Aholining va mamlakat iqtisodiyotining uglevodorodlarga boʻlgan ehtiyojini barqaror taʼminlash, neftgaz tarmogʻining ishlab chiqarish va eksport salohiyatini turgʻun rivojlantirish va oshirib borish, istiqbolli maydonlar va konlarda quduqlar va obyektlar qurishni jadallashtirish yoʻli orqali uglevodorod qazib olish hajmlarini yanada barqaror saqlab turish hamda oshirish, shuningdek, xorijiy investitsiyalar va zamonaviy texnologiyalarni jalb qilish hisobiga ularni jihozlash maqsadida:

1. Maʼlumot uchun qabul qilinsinki:

“Oʻzbekneftgaz” MXK boshqa manfaatdor vazirliklar va idoralar bilan birgalikda Ustyurt, Buxoro-Xiva, Surxondaryo va Fargʻona neftgaz va gazkondensat konlarida uglevodorodlarni qazib olish hajmlarini barqaror saqlab turish va yanada oshirish uchun 2017 — 2021-yillarda uglevodorod xom ashyosi qazib olishni koʻpaytirish Dasturi (keyingi oʻrinlarda — Dastur) ishlab chiqildi;

“Oʻzbekneftgaz” MXK va “Gazprombank” AJ oʻrtasida oʻzaro kelishilgan shartlarda Dasturni birgalikda moliyalashtirish toʻgʻrisida kelishuvga erishildi;

Oʻzbekiston Respublikasi Prezidentining 2016-yil 22-sentabrdagi PQ-2607-sonli qaroriga muvofiq amalga oshirilayotgan “Sechankoʻl, Oqjar va Chimboy investitsiya bloklarida, shuningdek, Urga, Oqchaloq va Chandir guruhi konlarini oʻrganish geologiya qidiruv ishlarini olib borish” investitsiya loyihasini amalga oshirish doirasida “Oʻzbekneftgaz” MXK va “Gazprom” JAJ (Rossiya) kompaniyasining — hamkor “Gas Project Development Central Asia AG” kompaniyalari tomonidan masʼuliyati cheklangan jamiyat shaklidagi “Natural Gas Stream” qoʻshma korxonasi (keyingi oʻrinlarda — qoʻshma korxona) tashkil etildi;

Dasturni amalga oshirish “Oʻzbekneftgaz” MXK milliy valyutadagi oʻz mablagʻlari hisobidan, shuningdek, Dastur boʻyicha ishlarni amalga oshirishni tashkil etish va xorijiy valyutada belgilangan xarajatlar qismida ularni moliyalashtirish uchun xorijiy korxonani jalb etish hisobiga amalga oshiriladi;

tovarlar, ishlar va xizmatlarni xarid qilishga oid tanlov savdolarini oʻtkazish qoʻshma korxonaning ichki nizomiga muvofiq tanlov komissiyasi tarkibida “Oʻzbekneftgaz” MXK vakillari ishtirokida amalga oshiriladi.

2. 2017 — 2021-yillarda uglevodorod xom ashyosi qazib olishni koʻpaytirish Dasturi:

2017 — 2021-yillarda neftgaz konlarini qurish va jihozlash boʻyicha chora-tadbirlar kompleksini oʻz ichiga olgan holda tasdiqlansin;

Oʻzbekiston Respublikasi Vazirlar Mahkamasi Dasturning amalga oshirilishi, jalb qilinayotgan kreditlardan maqsadli va samarali ishlatilishi, zarur hollarda Dastur parametrlariga aniqlik va tuzatishlar kiritilishi ustidan qatʼiy nazorat oʻrnatsin.

“Oʻzbekneftgaz” MXK (A. Sultanov) va “Oʻzneftgazqazibchiqarish” AJ (D. Xaqberdiyev) rahbarlari zimmasiga, Dasturni amalga oshirish boʻyicha biznes-reja doirasida tasdiqlanadigan chora-tadbirlar rejalarini oʻz ichiga olgan holda Dasturning asosiy parametrlarini oʻz vaqtida va sifatli ijro etilishi ustidan shaxsiy javobgarlik yuklansin.

3. “Oʻzbekneftgaz” MXK ikki oy muddatda:

“Oʻzbekneftgaz” MXK va qoʻshma korxona masʼuliyatini aniq koʻrsatib beradigan Dasturni amalga oshirish mexanizmini;

“Oʻzbekneftgaz” MXK tashkilotlari tomonidan 2017-yilda eksport qilish uchun qoʻshma korxonaga sotiladigan tabiiy gaz hajmlari, xorijiy investitsiyalarni jalb etish shartlarini hisobga olgan holda bajariladigan ishlar hajmlari va narxlarini;

2018-yildan boshlab toki kreditlar va ularning foizlari, shuningdek, Dasturni amalga oshirish bilan bogʻliq xarajatlar toʻliq uzilgunicha, keyinchalik eksport qilish uchun qoʻshma korxonaga “Oʻzbekneftgaz” MXK tashkilotlari tomonidan sotiladigan tabiiy gaz hajmlari, xorijiy kreditlarni jalb etish shartlarini hisobga olgan holda bajarilgan ishlarning har yilgi hajmlari va narxlarini belgilash, kelishish va tasdiqlash tartibini nazarda tutuvchi qaror loyihasini tasdiqlash uchun Vazirlar Mahkamasiga kiritsin.

4. Maʼlumot uchun qabul qilinsinki, qonun hujjatlariga muvofiq, qoʻshma korxona tomonidan tabiiy gazni eksport qilishdan olingan xorijiy valyutadagi valyuta tushumining bir qismini majburiy sotish hisobiga:

asosiy qarz toʻliq uzilgunicha, yangi korxonalarni qurish, faoliyat yuritayotgan korxonalarni modernizatsiya qilish va texnologik yangilashga berilgan valyuta kreditlari boʻyicha asosiy qarzni uzishga boʻlgan joriy toʻlovlar boʻyicha yoʻnaltirilgan mablagʻlar summasiga;

Oʻzbekiston Respublikasi hududidan tashqarida bojxona tartib-taomillari, transportirovka, sugʻurtalash, yuklarga hamrohlik qilish, komissiya mukofotlari, xorijiy banklar va Oʻzbekiston Respublikasining vakolatli banklari, shu jumladan shartnomalarga muvofiq, xorijiy valyutada amalga oshirilgan (muddati oʻtgan va kechiktirilgan ssudalar boʻyicha foizlardan tashqari) kafolatchilarning foizlari boʻyicha kreditlar uchun toʻlaniladigan foizlarga koʻra toʻlovlar summasi boʻyicha xarajatlar miqdoriga kamaytiriladi.

5. Dasturni amalga oshirish doirasida “Oʻzbekneftgaz” MXKning:

Dastur chora-tadbirlarini bajarish uchun “Oʻzbekneftgaz” MXK tashkilotlarining, ularni modernizatsiya qilish va qoʻshimcha jihozlashni nazarda tutgan holda mavjud quvvatlari, uskunalari va maxsus texnikasini jalb qilish toʻgʻrisidagi taklifiga rozilik berilsin.

7. “Oʻzbekneftgaz” MXKga, uning tarkibiy boʻlinmalariga, qoʻshma korxona va moliyalashtirayotgan bankka, istisno tariqasida, Dasturni amalga oshirish doirasida:

ish hujjatlari asosida — obyektlarni qurish uchun loyiha hujjatlarini bir bosqichli tartibda ishlab chiqish;

2018-yilning 1-yanvarigacha loyihalashtirish, muhandislik ishlari, texnik xizmat koʻrsatish, sogʻliqni muhofaza qilish, xavfsizlik texnikasi va atrof muhitni asrash boʻyicha xalqaro normalar va standartlar talablariga muvofiq obyektlarni bir vaqtning oʻzida qurish hamda ulardan foydalanishni amalga oshirishga;

tuzilgan uch tomonlama shartnomalarga muvofiq, qurilishi tugallangan obyektlarni “Oʻzbekneftgaz” MXK tashkilotlariga topshirishga ruxsat etilsin.

9. Oʻzbekiston Respublikasi Tashqi ishlar vazirligi “Oʻzbekneftgaz” MXK tomonidan tasdiqlanadigan, qoʻshma korxonaning talabnomalariga koʻra Dasturni amalga oshirishda qatnashayotgan xorijiy mutaxassislarga konsullik va boshqa yigʻimlar undirilmagan holda kirish vizalari rasmiylashtirilishini taʼminlasin.

10. Oʻzbekiston Respublikasi Ichki ishlar vazirligi “Oʻzbekneftgaz” MXK tomonidan tasdiqlanadigan, qoʻshma korxonaning talabnomalariga koʻra Dasturni amalga oshirishda qatnashayotgan xorijiy mutaxassislarga davlat boji undirilmagan holda koʻp martalik vizalarni rasmiylashtirish, berish va muddatini uzaytirish, shuningdek, vaqtinchalik yashash joyida vaqtinchalik propiska va vaqtinchalik propiska muddatini uzaytirishni taʼminlasin.

11. Oʻzbekiston Respublikasi Mehnat vazirligi mahalliy mutaxassislar boʻlmagan holda qoʻshma korxonaga belgilangan tartibda turdosh mutaxassisliklar boʻyicha xorijiy ishchi kuchini Oʻzbekiston Respublikasiga jalb etishga ruxsatnomalar berilishini, shuningdek, qoʻshma korxonaning talabnomalariga koʻra — xorijiy mutaxassislarga Oʻzbekiston Respublikasi hududida mehnat faoliyati huquqini beradigan tasdiqnomalar berilishini (muddati uzaytirilishini) taʼminlasin.

12. Mazkur qarorning ijrosini nazorat qilish Oʻzbekiston Respublikasi Bosh vazirining oʻrinbosari Gʻ.I. Ibragimov zimmasiga yuklansin.