Oʻzbekiston Respublikasi Prezidentining ““Nukus-farm”, “Zomin-farm”, “Kosonsoy-farm”, “Sirdaryo-farm”, “Boysun-farm”, “Boʻstonliq-farm” va “Parkent-farm” erkin iqtisodiy zonalarini tashkil etish toʻgʻrisida” 2017-yil 3-maydagi PF-5032-son Farmonini bajarish yuzasidan, shuningdek yangi tashkil etilgan erkin iqtisodiy zonalarga xorijiy va mahalliy investitsiyalarni jalb etish uchun qulay sharoitlar yaratish, respublika farmatsevtika tarmogʻini rivojlantirishga qaratilgan yuqori texnologiyali zamonaviy investitsiya loyihalarini amalga oshirish imkonini beradigan ishonchli transport, muhandislik-kommunikatsiya hamda ishlab chiqarish infratuzilmalarini shakllantirish maqsadida Vazirlar Mahkamasi qaror qiladi:

1. 2017 — 2019-yillarda “Nukus-farm”, “Zomin-farm”, “Kosonsoy-farm”, “Sirdaryo-farm”, “Boysun-farm”, “Boʻstonliq-farm” va “Parkent-farm” erkin iqtisodiy zonalari (keyingi oʻrinlarda erkin iqtisodiy zonalar deb ataladi) hududlarida transport, muhandislik-kommunikatsiya hamda ishlab chiqarish infratuzilmalarini jadal rivojlantirish dasturi (keyingi oʻrinlarda Dastur deb ataladi) maʼqullansin, jumladan:

2017 — 2019-yillarda “Nukus-farm”, “Zomin-farm”, “Kosonsoy-farm”, “Sirdaryo-farm”, “Boysun-farm”, “Boʻstonliq-farm” va “Parkent-farm” erkin iqtisodiy zonalarining transport, muhandislik-kommunikatsiya hamda ishlab chiqarish infratuzilmalarini jadal rivojlantirish dasturining (keyingi oʻrinlarda Dastur deb ataladi) asosiy maqsadli koʻrsatkichlari 1-ilovaga* muvofiq;

“Nukus-farm”, “Zomin-farm”, “Kosonsoy-farm”, “Sirdaryo-farm”, “Boysun-farm”, “Boʻstonliq-farm” va “Parkent-farm” erkin iqtisodiy zonalari uchun avtomobil yoʻllari uchastkalarini qurish hamda taʼmirlash tadbirlari 2-ilovaga* muvofiq;

“Nukus-farm”, “Zomin-farm”, “Kosonsoy-farm”, “Sirdaryo-farm”, “Boysun-farm”, “Boʻstonliq-farm” va “Parkent-farm” erkin iqtisodiy zonalari uchun suv taʼminoti, kanalizatsiya hamda irrigatsiya tizimlarini rivojlantirish tadbirlari 3-ilovaga* muvofiq;

“Nukus-farm”, “Zomin-farm”, “Kosonsoy-farm”, “Sirdaryo-farm”, “Boysun-farm”, “Boʻstonliq-farm” va “Parkent-farm” erkin iqtisodiy zonalari uchun elektr taʼminoti tarmoqlarini qurish hamda rekonstruksiya qilish tadbirlari 4-ilovaga* muvofiq;

“Nukus-farm”, “Zomin-farm”, “Kosonsoy-farm”, “Sirdaryo-farm”, “Boysun-farm”, “Boʻstonliq-farm” va “Parkent-farm” erkin iqtisodiy zonalari uchun gaz taʼminoti tarmoqlarini qurish hamda rekonstruksiya qilish tadbirlari 5-ilovaga* muvofiq;

“Nukus-farm”, “Zomin-farm”, “Kosonsoy-farm”, “Sirdaryo-farm”, “Boysun-farm”, “Boʻstonliq-farm” va “Parkent-farm” erkin iqtisodiy zonalari uchun telekommunikatsiya tarmoqlarini qurish tadbirlari 6-ilovaga* muvofiq.

2. Davlat va xoʻjalik boshqaruvi organlari, Qoraqalpogʻiston Respublikasi Vazirlar Kengashi, Jizzax, Namangan, Sirdaryo, Surxondaryo va Toshkent viloyatlari hokimliklari, boshqa manfaatdor tashkilotlar rahbarlari zimmasiga ushbu tadbirlarning asosiy maqsadli koʻrsatkichlari toʻliq hajmda va oʻz vaqtida bajarilishi, shuningdek Dasturga kiritilgan loyihalarning loyiha-smeta hujjatlari sifatli ishlab chiqilishi yuzasidan shaxsiy masʼuliyat yuklansin.

3. Erkin iqtisodiy zonalar va kichik sanoat zonalari faoliyatini muvofiqlashtiruvchi Respublika kengashiga (keyingi oʻrinlarda Respublika kengashi deb ataladi) erkin iqtisodiy zonalar hududida yangi tashkil etilayotgan quvvatlarni transport, muhandislik-kommunikatsiya hamda ishlab chiqarish infratuzilmalari bilan taʼminlash ustuvor ahamiyatga ega ekanidan kelib chiqqan holda, zarurat tugʻilganda Dasturga Oʻzbekiston Respublikasi Moliya vazirligi va Iqtisodiyot vazirligining asoslangan takliflari boʻyicha oʻzgartirishlar hamda qoʻshimchalar kiritish huquqi berilsin.

4. Erkin iqtisodiy zonalarning Dasturga kiritilgan infratuzilma obyektlarini, shuningdek zonalar direksiyalarining maʼmuriy binolarini qurish va rekonstruksiya qilishni loyiha-smeta hujjatlarini ishlab chiqish bilan birga amalga oshirishga 2017-yil 31-dekabrgacha istisno tariqasida ruxsat berilsin.

5. Qoraqalpogʻiston Respublikasi Vazirlar Kengashi, Jizzax, Namangan, Sirdaryo, Surxondaryo va Toshkent viloyatlari hokimliklari tegishli vazirliklar hamda idoralar bilan birgalikda Erkin iqtisodiy zonalar Maʼmuriy kengashiga erkin iqtisodiy zonalarning maʼmuriy binolarini qurish yoki direksiyalarini tegishli binolarda joylashtirish yuzasidan bir oy muddatda takliflar kiritsinlar.

6. Oʻzbekiston Respublikasi Iqtisodiyot vazirligi va Moliya vazirligi joriy yilda erkin iqtisodiy zonalar direksiyalariga hamda Qoraqalpogʻiston Respublikasi Vazirlar Kengashi, Jizzax, Namangan, Sirdaryo, Surxondaryo va Toshkent viloyatlari hokimliklariga Oʻzbekiston Respublikasining 2017-yilgi Investitsiya dasturi doirasida nazarda tutilgan kapital qoʻyilmalar limitlarini qayta taqsimlash hisobiga erkin iqtisodiy zonalar bosh rejasini va infratuzilma obyektlarining loyiha-smeta hujjatlarini ishlab chiqish uchun zarur mablagʻlar ajratilishini taʼminlasinlar.

7. Oʻzbekiston Respublikasi Investitsiyalar boʻyicha davlat qoʻmitasi, Iqtisodiyot vazirligi, Moliya vazirligi 2018-yilga va kelgusi yillarga moʻljallangan Oʻzbekiston Respublikasining rivojlanish davlat dasturlarini shakllantirishda ularga ushbu Dastur doirasida amalga oshirish nazarda tutilgan investitsiya loyihalarini belgilangan tartibda kiritishni nazarda tutsinlar, bunda quyidagilar hisobga olinsin:.

transport, muhandislik-kommunikatsiya va ishlab chiqarish infratuzilmalarini joylashtiriladigan yangi ishlab chiqarishlar bilan oʻzaro bogʻlagan holda jadal rivojlantirish boʻyicha takliflarni Respublika kengashi majlislarida koʻrib chiqish;

erkin iqtisodiy zonalarning transport, muhandislik-kommunikatsiya va ishlab chiqarish infratuzilmalarini yanada rivojlantirishga Oʻzbekiston Respublikasi Davlat budjetidan maxsus ajratiladigan mablagʻlar hisobiga amalga oshirish taklif etiladigan loyihalar roʻyxatini belgilash.

8. Oʻzbekiston Respublikasi Davlat arxitektura va qurilish qoʻmitasi loyiha-smeta hujjatlarini belgilangan tartibda davlat ekspertizasidan oʻtkazilishini taʼminlasin va qurilish-montaj ishlari sifatiga rioya etilishi yuzasidan tegishli davlat arxitektura-qurilish nazoratini oʻrnatsin.

9. Oʻzbekiston Respublikasi Iqtisodiyot vazirligi Qoraqalpogʻiston Respublikasi Vazirlar Kengashi, Jizzax, Namangan, Sirdaryo, Surxondaryo va Toshkent viloyatlari hokimliklari bilan birgalikda Dasturning amalga oshirilishi yuzasidan tizimli monitoring oʻrnatsin va monitoring natijalari toʻgʻrisida har chorakda Vazirlar Mahkamasiga axborot bersin.

10. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari — “Oʻzbekiston temir yoʻllari” AJ boshqaruvi raisi A.J. Ramatov, Oʻzbekiston Respublikasi Bosh vazirining oʻrinbosarlari J.A. Qoʻchqorov va Gʻ.I. Ibragimov zimmasiga yuklansin.