasi Bandlik va mehnat munosabatlari vazirligi investorlarning buyurtmanomalariga binoan, xorijiy mutaxassislarni Oʻzbekiston Respublikasiga jalb etishga ruxsatnomalar berilishini (muddati uzaytirilishini), shuningdek, koʻrsatilgan xorijiy fuqarolarga Oʻzbekiston Respublikasi hududida mehnat faoliyati bilan shugʻullanish huqukiga tasdiqnomalar berilishini (muddati uzaytirilishini) taʼminlasin.

13. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari — “Oʻzbekiston temir yoʻllari” AJ boshqaruvi raisi A.J. Ramatov, Oʻzbekiston Respublikasi Bosh vazirining oʻrinbosari — Oʻzbekiston Respublikasi Investitsiyalar boʻyicha davlat qoʻmitasi raisi S.R. Xolmuradov va Toshkent shahar hokimi vazifasini bajaruvchi J.A. Artikxodjayev zimmasiga yuklansin.