Oʻzbekiston Respublikasi Prezidentining “Mamlakatning oziq-ovqat xavfsizligini taʼminlash chora-tadbirlari toʻgʻrisida” 2018-yil 16-yanvardagi PF-5303-son Farmoniga muvofiq Vazirlar Mahkamasi qaror qiladi:

1. Oʻzbekiston Respublikasi Hukumatining ilovaga muvofiq ayrim qarorlariga oʻzgartirish va qoʻshimchalar kiritilsin.

2. Vazirliklar va idoralar oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsinlar.

3. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari — moliya vaziri J.A. Qoʻchqorov zimmasiga yuklansin.

1. Vazirlar Mahkamasining 1999-yil 15-apreldagi 174-son qarori (Oʻzbekiston Respublikasi QT, 1999-y., 4-son, 19-modda) bilan tasdiqlangan Birja va koʻrgazma-yarmarka savdolarida tuzilgan kontraktlar boʻyicha tovarlarni sotish, sotib olish va ularni olib chiqib ketish tartibining 8¹-bandiga quyidagi mazmundagi xatboshi qoʻshilsin:

“Birja brokerlari mahsulotlarni tovar-xomashyo birjalarining ochiq elektron savdolarida sotishdan olingan mablagʻlar hisobiga mijoz-norezident nomidan xorijiy valyutani sotib olishga (sotishga) tijorat banklariga buyurtmanomalar berish, norezidentlar — yuridik shaxslar esa — Oʻzbekiston Respublikasining tijorat banklarida hisob raqamlari ochish va mahsulotlarni tovar-xomashyo birjalarining ochiq elektron savdolarida sotishdan olingan mablagʻlar hisobiga xorijiy valyutani sotib olish (sotish) huquqiga egadir”.

2. Vazirlar Mahkamasining 1999-yil 6-maydagi 223-son qarori (Oʻzbekiston Respublikasi QT, 1999-y., 5-son, 25-modda) bilan tasdiqlangan Oʻzbekiston Respublikasi Tovar-xomashyo birjalari savdolarida import kontraktlari tuzish tartibining 12-bandida:

a) quyidagi mazmundagi ikkinchi xatboshi qoʻshilsin:

“Mahsulotlarni tovar-xomashyo birjalarining ochiq elektron savdolarida sotishdan norezidentlar tomonidan olingan mablagʻlardan birja brokerlari Oʻzbekiston Respublikasining tijorat banklari orqali ichki valyuta bozorida xorijiy valyutani sotib olish (sotish) uchun norezidentlar bilan tuzilgan shartnomalar asosida foydalanishi mumkin”;

b) ikkinchi xatboshi uchinchi xatboshi deb hisoblansin;

v) quyidagi mazmundagi xatboshi qoʻshilsin:

“Birja brokerlari mahsulotlarni tovar-xomashyo birjalarining ochiq elektron savdolarida sotishdan olingan mablagʻlar hisobiga mijoz-norezident nomidan xorijiy valyutani sotib olishga (sotishga) tijorat banklariga buyurtmanomalar berish, norezidentlar — yuridik shaxslar esa — Oʻzbekiston Respublikasining tijorat banklarida hisob raqamlari ochish va mahsulotlarni tovar-xomashyo birjalarining ochiq elektron savdolarida sotishdan olingan mablagʻlar hisobiga xorijiy valyutani sotib olish (sotish) huquqiga egadir”.

3. Vazirlar Mahkamasining “Ulgurji va birja savdosini tashkil etish tizimini takomillashtirish toʻgʻrisida” 2001-yil 1-maydagi 198-son qarorining 9-bandida (Oʻzbekiston Respublikasi QT, 2001-y., 5-son, 24-modda):

a) quyidagi mazmundagi uchinchi xatboshi qoʻshilsin:

“mahsulotlarni tovar-xomashyo birjalarining ochiq elektron savdolarida sotishdan norezidentlar tomonidan olingan mablagʻlardan birja brokerlari Oʻzbekiston Respublikasining tijorat banklari orqali ichki valyuta bozorida xorijiy valyutani sotib olish (sotish) uchun norezidentlar bilan tuzilgan shartnomalar asosida foydalanishi mumkin”;

b) uchinchi va toʻrtinchi xatboshilar tegishli ravishda toʻrtinchi va beshinchi xatboshilar deb hisoblansin;

v) quyidagi mazmundagi beshinchi xatboshi qoʻshilsin:

“birja brokerlari mahsulotlarni tovar-xomashyo birjalarining ochiq elektron savdolarida sotishdan olingan mablagʻlar hisobiga mijoz-norezident nomidan xorijiy valyutani sotib olishga (sotishga) tijorat banklariga buyurtmanomalar berish, norezidentlar — yuridik shaxslar esa — Oʻzbekiston Respublikasining tijorat banklarida hisob raqamlari ochish va mahsulotlarni tovar-xomashyo birjalarining ochiq elektron savdolarida sotishdan olingan mablagʻlar hisobiga xorijiy valyutani sotib olish (sotish) huquqiga egadir”.

g) beshinchi xatboshi oltinchi xatboshi deb hisoblansin.

4. Vazirlar Mahkamasining 2001-yil 10-iyuldagi 294-son qarori (Oʻzbekiston Respublikasi QT, 2001-y., 7-son, 38-modda) bilan tasdiqlangan Birjadan tashqari valyuta bozorida xorijiy valyutani xarid qilish va sotish operatsiyalarini oʻtkazish tartibi toʻgʻrisidagi nizomda:

a) 2-bandga quyidagi mazmundagi “l¹” kichik band qoʻshilsin:

“l¹) xorijiy valyutani tovar-xomashyo birjalarining ochiq elektron savdolarida sotishdan olingan mablagʻlar hisobiga mijozlar — norezidentlar nomidan birja brokerlari tomonidan, shuningdek, Oʻzbekiston Respublikasi tijorat banklarida hisob raqamlari ochish yoʻli bilan mahsulotlarni tovar-xomashyo birjalarining ochiq elektron savdolarda sotishdan olingan mablagʻlar hisobiga norezidentlar — yuridik shaxslar tomonidan sotib olish va sotish”;

b) quyidagi mazmundagi 30¹-band qoʻshilsin:

“30¹. Sotib olingan va birja brokerining toʻlov topshirigʻi boʻyicha birja brokerining maxsus hisob raqamiga oʻtkazilgan xorijiy valyuta norezidentlarning Oʻzbekiston Respublikasida yoki chet elda ochilgan bank hisob raqamlariga oʻtkaziladi”;

v) quyidagi mazmundagi 35¹-band qoʻshilsin:

“35¹. Birja brokerlari tovar-xomashyo birjalarining ochiq elektron savdolarida sotishdan olingan mablagʻlar hisobiga mijozlar — norezidentlar nomidan xorijiy valyutani sotib olishda tijorat bankiga qoʻshimcha ravishda:

tovar-xomashyo birjalari hisob-kitob-kliring palatasining konvertatsiya qilish uchun maxsus hisob raqamiga oʻtkazilgan summa mahsulotlarni tovar-xomashyo birjalarining ochiq elektron savdolarida sotishdan olinganligining tasdiqnomasi asl nusxasini;

broker va norezidentlar — yuridik shaxslar oʻrtasida brokerlik xizmatlari koʻrsatishga tuzilgan shartnomalar nusxalarini taqdim etadilar”.

5. Vazirlar Mahkamasining “Tovar-xomashyo birjalari faoliyatini takomillashtirishga doir qoʻshimcha chora-tadbirlar toʻgʻrisida” 2004-yil 31-maydagi 251-son qarorining 3-bandiga (Oʻzbekiston Respublikasi QT, 2004-y., 5-son, 50-modda) quyidagi mazmundagi xatboshi qoʻshilsin:

“tovar-xomashyo birjalarining ochiq elektron savdolarida isteʼmol tovarlarini sotish (sotib olish) uchun ulgurji savdoni amalga oshirishga litsenziya mavjud ekanligi talab etilmaydi”.

6. Vazirlar Mahkamasining 2005-yil 5-noyabrdagi 242-son qarori (Oʻzbekiston Respublikasi QT, 2005-y., 11-son, 57-modda) bilan tasdiqlangan Ulgurji savdo faoliyatini litsenziyalash toʻgʻrisidagi nizomda:

a) 1-bandning ikkinchi xatboshidagi “tovarlarning ayrim turlari” soʻzlaridan keyin “shuningdek, tovar-xomashyo birjalarining ochiq elektron savdolarida isteʼmol tovarlari” soʻzlari qoʻshilsin;

b) 9-bandda:

uchinchi xatboshi chiqarib tashlansin;

toʻrtinchi xatboshi uchinchi xatboshi deb hisoblansin;

v) 10-bandning “v” kichik bandi oʻz kuchini yoʻqotgan deb hisoblansin.

7. Vazirlar Mahkamasining “Isteʼmol tovarlari ulgurji savdosi tizimini takomillashtirish chora-tadbirlari toʻgʻrisida” 2006-yil 27-martdagi 52-son qarorida (Oʻzbekiston Respublikasi QT, 2006-y., 3-son, 24-modda):

a) 1-ilova 2-bandining ikkinchi xatboshidagi “(ulgurji savdo korxonalari — aksiyadorlik jamiyatlari uchun — qonun hujjatlarida belgilangan miqdorda, boshqa ulgurji savdo korxonalari uchun — eng kam oylik ish haqining kamida 3500 baravari miqdorida, ulardan pul mablagʻlari bilan — eng kam oylik ish haqining kamida 1200 baravari miqdorida)” soʻzlari chiqarib tashlansin;

b) 2-ilovada:

1-bandga quyidagi mazmundagi xatboshi qoʻshilsin:

“Ushbu Nizom tovar-xomashyo birjalarining ochiq elektron savdolarida isteʼmol tovarlarini ulgurji sotishga (sotib olishga) tatbiq etilmaydi”;

7-bandda:

uchinchi xatboshi chiqarib tashlansin;

toʻrtinchi — oltinchi xatboshilar tegishli ravishda uchinchi — beshinchi xatboshilar deb hisoblansin;

8-bandning “b” kichik bandi oʻz kuchini yoʻqotgan deb hisoblansin.

8. Vazirlar Mahkamasining “Toshkent shahrida “Xayatt Rijensi” savdo belgisi ostida xalqaro toifadagi mehmonxona qurilishini oʻz vaqtida tugallashni va mehmonxonaning samarali ishlashini taʼminlash chora-tadbirlari toʻgʻrisida” 2016-yil 22-fevraldagi 49-son qarori 8-bandining uchinchi xatboshiga “(oziq-ovqat tovarlari bundan mustasno)” soʻzlari qoʻshilsin.

9. Vazirlar Mahkamasining “Kartoshka yetishtirish hajmlarini koʻpaytirish, kartoshka urugʻchiligini rivojlantirish va urugʻlik fondini yaxshilash chora-tadbirlari toʻgʻrisida” 2017-yil 14-iyundagi 374-son qarorining (Oʻzbekiston Respublikasi QHT, 2017-y., 24-son, 501-modda) 4-bandi oʻz kuchini yoʻqotgan deb hisoblansin.

10. Vazirlar Mahkamasining “Vazirlar Mahkamasining “Kartoshka yetishtirish hajmlarini koʻpaytirish, kartoshka urugʻchiligini rivojlantinish va urugʻlik fondini yaxshilash chora-tadbirlari toʻgʻrisida” 2017-yil 14-iyundagi 374-son qaroriga kiritilayotgan oʻzgartirish va qoʻshimchalar toʻgʻrisida” 2017-yil 21-avgustdagi 652-son qaroriga ilovaning 2-bandi oʻz kuchini yoʻqotgan deb hisoblansin.

11. Vazirlar Mahkamasining 2018-yil 17-yanvardagi 33-son qarori (Oʻzbekiston Respublikasi QHT, 2018-y., 3-son, 48-modda) bilan tasdiqlangan Tovar-xomashyo birjalarida hisob-kitob-kliring operatsiyalarini oʻtkazish qoidalarining 23-bandiga quyidagi mazmundagi xatboshi qoʻshilsin:

“mahsulotlarni tovar-xomashyo birjalarining ochiq elektron savdolarida sotishdan olingan mablagʻlar hisobiga mijoz-norezident nomidan xorijiy valyutani sotib olishga (sotishga) tijorat banklariga buyurtmanomalar berish, norezidentlar — yuridik shaxslar esa — Oʻzbekiston Respublikasining tijorat banklarida hisob raqamlari ochish va mahsulotlarni tovar-xomashyo birjalarining ochiq elektron savdolarida sotishdan olingan mablagʻlar hisobiga xorijiy valyutani sotib olish (sotish)”.

12. Vazirlar Mahkamasining 2017-yil 21-avgustdagi 929-F-son farmoyishi 2-bandining birinchi xatboshi va 3-bandi, shuningdek, farmoyishga 1 va 2-ilovalar oʻz kuchini yoʻqotgan deb hisoblansin.