Oʻzbekiston Respublikasi Prezidentining “Oʻzbekiston Respublikasi Vazirlar Mahkamasi huzuridagi Oʻzbekistonga oid xorijdagi madaniy boyliklarni tadqiq etish markazini tashkil etish toʻgʻrisida” 2017-yil 20-iyundagi PQ-3074-son qarori ijrosini taʼminlash maqsadida Vazirlar Mahkamasi qaror qiladi:

1. Quyidagilar:

Oʻzbekiston Respublikasi Vazirlar Mahkamasi huzuridagi Oʻzbekistonga oid xorijdagi madaniy boyliklarni tadqiq etish markazi toʻgʻrisida nizom 1-ilovaga muvofiq;

Oʻzbekistonga oid xorijdagi madaniy boyliklarni tadqiq etish ishlarini muvofiqlashtirish boʻyicha respublika komissiyasi toʻgʻrisidagi nizom 2-ilovaga muvofiq tasdiqlansin.

2. Oʻzbekiston Respublikasi Vazirlar Mahkamasi huzuridagi Oʻzbekistonga oid xorijdagi madaniy boyliklarni tadqiq etish markazi (keyingi oʻrinlarda Markaz deb ataladi), Davlat arxitektura va qurilish qoʻmitasi hamda Toshkent shahar hokimligining Markaz joylashgan binoning tegishli xonalarini mukammal taʼmirlash boʻyicha:

buyurtmachi etib Toshkent shahar hokimligining “Yagona buyurtmachi xizmati” injiniring kompaniyasini belgilash;

bosh loyihachi va bosh pudratchi tashkilotlarni qonun hujjatlarida belgilangan tartibda tanlov savdolari asosida aniqlash toʻgʻrisidagi takliflariga rozilik berilsin.

3. Oʻzbekiston Respublikasi Davlat arxitektura va qurilish qoʻmitasi ishlab chiqilgan loyiha-smeta hujjatlarini belgilangan tartibda davlat ekspertizasidan oʻtkazsin hamda mukammal taʼmirlash ishlarining sifatli bajarilishi yuzasidan davlat arxitektura-qurilish nazoratini oʻrnatsin.

4. Markaz:

ikki oy muddatda Oʻzbekiston Respublikasi Fanlar akademiyasi va Madaniyat vazirligi bilan birgalikda Markazning moddiy-texnika bazasini mustahkamlash, yuqori malakali kadrlar bilan toʻldirish, Oʻzbekistonga oid xorijdagi madaniy boyliklarni tadqiq etish sohasida qonun hujjatlarini takomillashtirish yuzasidan kompleks chora-tadbirlar rejasini ishlab chiqsin va oʻrnatilgan tartibda Oʻzbekistonga oid xorijdagi madaniy boyliklarni tadqiq etish ishlarini muvofiqlashtirish boʻyicha respublika komissiyasiga tasdiqlash uchun kiritsin;

2017-yilgi xarajatlar smetasini hamda shtatlar jadvalini ishlab chiqib, oʻrnatilgan tartibda Oʻzbekiston Respublikasi Moliya vazirligida roʻyxatdan oʻtkazilishini taʼminlasin.

5. Mazkur qarorning ijrosini nazorat qilish Oʻzbekiston Respublikasi Vazirlar Mahkamasining Taʼlim, ilm-fan va yoshlar siyosati masalalari axborot-tahlil departamentiga yuklansin.

1. Ushbu Nizom Oʻzbekiston Respublikasi Vazirlar Mahkamasi huzuridagi Oʻzbekistonga oid xorijdagi madaniy boyliklarni tadqiq etish markazining (keyingi oʻrinlarda Markaz deb ataladi) asosiy vazifalari, funksiyalari, huquq va javobgarligini, shuningdek uning faoliyatini tashkil etish tartibini belgilaydi.

2. Markaz oʻz faoliyatini Oʻzbekiston Respublikasi Konstitutsiyasi va qonunlariga, Oʻzbekiston Respublikasi Oliy Majlisi palatalarining qarorlariga, Oʻzbekiston Respublikasi Prezidentining farmonlari, qarorlari va farmoyishlariga, Oʻzbekiston Respublikasi Vazirlar Mahkamasining qarorlari va farmoyishlariga, ushbu Nizomga va boshqa qonun hujjatlariga muvofiq amalga oshiradi.

3. Markaz oʻz faoliyatida Oʻzbekistonga oid xorijdagi madaniy boyliklarni tadqiq etish ishlarini muvofiqlashtirish boʻyicha respublika komissiyasiga (keyingi oʻrinlarda Komissiya deb ataladi) hisobot beradi.

4. Markaz oʻz faoliyatini davlat va xoʻjalik boshqaruvi organlari, mahalliy davlat hokimiyati organlari, nodavlat notijorat tashkilotlari, xorijiy va xalqaro hamda boshqa tashkilotlar bilan hamkorlikda amalga oshiradi.

5. Markaz Oʻzbekiston Respublikasi Vazirlar Mahkamasining Taʼlim, ilm-fan va yoshlar siyosati masalalari axborot-tahlil departamenti mutasaddiligida faoliyat yuritadi.

6. Markaz yuridik shaxs hisoblanadi, Oʻzbekiston Respublikasining Davlat gerbi tasviri tushirilgan va oʻz nomi yozilgan muhr va blankalarga, mustaqil balansga, bank, jumladan xorijiy valyutalardagi hisob raqamlariga va Oʻzbekiston Respublikasi Moliya vazirligining Gʻaznachiligida hisob raqamlariga ega boʻladi.

7. Markaz Komissiyaning ishchi organi hisoblanadi.

8. Quyidagilar Markazning asosiy vazifalari hisoblanadi:

milliy va xorijiy mutaxassislarni jalb etgan holda, chet ellarda saqlanayotgan, mamlakatimiz tarixi va madaniyatiga oid madaniy boyliklarni aniqlash, ularning toʻliq maʼlumotlar bazasi — reyestrini yaratish va uni muntazam yangilab borish, shuningdek, ana shu tarixiy eksponatlarning asl yoki koʻchirma nusxalarini, foto va videotasvirlarini yurtimizga olib kelish, tegishli ilmiy markazlar, xususan, Abu Rayhon Beruniy nomidagi Sharqshunoslik instituti bilan birgalikda ilmiy tadqiqotlar olib borib, erishilgan natijalarni ilmiy muomalaga kiritish borasidagi ishlarni muvofiqlashtirish;

faoliyat yoʻnalishi boʻyicha xorijiy davlatlardagi muzey va fondlar, arxivlar, ilmiy-madaniy muassasalar bilan oʻzaro madaniy aloqalarni yoʻlga qoʻyish, turli anjumanlar, konferensiya va koʻrgazmalar tashkil etish;

chet mamlakatlarda saqlanayotgan madaniy boyliklarni yurtimizga qaytarish yuzasidan muzokaralar olib borish va zarur chora-tadbirlar koʻrish, bu borada xalqaro miqyosdagi ilgʻor tajribani oʻrganish va amaliyotga joriy etish;

madaniy boyliklarning olib kirilishi va olib chiqilishi toʻgʻrisidagi qonun hujjatlariga rioya qilinishi va samarali bajarilishini tahlil qilish, ularni takomillashtirish boʻyicha takliflar ishlab chiqish, shuningdek, xalqaro shartnomalar va umumeʼtirof etilgan normalarni milliy qonunchiligimiz nuqtai nazaridan atroflicha oʻrganish;

xorijdagi mamlakatimiz tarixi va madaniyatiga oid madaniy boyliklarni ommaviy axborot vositalarida, jumladan, global Internet tarmogʻida keng yoritish, ular haqidagi bibliografik toʻplamlar, kataloglar, kitob-albomlar va boshqa matbaa mahsulotlarini turli tillarda nashr etib borish;

toʻplangan materiallarni mamlakatimiz va jahon miqyosida ilmiy muomalaga kiritish.

9. Markaz oʻziga yuklatilgan vazifalarni bajarish uchun quyidagi funksiyalarni amalga oshiradi:

a) milliy va xorijiy mutaxassislarni jalb etgan holda, chet ellarda saqlanayotgan, mamlakatimiz tarixi va madaniyatiga oid madaniy boyliklarni aniqlash, ularning toʻliq maʼlumotlar bazasi — reyestrini yaratish va uni muntazam yangilab borish, shuningdek, ana shu tarixiy eksponatlarning asl yoki koʻchirma nusxalarini, foto va videotasvirlarini yurtimizga olib kelish, tegishli ilmiy markazlar, xususan, Abu Rayhon Beruniy nomidagi Sharqshunoslik instituti bilan birgalikda ilmiy tadqiqotlar olib borib, erishilgan natijalarni ilmiy muomalaga kiritish borasidagi ishlarni muvofiqlashtirish sohasida:

mamlakatimiz tarixi va madaniyatiga oid madaniy boyliklarni aniqlash, ularning toʻliq maʼlumotlar bazasi — reyestrini yaratish va uni muntazam ravishda yangilab borish;

mamlakatimiz tarixi va madaniyatiga oid madaniy boyliklarga oid tarixiy eksponatlarning asl yoki koʻchirma nusxalarini, foto va videotasvirlarini yurtimizga olib kelish ishlarini hayotga tatbiq etish;

mamlakatimiz tarixi va madaniyatiga oid yurtimizga olib kelingan madaniy boyliklarni aks ettiruvchi eksponatlarning asl yoki koʻchirma nusxalarini, foto va videotasvirlarini, tegishli ilmiy muassasa hamda markazlar, xususan, Abu Rayhon Beruniy nomidagi Sharqshunoslik instituti bilan birgalikda ilmiy tadqiqotlarni olib borish;

Markazning ilmiy tadqiqotlari natijalari yuzasidan hisobotlarni tayyorlash va ularni Komissiyaga taqdim etilishini taʼminlash;

Markazning ilmiy tadqiqotlari natijalarini axborot byulletenlari va boshqa rasmiy nashrlarda chop etilishini tashkil etish;

b) faoliyat yoʻnalishi boʻyicha xorijiy davlatlardagi muzey va fondlar, arxivlar, ilmiy-madaniy muassasalar bilan oʻzaro madaniy aloqalarni yoʻlga qoʻyish, turli anjumanlar, konferensiya va koʻrgazmalar tashkil etish sohasida:

xorijiy mamlakatlar muzey va fondlari, arxivlari, ilmiy-madaniy muassasalari bilan, jumladan, qoʻshimcha ilmiy loyihalarni bajarish orqali xalqaro ilmiy-madaniy hamkorlikning samarali shakllari va yoʻnalishlarini rivojlantirish;

Markaz xodimlarini xorijdagi yetakchi ilmiy-madaniy va taʼlim muassasalarida oʻqishini, tajriba orttirishini, malakasini oshirishni tashkil etish;

oʻzaro tajriba almashish, ish usullari va yangi ilmiy-tadqiqotlarni yoʻlga qoʻyish hamda yosh ilmiy-madaniy kadrlarni tayyorlash uchun yetakchi xorijiy olimlarning jalb etilishini taʼminlash;

xorijiy ilmiy-madaniy va oliy taʼlim muassasalari bilan hamkorlikdagi ilmiy tadqiqotlarni bajarish uchun xorijiy tashkilotlar va jamgʻarmalarning xalqaro ilmiy grantlarini jalb etilishini taʼminlash;

mamlakatimiz tarixi va madaniyatiga oid madaniy boyliklarni tadqiq etish asnosida olingan maʼlumotlarni ilm ahliga yetkazishda hamda buyuk mutaffakirlar, mashhur fan va adabiyot arboblari sharafiga bagʻishlangan xalqaro ilmiy, ilmiy-madaniy kongresslar, konferensiyalar, simpoziumlar, seminarlarni tashkil etish va oʻtkazishda, shuningdek, xalqaro ilmiy va madaniy jurnallarning tahrir hayʼatlari ishlarida ishtirok etish;

v) chet mamlakatlarda saqlanayotgan madaniy boyliklarni yurtimizga qaytarish yuzasidan muzokaralar olib borish va zarur chora-tadbirlar koʻrish, bu borada xalqaro miqyosdagi ilgʻor tajribani oʻrganish va amaliyotga joriy etish sohasida:

Oʻzbekiston Respublikasi Tashqi ishlar vazirligi bilan hamkorlikda chet mamlakatlarda saqlanayotgan madaniy boyliklarni aniqlash, ular saqlanayotgan tashkilotlar bilan ilmiy aloqalar oʻrnatish hamda mazkur boyliklarni yurtimizga qaytarish yuzasidan xorijdagi mutasaddi muassasa va tashkilotlarni aniqlash ishlarini amalga oshirish;

Oʻzbekiston Respublikasi Tashqi ishlar vazirligi bilan hamkorlikda va uning yordamida chet mamlakatlarda saqlanayotgan madaniy boyliklarni yurtimizga qaytarish yuzasidan muzokaralar olib borish uchun zarur chora-tadbirlar koʻrish;

chet mamlakatlarda saqlanayotgan madaniy boyliklarni yurtimizga qaytarish yuzasidan muzokaralar olib borish va zarur chora-tadbirlar koʻrishda xalqaro miqyosdagi ilgʻor tajribani oʻrganish va amaliyotga joriy etish;

zarurat tugʻilgan holda xalqaro miqyosdagi ilgʻor tajriba asosida chet mamlakatlarda saqlanayotgan madaniy boyliklarni yurtimizga qaytarish boʻyicha chora-tadbirlar koʻrish borasida Komissiyaga tegishli takliflar kiritadi;

g) madaniy boyliklarning olib kirilishi va olib chiqilishi toʻgʻrisidagi qonun hujjatlariga rioya qilinishi va samarali bajarilishini tahlil qilish, ularni takomillashtirish boʻyicha takliflar ishlab chiqish, shuningdek, xalqaro shartnomalar va umumeʼtirof etilgan normalarni milliy qonunchiligimiz nuqtai nazaridan atroflicha oʻrganish sohasida:

madaniy boyliklarni olib kirilishi va olib chiqilishi toʻgʻrisidagi qonun hujjatlariga rioya qilinishi va samarali bajarilishini tahlil qilish ishlarini amalga oshirish;

madaniy boyliklarni olib kirilishi va olib chiqilishi toʻgʻrisidagi qonun hujjatlariga rioya qilinishi va samarali bajarilishini tahlili natijasida, vaziyat taqozo etgani hollarda, ularni takomillashtirish boʻyicha takliflar kiritish;

madaniy boyliklarni olib kirilishi va olib chiqilishi toʻgʻrisidagi qonun hujjatlari, xalqaro shartnomalar va umumeʼtirof etilgan normalarni milliy qonunchiligimiz nuqtai nazaridan atroflicha oʻrganish;

d) xorijdagi mamlakatimiz tarixi va madaniyatiga oid madaniy boyliklarni ommaviy axborot vositalarida, jumladan, global Internet tarmogʻida keng yoritish, ular haqidagi bibliografik toʻplamlar, kataloglar, kitob-albomlar va boshqa matbaa mahsulotlarini turli tillarda nashr etib borish sohasida:

xorijdagi mamlakatimiz tarixi va madaniyatiga oid madaniy boyliklarni respublika ommaviy axborot vositalarida keng yoritishni amalga oshirish;

xorijdagi mamlakatimiz tarixi va madaniyatiga oid madaniy boyliklar va ularning ilmiy tahlilini global Internet tarmogʻida keng yoritish ishlarini tashkil etish va amalga oshirish;

xorijdagi mamlakatimiz tarixi va madaniyatiga oid madaniy boyliklarni chuqur ilmiy oʻrganish asnosida olingan ilmiy maʼlumotlar va ularning tahliliy natijalariga oid bibliografik toʻplamlar, kataloglar, kitob-albomlar va boshqa matbaa mahsulotlarini turli tillarda nashr etish ishlarini amalga oshiradi;

e) toʻplangan materiallarni mamlakatimiz va jahon miqyosida ilmiy muomalaga kiritish sohasida:

xorijdagi mamlakatimiz tarixi va madaniyatiga oid madaniy boyliklarni chuqur ilmiy oʻrganish asnosida olingan ilmiy maʼlumotlar va ularning tahliliy natijalarini keng targʻib etish maqsadida ilmiy va ilmiy-amaliy konferensiyalarni uyushtirish;

xorijdagi mamlakatimiz tarixi va madaniyatiga oid madaniy boyliklarni tadqiq etishga oid respublika va xorijdagi turli darajalardagi konferensiyalarda qatnashish;

Oʻzbekiston Milliy teleradiokompaniyasi bilan hamkorlikda xorijdagi mamlakatimiz tarixi va madaniyatiga oid madaniy boyliklarga bagʻishlangan turkum koʻrsatuvlarni tayyorlash.

Markaz qonunchilikka muvofiq boshqa funksiyalarni ham amalga oshiradi.

10. Markaz oʻziga yuklatilgan vazifalar va funksiyalarni bajarish uchun quyidagi huquqlarga ega:

davlat va xoʻjalik boshqaruvi organlaridan, mahalliy davlat hokimiyati organlaridan va xoʻjalik yurituvchi subyektlardan oʻz vakolatiga kiruvchi masalalarni hal etishga doir maʼlumotlarni belgilangan tartibda soʻrash va olish;

oʻz vakolati doirasida konferensiyalar, seminarlar va boshqa tadbirlar oʻtkazish hamda boshqa tashkilotlar oʻtkazadigan tadbirlarda ishtirok etish;

oʻz xodimlarining ijtimoiy himoyasi boʻyicha chora-tadbirlarni amalga oshirish;

ilmiy-tadqiqot ishlariga respublikadagi va xorijdagi mutaxassislarni shartnoma asosida jalb qilish;

Komissiya bilan kelishilgan holda Markaz xodimlari va jalb qilingan mutaxassislarni xorijiy ilmiy-tadqiqot hamda taʼlim muassasalariga ilmiy tadqiqotlarni amalga oshirishi uchun yuborish;

Markaz faoliyatini takomillashtirish masalalari boʻyicha takliflarni Komissiya majlisi muhokamasiga qoʻyish;

Komissiya raisi bilan kelishilgan holda Markazning shtat jadvalini belgilangan tartibda tasdiqlash;

Markazda xodimlarning moddiy ragʻbatlantirish fondini tuzish;

moddiy-texnikaviy bazani rivojlantirish va asosiy fondlar rekonstruksiya va taʼmirlash ishlarini amalga oshirish yuzasidan Oʻzbekiston Respublikasi Vazirlar Mahkamasiga tegishli takliflar kiritish.

Markaz qonun hujjatlariga muvofiq boshqa huquqlarga ham ega boʻlishi mumkin.

11. Markaz oʻziga yuklatilgan vazifalar va funksiyalarning samarali bajarilishi uchun budjetdan ajratiladigan mablagʻlar va uning ixtiyoridagi boshqa mablagʻlardan maqsadli foydalanilishi uchun javob beradi.

12. Markazga belgilangan tartibda Vazirlar Mahkamasi tomonidan lavozimga tayinlanadigan va lavozimdan ozod etiladigan direktor boshchilik qiladi.

Direktorning Vazirlar Mahkamasi tomonidan lavozimga tayinlanadigan va lavozimdan ozod qilinadigan bir nafar oʻrinbosari boʻladi.

13. Markaz direktori:

Markaz faoliyatiga umumiy rahbarlikni amalga oshiradi hamda Markazga yuklangan vazifalar va funksiyalarning bajarilishi uchun shaxsan javob beradi;

davlat va xoʻjalik boshqaruvi organlarida va boshqa tashkilotlarda, shuningdek, xalqaro tashkilotlar va xorijiy mamlakatlar vakillari ishtirokida oʻtkaziladigan rasmiy tadbirlarda Markaz nomidan vakillik qiladi;

Markaz vakolatiga kiruvchi masalalar boʻyicha qarorlar qabul qiladi va Markazga yuklangan vazifalar va funksiyalarning bajarilishi uchun shaxsan javob beradi;

Markazning ilmiy-tadqiqot va boshqa jarayonlarni tashkil etish, ilmiy tadqiqotlarni rejalashtirish, manfaatdor ilmiy va oʻquv idoralari, muassasalar va tashkilotlar bilan hamkorlik qilishning barcha masalalari yuzasidan qarorlar qabul qiladi, ilmiy va uslubiy maʼlumotlar va axborotlarni muhokama qiladi, ilmiy ishlarni nashr qilish va saqlashga tavsiya etadi, ilmiy va faxriy unvonlarni berish toʻgʻrisida iltimosnomalar beradi;

aniq maqsadga yoʻnaltirilgan dastur va tanlov mavzularini, shuningdek, alohida topshiriq va buyurtmalarni amalga oshirish maqsadida Markazda vaqtinchalik tadqiqot guruhini tashkil etadi;

Markazda ijro intizomi holati boʻyicha bevosita rahbarlikni amalga oshiradi;

oʻzining oʻrinbosari va Markaz xodimlarining vakolatlari, majburiyatlari va shaxsiy javobgarligi darajasini belgilaydi;

Markaz boʻlimlari nizomini va Markaz xodimlarining lavozim yoʻriqnomalarini belgilangan tartibda tasdiqlaydi;

oʻz vakolati doirasida xodimlarni qonun hujjatlarida belgilangan tartibda lavozimga tayinlaydi va lavozimdan ozod qiladi;

zarurat tugʻilgan hollarda, Markazning tarkibiy tuzilmasiga xodimlarning belgilangan umumiy cheklangan soni doirasida oʻzgartirishlar kiritadi;

oʻz vakolati doirasida Markaz xodimlari tomonidan bajarish uchun majburiy boʻlgan buyruqlar qabul qiladi;

lavozimiga koʻra Komissiyaning masʼul kotibi hisoblanadi;

Markazga yuklatilgan maqsad va vazifalarning bajarilishi, xodimlar bilan tuzilgan shartnomalar, rejalarning bajarilishi va natijalari, ilm-fan va texnikaviy yutuqlarni jalb qilish chora-tadbirlari hamda Markaz va maʼmuriyatning boshqa faoliyati yuzasidan Komissiya oldida hisobot beradi.

Direktor qonun hujjatlariga muvofiq boshqa vakolatlarni ham amalga oshiradi.

14. Markaz direktori vaqtincha yoʻqligida uning vazifalarini uning oʻrinbosari bajaradi.

15. Markaz direktorining oʻrinbosari:

boʻlimlarga bevosita rahbarlik qiladi va Markazga yuklangan vazifalar va funksiyalarning bajarilishi hamda boʻlimlarda ijro intizomi holati uchun shaxsan javob beradi;

oʻziga biriktirilgan masalalar boʻyicha hujjatlar loyihasini va materiallarni oʻz vaqtida va sifatli tayyorlashni tashkil etadi, topshiriqlarning bajarilishi yuzasidan nazoratni taʼminlaydi;

Markaz ish rejasida, shuningdek mutaxassislarning shaxsiy ish rejalarida nazarda tutilgan tadbirlarni talab qilinadigan davr mobaynida amalga oshirish va muvofiqlashtirishni taʼminlaydi hamda oʻrganilgan masalalarning tanqidiy tahlili asosida Markaz direktoriga muhokama uchun takliflar kiritadi;

Vazirlar Mahkamasi yigʻilishlarida muhokama qilishga biriktirilgan masalalar boʻyicha materiallar tayyorlash uchun boʻlim boshliqlari va mutaxassislar bilan majlislar oʻtkazadi;

Markaz direktoriga tegishli mutaxassislar majburiyatlarini taqsimlash boʻyicha takliflar kiritadi;

Markaz direktoriga boʻlimlar xodimlarini lavozimga tayinlash va lavozimdan ozod qilish, ularning malakasini oshirish, ularni mukofotlash va intizomiy javobgarlikka tortish boʻyicha takliflar kiritadi;

vazifalar taqsimotiga koʻra boshqa tegishli vakolatlarni ham amalga oshiradi.

16. Markaz xodimlariga Oʻzbekiston Respublikasi Fanlar akademiyasi ilmiy-tadqiqot muassasalarining tegishli lavozimlari uchun belgilangan mehnatga haq toʻlash va moddiy ragʻbatlantirish shartlari qoʻllanadi.

17. Quyidagilar Markaz faoliyatini moliyalashtirishning asosiy manbalari hisoblanadi:

Oʻzbekiston Respublikasining Davlat budjeti mablagʻlari;

davlat buyurtmasi asosida ilmiy tadqiqotlarni bajarish uchun Oʻzbekiston Respublikasi Fan va texnologiyalar agentligi tomonidan ajratiladigan maqsadli grant mablagʻlari;

Markaz mutaxassislari va boshqa tashkilotlardan jalb qilinadigan ekspertlarni xorijiy davlatlarga xizmat safarlariga yuborish va chet ellik mutaxassislar (ekspertlar)ni jalb etish xarajatlari va Markaz faoliyati bilan bogʻliq boshqa xarajatlar uchun tadbirkorlik faoliyatidan, jumladan, noshirlik faoliyatidan tushadigan mablagʻlar, xalqaro moliyaviy institutlar, xorijiy tashkilotlar, donor mamlakatlar va tashkilotlarning grantlari, shuningdek, homiylik xayriyalari va qonun hujjatlarida taqiqlanmagan boshqa manbalar.

18. Markazni qayta tashkil etish va tugatish qonun hujjatlarida belgilangan tartibda amalga oshiriladi.

1. Ushbu Nizom Oʻzbekistonga oid xorijdagi madaniy boyliklarni tadqiq etish ishlarini muvofiqlashtirish boʻyicha respublika komissiyasining (keyingi oʻrinlarda Komissiya deb ataladi) faoliyatini tashkil etishni, vazifalari, funksiyalari va huquqlarini belgilaydi.

2. Komissiya Oʻzbekiston Respublikasi Vazirlar Mahkamasi huzuridagi kollegial organ hisoblanadi.

3. Komissiya oʻz faoliyatini Oʻzbekiston Respublikasi Konstitutsiyasi va qonunlariga, Oʻzbekiston Respublikasi Oliy Majlisi palatalarining qarorlariga, Oʻzbekiston Respublikasi Prezidentining farmonlari, qarorlari va farmoyishlariga, Oʻzbekiston Respublikasi Vazirlar Mahkamasining qarorlari va farmoyishlariga, ushbu Nizomga va boshqa qonun hujjatlariga muvofiq amalga oshiradi.

4. Komissiyasining oʻz vakolatlari doirasida qabul qilgan qarorlari davlat va xoʻjalik boshqaruvi organlari, mahalliy davlat hokimiyati organlari va boshqa tashkilotlar tomonidan bajarilishi majburiy hisoblanadi.

5. Oʻzbekiston Respublikasi Vazirlar Mahkamasi huzuridagi Oʻzbekistonga oid xorijdagi madaniy boyliklarni tadqiq etish markazi (keyingi oʻrinlarda Markaz deb ataladi) Komissiyaning ishchi organi hisoblanadi.

6. Quyidagilar Komissiyaning asosiy vazifalari hisoblanadi:

Markaz tomonidan mamlakatimiz tarixi va madaniyatiga oid xorijdagi madaniy boyliklarni tadqiq etish yuzasidan olib boriladigan ilmiy-tadqiqot ishlarini muvofiqlashtirish;

Markazning yillik faoliyat rejasini tasdiqlash va uning amalga oshirilishi uchun koʻmaklashish, shuningdek, zaruratdan kelib chiqqan holda, Markazga yuklangan asosiy vazifalar ijrosini taʼminlash maqsadida, Markazning taklifiga asosan uning mutaxassislari va boshqa tashkilotlardan Markazga jalb qilinadigan ekspertlarni xorijiy davlatlarga safarlarga joʻnatish ishlarini muvofiqlashtirish;

har chorak yakuni boʻyicha Markaz hisobotlarini eshitish, uning faoliyati samarasi va natijadorligini baholash;

mamlakatimiz tarixi va madaniyatiga oid xorijdagi madaniy boyliklarni tadqiq etish boʻyicha davlat va xoʻjalik boshqaruvi organlari faoliyatini muvofiqlashtirish va bu borada zarur chora-tadbirlarni amalga oshirish.

7. Komissiya oʻziga yuklatilgan vazifalarni bajarish uchun quyidagi funksiyalarni amalga oshiradi:

a) Markaz tomonidan mamlakatimiz tarixi va madaniyatiga oid xorijdagi madaniy boyliklarni tadqiq etish yuzasidan olib boriladigan ilmiy-tadqiqot ishlarini muvofiqlashtirish sohasida:

mamlakatimiz ijtimoiy, maʼnaviy va madaniy taraqqiyotining uzviy qismini tashkil etgan tarix va madaniyatimizga oid xorijdagi madaniy boyliklarni tadqiq etish siyosatini amalga oshiradi;

mamlakatimiz tarixi va madaniyatiga oid xorijdagi madaniy boyliklarni tadqiq etish yuzasidan olib boriladigan ilmiy-tadqiqot ishlarining ustuvor va istiqbolli yoʻnalishlarini rivojlantirish strategiyasini belgilaydi;

mamlakatimiz tarixi va madaniyatiga oid xorijdagi madaniy boyliklarni tadqiq etish va yanada rivojlantirish sohasidagi davlat dasturlarini amalga oshirilishini taʼminlaydi;

mamlakatimiz tarixi va madaniyatiga oid xorijdagi madaniy boyliklarni tadqiq etish yuzasidan olib boriladigan ilmiy-tadqiqot ishlarini muvofiqlashtiradi;

b) Markazning yillik faoliyat rejasini tasdiqlash va uni amalga oshirilishi uchun koʻmaklashish, shuningdek, zaruratdan kelib chiqqan holda, Markazga yuklangan asosiy vazifalar ijrosini taʼminlash maqsadida, Markazning taklifiga asosan uning mutaxassislari va boshqa tashkilotlardan Markazga jalb qilinadigan ekspertlarni xorijiy davlatlarga safarlarga joʻnatish ishlarini muvofiqlashtirish sohasida:

Markazning yillik faoliyat rejasini tasdiqlaydi;

Markazga yuklatilgan ilmiy va amaliy tadbirlarni amalga oshirilishida koʻmaklashadi;

Markazning yillik faoliyat zaruratidan kelib chiqqan holda, unga yuklangan asosiy vazifalar ijrosini taʼminlash ishlariga amaliy yordam koʻrsatadi;

Markazning taklifiga asosan uning mutaxassislari va boshqa tashkilotlardan Markazga jalb qilinadigan ekspertlarni xorijiy davlatlarga safarlarga joʻnatish ishlarini muvofiqlashtiradi;

v) har chorak yakuni boʻyicha Markaz hisobotlarini eshitish, uning faoliyati samarasi va natijadorligini baholash sohasida:

Markaz faoliyati yuzasidan har chorak yakuni boʻyicha hisobotlarni eshitadi;

Markaz rejalarida aks etgan fundamental, amaliy va innovatsion tadqiqotlari dasturlarini shakllantirish jarayoniga rahbarlik qiladi;

Markaz vakolati doirasidagi fundamental, amaliy va innovatsion tadqiqotlarning grant asosidagi davlat dasturlarini Oʻzbekiston Respublikasi Davlat budjeti mablagʻlari hisobiga moliyalashtirishning tegishli hajmlarini tasdiqlaydi;

buyurtmachilar — vazirliklar, idoralar, va boshqa tashkilotlar bilan birgalikda moliyalashtiriladigan amaliy va innovatsion tadqiqotlarning maqsadli davlat ilmiy-texnika dasturlarini tasdiqlaydi;

zarurat boʻlganda, Markazning tegishli davlat ilmiy dasturlariga oʻzgartirish va qoʻshimchalar kiritadi;

Markazning daromadlari va xarajatlari prognoz parametrlarini, Markazga mablagʻlar tushishi va ulardan foydalanilishi toʻgʻrisidagi hisobotlarni tasdiqlaydi, shuningdek, zarurat boʻlganda, ularga tegishli oʻzgartirish va qoʻshimchalar kiritadi;

g) mamlakatimiz tarixi va madaniyatiga oid xorijdagi madaniy boyliklarni tadqiq etish boʻyicha davlat va xoʻjalik boshqaruvi organlari faoliyatini muvofiqlashtirish va bu borada zarur chora-tadbirlarni amalga oshirish sohasida:

davlat organlarining rahbarlari, mansabdor shaxslarining, shuningdek yetakchi olimlar va ekspertlarning Markaz ilmiy faoliyatiga oid integratsiya jarayonlarini yanada rivojlantirish va oʻzaro foydali tarmoqlararo ilmiy hamkorlik qilish masalalari boʻyicha tavsiyalari va takliflarini eshitadi;

Markaz tomonidan amalga oshirilayotgan hamda tasdiqlangan ilmiy tadqiqotlar va amaliy tadbirlarning bajarilishida mutasaddi davlat va xoʻjalik boshqaruvi organlari, mahalliy davlat hokimiyati organlarining faoliyatlarini muvofiqlashtiradi.

8. Komissiya oʻziga yuklatilgan vazifalarni bajarish uchun quyidagi huquqlarga ega:

Markaz, Oʻzbekiston Respublikasi Madaniyat vazirligi, Fanlar akademiyasi, boshqa davlat va xoʻjalik boshqaruvi organlari rahbarlarining hisobotlarini eshitish;

Komissiya aʼzolari, davlat va xoʻjalik boshqaruvi organlari, mahalliy davlat hokimiyati organlari mansabdor shaxslarining Komissiyaga yuklatilgan vazifalarning bajarilishi yuzasidan shaxsiy hisobotlarini eshitish;

oʻz vakolatiga kiradigan masalalar boʻyicha zarur materiallar va hujjatlarni davlat va xoʻjalik boshqaruvi organlaridan, mahalliy davlat hokimiyati organlaridan belgilangan tartibda soʻrash va olish;

Oʻzbekistonga oid xorijdagi madaniy boyliklarni tadqiq etish masalalari boʻyicha Oʻzbekiston Respublikasi Prezidentiga takliflar kiritish;

Oʻzbekistonga oid xorijdagi madaniy boyliklarni tadqiq etish masalalarini oʻrganish va ular boʻyicha takliflarni ishlab chiqish uchun ishchi guruhlar tashkil etish;

Markaz tomonidan mamlakatimiz tarixi va madaniyatiga oid xorijdagi madaniy boyliklarni tadqiq etish yuzasidan olib boriladigan ilmiy-tadqiqot ishlarini nazorat qilish;

Markazning yillik ish rejasini tasdiqlash;

Markazning taklifiga asosan uning mutaxassislari va boshqa tashkilotlardan Markazga jalb qilinadigan ekspertlarni xorijiy davlatlarga safarlarga joʻnatish tartibini belgilash;

Komissiya tomonidan qabul qilinadigan qarorlar izchil amalga oshirilishini nazorat qilish.

9. Komissiyaga rais boshchilik qiladi, uning vakolatiga quyidagilar kiradi:

Komissiyaning samarali ishlashini taʼminlash;

yuklangan vazifalar bajarilishi boʻyicha Komissiya aʼzolarining ishini muvofiqlashtirish;

Komissiya ishi reglamentini tasdiqlash;

Komissiya majlislari kun tartibini belgilash va ularni chaqirish;

Komissiya tomonidan qabul qilingan qarorlar bajarilishi nazorat qilinishini tashkil etish.

Komissiya raisi qonun hujjatlariga muvofiq boshqa vakolatlarni ham amalga oshiradi.

10. Markaz direktori, lavozimiga koʻra, Komissiyaning masʼul kotibi hisoblanadi.

11. Markaz:

Komissiya majlislariga zarur materiallarning oʻz vaqtida tayyorlanishini tashkil etadi;

Komissiya qarorlari bajarilishini nazorat qilishni va ularning monitoringi olib borilishini tashkil etadi va ularning natijalarini koʻrib chiqish uchun Komissiyaga taqdim etadi;

Komissiya bayonnomalarini rasmiylashtiradi va Komissiya aʼzolariga tegishli qismi yuzasidan tasdiqlangan bayonnomalarni tegishli davlat va xoʻjalik boshqaruvi organlariga, mahalliy davlat hokimiyati organlariga va boshqa tashkilotlarga yuboradi;

oʻziga yuklangan vazifalarni bajarish uchun zarur boʻlgan axborot va materiallarni davlat va xoʻjalik boshqaruvi organlaridan, mahalliy davlat hokimiyati organlaridan belgilangan tartibda oladi;

Komissiyada ish yuritilishini taʼminlaydi;

Komissiyaning qarorlariga muvofiq boshqa funksiyalarni amalga oshiradi.

12. Komissiya oʻz faoliyatini doimiy asosda amalga oshiradi va oʻz majlislarini zaruriyatga koʻra, va ayni paytda yil choragida kamida bir marta oʻtkazadi.

Komissiya majlisini rais, u boʻlmaganda — Komissiya raisining oʻrinbosari olib boradi.

13. Komissiya yigʻilishlarining kun tartibi Markaz tomonidan tuziladi va Oʻzbekiston Respublikasi Vazirlar Mahkamasiga yuboriladi.

14. Komissiyaning navbatdagi yigʻilishi kun tartibi va materiallari Markaz tomonidan yigʻilish boshlanishidan kamida 3 kalendar kun oldin boʻlajak yigʻilish toʻgʻrisidagi bildirishnoma bilan birgalikda Komissiya aʼzolariga yuboriladi.

15. Komissiyaning qarorlari uning aʼzolarining oddiy koʻpchilik ovozi bilan qabul qilinadi. Ovozlar teng boʻlganda raisning ovozi hal qiluvchi ovoz hisoblanadi.

16. Istisno hollarda qarorlarni tezkor qabul qilish maqsadida rais ayrim masalalar boʻyicha Komissiyaning qarorlarini soʻrov yoʻli bilan tasdiqlashga haqlidir.

17. Komissiyaning qarorlari bayonnoma bilan rasmiylashtiriladi va rais tomonidan tasdiqlanadi. Komissiya aʼzolari bayonnomani imzolashda oʻzlarining alohida fikrini bildirishga haqlidir.

Komissiya bayonnomasining asl nusxasi va unga oid materiallar Markazda saqlanadi.

18. Komissiyani qayta tashkil etish va tugatish qonun hujjatlarida belgilangan tartibda amalga oshiriladi.