Koreya Respublikasi kompaniyalari bilan oʻzaro foydali hamkorlikni yanada chuqurlashtirish, toʻgʻridan-toʻgʻri xorijiy investitsiyalarni jalb qilish uchun qulay shart-sharoitlar yaratish, savdo-iqtisodiy aloqalarni kengaytirish, shuningdek, zamonaviy axborot-kommunikatsiya texnologiyalarini joriy etish maqsadida:

1. Maʼlumot uchun qabul qilinsinki:

a) 2018-yil 18 — 22-iyun kunlari Seul shahrida (Koreya Respublikasi) Koreya fond bozori ishtirokchilari uyushmasi (KOSDAQ), Koreya xalqaro savdo uyushmasi (KITA), Milliy agromadaniy kooperativlar federatsiyasi (Nonghyup), Koreyaning blokcheyn-tadbirkorlar uyushmasi va Koreyaning yirik kompaniyalari bilan muzokaralar oʻtkazildi;

b) oʻtkazilgan muzokaralar yakunlari boʻyicha quyidagilar toʻgʻrisida kelishuvlarga erishildi:

2018-yilning ikkinchi yarim yilligida Toshkent shahrida Koreya fond bozori ishtirokchilari uyushmasi (KOSDAQ) bilan hamkorlikda biznes-forum oʻtkazish;

Oʻzbekiston Respublikasi Prezidenti huzuridagi Loyiha boshqaruvi milliy agentligi va Koreya xalqaro savdo uyushmasi (KITA) oʻrtasida Strategik sheriklik toʻgʻrisida bitim imzolash;

Oʻzbekiston Respublikasining qishloq xoʻjaligini rivojlantirishda koʻmaklashish va toʻgʻridan-toʻgʻri investitsiyalarni amalga oshirish masalalarini muhokama qilish uchun Milliy agromadaniy kooperativlar federatsiyasi (Nonghyup) rahbariyatining tashrifi;

Oʻzbekiston Respublikasi Mudofaa vazirligining ayrim obyektlarini va sogʻliqni saqlash tizimini modernizatsiya qilish, Toshkent viloyatida bolalar koʻngilochar bogʻini, Toshkent shahrida tijorat va turar joy koʻchmas mulk obyektlarini qurish loyihalarini, energiya resurslarini hisobga olishning avtomatlashtirilgan tizimlarini joriy etish, hisobga olish asbob-uskunalari va ular uchun konsentratorlar ishlab chiqaradigan qoʻshma korxona tashkil etish boʻyicha tajriba loyihalarini Koreya kompaniyalari bilan roʻyobga chiqarish;

v) Oʻzbekiston Respublikasi Prezidenti huzuridagi Loyiha boshqaruvi milliy agentligi va Koreyaning blokcheyn-tadbirkorlar uyushmasi oʻrtasida Oʻzbekiston Respublikasida blokcheyn texnologiyalarni joriy etishda Koreya tomonidan texnik koʻmak berilishini nazarda tutadigan Hamkorlik toʻgʻrisida bitim imzolandi.

Oʻzbekiston Respublikasi Prezidenti huzuridagi Loyiha boshqaruvi milliy agentligi ushbu bandda nazarda tutilgan tadbirlar va loyihalarni amalga oshirishga koʻmaklashishi belgilab qoʻyilsin.

2. Ushbu qarorning 1-bandida koʻrsatilgan loyihalarni amalga oshirish doirasida 2021-yil 1-iyulga qadar muddatga:

bosh loyiha, pudrat va subpudrat tashkilotlari — loyiha-qidiruv va qurilish-montaj ishlarining bajarilayotgan hajmlari boʻyicha barcha turdagi soliqlar va davlat maqsadli jamgʻarmalariga majburiy ajratmalardan;

buyurtmachi, bosh loyiha va pudrat tashkilotlari, ishlab chiqaruvchilar va subpudrat tashkilotlari tomonidan xarid qilinadigan tovarlar (ishlar, xizmatlar), jumladan xom ashyo, materiallar, ehtiyot qismlar, butlovchi buyumlar va asbob-uskunalar — qoʻshilgan qiymat soligʻidan;

belgilangan tartibda shakllantiriladigan roʻyxat boʻyicha buyurtmachi, bosh pudrat va subpudrat tashkilotlari tomonidan olib kelinadigan va respublikada ishlab chiqarilmaydigan tovarlar (ishlar, xizmatlar), jumladan xom ashyo, materiallar, ehtiyot qismlar, butlovchi buyumlar va asbob-uskunalar — bojxona toʻlovlaridan (bojxonada rasmiylashtiruvi uchun yigʻimlar bundan mustasno) ozod etilsin.

3. Oʻzbekiston Respublikasi Tashqi ishlar vazirligi ushbu qarorning 1-bandida koʻrsatilgan tadbirlarni oʻtkazish va loyihalarni amalga oshirish doirasida jalb etiladigan xorijlik mutaxassislarga Oʻzbekiston Respublikasi Prezidenti huzuridagi Loyiha boshqaruvi milliy agentligining buyurtmanomalariga binoan konsullik va boshqa yigʻimlar undirilmasdan kirish vizalari rasmiylashtirilishini taʼminlasin.

4. Oʻzbekiston Respublikasi Ichki ishlar vazirligi ushbu qarorning 1-bandida koʻrsatilgan tadbirlarni oʻtkazish va loyihalarni amalga oshirish doirasida jalb etiladigan xorijlik mutaxassislarga Oʻzbekiston Respublikasi Prezidenti huzuridagi Loyiha boshqaruvi milliy agentligi buyurtmanomalariga binoan davlat boji undirilmasdan koʻp martalik vizalar rasmiylashtirilishi, berilishi va uzaytirilishini, shuningdek, ularning vaqtincha turgan joyi boʻyicha roʻyxatga olinishi va uning muddati uzaytirilishini taʼminlasin.

5. Oʻzbekiston Respublikasi Bandlik va mehnat munosabatlari vazirligi Oʻzbekiston Respublikasi Prezidenti huzuridagi Loyiha boshqaruvi milliy agentligi buyurtmanomalariga binoan ushbu qarorning 1-bandida koʻrsatilgan loyihalarni amalga oshirish uchun respublikaga yuqori malakali xorijlik mutaxassislarni jalb qilish uchun ruxsatnomalar berilishini (uzaytirilishini), shuningdek, jalb etiladigan xorijlik mutaxassislarga Oʻzbekiston Respublikasi hududida mehnat faoliyatini amalga oshirish huquqiga tasdiqnomalar berilishini (uzaytirilishini ) taʼminlasin.

6. Oʻzbekiston Respublikasi Moliya vazirligi, zaruratga koʻra, ushbu qarorning 1-bandida koʻrsatilgan ijtimoiy loyihalarni amalga oshirish uchun jalb etiladigan xorijiy kreditlar va qarzlar boʻyicha Oʻzbekiston Respublikasi davlat kafolatlari berilishini taʼminlasin.

7. Mazkur qarorning ijrosini nazorat qilish Oʻzbekiston Respublikasining Bosh vaziri A.N. Aripov va Oʻzbekiston Respublikasi Prezidenti huzuridagi Loyiha boshqaruvi milliy agentligi direktori Sh.M. Sadikov zimmasiga yuklansin.