Oʻzbekiston Respublikasi Hukumati va Qozogʻiston Respublikasi Hukumati, keyingi oʻrinlarda “Tomonlar” deb ataluvchilar,

Oʻzbekiston Respublikasi Hukumati bilan Qozogʻiston Respublikasi Hukumati oʻrtasida xalqaro avtomobil qatnovi toʻgʻrisida 2006-yil 20-martda imzolangan Bitimning (keyingi oʻrinlarda — Bitim) 15-moddasi 2-bandiga, shuningdek Tomonlar davlatlari oʻrtasida yoʻlovchilarni avtomobilda xalqaro tashish sohasida hamkorlikni rivojlantirish zaruriyatiga amal qilgan holda,

quyidagilar toʻgʻrisida kelishib oldilar:

Bitimga hamda Bitimni qoʻllash toʻgʻrisida Ijro Bayonnomasiga (keyingi oʻrinlarda — Ijro Bayonnomasi) quyidagi oʻzgartish va qoʻshimchalar kiritilsin:

1. Bitimning muqaddimasi quyidagi tahrirda bayon etilsin:

“Oʻzbekiston Respublikasi Hukumati va Qozogʻiston Respublikasi Hukumati, keyingi oʻrinlarda “Tomonlar” deb ataluvchilar,

Tomonlar davlatlari oʻrtasida yoʻlovchi va yuklarni avtomobilda xalqaro tashish sohasida hamkorlikni yanada rivojlantirish zaruriyatiga amal qilgan holda,

Tomonlar davlatlari oʻrtasida avtomobilda yoʻlovchi va yuklarni, shuningdek ularning hududlari orqali tranzit tashishlarni yengillashtirishga intilib,

mazkur masalalarni oʻzaro yordam, hamkorlik va oʻzaro manfaatdorlik asosida tartibga solish istagida,

quyidagilar toʻgʻrisida kelishib oldilar:”.

2. Bitimning 1-moddasi 1-bandi quyidagi tahrirda bayon etilsin:

“1. Mazkur Bitim qoidalari Tomonlardan birining davlati hududida roʻyxatga olingan avtotransport vositalarida amalga oshiriladigan Oʻzbekiston Respublikasi bilan Qozogʻiston Respublikasi oʻrtasida avtomobilda yoʻlovchi va yuklarni xalqaro tashishlar, ularning hududlari orqali tranzit tashishlar, uchinchi mamlakatlardan/ga tashishlarga qoʻllaniladi.”.

3. Bitimning 2-moddasi 1 va 2-bandlari quyidagi tahrirda bayon etilsin:

“1. “Tashuvchi” atamasi:

Tomonlardan birining davlati hududida roʻyxatga olingan, milliy qonunchilikka muvofiq haq evaziga yoki oʻz hisobidan yoʻlovchi va yuklarning xalqaro tashishlarini amalga oshirish huquqiga ega boʻlgan jismoniy yoki yuridik shaxsni anglatadi.

2. “Avtotransport vositasi” atamasi:

yoʻlovchilarni tashishda — avtobus, yaʼni yoʻlovchilarni tashish uchun moʻljallangan hamda haydovchi oʻrindigʻi bilan birga hisoblaganda kamida 9 ta oʻrindiqqa ega boʻlgan avtotransport vositasini;

yuklarni tashishda — yuk tashish uchun moʻljallangan avtotransport vositasi, shu jumladan yuk avtomobili, tirkamali yuk avtomobili, shatakchi avtomobil yoki yarim tirkamali shatakchi avtomobilni anglatadi.”.

4. Bitimning 2-moddasi quyidagi mazmundagi 7, 8 va 9-bandlar bilan toʻldirilsin:

“7. “Yoʻlovchilarni muntazam tashishlar” atamasi:

Tomonlar davlatlari vakolatli organlari oʻrtasida oldindan kelishilgan yoʻnalishlar, jadval, tariflar, tashuvchi yoʻlovchilarni chiqaradigan va tushiradigan bekatlar boʻyicha amalga oshiriladigan avtobusda yoʻlovchi tashuvlarini anglatadi.

8. “Yoʻlovchilarni nomuntazam tashishlar” atamasi:

“yoʻlovchilarni muntazam tashishlar” atamasi qamroviga kirmaydigan yoʻlovchilarni avtobusda tashishlarni anglatadi.

9. “Tranzit tashishlar” atamasi:

Tomonlardan birining davlati hududi orqali yoʻlovchilar yoki yuklarni tashishni anglatadi, bunda joʻnash va yetib borish manzili mazkur davlat hududidan tashqarida joylashgan boʻladi.”.

5. Bitim III bobining nomlanishi quyidagi tahrirda bayon etilsin:

“III. Yoʻlovchi va yuklarni tashish”.

6. Bitimning 4-moddasiga quyidagi mazmundagi 3-band qoʻshilsin:

“3. Tomonlar davlatlari vakolatli organlari ruxsatnoma blankalarini almashtirish tartibini oʻzaro kelishib oladilar. Mazkur blankalarda ruxsatnomani bergan vakolatli organning muhri va masʼul shaxsining imzosi mavjud boʻlishi lozim.”.

7. Bitim quyidagi mazmundagi 5-1 va 5-2-moddalar bilan toʻldirilsin:

1. Yoʻlovchilarni muntazam tashishlar Tomonlar davlatlari vakolatli organlari oʻrtasidagi kelishuv boʻyicha tashkil etiladi.

2. Tomonlar davlatlari oʻrtasida yoki ularning hududlari orqali tranzit tarzda yoʻlovchilarni muntazam tashishlar Tomonlar davlatlari vakolatli organlari tarafidan yoʻnalishning oʻz davlati hududidan oʻtadigan qismiga beriladigan ruxsatnomalar asosida amalga oshiriladi. Ruxsatnomalar Tomonlar davlatlarining vakolatli organlari kelishgan tartibda 5 yilgacha boʻlgan muddatga beriladi.

3. Muntazam tashishlarni tashkil etish toʻgʻrisidagi takliflar Tomonlar davlatlarining vakolatli organlari tomonidan bir-biriga beriladi va unda quyidagi maʼlumotlar bayon etilishi lozim:

a) tashuvchining nomi;

b) yetkazib berish manzillardagi avtovokzallar (avtostansiyalar) koʻrsatilgan qatnov yoʻnalishi;

v) harakat jadvali va tariflar;

g) tashishlarni amalga oshirishning moʻljallangan muddati va muntazamligi;

d) tashuvchi yoʻlovchilarni chiqaradigan va tushiradigan toʻxtash bekatlari, shuningdek chegaradan oʻtish punktlari;

e) qoʻshma shartnoma, basharti xizmat bir necha tashuvchilar tomonidan birgalikda koʻrsatilayotgan boʻlsa.

4. Tomonlarning vakolatli organlari yoʻlovchilarni muntazam tashishlarni oʻz hududlari orqali tashkil etish tartibini (yozma ravishda) kelishib oladilar.

1. Tomonlar davlatlari oʻrtasida yoki ularning hududlari orqali tranzit tarzda yoʻlovchilarni nomuntazam tashishlar Tomonlar davlatlari vakolatli organlari tarafidan beriladigan ruxsatnomalar asosida amalga oshiriladi, ushbu moddaning 2-bandida belgilangan tashishlar bundan mustasno.

2. Ushbu moddaning 1-bandida koʻrsatilgan ruxsatnoma yoʻlovchilarni nomuntazam tashishlar uchun quyidagi hollarda talab etilmaydi:

a) agar yoʻlovchilar guruhi xuddi shu tarkibda ayni avtobusning oʻzida butun yoʻnalish boʻylab tashilayotgan boʻlsa va bunda:

yoʻnalish avtobus roʻyxatdan oʻtgan Tomon davlati hududida boshlansa va tugasa, yoxud;

yoʻnalish avtobus roʻyxatdan oʻtgan Tomon davlati hududida boshlansa va boshqa Tomon davlatining hududida tugasa, basharti avtobus mazkur boshqa Tomon davlatining hududidan boʻsh qaytsa yoki;

avtobus boshqa Tomon davlati hududiga aynan shu tashuvchi tomonidan ilgari olib borib qoʻyilgan yoʻlovchilar guruhini olib ketish maqsadida boʻsh kirib borsa;

b) nosoz avtobus boshqa avtobus bilan almashtirilsa.

3. Mazkur moddaning 2-bandi a) kichik bandida nazarda tutilgan tashuvlarni amalga oshirishda, avtobus haydovchisi Tomonlar davlatlari vakolatli organlari tarafidan kelishilgan shakl boʻyicha tuzilgan yoʻlovchilar roʻyxatiga ega boʻlishi lozim.

4. Yoʻlovchilarni har bir nomuntazam tashishga bir marta manzilga borish va qaytishni amalga oshirish huquqini beruvchi alohida ruxsatnoma berilishi lozim.”.

8. Bitimning 6-moddasi 1-bandi quyidagi tahrirda bayon etilsin:

“1. Mazkur Bitimga binoan talab etilayotgan ruxsatnomalar (4-moddaning 2-bandi, 5-moddaning 1-bandi, 5-1 — moddaning 2-bandi, 5-2-moddaning 1-bandi), shuningdek tashuvlarga oid boshqa hujjatlar mazkur Bitimda koʻrsatilgan barcha tashuvlar davomida avtotransport vositasida boʻlishi kerak va Tomonlar davlatlari vakolatli organlari vakillarining talabiga koʻra tekshirish uchun taqdim etilishi lozim.”.

9. Bitimning 8-moddasi quyidagi tahrirda bayon etilsin:

“1. Mazkur Bitimda nazarda tutilgan tashuvlar oʻz davlatlarining milliy qonunchiligiga muvofiq yoʻlovchi va yuklarni xalqaro tashish ruxsat etilgan tashuvchilar tomonidangina amalga oshirilishi mumkin.

2. Yoʻlovchi va yuklarni xalqaro tashishlarni amalga oshiradigan avtotransport vositalari oʻz davlatining roʻyxatga olish va farqlovchi belgilariga ega boʻlishlari lozim.

Yuk avtomobillari yoki shatakchi avtomobillar Tomonlar davlatlarining roʻyxatga olish va farqlovchi belgilariga ega boʻlgandagina, tirkamalar va yarim tirkamalar boshqa davlatlarning roʻyxatga olish va farqlovchi belgilariga ega boʻlishlari mumkin.

3. Tomonlarning tashuvchilari yoʻlovchi va yuklar tashuvlari amalga oshirilayotgan hudud davlatining harakat qoidalari va boshqa qonunlariga rioya qilishlari lozim.”.

10. Bitimning 9-moddasi quyidagi tahrirda bayon etilsin:

Mazkur Bitimga muvofiq yoʻlovchi va yuklarni tashish avtotransport vositalari egalarining uchinchi shaxslarga yetkazilgan zarar uchun fuqarolik javobgarligini majburiy sugʻurtalash sharti bilan amalga oshiriladi. Tashuvchi tashuvlarni amalga oshirayotgan har bir avtotransport vositasini oldindan sugʻurtalashi lozim.”.

11. Bitimning 12-moddasida:

1-bandning b) va v) kichik bandlari quyidagi tahrirda bayon etilsin:

“b) yoʻlovchi va yuklarni tashish davomida foydalanish uchun zarur boʻlgan miqdordagi moylash materiallari;

v) yoʻlovchi va yuklarni xalqaro tashishni amalga oshirayotgan avtotransport vositasini taʼmirlash uchun moʻljallangan ehtiyot qismlar va asbob-uskunalar.”.

2-band quyidagi tahrirda bayon etilsin:

“2. Mazkur Bitim doirasida yoʻlovchi va yuklarni tashishni amalga oshirayotgan avtotransport vositalari avtotransport vositalariga egalik qilish yoki undan foydalanish, boshqa Tomon davlatining avtomobil yoʻllaridan foydalanish va ularni taʼmirlash bilan bogʻliq yigʻim va toʻlovlardan oʻzaro ozod etiladi, toʻlovli avtomobil yoʻllari, avtomagistrallar, koʻpriklar va tonnellardan foydalanish uchun yigʻim va toʻlovlar, basharti bunday yigʻim va toʻlovlar ushbu davlatning avtotransport vositalaridan undiriladigan boʻlsa, bundan mustasno.”.

12. Ijro Bayonnomasining 1-bandi quyidagi tahrirda bayon etilsin:

“1. Bitimning vakolatli organlari quyidagilar hisoblanadi:

Oʻzbekiston Respublikasi tomonidan:

Oʻzbekiston avtomobil va daryo transporti agentligi, Oʻzbekiston Respublikasi Ichki ishlar vazirligi, Davlat bojxona qoʻmitasi va Avtomobil yoʻllari davlat qoʻmitasi.

Qozogʻiston Respublikasi tomonidan:

Qozogʻiston Respublikasi Investitsiyalar va rivojlanish boʻyicha vazirligi.

Tomonlar davlatlari vakolatli organlarining rasmiy nomlanishlarida oʻzgarishlar boʻlsa, Tomonlar zudlik bilan bir-birlarini diplomatik kanallar orqali xabardor qiladilar.”.

Mazkur Bayonnoma uning kuchga kirishi uchun zarur boʻlgan davlat ichki protseduralarini Tomonlar bajarganliklari toʻgʻrisida oxirgi yozma xabarnoma olingan sanadan boshlab kuchga kiradi.

Mazkur Bayonnoma Bitimning amal qilish muddati tugagan sanadan oʻz kuchini yoʻqotadi.

Ostona shahrida 2017-yil 23-martda ikki nusxada, har biri oʻzbek, qozoq va rus tillarida tuzildi, bunda barcha matnlar teng autentikdir. Matnlarda tafovut mavjud boʻlgan taqdirda, Tomonlar rus tilidagi matnga murojaat qiladilar.