Oʻzbekiston Respublikasi Hukumati va Quvayt Davlati Hukumati, keyingi oʻrinlarda “Tomonlar” deb ataluvchilar,

Tomonlar davlatlari oʻrtasida ikki tomonlama munosabatlarni mustahkamlash istagida,

ikki davlatning amaldagi diplomatik pasportga ega fuqarolarining kirish va chiqish, shuningdek safar qilishlariga koʻmaklashishga intilib,

quyidagilar toʻgʻrisida kelishib oldilar:

Har ikkala Tomon davlatining amaldagi diplomatik pasporti egalari boshqa Tomon davlati hududiga kirgan sanadan boshlab olti (6) oy ichida toʻqson (90) kundan oshmagan muddatda vizalar rasmiylashtirmagan holda ushbu Tomon davlati hududiga kirish, chiqish, tranzit oʻtish hamda vaqtinchalik boʻlish huquqiga egadirlar.

Har ikkala Tomon davlatining amaldagi diplomatik pasporti egalari boshqa Tomon davlati hududida boʻlishlari davomida ushbu Tomon davlatida chet ellik fuqarolar uchun oʻrnatilgan qonunlarga, shu jumladan roʻyxatdan oʻtish, boʻlib turish va harakatlanish qoidalariga rioya qiladilar.

1. Boshqa Tomon davlati hududida akkreditatsiya qilingan diplomatik vakolatxonalar va konsullik muassasalari, xalqaro tashkilotlarning xodimlari boʻlgan har ikkala Tomon davlatining amaldagi diplomatik pasporti egalari akkreditatsiya qilingan butun davr mobaynida, basharti ularning maqomini tasdiqlovchi rasmiy hujjatlari mavjud boʻlgan taqdirda, ushbu boshqa Tomon davlati hududiga vizalar rasmiylashtirmagan holda kirish, chiqish va boʻlib turish huquqiga egadirlar. Yuboruvchi Tomon bunday xodimlarning tayinlanishidan kamida oʻttiz (30) kun oldin boshqa Tomonni diplomatik kanallar orqali xabardor qiladi.

2. Ushbu moddaning 1-bandida koʻrsatilgan shartlar boshqa Tomon davlati hududida akkreditatsiya qilingan diplomatik vakolatxonalar, konsullik muassasalari yoki xalqaro tashkilotlar xodimlarining turmush oʻrtogʻi, voyaga yetmagan farzandlari va qaramogʻida boʻlgan ota-onalariga ham tatbiq qilinadi, basharti ular yuboruvchi Tomon davlatining amaldagi diplomatik pasport egalari boʻlsalar.

Har bir Tomon oʻz davlati hududiga boshqa Tomon davlatining amaldagi diplomatik pasporti egalarining hech qanday asoslantirishlarsiz kirishini rad etish yoki boʻlish muddatini chegaralash huquqini saqlab qoladi. Bu holda, Tomonlar bir-birlarini diplomatik kanallar orqali xabardor qiladilar.

Har bir Tomon jamoat tartibi, milliy xavfsizlik yoki aholi sogʻligʻini saqlash maqsadida ushbu Bitimni vaqtinchalik, qisman yoki butunlay toʻxtatib turish huquqini saqlab qoladi. Har bir Tomon bunday jarayon toʻgʻrisida boshqa Tomonni darhol yozma ravishda diplomatik kanallar orqali xabardor qiladi.

1. Tomonlar ushbu Bitim kuchga kirganidan soʻng oʻttiz (30) kun ichida amaldagi diplomatik pasport namunalarini, shu jumladan bunday hujjatlarning batafsil tavsifini diplomatik kanallar orqali almashadilar.

2. Agar Tomonlardan biri ushbu Bitimning amal qilishi davomida diplomatik pasportlarni almashtirsa yoki ularga oʻzgartirish kiritsa, ushbu Tomon boshqa Tomonni oʻttiz (30) kun avval diplomatik kanallar orqali xabardor qiladi hamda yangi pasport namunasini, shu jumladan uning batafsil tavsifini taqdim qiladi.

1. Har ikkala Tomon davlatining amaldagi diplomatik pasporti egalari boshqa Tomon davlati hududida yoʻl hujjatlari yoʻqolgan yoki shikastlangan taqdirda oʻz davlatlari diplomatik vakolatxonasi yoki konsullik muassasasini qabul qiluvchi davlat Tashqi ishlar vazirligini tegishli choralar koʻrishi yuzasidan xabardor qilishlari uchun ogoh qiladilar.

2. Yoʻqolgan yoki shikastlangan hujjat oʻrniga tegishli Tomon davlati diplomatik vakolatxonasi yoki konsullik muassasasi yangi pasport yoki yoʻqolgan yoxud shikastlangan pasportning oʻrnini vaqtinchalik bosuvchi boshqa yoʻl hujjati bilan taʼminlaydi.

Ushbu Bitim qoidalarini amalga oshirish va talqin qilishda nizo va kelishmovchiliklar yuzaga kelgan taqdirda, Tomonlar ularni diplomatik kanallar orqali muzokaralar va maslahatlashuvlar yoʻli bilan hal qiladilar.

Ushbu Bitimga Tomonlarning oʻzaro roziligi bilan ushbu Bitimning ajralmas qismi hisoblanadigan hamda ushbu Bitimning 10-moddasi 1-bandida koʻrsatilgan tartibda kuchga kiradigan alohida bayonnomalar bilan rasmiylashtiriladigan oʻzgartirish va qoʻshimchalar kiritilishi mumkin.

1. Ushbu Bitim nomuayyan muddatga tuziladi va Tomonlar uning kuchga kirishi uchun zarur boʻlgan ichki huquqiy protseduralarni tugatganliklari toʻgʻrisida bir-birlarini xabardor qiluvchi oxirgi yozma xabarnomani diplomatik kanallar orqali olgan sanadan boshlab kuchga kiradi.

2. Har ikkala Tomon ushbu Bitimni boshqa Tomonga diplomatik kanallar orqali yozma xabarnoma yuborish orqali tugatishi mumkin. Ushbu Bitim boshqa Tomondan bunday xabarnoma olingan sanadan eʼtiboran toʻqson (90) kundan soʻng tugatiladi.

Al-Quvayt shahrida 2017-yilning 8-fevralida ikki (2) asl nusxada, har biri oʻzbek, arab va ingliz tillarida tuzildi, bunda barcha matnlar bir xil kuchga ega.

Ushbu Bitim qoidalarini talqin qilishda tafovut yuzaga kelgan taqdirda, ingliz tilidagi matn ustuvor boʻladi.