Mamlakatimizda 2017 — 2021-yillarda Oʻzbekiston Respublikasini rivojlantirishning beshta ustuvor yoʻnalishi boʻyicha Harakatlar strategiyasi doirasida davlat boshqaruvini takomillashtirish hamda jamiyatni demokratlashtirish, aholining turmush darajasi va sifatini oshirish, hududlarni kompleks rivojlantirish borasida amalga oshirilayotgan keng koʻlamli islohotlar parlament oldiga yangidan-yangi vazifalarni qoʻymoqda.

Bugungi shiddatli islohotlar davrida parlament vakillarining xalq bilan doimiy muloqotini sifat jihatidan yangi darajaga koʻtarish, Qonunchilik palatasi faoliyatining qonun ijodkorligi, parlament va deputatlik nazorati, parlamentlararo aloqalarni rivojlantirish, shuningdek quyi palata faoliyatini ommaviy axborot vositalarida keng yoritish kabi muhim yoʻnalishlarini yanada takomillashtirish talab etilmoqda.

Shundan kelib chiqib, Qonunchilik palatasining 2018-yil ikkinchi yarim yilligiga moʻljallangan faoliyatining asosiy yoʻnalishlarini mamlakatimiz Prezidentining Farmon va qarorlarida hamda oʻtkazilayotgan videoselektor yigʻilishlarida belgilab berilayotgan ustuvor yoʻnalishlardan kelib chiqqan holda tanqidiy qayta koʻrib chiqishni taqozo etmoqda.

Yuqoridagilarni inobatga olib, demokratik islohotlarni amalga oshirish va mamlakatni modernizatsiya qilishda Qonunchilik palatasining faol ishtirokini taʼminlash maqsadida Oʻzbekiston Respublikasi Oliy Majlisi Qonunchilik palatasining Kengashi qaror qiladi:

1. Oʻzbekiston Respublikasi Oliy Majlisi Qonunchilik palatasining 2018-yil ikkinchi yarim yilligiga moʻljallangan faoliyatining asosiy yoʻnalishlari tasdiqlansin (ilova qilinmoqda*).

2. Oʻzbekiston Respublikasi Oliy Majlisi Qonunchilik palatasi Kengashining 2018-yil 22-yanvardagi 1431-III-sonli qarori bilan tasdiqlangan Oʻzbekiston Respublikasi Oliy Majlisi Qonunchilik palatasining 2018-yilga moʻljallangan faoliyatining asosiy yoʻnalishlariga muvofiq iyul — dekabr oylarida amalga oshirilishi nazarda tutilgan tadbirlarning oʻtkazilishi bekor qilinsin.

3. Oʻzbekiston Respublikasi Oliy Majlisi Qonunchilik palatasining 2018-yil ikkinchi yarim yilligiga moʻljallangan faoliyatining asosiy yoʻnalishlarida nazarda tutilgan tadbirlarning bajarilishini nazorat qilish Oʻzbekiston Respublikasi Oliy Majlisi Qonunchilik palatasi Spikerining oʻrinbosarlari zimmasiga yuklatilsin.

4. Ushbu qaror Oʻzbekiston Respublikasi Oliy Majlisi Qonunchilik palatasining majlisida tasdiqlash uchun kiritilsin.