Oʻzbekiston Respublikasi Prezidentining “Oʻzbekiston Respublikasi Davlat mulki qoʻmitasi huzurida Qimmatli qogʻozlar bozori ishlashini muvofiqlashtirish va nazorat qilish markazini tashkil etish toʻgʻrisida”gi Farmonining bajarilishini taʼminlash maqsadida Vazirlar Mahkamasi qaror qiladi:

1. Oʻzbekiston Respublikasi Davlat mulki qoʻmitasi huzuridagi qimmatli qogʻozlar bozori faoliyatini muvofiqlashtirish va nazorat qilish markazini boshqarishning tashkiliy tuzilmasi va uning apparati tuzilmasi 1, 2, 2a-ilovalarga muvofiq tasdiqlansin.

Oʻzbekiston Respublikasi Davlat mulki qoʻmitasi huzuridagi qimmatli qogʻozlar bozori faoliyatini muvofiqlashtirish va nazorat qilish markazi tizimi xodimlarining cheklangan soni hududiy boʻlinma (boʻlim)lar bilan birgalikda 180 kishidan iborat etib, shu jumladan Oʻzbekiston Respublikasi Moliya vazirligi huzuridagi qimmatli qogʻozlar va fond birjalari boʻyicha davlat komissiyasi xodimlarining ilgari belgilangan soniga qoʻshimcha ajratiladigan 113 kishini ham qoʻshgan holda, tasdiqlansin. Markaz apparati xodimlarining soni (xizmat koʻrsatuvchi xodimlardan tashqari) 45 kishi boʻlishiga rozilik berilsin.

2. Qoʻshimcha ravishda Oʻzbekiston Respublikasi Davlat mulki qoʻmitasi raisining birinchi oʻrinbosari — qimmatli qogʻozlar bozori faoliyatini muvofiqlashtirish va nazorat qilish markazining bosh direktori lavozimi kiritilsin.

Markazga Bosh direktorning Oʻzbekiston Respublikasi Vazirlar Mahkamasi tomonidan lavozimga tayinlanadigan ikki nafar oʻrinbosari boʻlishiga ruxsat etilsin.

3. Belgilab qoʻyilsinki, hududiy boʻlinmalar (boʻlimlar) oʻz faoliyatida Oʻzbekiston Respublikasi Davlat mulki qoʻmitasi huzuridagi qimmatli qogʻozlar bozori faoliyatini muvofiqlashtirish va nazorat qilish markaziga va davlat mulkini boshqarish va tadbirkorlikni qoʻllab-quvvatlash hududiy organlariga boʻysunadilar.

Qimmatli qogʻozlar bozori faoliyatini muvofiqlashtirish va nazorat qilish hududiy boʻlimlarining rahbarlari Oʻzbekiston Respublikasi Davlat mulki qoʻmitasi tegishli hududiy boshqarmasining rahbari tomonidan, Oʻzbekiston Respublikasi Davlat mulki qoʻmitasi huzuridagi Markazning bosh direktori bilan kelishgan holda lavozimga tayinlanadilar va lavozimdan ozod qilinadilar.

Markaz xodimlariga Oʻzbekiston Respublikasi Davlat mulki qoʻmitasi xodimlari uchun belgilangan mehnatga haq toʻlash shartlari joriy etilsin.

4. Oʻzbekiston Respublikasi Davlat mulki qoʻmitasi huzuridagi Qimmatli qogʻozlar bozori faoliyatini muvofiqlashtirish va nazorat qilish markazi toʻgʻrisidagi Nizom 3-ilovaga muvofiq tasdiqlansin.

5. Belgilab qoʻyilsinki, Oʻzbekiston Respublikasi Davlat mulki qoʻmitasi huzuridagi Qimmatli qogʻozlar bozori faoliyatini muvofiqlashtirish va nazorat qilish markazi markaziy apparatining va uning hududiy boʻlinmalarining joriy faoliyatini mablagʻ bilan taʼminlash respublika budjeti hisobidan amalga oshiriladi.

6. Oʻzbekiston Respublikasi Davlat mulki qoʻmitasi qimmatli qogʻozlar bozori faoliyatini muvofiqlashtirish va nazorat qilish hududiy boʻlimi toʻgʻrisidagi namunaviy nizomni bir oy muddatda ishlab chiqsin va belgilangan tartibda tasdiqlasin.

7. Oʻzbekiston Respublikasi Moliya vazirligi:

Qimmatli qogʻozlar bozori faoliyatini muvofiqlashtirish va nazorat qilish markaziy apparatini va uning hududiy boʻlimlarini mablagʻ bilan taʼminlash uchun respublika budjetida zarur mablagʻlarni belgilangan tartibda nazarda tutsin;

Oʻzbekiston Respublikasi Moliya vazirligi huzuridagi Qimmatli qogʻozlar va fond birjalari davlat komissiyasining hamda uning hududiy boʻlinmalarining moddiy-texnika resurslarini, anjomlarini, asbob-uskunalarini va transport vositalarini Markazga bersin;

markaziy apparatda Moliya vazirligining Qimmatli qogʻozlar boshqarmasi negizida 18 kishidan iborat Davlat qimmatli qogʻozlar emissiyasi boshqarmasini tashkil etsin.

8. Oʻzbekiston Respublikasi Moliya vazirligi huzuridagi Qimmatli qogʻozlar va fond birjalari davlat komissiyasining hududiy boʻlinmalari ilgari egallab kelgan xizmat binolari va aloqa liniyalari Oʻzbekiston Respublikasi Davlat mulki qoʻmitasi huzuridagi Qimmatli qogʻozlar bozori faoliyatini muvofiqlashtirish va nazorat qilish markazining hududiy boʻlinmalari (boʻlimlari) ixtiyorida qoldirilsin.

9. Qimmatli qogʻozlar bozori faoliyatini muvofiqlashtirish va nazorat qilish markazining markaziy apparati Toshkent shahar, “Pravda Vostoka” koʻchasi, 10-uydagi Respublika birja markazi binosiga joylashtirilsin.

10. Oʻzbekiston Respublikasi Vazirlar Mahkamasining “Respublikada qimmatli qogʻozlar bozorining faoliyat koʻrsatishini tartibga solish va uni yanada rivojlantirish chora-tadbirlari toʻgʻrisida” 1995-yil 7-sentabrdagi 351-son qarorining 1—3-bandlari oʻz kuchini yoʻqotgan deb hisoblansin.

11. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari V.A. Chjen zimmasiga yuklansin.

Bosh direktor — Oʻzbekiston Respublikasi Davlat mulki qoʻmitasi raisining birinchi oʻrinbosari

Apellatsiyalarni koʻrib chiqish kengashi

Bosh direktor oʻrinbosari

Bosh direktor oʻrinbosari

Metodologiya va qonunchilikni amalga oshirish boshqarmasi

Qimmatli qogʻozlar operatsiyalarini va qimmatli qogʻozlar bozori ishtirokchilari faoliyatini tartibga solish va nazorat qilish boshqarmasi

Qimmatli qogʻozlar bozori xorijiy ishtirokchilarining faoliyatini tartibga solish boshqarmasi

Davlat reyestri, hisobga olish va hisobotni tashkil etish boshqarmasi

Hududiy boʻlinmalar (boʻlimlar) faoliyatini muvofiqlashtirish boshqarmasi

Axborot boshqarmasi

Ishlar boshqarmasi

1. Oʻzbekiston Respublikasi Davlat mulki qoʻmitasi huzuridagi qimmatli qogʻozlar bozori faoliyatini muvofiqlashtirish va nazorat qilish markazi (keyingi oʻrinlarda — Markaz) davlat boshqaruv organi hisoblanadi.

2. Markaz oʻz faoliyatida Oʻzbekiston Respublikasi Konstitutsiyasiga, qonunlariga, Oʻzbekiston Respublikasi Oliy Majlisining boshqa hujjatlariga, Oʻzbekiston Respublikasi Prezidentining farmonlari, qarorlari va farmoyishlariga, Vazirlar Mahkamasining qarorlari va farmoyishlariga, boshqa normativ hujjatlarga, shuningdek mazkur Nizomga amal qiladi.

3. Markazning oʻz vakolatlari doirasida qabul qilgan qarorlari davlat va mahalliy boshqaruv organlari, mulkchilik shakllaridan qatʼi nazar, xoʻjalik birlashmalari, korxonalar va tashkilotlar, shuningdek Oʻzbekiston Respublikasi va xorijiy davlatlarning fuqarolari tomonidan bajarilishi majburiydir.

4. Markaz yuridik shaxs hisoblanadi, Oʻzbekiston Respublikasi gerbi tasviri tushirilgan va oʻz nomi yozilgan muhrga, banklarda hisob-kitob va valyuta schyotlariga ega boʻladi.

5. Quyidagilar Markazning asosiy vazifalari hisoblanadi:

respublikada qimmatli qogʻozlar bozorini shakllantirish, rivojlantirish, nazorat qilish va boshqarish sohasida davlat siyosatini amalga oshirish;

respublikada roʻyxatdan oʻtkazilgan qimmatli qogʻozlar chiqarilishi va bozor qatnashchilarining, qimmatli qogʻozlar bozori tuzilmasi va rivojlanishi boʻyicha maʼlumotlar bankining yagona reyestrlarini yuritish, hisobga olish va hisobotni tashkil etish, qimmatli qogʻozlar muomalasini, qimmatli qogʻozlar bozori qatnashchilarining kasb faoliyatini boshqarish;

barcha davlat organlari va xoʻjalik yurituvchi subyektlar tomonidan qimmatli qogʻozlar va qimmatli qogʻozlar bozori qatnashchilari faoliyati toʻgʻrisidagi qonunchilikning bajarilishini nazorat qilish va taʼminlash;

qimmatli qogʻozlarning milliy va xalqaro bozorlarida oʻzbekistonlik va xorijiy emitentlarning qimmatli qogʻozlari chiqarilishi va samarali muomalada boʻlishi uchun zarur huquqiy shart-sharoitlarni taʼminlovchi normativ hujjatlarni ishlab chiqish;

qimmatli qogʻozlar bilan operatsiyalarni amalga oshiruvchi yuridik va jismoniy shaxslar — investorlarning huquq va manfaatlarini himoya qilish;

qimmatli qogʻozlar bozorining ahvoli va uning qatnashchilari toʻgʻrisida investorlarni va jamoatchilikni keng xabardor qilish;

qimmatli qogʻozlar bozorining samarali infrastrukturasini tashkil etishda qatnashish;

Oʻzbekiston Respublikasi vazirliklari, idoralari, mahalliy boshqaruv organlarining, professional va noprofessional qatnashchilarning, ularning birlashmalari (uyushmalari)ning qimmatli qogʻozlar bozoridagi faoliyatini muvofiqlashtirish.

6. Markaz oʻziga yuklangan vazifalarga muvofiq:

qimmatli qogʻozlar va ularning emitentlari toʻgʻrisidagi axborotning toʻliq ochilishi va uning tushunarli boʻlishi ustidan nazoratni amalga oshiradi;

qimmatli qogʻozlar bozorini shakllantirish va tartibga solish hamda uning qatnashchilari faoliyati masalalariga oid normativ hujjatlarni ishlab chiqadi;

investorlarning korxonani (aksionerlik jamiyatini) boshqarishda qatnashishdagi, dividendlar olishdagi huquq va manfaatlarini himoya qilish chora-tadbirlarini koʻradi;

oʻzbekistonlik emitentlar qimmatli qogʻozlarining chet elda va xorijiy emitentlar qimmatli qogʻozlarining Oʻzbekiston Respublikasi hududida muomalada boʻlishi shartlari va tartibini belgilaydi;

qimmatli qogʻozlar va ularning hosilalari emissiyasini (chiqarilishini), emitentlar, shu jumladan Oʻzbekiston Respublikasi hududida qimmatli qogʻozlar emissiyasini amalga oshiruvchi xorijiy emitentlar qimmatli qogʻozlari emissiyasi prospektlarini roʻyxatdan oʻtkazadi;

investitsiya institutlari sifatida qimmatli qogʻozlar bozoridagi faoliyatga litsenziya beradi;

tegishli davlat organlari bilan birgalikda qimmatli qogʻozlar bozorining samarali infrastrukturasini tashkil etishda qatnashadi;

qimmatli qogʻozlar bozori qatnashchilarining faoliyatini muvofiqlashtiradi, qimmatli qogʻozlar bilan kasb faoliyatini amalga oshirishga yagona talablarni, qimmatli qogʻozlar bilan bitishuvlarni amalga oshirish qoidalarini, qimmatli qogʻozlar bilan operatsiyalar oʻtkazish hisobi va hisoboti standartlarini ishlab chiqadi va tasdiqlaydi;

qimmatli qogʻozlar bilan operatsiyalar oʻtkazilishining toʻgʻriligini nazorat qiladi hamda qimmatli qogʻozlar bozori qatnashchilari faoliyati ustidan, xorijiy emitentlarning qimmatli qogʻozlari Oʻzbekiston Respublikasi qimmatli qogʻozlar bozoriga muomalaga qoʻyilishi qoidalari hamda kvotalariga rioya etilishi ustidan nazoratni amalga oshiradi va ushbu qoidalar va qoidalarni buzuvchilarga nisbatan qonunchilikda nazarda tutilgan chora-tadbirlarni qoʻllaydi;

qimmatli qogʻozlar bozori qatnashchilariga nisbatan malaka talablarini belgilaydi, ularni attestatsiyadan oʻtkazadi, guvohnomalar, qimmatli qogʻozlar egalari reyestri va hisobga olish registri yuritilishiga talabnomalarni beradi, ularga rioya etilishini nazorat qiladi;

Oʻzbekiston Respublikasi Markaziy banki bilan birgalikda tijorat banklarining qimmatli qogʻozlar bozoridagi faoliyati ustidan nazoratni amalga oshiradi;

qonunchilik hujjatlari va normativ hujjatlarining ijro etilishini taʼminlash, qimmatli qogʻozlarning chiqarilishi, bozorga qoʻyilishi, muomalada boʻlishi va saqlanishini birxillashtirish, qimmatli qogʻozlar bilan operatsiyalar oʻtkazishning hisobi va hisoboti, qimmatli qogʻozlar bozori qatnashchilari faoliyatini nazorat qilish uchun qimmatli qogʻozlar bozorining professional qatnashchilari birlashmalari (uyushmalari) faoliyatini muvofiqlashtiradi va yoʻnaltiradi;

respublikada roʻyxatdan oʻtkazilgan qimmatli qogʻozlar chiqarishlarning, shuningdek investitsiya institutlari sifatida faoliyatga litsenziya olgan yuridik va jismoniy shaxslarning yagona davlat reyestrlarini yuritadi hamda ularni roʻyxatlarini eʼlon qiladi;

turlari boʻyicha roʻyxatdan oʻtkazilgan qimmatli qogʻozlarning miqdori haqidagi yillik ommaviy hisobotlarni tuzadi, investorlar va jamoatchilikning keng xabardor qilinishini taʼminlaydi;

axborot tizimini tashkil etish, qimmatli qogʻozlar bilan ishlashni avtomatlashtirish va kompyuterlashtirish chora-tadbirlarini amalga oshiradi;

qimmatli qogʻozlarga oid qonunlar va normativ hujjatlar ijrosini nazorat etish, qimmatli qogʻozlar ichki va tashqi bozorlarida qimmatli qogʻozlar bilan operatsiyalar oʻtkazishni birxillashtirish, ular qatnashchilari faoliyatini nazorat qilish boʻyicha birgalikdagi faoliyatni muvofiqlashtirish sohasida qimmatli qogʻozlar bozorini tartibga solib borish xalqaro va xorijiy organlari bilan hamkorlik qiladi;

Oʻzbekiston Respublikasining amaldagi qonunchilik hujjatlariga muvofiq Markazning vazifalari va vakolatlaridan kelib chiquvchi boshqa funksiyalarni bajaradi.

7. Markaz:

barcha emitentlar va qimmatli qogʻozlar bozorining qatnashchilari tomonidan axborot berish va eʼlon qilish qoidalarini belgilash;

oʻz qimmatli qogʻozlarini ommaviy sotish uchun qimmatli qogʻozlar bozorining faoliyat koʻrsatishini professional taʼminlovchi istalgan shaxs orqali taqdim etuvchi emitentdan, shuningdek fond birjalaridan Oʻzbekiston Respublikasi qonunchiligiga muvofiq tuzilishi va eʼlon qilinishi majburiy boʻlgan qoidalar, ustavlar, ish tartiblari, yoʻriqnomalar, namunaviy hujjatlar nusxalari taqdim etilishini talab etish;

emitentlarning va qimmatli qogʻozlar bozori qatnashchilarining buxgalteriya hujjatlarini qimmatli qogʻozlar va ular bilan operatsiyalar oʻtkazish haqidagi eʼlon qilingan axborotning toʻgʻriligini tekshirish yuzasidan, shuningdek qonunlar va normativ hujjatlar buzilganligi yoki buzilishi ehtimoli toʻgʻrisidagi maʼlumotlar tushishi yuzasidan tekshirish:

investorlarning, shuningdek qimmatli qogʻozlar bozori qatnashchilarining qimmatli qogʻozlar chiqarish, ularning muomalada boʻlishi, ular bilan operatsiyalar oʻtkazishga oid ularning qonuniy huquq va manfaatlari buzilishiga doir shikoyatlarini koʻrib chiqish, qimmatli qogʻozlar boʻyicha qonunchilikning buzilish hollarini tekshirish;

emitentlarning roʻyxatdan oʻtkazish uchun taqdim etilgan hujjatlarini tekshirish va ularga Oʻzbekiston Respublikasi qonunlari va normativ hujjatlariga muvofiq oʻzgartirish va qoʻshimchalar kiritilishini talab etish;

qimmatli qogʻozlar bozori faoliyati va uni rivojlantirish sohasida Oʻzbekiston Respublikasi manfaatlarini xalqaro darajada ifodalash;

yuqori malakali xorijiy va vatanimiz mutaxassislarini maslahatchilar va ekspertlar sifatida kontrakt asosida ishga taklif etish;

fond birjalari birja kengashlari, boshqa birjalarning fond boʻlimlari majlislarida qatnashish, birja faoliyatini nazorat qilishni amalga oshirish uchun davlat nazoratchilarini tayinlash;

Oʻzbekiston Respublikasi qonunchiligiga muvofiq qimmatli qogʻozlar bozori qatnashchilari boʻlgan professional uyushmalarning faoliyatini va ularning aʼzolari faoliyatini muvofiqlashtirish;

oʻz vakolatlari doirasida qimmatli qogʻozlarga oid qonunlar va normativ hujjatlarni buzuvchilarga nisbatan quyidagi sanksiyalarni qoʻllash;

qimmatli qogʻozlar bozori professional qatnashchilarining koʻrib chiqishi va bajarishi majburiy boʻlgan yozma koʻrsatmalarni kiritish;

fond birjalari (yoki boshqa birjalarning fond boʻlimlari)dan aʼzolaridan biri yoki bir nechtasi qimmatli qogʻozlarga oid Oʻzbekiston Respublikasi qonunchiligini va Markaz talablarini buzgan hollarda ularni faoliyat koʻrsatishdan chiqarishni yoki chetlatishni talab qilish;

qimmatli qogʻozlar emissiyasi prospektini belgilangan tartibda tasdiqlamasdan oʻtkazilayotgan qimmatli qogʻozlarni ochiq sotishga taklif qilishga oid reklamani toʻxtatishni emitentlardan talab qilish;

emitentlar tomonidan amaldagi qonunchilik buzilgan hollarda ularning emissiyasini va qimmatli qogʻozlari muomalasini toʻxtatish yoki cheklash;

qimmatli qogʻozlar bozorining professional qatnashchilari tomonidan qimmatli qogʻozlar toʻgʻrisidagi Oʻzbekiston Respublikasi qonunchiligi bir necha marta yoki qoʻpol ravishda buzilgan hollarda investitsiya institutlari va qimmatli qogʻozlar bozori qatnashchisi sifatida qimmatli qogʻozlar bilan faoliyatni amalga oshirish uchun berilgan litsenziyani toʻxtatib qoʻyish yoki bekor qilish toʻgʻrisida qaror qabul qilish;

qimmatli qogʻozlar toʻgʻrisidagi qonunchilik buzilishlarining aniqlangan faktlari boʻyicha materiallarini amaldagi qonunchilikka muvofiq huquqni himoya qilish organlariga oshirish;

fuqarolarga qimmatli qogʻozlarga oid professional faoliyat yuritish huquqini beruvchi malaka attestatsiyalari berish, shuningdek ular tomonidan amaldagi qonunchilik buzilgan hollarda ularning attestatsiyalarini toʻxtatib qoʻyish yoki ularni bekor qilish;

birjalar va qimmatli qogʻozlar bilan operatsiyalar oʻtkazish ishlari qoidalari buzilgan hollarda fond birjasida operatsiyalarni bir muncha vaqt toʻxtatib qoʻyish hamda operatsiyalar boʻyicha kliring va hisob-kitoblarni muayyan davrga toʻxtatish toʻgʻrisida Oʻzbekiston Respublikasining qonunchiligiga muvofiq qarorlar qabul qilish;

aksionerlik jamiyatlarini taʼsis etilmagan deb tan olinishiga taalluqli Markaz tomonidan aniqlangan maʼlumotlarni qonunchilik bilan belgilangan tartibda vakolatli davlat organlariga berish;

belgilangan tartib buzilgan va hujjatlar qonunchilik talablariga muvofiq kelmagan hollarda qimmatli qogʻozlarni roʻyxatga olishni rad etish huquqiga ega;

8. Markaz faoliyati uning bosh direktori, Apellatsiyalarni koʻrib chiqish kengashi, markaziy apparat va Markazning Qoraqalpogʻiston Respublikasi, viloyatlar va Toshkent shahridagi hududiy boʻlimlari tomonidan taʼminlanadi.

9. Markazning bosh direktori lavozimiga koʻra Oʻzbekiston Respublikasi Davlat mulki qoʻmitasi raisining birinchi oʻrinbosari hisoblanadi va Vazirlar Mahkamasi tomonidan tayinlanadi. Bosh direktor oʻrinbosarlari va Apellatsiyalarni koʻrib chiqish kengashi aʼzolari Bosh direktorning taqdimnomasiga koʻra Oʻzbekiston Respublikasi Vazirlar Mahkamasi tomonidan tayinlanadilar.

10. Qimmatli qogʻozlar bozori faoliyatini muvofiqlashtirish va nazorat qilish boʻyicha hududiy boʻlimlar oʻz faoliyatida Markazga va davlat mulkini boshqarish va tadbirkorlikni qoʻllab-quvvatlash hududiy organlariga boʻysunadilar.

Hududiy boʻlimlarning rahbarlari Markazning bosh direktori bilan kelishilgan holda Oʻzbekiston Respublikasi Davlat mulki qoʻmitasi tegishli hududiy boshqarmasining boshliqlari tomonidan lavozimga tayinlanadilar va lavozimdan ozod qilinadilar.

11. Markazning bosh direktori:

Markazga yuklangan vazifalarning bajarilishi uchun javob beradi, Markazning va uning joylardagi organlarining faoliyatini tashkil etadi, Markaz xodimlarining vazifalarini taqsimlaydi va ularning javobgarligi darajasini belgilaydi, Markaz xodimlarini ishga qabul qiladi va ularni ishdan boʻshatadi hamda boshqa vakolatlarni amalga oshiradi;

oʻz vakolati doirasida va Oʻzbekiston Respublikasining amaldagi qonunchiligi asosida buyruqlar, yoʻriqnomalar va qarorlar chiqaradi, koʻrsatmalar beradi va ularning bajarilishini tekshiradi, Markazning tarkibiy boʻlinmalari toʻgʻrisidagi nizomlarni tasdiqlaydi;

Markazning tasdiqlangan tuzilmasiga, xodimlari soni va mehnatga haq toʻlash fondiga oʻzgartirishlar kiritish yuzasidan belgilangan tartibda takliflar kiritishga haqlidir;

unga qonunchilik bilan berilgan hamda mazkur Nizomdan kelib chiquvchi boshqa funksiyalarni bajaradi.

12. Vazirlar Mahkamasi tomonidan tayinlanadigan yetti kishidan iborat boʻlgan Apellatsiyalarni koʻrib chiqish kengashi oʻzining muntazam oʻtkazib turiladigan majlislarida:

qimmatli qogʻozlar bozori qatnashchilarining notoʻgʻri xatti-harakatlari ustidan berilgan apellatsiyalarni koʻrib chiqadi va ular yuzasidan qaror chiqaradi;

eng muhim buyruqlar, qoidalar, yoʻriqnomalar va normativ tusdagi boshqa hujjatlar loyihalarini;

respublikada qimmatli qogʻozlar bozorini shakllantirish, rivojlantirish, nazorat qilish va tartibga solishga oid davlat siyosatini amalga oshirishning asosiy masalalarini koʻrib chiqadi.

13. Apellatsiyalarni koʻrib chiqish kengashining qarorlari uning majlisida kamida 5 aʼzo qatnashgan taqdirda Kengash aʼzolarining koʻpchilik ovozi bilan qabul qilinadi va Kengash qarorlari sifatida rasmiylashtiriladi.