Oʻzbekiston Respublikasi Prezidentining afv etishni amalga oshirish boʻyicha konstitutsiyaviy vakolatini roʻyobga chiqarish mexanizmlarini yanada takomillashtirish maqsadida va Oʻzbekiston Respublikasi Konstitutsiyasining 93-moddasi 23-bandiga muvofiq:

1. Oʻzbekiston Respublikasida afv etishni amalga oshirish tartibi toʻgʻrisidagi nizom ilovaga muvofiq tasdiqlansin.

2. Oʻzbekiston Respublikasi Prezidentining 2009-yil 13-martdagi “Oʻzbekiston Respublikasida afv etishni amalga oshirish tartibi toʻgʻrisidagi nizomni tasdiqlash haqida”gi PF-4094-son Farmoni oʻz kuchini yoʻqotgan deb hisoblansin.

4. Oʻzbekiston Respublikasi Ichki ishlar vazirligi manfaatdor idoralar bilan birgalikda bir oy muddatda qonun hujjatlariga ushbu Farmondan kelib chiqadigan oʻzgartish va qoʻshimchalar toʻgʻrisida takliflar kiritsin.

5. Mazkur Farmonning ijrosini nazorat qilish Oʻzbekiston Respublikasi Prezidenti Davlat maslahatchisining birinchi oʻrinbosari B.M. Mavlonov zimmasiga yuklansin.

1. Ushbu Nizom afv etish toʻgʻrisidagi iltimosnomalarni taqdim etish, rasmiylashtirish va koʻrib chiqish, shuningdek, Oʻzbekiston Respublikasi Prezidenti huzuridagi Afv etish masalalari boʻyicha komissiya (keyingi oʻrinlarda Komissiya deb yuritiladi) faoliyatini tashkil etish tartibini belgilaydi.

2. Afv etish mahkumni jazodan toʻliq yoki qisman ozod etadigan yoki sud tomonidan tayinlangan jazoni boshqa yengilroq jazo bilan almashtiradigan yoxud sudlanganlikni olib tashlaydigan insonparvarlik akti hisoblanadi.

Afv etish muayyan mahkumga nisbatan individual tartibda amalga oshiriladi hamda uni oqlaydigan va u tomonidan jinoyat sodir etganlik faktini bartaraf qiladigan holat hisoblanmaydi.

Afv etish Oʻzbekiston Respublikasi Prezidenti tomonidan Oʻzbekiston Respublikasi Prezidenti Farmonini qabul qilish orqali amalga oshiriladi.

3. Oʻzbekiston Respublikasi Prezidenti oʻz ixtiyoriga koʻra istalgan mahkumni yoki jazoni oʻtab boʻlgan shaxsni afv etishi mumkin.

4. Afv etish Oʻzbekiston Respublikasi sudlari tomonidan hukm qilingan Oʻzbekiston Respublikasi fuqarolariga, chet el fuqarolariga va fuqaroligi boʻlmagan shaxslarga nisbatan qoʻllaniladi.

5. Afv etish quyidagi shakllarda amalga oshiriladi:

asosiy va ijro etilmagan qoʻshimcha jazodan toʻliq yoki qisman ozod qilish;

jazodan muddatidan ilgari shartli ozod qilish;

umrbod ozodlikdan mahrum qilish jazosini yoki jazoning oʻtalmagan qismini yengilroq jazo bilan almashtirish;

sudlanganlikni olib tashlash.

6. Afv etish toʻgʻrisidagi iltimosnomalarni dastlabki tarzda koʻrib chiqish Oʻzbekiston Respublikasi Prezidenti huzuridagi maslahat-kengash organi hisoblangan Komissiya tomonidan amalga oshiriladi.

7. Oʻzbekiston Respublikasi Prezidentining islohotlarni huquqiy taʼminlash va huquqni muhofaza qilish faoliyatini muvofiqlashtirish masalalari boʻyicha maslahatchisi boʻlinmalarining Fuqarolik, afv etish va siyosiy boshpana berish masalalari boʻyicha shuʼbasi (keyingi oʻrinlarda — Shuʼba) Komissiyaning ishchi organi hisoblanadi.

8. Komissiyaning tarkibi Oʻzbekiston Respublikasi Prezidenti tomonidan tasdiqlanadi.

9. Komissiya tarkibiga Oʻzbekiston Respublikasi Oliy sudi, Bosh prokuraturasi, Davlat xavfsizlik xizmati, Ichki ishlar vazirligi, Adliya vazirligi, shuningdek, Oʻzbekiston Yoshlar ittifoqi va Xotin-qizlar qoʻmitasi, Fuqarolarning oʻzini oʻzi boshqarish organlari faoliyatini muvofiqlashtirish boʻyicha respublika kengashi hamda “Nuroniy” jamgʻarmasi vakillari kiritiladi.

Komissiya tarkibiga Oʻzbekiston Respublikasi Oliy Majlisi Qonunchilik palatasi deputatlari va Senati aʼzolari, shuningdek, boshqa davlat organlari, nodavlat notijorat tashkilotlar vakillari hamda boshqa shaxslar ham kiritilishi mumkin.

10. Komissiya majlislarini Komissiya raisi yoki uning topshirigʻiga koʻra oʻrinbosar oʻtkazadi.

11. Komissiya majlislari afv etish toʻgʻrisidagi iltimosnomalar kelib tushishiga qarab oʻtkaziladi.

12. Komissiya majlislarida Oʻzbekiston Respublikasi Oliy sudi raisi, Bosh prokurori, Davlat xavfsizlik xizmati raisi, ichki ishlar va adliya vazirlari, ular boʻlmagan taqdirda oʻrinbosarlari ishtirok etishi mumkin.

13. Komissiya afv etish toʻgʻrisidagi iltimosnomalarni koʻrib chiqish bilan bogʻliq masalalarni muhokama qilish uchun oʻz majlislariga davlat organlari, nodavlat notijorat tashkilotlar vakillarini va boshqa shaxslarni taklif etish huquqiga ega.

14. Komissiya majlisida bayonnoma yuritiladi.

15. Afv etish toʻgʻrisidagi iltimosnoma mahkum yoki jazoni oʻtab boʻlgan shaxs, shuningdek, qonun hujjatlari bilan afv etish toʻgʻrisida iltimosnoma qoʻzgʻatish huquqi berilgan shaxs (organ)lar tomonidan Oʻzbekiston Respublikasi Prezidenti nomiga yozma shaklda beriladi.

Agar iltimosnoma qonun hujjatlari bilan afv etish toʻgʻrisida iltimosnoma qoʻzgʻatish huquqi berilgan shaxs (organ) tomonidan berilgan boʻlsa, mahkumning yozma roziligi olinishi shart. Bunday holatda afv etish toʻgʻrisidagi iltimosnoma ushbu Nizomning 19-bandida koʻrsatilgan organlarga mahkumning roziligini olish, tegishli materiallarni belgilangan tartibda rasmiylashtirish uchun yuboriladi. Afv etish toʻgʻrisidagi iltimosnoma mahkumning yozma roziligi va ushbu Nizom talablariga muvofiq rasmiylashtirilgan boshqa materiallar bilan birga Shuʼbaga yuboriladi.

16. Afv etish toʻgʻrisidagi iltimosnoma sud hukmi qonuniy kuchga kirgandan keyin quyidagi muddatlarda berilishi mumkin:

a) umrbod ozodlikdan mahrum qilishga hukm etilgan shaxs tomonidan u tayinlangan jazoning yigirma besh yilini haqiqatda oʻtab boʻlganidan keyin, agar jazoni oʻtash davrida mahkum qatʼiy tuzalish yoʻliga oʻtgan, belgilangan tartibni buzganlik uchun intizomiy jazo olmagan, mehnat va oʻqishga nisbatan vijdonan munosabatda boʻlayotgan, tarbiyaviy tadbirlar oʻtkazishda faol ishtirok etayotgan taqdirda esa, tayinlangan jazoning yigirma yilini haqiqatda oʻtab boʻlganidan keyin;

b) uzoq muddatga ozodlikdan mahrum qilishga hukm etilgan shaxs tomonidan u tayinlangan jazo muddatining yigirma yilini haqiqatda oʻtab boʻlganidan keyin, agar jazoni oʻtash davrida mahkum qatʼiy tuzalish yoʻliga oʻtgan, belgilangan tartibni buzganlik uchun intizomiy jazo olmagan, mehnat va oʻqishga nisbatan vijdonan munosabatda boʻlayotgan, tarbiyaviy tadbirlar oʻtkazishda faol ishtirok etayotgan taqdirda esa, tayinlangan jazoning oʻn besh yilini haqiqatda oʻtab boʻlganidan keyin;

v) boshqa jazoga hukm etilgan shaxs tomonidan oʻtalgan (ijro etilgan) jazo muddati (hajmi)dan qatʼi nazar, ushbu bandning “g” kichik bandida koʻrsatilgan shaxslar bundan mustasno;

g) ilgari amnistiya akti asosida jinoiy javobgarlikdan ozod etilgan, shartli hukm qilingan, muddatidan ilgari shartli ravishda, amnistiya akti va afv etish asosida jazodan ozod qilingan, shuningdek, oʻziga nisbatan yengilroq jazo bilan almashtirish qoʻllanilgan hamda yana qasddan jinoyat sodir etgan shaxs, xuddi shuningdek, oʻta xavfli retsidivist tomonidan u tayinlangan jazo muddatining kamida uchdan bir qismini haqiqatda oʻtab boʻlganidan keyin, ushbu bandning “a” va “b” kichik bandlarida koʻrsatilgan shaxslar bundan mustasno.

17. Afv etish toʻgʻrisidagi iltimosnoma Shuʼbaga:

a) jazoni ijro etish muassasasining maʼmuriyati yoki hukmni ijro etuvchi boshqa organ (keyingi oʻrinlarda — muassasa maʼmuriyati) orqali;

b) sudlanganlikni olib tashlash boʻyicha afv etish toʻgʻrisidagi iltimosnoma berilgan hollarda mustaqil ravishda yuboriladi.

18. Afv etish toʻgʻrisidagi iltimosnoma muassasa maʼmuriyati tomonidan afv etish toʻgʻrisidagi iltimosnomalar hisobi yuritiladigan maxsus jurnalda iltimosnoma berilgan kunda roʻyxatdan oʻtkaziladi, bu haqda mahkum imzo qoʻydirilgan holda xabardor etiladi.

19. Afv etish toʻgʻrisidagi iltimosnoma muayyan huquqdan mahrum qilish, majburiy jamoat ishlari, axloq tuzatish ishlari, ozodlikni cheklash, ozodlikdan mahrum qilish, uzoq muddatga ozodlikdan mahrum qilish yoxud umrbod ozodlikdan mahrum qilish tariqasidagi jazoga hukm qilingan shaxs tomonidan berilgan kundan boshlab oʻn kundan kechikmay Oʻzbekiston Respublikasi Ichki ishlar vazirligiga yoki sud tomonidan jazoni ijro etish zimmasiga yuklangan boshqa organga yuboriladi.

Jarima tariqasidagi jazoga hukm qilingan shaxsni afv etish toʻgʻrisidagi iltimosnoma Bosh prokuratura huzuridagi Majburiy ijro byurosi tomonidan, xizmat boʻyicha cheklash va intizomiy qismga joʻnatish tariqasidagi jazoga hukm qilingan shaxsni afv etish toʻgʻrisidagi iltimosnoma Oʻzbekiston Respublikasi Mudofaa vazirligi yoki jazoni ijro etuvchi boshqa organ tomonidan ushbu Nizomda belgilangan tartibda Shuʼbaga yuboriladi.

20. Ushbu Nizomning 16 va 34-bandlari talablariga muvofiq berilgan afv etish toʻgʻrisidagi iltimosnomani yuborishni muassasa maʼmuriyati tomonidan rad etish mumkin emas. Muassasa maʼmuriyati tomonidan iltimosnoma yuborilganligi haqida mahkum ikki kun davomida imzo qoʻydirilgan holda xabardor etiladi.

Ushbu nizomning 16 va 34-bandlarida koʻrsatilgan muddatlar oʻtgunga qadar afv etish toʻgʻrisidagi iltimosnoma bilan murojaat qilingan hollarda muassasa maʼmuriyati tomonidan ushbu iltimosnoma keyinchalik koʻrib chiqish uchun yuborilmagan holda roʻyxatdan oʻtkaziladi, mahkumga esa afv etish toʻgʻrisidagi iltimosnomani berish tartibi imzo qoʻydirilgan holda tushuntiriladi.

21. Afv etish toʻgʻrisidagi iltimosnomaga muassasa maʼmuriyati tomonidan quyidagi hujjatlar ilova qilinadi:

a) mahkumning shaxsini tasdiqlovchi hujjatning muassasa maʼmuriyati tomonidan tasdiqlangan nusxasi;

b) mahkumning biografik maʼlumotlari, uning oilaviy holati haqidagi maʼlumotlar, shuningdek, mahkumning oldingi afv etish toʻgʻrisidagi iltimosnomalarini koʻrib chiqish natijalari koʻrsatilgan soʻrovnoma;

v) mahkumning jazoni oʻtash davridagi xulq-atvori, mehnat va oʻqishga munosabati, sodir etilgan qilmishga munosabati toʻgʻrisidagi maʼlumotlarni oʻz ichiga olgan muassasa maʼmuriyatining mahkum haqidagi tavsifnomasi;

g) mahkumning sogʻligʻi holati haqida maʼlumotnoma;

d) mahkumning jazoni oʻtashiga asos boʻlgan sud hukmi (hukmlari)ning muassasa maʼmuriyati tomonidan tasdiqlangan nusxasi va yuqori turuvchi sud instansiyalarining ushbu sud hukmi (hukmlari) boʻyicha qarorlarining, shuningdek, mahkumga nisbatan chiqarilgan boshqa sud qarorlarining muassasa maʼmuriyati tomonidan tasdiqlangan nusxalari;

e) muassasa maʼmuriyatining sud hukmi qonuniy kuchga kirishi, mahkumga nisbatan amnistiya akti yoki afv etish qoʻllanilishi, shuningdek, jinoyat oqibatida yetkazilgan zarar mahkum tomonidan qoplanishi haqidagi maʼlumotlarni oʻz ichiga olgan axboroti.

Afv etish toʻgʻrisidagi iltimosnomaga mahkumning iltimosiga koʻra afv etish haqidagi masalani hal qilish uchun ahamiyatga ega boshqa materiallar ilova qilinishi mumkin.

22. Ushbu Nizomning 19-bandida koʻrsatilgan organlar afv etish toʻgʻrisidagi iltimosnomani olgan kundan boshlab oʻn kun davomida:

afv etish toʻgʻrisidagi iltimosnomani kelib tushgan materiallar bilan birga oʻrganadi va har bir mahkum boʻyicha mazkur organlar rahbarlarining oʻrinbosarlari tomonidan tasdiqlanadigan umumlashtirilgan maʼlumotnoma-jadval tayyorlaydi;

iltimosnomani umumlashtirilgan maʼlumotnoma-jadval va boshqa materiallar bilan birga Shuʼbaga yuboradi. Ogʻir va oʻta ogʻir jinoyatlar uchun hukm qilingan shaxslarga nisbatan iltimosnoma, maʼlumotnoma-jadval, sud qarori yoki uning qaror qiluvchi qismi hamda boshqa materiallarning nusxalari Oʻzbekiston Respublikasi Oliy sudi va Bosh prokuraturasiga, Jinoyat kodeksining 150 — 163, 244¹, 244², 244³ va 246-moddalarida (diniy ekstremizm, separatizm va aqidaparastlikni targʻib qiluvchi materiallarga doir qismi boʻyicha) nazarda tutilgan jinoyatlar boʻyicha iltimosnoma, maʼlumotnoma-jadval, sud qarori yoki uning qaror qiluvchi qismi hamda boshqa materiallarning nusxalari Davlat xavfsizlik xizmatiga ham yuboriladi.

Oʻzbekiston Respublikasi Oliy sudi, Bosh prokuraturasi va Davlat xavfsizlik xizmati bir oy davomida Shuʼbaga mazkur organlar rahbarlari oʻrinbosarlari tomonidan tasdiqlanadigan mahkumni afv etish mumkinligi masalasi yuzasidan xulosa taqdim etadi. Xulosada mahkumning shaxsi va sodir etilgan jinoyatning holatlari toʻgʻrisidagi maʼlumotlar, shuningdek, mahkumga nisbatan qabul qilingan sud qarorlarining mazmuni koʻrsatiladi.

23. Materiallar roʻyxat qilingan, ip oʻtkazib bogʻlangan va muhrlangan shaklda Shuʼbaga yuboriladi.

24. Ushbu Nizomning 19-bandida koʻrsatilgan organlar:

a) mahkum vafot etganda;

b) mahkum saqlash sharoiti oʻzgarganligi munosabati bilan boshqa muassasaga oʻtkazilganda;

v) afv etish haqidagi masalani hal qilishga taʼsir etishi mumkin boʻlgan boshqa holatlar yuzaga kelganda, jumladan mahkumga nisbatan jazodan ozod qilishning boshqa turlari qoʻllanilganda, Shuʼbani darhol xabardor qilishi shart.

25. Shuʼba hujjat aylanishini va hisobotni yuritish, dastlabki materiallar va tegishli xulosalarni toʻplash, maʼlumotnoma-jadval va bayonnomalar loyihalarini, shuningdek, Komissiya majlislarini oʻtkazish uchun zarur boʻlgan boshqa hujjatlarni tayyorlashni oʻz ichiga olgan Komissiya ishini tashkil etadi.

26. Tegishli materiallar bilan birga afv etish toʻgʻrisida kelib tushgan har bir iltimosnoma Shuʼba tomonidan ushbu Nizom talablariga rioya qilinganligi yuzasidan oʻrganiladi.

Shuʼba oʻrganish natijalari boʻyicha afv etish toʻgʻrisidagi iltimosnoma kelib tushgan kundan boshlab oʻn kun davomida:

iltimosnomani belgilangan tartibda koʻrib chiqish uchun qabul qiladi;

agar hujjatlarni berishda yoki rasmiylashtirishda ushbu Nizom talablari buzilishiga yoʻl qoʻyilgan boʻlsa, iltimosnomani koʻrib chiqish uchun qabul qilishni rad etadi va iltimosnomani u kelgan organga yoxud uni yuborgan shaxsga qaytaradi. Bunda afv etish toʻgʻrisidagi iltimosnoma aniqlangan kamchiliklar bartaraf etilgandan keyin, u qaytarilgan kundan boshlab bir oydan kechiktirmasdan takroran taqdim etilishi mumkin.

Hukmning asossizligiga yoki qonuniylik buzilganligiga doir tekshirilishi zarur boʻlgan maʼlumotlar keltirilgan afv etish toʻgʻrisidagi iltimosnomalar Shuʼba tomonidan tekshirish uchun tegishli organlarga yuboriladi.

27. Shuʼba, zarurat boʻlganda, tegishli organlar va tashkilotlarga quyidagilarni olish uchun soʻrovlar yuborishga haqli:

mahkumning sodir etilgan jinoyatga, mehnatga, oʻqishga nisbatan munosabatini, uning xulq-atvorini, sogʻligʻi holatini, shuningdek, jinoyat oqibatida yetkazilgan zarar qoplanganligini aks ettiruvchi axborotni;

mahkumga nisbatan amnistiya akti yoki afv etish qoʻllanilganligi, shartli hukm qilinganligi, hukm ijrosi kechiktirilganligi, jazodan muddatidan ilgari shartli ozod qilinganligi, jazoning oʻtalmagan qismi yengilroq jazo bilan almashtirilganligi, kasallik yoki mehnat qobiliyatini yoʻqotish oqibatida jazodan ozod etilganligi, muqaddam sudlanganligi, sudlanganligi olib tashlanganligi va tugallanganligi haqidagi maʼlumotlarni;

afv etish toʻgʻrisidagi iltimosnomani koʻrib chiqish uchun zarur boʻlgan boshqa maʼlumotlarni.

Tegishli organlar va tashkilotlar soʻrov kelib tushgan kundan boshlab oʻn kun davomida soʻralgan axborotni va maʼlumotlarni taqdim etadi.

28. Shuʼba toʻplangan materiallarni oʻrganish yakunlari boʻyicha umumlashtirilgan maʼlumotnoma-jadval tuzadi. Unda quyidagilar aks ettiriladi:

a) mahkumning biografik maʼlumotlari, oilaviy ahvoli, sogʻligʻi holati va uning shaxsini tavsiflovchi boshqa maʼlumotlar;

b) mahkumning muqaddam sudlanganligi, unga nisbatan amnistiya akti va afv etish qoʻllanilganligi, shartli hukm qilinganligi, jazodan muddatidan ilgari shartli ozod qilinganligi, hukm ijrosi kechiktirilganligi, jazoning oʻtalmagan qismi yengilroq jazo bilan almashtirilganligi, kasalligi sababli jazoni oʻtashdan ozod qilinganligi, sudlanganligi olib tashlanganligi va tugallanganligi haqidagi maʼlumotlar;

v) hukm chiqargan sud nomi va hukm chiqarilgan sana, sud hukmi qonuniy kuchga kirishi haqidagi maʼlumotlar, mahkumga nisbatan hukmning xulosa qismi mazmuni (Oʻzbekiston Respublikasi Jinoyat kodeksining mahkum hukm qilingan moddalari, tayinlangan jazo turi, muddati yoki hajmi, undirilishi lozim boʻlgan zarar summasi);

g) mahkum jazoni oʻtayotgan joy, jazoni ijro etish muassasalarida uning belgilangan rejimga rioya qilishi, jinoyat oqibatida yetkazilgan zararning qoplanganligi, jazo muddati (hajmi)ning oʻtalgan va oʻtalmagan qismlari, shuningdek, afv etish toʻgʻrisidagi oldingi iltimosnomalarni koʻrib chiqish natijalari haqidagi maʼlumotlar;

d) Oʻzbekiston Respublikasi Oliy sudi, Bosh prokuraturasi va Davlat xavfsizlik xizmatining mahkumlarni afv etish mumkinligi haqidagi xulosalari;

e) afv etish haqidagi masalani koʻrib chiqish uchun zarur boʻlgan boshqa materiallar.

29. Afv etish toʻgʻrisidagi iltimosnoma va tayyorlangan tegishli materiallar Shuʼba tomonidan Komissiya majlisida koʻrib chiqish uchun kiritiladi.

30. Afv etish toʻgʻrisidagi iltimosnomani Komissiya tomonidan koʻrib chiqish muddati iltimosnoma kelib tushgan kundan boshlab uch oydan oshmasligi lozim.

31. Afv etish toʻgʻrisidagi iltimosnomani koʻrib chiqishda Komissiya tomonidan quyidagilar eʼtiborga olinadi:

a) sodir etilgan jinoyatning xususiyati va ijtimoiy xavflilik darajasi;

b) jazoni oʻtash yoki ijro etish vaqtida mahkumning xulq-atvori (tuzalishi);

v) oʻtalgan (ijro etilgan) jazo muddati (hajmi);

g) mahkumga nisbatan muqaddam amnistiya akti, afv etish qoʻllanilganligi yoki jazodan muddatidan ilgari shartli ozod etilganligi, jazoning yengilroq jazo bilan almashtirilganligi;

d) jinoyat oqibatida yetkazilgan zararning qoplanganligi;

e) mahkumning shaxsi, sogʻligʻi holati, sudlanganligi, oilaviy ahvoli va yoshi;

j) Oʻzbekiston Respublikasi Oliy sudi, Bosh prokuraturasi va Davlat xavfsizlik xizmatining xulosalari;

z) Komissiya iltimosnomani koʻrib chiqish uchun muhim deb hisoblagan boshqa holatlar.

32. Afv etish toʻgʻrisidagi iltimosnomani koʻrib chiqishda qoʻshimcha tekshirilishi zarur boʻlgan masalalar kelib chiqqan hollarda, Komissiya iltimosnomani koʻrib chiqishdan olib tashlash, iltimosnoma koʻrib chiqiladigan muddat davomida, jumladan joyiga chiqqan hamda manfaatdor organlar va tashkilotlar vakillarini jalb qilgan holda tegishli organlarga oʻrganish oʻtkazish haqida topshiriq berish yoki oʻrganishni mustaqil tashkil etishga haqli. Oʻrganish yakuni boʻyicha Komissiyaga oʻrganilgan masala yuzasidan xulosa kiritiladi.

33. Komissiya majlisi unda Komissiya aʼzolari umumiy sonining kamida uchdan ikki qismi ishtirok etsa, vakolatli hisoblanadi.

Komissiya afv etish toʻgʻrisidagi iltimosnomani dastlabki tarzda koʻrib chiqish natijalari boʻyicha oddiy koʻpchilik ovoz bilan bayonnoma qarorini qabul qiladi.

Ovozlar teng boʻlib qolganda, Komissiya raisining ovozi hal qiluvchi ovoz hisoblanadi.

Afv etish toʻgʻrisidagi iltimosnoma ijobiy koʻrib chiqilganda, Komissiya Oʻzbekiston Respublikasi Prezidentiga taklif kiritadi.

Afv etish toʻgʻrisidagi iltimosnoma rad etilganda, Shuʼba bu haqda bir kun davomida iltimosnoma bergan shaxsni xabardor qilish uchun iltimosnoma kelib tushgan organga yoki iltimosnomani mustaqil ravishda yuborgan shaxsga xabar beradi.

Muassasa maʼmuriyati afv etish toʻgʻrisidagi iltimosnoma rad etilganligi haqidagi maʼlumotni olgandan soʻng keyingi kundan kechiktirmasdan iltimosnoma bergan mahkumni imzo qoʻydirgan holda xabardor qiladi.

34. Ogʻir va oʻta ogʻir jinoyatlar uchun hukm qilingan shaxslarni afv etish toʻgʻrisidagi takroriy murojaatga oldingi iltimosnoma rad etilgan kundan boshlab bir yil oʻtgandan soʻng, boshqa jinoyatlar uchun hukm qilingan shaxslarni afv etish toʻgʻrisidagi takroriy murojaatga esa oldingi iltimosnoma rad etilgan kundan boshlab olti oy oʻtgandan keyin yoʻl qoʻyiladi, jiddiy ahamiyatga ega boʻlgan yangi holatlar yuzaga kelgan hollar bundan mustasno.

35. Oʻzbekiston Respublikasi Prezidentining afv etish toʻgʻrisidagi farmoni ijro qilish uchun:

jarima jazosiga hukm qilingan shaxslarga nisbatan — Oʻzbekiston Respublikasi Bosh prokuraturasi huzuridagi Majburiy ijro byurosiga;

muayyan huquqdan mahrum qilish, majburiy jamoat ishlari, axloq tuzatish ishlari, ozodlikni cheklash, ozodlikdan mahrum qilish, uzoq muddatga ozodlikdan mahrum qilish yoxud umrbod ozodlikdan mahrum qilish tariqasidagi jazoga hukm qilingan shaxslarga, shuningdek, sudlanganligi olib tashlangan shaxslarga nisbatan — Oʻzbekiston Respublikasi Ichki ishlar vazirligiga yoki sud tomonidan jazoni ijro etish zimmasiga yuklangan boshqa organga;

xizmat boʻyicha cheklash, intizomiy qismga joʻnatish tariqasidagi jazoga hukm qilingan shaxslarga nisbatan — Oʻzbekiston Respublikasi Mudofaa vazirligiga yoki jazoni ijro etuvchi boshqa organlarga yuboriladi.

Oʻzbekiston Respublikasi Prezidentining afv etish toʻgʻrisidagi farmoni maʼlumot uchun va ijrosi ustidan nazoratni amalga oshirish uchun tegishli ravishda Oʻzbekiston Respublikasi Oliy sudi va Bosh prokuraturasiga yuboriladi.

36. Ushbu Nizomning 19-bandida koʻrsatilgan organlar Komissiyaga Oʻzbekiston Respublikasi Prezidentining afv etish masalalari boʻyicha farmonlari ijrosi haqida ularning ijro etilishiga qarab axborot beradi.

37. Oʻzbekiston Respublikasi Prezidentining afv etish toʻgʻrisidagi farmoni ijrosini nazorat qilish Shuʼba tomonidan amalga oshiriladi.

38. Ushbu Nizom talablari buzilishida aybdor boʻlgan shaxslar belgilangan tartibda javob beradilar.