O‘zbekiston Respublikasi Prezidentining 2018-yil 19-fevraldagi “Axborot texnologiyalari va kommunikatsiyalari sohasini yanada takomillashtirish chora-tadbirlari to‘g‘risida” PF-5349-son Farmoni, 2018-yil 19-fevraldagi “O‘zbekiston Respublikasi Axborot texnologiyalari va kommunikatsiyalarini rivojlantirish vazirligi faoliyatini tashkil etish to‘g‘risida” PQ-3549-son qaroriga muvofiq, shuningdek, Muhammad al-Xorazmiy nomidagi Toshkent axborot texnologiyalari universiteti va uning filiallarida kadrlar tayyorlash tizimini tubdan takomillashtirish va samaradorligini oshirish, o‘quv jarayoniga ta’limning kredit tizimini joriy qilish orqali universitetni jahonning nufuzli universitetlari qatoriga kirishini ta’minlash maqsadida Vazirlar Mahkamasi qaror qiladi:

1. O‘zbekiston Respublikasi Prezidentining 2018-yil 19-fevraldagi “Axborot texnologiyalari va kommunikatsiyalari sohasini yanada takomillashtirish chora-tadbirlari to‘g‘risida” PF-5349-son Farmoniga asosan Muhammad al-Xorazmiy nomidagi Toshkent axborot texnologiyalari universiteti (keyingi o‘rinlarda Universitet deb yuritiladi) va uning filiallarida 2018/2019 o‘quv yilidan boshlab axborot texnologiyalari va kommunikatsiyalari sohasida kadrlar tayyorlash bo‘yicha o‘qitishning kredit tizimini joriy etish taklifi ma’qullanganligi ma’lumot uchun qabul qilinsin.

3. Quyidagilar ta’limning kredit tizimini joriy etish orqali Universitet va uning filiallarini rivojlantirishning asosiy yo‘nalishlari etib belgilansin:

Universitet va uning filiallari professor-o‘qituvchilari tarkibini yuqori darajada kasbiy pedagogik mahoratga ega bo‘lgan mutaxassislar bilan to‘ldirish, shuningdek, nufuzli xorijiy oliy ta’lim va ilmiy muassasalarda ta’lim olgan, malaka oshirgan, ilmiy darajalarini himoya qilgan iqtidorli pedagog kadrlar hamda amaliy ish tajribasiga ega bo‘lgan mutaxassislarni ta’lim jarayoniga keng jalb qilish;

xalqaro reytinglarda nufuzli o‘rinlarni egallagan xorijiy oliy ta’lim muassasalari bilan talabalar, professor-o‘qituvchilar, ilmiy-izlanuvchi olimlarning almashinuv dasturlarini keng joriy qilish, yetakchi xorijiy ilmiy-ta’lim muassasalari, ilmiy-tadqiqot markazlari bilan hamkorlikni mustahkamlash;

o‘quv jarayonini tashkil etishning samarali usullari va zamonaviy ta’lim texnologiyalarini o‘zlashtirish, malakali pedagog kadrlar uchun raqobat muhitini yaratish orqali ularning tajribasini muntazam oshirib borish;

talabaga o‘zining ta’lim dasturini mustaqil shakllantirish imkonini yaratish va bilimini baholashda oshkoralikni ta’minlash.

4. Universitet O‘zbekiston Respublikasi Oliy va o‘rta maxsus ta’lim vazirligi bilan kelishgan holda, ta’lim sifatini oshirish maqsadida xorijiy davlatlarning axborot-kommunikatsiya texnologiyalari sohasini rivojlantirish amaliyotidan kelib chiqib, ikki oy muddatda xalqaro andozalarga mos va ilg‘or pedagogik texnologiyalarga asoslangan o‘quv rejalari va dasturlari, bitiruvchilarning malaka talablarini ishlab chiqilishi hamda tasdiqlanishini ta’minlasin.

5. Belgilab qo‘yilsinki:

2018/2019 o‘quv yilidan boshlab Universitet va uning filiallari tarkibidagi akademik litseylarning ta’lim dasturlari zamonaviy axborot va pedagogik texnologiyalardan keng foydalanish asosida matematika, fizika, chet tili va axborot texnologiyalariga oid fanlar chuqur o‘qitilishi nazarda tutilgan holda ishlab chiqiladi;

Universitet va uning filiallari tarkibidagi akademik litseylarning pedagog kadrlari tarkibi 30 foizgacha Universitet va uning filiallaridan o‘rindoshlik asosida yuqori malakali pedagoglarni jalb etish hisobiga shakllantiriladi.

6. O‘zbekiston Respublikasi Axborot texnologiyalari va kommunikatsiyalarini rivojlantirish vazirligi Universitet bilan birgalikda ikki oy muddatda Axborot-kommunikatsiya texnologiyalarini rivojlantirish jamg‘armasi mablag‘lari hisobidan Universitet professor-o‘qituvchilari tarkibini “Scopus” va “Web of science” tizimiga kiruvchi xalqaro ilmiy jurnallarda ilmiy maqolalar chop etilishidan, shuningdek, ilmiy-uslubiy, ilmiy-tadqiqot, tashkiliy-uslubiy, ma’naviy-ma’rifiy va tarbiyaviy ishlar bajarilishidan kelib chiqqan holda moddiy rag‘batlantirish tartibini ishlab chiqsin va tasdiqlasin.

7. O‘zbekiston Respublikasi Vazirlar Mahkamasining 2013-yil 28-iyundagi “Muhammad al-Xorazmiy nomidagi Toshkent axborot texnologiyalari universiteti va uning hududiy filiallari tashkiliy tuzilmasini takomillashtirish to‘g‘risida” 188-son qarori o‘z kuchini yo‘qotgan deb hisoblansin.

8. O‘zbekiston Respublikasi Axborot texnologiyalari va kommunikatsiyalarini rivojlantirish vazirligi manfaatdor vazirlik va idoralar bilan birgalikda bir oy muddatda o‘zlari qabul qilgan normativ-huquqiy va boshqa hujjatlarni mazkur qarorga muvofiqlashtirsin.

9. Mazkur qarorning ijrosini nazorat qilish O‘zbekiston Respublikasi Bosh vazirining o‘rinbosari A.A. Abduxakimov va Axborot texnologiyalari va kommunikatsiyalarini rivojlantirish vaziri A.I. Axmedxadjayev zimmasiga yuklansin.