O‘zbekiston Respublikasi Prezidentining “O‘simliklar karantini bo‘yicha davlat xizmati faoliyatining samaradorligini oshirishga doir qo‘shimcha chora-tadbirlar to‘g‘risida” 2018-yil 28-martdagi PQ-3626-son qarorini ijro etish yuzasidan, o‘simliklar klinikalarini tashkil etish va ularning keyinchalik faoliyat ko‘rsatishi sohasida davlat-xususiy sheriklikni rivojlantirish uchun qulay shart-sharoitlarni ta’minlash maqsadida Vazirlar Mahkamasi qaror qiladi:

1. O‘simliklar klinikalarini tashkil etish to‘g‘risidagi nizom ilovaga muvofiq tasdiqlansin.

2. Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari:

bir oy muddatda va har yili 1-fevralgacha davlat-xususiy sheriklik shartlarida o‘simliklar klinikalarini qurish, rekonstruksiya qilish va jihozlash uchun ajratilishi kerak bo‘lgan yer uchastkalarini belgilasinlar, shuningdek, tasdiqlangan yer uchastkalari ma’lumotlari ro‘yxatlarini O‘zbekiston Respublikasi O‘simliklar karantini va himoyasi agentligiga (keyingi o‘rinlarda — Agentlik) taqdim etsinlar.

O‘zbekiston Respublikasi Xususiylashtirilgan korxonalarga ko‘maklashish va raqobatni rivojlantirish davlat qo‘mitasi (keyingi o‘rinlarda Davlat raqobat qo‘mitasi deb ataladi) bilan birgalikda bir oy muddatda foydalanilmayotgan bo‘sh turgan binolar va xonalar ro‘yxatlarini aniqlasinlar va Agentlikka taqdim etsinlar;

foydalanilmayotgan bo‘sh turgan binolar va xonalar Agentlik bilan tuzilgan davlat-xususiy sheriklik to‘g‘risidagi bitimlar asosida o‘simliklar klinikalarini tashkil etish uchun uzoq muddatga tekin foydalanish uchun berilishini ta’minlasinlar.

3. Vazirliklar va idoralar o‘zlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsinlar.

4. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosari Z.T. Mirzayev zimmasiga yuklansin.

1. Ushbu Nizom o‘simliklar klinikalari faoliyatini tashkil etish tartibini belgilaydi.

2. Ushbu Nizomda quyidagi tushunchalardan foydalaniladi:

davlat-xususiy sheriklik — o‘simliklar klinikalari faoliyatini tashkil etish maqsadida davlat va xususiy sheriklarning muayyan muddatga yuridik rasmiylashtirilgan o‘zaro manfaatli hamkorligi;

davlat tomonidan sherik — O‘zbekiston Respublikasi O‘simliklar karantini va himoyasi agentligi (keyingi o‘rinlarda O‘simliklar karantini va himoyasi agentligi);

o‘simliklar klinikasi — o‘simliklarga agrotexnik, biologik va kimyoviy ishlov berish bo‘yicha xizmatlar ko‘rsatuvchi hamda o‘simliklarga ishlov berish va o‘simliklar zararkunandalari va kasalliklariga qarshi kurashish uchun aholini va qishloq xo‘jaligi korxonalarini biokimyoviy, kimyoviy, biologik, mexanik vositalar va uskunalar (inventar) bilan ta’minlaydigan tijorat tashkiloti;

O‘simliklar karantini va himoyasi agentligi Davlat-xususiy sheriklikka nomzodlarni tanlash bo‘yicha komissiyasi (keyingi o‘rinlarda Komissiya deb ataladi) — O‘simliklar karantini va himoyasi agentligi, O‘zbekiston Respublikasi Davlat aktivlarini boshqarish agentligi (keyingi o‘rinlarda — Agentlik), O‘simliklar karantini va himoyasi agentligi O‘simliklar karantini va himoyasi ilmiy-tadqiqot institutining vakillaridan iborat tarkibda, ushbu Nizomda nazarda tutilgan tartibda xususiy sheriklarga nomzodlarni tanlab olish uchun tuziladigan organ;

davlat va xususiy sherik to‘g‘risidagi bitim (keyingi o‘rinlarda bitim deb ataladi) — tomonlarning huquqlari, majburiyatlari va javobgarligini, shuningdek, o‘simliklar klinikalari faoliyatini tashkil etish bo‘yicha loyihani amalga oshirishning boshqa shartlarini belgilaydigan davlat bilan xususiy sheriklar o‘rtasida tuziladigan yozma shartnoma;

xususiy sherik — o‘simliklar klinikalari faoliyatini tashkil etishda asosiy talablarga javob beradigan, davlat va xususiy sheriklik to‘g‘risidagi bitimni tuzgan yoxud tuzish xohishini bildirgan tijorat tashkiloti.

3. O‘simliklar klinikasi yuridik shaxs tarzida yoki yuridik shaxsning tarkibiy bo‘linmasi (filiali) shaklida, shu jumladan, davlat-xususiy sheriklik shartlari asosida tashkil etiladi.

4. O‘simliklar klinikalari faoliyatini tashkil etish sohasida davlat-xususiy sheriklik shakllari quyidagi tarzda amalga oshiriladi:

davlat mulki obyektlarining foydalanilmayotgan binolarini uzoq muddatga bepul foydalanishga berish;

bitimda ko‘rsatilgan shartlarda qurilish, rekonstruksiya qilish va jihozlash uchun yer uchastkasi ajratish.

5. Quyidagilar o‘simliklar klinikalari faoliyatini tashkil etishda asosiy talablar hisoblanadi:

a) shu jumladan, zararsizlantirish bo‘yicha kamida to‘rt nafar kishidan iborat otryadlar tashkil etish hisobiga o‘simliklarga agrotexnik, biologik va kimyoviy ishlov berish xizmatlari ko‘rsatish;

b) qishloq xo‘jaligi ishlab chiqaruvchilari va aholini o‘simliklarni himoya qilishning kimyoviy, biokimyoviy, biologik va mexanik vositalari, o‘simliklar zararkunandalari va kasalliklariga qarshi kurashish bo‘yicha vositalar, shu jumladan:

feromon tutgichlar;

zararkunandalarga qarshi kurashish uchun biomahsulotlar;

gerbitsidlar, fungitsidlar, instektitsidlar, insektoakaritsidlar, nematotsidlar va biopreparatlar bilan ta’minlash;

v) uzluksiz sotishni ta’minlash uchun kimyoviy, biokimyoviy, biologik, mexanik vositalar, priborlar va preparatlarning minimal assortimenti majburiy mavjud bo‘lishi;

g) binolar va xonalarga qo‘yiladigan ekologik talablar, sanitariya normalari, qoidalari va gigiyenik normativlarga rioya qilish;

d) zararkunandalar, kasalliklar va begona o‘tlarni aniqlash uchun tegishli laboratoriya uskunasi, inventar mavjud bo‘lishi, shuningdek, o‘simliklarga ishlov berish uchun kimyoviy, biokimyoviy va biologik vositalarni tayyorlash va qadoqlash.

O‘simliklar klinikalarida mavjud bo‘lishi majburiy bo‘lgan kimyoviy, biokimyoviy, biologik, mexanik vositalar, priborlar va preparatlarning minimal assortimenti ro‘yxati O‘simliklar karantini va himoyasi agentligi tomonidan tasdiqlanadi va (yoki) bitimda nazarda tutiladi.

6. O‘simliklarga agrotexnik, biologik va kimyoviy ishlov berish bo‘yicha xizmatlar ko‘rsatish, shuningdek, o‘simliklar zararkunandalari va kasalliklariga qarshi kurashish bo‘yicha qishloq xo‘jaligi ishlab chiqaruvchilari va aholini kimyoviy, biokimyoviy, biologik va mexanik vositalar bilan ta’minlash o‘simliklar klinikalarining asosiy vazifalari hisoblanadi.

7. O‘simliklar klinikalari quyidagi funksiyalarni amalga oshiradilar:

keyinchalik sotish uchun belgilangan tartibda muvofiqlik sertifikatlariga ega bo‘lgan o‘simliklarni himoya qilishning kimyoviy, biokimyoviy, biologik va mexanik vositalarini xarid qiladilar;

belgilangan tartibda o‘simliklarni himoya qilishning kimyoviy, biokimyoviy, biologik va mexanik vositalarini saqlashni, yo‘q qilishni ta’minlaydilar;

tegishli hududda o‘simliklar karantini obyektlari aniqlanishi hamda o‘simlik dunyosi kasalliklari va zararkunandalari tarqalishi holatlari to‘g‘risida O‘simliklar karantini va himoyasi agentligini xabardor qiladilar, O‘simliklar karantini va himoyasi agentligining murojaati bo‘yicha amaliyotda uchraydigan o‘simliklar zararkunandalari va kasalliklari to‘g‘risida axborot taqdim etadilar;

o‘simliklarni himoya qilishning kimyoviy, biokimyoviy, biologik vositalari va mexanik vositalarini qo‘llash va saqlash bo‘yicha aholiga bepul maslahatlar beradilar va axborot yordami ko‘rsatadilar;

o‘simliklarga agrotexnik, biologik va kimyoviy ishlov berish bo‘yicha zarur xizmatlarni ko‘rsatish uchun o‘simliklar zararkunandalari va kasalliklar turlarini aniqlaydilar.

O‘simliklar klinikalarining faoliyatini, shu jumladan, davlat-xususiy sheriklik shartlaridagi klinikalar faoliyati monitoringini olib borish O‘simliklar karantini va himoyasi agentligi tomonidan amalga oshiriladi. O‘simliklar klinikalari faoliyati monitoringini olib borish tartibi O‘simliklar karantini va himoyasi agentligi tomonidan tasdiqlanadi va (yoki) bitimda nazarda tutiladi.

8. Davlat-xususiy sheriklik Komissiya tomonidan tanlov asosida amalga oshiriladi.

9. Tarkibiga O‘simliklar karantini va himoyasi agentligi, Agentlik, O‘simliklar karantini va himoyasi ilmiy-tadqiqot instituti vakillari kiradigan Komissiya kamida ikkita ishtirokchidan arizalar tushganda tanlov o‘tkazadi.

Komissiya a’zolarining soni toq bo‘lishi va kamida besh nafar kishini tashkil etishi kerak. O‘simliklar karantini va himoyasi agentligi bosh direktorining o‘rinbosari Komissiyaning raisi hisoblanadi.

Komissiya ishi reglamenti Komissiyaning qarori bilan tasdiqlanadi.

10. Davlat tomonidan sherik tanlov boshlanishidan 30 kun oldin tanlov savdolari o‘tkazilishi to‘g‘risidagi e’lonni o‘zining rasmiy veb-saytining maxsus bo‘limida, ommaviy axborot vositalarida, ijtimoiy tarmoqlarda va boshqa manbalarda majburiy tartibda joylashtiradi.

11. Tanlov to‘g‘risidagi e’londa quyidagi ma’lumotlar bo‘lishi kerak:

davlat tomonidan sherikning nomi va pochta manzili, uning aloqa qilinadigan telefoni va elektron pochta manzili;

obyektning nomi, joylashgan joyi, soni, tavsifi;

davlat-xususiy sheriklik loyihasini amalga oshirish shartlari;

davlat-xususiy sheriklikni amalga oshirish shakliga bog‘liq ravishda talab etiladigan investitsiyaviy va ijtimoiy majburiyatlarning minimal hajmi;

tanlov o‘tkazish sanasi, vaqti va joyi;

tanlov takliflarini qabul qilishning oxirgi muddati (kun va soat ko‘rsatilgan holda).

12. Xususiy sheriklikka nomzod davlat tomonidan sherikning rasmiy veb-saytida arizani joylashtiradi, unda:

a) yuridik shaxsning nomi, uning tashkiliy-huquqiy shakli;

b) yuridik shaxs joylashgan joy;

v) bank rekvizitlari;

g) moddiy-texnik baza to‘g‘risidagi ma’lumotlar ko‘rsatiladi, u:

o‘simliklarga agrotexnik, biologik va kimyoviy ishlov berish bo‘yicha xizmatlar ko‘rsatish uchun tovar zaxirasi va aylanma mablag‘lar mavjudligi, shuningdek, qishloq xo‘jaligi ishlab chiqaruvchilari va aholini o‘simliklarni himoya qilishning kimyoviy, biokimyoviy, biologik va mexanik vositalari bilan ta’minlash;

zararkunandalar, kasalliklar va begona o‘tlarni aniqlash, shuningdek, o‘simliklarga ishlov berish uchun kimyoviy, biokimyoviy, biologik vositalarni tayyorlash va qadoqlash uchun tegishli laboratoriya uskunalari, inventar mavjudligi;

zararsizlantirish bo‘yicha otryad va yakka tartibda himoya qilish vositalari mavjudligi;

zararkunandalarga qarshi kurashish uchun biomahsulotlarni yetishtirish bo‘yicha shart-sharoitlar mavjudligi to‘g‘risidagi ma’lumotlarni o‘z ichiga oladi.

13. Taqdim etilgan ma’lumotlarning ishonchliligi Inspeksiya tomonidan elektron idoralararo o‘zaro hamkorlik yo‘li bilan aniqlanadi.

Noaniqliklar yuzaga kelgan taqdirda taqdim etilgan ma’lumotlarning ishonchliligi O‘simliklar karantini va himoyasi agentligining topshirig‘iga ko‘ra O‘zbekiston Respublikasi Savdo-sanoat palatasi vakillari jalb etilgan holda O‘simliklar karantini va himoyasi hududiy boshqarmasi mutaxassislari tomonidan joyning o‘zida o‘rganilishi mumkin.

14. Davlat-xususiy sheriklik loyihasini amalga oshirish to‘g‘risida tushgan ariza, u tushgan kundan boshlab o‘n kun mobaynida davlat tomonidan sherik tarafidan Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari hamda Agentlik bilan birgalikda ko‘rib chiqiladi.

15. Tushgan ariza ko‘rib chiqilgandan va Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari hamda Agentlikning ijobiy xulosalari olingandan keyin davlat tomonidan sherik tanlov e’lon qiladi.

16. O‘simliklar karantini va himoyasi agentligi ijobiy xulosa olingandan keyin besh ish kuni mobaynida nomzodni Komissiya majlisini o‘tkazish joyi va vaqti to‘g‘risida xabardor qiladi.

Davlat-xususiy sheriklik to‘g‘risida bitim tuzishga talabgorlik qiluvchi nomzod o‘z nomzodini ko‘rib chiqishda Komissiya majlisida ishtirok etish huquqiga egadir.

17. Xususiy sherikning arizasi Komissiya tomonidan ko‘rib chiqilganligi uchun qonun hujjatlarida belgilangan bazaviy hisoblash miqdorining bir baravari miqdorida yig‘im undiriladi va u davlat tomonidan sherikning maxsus hisob raqamiga o‘tkaziladi.

18. Nomzodni, xususiy sherikni tanlab olish Komissiya tomonidan quyidagi mezonlar asosida amalga oshiriladi:

o‘simliklarga agrotexnik, biologik va kimyoviy ishlov berish bo‘yicha xizmatlar ko‘rsatish, shuningdek, qishloq xo‘jaligi ishlab chiqaruvchilari va aholini o‘simliklarni himoya qilishning kimyoviy, biokimyoviy, biologik va mexanik vositalari, o‘simliklarga to‘liq hajmda ishlov berish uchun preparatlar bilan ta’minlash imkonini beruvchi tegishli moddiy-texnik baza, tovar zaxirasi va aylanma mablag‘lar mavjudligi;

zararkunandalar, kasalliklar va begona o‘tlarni aniqlash, shuningdek, o‘simliklarga ishlov berish uchun kimyoviy, biokimyoviy, biologik vositalarni qadoqlash uchun tegishli laboratoriya uskunalari, inventarning mavjudligi;

zararsizlantirish bo‘yicha otryad va yakka tartibdagi himoya vositalarining mavjudligi;

zararkunandalarga qarshi kurashish uchun biomahsulotlar yetishtirish uchun shart-sharoitlarning mavjudligi.

19. Tanlov taklifi, davlat-xususiy sheriklik loyihasini amalga oshirish uchun eng maqbul deb e’tirof etilgan ishtirokchi tanlov g‘olibi deb e’tirof etiladi.

Tanlov yakunlari bo‘yicha uning takliflari parametrlari tanlov shartlariga muvofiq bo‘lgan, biroq tanlov hujjatlariga muvofiq g‘olib tomonidan taklif etilgan parametrlar darajasidan past bo‘lgan zaxira g‘olib ham aniqlanadi.

Tanlov g‘olibi davlat-xususiy sheriklik to‘g‘risidagi bitimni imzolashni rad etgan yoki undan bosh tortgan taqdirda, zaxira g‘olib bilan tegishli bitimni imzolashga yo‘l qo‘yiladi. Tanlovning zaxira g‘olibi bilan bitim tuzish tanlovning g‘olibi bilan bitim tuzish tartibiga o‘xshash tartibda amalga oshiriladi.

20. Faqat bir nafar ishtirokchidan ariza tushgan taqdirda tanlov o‘tkazilmaydi, qaror esa Komissiya tomonidan ishtirokchining arizasini va arizaga ilova qilinadigan hujjatlarni o‘rganib chiqish yakunlari bo‘yicha tanlov to‘g‘risida e’lon berilgan paytdan boshlab o‘ttiz kunlik muddat tamom bo‘lgandan keyin besh ish kuni mobaynida qabul qilinadi. Komissiya xususiy sherikning taklifi tanlov talablariga muvofiqligidan kelib chiqqan holda ijobiy yoki salbiy qaror qabul qiladi.

Davlat tomonidan sherik tanlov yakunlari to‘g‘risida Komissiya qarori qabul qilingan kunda o‘zining rasmiy veb-saytida ma’lumotni joylashtirish yo‘li bilan tanlov ishtirokchilarini uning natijalari to‘g‘risida xabardor qilishi shart.

21. Komissiyaning davlat-xususiy sheriklik to‘g‘risida bitim tuzilishini rad etish to‘g‘risidagi qarori ustidan sud tartibida shikoyat qilish mumkin.

22. Davlat tomonidan sherik qaror qabul qilingandan keyin uch kun muddatda nomzodga davlat-xususiy sheriklik to‘g‘risidagi bitim loyihasini yuboradi.

23. Bitim uni amalga oshirish shakliga bog‘liq ravishda:

bitim mavzusini;

bitimning amal qilish muddati va shartlarini;

o‘simliklar klinikalari faoliyati boshlanishi muddatlarini;

bitim tomonlarining huquq va majburiyatlarini;

davlat-xususiy sheriklik loyihasini amalga oshirish monitoringini amalga oshirish va darajasini baholash tartibini;

davlat-xususiy sheriklik loyihasini amalga oshirish jarayonida ishlab chiqariladigan va (yoki) taqdim etiladigan infrastruktura obyektlari, xizmatlar sifatiga qo‘yiladigan talablarni;

xususiy sherik tomonidan uning majburiyatlari ijrosi to‘g‘risida axborot taqdim etilishi tartibi va muddatlarini;

davlat tomonidan sherik va xususiy sherik o‘rtasidagi bitim ijrosi bilan bog‘liq xavf-xatarlarni taqsimlash tartibi va shartlarini;

davlat-xususiy sheriklik loyihasini amalga oshirish uchun davlat tomonidan sherik tomonidan xususiy sherikka beriladigan infratuzilma obyektlariga egalik qilish va ulardan foydalanish tartibini;

o‘simliklar klinikalaridan foydalanish, texnik xizmat ko‘rsatish, loyihalashtirish, qurish, rekonstruksiya qilish, ta’mirlash, modernizatsiya qilish tartibini;

bitimni ijro etish jarayonida tashkil etilgan obyektga va boshqa mol-mulkka huquqlarni bitimning amal qilishi to‘xtatilgandan keyin taqsimlash tartibini;

bitim shartlariga rioya qilinmaganligi uchun tomonlarning javobgarligini;

bitimga o‘zgartirish va qo‘shimchalar kiritish tartibini;

bitimni bekor qilish tartibini;

xususiy sherik tomonidan majburiyatlar bajarilmaganligi yoki lozim darajada bajarilmaganligi uchun sanksiyalarni;

bitimni amalga oshirishda yuzaga keladigan nizolarni hal etish tartibini o‘z ichiga olishi kerak.

Bitimda qonun hujjatlariga zid bo‘lmagan boshqa shartlar ham bo‘lishi mumkin.

24. Bitimni imzolashga tayyorlash uchun davlat tomonidan sherik xususiy sherikka bitim loyihasi matnini taqdim etadi.

25. Zarurat bo‘lganda bitim qoidalarini kelishish maqsadida davlat tomonidan sherik bilan xususiy sherik o‘rtasida muzokaralar o‘tkaziladi.

26. Bitim davlat tomonidan sherik va xususiy sherik o‘rtasida 2 nusxada (xar bir taraf uchun bir nusxadan) imzolanadi.

27. Tuzilgan bitimlarning yagona reyestri O‘simliklar karantini va himoyasi agentligi tomonidan yuritiladi.

28. Bitim tomonlar uni imzolagan paytdan boshlab kuchga kiradi va uning muddati tamom bo‘lguniga yoki u bekor qilinguniga qadar amal qiladi.

29. Quyidagi hollarda bitimga o‘zgartirish va qo‘shimchalar kiritilishi mumkin:

har ikki tomonning roziligi bilan;

davlat tomonidan sherik bilan xususiy sherikning shartnomaviy munosabatlari yuzasidan o‘simliklar karantinini tartibga solish sohasida qonun hujjatlari o‘zgarishi munosabati bilan — davlat tomonidan sherikning talabi bo‘yicha;

sudning qaroriga ko‘ra.

30. Bitim quyidagi hollarda bekor qilinadi:

har ikki tomonning roziligi bilan;

xususiy sherik bankrot bo‘lgan va tugatilgan taqdirda;

xususiy sherik tomonidan o‘z majburiyatlari bajarilmagan taqdirda — davlat tomonidan sherikning talabi bo‘yicha;

davlat tomonidan sherik tarafidan o‘z majburiyatlari bajarilmagan taqdirda — xususiy sherikning talabi bo‘yicha.

Ushbu bandning to‘rtinchi va beshinchi xatboshilarida nazarda tutilgan hollarda bitim sud tartibida bekor qilinadi.

31. Bitim uning amal qilish muddati tamom bo‘lgandan keyin to‘xtatiladi.

Bitimning amal qilish muddati tamom bo‘lishi tomonlarni uning buzilganligi uchun javobgarlikdan ozod qilmaydi.

32. Xususiy sherik:

davlat-xususiy sheriklik loyihasi tashabbusi to‘g‘risidagi taklifni ko‘rib chiqish uchun davlat tomonidan sherikka taqdim etish;

bitimning amal qilish muddatiga yer uchastkalari, bo‘sh turgan obyektlar, shu jumladan, faoliyat ko‘rsatmagan davlat muassasalarini hamda foydalanilmayotgan xonalar yoki korpuslarni olish va ulardan foydalanish;

davlat-xususiy sheriklik loyihasini amalga oshirishda metodik ta’minlanish;

bitim shartlari davlat tomonidan sherik tarafidan buzilgan taqdirda bitimni sud tartibida bekor qilishni talab qilish huquqiga egadir.

Xususiy sherik qonun hujjatlariga muvofiq boshqa huquqlarga ham ega bo‘lishi mumkin.

33. Xususiy sherik:

bitim va O‘zbekiston Respublikasi qonun hujjatlari talablariga qat’iy rioya qilishi;

bitim amal qilishining butun muddati mobaynida obyekt faoliyati ixtisosliligini saqlab qolishi;

sanitariya qoidalariga, normalarga va gigiyenik normativlarga rioya qilishi;

qonun hujjatlariga qat’iy muvofiq ravishda o‘simliklar klinikalari faoliyat ko‘rsatishi uchun yuqori malakali kadrlar va boshqa kadrlar bilan butlashi, zarur shart-sharoitlar yaratish chora-tadbirlarini ko‘rishi;

o‘simliklar klinikalari faoliyati doirasida ko‘rsatiladigan xizmatlarning yuqori sifatini ta’minlaydigan qulay shart-sharoitlar yaratishi;

obyektni to‘liq yoki qisman moliyalashtirishni, undan foydalanishni, texnik xizmat ko‘rsatishni, shuningdek, loyihalashtirish, qurish, rekonstruksiya qilish, ta’mirlash, modernizatsiya qilishni ta’minlashi shart.

Xususiy sherik qonun hujjatlariga muvofiq boshqa majburiyatlarga ham ega bo‘ladi.

Bitimning amal qilish muddati tamom bo‘lgunga qadar xususiy sherikning mulkida bo‘lgan obyekt xususiy sherik tomonidan o‘zgaga berilishiga yo‘l qo‘yilmaydi, O‘zbekiston Respublikasi qonun hujjatlariga muvofiq xususiy sherik almashtirilishi bundan mustasno.

34. Davlat tomonidan sherik:

bitim shartlari bajarilishi to‘g‘risida xususiy sherikdan har choraklik asosida ma’lumot olish;

bitim shartlari bajarilishi monitoringini olib borish va davlat-xususiy sheriklik loyihalari amalga oshirilishini baholash;

qonun hujjatlariga va bitim shartlariga rioya qilish monitoringini olib borish doirasida aniqlangan qoida buzilishlari bartaraf etilishini talab qilish;

obyekt bo‘yicha xususiy sherikning aybi bilan yuzaga kelgan zararlar qoplanishini talab qilish;

bitim shartlari xususiy sherik tomonidan buzilgan taqdirda bitimni sud tartibida bekor qilishni talab qilish huquqiga egadir.

Davlat tomonidan sherik qonun hujjatlariga muvofiq boshqa huquqlarga ham ega bo‘lishi mumkin.

35. Davlat tomonidan sherik:

obyektni bitimda belgilangan muddatlarda, tartibda va shartlarda bepul asosda xususiy sherikka berishga;

xususiy sherikning xo‘jalik faoliyatini amalga oshirishiga aralashmaslikka majburdir.

Davlat tomonidan sherik qonun hujjatlariga muvofiq boshqa majburiyatlarga ham ega bo‘ladi.

42. Davlat tomonidan sherik xususiy sherik bilan amal qilish muddati 30 yil bo‘lgan bitim tuzilgan paytdan boshlab bir kun mobaynida uni Agentlikning Qoraqalpog‘iston Respublikasi, viloyatlar va Toshkent shahridagi hududiy boshqarmalari huzuridagi Davlat mulkini ijaraga berish markaziga davlat ro‘yxatidan o‘tkazish uchun, shuningdek, obyekt balansida bo‘lgan balansda saqlovchiga yuboradi.

43. Balansda saqlovchi tuzilgan bitim shartlariga muvofiq o‘n kun muddatda obyektni xususiy sherikka beradi, xususiy sherik esa bitimning amal qilish muddati tamom bo‘lgach yoki bitim muddatidan oldin bekor qilinganda obyektni bitim shartlariga muvofiq holatda balansda saqlovchiga qaytarishga majburdir.

44. Obyekt uning barcha anjomlari va unga tegishli bo‘lgan texnik hujjatlar bilan birgalikda xususiy hamkorga beriladi va u tomonidan qaytariladi.

45. Obyektni topshirish va qaytarish ikki tomonlama topshirish dalolatnomasi tuzilgan holda tomonlarning vakolatli vakillari ishtirokida amalga oshiriladi, ikki tomonlama topshirish dalolatnomasida:

dalolatnoma tuzilgan joy va sana;

bitimning rekvizitlari (tuzilgan sana, raqami);

davlat mol-mulkining texnik holati ko‘rsatiladi.

Topshirish dalolatnomasi tomonlarning vakolatli vakillari tomonidan imzolanadi va tomonlarning muhrlari bilan tasdiqlanadi.

46. Topshirish dalolatnomasi imzolanganidan keyin balansda saqlovchi va xususiy sherik o‘rtasida yetti kun mobaynida kommunal va foydalanish xizmatlari ko‘rsatuvchilar tomonidan belgilangan tariflar hisobga olingan holda kommunal va foydalanish xizmatlari bo‘yicha to‘lovlar miqdori, to‘lash tartibi va muddatlarini tartibga soluvchi bitim tuziladi.

Elektr energiyasi, suv va gaz ta’minotini hisobga olishning zarur priborlarini o‘rnatish bitim shartlariga muvofiq balansda saqlovchi yoki xususiy sherik tomonidan amalga oshiriladi.

47. Davlat tomonidan sherik bitim tuzilgan kundan boshlab bir kun mobaynida bitim doirasida yer uchastkasini olish uchun Qoraqalpog‘iston Respublikasi Vazirlar Kengashiga, viloyatlar va Toshkent shahar hokimliklariga murojaat qiladi.

49. Qurilish vazirligining hududiy organi yigirma ish kuni mobaynida yer uchastkasi berish bo‘yicha materiallarni tayyorlaydi va vakolatli organlar (tashkilotlar) bilan kelishadi hamda yer uchastkasini tanlash va berish bo‘yicha materiallarni Qoraqalpog‘iston Respublikasi Vazirlar Kengashiga, viloyatlar va Toshkent shahar hokimliklariga yoki tumanlar (shaharlar) hokimliklariga yuboradi.

50. Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari xususiy sherikka o‘simliklar klinikalarini tashkil etish maqsadida yer uchastkasini qonunchilikda belgilangan tartibda ijaraga berish uchun ushbu yer uchastkasini davlat sherigiga doimiy foydalanish huquqi bilan berish to‘g‘risida qaror qabul qiladilar.

Davlat tomonidan sherik va xususiy sherik o‘rtasida yer uchastkasini ijaraga berish shartlari va muddati bitimga qo‘shimcha kiritish orqali belgilanadi.

51. Yer uchastkasini berish bo‘yicha materiallarni tayyorlash va kelishish bilan bog‘liq xarajatlar xususiy sherik bilan bitimga qo‘shimcha kiritilgandan keyin u tomonidan qoplanadi.

53. Ushbu Nizom talablari buzilishida aybdor bo‘lgan shaxslar belgilangan tartibda javob beradilar.

54. O‘simliklar klinikalari faoliyati va O‘zbekiston Respublikasining butun hududida barcha o‘simliklar klinikalarida ushbu Nizom talablariga rioya etilishi ustidan nazorat qilish o‘simliklar karantini bo‘yicha tegishli O‘simliklar karantini va himoyasi hududiy boshqarmalariga yuklanadi.