O‘zbekiston Respublikasi Prezidentining afv etishni amalga oshirish bo‘yicha konstitutsiyaviy vakolatini ro‘yobga chiqarish mexanizmlarini yanada takomillashtirish maqsadida va O‘zbekiston Respublikasi Konstitutsiyasining 109-moddasi 23-bandiga muvofiq:

1. O‘zbekiston Respublikasida afv etishni amalga oshirish tartibi to‘g‘risidagi nizom ilovaga muvofiq tasdiqlansin.

2. O‘zbekiston Respublikasi Prezidentining 2009-yil 13-martdagi “O‘zbekiston Respublikasida afv etishni amalga oshirish tartibi to‘g‘risidagi nizomni tasdiqlash haqida”gi PF-4094-son Farmoni o‘z kuchini yo‘qotgan deb hisoblansin.

4. O‘zbekiston Respublikasi Ichki ishlar vazirligi manfaatdor idoralar bilan birgalikda bir oy muddatda qonun hujjatlariga ushbu Farmondan kelib chiqadigan o‘zgartish va qo‘shimchalar to‘g‘risida takliflar kiritsin.

5. Mazkur Farmonning ijrosini nazorat qilish O‘zbekiston Respublikasi Prezidenti Davlat maslahatchisining birinchi o‘rinbosari B.M. Mavlonov zimmasiga yuklansin.

1. Ushbu Nizom afv etish to‘g‘risidagi iltimosnomalarni taqdim etish, rasmiylashtirish va ko‘rib chiqish, shuningdek, O‘zbekiston Respublikasi Prezidenti huzuridagi Afv etish masalalari bo‘yicha komissiya (keyingi o‘rinlarda Komissiya deb yuritiladi) faoliyatini tashkil etish tartibini belgilaydi.

2. Afv etish mahkumni jazodan to‘liq yoki qisman ozod etadigan yoki sud tomonidan tayinlangan jazoni boshqa yengilroq jazo bilan almashtiradigan yoxud sudlanganlikni olib tashlaydigan insonparvarlik akti hisoblanadi.

Afv etish muayyan mahkumga nisbatan individual tartibda amalga oshiriladi hamda uni oqlaydigan va u tomonidan jinoyat sodir etganlik faktini bartaraf qiladigan holat hisoblanmaydi.

Afv etish O‘zbekiston Respublikasi Prezidenti tomonidan O‘zbekiston Respublikasi Prezidenti Farmonini qabul qilish orqali amalga oshiriladi.

3. O‘zbekiston Respublikasi Prezidenti o‘z ixtiyoriga ko‘ra istalgan mahkumni yoki jazoni o‘tab bo‘lgan shaxsni afv etishi mumkin.

4. Afv etish O‘zbekiston Respublikasi sudlari tomonidan hukm qilingan O‘zbekiston Respublikasi fuqarolariga, chet el fuqarolariga va fuqaroligi bo‘lmagan shaxslarga nisbatan qo‘llaniladi.

5. Afv etish quyidagi shakllarda amalga oshiriladi:

asosiy va ijro etilmagan qo‘shimcha jazodan to‘liq yoki qisman ozod qilish;

jazodan muddatidan ilgari shartli ozod qilish;

umrbod ozodlikdan mahrum qilish jazosini yoki jazoning o‘talmagan qismini yengilroq jazo bilan almashtirish;

sudlanganlikni olib tashlash.

6. Afv etish to‘g‘risidagi iltimosnomalarni dastlabki tarzda ko‘rib chiqish O‘zbekiston Respublikasi Prezidenti huzuridagi maslahat-kengash organi hisoblangan Komissiya tomonidan amalga oshiriladi.

7. O‘zbekiston Respublikasi Prezidenti Administratsiyasi Jamoat xavfsizligi va qonun ustuvorligi bo‘yicha departamentining fuqarolik va afv etish shu’basi (keyingi o‘rinlarda — Shu’ba) Komissiyaning ishchi organi hisoblanadi.

8. Komissiyaning tarkibi O‘zbekiston Respublikasi Prezidenti tomonidan tasdiqlanadi.

9. Komissiya tarkibiga O‘zbekiston Respublikasi Oliy sudi, Bosh prokuraturasi, Davlat xavfsizlik xizmati, Ichki ishlar vazirligi, Adliya vazirligi, Kambag‘allikni qisqartirish va bandlik vazirligi, shuningdek, O‘zbekiston Respublikasi Yoshlar ishlari agentligi va “Nuroniy” jamg‘armasi vakillari kiritiladi.

Komissiya tarkibiga O‘zbekiston Respublikasi Oliy Majlisi Qonunchilik palatasi deputatlari va Senati a’zolari, shuningdek, boshqa davlat organlari, nodavlat notijorat tashkilotlar vakillari hamda boshqa shaxslar ham kiritilishi mumkin.

10. Komissiya majlislarini Komissiya raisi yoki uning topshirig‘iga ko‘ra o‘rinbosar o‘tkazadi.

11. Komissiya majlislari afv etish to‘g‘risidagi iltimosnomalar kelib tushishiga qarab o‘tkaziladi.

Zarur hollarda Komissiya majlislari videokonferensaloqa rejimida o‘tkazilishi mumkin.

12. Komissiya majlislarida O‘zbekiston Respublikasi Oliy sudi raisi, Bosh prokurori, Davlat xavfsizlik xizmati raisi, ichki ishlar, adliya vazirlari hamda Oila va xotin-qizlar qo‘mitasi raisi, ular bo‘lmagan taqdirda o‘rinbosarlari ishtirok etishi mumkin.

13. Komissiya afv etish to‘g‘risidagi iltimosnomalarni ko‘rib chiqish bilan bog‘liq masalalarni muhokama qilish uchun o‘z majlislariga davlat organlari, nodavlat notijorat tashkilotlar vakillarini va boshqa shaxslarni taklif etish huquqiga ega.

14. Komissiya majlisida bayonnoma yuritiladi.

15. Afv etish to‘g‘risidagi iltimosnoma mahkum yoki jazoni o‘tab bo‘lgan shaxs, shuningdek, qonun hujjatlari bilan afv etish to‘g‘risida iltimosnoma qo‘zg‘atish huquqi berilgan shaxs (organ)lar tomonidan O‘zbekiston Respublikasi Prezidenti nomiga yozma shaklda beriladi.

Agar iltimosnoma qonun hujjatlari bilan afv etish to‘g‘risida iltimosnoma qo‘zg‘atish huquqi berilgan shaxs (organ) tomonidan berilgan bo‘lsa, mahkumning yozma roziligi olinishi shart. Bunday holatda afv etish to‘g‘risidagi iltimosnoma ushbu Nizomning 19-bandida ko‘rsatilgan organlarga mahkumning roziligini olish, tegishli materiallarni belgilangan tartibda rasmiylashtirish uchun yuboriladi. Afv etish to‘g‘risidagi iltimosnoma mahkumning yozma roziligi va ushbu Nizom talablariga muvofiq rasmiylashtirilgan boshqa materiallar bilan birga Shu’baga yuboriladi.

16. Afv etish to‘g‘risidagi iltimosnoma sud hukmi qonuniy kuchga kirgandan keyin quyidagi muddatlarda berilishi mumkin:

a) umrbod ozodlikdan mahrum qilishga hukm etilgan shaxs tomonidan u tayinlangan jazoning yigirma besh yilini haqiqatda o‘tab bo‘lganidan keyin, agar jazoni o‘tash davrida mahkum qat’iy tuzalish yo‘liga o‘tgan, belgilangan tartibni buzganlik uchun intizomiy jazo olmagan, mehnat va o‘qishga nisbatan vijdonan munosabatda bo‘layotgan, tarbiyaviy tadbirlar o‘tkazishda faol ishtirok etayotgan taqdirda esa, tayinlangan jazoning yigirma yilini haqiqatda o‘tab bo‘lganidan keyin;

b) uzoq muddatga ozodlikdan mahrum qilishga hukm etilgan shaxs tomonidan u tayinlangan jazo muddatining yigirma yilini haqiqatda o‘tab bo‘lganidan keyin, agar jazoni o‘tash davrida mahkum qat’iy tuzalish yo‘liga o‘tgan, belgilangan tartibni buzganlik uchun intizomiy jazo olmagan, mehnat va o‘qishga nisbatan vijdonan munosabatda bo‘layotgan, tarbiyaviy tadbirlar o‘tkazishda faol ishtirok etayotgan taqdirda esa, tayinlangan jazoning o‘n besh yilini haqiqatda o‘tab bo‘lganidan keyin;

v) boshqa jazoga hukm etilgan shaxs tomonidan o‘talgan (ijro etilgan) jazo muddati (hajmi)dan qat’i nazar, ushbu bandning “g” kichik bandida ko‘rsatilgan shaxslar bundan mustasno;

g) ilgari amnistiya akti asosida jinoiy javobgarlikdan ozod etilgan, shartli hukm qilingan, muddatidan ilgari shartli ravishda, amnistiya akti va afv etish asosida jazodan ozod qilingan, shuningdek, o‘ziga nisbatan yengilroq jazo bilan almashtirish qo‘llanilgan hamda yana qasddan jinoyat sodir etgan shaxs, xuddi shuningdek, o‘ta xavfli retsidivist tomonidan u tayinlangan jazo muddatining kamida uchdan bir qismini haqiqatda o‘tab bo‘lganidan keyin, ushbu bandning “a” va “b” kichik bandlarida ko‘rsatilgan shaxslar bundan mustasno.

17. Afv etish to‘g‘risidagi iltimosnoma Shu’baga:

a) jazoni ijro etish muassasasining ma’muriyati yoki hukmni ijro etuvchi boshqa organ (keyingi o‘rinlarda — muassasa ma’muriyati) orqali;

b) sudlanganlikni olib tashlash bo‘yicha afv etish to‘g‘risidagi iltimosnoma berilgan hollarda mustaqil ravishda yuboriladi.

18. Afv etish to‘g‘risidagi iltimosnoma muassasa ma’muriyati tomonidan afv etish to‘g‘risidagi iltimosnomalar hisobi yuritiladigan maxsus jurnalda iltimosnoma berilgan kunda ro‘yxatdan o‘tkaziladi, bu haqda mahkum imzo qo‘ydirilgan holda xabardor etiladi.

19. Afv etish to‘g‘risidagi iltimosnoma muayyan huquqdan mahrum qilish, majburiy jamoat ishlari, axloq tuzatish ishlari, ozodlikni cheklash, ozodlikdan mahrum qilish, uzoq muddatga ozodlikdan mahrum qilish yoxud umrbod ozodlikdan mahrum qilish tariqasidagi jazoga hukm qilingan shaxs tomonidan berilgan kundan boshlab o‘n kundan kechikmay O‘zbekiston Respublikasi Ichki ishlar vazirligiga yoki sud tomonidan jazoni ijro etish zimmasiga yuklangan boshqa organga yuboriladi.

Jarima tariqasidagi jazoga hukm qilingan shaxsni afv etish to‘g‘risidagi iltimosnoma Bosh prokuratura huzuridagi Majburiy ijro byurosi tomonidan, xizmat bo‘yicha cheklash va intizomiy qismga jo‘natish tariqasidagi jazoga hukm qilingan shaxsni afv etish to‘g‘risidagi iltimosnoma O‘zbekiston Respublikasi Mudofaa vazirligi yoki jazoni ijro etuvchi boshqa organ tomonidan ushbu Nizomda belgilangan tartibda Shu’baga yuboriladi.

20. Ushbu Nizomning 16 va 34-bandlari talablariga muvofiq berilgan afv etish to‘g‘risidagi iltimosnomani yuborishni muassasa ma’muriyati tomonidan rad etish mumkin emas. Muassasa ma’muriyati tomonidan iltimosnoma yuborilganligi haqida mahkum ikki kun davomida imzo qo‘ydirilgan holda xabardor etiladi.

Ushbu nizomning 16 va 34-bandlarida ko‘rsatilgan muddatlar o‘tgunga qadar afv etish to‘g‘risidagi iltimosnoma bilan murojaat qilingan hollarda muassasa ma’muriyati tomonidan ushbu iltimosnoma keyinchalik ko‘rib chiqish uchun yuborilmagan holda ro‘yxatdan o‘tkaziladi, mahkumga esa afv etish to‘g‘risidagi iltimosnomani berish tartibi imzo qo‘ydirilgan holda tushuntiriladi.

21. Afv etish to‘g‘risidagi iltimosnomaga muassasa ma’muriyati tomonidan quyidagi hujjatlar ilova qilinadi:

a) mahkumning shaxsini tasdiqlovchi hujjatning muassasa ma’muriyati tomonidan tasdiqlangan nusxasi;

b) mahkumning biografik ma’lumotlari, uning oilaviy holati haqidagi ma’lumotlar, shuningdek, mahkumning oldingi afv etish to‘g‘risidagi iltimosnomalarini ko‘rib chiqish natijalari ko‘rsatilgan so‘rovnoma;

v) mahkumning jazoni o‘tash davridagi xulq-atvori, mehnat va o‘qishga munosabati, sodir etilgan qilmishga munosabati to‘g‘risidagi ma’lumotlarni o‘z ichiga olgan muassasa ma’muriyatining mahkum haqidagi tavsifnomasi;

g) mahkumning sog‘lig‘i holati haqida ma’lumotnoma;

d) mahkumning jazoni o‘tashiga asos bo‘lgan sud hukmi (hukmlari)ning muassasa ma’muriyati tomonidan tasdiqlangan nusxasi va yuqori turuvchi sud instansiyalarining ushbu sud hukmi (hukmlari) bo‘yicha qarorlarining, shuningdek, mahkumga nisbatan chiqarilgan boshqa sud qarorlarining muassasa ma’muriyati tomonidan tasdiqlangan nusxalari;

e) muassasa ma’muriyatining sud hukmi qonuniy kuchga kirishi, mahkumga nisbatan amnistiya akti yoki afv etish qo‘llanilishi, shuningdek, jinoyat oqibatida yetkazilgan zarar mahkum tomonidan qoplanishi haqidagi ma’lumotlarni o‘z ichiga olgan axboroti.

Afv etish to‘g‘risidagi iltimosnomaga mahkumning iltimosiga ko‘ra afv etish haqidagi masalani hal qilish uchun ahamiyatga ega boshqa materiallar ilova qilinishi mumkin.

22. Ushbu Nizomning 19-bandida ko‘rsatilgan organlar afv etish to‘g‘risidagi iltimosnomani olgan kundan boshlab o‘n kun davomida:

afv etish to‘g‘risidagi iltimosnomani kelib tushgan materiallar bilan birga o‘rganadi va har bir mahkum bo‘yicha mazkur organlar rahbarlarining o‘rinbosarlari tomonidan tasdiqlanadigan umumlashtirilgan ma’lumotnoma-jadval tayyorlaydi;

iltimosnomani umumlashtirilgan ma’lumotnoma-jadval va boshqa materiallar bilan birga Shu’baga yuboradi. Og‘ir va o‘ta og‘ir jinoyatlar uchun hukm qilingan shaxslarga nisbatan iltimosnoma, ma’lumotnoma-jadval, sud qarori yoki uning qaror qiluvchi qismi hamda boshqa materiallarning nusxalari O‘zbekiston Respublikasi Oliy sudi va Bosh prokuraturasiga, Jinoyat kodeksining 150 — 163, 244¹, 244², 244³ va 246-moddalarida (diniy ekstremizm, separatizm va aqidaparastlikni targ‘ib qiluvchi materiallarga doir qismi bo‘yicha) nazarda tutilgan jinoyatlar bo‘yicha iltimosnoma, ma’lumotnoma-jadval, sud qarori yoki uning qaror qiluvchi qismi hamda boshqa materiallarning nusxalari Davlat xavfsizlik xizmatiga ham yuboriladi.

O‘zbekiston Respublikasi Oliy sudi, Bosh prokuraturasi va Davlat xavfsizlik xizmati bir oy davomida Shu’baga mazkur organlar rahbarlari o‘rinbosarlari tomonidan tasdiqlanadigan mahkumni afv etish mumkinligi masalasi yuzasidan xulosa taqdim etadi. Xulosada mahkumning shaxsi va sodir etilgan jinoyatning holatlari to‘g‘risidagi ma’lumotlar, shuningdek, mahkumga nisbatan qabul qilingan sud qarorlarining mazmuni ko‘rsatiladi.

23. Materiallar ro‘yxat qilingan, ip o‘tkazib bog‘langan va muhrlangan shaklda Shu’baga yuboriladi.

24. Ushbu Nizomning 19-bandida ko‘rsatilgan organlar:

a) mahkum vafot etganda;

b) mahkum saqlash sharoiti o‘zgarganligi munosabati bilan boshqa muassasaga o‘tkazilganda;

v) afv etish haqidagi masalani hal qilishga ta’sir etishi mumkin bo‘lgan boshqa holatlar yuzaga kelganda, jumladan mahkumga nisbatan jazodan ozod qilishning boshqa turlari qo‘llanilganda, Shu’bani darhol xabardor qilishi shart.

25. Shu’ba hujjat aylanishini va hisobotni yuritish, dastlabki materiallar va tegishli xulosalarni to‘plash, ma’lumotnoma-jadval va bayonnomalar loyihalarini, shuningdek, Komissiya majlislarini o‘tkazish uchun zarur bo‘lgan boshqa hujjatlarni tayyorlashni o‘z ichiga olgan Komissiya ishini tashkil etadi.

26. Tegishli materiallar bilan birga afv etish to‘g‘risida kelib tushgan har bir iltimosnoma Shu’ba tomonidan ushbu Nizom talablariga rioya qilinganligi yuzasidan o‘rganiladi.

Shu’ba o‘rganish natijalari bo‘yicha afv etish to‘g‘risidagi iltimosnoma kelib tushgan kundan boshlab o‘n kun davomida:

iltimosnomani belgilangan tartibda ko‘rib chiqish uchun qabul qiladi;

agar hujjatlarni berishda yoki rasmiylashtirishda ushbu Nizom talablari buzilishiga yo‘l qo‘yilgan bo‘lsa, iltimosnomani ko‘rib chiqish uchun qabul qilishni rad etadi va iltimosnomani u kelgan organga yoxud uni yuborgan shaxsga qaytaradi. Bunda afv etish to‘g‘risidagi iltimosnoma aniqlangan kamchiliklar bartaraf etilgandan keyin, u qaytarilgan kundan boshlab bir oydan kechiktirmasdan takroran taqdim etilishi mumkin.

Hukmning asossizligiga yoki qonuniylik buzilganligiga doir tekshirilishi zarur bo‘lgan ma’lumotlar keltirilgan afv etish to‘g‘risidagi iltimosnomalar Shu’ba tomonidan tekshirish uchun tegishli organlarga yuboriladi.

27. Shu’ba, zarurat bo‘lganda, tegishli organlar va tashkilotlarga quyidagilarni olish uchun so‘rovlar yuborishga haqli:

mahkumning sodir etilgan jinoyatga, mehnatga, o‘qishga nisbatan munosabatini, uning xulq-atvorini, sog‘lig‘i holatini, shuningdek, jinoyat oqibatida yetkazilgan zarar qoplanganligini aks ettiruvchi axborotni;

mahkumga nisbatan amnistiya akti yoki afv etish qo‘llanilganligi, shartli hukm qilinganligi, hukm ijrosi kechiktirilganligi, jazodan muddatidan ilgari shartli ozod qilinganligi, jazoning o‘talmagan qismi yengilroq jazo bilan almashtirilganligi, kasallik yoki mehnat qobiliyatini yo‘qotish oqibatida jazodan ozod etilganligi, muqaddam sudlanganligi, sudlanganligi olib tashlanganligi va tugallanganligi haqidagi ma’lumotlarni;

afv etish to‘g‘risidagi iltimosnomani ko‘rib chiqish uchun zarur bo‘lgan boshqa ma’lumotlarni.

Tegishli organlar va tashkilotlar so‘rov kelib tushgan kundan boshlab o‘n kun davomida so‘ralgan axborotni va ma’lumotlarni taqdim etadi.

28. Shu’ba to‘plangan materiallarni o‘rganish yakunlari bo‘yicha umumlashtirilgan ma’lumotnoma-jadval tuzadi. Unda quyidagilar aks ettiriladi:

a) mahkumning biografik ma’lumotlari, oilaviy ahvoli, sog‘lig‘i holati va uning shaxsini tavsiflovchi boshqa ma’lumotlar;

b) mahkumning muqaddam sudlanganligi, unga nisbatan amnistiya akti va afv etish qo‘llanilganligi, shartli hukm qilinganligi, jazodan muddatidan ilgari shartli ozod qilinganligi, hukm ijrosi kechiktirilganligi, jazoning o‘talmagan qismi yengilroq jazo bilan almashtirilganligi, kasalligi sababli jazoni o‘tashdan ozod qilinganligi, sudlanganligi olib tashlanganligi va tugallanganligi haqidagi ma’lumotlar;

v) hukm chiqargan sud nomi va hukm chiqarilgan sana, sud hukmi qonuniy kuchga kirishi haqidagi ma’lumotlar, mahkumga nisbatan hukmning xulosa qismi mazmuni (O‘zbekiston Respublikasi Jinoyat kodeksining mahkum hukm qilingan moddalari, tayinlangan jazo turi, muddati yoki hajmi, undirilishi lozim bo‘lgan zarar summasi);

g) mahkum jazoni o‘tayotgan joy, jazoni ijro etish muassasalarida uning belgilangan rejimga rioya qilishi, jinoyat oqibatida yetkazilgan zararning qoplanganligi, jazo muddati (hajmi)ning o‘talgan va o‘talmagan qismlari, shuningdek, afv etish to‘g‘risidagi oldingi iltimosnomalarni ko‘rib chiqish natijalari haqidagi ma’lumotlar;

d) O‘zbekiston Respublikasi Oliy sudi, Bosh prokuraturasi va Davlat xavfsizlik xizmatining mahkumlarni afv etish mumkinligi haqidagi xulosalari;

e) afv etish haqidagi masalani ko‘rib chiqish uchun zarur bo‘lgan boshqa materiallar.

29. Afv etish to‘g‘risidagi iltimosnoma va tayyorlangan tegishli materiallar Shu’ba tomonidan Komissiya majlisida ko‘rib chiqish uchun kiritiladi.

30. Afv etish to‘g‘risidagi iltimosnomani Komissiya tomonidan ko‘rib chiqish muddati iltimosnoma kelib tushgan kundan boshlab uch oydan oshmasligi lozim.

31. Afv etish to‘g‘risidagi iltimosnomani ko‘rib chiqishda Komissiya tomonidan quyidagilar e’tiborga olinadi:

a) sodir etilgan jinoyatning xususiyati va ijtimoiy xavflilik darajasi;

b) jazoni o‘tash yoki ijro etish vaqtida mahkumning xulq-atvori (tuzalishi);

v) o‘talgan (ijro etilgan) jazo muddati (hajmi);

g) mahkumga nisbatan muqaddam amnistiya akti, afv etish qo‘llanilganligi yoki jazodan muddatidan ilgari shartli ozod etilganligi, jazoning yengilroq jazo bilan almashtirilganligi;

d) jinoyat oqibatida yetkazilgan zararning qoplanganligi;

e) mahkumning shaxsi, sog‘lig‘i holati, sudlanganligi, oilaviy ahvoli va yoshi;

j) O‘zbekiston Respublikasi Oliy sudi, Bosh prokuraturasi va Davlat xavfsizlik xizmatining xulosalari;

z) Komissiya iltimosnomani ko‘rib chiqish uchun muhim deb hisoblagan boshqa holatlar.

32. Afv etish to‘g‘risidagi iltimosnomani ko‘rib chiqishda qo‘shimcha tekshirilishi zarur bo‘lgan masalalar kelib chiqqan hollarda, Komissiya iltimosnomani ko‘rib chiqishdan olib tashlash, iltimosnoma ko‘rib chiqiladigan muddat davomida, jumladan joyiga chiqqan hamda manfaatdor organlar va tashkilotlar vakillarini jalb qilgan holda tegishli organlarga o‘rganish o‘tkazish haqida topshiriq berish yoki o‘rganishni mustaqil tashkil etishga haqli. O‘rganish yakuni bo‘yicha Komissiyaga o‘rganilgan masala yuzasidan xulosa kiritiladi.

33. Komissiya majlisi unda Komissiya a’zolari umumiy sonining kamida uchdan ikki qismi ishtirok etsa, vakolatli hisoblanadi.

Komissiya afv etish to‘g‘risidagi iltimosnomani dastlabki tarzda ko‘rib chiqish natijalari bo‘yicha oddiy ko‘pchilik ovoz bilan bayonnoma qarorini qabul qiladi.

Ovozlar teng bo‘lib qolganda, Komissiya raisining ovozi hal qiluvchi ovoz hisoblanadi.

Afv etish to‘g‘risidagi iltimosnoma ijobiy ko‘rib chiqilganda, Komissiya O‘zbekiston Respublikasi Prezidentiga taklif kiritadi.

Afv etish to‘g‘risidagi iltimosnoma rad etilganda, Shu’ba bu haqda bir kun davomida iltimosnoma bergan shaxsni xabardor qilish uchun iltimosnoma kelib tushgan organga yoki iltimosnomani mustaqil ravishda yuborgan shaxsga xabar beradi.

Muassasa ma’muriyati afv etish to‘g‘risidagi iltimosnoma rad etilganligi haqidagi ma’lumotni olgandan so‘ng keyingi kundan kechiktirmasdan iltimosnoma bergan mahkumni imzo qo‘ydirgan holda xabardor qiladi.

34. Og‘ir va o‘ta og‘ir jinoyatlar uchun hukm qilingan shaxslarni afv etish to‘g‘risidagi takroriy murojaatga oldingi iltimosnoma rad etilgan kundan boshlab bir yil o‘tgandan so‘ng, boshqa jinoyatlar uchun hukm qilingan shaxslarni afv etish to‘g‘risidagi takroriy murojaatga esa oldingi iltimosnoma rad etilgan kundan boshlab olti oy o‘tgandan keyin yo‘l qo‘yiladi, jiddiy ahamiyatga ega bo‘lgan yangi holatlar yuzaga kelgan hollar bundan mustasno.

34^1. O‘zbekiston Respublikasi Prezidenti mahkumning yoki jazoni o‘tab bo‘lgan shaxsning afv etishni so‘rab yozgan iltimosnomasi mavjud yoki mavjud emasligidan qat’i nazar o‘z tashabbusi bilan istalgan mahkumni yoki jazoni o‘tab bo‘lgan shaxsni afv etishi mumkin.

34^2. Bu haqda Shu’baga O‘zbekiston Respublikasi Prezidentining topshiriq xati yuboriladi.

34^3. Shu’ba O‘zbekiston Respublikasi Prezidentidan topshiriq xatini olgan kundan e’tiboran bir ish kuni ichida Komissiya a’zolariga Komissiyaning majlisi o‘tkazilishi kuni va joyi haqida xabar beradi.

34^4. Komissiyaning majlisi yakuni bo‘yicha Shu’ba tomonidan mahkumlarni yoki jazoni o‘tab bo‘lgan shaxslarning shaxsini va hujjatlarini o‘rganish bo‘yicha Komissiya a’zolari, sud, huquqni muhofaza qiluvchi organlar va boshqa mutasaddi tashkilotlar mas’ul xodimlaridan iborat tarkibda ishchi guruhlar shakllantiriladi va ularning joylarga chiqishi tashkil etiladi.

34^5. Ishchi guruh Komissiyaning muhokamasiga kiritish uchun hujjatlari ajratib olingan mahkumlardan yoki jazoni o‘tab bo‘lgan shaxslardan ularga nisbatan afv etish masalasi ko‘rib chiqilishiga e’tirozi yo‘qligi haqida rozilik xatini oladi.

Mahkumning yoki jazoni o‘tab bo‘lgan shaxsning rozilik xatiga mazkur Nizomning 21-bandida nazarda tutilgan hujjatlar ilova qilinadi.

Mahkum yoki jazoni o‘tab bo‘lgan shaxs rozilik xatini yozmagan taqdirda, uning hujjatlari Komissiyaning muhokamasiga kiritilmaydi.

34^6. Komissiya ishchi guruh tomonidan taqdim etilgan mahkumlarning yoki jazoni o‘tab bo‘lgan shaxslarning hujjatlarini muhokama qilib, afv etilishi mumkin bo‘lgan mahkumlar yoki jazoni o‘tab bo‘lgan shaxslar bo‘yicha bayonnoma qarorini qabul qiladi va O‘zbekiston Respublikasi Prezidentiga taklif kiritadi.

34^7. Komissiyaning mahkumni yoki jazoni o‘tab bo‘lgan shaxsni afv etishga tavsiya qilishni rad etganligi, mahkumga yoki jazoni o‘tab bo‘lgan shaxsga kelgusida afv etishni so‘rab iltimosnoma bilan murojaat qilishga monelik qilmaydi.

35. O‘zbekiston Respublikasi Prezidentining afv etish to‘g‘risidagi farmoni ijro qilish uchun:

jarima jazosiga hukm qilingan shaxslarga nisbatan — O‘zbekiston Respublikasi Bosh prokuraturasi huzuridagi Majburiy ijro byurosiga;

muayyan huquqdan mahrum qilish, majburiy jamoat ishlari, axloq tuzatish ishlari, ozodlikni cheklash, ozodlikdan mahrum qilish, uzoq muddatga ozodlikdan mahrum qilish yoxud umrbod ozodlikdan mahrum qilish tariqasidagi jazoga hukm qilingan shaxslarga, shuningdek, sudlanganligi olib tashlangan shaxslarga nisbatan — O‘zbekiston Respublikasi Ichki ishlar vazirligiga yoki sud tomonidan jazoni ijro etish zimmasiga yuklangan boshqa organga;

xizmat bo‘yicha cheklash, intizomiy qismga jo‘natish tariqasidagi jazoga hukm qilingan shaxslarga nisbatan — O‘zbekiston Respublikasi Mudofaa vazirligiga yoki jazoni ijro etuvchi boshqa organlarga yuboriladi.

O‘zbekiston Respublikasi Prezidentining afv etish to‘g‘risidagi farmoni ma’lumot uchun va ijrosi ustidan nazoratni amalga oshirish uchun tegishli ravishda O‘zbekiston Respublikasi Oliy sudi va Bosh prokuraturasiga yuboriladi.

36. Ushbu Nizomning 19-bandida ko‘rsatilgan organlar Komissiyaga O‘zbekiston Respublikasi Prezidentining afv etish masalalari bo‘yicha farmonlari ijrosi haqida ularning ijro etilishiga qarab axborot beradi.

37. O‘zbekiston Respublikasi Prezidentining afv etish to‘g‘risidagi farmoni ijrosini nazorat qilish Shu’ba tomonidan amalga oshiriladi.

38. Ushbu Nizom talablari buzilishida aybdor bo‘lgan shaxslar belgilangan tartibda javob beradilar.