O‘zbekiston Respublikasi Prezidentining “Ichki ishlar organlari xodimlarini tayyorlash, qayta tayyorlash va malakasini oshirish tizimini tubdan takomillashtirish chora-tadbirlari to‘g‘risida” 2017-yil 16-avgustdagi PQ-3216-son qaroriga muvofiq, shuningdek ichki ishlar organlari xodimlarini tayyorlashning kadrlar salohiyatini oshirish imkonini beradigan sifat jihatdan yangi tizimini joriy etish maqsadida Vazirlar Mahkamasi qaror qiladi:

1. O‘zbekiston Respublikasi Ichki ishlar vazirligi Akademiyasida o‘quv yuklamasining hajmi ilovaga muvofiq tasdiqlansin.

2. Mazkur qarorning bajarilishini nazorat qilish O‘zbekiston Respublikasi ichki ishlar vaziri P.R. Bobojonov zimmasiga yuklansin.

Barcha turdagi auditoriya va auditoriyadan tashqari o‘quv ishlarini o‘z ichiga olgan o‘quv yuklamasining eng yuqori hajmi haftasiga 54 soat qilib belgilanadi. Ishlab chiqarishdan ajralgan holda (kunduzgi) o‘qish shakli uchun auditoriya mashg‘ulotlari va ilmiy faoliyatning eng yuqori hajmi haftasiga 36 soat qilib belgilanishi lozim.

O‘qishning normativ muddati uch yil bo‘lgani holda o‘quv jarayoni 152 hafta davom etishi zarur.

O‘qish davrining umumiy hajmi quyidagicha taqsimlanadi:

nazariy va amaliy ta’lim — 63 — 70%;

attestatsiya — 8 — 10%;

ta’til — 8 — 16%;

malakaviy amaliyot — 6 — 18%;

bitiruv malakaviy (ilmiy-tadqiqot) ishi — 2 — 5%.

Nazariy va amaliy ta’lim hajmi fanlar bloklari bo‘yicha quyidagicha taqsimlanadi:

gumanitar va ijtimoiy-iqtisodiy fanlar — 10 — 15%;

matematik va tabiiy-ilmiy fanlar — 5 — 15%;

umumkasbiy fanlar — 35 — 50%;

ixtisoslik fanlari — 30 — 40%;

qo‘shimcha fanlar — 5 — 9%.

Ta’lim yo‘nalishi bo‘yicha fan, texnika va texnologiyalarning zamonaviy yutuqlari, kadrlar buyurtmachilari talablaridan kelib chiqqan holda o‘quv davrining umumiy hajmi taqsimotiga hamda nazariy ta’lim davri hajmining fanlar bloklari bo‘yicha taqsimotiga O‘zbekiston Respublikasi Ichki ishlar vazirligi Akademiyasi ilmiy kengashining qarori asosida 5 foizgacha o‘zgartirish kiritilishi mumkin.