Oʻzbekiston Respublikasi Prezidentining 2018-yil 12-iyundagi PQ-3785-son “Fuqarolik holati dalolatnomalarini qayd etish tizimini yanada takomillashtirish chora-tadbirlari toʻgʻrisida”gi qaroriga muvofiq Oʻzbekiston Respublikasi Adliya vazirligi va Moliya vazirligi qaror qiladi:

1. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklarining FHDY boʻlimlari faoliyatini moliyalashtirish uchun maxsus tashkil qilinadigan shaxsiy gʻazna hisobvaragʻiga yoʻnaltirilgan mablagʻlardan foydalanish tartibi toʻgʻrisidagi nizom ilovaga muvofiq tasdiqlansin.

2. Mazkur qaror rasmiy eʼlon qilingan kundan eʼtiboran kuchga kiradi.

Mazkur Nizom Oʻzbekiston Respublikasi Prezidentining 2018-yil 12-iyundagi PQ-3785-son “Fuqarolik holati dalolatnomalarini qayd etish tizimini yanada takomillashtirish chora-tadbirlari toʻgʻrisida”gi qaroriga muvofiq FHDY boʻlimlari va nikoh uylari (bundan buyon matnda FHDY boʻlimlari deb yuritiladi) faoliyatini moliyalashtirish uchun Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklarining maxsus tashkil qilinadigan shaxsiy gʻazna hisobvaragʻi (bundan buyon matnda maxsus hisobvaraq deb yuritiladi) mablagʻlaridan foydalanish tartibini belgilaydi.

1. Maxsus hisobvaraq mablagʻlarini tasarruf etish Oʻzbekiston Respublikasining Konstitutsiyasi, Oʻzbekiston Respublikasining qonunlari, Oʻzbekiston Respublikasi Oliy Majlisi palatalarining qarorlari, Oʻzbekiston Respublikasi Prezidentining farmonlari, qarorlari va farmoyishlari, Vazirlar Mahkamasining qarorlari, boshqa qonun hujjatlari hamda mazkur Nizomga muvofiq amalga oshiriladi.

2. Oʻzbekiston Respublikasi Adliya vazirligining maxsus gʻaznachilik shaxsiy hisobvaragʻiga gerb yigʻimidan tushadigan mablagʻlarning 40 foizi, shuningdek, FHDY boʻlimlari tomonidan koʻrsatiladigan pullik xizmatlar Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklarining maxsus tashkil qilinadigan gʻaznachilik shaxsiy hisobvaragʻiga yoʻnaltiriladi va faqat FHDY boʻlimlarining moddiy-texnik bazasini mustahkamlash boʻyicha tadbirlari, xodimlarining uzoq muddat xizmat qilgani uchun ish haqiga ustama haq toʻlash va martaba darajalari uchun qoʻshimchalariga, shuningdek, ularni moddiy ragʻbatlantirishga (lavozim maoshining va mukofotlarning 100 foizi miqdorigacha shaxsiy ustamalar) ishlatiladi.

3. Maxsus hisobvaraq daromadlari quyidagilar hisobidan shakllantiriladi:

Oʻzbekiston Respublikasi Adliya vazirligining maxsus gʻaznachilik shaxsiy hisobvaragʻiga gerb yigʻimidan tushadigan mablagʻlarning 40 foizi;

FHDY boʻlimlari tomonidan pullik xizmatlar koʻrsatishdan tushadigan mablagʻlarning 100 foizi.

4. Mablagʻlar tuman (shahar) mahalliy budjetlari uchun ochilgan tegishli (25 razryadli 4014 Taqsimlanishi nazarda tutilgan mablagʻlar (tranzit) xisobvaraqlar orqali Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari uchun ochilgan (27 razryadli 4014 Taqsimlanishi nazarda tutilgan mablagʻlar (tranzit) maxsus hisobvaraqqa kelib tushadi.

5. Maxsus hisobvaraqdagi mablagʻlar quyidagilarga yoʻnaltiriladi:

FHDY boʻlimlari xodimlarining uzoq muddat xizmat qilgani uchun ish haqiga ustama haq va martaba darajalari uchun qoʻshimchalar toʻlashga;

FHDY boʻlimlari xodimlarini moddiy ragʻbatlantirishga (lavozim maoshining 100 foizi miqdorigacha shaxsiy ustamalar va mukofotlar);

FHDY boʻlimlarining moddiy-texnik bazasini mustahkamlash boʻyicha tadbirlarga.

6. Maxsus hisobvaraqdagi mablagʻlar Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari tomonidan tuman (shahar) hokimliklarining tegishli budjetdan tashqari shaxsiy gʻazna hisobvaragʻiga (4010 Ajratmalar hisobiga shakllanadigan vazirlik va idoralarning budjetdan tashqari jamgʻarmalari) hududiy moliya boʻlimlari tomonidan roʻyxatdan oʻtkazilgan xarajatlar smetasi doirasida xar oylik haqiqiy xarajatlardan kelib chiqib buyurtmanoma asosida moliyalashtirib beriladi.

7. Tuman (shahar) hokimliklarining tegishli budjetdan tashqari shaxsiy gʻazna hisobvaraqlariga maxsus hisobvaraqdan kelib tushgan mablagʻlarni sarflash Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bilan kelishilgan va tuman (shahar) moliya boʻlimlari tomonidan belgilangan tartibda roʻyxatdan oʻtkazilgan xarajatlar smetasiga asosan amalga oshiriladi.

8. Maxsus hisobvaraqdan ajratilgan mablagʻlarning sarflanishi toʻgʻrisidagi hisobot tuman (shahar) hokimliklari tomonidan har oyda Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklariga taqdim etiladi.

9. Maxsus hisobvaraqning joriy yilda foydalanilmagan mablagʻlari Oʻzbekiston Respublikasi Davlat budjetiga olib qoʻyilmaydi va ulardan keyingi yilda foydalaniladi.

10. Maxsus hisobvaraq mablagʻlarini taqsimlash Qoraqalpogʻiston Respublikasi Vazirlar Kengashi Raisi, viloyatlar va Toshkent shahar hokimlari tomonidan amalga oshiriladi.

11. Maxsus hisobvaraqdan FHDY boʻlimlari xodimlarini moddiy ragʻbatlantirish va ijtimoiy muhofaza qilish quyidagi shakllarda amalga oshiriladi:

lavozim maoshlariga har oylik shaxsiy ustama oʻrnatish;

bayramlarda bir martalik pul mukofoti bilan mukofotlash;

martaba darajalari hamda uzoq muddatli xizmat uchun qoʻshimcha haq va ustamalar toʻlash;

ishda muvaffaqiyatlarga erishganligi va muhim topshiriqlarni bajarganligi uchun alohida xodimlarni mukofotlash.

12. FHDY boʻlimlari xodimlariga lavozim maoshlarining 100 foizigacha boʻlgan miqdorda har oylik shaxsiy ustamalar oʻrnatiladi.

Shaxsiy ustamalar tuman (shahar) hokimining oʻrinbosarlari — tuman (shahar) xotin-qizlar qoʻmitalari raislari tomonidan belgilanadi.

13. FHDY boʻlimlari xodimlari bayramlar munosabati bilan bir oylik mehnatga haq toʻlash fondi (lavozim maoshi va ragʻbatlantirish koeffitsiyenti) miqdorigacha bir martalik mukofot bilan moddiy ragʻbatlantiriladi.

14. FHDY boʻlimlari xodimlariga martaba darajalari hamda uzoq muddatli xizmat uchun qoʻshimcha haq va ustamalar toʻlash Oʻzbekiston Respublikasi Vazirlar Mahkamasining 2018-yil 3-iyuldagi 498-son “Fuqarolik holati dalolatnomalarini yozish organlari faoliyatini tashkil etish chora-tadbirlari toʻgʻrisida”gi qarorida belgilangan tartibda amalga oshiriladi.

15. Ishda muvaffaqiyatlarga erishganligi va muhim topshiriqlarni bajarganligi uchun FHDY boʻlimlarining alohida xodimlari tuman (shahar) hokimi tomonidan eng kam ish haqining 10 baravari miqdorigacha boʻlgan bir martalik mukofot bilan ragʻbatlantirilishi mumkin.

16. Moddiy ragʻbatlantirishning aniq miqdorlari mazkur Nizomning 11 — 15-bandlari bilan belgilangan doirada, maxsus hisobvaraq tushumlari hajmidan kelib chiqib, har yili Qoraqalpogʻiston Respublikasi Vazirlar Kengashi Raisi, viloyatlar va Toshkent shahar hokimlari tomonidan belgilanadi.

17. Ushbu Nizom talablarini buzishda aybdor shaxslar qonun hujjatlarida belgilangan tartibda javobgar boʻladilar.