Taʼkidlash lozimki, Oʻzbekiston Respublikasini 2017 — 2021-yillarda rivojlantirishning beshta ustuvor yoʻnalishi boʻyicha Harakatlar strategiyasini amalga oshirish doirasida respublikada xususiylashtirilgan korxonalarning ishlab chiqarishini yanada kengaytirishni ragʻbatlantirish, ishlab chiqarish quvvatlarini chuqur modernizatsiya qilish, ular tomonidan tayyorlanayotgan mahsulotlarning ichki va tashki bozorlarda raqobatdoshligini oshirish imkonini beradigan kulay shart-sharoitlar yaratish orqali ular faoliyatining samaradorligini oshirish boʻyicha kompleks chora-tadbirlar amalga oshirilmoqda.

Avval xususiylashtirilgan korxonalar bilan ishlash uslubi va yondashuvlari tubdan oʻzgartirildi. Ishlab chiqarishni, shu jumladan ishlamayotgan korxonalarda tiklash va rivojlantirish boʻyicha faoliyat samaradorligini oshirish “yoʻl xaritalari”ni ishlab chiqish va amalga oshirishga har tomonlama koʻmaklashishga alohida eʼtibor qaratilmoqda.

Oʻzbekiston Respublikasi Prezidentining “Tadbirkorlarning ishlab chiqarish maydonlaridan foydalanishlarini yanada ragʻbatlantirish chora-tadbirlari toʻgʻrisida” 2017-yil 23-fevraldagi PQ-2796-sonli qarorini hayotga tatbiq etish borasidagi aniq chora-tadbirlar 2017-yilda ilgari faoliyat koʻrsatmagan va toʻla quvvat bilan ishlamagan 1137 ta korxonada tadbirkorlik faoliyatini qayta tiklash, 10 mingdan ortiq yangi ish oʻrinlari yaratish imkonini berdi.

Shu bilan birga, hududlarda oʻtkazilgan xatlovlar bu borada choralar koʻrilgani va davlat tomonidan yordam koʻrsatilayotganiga qaramasdan, avval xususiylashtirilgan 3 mingga yaqin korxona va obyektlar mulkdorlari tomonidan oʻzlariga tegishli boʻsh turgan ishlab chiqarish maydonlaridan nooqilona foydalanayotganidan dalolat beradi.

Idoralararo komissiyalar qarorlariga muvofiq investitsiya majburiyatlarini bajarmagan 444 mulkdor mulkiga nisbatan moliyaviy jarimalar qoʻllanilib, qiymati qariyb 12 mlrd. soʻmlik stavkalari oshirilgan yer va mulk soliqlari hisoblandi. Shunga qaramay, boʻsh turgan ishlab chiqarish maydonlarning mulkdorlariga taʼsir koʻrsatishning amaldagi mexanizmi avval xususiylashtirilgan va qurilishi tugallanmagan obyektlar va foydalanilmayotgan ishlab chiqarish maydonlarini xoʻjalik faoliyatiga tezkor jalb etish boʻyicha kutilgan natijani bermayapti.

Mulkdorlarning oʻzlariga tegishli boʻsh turgan ishlab chiqarish maydonlaridan oqilona va maqsadli foydalanish yuzasidan masʼuliyatni kuchaytirish, zarur investitsiyalarni kiritish va yangi ish oʻrinlari tashkil etish maqsadida:

1. Muntazam ravishda oʻtkaziladigan yalpi xatlovlar asosida qurilishi tugallanmagan obyektlar va foydalanilmayotgan ishlab chiqarish maydonlarini aniqlashda hamda birinchi navbatda, ular negizida tadbirkorlik faoliyatini tiklash orqali ulardan samarali foydalanish boʻyicha “yoʻl xaritalarini” ishlab chiqish ishlarini davom ettirish Oʻzbekiston Respublikasi Xususiylashtirilgan korxonalarga koʻmaklashish va raqobatni rivojlantirish davlat qoʻmitasi, Oʻzbekiston Respublikasi Davlat soliq qoʻmitasi, Oʻzbekiston Savdo-sanoat palatasi, Oʻzbekiston Respublikasi Yer resurslari, geodeziya, kartografiya va davlat kadastri boʻyicha davlat qoʻmitasi rahbarlari, Qoraqalpogʻiston Respublikasi Vazirlar Kengashi Raisi, viloyatlar, tumanlar va shaharlar hokimlarining muhim vazifalari hisoblansin.

2. Oʻzbekiston Respublikasi Xususiylashtirilgan korxonalarga koʻmaklashish va raqobatni rivojlantirish davlat qoʻmitasi, Iqtisodiyot vazirligi, Moliya vazirligi va Davlat soliq qoʻmitasining Oʻzbekiston Respublikasi Prezidentining “Tadbirkorlarning ishlab chiqarish maydonlaridan foydalanishlarini yanada ragʻbatlantirish chora-tadbirlari toʻgʻrisida” 2017-yil 23-fevraldagi PQ-2796-sonli qaroriga ilovaga muvofiq oʻzgartirishlar va qoʻshimcha kiritish toʻgʻrisidagi taklifiga rozilik berilsin.

3. Oʻzbekiston Respublikasi Xususiylashtirilgan korxonalarga koʻmaklashish va raqobatni rivojlantirish davlat qoʻmitasi Adliya vazirligi va boshqa manfaatdor vazirliklar hamda idoralar bilan birgalikda bir oy muddatda qonun hujjatlariga ushbu qarordan kelib chiqadigan oʻzgartirish va qoʻshimchalar toʻgʻrisida Oʻzbekiston Respublikasi Vazirlar Mahkamasiga takliflar kiritsin.

4. Mazkur qaror 2018-yil 1-maydan boshlab kuchga kiradi.

5. Mazkur qarorning ijrosini nazorat qilish Oʻzbekiston Respublikasi Bosh vazirining oʻrinbosari S.R. Xolmuradov, Bosh vazir oʻrinbosari — Moliya vaziri J.A. Qoʻchqorov hamda Oʻzbekiston Respublikasi Xususiylashtirilgan korxonalarga koʻmaklashish va raqobatni rivojlantirish davlat qoʻmitasi raisi R.A. Gʻulomov zimmasiga yuklansin.

1. 3-bandning toʻrtinchi xatboshi quyidagi tahrirda bayon etilsin:

“investitsiya loyihasining maqomi toʻgʻrisida, qurilishi tugallanmagan obyektlar va foydalanilmayotgan ishlab chiqarish maydonlari negizida amalga oshiriladigan investitsiya loyihasini mulkdor (uning roziligi bilan, boshqa tashabbus koʻrsatuvchilar, shu jumladan, ijaraga oluvchilar) tomonidan taqdim etilganligi yoki taqdim etilmaganligi toʻgʻrisida, shuningdek, loyihani amalga oshirilganligi yoki amalga oshirilmaganligi toʻgʻrisida xulosalar berish”.

2. 5-band kuyidagi tahrirda bayon etilsin:

“5. Belgilansinki, investitsiya loyihasini mulkdor (boshqa tashabbus koʻrsatuvchilar) tomonidan taqdim etilmaganligi yoki amalga oshirilganligi toʻgʻrisida Idoralararo komissiya tomonidan xulosa chiqarilgandan soʻng keyingi oydan boshlab:

yuridik shaxslar — qurilishi tugallanmagan obyektlar va foydalanilmayotgan ishlab chiqarish maydonlarining soddalashtirilgan soliqqa tortish tartibini koʻllayotgan mulkdorlari umumoʻrnatilgan tartibdagi soliqlar hamda boshqa majburiy toʻlovlarni toʻlashga oʻtadilar;

yuridik va jismoniy shaxslar — mulkdorlar oʻzlariga tegishli qurilishi tugallanmagan obyektlar hamda foydalanilmayotgan ishlab chiqarish maydonlari uchun mulk va yer soliqlarini ikki baravar miqdorda, 6 oy oʻtgandan keyin — besh baravar miqdorda, 12 oy oʻtgandan keyin va keyinchalik — oʻn baravar miqdorda toʻlaydilar;

yuridik va jismoniy shaxslarga — qurilishi tugallanmagan obyektlar va foydalanilmayotgan ishlab chiqarish maydonlari mulkdorlariga nisbatan qonun hujjatlari bilan beriladigan soliqlar boʻyicha imtiyozlar va preferensiyalar qoʻllanilmaydi”.

3. 6-bandning:

a) ikkinchi xatboshidagi “2” raqami “1” raqami bilan almashtirilsin;

b) toʻrtinchi xatboshidagi “12” raqami “3” raqami bilan almashtirilsin;

v) oltinchi xatboshi kuyidagi tahrirda bayon eti:

“investitsiya loyihasini taqdim etganlarga yoki uni amalga oshirishni boshlaganlarga — qurilishi tugallanmagan obyektlar va foydalanilmayotgan ishlab chiqarish maydonlari negizida amalga oshiriladigan investitsiya loyihasini mulkdor (uning roziligi bilan, boshqa tashabbus koʻrsatuvchilar, shu jumladan, ijaraga oluvchilar) tomonidan taqdim etilganligi toʻgʻrisida, shuningdek, uni amalga oshirilayotganligi toʻgʻrisida xulosa Idoralararo komissiya tomonidan berilgan sanadan keyingi kalendar choragidan boshlab”.

4. 7-band kuyidagi tahrirda bayon etilsin:

“7. Shunday tartib oʻrnatilsinki, unga muvofiq:

ushbu qarorning 5-bandida nazarda tutilgan oshirilgan stavkali va oshirib boriladigan koeffitsiyentli soliqlar Idoralararo komissiyaning qarori bilan faqat tovarlar (ishlar, xizmatlar) ishlab chiqarishga jalb etilmagan ishlab chiqarish maydonlari va yer uchastkalariga nisbatan qoʻllaniladi;

xoʻjalik boshqaruvi organlari rahbarlari tarmoq investitsiya loyihalarini ishlab chiqishda ularning tarmogʻiga kiradigan oldin xususiylashtirilgan korxonani tiklashni hisobga olishlari kerak”.

5. Yangi tahrirda bayon etilgan 1-ilovaning 3-boʻlimi rus tilidagi matnda berilgan.