Keyingi vaqtlarda aholini va sogʻliqni saqlash muassasalarini arzon dori vositalari, tibbiyot buyumlari va tibbiyot texnikalari bilan taʼminlashni yaxshilashga qaratilgan qator normativ-huquqiy hujjatlar qabul qilindi.

Shu bilan birga, farmatsevtika tarmogʻidagi ishlarning mavjud holatini oʻrganish tibbiyot muassasalari va aholining dori vositalari, tibbiyot buyumlari bilan taʼminlanishi ustidan tizimli monitoring va nazorat, davlat sogʻliqni saqlash muassasalarida tibbiyot texnikasi holatining lozim darajadagi hisobi va tahlili mavjud emasligini koʻrsatdi.

Farmatsevtika tarmogʻini barqaror rivojlantirishning yagona strategiyasi ishlab chiqilmagan hamda mahalliy farmatsevtika korxonalarining faoliyatini, shu jumladan tegishli mahsulotlarni aholi va sogʻliqni saqlash muassasalarining ularga boʻlgan ehtiyojini hisobga olgan holda ishlab chiqarish boʻyicha faoliyatini lozim darajada muvofiqlashtirish taʼminlanmayapti.

Deyarli tayyor mahsulot boʻlgan import xom ashyosidan foydalangan holda dori vositalari va tibbiyot buyumlarini ishlab chiqarishning keng tarqalgan amaliyoti hamda texnologik jarayonlarning past darajada ekanligi yuqori sifatli va raqobatbardosh farmatsevtika mahsulotlarini mahalliy ishlab chiqarishni tashkil etishga toʻsqinlik qilmoqda.

Farmatsevtika faoliyatini rivojlantirish uchun shart-sharoitlarni yaxshilash, aholi va sogʻliqni saqlash muassasalarining arzon, sifatli dori vositalari, tibbiyot buyumlari va tibbiyot texnikalari bilan taʼminlanganlik darajasini yanada oshirish, ularning ishlab chiqarilishi, olib kirilishi va sotilishini muvofiqlashtirishning yagona tizimini joriy etish maqsadida:

1. Oʻzbekiston Respublikasi Sogʻliqni saqlash vazirligi huzurida Farmatsevtika tarmogʻini rivojlantirish agentligi (keyingi oʻrinlarda Agentlik deb yuritiladi) tashkil etilsin.

2. Oʻzbekiston Respublikasi Sogʻliqni saqlash vazirligi, Iqtisodiyot vazirligi, Moliya vazirligi hamda Xususiylashtirilgan korxonalarga koʻmaklashish va raqobatni rivojlantirish davlat qoʻmitasining:

Oʻzbekiston Respublikasi Sogʻliqni saqlash vazirligining Dori vositalari, tibbiyot buyumlari va tibbiyot texnikalari ekspertizasi va standartizatsiyasi davlat markazini;

Oʻzbek kimyo-farmatsevtika ilmiy-tadqiqot institutini;

Toshkent vaksina va zardoblar ilmiy-tadqiqot institutini;

“Sharq tabobati” ilmiy-tadqiqot institutini Agentlikka berish toʻgʻrisidagi taklifi maʼqullansin.

3. Quyidagilar Agentlikning asosiy vazifalari etib belgilansin:

farmatsevtika tarmogʻini barqaror rivojlantirish strategiyasini, shu jumladan davlat-xususiy sheriklikni joriy etish orqali ishlab chiqish va roʻyobga chiqarish, farmatsevtika korxonalari va tashkilotlari faoliyatini muvofiqlashtirish, aholi va davlat sogʻliqni saqlash muassasalarini dori vositalari, tibbiyot buyumlari xamda tibbiyot texnikalari bilan taʼminlash dasturlarini amalga oshirish;

farmatsevtika bozori konyunkturasini oʻrganishni tashkil qilish, ichki va tashki bozorlarda yuqori sifatli, raqobatbardosh dori vositalari, tibbiyot buyumlari va tibbiyot texnikalarining yangi turlarini ishlab chiqarishni oʻzlashtirishga hamda ularni jahon bozoriga olib chiqishga koʻmaklashish;

aholi va davlat sogʻliqni saqlash muassasalarining dori vositalari, tibbiyot buyumlari va tibbiyot texnikalari, shu jumladan ularning mahalliy ishlab chiqarilgan turlari bilan taʼminlanganlik holatini tizimli tahlil qilish, shu asosda ichki bozorni yanada toʻldirish va ishlab chiqarishni mahalliylashtirish boʻyicha takliflar ishlab chiqish;

farmatsevtika tarmogʻi korxonalarining asbob-uskunalarini modernizatsiya qilish va texnologik qayta jihozlashga koʻmaklashish, chet el investitsiyalarini, shu jumladan xorijiy va xalqaro moliya institutlarining mablagʻlarini keng jalb qilish;

dori vositalari, tibbiyot buyumlari va tibbiyot texnikalarini ishlab chiqarish jarayoniga innovatsion texnologiyalarni yanada joriy etish uchun ilmiy-tadqiqot ishlari oʻtkazilishini tashkil etish;

Ijtimoiy ahamiyatga ega dori vositalari va tibbiyot buyumlarining roʻyxatini takomillashtirish boʻyicha takliflar ishlab chiqishda, shuningdek, ularga qatʼiy narxlarni oʻrnatish boʻyicha takliflar tayyorlash va kiritishda bevosita ishtirok etish;

dori vositalari, tibbiyot buyumlari va tibbiyot texnikalarini mahalliy ishlab chiqaruvchilarga yetakchi chet el farmatsevtika kompaniyalari bilan hamkorlikni tashkil etishga koʻmaklashish;

dori vositalari, tibbiyot buyumlari va tibbiyot texnikalarini mahalliy ishlab chiqarilgan mahsulot deb topish uchun mezonlarni ishlab chiqishga koʻmaklashish;

dori vositalari, tibbiyot buyumlari va tibbiyot texnikalarini davlat roʻyxatidan oʻtkazish;

davlat sogʻliqni saqlash muassasalarida foydalanilayotgan tibbiyot texnikalarining hisobi va reyestri yuritilishini taʼminlash hamda ularning holatini tahlil qilish;

davlat sogʻliqni saqlash muassasalari uchun dori vositalari, tibbiyot buyumlari, tibbiyot texnikalari va maxsus tibbiyot avtotransportining markazlashtirilgan xaridini tashkil etish;

Oʻzbekiston Respublikasi Sogʻliqni saqlash vazirligining ijtimoiy dorixonalari (keyingi oʻrinlarda ijtimoiy dorixonalar deb yuritiladi) tarmogʻini tashkil etish va faoliyat koʻrsatishini taʼminlash;

farmatsevtika tarmogʻiga xalqaro standartlarning joriy etilishini muvofiqlashtirish.

4. Belgilab qoʻyilsinki:

Agentlik mustaqil yuridik shaxs hisoblanadi, oʻz balansiga, bank muassasalarida hisob raqamlariga, Oʻzbekiston Respublikasi Davlat gerbi tasviri tushirilgan muhrga ega boʻladi;

Agentlik Oʻzbekiston Respublikasi Prezidenti tomonidan lavozimga tayinlanadigan va lavozimdan ozod etiladigan direktor tomonidan boshqariladi;

Agentlik direktorining Oʻzbekiston Respublikasi Prezidenti bilan kelishilgan holda Sogʻliqni saqlash vaziri tomonidan lavozimga tayinlanadigan va lavozimdan ozod etiladigan oʻrinbosarlari boʻladi;

Agentlik direktori maqomi, maishiy, tibbiy va transport xizmatlari koʻrsatish boʻyicha Oʻzbekiston Respublikasi Sogʻliqni saqlash vazirining birinchi oʻrinbosariga tenglashtiriladi;

Agentlik faoliyati Oʻzbekiston Respublikasi Davlat budjeti mablagʻlari va qonun hujjatlarida taqiqlanmagan boshqa mablagʻlar hisobidan moliyalashtiriladi.

5. Agentlikka kuyidagi huquqlar berilsin:

davlat organlari va boshqa tashkilotlarning mamlakat farmatsevtika tarmogʻini rivojlantirishni nazarda tutuvchi kompleks chora-tadbirlarni ishlab chiqish va amalga oshirish masalalari boʻyicha ishini muvofiqlashtirish;

Agentlik vakolatiga taalluqli boʻlgan masalalar boʻyicha davlat organlari va boshqa tashkilotlardan hujjatlar, statistik maʼlumotlar, hisobotlar, tahliliy materiallar, xulosalar va boshqa axborotlarni soʻrash va olish;

dori vositalari, tibbiyot buyumlari va tibbiyot texnikalarini, shu jumladan chet eldan import qilinayotganlarini oʻrnatilgan tartibda davlat roʻyxatidan oʻtkazish va sertifikatlash;

Agentlik zimmasiga yuklatilgan vazifalarni bajarish doirasida davlat organlari va tashkilotlari, nodavlat tashkilotlar, yetakchi loyiha institutlari, ilmiy-taʼlim muassasalari, shuningdek, xalqaro tashkilotlar, chet el kompaniyalarining yuqori malakali xodimlarini va mutaxassislarni jalb qilish;

farmatsevtika tarmogʻini rivojlantirish masalalari boʻyicha xorijiy davlatlarning vakolatli organlari bilan toʻgʻridan-toʻgʻri maʼlumot almashish;

farmatsevtika tarmogʻining erkin iqtisodiy zonalarini tashkil etish va faoliyatini yanada takomillashtirish, shuningdek, ularni boshqarish masalalarini kelishish;

belgilangan tartibda noshirlik faoliyatini amalga oshirish, axborot materiallari, davriy nashrlar va boshqa bosma mahsulotlarni chiqarish hamda tarqatish;

farmatsevtika korxonalarini GMP qoidalariga muvofiqligi yuzasidan sertifikatsiyadan oʻtkazish;

farmatsevtika tarmogʻi mutaxassislarining malakasini oshirish.

6. Oʻzbekiston Respublikasi Vazirlar Mahkamasi oʻn kun muddatda:

Agentlikning tashkiliy tuzilmasini, Agentlik markaziy apparati va uning hududiy boʻlinmalari tashkiliy-shtat tuzilmasini;

Oʻzbekiston Respublikasi Sogʻliqni saqlash vazirligi huzuridagi Farmatsevtika tarmogʻini rivojlantirish agentligi toʻgʻrisidagi nizomni;

Oʻzbekiston Respublikasi Sogʻliqni saqlash vazirligi huzuridagi Farmatsevtika tarmogʻini rivojlantirish agentligi faoliyatining samaradorligini baholash mezonlari toʻgʻrisidagi nizomni tasdiqlasin.

7. Oʻzbekiston Respublikasi Moliya vazirligi Agentlik faoliyatini moliyalashtirishga mablagʻlarni 2017-yilda asoslantirilgan hisob-kitoblar boʻyicha ajratsin hamda har yili Oʻzbekiston Respublikasining Davlat budjeti xarajatlarida nazarda tutsin.

8. Oʻzbekiston Respublikasi Xususiylashtirilgan korxonalarga koʻmaklashish va raqobatni rivojlantirish davlat qoʻmitasi hamda Toshkent shahar hokimligi ikki hafta muddatda Agentlikni unga yuklatilgan vazifalarni bajarish uchun zarur boʻlgan bino bilan taʼminlasin.

9. Oʻzbekiston Respublikasi Axborot texnologiyalari va kommunikatsiyalarini rivojlantirish vazirligi Agentlikni belgilangan tartibda zarur aloqa vositalari, shu jumladan hukumat aloqasi bilan taʼminlasin.

10. Quyidagilar:

a) “Oʻzfarmsanoat” DAK aʼzolarining konsern mulki va boshqa tovar-moddiy boyliklarini Agentlikka oʻtkazish bilan uni tugatish toʻgʻrisidagi;

b) Oʻzbekiston Respublikasi Sogʻliqni saqlash vazirligining:

Oʻzbekiston Respublikasi Sogʻliqni saqlash vazirligining “Oʻzmedeksport” respublika tashqi iqtisodiy davlat korxonasini Sogʻliqni saqlash vazirligi huzuridagi Farmatsevtika tarmogʻini rivojlantirish agentligining “Oʻzmedimpeks” davlat unitar korxonasi (keyingi oʻrinlarda “Oʻzmedimpeks” DUK deb yuritiladi) etib qayta nomlash;

“Oʻzmedlizing” AJning ustav kapitalidagi davlat ulushini “Oʻzmedimpeks” DUKga davlat ulushi boʻyicha aksiyador funksiyasini bergan holda operativ boshqaruvga berish toʻgʻrisidagi takliflari maʼqullansin.

12. Oʻzbekiston Respublikasi Sogʻliqni saqlash vazirligi, “Oʻzmedimpeks” DUK, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari 2018-yil 1-yanvarga kadar muddatda ijtimoiy dorixonalarni davlat sogʻliqni saqlash muassasalari (tuman (shahar) tibbiyot birlashmalari, qishloq oilaviy poliklinikalar, qishloq vrachlik punktlari), davlat mulkida boʻlgan boʻsh turgan bino va inshootlar negizida 2018-yil 1-dekabrga qadar muddatda zarur hollarda kapital-taʼmirlash ishlarini oʻtkazib, keyinchalik ularning hamma joyda faoliyat koʻrsatishini taʼminlagan holda joylashuvini tasdiqlasin.

Oʻzbekiston Respublikasi Moliya vazirligi 2017-2018-yillarda ijtimoiy dorixonalarni tasdiqlangan normativlarga muvofiq ravishda jihozlash uchun Budjetdan tashqari taʼlim va tibbiyot muassasalarining moddiy-texnika bazasini rivojlantirish jamgʻarmasidan zarur mablagʻlarni yoʻnaltirsin.

13. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari:

Oʻzbekiston Respublikasi Sogʻliqni saqlash vazirligi hamda Xususiylashtirilgan korxonalarga koʻmaklashish va raqobatni rivojlantirish davlat qoʻmitasi bilan birgalikda “Oʻzmedimpeks” DUK buyurtmalari boʻyicha davlat mulki boʻlgan inshootlardan va boshqa mulklardan begʻaraz foydalanishga, shu jumladan ijtimoiy dorixonalar tashkil etish uchun taqdim qilishni taʼminlab borsin;

Qoraqalpogʻiston Respublikasi budjeti, viloyatlar va Toshkent shahrining mahalliy budjetlari hisobidan ijtimoiy dorixonalarni kapital taʼmirlash, shuningdek, muhandislik infratuzilmalarini joylashtirish, hududlarini obodonlashtirish va ularning loyiha hujjatlarini ishlab chiqishga mablagʻlar ajratsin.

14. Oʻzbekiston Respublikasi Iqtisodiyot vazirligi va Sogʻliqni saqlash vazirligi 2018-yilga moʻljallangan Oʻzbekiston Respublikasining investitsiya dasturida ijtimoiy dorixonalarning qurilishi va rekonstruksiya qilinishi uchun tasdiqlangan va ekspertizadan oʻtkazilgan loyiha-smeta hujjatlariga muvofiq markazlashtirilgan kapital mablagʻlar limitlarini ajratishni nazarda tutsin.

15. Oʻzbekiston Respublikasi Prezidentining 2016-yil 31-oktabrdagi PQ-2647-son qarori bilan tashkil etilgan Davolash muassasalari va aholini dori-darmon vositalari bilan taʼminlashni nazorat qilish respublika komissiyasi uning funksiyalarini Oʻzbekiston Respublikasi Sogʻliqni saqlash vazirligiga yuklagan holda tugatilsin.

Belgilansinki, Ijtimoiy ahamiyatga ega dori vositalari va tibbiyot buyumlarining roʻyxatiga kiritilgan dori vositalari hamda tibbiyot buyumlari uchun qatʼiy narxlar Sogʻliqni saqlash vazirligi tomonidan “Oʻzmedimpeks” DUKning Oʻzbekiston Respublikasi Investitsiyalar boʻyicha davlat qoʻmitasi bilan kelishilgan takliflariga koʻra belgilanadi.

16. “Oʻzmedimpeks” DUK 2023-yil 1-yanvarga kadar barcha turdagi soliq va davlat maqsadli jamgʻarmalariga majburiy toʻlovlar toʻlashdan, shuningdek, Oʻzbekiston Respublikasi Sogʻliqni saqlash vazirligining buyurtmalari boʻyicha dori vositalari, tibbiyot buyumlari, tibbiyot texnikalari va maxsus tibbiyot avtotransporti yetkazib berish shartnomalari yuzasidan bojxona toʻlovlari (bojxona rasmiylashtiruvi uchun yigʻimlardan tashqari) toʻlashdan ozod qilinsin.

17. Oʻzbekiston Respublikasi Sogʻliqni saqlash vazirligi uch oy muddatda:

manfaatdor vazirlik va idoralar bilan birgalikda dori vositalari va tibbiyot buyumlarini roʻyxatga olish, narxini belgilash tartibini takomillashtirishni, qonunchilikka “in bulk” mahsulotning aniq belgilangan tushunchasini kiritishni nazarda tutuvchi kompleks chora-tadbirlarni ishlab chiqsin va amalga oshirsin;

Oʻzbekiston Respublikasi Investitsiyalar boʻyicha davlat qoʻmitasi, Xususiylashtirilgan korxonalarga koʻmaklashish va raqobatni rivojlantirish davlat qoʻmitasi, boshqa manfaatdor idoralar bilan birgalikda ushbu Farmon talablarini hisobga olgan holda ijtimoiy ahamiyatga ega dori vositalari va tibbiyot buyumlarining qatʼiy narxini, shuningdek, dori vositalari va tibbiyot buyumlarining tartibga solinadigan narxlarini belgilash tartibini tasdiqlasin;

manfaatdor vazirlik va idoralar bilan birgalikda dori vositalari, tibbiyot buyumlari va tibbiyot texnikalarini ularning xalqaro va milliy standartlarga muvofiqligini hisobga olgan holda mahalliy ishlab chiqarilgan mahsulotlar deb topish mezonlarini tasdiqlash toʻgʻrisidagi normativ-huquqiy hujjat loyihasini Oʻzbekiston Respublikasi Vazirlar Mahkamasiga kiritsin;

dori vositalari, tibbiyot buyumlari va tibbiyot texnikalarini mahalliy ishlab chiqarilgan mahsulotlar deb topish mezonlarini tasdiqlangan kundan boshlab dori vositalari, tibbiyot buyumlari va tibbiyot texnikalarini mahalliy ishlab chiqarilgan mahsulotlar deb topish nuqtai nazaridan ularning ishlab chiqarilishini texnologik auditdan oʻtkazsin;

dori vositalari, tibbiyot buyumlari va tibbiyot texnikalarini olib kirish boʻyicha yagona logistika markazini tashkil etish yuzasidan takliflar kiritsin;

Oʻzbekiston Respublikasi Sogʻliqni saqlash vazirligi tizimida amalga oshirilayotgan investitsiya loyihalari doirasida yaratilgan loyihalarni bajarish guruhlari faoliyatining samaradorligini oʻrgansin.

18. Oʻzbekiston Respublikasi Prezidentining 2017-yil 8-sentabrdagi PF-5185-son Farmoni bilan tasdiqlangan Oʻzbekiston Respublikasida Maʼmuriy islohotlar konsepsiyasiga muvofiq Oʻzbekiston Respublikasi Sogʻliqni saqlash vazirligining faoliyati va tuzilmasi tanqidiy qaytadan koʻrib chiqilayotganligi maʼlumot uchun qabul qilinsin.

Mazkur ishlar jarayonida Sogʻliqni saqlash vazirligining budjetni shakllantirish, taqsimlash va budjet mablagʻlarini sarflashdagi mustaqilligini oshirishni inobatga olgan holda sogʻliqni saqlash idoralari va muassasalarining moliyalashtirish tizimini tubdan takomillashtirishga alohida eʼtibor qaratilsin.

19. “Oʻzmedimpeks” DUKga olib kirilayotgan dori vositalari, tibbiyot buyumlari, tibbiyot texnikalari va maxsus tibbiyot avtotransportlarini “Oʻzmedimpeks” DUK rahbariyati tomonidan ularni saqlab turishning zarur shart-sharoitlarini taʼminlash boʻyicha majburiyatlarni qabul qilgan holda “vaqtincha saqlash” va “bojxona ombori” bojxona rejimi ostida shaxsiy hamda ijaraga olingan omborlarga joylashtirishga istisno tariqasida ruxsat berilsin.

20. Oʻzbekiston Respublikasi Davlat bojxona qoʻmitasi bir oy muddatda “Oʻzmedimpeks” DUKga Toshkent shahar, Mirzo Ulugʻbek tumani, E. Maraimov koʻchasi, 50-uyda joylashgan bojxona omborining bino va inshootini begʻaraz foydalanishga oʻtkazsin.

21. Oʻzbekiston Respublikasi Xususiylashtirilgan korxonalarga koʻmaklashish va raqobatni rivojlantirish davlat qoʻmitasi hamda Toshkent shahar hokimligi bir oy muddatda “Oʻzmedimpeks” DUKni unga yuklatilgan vazifalarni bajarish uchun zarur boʻlgan bino va xonalar bilan taʼminlash boʻyicha takliflar kiritsin.

22. Oʻzbekiston Respublikasi Sogʻliqni saqlash vazirligi Adliya vazirligi, boshqa manfaatdor idoralar bilan birgalikda ikki oy muddatda qonun hujjatlariga ushbu Farmondan kelib chiqadigan oʻzgartish va qoʻshimchalar toʻgʻrisidagi takliflarni Vazirlar Mahkamasiga kiritsin.

23. Mazkur Farmonning ijrosini nazorat qilish Oʻzbekiston Respublikasining Bosh vaziri A.N. Aripov, Oʻzbekiston Respublikasi Prezidentining Davlat maslahatchisi A.N. Yunusxodjayev va Oʻzbekiston Respublikasining Bosh prokurori I.B. Abdullayev zimmasiga yuklansin.