Akademik litseylar va kasb-hunar kollejlarining moddiy-texnika bazasini yanada rivojlantirish, Kadrlar tayyorlash milliy dasturining birinchi bosqichini amalga oshirish tajribasini hisobga olgan holda ularni oqilona joylashtirish va texnika bilan jihozlash, oʻtkazilayotgan tarkibiy qayta oʻzgartirishlarga muvofiq iqtisodiyot tarmoqlarini malakali mutaxassislar bilan taʼminlash maqsadida Vazirlar Mahkamasi qaror qiladi:

1. 2009-yilgacha boʻlgan davrda akademik litseylar va kasb-hunar kollejlarini tashkil etish va respublika hududida joylashtirishning aniq dasturi 1-3-ilovalarga* muvofiq tasdiqlansin.

3. “Davarxitektqurilish” qoʻmitasi Oʻzbekiston Respublikasi Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi bilan birgalikda loyihalashtirilayotgan binolarning foydali maydonini maqbullashtirishni va ularni qurish xarajatlarini kamida 15 foizga qisqartirishni nazarda tutuvchi yangidan tasdiqlangan normativlarga muvofiq akademik litseylar va kasb-hunar kollejlarining bazaviy loyihalariga tuzatishlar kiritishni hamda ularni ekspertizadan oʻtkazishni bir oy muddatda tugallasin.

4. Rekonstruksiya qilish va toʻliq taʼmirlash negizida akademik litseylar va kasb-hunar kollejlari tashkil etishga moʻljallangan qurilishi tugallanmagan obyektlar, alohida binolar hamda obyektlar roʻyxati 4-ilovaga* muvofiq tasdiqlansin.

5. Oʻzbekiston Respublikasi Makroiqtisodiyot va statistika vazirligi, Moliya vazirligi, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari, Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi 2002-2003-yillar mobaynida moliya va moddiy-texnika resurslarini 5-ilovaga* muvofiq akademik litseylar va kasb-hunar kollejlariga aylantirilayotgan kasb-hunar-texnika bilim yurtlari va texnikumlarni rekonstruksiya qilishga hamda toʻliq taʼmirlashga jamlasinlar.

Oʻzbekiston Respublikasi Moliya vazirligi 2002-2003-yilgi davlat budjeti parametrlarini shakllantirishda tejalgan stipendiyalar hisobiga boʻshaydigan budjet mablagʻlaridan akademik litseylar va kasb-hunar kollejlariga aylantirilayotgan kasb-hunar bilim yurtlari va texnikumlar binolarini rekonstruksiya qilish hamda toʻliq taʼmirlashda maqsadli foydalanishni nazarda tutsin.

6. Vazirliklar va idoralarning 6-ilovaga* muvofiq kasb-hunar kollejlarini oʻz mablagʻlari hamda jalb etilgan mablagʻlar hisobiga foydalanishga topshirish toʻgʻrisidagi takliflari qabul qilinsin.

7. Oʻquv-laboratoriya asbob-anjomlari, taʼlimning texnik vositalari va oʻquv-koʻrgazmali qoʻllanmalar ishlab chiqarishni respublika korxonalarida mahalliylashtirish dasturi 7 va 8-ilovalarga* muvofiq tasdiqlansin.

Oʻquv-texnik asbob-anjomlar ishlab chiqarishni tashkil etish hamda ularni ishlab chiqarishni mahalliylashtirish topshiriqlarining bajarilishini oʻz vaqtida taʼminlash ishlarini muvofiqlashtirib borish yuzasidan javobgarlik Oʻzbekiston Respublikasi Makroiqtisodiyot va statistika vazirligi hamda Oliy va oʻrta maxsus taʼlim vazirligining Oʻrta maxsus, kasb-hunar taʼlimi markaziga yuklansin.

Oʻzbekiston Respublikasi Moliya vazirligi respublika davlat budjetini shakllantirishda oʻquv-laboratoriya asbob-anjomlari, taʼlimning texnik vositalari va oʻquv-koʻrgazmali qoʻllanmalar sotib olish uchun zarur mablagʻlarning har yili maqsadli ajratishni nazarda tutsin.

8. Belgilab qoʻyilsinki, akademik litseylar va kasb-hunar kollejlarini rekonstruksiya qilish va qurish faqat tanlov (tender) asosida, keyinchalik oʻzgartirilmaydigan shartnomaviy narx boʻyicha amalga oshiriladi.

Oʻzbekiston Respublikasi “Davarxitektqurilish” qoʻmitasi akademik litseylar va kasb-hunar kollejlarini qurish va rekonstruksiya qilishda tender savdolarini oʻtkazish hamda qatʼiy belgilangan shartnomaviy narxlar boʻyicha hisob-kitoblarni amalga oshirishning belgilangan mexanizmiga rioya qilinishi ustidan nazoratni kuchaytirsin.

Oʻzbekiston Respublikasi Moliya vazirligining Nazorat-taftish bosh boshqarmasi akademik litseylar va kasb-hunar kollejlarini qurish hamda rekonstruksiya qilishga ajratiladigan mablagʻlardan maqsadli foydalanilishi ustidan qatʼiy nazorat oʻrnatsin.

9. Foydalanishga topshirilayotgan akademik litseylar va kasb-hunar kollejlarini zamonaviy oʻquv-laboratoriya asbob-anjomlari, taʼlimning texnik vositalari va oʻquv-koʻrgazmali qoʻllanmalar bilan jihozlash uchun Xorijiy investitsiyalar va kreditlarni jalb etish boʻyicha ishchi guruh tarkibi 9-ilovaga* muvofiq tasdiqlansin.

Ishchi guruh akademik litseylar va kasb-hunar kollejlarini respublikada ishlab chiqarilmaydigan zamonaviy oʻquv-laboratoriya asbob-anjomlari, taʼlimning texnik vositalari va oʻquv-koʻrgazmali qoʻllanmalar bilan jihozlash uchun imtiyozli xorijiy kreditlar va investitsiyalarni jalb etish boʻyicha mufassal chora-tadbirlar koʻrsin.

10. Qoraqalpogʻiston Respublikasi Vazirlar Kengashi, viloyatlar hamda Toshkent shahar hokimliklari “Davarxitektqurilish” qoʻmitasi va Oʻzbekiston Respublikasi Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi bilan birgalikda obyektlar qurilishi va qayta taʼmirlanishiga oid loyiha va tender hujjatlarining koʻrsatib oʻtilgan aniq Dasturga muvofiq oʻz vaqtida tayyorlanishini taʼminlasinlar.

Akademik litseylar va kasb-hunar kollejlarini tashkil etish va respublika hududida joylashtirishning aniq Dasturi belgilangan muddatlarda toʻliq bajarilishi uchun shaxsan javobgarlik Qoraqalpogʻiston Respublikasi Vazirlar Kengashining Raisi, viloyatlar va Toshkent shahar hokimlari, Oʻzbekiston Respublikasi Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi rahbari zimmasiga yuklansin.

11. Quyidagilar oʻz kuchini yoʻqotgan deb hisoblansin:

Oʻzbekiston Respublikasi Vazirlar Mahkamasining “1999—2005-yillarda akademik litseylar va kasb-hunar kollejlarining moddiy-texnika bazasini rivojlantirish hamda mablagʻ bilan taʼminlash dasturi toʻgʻrisida” 1998-yil 23-sentabrdagi 406-son qarori, qarorning 5-bandi birinchi va uchinchi xatboshi, 6-bandi, 7-bandining birinchi xatboshi va 10-bandi bundan mustasno;

Oʻzbekiston Respublikasi Vazirlar Mahkamasining 2000-yil 19-sentabrdagi 359-son qaroriga 1-ilovaning 15-bandi.

12. Mazkur qarorning bajarilishini nazorat qilish Oʻzbekiston Respublikasining Bosh vaziri Oʻ.T. Sultonov zimmasiga yuklansin.