2017 ― 2021-yillarda Oʻzbekiston Respublikasini rivojlantirishning beshta ustuvor yoʻnalishi boʻyicha Harakatlar strategiyasini “Faol tadbirkorlik, innovatsion gʻoyalar va texnologiyalarni qoʻllab-quvvatlash yili”da amalga oshirishga oid Davlat dasturining 6-bandida belgilangan vazifalarni bajarish maqsadida Oʻzbekiston Respublikasi Oliy Majlisi Qonunchilik palatasining Kengashi va Oʻzbekiston Respublikasi Oliy Majlisi Senatining Kengashi qaror qiladilar:

1. Oʻzbekiston Respublikasi Oliy Majlisi huzuridagi Qonunchilik muammolari va parlament tadqiqotlari instituti (bundan buyon matnda Institut deb yuritiladi) tomonidan:

ilmiy darajaga ega va ilgʻor xorijiy mamlakatlarda tahsil olgan yuqori malakali mutaxassislardan iborat kadrlar tarkibini shakllantirish;

shunga oʻxshash xorijiy institutlar hamda markazlar bilan hamkorlik oʻrnatish va uni rivojlantirish borasida muayyan ishlar amalga oshirilganligi maʼlumot uchun qabul qilinsin.

2. Institutning yangilangan tuzilmasi hamda xodimlarning cheklangan umumiy soni 40 nafardan iborat boʻlgan shtatlar jadvali, shuningdek Yagona tarif setkasi boʻyicha ularning mehnatiga haq toʻlashning yangilangan razryadlari 1, 2, 3-ilovalarga* muvofiq tasdiqlansin.

Oʻzbekiston Respublikasi Oliy Majlisi Qonunchilik palatasi Kengashining va Oʻzbekiston Respublikasi Oliy Majlisi Senati Kengashining 2017-yil 29-dekabrda qabul qilingan 1399-III/KQ-283-III-sonli qoʻshma qaroriga 2, 3, 4-ilovalar oʻz kuchini yoʻqotgan deb topilsin.

3. Belgilab qoʻyilsinki, Oʻzbekiston Respublikasi Oliy Majlisi Qonunchilik palatasi Kengashining va Oʻzbekiston Respublikasi Oliy Majlisi Senati Kengashining 2017-yil 29-dekabrda qabul qilingan 1399-III/KQ-283-III-sonli qoʻshma qarori bilan tasdiqlangan Oʻzbekiston Respublikasi Oliy Majlisi huzuridagi Qonunchilik muammolari va parlament tadqiqotlari instituti toʻgʻrisidagi nizomda belgilangan vazifalardan tashqari quyidagilar ham Institutning vazifalari hisoblanadi:

Oʻzbekiston Respublikasi Oliy Majlisi palatalari tomonidan budjetnomani koʻrib chiqishda Oʻzbekiston Respublikasi Davlat budjetining, davlat maqsadli jamgʻarmalari budjetlarining hamda soliq va budjet siyosati asosiy yoʻnalishlarining loyihalari boʻyicha axborot-tahliliy materiallar tayyorlash;

Oʻzbekiston Respublikasi Oliy Majlisi Qonunchilik palatasiga taqdim etiladigan Oʻzbekiston Respublikasi Davlat budjetining va davlat maqsadli jamgʻarmalari budjetlarining tegishli hisobot davridagi ijrosi toʻgʻrisidagi hisobotlar boʻyicha axborot-tahliliy materiallar tayyorlash;

qonunchilik muammolari, qabul qilinayotgan qonunlar va huquqni qoʻllash amaliyotining samaradorligi masalalari yuzasidan jamoatchilik fikrini va tashabbuslarini “Mening fikrim” veb-portali orqali oʻrganish.

4. Institut ikki oy muddatda Oʻzbekiston Respublikasi Oliy Majlisi palatalari deputatlari, senatorlari, qoʻmitalari va komissiyalari soʻrovlariga koʻra Institut tomonidan tayyorlanadigan axborot-tahliliy hamda boshqa materiallarning shakllarini, shuningdek ularning sifatini baholash tartibotini ishlab chiqsin va tasdiqlasin.

5. Qonun ijodkorligi jarayonida keng jamoatchilikning ishtirokini taʼminlash maqsadida Institut oʻz boʻlimlari qoshidagi ilmiy-ekspertlik kengashlari tarkibiga yetuk olimlarni, amaliyotchilarni, tadbirkorlik subyektlarining, fuqarolik jamiyati institutlarining vakillarini kiritib, ushbu kengashlarning ishini taʼminlasin.

6. Institut qoshida yoshlarni qonun ijodkorligi jarayoniga keng jalb etish, qonun ijodkorligi sohasida hamda parlament faoliyatining boshqa jabhalarida bilim va koʻnikmalar olishga intiluvchi yoshlarni birlashtirishga qaratilgan “Yosh qonunshunoslar klubi” tashkil etilganligi maʼlumot uchun qabul qilinsin.

Oʻzbekiston Respublikasi Oliy Majlisi Qonunchilik palatasi va Senati devonlari Institutning “Yosh qonunshunoslar klubi” samarali faoliyat koʻrsatishiga har tomonlama koʻmaklashsin.

7. Institut xorijiy parlamentlar ishi tajribasini oʻrganish, bu tajribaning samarali shakllari va uslublarini Oʻzbekiston Respublikasi Oliy Majlisi palatalari, deputatlar va senatorlar faoliyatida qoʻllash maqsadida xorijiy mamlakatlar parlamentlari hamda xalqaro parlament tashkilotlari faoliyati toʻgʻrisida haftalik tahliliy sharh tayyorlanishi va chiqarilishini taʼminlasin.

8. Oʻzbekiston Respublikasi Tashqi ishlar vazirligi, Oʻzbekiston Respublikasi Investitsiyalar boʻyicha davlat qoʻmitasi Institut bilan birgalikda bir oy muddatda Institutning xalqaro tashkilotlar va xorijiy mamlakatlarning tadqiqot muassasalari bilan hamkorligini oʻrnatish borasida “Yoʻl xaritasi”ni ishlab chiqsin hamda tasdiqlasin va bunda amaliy chora-tadbirlarni roʻyobga chiqarish boʻyicha aniq muddatlar hamda masʼul ijrochilarni belgilasin.

9. Oʻzbekiston Respublikasi Oliy Majlisi palatalarining devonlari Toshkent shahar hokimligi bilan birgalikda Institutni qulay binoga joylashtirish masalasi hal etilishini tezlashtirsin.

10. Oʻzbekiston Respublikasi Vazirlar Mahkamasi bir oy muddatda hukumat qarorlarini ushbu qoʻshma qarorga muvofiqlashtirsin, davlat boshqaruvi organlarining ushbu qoʻshma qarorga zid boʻlgan oʻz normativ-huquqiy hujjatlarini qayta koʻrib chiqishlari va bekor qilishlarini taʼminlasin.

11. Ushbu qoʻshma qarorning ijrosini nazorat qilish Oʻzbekiston Respublikasi Oliy Majlisi Qonunchilik palatasi Spikerining oʻrinbosari S. Otamuratov va Oʻzbekiston Respublikasi Oliy Majlisi Senati Raisining oʻrinbosari S. Artikova zimmasiga yuklansin.