Oʻzbekiston Respublikasi Prezidentining “Respublika davlat boshqaruvi organlari tizimini takomillashtirish toʻgʻrisida” 2003-yil 9-dekabrdagi PF-3358-son Farmonini bajarish yuzasidan hamda neft mahsulotlari va gazni qazib olish, ishlab chiqarish, sotish va ulardan foydalanishda belgilangan tartibga va texnologiya talablariga rioya etilishini nazorat qilish darajasini oshirish maqsadida Vazirlar Mahkamasi qaror qiladi:

1. Quyidagilar “Oʻzdavneftgazinspeksiya”ning asosiy vazifalari etib belgilansin:

neft mahsulotlari va gaz sotish hamda ulardan foydalanish boʻyicha qonun hujjatlari va boshqa normativ-huquqiy hujjatlarning bajarilishini nazorat qilish;

energiyani tejovchi davlat dasturlarini, neft, gaz, gaz kondensati va ularni qayta ishlash mahsulotlaridan foydalanish masalalari boʻyicha loyihalar va tadbirlarni amalga oshirish;

neft, gaz va gaz kondensatini qazib olish, qayta ishlash, uzatish, saqlash obyektlarini (qurilmalarini) montaj qilish va ulardan foydalanishda texnologiya talablariga rioya etilishini nazorat qilish;

neft mahsulotlari va gazdan foydalanish, ularni sotish, shuningdek neft, gaz va gaz kondensatini qazib olish, qayta ishlash, uzatish, saqlash obyektlarini (qurilmalarini) montaj qilish va ulardan foydalanish boʻyicha normativ hujjatlarni ishlab chiqish.

2. Quyidagilar:

“Oʻzdavneftgazinspeksiya”ning tashkiliy tuzilmasi, uning markaziy apparati va hududiy boʻlimlari tuzilmasi 1—3-ilovalarga muvofiq;

Oʻzbekiston Respublikasi Vazirlar Mahkamasi huzuridagi Oʻzbekiston neft mahsulotlari va gazdan foydalanishni nazorat qilish davlat inspeksiyasi toʻgʻrisidagi nizom 4-ilovaga muvofiq tasdiqlansin.

3. “Oʻzdavneftgazinspeksiya” markaziy apparati xodimlarining cheklangan umumiy soni 37 nafar, shu jumladan boshqaruv xodimlari soni 8 nafar etib belgilansin.

“Oʻzdavneftgazinspeksiya” boshligʻiga, zarurat boʻlganda, xodimlarning belgilangan cheklangan soni doirasida “Oʻzdavneftgazinspeksiya” markaziy apparati va uning hududiy boʻlimlari tuzilmasiga oʻzgartirish kiritishga ruxsat berilsin.

4. “Oʻzdavneftgazinspeksiya” faoliyatini mablagʻ bilan taʼminlashning Oʻzbekiston Respublikasi Moliya vazirligi bilan kelishilgan holda har yili tasdiqlanadigan xarajatlar smetasiga muvofiq:

“Oʻztransgaz” aksiyadorlik kompaniyasi, “Oʻzneftmahsulot” aksiyadorlik kompaniyasining neft bazalari, “Oʻzbekneftgaz” milliy xolding kompaniyasining “Shoʻrtanneftgaz” unitar shoʻba korxonasi va Muborak gazni qayta ishlash zavodining, ushbu mablagʻlarni Vazirlar Mahkamasining 1999-yil 5-fevraldagi 54-son qarori bilan tasdiqlangan Mahsulot (ishlar, xizmatlar)ni ishlab chiqarish va sotish xarajatlari tarkibi hamda moliyaviy natijalarni shakllantirish tartibi toʻgʻrisidagi nizomning 1.1.4-bandiga muvofiq ishlab chiqarish moddiy xarajatlariga kiritgan holda, majburiy ajratmalari;

neft mahsulotlari va gazdan foydalanish qoidalarini buzganlik uchun Oʻzbekiston Respublikasi Vazirlar Mahkamasining “Yoqilgʻi-energetika resurslaridan foydalanish qoidalarini buzganlik uchun iqticodiy jazolarni qoʻllash toʻgʻrisida” 1994-yil 9-martdagi 124-son qarorida belgilangan tartibga muvofiq iqtisodiy jazolarni qoʻllashdan tushadigan mablagʻlarning bir qismi hisobiga amalga oshiriladigan tartibi saqlab qolinsin.

5. Vazirlar Mahkamasining “Oʻzbekiston neft mahsulotlari va gazdan foydalanishni nazorat qilish davlat inspeksiyasini tashkil etish toʻgʻrisida” 2000-yil 8-iyundagi 220-son qarorining 2—6-bandlari (Oʻzbekiston Respublikasi QT, 2000-y., 6-son, 29-modda), Vazirlar Mahkamasining 2003-yil 26-dekabrdagi 573-son qaroriga ilovaning 2-bandi (Oʻzbekiston Respublikasi QT, 2003-y., 12-son, 133-modda) va Vazirlar Mahkamasining 2004-yil 8-yanvardagi 9-son qaroriga ilovaning 3-bandi (Oʻzbekiston Respublikasi QT, 2004-y., 1-son, 3-modda) oʻz kuchini yoʻqotgan deb hisoblansin.

6. “Oʻzdavneftgazinspeksiya”, “Oʻzbekneftgaz” milliy xolding kompaniyasi manfaatdor vazirliklar va idoralar bilan birgalikda bir oy muddatda idoraviy normativ hujjatlarning ushbu qarorga muvofiqlashtirilishini taʼminlasinlar.

7. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari Oʻ.T. Sultonov zimmasiga yuklansin.

1. Oʻzbekiston neft mahsulotlari va gazdan foydalanishni nazorat qilish davlat inspeksiyasi (keyingi oʻrinlarda “Oʻzdavneftgazinspeksiya” deb ataladi) neft mahsulotlari va gazdan foydalanish, ularni sotish, shuningdek neft, gaz va gaz kondensati qazib olish, ularni qayta ishlash, uzatish, saqlash obyektlarini (qurilmalarini) montaj qilish va ulardan foydalanishda texnologiya talablariga rioya qilinishi ustidan davlat nazorati sohasidagi maxsus vakolatli davlat boshqaruvi organi hisoblanadi.

“Oʻzdavneftgazinspeksiya” oʻz faoliyatida Oʻzbekiston Respublikasi Vazirlar Mahkamasiga hisob beradi.

2. “Oʻzdavneftgazinspeksiya” tizimiga yuridik shaxs maqomiga ega boʻlmagan Qoraqalpogʻiston Respublikasi, viloyatlar va Toshkent shahridagi hududiy boʻlimlar, shuningdek Toshkent nazorat-kimyo laboratoriyasi kiradi.

Hududiy boʻlimlar oʻz faoliyatini “Oʻzdavneftgazinspeksiya” tomonidan tasdiqlangan nizomga muvofiq amalga oshiradi, mahalliy davlat hokimiyati organlaridan mustaqil hisoblanadi hamda bevosita “Oʻzdavneftgazinspeksiya”ga boʻysunadi.

3. “Oʻzdavneftgazinspeksiya” oʻz faoliyatida Oʻzbekiston Respublikasi Konstitutsiyasiga va qonunlariga, Oʻzbekiston Respublikasi Oliy Majlisining qarorlari va boshqa hujjatlariga, Oʻzbekiston Respublikasi Prezidentining farmonlari, qarorlari va farmoyishlariga, Oʻzbekiston Respublikasi Vazirlar Mahkamasining qarorlari va farmoyishlariga, boshqa normativ-huquqiy hujjatlarga, shuningdek mazkur Nizomga amal qiladi.

4. “Oʻzdavneftgazinspeksiya” oʻz faoliyatini davlat boshqaruvi boshqa organlari, huquqni muhofaza qilish organlari, mahalliy davlat hokimiyati organlari, jamoat birlashmalari va boshqa tashkilotlar bilan oʻzaro hamkorlikda amalga oshiradi.

5. “Oʻzdavneftgazinspeksiya” faoliyatini mablagʻ bilan taʼminlash Oʻzbekiston Respublikasi Moliya vazirligi bilan kelishilgan holda har yili tasdiqlanadigan xarajatlar smetasiga muvofiq:

“Oʻztransgaz” aksiyadorlik kompaniyasi, “Oʻzneftmahsulot” aksiyadorlik kompaniyasining neft bazalari, “Oʻzbekneftgaz” milliy xolding kompaniyasining “Shoʻrtanneftgaz” unitar shoʻba korxonasi va Muborak gazni qayta ishlash zavodining, ushbu mablagʻlarni Vazirlar Mahkamasining 1999-yil 5-fevraldagi 54-son qarori bilan tasdiqlangan Mahsulot (ishlar, xizmatlar)ni ishlab chiqarish va sotish xarajatlari tarkibi hamda moliyaviy natijalarni shakllantirish tartibi toʻgʻrisidagi Nizomning 1.1.4-bandiga muvofiq ishlab chiqarish moddiy xarajatlariga kiritgan holda, majburiy ajratmalari;

neft mahsulotlari va gazdan foydalanish qoidalarini buzganlik uchun Oʻzbekiston Respublikasi Vazirlar Mahkamasining 1994-yil 9-martdagi 124-son qarori bilan belgilangan tartibga muvofiq iqtisodiy jazolarni qoʻllashdan tushadigan mablagʻlarning bir qismi hisobiga amalga oshiriladi.

6. “Oʻzdavneftgazinspeksiya” yuridik shaxs hisoblanadi, Oʻzbekiston Respublikasi Davlat gerbi tasviri tushirilgan va oʻz nomi yozilgan muhrga ega boʻladi.

7. Quyidagilar “Oʻzdavneftgazinspeksiya”ning vazifalari hisoblanadi:

neft mahsulotlari va gaz sotish hamda ulardan foydalanish boʻyicha qonun hujjatlari va boshqa normativ-huquqiy hujjatlarning bajarilishini nazorat qilish;

energiyani tejovchi davlat dasturlarini, neft, gaz, gaz kondensati va ularni qayta ishlash mahsulotlaridan foydalanish masalalari boʻyicha loyihalar va tadbirlarni amalga oshirish;

neft, gaz va gaz kondensatini qazib olish, qayta ishlash, uzatish, saqlash obyektlarini (qurilmalarini) montaj qilish va ulardan foydalanishda texnologiya talablariga rioya etilishini nazorat qilish;

neft mahsulotlari va gazdan foydalanish, ularni sotish, shuningdek neft, gaz va gaz kondensatini qazib olish, qayta ishlash, uzatish, saqlash obyektlarini (qurilmalarini) montaj qilish va ulardan foydalanish boʻyicha normativ hujjatlarni ishlab chiqish.

8. “Oʻzdavneftgazinspeksiya” oʻziga yuklangan vazifalarga muvofiq quyidagi funksiyalarni bajaradi:

yuridik shaxslar tomonidan neft mahsulotlari va gazdan foydalanilishini, ularning sotilishini, sifat va miqdor jihatidan saqlanishini, shuningdek neft, gaz va gaz kondensatini qazib olish, qayta ishlash, uzatish, saqlash obyektlarini (qurilmalarini) montaj qilish va ulardan foydalanishda texnologiya talablariga rioya etilishini belgilangan tartibda tekshiradi;

gazdan belgilangan maqsaddan tashqari foydalanilishiga yoʻl qoʻymaslik hamda mulkchilik shakllaridan qatʼi nazar, gaz isteʼmolchilari (aholidan tashqari) oʻzboshimchalik bilan oʻrnatib olgan gazdan foydalanish qurilmalarini aniqlash yuzasidan gaz sotuvchi tashkilotlar va gaz uzatish tashkilotlari ishlarini belgilangan tartibda nazorat qiladi;

yuridik shaxslarning yonilgʻi isteʼmol qiluvchi qurilmalarida ishga tushirish va rejim-sozlash ishlarini bajarish sifatini belgilangan tartibda tekshiradi;

energiyani tejovchi davlat dasturlarini, neft, gaz, gaz kondensati va ularni qayta ishlash mahsulotlaridan foydalanish masalalari boʻyicha loyihalar va tadbirlarni ishlab chiqishda qatnashadi va ularning amalga oshirilishini nazorat qiladi;

neft mahsulotlari va gazdan foydalanish, ularni sotish, shuningdek neft, gaz va gaz kondensatini qazib olish, qayta ishlash, uzatish, saqlash obyektlarini (qurilmalarini) montaj qilish va ulardan foydalanish boʻyicha zarur normativ hujjatlarni ishlab chiqishda qatnashadi, qonun hujjatlarida belgilangan hollarda ularga rozilik beradi;

“Oʻzdavneftgazinspeksiya” vakolatiga kiruvchi masalalar boʻyicha normativ hujjatlar va qoidalar yuzasidan ekspert xulosalar beradi hamda ularni kelishib oladi;

Vazirlar Mahkamasining yagona energetika tizimiga ulanadigan elektr stansiyalarida elektr ishlab chiqarish faoliyatini, neft, gaz hamda gaz kondensati qazib chiqarish, qayta ishlash va sotish, neft mahsulotlarini sotish, magistral gaz quvurlari, neft quvurlari va neft mahsulotlari quvurlarini loyihalashtirish, qurish, ulardan foydalanish va ularni taʼmirlash faoliyatini litsenziyalash komissiyalari ishida qatnashadi;

neft mahsulotlarini AYQSh va moy almashtirish shoxobchalari orqali sotish faoliyatini litsenziyalash boʻyicha hududiy komissiyalar ishchi organi funksiyalarini bajaradi;

neft-gaz tarmogʻi texnologik obyektlarining ishdan chiqish sabablarini tekshirish komissiyalarining ishida, koʻrsatib oʻtilgan obyektlar ishdan chiqishining oldini olish va ularning ishonchliligini oshirish tadbirlarini ishlab chiqishda qatnashadi;

yoqilgʻi isteʼmol qiluvchi korxonalar (qurilmalar), neft-gaz texnologiya obyektlari, neft va gaz quduqlari, neft bazalari, avtomobil yonilgʻisi quyish shoxobchalari (AYQSh), avtomobillarga kompressor vositasida gaz toʻldirish shoxobchalari (AKGTSh) va avtomobillarga gaz quyish shoxobchalarini (AGQSh) qurish, rekonstruksiya qilish, texnika bilan qayta jihozlash va gaz taʼminoti loyihalarini belgilangan texnologiya talablariga muvofiqligi jihatidan roʻyxatdan oʻtkazadi;

attestatsiya komissiyalari hamda neft-gaz texnologik obyektlarini, neft bazalarini, AYQSh, AKGTSh va AGQShlarni loyihalash, montaj qilish, sozlash va foydalanishga topshirishni amalga oshiruvchi xoʻjalik yurituvchi subyektlar muhandis-texnik xodimlarining normalar va qoidalarga doir bilimlarini tekshirish komissiyalari ishida qatnashadi;

qurilish, rekonstruksiya qilish, mukammal taʼmirlash tugallanganda yoqilgʻidan foydalanuvchi korxonalar va neft-gaz texnologik obyektlari (qurilmalar)ga asbob-uskunalarni kompleks sinab koʻrish, rejim-sozlash ishlari va tabiiy gaz vosita sifatida qoʻllanganda gaz quvurlarini tozalash ishlari uchun gaz uzatishga ruxsatnoma beradi.

qurilishi tugallangan neft-gaz texnologik obyektlari, neft va gaz quduqlari, neft bazalari, avtoyonilgʻi quyish shoxobchalari, avtomobillarga kompressor vositasida gaz toʻldirish shoxobchalari va avtomobillarga gaz toʻldirish shoxobchalarini texnik koʻrikdan oʻtkazadi va ularni foydalanishga qabul qilish komissiyalari ishida ishtirok etadi.

9. “Oʻzdavneftgazinspeksiya” oʻziga yuklangan vazifalar va funksiyalarni bajarish uchun quyidagi huquqlarga ega:

“Oʻzdavneftgazinspeksiya” vakolatiga kiruvchi masalalar boʻyicha yuridik shaxslar faoliyatini belgilangan tartibda tekshirish;

yuridik shaxslar tomonidan neft mahsulotlari va gazdan foydalanilishini, ularning sotilishini, sifat va miqdor jihatidan saqlanishini, shuningdek neft, gaz va gaz kondensatini qazib olish, qayta ishlash, uzatish, saqlash obyektlarini (qurilmalarini) montaj qilish va ulardan foydalanishda texnologiya talablariga rioya etilishini belgilangan tartibda nazorat qilish;

tekshirishlarga tegishli vazirliklar, idoralar, korxonalar, muassasalar va tashkilotlar mutaxassislarini jalb etish;

tekshirishlar davomida tekshirilayotgan obyektlarda aniqlangan buzilishlar va kamchiliklar boʻyicha bajarilishi majburiy boʻlgan yozma koʻrsatmalar berish;

turgʻun va koʻchma laboratoriyalarda neft mahsulotlari namunalari sifatini mustaqil ravishda tekshirish va tegishli xulosalar berish;

neft mahsulotlarini qabul qilish, saqlash, berish, hisobga olish, shuningdek neft omborxonasi uskunalarining texnik va metrologik holati qoidalarini qoʻpol ravishda buzish hollari aniqlanganda neft mahsulotlarini sotishni belgilangan tartibda toʻxtatib qoʻyish;

texnologik obyektlar qurilishini va ulardan foydalanishni, ularni loyihalash, qurish va ulardan foydalanishning amaldagi normalari va qoidalari buzilgan hollarda va bu buzilishlar ularning ishonchliligi pasayishiga olib kelsa, shuningdek qurilish buyurtmachining malakali texnika nazorati va mualliflik nazorati bilan taʼminlamaganda, toʻxtatib qoʻyish;

litsenziya talablari va shartlari buzilganligi uchun yuridik shaxslarning energetika tekshiruvlari va ekspertizalari oʻtkazish, neft, gaz hamda gaz kondensati qazib chiqarish, qayta ishlash va sotish, neft mahsulotlarini sotish, shuningdek magistral gaz quvurlari, neft quvurlari va neft mahsulotlari quvurlarini loyihalashtirish, qurish, ulardan foydalanish va ularni taʼmirlash faoliyatini amalga oshirish huquqini beruvchi litsenziyalarining amal qilishini toʻxtatib turish va toʻxtatish toʻgʻrisida litsenziyalovchi organlarga takliflar kiritish;

tekshirilayotgan obyektlarda, meʼyoriy-texnik hujjatlarning ushbu obyektlarning ishonchliligini va neft hamda gazdan foydalanishning samaradorligini taʼminlash boʻyicha tegishli talablariga mos kelmaydigan apparaturalar, asbob-uskunalar, materiallar va buyumlarni, shuningdek texnologiyalarni qoʻllashni taqiqlash. Ularni ishlab chiqarishdan olib tashlash toʻgʻrisida tegishli organlarga takliflar kiritish;

texnologik obyektlarni loyihalash, qurish va foydalanishning amaldagi normalari va qoidalaridan asosli chetga chiqishlarni, agar ushbu oʻzgartirishlar mazkur obyektlardan foydalanishning ishonchliligini pasaytirishga olib kelmasa, rozilik berish;

gaz sotuvchi, gaz uzatuvchi tashkilotlarga quyidagi hollarda:

a) “Oʻzdavneftgazinspeksiya”ning ruxsatisiz gaz berilganda;

b) gaz sarfini hisobga olish priborlari boʻlmagan gazdan foydalanish qurilmalaridan foydalanilganda yoxud gazdan foydalanuvchi qurilmalarda loyihada nazarda tutilgan gaz yonishi jarayonlarini avtomatik boshqarish vositalari yoki issiqlik-texnika nazorati yoki gazdan samarali foydalanishni taʼminlovchi issiqlikdan qayta foydalanish asbob-uskunalari boʻlmaganda (buzilganda);

v) gazdan foydalanish qurilmalarini ishga tushirish va rejim-sozlash ishlarini oʻtkazish muddatlari buzilganda gazdan foydalanuvchi qurilmalarga gaz berishni toʻxtatish toʻgʻrisida bajarilishi majburiy boʻlgan yozma koʻrsatmalar berish;

yoqilgʻi-energetika resurslaridan foydalanishda buzilishlar uchun yuridik shaxslarga nisbatan, ularning qaysi idoraga qarashliligidan va mulkchilik shakllaridan qatʼi nazar, Oʻzbekiston Respublikasi qonun hujjatlari bilan berilgan oʻz vakolatlari doirasida iqtisodiy jazolar qoʻllash;

“Oʻzdavneftgazinspeksiya” vakolatiga tegishli masalalar boʻyicha vazirliklar, idoralar, mahalliy davlat hokimiyati organlari, tashkilotlar va korxonalardan zarur maʼlumotlar va materiallar olish;

vazirliklar, idoralar, tashkilotlar va korxonalar rahbarlarining “Oʻzdavneftgazinspeksiya” vakolatiga kiruvchi masalalar boʻyicha hisobotlarini eshitish;

neft mahsulotlari va gazdan foydalanish, ularni sotish, shuningdek neft, gaz va gaz kondensatini qazib olish, qayta ishlash, tashish, saqlash obyektlarini (qurilmalarini) montaj qilish va ularni ishlatish boʻyicha zarur normativ-texnik hujjatlarni ishlab chiqish toʻgʻrisida yozma koʻrsatmalar berish;

normativ-metodik hujjatlarni ekspertizadan oʻtkazish uchun mustaqil ekspertlarni hamda ilmiy-tadqiqot, auditorlik, maslahat tashkilotlari va boshqa tashkilotlarning mutaxassislarini belgilangan tartibda jalb qilish;

“Oʻzdavneftgazinspeksiya” vakolatiga kiruvchi masalalar boʻyicha belgilangan tartibda normativ-huquqiy hujjatlar qabul qilish.

10. “Oʻzdavneftgazinspeksiya”ning qarorlari, shuningdek “Oʻzdavneftgazinspeksiya”ga berilgan vakolatlar doirasida qabul qilingan normativ-huquqiy hujjatlar vazirliklar, davlat qoʻmitalari, idoralar, mahalliy davlat hokimiyati organlari, korxonalar, muassasalar, tashkilotlar, mansabdor shaxslar va fuqarolar tomonidan bajarilishi majburiydir.

“Oʻzdavneftgazinspeksiya”, zarur hollarda, boshqa vazirliklar, davlat qoʻmitalari va idoralar bilan qoʻshma qarorlar va boshqa hujjatlar qabul qilishga haqlidir.

11. “Oʻzdavneftgazinspeksiya” oʻziga yuklangan vazifalarning samarali bajarilishi uchun javob beradi.

“Oʻzdavneftgazinspeksiya” va uning hududiy boʻlimlari mansabdor shaxslari xatti-harakatlari ustidan shikoyat qilish qonun hujjatlariga muvofiq amalga oshiriladi.

“Oʻzdavneftgazinspeksiya” mansabdor shaxslari oʻz xizmat vazifalarini zarur darajada bajarmaganliklari uchun qonun hujjatlarida belgilangan tartibda javob beradilar.

12. “Oʻzdavneftgazinspeksiya”ga qonun hujjatlarida belgilangan tartibda lavozimga tayinlanadigan va lavozimdan ozod qilinadigan boshliq boshchilik qiladi.

Boshliqning qonun hujjatlarida belgilangan tartibda lavozimga tayinlanadigan va lavozimdan ozod qilinadigan ikki nafar oʻrinbosari boʻladi.

“Oʻzdavneftgazinspeksiya” boshligʻi maqomiga koʻra Oʻzbekiston Respublikasi vazirining birinchi oʻrinbosariga, boshliq oʻrinbosarlari — Oʻzbekiston Respublikasi vaziri oʻrinbosarlariga tenglashtiriladi.

13. “Oʻzdavneftgazinspeksiya” xodimlari maqomiga koʻra “Oʻzbekneftgaz” milliy xolding kompaniyasi xodimlarining tegishli toifalariga tenglashtiriladi.

14. “Oʻzdavneftgazinspeksiya” boshligʻi:

“Oʻzdavneftgazinspeksiya” faoliyatiga yakkaboshchilik asosida umumiy rahbarlik qiladi, “Oʻzdavneftgazinspeksiya”ga yuklangan vazifalar va funksiyalarning bajarilishi uchun shaxsan javob beradi;

“Oʻzdavneftgazinspeksiya” tuzilmasiga xodimlarning shtatda belgilangan soni va mehnatga haq toʻlash fondi doirasida oʻzgartirishlar kiritadi;

“Oʻzdavneftgazinspeksiya” tarkibiy boʻlinmalari toʻgʻrisidagi nizomlarni belgilangan tartibda tasdiqlaydi;

“Oʻzdavneftgazinspeksiya” xodimlarini belgilangan tartibda lavozimga tayinlaydi va lavozimdan ozod qiladi;

qonun hujjatlariga muvofiq boshqa vakolatlarni amalga oshiradi.

15. “Oʻzdavneftgazinspeksiya” boshligʻi lavozimiga koʻra ayni bir vaqtda Neft mahsulotlari va gazdan foydalanishni nazorat qilish Bosh davlat inspektori, uning oʻrinbosarlari esa Bosh davlat inspektori oʻrinbosarlari hisoblanadi. Bosh texnologlar va bosh mutaxassislar katta davlat inspektorlari hisoblanadilar. Muhandislar davlat inspektorlari hisoblanadilar.

16. “Oʻzdavneftgazinspeksiya”ni qayta tashkil etish va tugatish qonun hujjatlarida belgilangan tartibda amalga oshiriladi.