O‘zbekiston Respublikasi Prezidentining “Aholi va hududlarni favqulodda vaziyatlardan muhofaza qilish sohasida mutaxassislar tayyorlash tizimini yanada takomillashtirish chora-tadbirlari to‘g‘risida” 2017-yil 2-iyundagi PQ-3030-son qaroriga muvofiq, O‘zbekiston Respublikasi Fuqaro muhofazasi institutida Favqulodda vaziyatlar vazirligi, shuningdek Favqulodda vaziyatlarda ularning oldini olish va harakat qilish davlat tizimi uchun yuqori malakali mutaxassislar tayyorlash maqsadida Vazirlar Mahkamasi qaror qiladi:

1. O‘zbekiston Respublikasi Prezidentining “Aholi va hududlarni favqulodda vaziyatlardan muhofaza qilish sohasida mutaxassislar tayyorlash tizimini yanada takomillashtirish chora-tadbirlari to‘g‘risida” 2017-yil 2-iyundagi PQ-3030-son qaroriga muvofiq O‘zbekiston Respublikasi Fuqaro muhofazasi institutida (keyingi o‘rinlarda Institut deb ataladi) 5A640103 — “Favqulodda vaziyatlarda aholi xavfsizligi” mutaxassisligi bo‘yicha magistratura bosqichi (keyingi o‘rinlarda magistratura bosqichi deb ataladi) ochilganligi ma’lumot uchun qabul qilinsin.

2. Belgilab qo‘yilsinki:

magistratura bosqichiga respublikadagi tegishli oliy ta’lim muassasalarining 5640100 — “Hayotiy faoliyat xavfsizligi” yo‘nalishi bo‘yicha bakalavriat bosqichini tamomlagan oliy ma’lumotli mutaxassislar hamda O‘zbekiston Respublikasi Favqulodda vaziyatlar vazirligi, shuningdek Favqulodda vaziyatlarda ularning oldini olish va harakat qilish davlat tizimiga kiruvchi vazirliklar, idoralar va boshqa tashkilotlarning aholi va hududlarni favqulodda vaziyatlardan muhofaza qilish sohasida besh yildan kam bo‘lmagan mehnat stajiga ega bo‘lgan xodimlari qabul qilinadi;

magistratura bosqichiga qabul qilish O‘zbekiston Respublikasi Vazirlar Mahkamasining “Oliy ta’lim muassasalariga o‘qishga qabul qilish, talabalar o‘qishini ko‘chirish, qayta tiklash va o‘qishdan chetlashtirish tartibi to‘g‘risidagi nizomlarni tasdiqlash haqida” 2017-yil 20-iyundagi 393-son qaroriga muvofiq amalga oshiriladi;

magistratura bosqichida davlat granti va to‘lov-kontrakt asosida ta’lim oluvchi tinglovchilarning asosiy ish joyi va o‘rtacha oylik ish haqi ularning o‘qish muddati davrida saqlanadi;

doimiy ish joyiga ega bo‘lmaganlar safidan magistraturaga qabul qilingan tinglovchilar oliy ta’lim muassasalari talabalari uchun belgilangan stipendiya miqdorlariga muvofiq stipendiya bilan ta’minlanadi;

magistratura bosqichida to‘lov-kontrakt asosida o‘qitishning to‘lov miqdorlari tegishli yo‘nalishlari bo‘yicha oliy ta’lim muassasalari magistraturasidagi to‘lov-kontrakt asosida o‘qitishning miqdorlariga tenglashtiriladi.

3. O‘zbekiston Respublikasi Favqulodda vaziyatlar vazirligi Oliy va o‘rta maxsus ta’lim vazirligi bilan birgalikda:

2017-yilning 25-avgustiga qadar tajribali professor-o‘qituvchilar tarkibidan magistraturaga qabul qilishni tashkil etish va o‘tkazish bo‘yicha komissiya tuzsin;

2017-yilning 31-avgustiga qadar magistratura bo‘yicha davlat ta’lim standartlari asosida magistrlarni tayyorlash o‘quv rejalari va dasturlarini ishlab chiqsin.

4. O‘zbekiston Respublikasi Fuqaro muhofazasi institutining magistratura bosqichiga 2017/2018 o‘quv yili uchun qabul kvotasi jami 25 ta o‘rin, shundan 8 ta o‘rin davlat granti va 17 ta o‘rin to‘lov-kontrakt asosida belgilansin.

5. 2017/2018 o‘quv yilida magistratura bosqichi uchun istisno tariqasida:

hujjatlar 1 — 10-sentabr kunlari qabul qilinsin;

kirish sinovlari (maxsus test) 15-sentabr kuni o‘tkazilsin;

o‘quv yili 2-oktabrdan boshlansin.

2018/2019 o‘quv yilida va keyingi yillarda magistratura bosqichiga qabul qilish O‘zbekiston Respublikasi Vazirlar Mahkamasining 2017-yil 20-iyundagi 393-son qarori bilan tasdiqlangan Oliy ta’lim muassasalarining magistraturasiga o‘qishga qabul qilish tartibi to‘g‘risidagi nizomda belgilangan tartibda amalga oshirilsin.

6. Vazirliklar va idoralar o‘zlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsinlar.

7. Mazkur qarorning bajarilishini nazorat qilish O‘zbekiston Respublikasi Bosh vazirining birinchi o‘rinbosari — “O‘zbekiston temir yo‘llari” AJ boshqaruvi raisi A.J. Ramatov va O‘zbekiston Respublikasi favqulodda vaziyatlar vaziri R.M. Djurayev zimmasiga yuklansin.