Innovatsion g‘oyalar va texnologiyalarni joriy etishga qaratilgan dasturlar va tadbirlarni sifatli ishlab chiqish uchun zarur sharoitlarni yaratish, shuningdek, O‘zbekiston Respublikasi Innovatsion rivojlanish vazirligining markaziy apparati samarali faoliyat yuritishini tashkil etish maqsadida O‘zbekiston Respublikasi Vazirlar Mahkamasi qaror qiladi:

1. O‘zbekiston Respublikasi Innovatsion rivojlanish vazirligi, Oliy va o‘rta maxsus ta’lim vazirligi, Iqtisodiyot vazirligi, O‘zbekiston Respublikasi Davlat arxitektura va qurilish qo‘mitasi hamda Toshkent shahri hokimiyatining quyidagi takliflariga rozilik berilsin:

2018-2019-yillarda O‘zbekiston Respublikasi Innovatsion rivojlanish vazirligining ma’muriy binosini qurish va innovatsion parkni tashkil etish (keyingi o‘rinlarda — obyektlar);

obyektlarni qurish uchun Toshkent shahri, Olmazor tumani, Universitet ko‘chasida joylashgan 3,0 gektar maydondagi yer uchastkasini ajratish.

2. Quyidagilar obyektlar bo‘yicha belgilansin:

buyurtmachi — Toshkent shahri hokimiyati huzuridagi “Yagona buyurtmachi xizmati” injiniring kompaniyasi;

bosh loyihalovchi tashkilot — MCHJ “Arhidea pro”;

bosh pudratchi tashkilot — MCHJ “Qurilish Universal Kompakt Servis”.

3. Istisno tariqasida quyidagilarga ruxsat berilsin:

obyektlarning loyiha-smeta hujjatlarini ishlab chiqish bilan bir vaqtda qurilish-montaj ishlarini 2019-yil 1-yanvarga qadar amalga oshirish;

obyektlarni jihozlash uchun zarur bo‘lgan va O‘zbekiston Respublikasida ishlab chiqarilmaydigan texnologik va laboratoriya uskunalari hamda xo‘jalik inventarlarini tanlov savdolari (tenderlar) o‘tkazmasdan, xorijiy ishlab chiqaruvchilar (yetkazib beruvchilar) bilan to‘g‘ridan-to‘g‘ri shartnomalar tuzish yo‘li bilan eng yaxshi takliflarni tanlab olish asosida xarid qilish va ularni 2019-yil 1-iyunga qadar bojxona to‘lovlaridan (bojxona rasmiylashtiruvi yig‘imlaridan tashqari) ozod qilish.

4. Obyektlarni qurish, moddiy-texnik bazasini takomillashtirish va jihozlash bilan bog‘liq xarajatlarni moliyalashtirish manbalari sifatida quyidagilar belgilansin:

a) loyiha-smeta hujjatlarini ishlab chiqish va qurilish:

30,0 mlrd. so‘m — “O‘zbekneftgaz” AJ maxsus hisobidan (2018-yilning II, III va IV choraklarida har biri 10,0 mlrd. so‘mdan teng ulushlarda) va ushbu mablag‘lar O‘zbekiston Respublikasi Moliya vazirligi huzuridagi orolbo‘yi mintaqasini rivojlantirish jamg‘armasiga yo‘naltiriladi;

yetishmayotgan qismi — O‘zbekiston Respublikasining yillik davlat rivojlantirish dasturlarida O‘zbekiston Respublikasi Innovatsion rivojlanish vazirligi uchun ajratiladigan kapital qo‘yilmalar limitlari;

b) moddiy-texnik bazani takomillashtirish va jihozlash — O‘zbekiston Respublikasi Davlat budjeti mablag‘lari, Innovatsion rivojlanish vazirligi xodimlarini moddiy rag‘batlantirish jamg‘armasi mablag‘lari, xalqaro moliya institutlari grantlari va qonunchilikda taqiqlanmagan boshqa manbalar;

v) atrof-muhitni obodonlashtirish hamda suv ta’minoti va kanalizatsiya tarmoqlarini qurish — Toshkent shahri mahalliy budjetining qo‘shimcha manbalari va qonunchilikda taqiqlanmagan boshqa manbalar;

g) tashqi elektr, gaz ta’minoti va aloqa tarmoqlarini qurish hamda ularning uzluksiz ishlashini ta’minlash — tegishli ravishda “O‘zbekenergo” AJ, “O‘ztransgaz” AJ va “O‘zbektelekom” AKning o‘z mablag‘lari hisobidan.

5. O‘zbekiston Respublikasi Investitsiyalar bo‘yicha davlat qo‘mitasi manfaatdor vazirlik va idoralar bilan birgalikda tasdiqlangan loyiha-smeta hujjatlari asosida obyektlarni qurish uchun O‘zbekiston Respublikasining davlat rivojlantirish dasturlari doirasida markazlashtirilgan manbalar hisobidan kapital qo‘yilmalar limitlarini ta’minlasin.

6. Toshkent shahri hokimiyati:

O‘zbekiston Respublikasi Davlat arxitektura va qurilish qo‘mitasi, O‘zbekiston Respublikasi yer resurslari, geodeziya, kartografiya va davlat kadastri bo‘yicha davlat qo‘mitasi hamda bosh loyihalovchi tashkilot bilan birgalikda obyektlarni qurish uchun yer uchastkasining chegaralarini aniqlash va ajratilishini ta’minlasin;

manfaatdor vazirlik va idoralar bilan hamkorlikda obyektlarni qurish, tashqi muhandislik va transport kommunikatsiyalarini tortish bilan bog‘liq tashkiliy va texnik masalalarni hal etsin;

buyurtmachi va bosh pudratchi tashkilot bilan hamkorlikda obyektlarni 2019-yil 21-martga qadar foydalanishga topshirilishini ta’minlasin.

7. O‘zbekiston Respublikasi Davlat arxitektura va qurilish qo‘mitasi tasdiqlangan tartibda loyiha-smeta hujjatlarining davlat ekspertizasini o‘tkazsin va obyektlarda qurilish-montaj ishlarining sifatini nazorat qilish maqsadida davlat arxitektura-qurilish nazoratini o‘rnatsin.

8. O‘zbekiston Respublikasi Innovatsion rivojlanish vazirligi, Oliy va o‘rta maxsus ta’lim vazirligi hamda O‘zbekiston Respublikasi Fanlar akademiyasining Innovatsion rivojlanish vazirligi huzurida Innovatsion ishlanmalarni tatbiq etishning ilmiy-amaliy markazini tashkil etish haqidagi taklifiga rozilik berilsin (keyingi o‘rinlarda — Markaz).

9. Markaz faoliyatini moliyalashtirish manbalari sifatida quyidagilar belgilansin:

O‘zbekiston Respublikasi Davlat budjeti mablag‘lari;

Markaz rezidentlariga xizmat ko‘rsatishdan olingan daromadlar;

ta’sischi mablag‘lari;

xalqaro moliya institutlari, xorijiy hukumat va nodavlat tashkilotlarning beg‘araz texnik ko‘magi (grantlar);

qonunchilikda taqiqlanmagan boshqa manbalar.

14. O‘zbekiston Respublikasi Vazirlar Mahkamasining 2017-yil 5-sentabrdagi “O‘zbekiston Respublikasi Oliy va o‘rta maxsus ta’lim vazirligi huzurida Talabalar ilmiy-ma’rifiy markazini tashkil etish to‘g‘risida”gi 697-son qarori o‘z kuchini yo‘qotgan deb hisoblansin.

15. Ushbu qaror ijrosini nazorat qilish O‘zbekiston Respublikasi Bosh vazirining birinchi o‘rinbosari — “O‘zbekiston temir yo‘llari” AJ boshqaruvi raisi A.J. Ramatov, O‘zbekiston Respublikasi Bosh vazirining o‘rinbosari — moliya vaziri D.A. Kuchkarov va O‘zbekiston Respublikasi Bosh vazirining o‘rinbosari — Investitsiyalar bo‘yicha davlat qo‘mitasi raisi S.R. Xolmuradov zimmasiga yuklansin.