O‘zbekiston Respublikasi Prezidentining 2018-yil 26-apreldagi “Fermer, dehqon xo‘jaliklari va tomorqa yer egalari faoliyatini takomillashtirish bo‘yicha qo‘shimcha chora-tadbirlar to‘g‘risida” PQ-3680-son qarori ijrosini ta’minlash, O‘zbekiston fermer, dehqon xo‘jaliklari va tomorqa yer egalari kengashi huzuridagi Fermer, dehqon xo‘jaliklari va tomorqa yer egalarini qo‘llab-quvvatlash jamg‘armasi (keyingi o‘rinlarda Jamg‘arma deb ataladi) faoliyatini tashkil etish maqsadida Vazirlar Mahkamasi qaror qiladi:

1. Quyidagilar:

O‘zbekiston fermerlari kengashi huzuridagi Fermer xo‘jaliklarini qo‘llab-quvvatlash jamg‘armasi vasiylik kengashining tarkibi 1-ilovaga muvofiq;

O‘zbekiston fermerlari kengashi huzuridagi Fermer xo‘jaliklarini qo‘llab-quvvatlash jamg‘armasi ijro etuvchi apparatining tuzilmasi 2-ilovaga muvofiq;

O‘zbekiston fermerlari kengashi huzuridagi Fermer xo‘jaliklarini qo‘llab-quvvatlash jamg‘armasi to‘g‘risidagi nizom 3-ilovaga muvofiq tasdiqlansin.

Jamg‘armaning ijro etuvchi apparati, jumladan, markaziy apparati va hududiy vakillari shtat birliklari soni Jamg‘arma vasiylik kengashi tomonidan belgilanadi. Bunda Jamg‘arma ish hajmidan kelib chiqib, Vasiylik kengashiga Jamg‘armaga qo‘shimcha shtat birliklari jalb etish, O‘zbekiston fermerlari kengashiga zarurat bo‘lganda Jamg‘armaning ijro etuvchi apparati tuzilmasiga o‘zgartirishlar kiritish huquqi berilsin.

Belgilab qo‘yilsinki:

“Tomorqa xizmati” MCHJlarning ustav fondlarida Jamg‘arma mablag‘lari hisobiga shakllantirilgan ulush nomidan O‘zbekiston fermerlari kengashi, hududiy fermerlar kengashlari ishtirokchi bo‘lishi mumkin;

hududiy fermerlar kengashlari raislari “Tomorqa xizmati” MCHJ ustav fondidagi ulushlarning samarali boshqarilishi uchun shaxsan mas’ul hisoblanadi;

Jamg‘arma ijrochi etuvchi direktori lavozimiga ko‘ra O‘zbekiston fermerlari kengashi raisining o‘rinbosari hisoblanadi, Jamg‘armaning hududiy vakillari hududiy fermerlar kengashlari raislari o‘rinbosarlari hisoblanadi. Bunda Jamg‘arma ijrochi direktoriga Kengash faoliyatida ishtirokidan kelib chiqib, Kengash mablag‘lari hisobidan qo‘shimcha rag‘batlantirish to‘lovlari amalga oshirilishi mumkin.

Jamg‘arma tomonidan fermer xo‘jaliklariga va boshqa qishloq xo‘jaligi korxonalariga qonunchilikda belgilangan tartibda meva-sabzavotlarni qayta ishlash (quritish) korxonalari, sovitish omborxonalari, chorvachilik komplekslari, ishlab chiqarish bino-inshootlari, issiqxona majmualari qurib berish, tayyor intensiv bog‘lar va tokzorlar barpo etish, qishloq xo‘jaligida zanjirli ishlab chiqarishni yo‘lga qo‘yib, yakuniy mahsulot ishlab chiqarishga ixtisoslashgan, jumladan, omuxta yem tayyorlash, sutni qayta ishlash, tomat pasta ishlab chiqarish, mineral o‘g‘itlar tayyorlash, o‘simliklarga kimyoviy ishlov berish, qadoqlash va saralash uskunalari bilan ta’minlash bo‘yicha lizing faoliyatini amalga oshirish tartibi Jamg‘arma vasiylik kengashi tomonidan tasdiqlanadi.

O‘zbekiston Respublikasi Prezidentining 2018-yil 26-apreldagi “Fermer, dehqon xo‘jaliklari va tomorqa yer egalari faoliyatini takomillashtirish bo‘yicha qo‘shimcha chora-tadbirlar to‘g‘risida”gi PQ-3680-son qaroriga muvofiq mablag‘larni tijorat banklariga joylashtirish hisobidan olinadigan daromadlarning 30 foizgacha miqdordagi Jamg‘arma daromadlari Kengashni moddiy-texnik hamda moliyaviy jihatdan ta’minlash, shuningdek, uning xodimlarini moddiy rag‘batlantirish uchun yo‘naltirilishi ma’lumot uchun qabul qilinsin.

Mazkur bandning o‘n birinchi xatboshisidagi maqsadlar uchun Jamg‘armaning “Tomorqa xizmati” MCHJ ustav kapitalidagi ulushlarini nominal (balans) qiymatida O‘zbekiston fermerlari kengashiga hamda hududiy fermerlar kengashlariga berishga rozilik berilsin.

2. Jamg‘arma Toshkent shahar, Islom Karimov ko‘chasi, 2A-uy manziliga bepul foydalanish huquqi bilan joylashtirilsin hamda mazkur manzilda ajratilgan hudud va xonalarni Jamg‘arma mablag‘lari hisobidan ta’mirlash vakolati berilsin.

Jamg‘arma Vasiylik kengashi bilan kelishgan holda Toshkent shahri hududida yer maydoni sotib olib, ma’muriy bino qurishi yoki tayyor binoni xarid qilishi mumkin.

3. O‘zbekiston Respublikasi Axborot texnologiyalari va kommunikatsiyalarini rivojlantirish vazirligi Jamg‘armani belgilangan tartibda Hukumat va shahar aloqa vositalari bilan ta’minlasin.

4. Jamg‘armaning Vasiylik kengashi raisi (Z. Mirzayev) Jamg‘armaning Vasiylik kengashi to‘g‘risidagi nizomni bir oy muddatda tasdiqlasin.

6. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosari Z.T. Mirzayev hamda O‘zbekiston fermer, dehqon xo‘jaliklari va tomorqa yer egalari kengashi raisi vazifasini bajaruvchi A.A. Xaitov zimmasiga yuklansin.

1. Ushbu Nizom O‘zbekiston fermerlari kengashi huzuridagi Fermer xo‘jaliklarini qo‘llab-quvvatlash jamg‘armasining (keyingi o‘rinlarda Jamg‘arma deb ataladi) vazifalari va faoliyati yo‘nalishlarini, boshqarish tartibini, shuningdek, uning mablag‘larini shakllantirish va ulardan foydalanish tartibini belgilaydi.

Jamg‘arma o‘z faoliyatida O‘zbekiston fermerlari kengashiga (keyingi o‘rinlarda Kengash deb ataladi) hisobot beradi.

2. Jamg‘arma o‘z faoliyatida O‘zbekiston Respublikasi Konstitutsiyasi va qonunlariga, O‘zbekiston Respublikasi Oliy Majlisi palatalari qarorlariga, O‘zbekiston Respublikasi Prezidentining farmonlari, qarorlari va farmoyishlariga, Vazirlar Mahkamasining qarorlari va farmoyishlariga, ushbu Nizomga, shuningdek boshqa qonun hujjatlariga amal qiladi.

3. Jamg‘arma muassasa shaklidagi yuridik shaxs hisoblanadi, o‘zining mustaqil balansiga, milliy va xorijiy valyutada bank hisob raqamlariga, o‘z emblemasi tasviri tushirilgan va nomi davlat tilida yozilgan muhrga, shtamplarga va blankalarga ega.

4. Fermer xo‘jaliklari va boshqa qishloq xo‘jaligi korxonalarini moliyaviy qo‘llab-quvvatlash Jamg‘armaning asosiy vazifalari hisoblanadi.

5. Jamg‘arma o‘z faoliyatini quyidagi asosiy yo‘nalishlar bo‘yicha amalga oshiradi:

fermer xo‘jaliklari va boshqa qishloq xo‘jaligi korxonalari faoliyatini rivojlantirish, kredit resurslaridan foydalanishni kengaytirish sohasida qo‘llab-quvvatlash;

fermer xo‘jaliklari va boshqa qishloq xo‘jaligi korxonalarining innovatsion faoliyatini qo‘llab-quvvatlash, yangi turdagi qishloq xo‘jaligi mahsulotlari yetishtirishni rag‘batlantirish, shuningdek qishloq xo‘jaligida yangi samarali texnologiyalarni joriy qilishga ko‘maklashish;

qishloq xo‘jaligi faoliyatini rivojlantirishga ko‘maklashuvchi davlat, tarmoq va hududiy dasturlarni, loyihalar hamda tadbirlarni amalga oshirishda ishtirok etish.

fermer xo‘jaliklari va boshqa qishloq xo‘jaligi korxonalarini Jamg‘arma mablag‘lari hisobidan qonunchilikda belgilangan tartibda qishloq xo‘jaligi texnikasi va texnologiyalari, qishloq xo‘jaligi mahsulotlarini tashishga mo‘ljallangan transport vositalari, asbob-uskunalar yoki ular joylashgan bino-inshootlar bilan birga, shuningdek, tayyor intensiv bog‘ va tokzorlar hamda issiqxonalar bilan ta’minlash bo‘yicha lizing faoliyatini amalga oshirish.

6. Jamg‘armaning Vasiylik kengashi Jamg‘armani boshqarishning yuqori organi hisoblanadi.

7. Jamg‘armaning Vasiylik kengashi:

Jamg‘arma Vasiylik kengashi to‘g‘risida nizomni tasdiqlaydi;

Jamg‘armaning daromadlari bo‘yicha har yilgi prognozlarni tasdiqlaydi;

Jamg‘arma tomonidan tijorat banklariga resurs ajratish, lizing xizmatlarini ko‘rsatish hamda Jamg‘armaning boshqa asosiy faoliyat yo‘nalishlariga mablag‘lar ajratishning har yilgi prognoz parametrlarini belgilaydi. Bunda Jamg‘arma mablag‘lari hisobidan moliyalashtiriladigan loyihalarga tashabbuskorlarning talabidan kelib chiqqan holda har yilgi parametrlardan kelib chiqib qo‘shimcha mablag‘lar ajratilishi mumkin;

Jamg‘armaning ijro etuvchi apparati faoliyati ustidan nazorat qiladi;

Jamg‘arma ijro etuvchi direktorining Jamg‘arma mablag‘laridan foydalanilishi to‘g‘risidagi hisobotlarini muntazam eshitadi;

har chorakda hisobot davridan keyingi oyning 20-kunidan kechikmay O‘zbekiston Respublikasi Iqtisodiyot va moliya vazirligiga Jamg‘arma mablag‘lari shakllantirilishi va ulardan foydalanilishi to‘g‘risida hisobotlar taqdim etadi;

Jamg‘armani yillik auditdan o‘tkazish uchun, shu jumladan, uning mablag‘laridan maqsadli foydalanish bo‘yicha auditorlik tashkilotini belgilaydi;

Jamg‘arma ishtirokchi hisoblangan mas’uliyati cheklangan jamiyatlar ustav kapitalidagi ulushlarini va ularning yirik bitimlari doirasidagi aktivlarini tasarrufidan chiqarish tartibini belgilaydi, odatdagi xo‘jalik faoliyati jarayonida tuziladigan bitimlar bundan mustasno;

O‘zbekiston Respublikasi Vazirlar Mahkamasiga Jamg‘armaning ustav kapitalini ko‘paytirish to‘g‘risida takliflar kiritadi.

Jamg‘arma Vasiylik kengashi qarorlari ochiq ovoz berish orqali, oddiy ko‘pchilik ovoz bilan qabul qilinadi. Vasiylik kengashi majlis bayonlari so‘rov o‘tkazish yo‘li bilan rasmiylashtirilishi mumkin.

Jamg‘armaning Vasiylik kengashi a’zolariga yuklangan vazifalar bajarilganligi uchun Jamg‘armaning Vasiylik kengashi to‘g‘risidagi nizomda belgilangan tartibda va miqdorlarda taqdirlash pullari to‘lanadi.

8. Jamg‘armaning ijro etuvchi apparati Jamg‘armaning ijroiya organi hisoblanadi. Jamg‘armaning ijro etuvchi direktori (keyingi o‘rinlarda Ijro etuvchi direktor deb ataladi) Jamg‘arma ijro etuvchi apparati rahbari hisoblanadi.

9. Ijro etuvchi direktor:

Jamg‘armaning joriy faoliyatiga operativ rahbarlik qiladi;

Jamg‘armaga yuklangan vazifalarga muvofiq Jamg‘armaning ijro etuvchi apparati faoliyatini tashkil etadi va shaxsan javob beradi;

Jamg‘armaning ijro etuvchi apparati xodimlarini ishga qabul qiladi va ular bilan tuzilgan mehnat shartnomalari amal qilishini to‘xtatadi, ularning lavozim majburiyatlari va vakolatlarini taqsimlaydi;

xalqaro va xorijiy tashkilotlarda Jamg‘arma nomidan ish ko‘radi;

Jamg‘arma nomidan mehnat, xo‘jalik, kredit shartnomalarini va boshqa shartnomalarni, shu jumladan, resurslarni ajratish va tijorat banklarining depozitlarida joylashtirish to‘g‘risidagi shartnomalarni imzolaydi;

Jamg‘armaning pul mablag‘lari va moddiy boyliklarining buxgalteriya hisobi yuritilishini, moliyaviy va statistika hisobotlari belgilangan tartibda tayyorlanishi va taqdim etilishini tashkil etadi;

qonun hujjatlariga muvofiq boshqa majburiyatlar va vakolatlarni amalga oshiradi.

Mazkur bandda nazarda tutilayotgan majburiyat va vakolatlar Jamg‘arma ijro etuvchi direktori o‘rinbosari zimmasiga yuklatilishi mumkin.

10. Jamg‘armaning ijro etuvchi apparatini saqlab turish Jamg‘armaning Vasiylik kengashi tomonidan tasdiqlanadigan daromadlar va xarajatlar smetasi asosida Jamg‘armaning mablag‘lari hisobiga amalga oshiriladi.

11. Jamg‘arma ijro etuvchi direktori va xodimlarini moddiy rag‘batlantirish Jamg‘arma Vasiylik kengashi tomonidan tasdiqlanadigan Jamg‘arma xodimlarini moddiy rag‘batlantirish to‘g‘risidagi nizomga asosan Jamg‘arma mablag‘lari hisobidan amalga oshiriladi.

13. Jamg‘arma xodimlarining ish haqi lavozim maoshi, mukofotlar, qo‘shimcha haq va ustamalar, rag‘batlantiruvchi to‘lovlar, shuningdek, qonun hujjatlarida hamda Jamg‘arma xodimlarini moddiy rag‘batlantirish to‘g‘risidagi nizomda nazarda tutilgan qo‘shimcha moddiy rag‘batlantirish mablag‘laridan tashkil topadi.

Jamg‘arma xodimlarining lavozim maoshlari Jamg‘arma Vasiylik kengashi tomonidan tasdiqlanadigan shtatlar jadvali asosida belgilanadi.

Jamg‘arma o‘z xodimlarining lavozim maoshlariga 5 baravargacha o‘sib boruvchi koeffitsiyentni qo‘llashga haqli.

14. Jamg‘armaga yuklangan vazifalarni bajarish uchun Jamg‘arma daromadlari va xarajatlari smetasiga muvofiq o‘n beshta xizmat avtotransport vositasini xarid qilish va saqlash uchun mablag‘ ajratiladi.

Jamg‘armada ish yuritish jarayonini raqamlashtirish maqsadida Jamg‘arma vasiylik kengashi bilan kelishgan holda uning faoliyatidagi barcha hisob-kitoblarni va hujjatlashtirish jarayonini qamrab oluvchi hamda “oilakredit.uz” yagona elektron platformasiga integratsiya qilinadigan axborot dasturi yaratiladi.

15. Jamg‘arma mablag‘lari quyidagi manbalar hisobiga shakllantiriladi:

Jamg‘armaga yuklangan vazifalarni bajarish uchun jalb qilinadigan xalqaro moliya institutlari, xorijiy hukumat tashkilotlari va boshqa donorlarning kreditlari (qarzlari) va grantlari;

Jamg‘armaning daromadlari, shu jumladan, mablag‘larni depozit hisob raqamlariga joylashtirishdan olinadigan daromadlar;

qonun hujjatlarida taqiqlanmagan boshqa manbalar.

Jamg‘armaga kelib tushgan mablag‘lar uning o‘z mablag‘lari hisoblanadi va Jamg‘armaning Vasiylik kengashi tomonidan tasdiqlanadigan daromadlar va xarajatlar smetasi asosida sarflanadi.

16. Jamg‘arma mablag‘lari Jamg‘armaning tijorat banklarida ochiladigan hisob raqamlarida jamlanadi.

17. Jamg‘arma mablag‘lari quyidagilar uchun sarflanadi:

fermer xo‘jaliklari va ular bilan hamkorlikda ishlaydigan dehqon xo‘jaliklari hamda boshqa qishloq xo‘jaligi korxonalariga chorvachilik (qoramol, qo‘y, echki), baliqchilik, quyonchilik, asalarichilik, kurkachilik va parrandachilik, biogumus ishlab chiqarish, agroturizm loyihalari, suv chiqarish uchun tejamkor nasos agregatlari xarid qilish, qishloq xo‘jaligi maqsadlarida quyosh panellarini o‘rnatish, artezian quduqlarini qazish, yomg‘irlatib sug‘orish tizimini o‘rnatish va dala do‘konlarini qurish uchun — 1 yilgacha imtiyozli davr bilan 4 yil muddatga kreditlar ajratish uchun resurslarni tijorat banklariga joylashtirish. Bunda kreditlar yillik Markaziy bankning asosiy stavkasidan 4 foizlik punkt yuqori stavkada (shundan 4 foizi bank marjasi) beriladi;

fermer xo‘jaliklari va ular bilan hamkorlikda ishlaydigan dehqon xo‘jaliklari hamda boshqa qishloq xo‘jaligi korxonalariga bog‘dorchilik (ko‘chatchilik), uzumchilik (tok so‘risi) va limonchilikni tashkil etish, issiqxona qurish, qishloq xo‘jaligi texnikasi va transporti hamda asbob-uskunalarini xarid qilish, ularni joylashtirish uchun bino va inshootlar (jumladan, yozgi to‘rli issiqxonalar) qurish, ko‘chma muzlatkichlarni o‘rnatish, agrologistika markazlarini tashkil etish, “in-vitro” va boshqa laboratoriyalar, sovutish omborxonalarini tashkil etish uchun — 3 yilgacha imtiyozli davr bilan 7 yilgacha kreditlar ajratish uchun resurslarni tijorat banklariga joylashtirish. Bunda kreditlar yillik Markaziy bankning asosiy stavkasidan 4 foizlik punkt yuqori stavkada (shundan 4 foizi bank marjasi) beriladi;

qishloq xo‘jaligi mahsulotlarini yetishtirish, qayta ishlash va eksport qilish, xalqaro sertifikatlar olish, “o‘simliklar klinikasi” faoliyati hamda qishloq xo‘jaligining boshqa yo‘nalishlari uchun aylanma mablag‘larga talabgorlarga 6 oy imtiyozli davr bilan 18 oy muddatga kreditlar ajratish uchun resurslarni tijorat banklariga joylashtirish. Bunda kreditlar yillik Markaziy bankning asosiy stavkasida (shundan 4 foizi bank marjasi) beriladi;

Jahon banki va boshqa xalqaro moliya institutlarining kreditlari va qarzlariga xizmat ko‘rsatish;

xalqaro moliya institutlaridan olingan grant mablag‘lari va Jamg‘armaning o‘z mablag‘lari hisobidan fermer xo‘jaliklari va boshqa qishloq xo‘jaligi korxonalariga grantlar ajratish. Bunda Jamg‘arma mablag‘lari hisobidan grant ajratish yo‘nalishlari va tartibi Jamg‘arma Vasiylik kengashi tomonidan belgilanadi;

fermer xo‘jaliklari va boshqa qishloq xo‘jaligi korxonalariga qonunchilikda belgilangan tartibda meva-sabzavotlarni qayta ishlash (quritish) korxonalari, sovitish omborxonalari, chorvachilik komplekslari, ishlab chiqarish bino-inshootlari, issiqxona majmualari qurib berish, intensiv bog‘lar va tokzorlar barpo etish, qishloq xo‘jaligida zanjirli ishlab chiqarishni yo‘lga qo‘yib, yakuniy mahsulot ishlab chiqarishga ixtisoslashgan, jumladan, omuxta yem tayyorlash, sutni qayta ishlash, tomat pasta ishlab chiqarish, mineral o‘g‘itlar tayyorlash, o‘simliklarga kimyoviy ishlov berish, qadoqlash va saralash uskunalari bilan ta’minlash bo‘yicha lizing faoliyatini amalga oshirish;

qishloq xo‘jaligi mahsulotlari yetishtiruvchilarga quritish sexi va sovitkichli omborxonalarni xarid qilish va o‘rnatishga 36 oygacha imtiyozli davr bilan 84 oy muddatga yillik Markaziy bankning asosiy stavkasidan 4 foizlik punkt yuqori stavkada oilaviy tadbirkorlikni rivojlantirish dasturlarining yagona elektron platformasi orqali kreditlar berish. Bunda, kredit summasining 60 foizi bo‘yicha garov ta’minoti sifatida o‘rnatiladigan quritish sexi va sovitkichli omborxonalar olinadi, 40 foizi bo‘yicha garov ta’minoti sifatida ularning qaytmaslik xatarini sug‘urta qilish bo‘yicha sug‘urta polisi olinadi;

meva-sabzavotlarni qayta ishlash (quritish) korxonalari, sovitish omborxonalari, chorvachilik komplekslari, issiqxona majmualari qurilishiga, intensiv bog‘lar va tokzorlar barpo etilishiga, qishloq xo‘jaligida zanjirli ishlab chiqarishni yo‘lga qo‘yib, yakuniy mahsulot ishlab chiqarishga ixtisoslashgan, jumladan, omuxta yem tayyorlash, sutni qayta ishlash, tomat pasta ishlab chiqarish, mineral o‘g‘itlar tayyorlash, o‘simliklarga kimyoviy ishlov berish, qadoqlash va saralash uskunalarini keltirishga va mazkur obyektlarni sotish uchun savdo maydonlari tashkil etishga. Bunda mazkur xatboshida nazarda tutilayotgan faoliyat Jamg‘arma ta’sischiligida tashkil etiladigan tadbirkorlik subyektlari tomonidan amalga oshirilishi mumkin, shuningdek mazkur obyektlar fermer xo‘jaliklari va boshqa qishloq xo‘jaligi korxonalariga Jamg‘armadan belgilangan tartibda ajratiladigan kreditlar evaziga va lizing to‘lovlari asosida mazkur obyektlarning o‘zini garovga qo‘yish huquqi asosida Jamg‘arma tomonidan balans qiymatida sotiladi. Ularni qurish, xarid qilish va sotish tartibi Jamg‘arma vasiylik kengashi tomonidan tasdiqlanadi;

davlat-xususiy sheriklik shartlari asosida loyihalarni belgilangan tartibda moliyalashtirish;

Jamg‘armani saqlab turish va faoliyatini moddiy-texnik jihatdan ta’minlash;

ustav kapitalida Jamg‘arma ulushi shakllantirilgan mas’uliyati cheklangan jamiyatlar faoliyatida ishtirok etish va ularga qo‘shimcha mablag‘ ajratish;

fermer xo‘jaliklari va boshqa qishloq xo‘jaligi korxonalarini rivojlantirish, qonunchilik hujjatlarida nazarda tutilgan innovatsion va boshqa loyihalarni amalga oshirishga investitsiyalarni jalb qilish bilan bog‘liq boshqa yo‘nalishlar;

Jamg‘arma tomonidan fermer xo‘jaliklari rahbarlari va a’zolarining hamda qishloq xo‘jaligi kooperativlari xodimlarining bilim va ko‘nikmalarini oshirish uchun o‘quv kurslarini tashkil etish bilan bog‘liq xarajatlarni qoplash uchun subsidiyalar ajratish. Bunda o‘quv markazlari faoliyatini moliyalashtirish tartibi Jamg‘armaning vasiylik kengashi tomonidan tasdiqlanadi;

fermer xo‘jaliklari va boshqa qishloq xo‘jaligi korxonalarida qishloq xo‘jaligi borasida innovatsion yo‘nalishlarni ommalashtirish maqsadida mahalliy va xalqaro seminar va ko‘rgazmalar tashkil etish hamda xorijda o‘tkaziladigan bu kabi tadbirlarda fermer xo‘jaliklari va boshqa qishloq xo‘jaligi korxonalari rahbarlari, Kengash va Jamg‘arma xodimlarini ishtirokini ta’minlash;

Kengashni saqlash va moddiy-texnik ta’minlash hamda mablag‘larni tijorat banklariga joylashtirish hisobiga olinadigan Jamg‘arma daromadlarning 30 foizi miqdordagi mablag‘lar (pul mablag‘lari yoki boshqa aktivlar ko‘rinishida) uning xodimlarini moddiy rag‘batlantirish.

18. Jamg‘armaning tijorat banklariga resurs ajratish va mablag‘larini depozitga qo‘yishdan olingan, shuningdek Jamg‘armaning bo‘sh turgan mablag‘lariga tijorat banki tomonidan to‘langan foiz ko‘rinishidagi daromadlari Jamg‘armaning o‘z mablag‘lari bo‘lib, konsolidatsiyalashgan budjet mablag‘lari yoki budjet tizimi budjetlari mablag‘lari hisoblanmaydi.

Jamg‘armaning Vasiylik kengashi qaroriga asosan “Tomorqa xizmati” MCHJlarga 300 million so‘mgacha ajratilgan garovsiz kredit uchun Jamg‘armaning tijorat banklari tomonidan garovga (depozit) olingan mablag‘larining akseptsiz undirilgan hamda tijorat banklariga qo‘yilgan depozit mablag‘larining qaytmagan qismi mazkur bandning birinchi xatboshisida keltirilgan manbalar hisobidan yaratilgan zaxira mablag‘lari hisobidan qoplanadi.

Jamg‘armaning “Tomorqa xizmati” MCHJlar ustav fondini shakllantirish uchun yo‘naltirilgan mablag‘lari mazkur bandning birinchi xatboshida keltirilgan manbalar hisobidan shakllantirilgan bo‘lib, Jamg‘armaning o‘z aktivlari hisoblanadi.

O‘zbekiston Respublikasi Prezidentining 2025-yil 14-fevraldagi “Tomorqa yer egalari va dehqon xo‘jaliklari faoliyatida zamonaviy tashkiliy tizimni joriy qilish va moliyaviy qo‘llab-quvvatlashning qo‘shimcha chora-tadbirlari to‘g‘risida”gi PF-22-son Farmoni 6-bandida belgilangan mablag‘lar Kambag‘allikni qisqartirish va bandlik vazirligi huzuridagi Dehqon xo‘jaliklari va tomorqa yer egalarini qo‘llab-quvvatlash jamg‘armasiga o‘tkazib berilgandan so‘ng Jamg‘armaning balansida mavjud barcha aktivlar, jumladan pul mablag‘lari Fermer, dehqon xo‘jaliklari va tomorqa yer egalarini qo‘llab-quvvatlash jamg‘armasining daromadidan shakllangan o‘z aktivlari hisoblanadi;

Jamg‘arma faoliyati va mablag‘lari davlat tashqi auditi va moliyaviy nazorati organlari nazorat obyekti hisoblanmaydi.

19. Tijorat banklariga resurslar ajratish uchun Jamg‘arma va bosh tijorat banki o‘rtasida qonun hujjatlarida belgilangan tartibda bosh kelishuv tuziladi.

20. Bosh kelishuvni tuzish uchun tijorat banklari Jamg‘armaga bankning tegishli boshqaruv organi (kuzatuv kengashi yoki aksiyadorlar umumiy yig‘ilishi) tomonidan tasdiqlangan bosh kelishuv tuzish to‘g‘risidagi qarorning yoki bosh kelishuv tuzish vakolatini beruvchi boshqa hujjatning bir nusxasini taqdim etadi.

21. Jamg‘arma mablag‘lari hisobidan kreditlar hududiy fermerlar kengashlari tavsiyanomasiga ko‘ra hamda har bir mahallaga mahallabay ishlash bo‘yicha biriktirilgan hokim yordamchisi tomonidan beriladigan tavsiyalar asosida ko‘ra oilaviy tadbirkorlikni rivojlantirish dasturlari doirasidagi loyihalarni moliyalashtirish manbalarida nazarda tutilgan mablag‘lardan tashqari va navbatsiz rasmiylashtirib beriladi.

Tavsiya etilgan talabgor kredit olish bo‘yicha talablarga mos bo‘lmaganda tijorat banklari kredit bermaslik huquqiga ega.

Talabgorlarga kreditlar oilaviy tadbirkorlikni rivojlantirish dasturlaridan tashqari boshqa qishloq xo‘jaligi yo‘nalishlari asosida ham ajratilishi mumkin.

22. Bosh kelishuvni tuzgan respublika tijorat banklari yoki ularning viloyat filiallari mablag‘lar olish uchun Jamg‘armaga hududiy fermerlar kengashlari bilan kelishilganligini tasdiqlovchi axborot va hududlar bo‘yicha qarz oluvchilar — loyiha tashabbuskorlari ko‘rsatilgan buyurtmanomani taqdim etadilar.

23. Olingan buyurtmanomalar asosida Jamg‘arma mablag‘larni tijorat bankiga o‘tkazib beradi, shuningdek, fermerlar bilan hamkorlikda ishlaydigan dehqon xo‘jaliklari uchun mablag‘lar tijorat banklarining umumiy buyurtmanomasi asosida (tashabbuskor — fermerlar bilan hamkorlikda ishlaydigan dehqon xo‘jaliklari ko‘rsatilmagan holda) ham o‘tkazib berilishi mumkin.

Jamg‘armaga kiritilgan buyurtmanomalar qonunchilikda belgilangan talablarga mos bo‘lmagan taqdirda, tijorat bankiga resurs bo‘lib — bo‘lib ajratilishi yoki ajratilmasdan qaytarib yuborilishi mumkin.

24. Jamg‘arma tomonidan tijorat banklariga ajratilgan hamda fermer xo‘jaliklariga kredit berish uchun foydalanilayotgan resurslar uchun bosh bank bosh kelishuvda nazarda tutilgan tijorat banki marjasini ajratib qolgan holda imtiyozli foiz stavkasi miqdorida foiz hisoblaydi, ushbu mablag‘lar jamg‘arib boriladigan hisobraqamida yig‘iladi va bosh kelishuvda belgilangan muddatlarda Jamg‘armaning tegishli bank hisobraqamiga o‘tkazib beriladi.

Jamg‘arma mablag‘lari fermer xo‘jaliklari va boshqa qishloq xo‘jaligi korxonalariga maxsus elektron axborot dasturlari orqali rasmiylashtirib berilishi mumkin.

Tomorqa yer egalariga onlayn tarzda mikrokreditlar ajratish uchun resurslar hududiy fermer, dehqon xo‘jaliklari va tomorqa yer egalari kengashlarining takliflariga asosan Jamg‘arma tomonidan respublika tijorat banklariga tumanlar kesimida joylashtiriladi.

25. Tijorat banki foydalanilmagan va muddatidan oldin qaytarilgan, shuningdek, maqsadsiz ishlatilgan mablag‘larni Jamg‘arma hisobraqamiga qaytarishga majbur.

Tijorat banklari Jamg‘armadan ajratilgan kreditlarni tashabbuskorlar tomonidan maqsadli foydalanilishi va tijorat bankiga qaytarilishi to‘g‘risida Jamg‘armaga har oyning 5-sanasiga qadar tashabbuskorlar kesimida axborot taqdim etadi.

26. Ushbu Nizom talablari buzilishida aybdor bo‘lgan shaxslar qonun hujjatlariga muvofiq javob beradilar.

27. Ushbu Nizomni amalga oshirishda yuzaga keladigan nizolar qonun hujjatlarida belgilangan tartibda, shu jumladan, sud tartibida hal etiladi.

28. Jamg‘arma tugatish qonun hujjatlarida nazarda tutilgan tartibda amalga oshiriladi.