Naqd pul mablagʻlarini bank aylanmasiga jalb etish, aholining boʻsh pul mablagʻlarini mintaqaviy ijtimoiy dasturlarni amalga oshirish uchun qoʻshimcha ravishda jamlash, pul-buyum lotereyalari oʻtkazishni faollashtirish va ularni tashkil etishning normativ-huquqiy bazasini takomillashtirish maqsadida Vazirlar Mahkamasi qaror qiladi:

1. Oʻzbekiston Respublikasi Kapital bozorini rivojlantirish agentligiga pul-buyum lotereyalari tashkil etish faoliyatini tartibga solish funksiyasi yuklansin.

2. Oʻzbekiston Respublikasi Xalq bankiga pul-buyum lotereyalarini tashkil etish va oʻtkazish huquqi berilsin.

Belgilab qoʻyilsinki, Xalq banki tomonidan pul-buyum lotereyalarini oʻtkazishni tashkil etishdan olinadigan daromadlar aholining boʻsh mablagʻlarini omonatlarga jalb etish ishlarini faollashtirishga maqsadli yoʻnaltirilgan holda uning tasarrufida qoladi.

3. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari huzurida mintaqaviy lotereyalarni tashkil etish boʻyicha ixtisoslashtirilgan xoʻjalik hisobidagi tuzilmalar tashkil qilish maqsadga muvofiq deb hisoblansin, ularga quyidagi asosiy vazifalar yuklansin:

mintaqaviy lotereyalar har xil turlarini tashkil etish va oʻtkazish;

xayriya tashkilotlari va jamgʻarmalari tomonidan tashkil etiladigan lotereyalar oʻtkazishda qatnashish;

lotereyalarni oʻtkazishdan olinadigan daromadlarni mintaqalarda sogʻlom avlodni tarbiyalash, jismoniy tarbiya va sportni rivojlantirish, aholi manzilgohlarini obodonlashtirish va ularning infratuzilmasini takomillashtirish, boshqa ijtimoiy dasturlarni roʻyobga chiqarish chora-tadbirlarini amalga oshirish uchun qoʻshimcha manba sifatida jamlash.

4. Lotereyalar tashkil etish va oʻtkazish tartibi toʻgʻrisidagi Nizom ilovaga muvofiq tasdiqlansin.

7. Belgilab qoʻyilsinki:

Oʻzbekiston Respublikasi Kapital bozorini rivojlantirish agentligi tomonidan berilgan litsenziyaga muvofiq lotereyalar tashkil etish faoliyatini amalga oshiruvchi yuridik shaxslar mazkur faoliyatdan olingan yalpi tushumni alohida hisobga oladilar;

8. Oʻzbekiston Respublikasi Vazirlar Mahkamasining “Oʻzbekiston Respublikasi hududida lotereya oʻyinlari oʻtkazish tartibini takomillashtirish toʻgʻrisida” 1997-yil 19-sentabrdagi 444-son qarori (Oʻzbekiston Respublikasi QT, 1997-y., 9-son, 31-modda) oʻz kuchini yoʻqotgan deb hisoblansin.

9. Oʻzbekiston Respublikasi Adliya vazirligi Moliya vazirligi va Davlat soliq qoʻmitasi bilan birgalikda bir oy muddatda Vazirlar Mahkamasiga qonun hujjatlariga mazkur qarordan kelib chiquvchi oʻzgartirish va qoʻshimchalar toʻgʻrisida takliflar kiritsin.

10. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari R.S. Azimov zimmasiga yuklansin.

1. Mazkur Nizom lotereya tashkil etish va oʻtkazish tartibini belgilaydi.

2. Mazkur Nizom maqsadlari uchun quyidagi tushunchalardan foydalaniladi:

lotereya (keyingi oʻrinlarda matnda oʻyin deb yuritiladi) — yuridik va jismoniy shaxslarning pul mablagʻlarini ixtiyoriylik asosida oʻyin biletlarini tarqatish yoʻli bilan jalb qilishni nazarda tutuvchi tavakkalchilikka asoslangan oʻyin, ular boʻyicha tushgan mablagʻlarning bir qismi oʻyin qatnashchilariga buyum yoki boshqa yutuqlar holida oʻyin (tiraj) natijalariga koʻra toʻlanadi;

oʻyin bileti — oʻyin qatnashchisi oʻyin qiymatini toʻlagan holda oʻyin tashkilotchisi bilan shartnomaviy munosabatlarga kirishganligi va oʻyinni oʻtkazish shartlariga muvofiq oʻyinda qatnashishidan dalolat beruvchi maxsus blanka (kartochka, kupon, kvitansiya, jeton yoki boshqa xildagi axborot manbai);

oʻyin (tiraj) — yutuqlarning oʻyin qatnashchilari oʻrtasida tasodifiy taqsimlanishi. Lotereya biletining har bittasiga oʻyin shartlarida nazarda tutilgan yutuqlarni olishning teng imkoniyati (teng ehtimolligi) oʻyinning asosiy prinsipi hisoblanadi. Oʻyinlarning ushbu prinsiplar buzilgan holda oʻtkazilishi taqiqlanadi;

tiraj jihozlari — oʻyin (tiraj)larni oʻtkazishda foydalaniladigan hamda litsenziya talablarining va ushbu jihozlar turiga litsenziyalovchi organ tomonidan belgilanadigan shartlarning bajarilishini taʼminlovchi maxsus jihozlar (mexanik, elektron yoki boshqa texnika jihozlari);

oʻyin tashkilotchisi (yoki muassis) — lotereyalar tashkil etish boʻyicha faoliyat bilan shugʻullanish huquqini beruvchi litsenziyaga ega boʻlgan hamda oʻyinlarni tashkil etish va oʻtkazish boʻyicha tadbirlarning butun kompleksini oʻtkazishni tashkil qiluvchi va mablagʻ bilan taʼminlovchi yuridik shaxs — Oʻzbekiston Respublikasi rezidenti;

oʻyin qatnashchisi — oʻyin qiymatini toʻlagan, oʻyin tashkilotchisi bilan shartnomaviy munosabatlarga kirishgan va oʻyinda uni oʻtkazish shartlariga muvofiq qatnashuvchi yuridik yoki jismoniy shaxs;

litsenziyalovchi organ — lotereyalarni tashkil etish boʻyicha faoliyatni litsenziyalashni amalga oshiruvchi maxsus vakolatli organ;

oʻyinni oʻtkazish shartlari (keyingi oʻrinlarda Shartlar deb yuritiladi) — litsenziyalovchi organ tomonidan tasdiqlanadigan, oʻyinni oʻtkazish shartlari va tartibini belgilaydigan, oʻyin tashkilotchisi, qatnashchilari va litsenziyalovchi organ oʻrtasidagi munosabatlarni tartibga soluvchi hujjat;

yutuqlar (mukofotlar) fondi — oʻyinlarni oʻtkazish Shartlarida litsenziyalovchi organ tomonidan tasdiqlangan oʻyin qoidalariga muvofiq yutuqlarni toʻlash uchun moʻljallangan pul mablagʻlari summasi yoki pul ifodasidagi mol-mulklar.

3. Oʻyinlar oʻyinlarni oʻtkazish boʻyicha tadbirlarning butun kompleksini tashkil etuvchi va mablagʻ bilan taʼminlovchi bir yoki bir nechta tashkilotchilar tomonidan oʻtkazilishi mumkin.

4. Faoliyatining asosiy turi oʻyinlar oʻtkazish hisoblanmaydigan yuridik shaxs tashkiliy qoʻmita tashkil etishi shart, unga oʻyinlarni tashkil etish va oʻtkazish boʻyicha tadbirlarning butun kompleksini amalga oshirish yuklanadi.

5. Oʻyinlarni oʻtkazish quyidagi shakllarda amalga oshirilishi mumkin:

a) tiraj lotereyalari, bunda tartib raqamlari qoʻyilgan (zarurat boʻlganda, seriyalar va razryadlarga boʻlingan), ular boʻyicha oldindan belgilangan vaqtda yutuqlar oʻyini tashkil qilinadigan lotereya biletlari chiqariladi. Bunda oʻyin biletlari soni, bitta oʻyin biletining qiymati, tirajlarni oʻtkazish vaqti, pul, buyum yoki boshqa yutuqlar miqdori va soni lotereyalar chiqarilgungacha belgilanadi;

b) bir lahzali lotereyalar, bunda lotereya biletlari ularni buzmasdan yutuq chiqqan oʻyin biletlarini aniqlashni toʻliq istisno qiluvchi yopiq holda yutuqlar oldindan belgilangan holda chiqariladi. Qatnashish natijalari oʻyin bileti sotib olingandan va u ochilgandan (himoya qatlamini oʻchirish, oʻyin biletining bir qismini kesish yoki qirqib olish) keyin darhol aniqlanadi;

v) passiv va aktiv lotereyalarga boʻlinadigan sonli lotereyalar. Passiv sonli lotereyada qatnashishni xohlovchi shaxs sonlar, belgilar yoki boshqa qaydlar kombinatsiyasi oldindan koʻrsatilgan oʻyin biletini belgilangan qiymati boʻyicha sotib oladi. Aktiv sonli lotereyada qatnashishni xohlovchi shaxs maxsus blankada yoki boshqa yoʻl bilan yoʻl qoʻyiladigan natijalar yigʻindisidan tirajning mumkin boʻlgan natijasini tanlaydi, u oʻyin tashkilotchisi tomonidan tanlangan variantlar roʻyxatdan oʻtkazilgandan va variantlarga muvofiq keluvchi tirajda qatnashishning qiymati tegishli variant boʻyicha toʻlangandan keyin lotereya qatnashchisiga aylanadi.

Sonli lotereyalar tiraji sonlar, belgilar, boshqa qaydlarni yoki ularning kombinatsiyalarini tasodifiy tanlash yoʻli bilan, shuningdek Shartlarda nazarda tutilgan u yoki bu voqealar natijasida amalga oshiriladi. Sonli lotereyalar tirajining televideniye orqali toʻgʻridan-toʻgʻri efirda translyatsiya qilmasdan oʻtkazilishiga yoʻl qoʻyilmaydi.

Sonli lotereyalar boʻyicha yutuqli biletlar, shuningdek tegishli yutuqlar miqdori tiraj natijalarining oʻyin biletlarida belgilangan natijalarga toʻliq yoki qisman mos tushishiga qarab aniqlanadi.

6. Oʻyinlarni oʻtkazish tartiboti quyidagilarni oʻz ichiga oladi:

a) tashkilotchi (yoki tashkilotchilar) tomonidan moliyaviy majburiyatlar hajmlarini taqsimlagan holda oʻyinni oʻtkazish toʻgʻrisida qarorlar qabul qilish;

b) zarur hujjatlarni tayyorlash va tashkilotchi (yoki tashkilotchilar) tomonidan Shartlarni tasdiqlash;

v) tayyorlovchi korxonalar bilan oʻyin biletlari tayyorlash yuzasidan shartnomalar tuzish va ularni ekspertizadan oʻtkazish, shuningdek tayyorlovchi tashkilotlar bilan, savdo yoki boshqa tashkilotlar bilan Shartlarga muvofiq buyumlar (yoki pul boʻlmagan) yutuqlar sifatida nazarda tutilgan tovarlarni yetkazib berish (xizmatlar koʻrsatish) yuzasidan shartnomalar tuzish;

g) faoliyatning litsenziyalanadigan turi bilan shugʻullanish huquqiga maxsus ruxsatnoma (litsenziya) olish (oʻyinni birinchi marta oʻtkazayotgan tashkilotchilarga litsenziya Shartlarni tasdiqlash bilan bir vaqtda beriladi);

d) litsenziyalovchi organda Shartlarni tasdiqlash;

e) oʻyin biletlarini ishlab chiqarish va tarqatish;

j) lotereyalar tirajlarini va ularning natijalarini eʼlon qilish (agar bu Shartlarda nazarda tutilgan boʻlsa);

z) yutuqlarni berish;

i) litsenziyalovchi organga har choraklik hisobotlarni, shuningdek oʻyinlar tugagach ularni oʻtkazish natijalari toʻgʻrisida toʻliq hisobot taqdim etish.

7. Oʻyin biletlarida quyidagi rekvizitlar boʻlishi kerak:

oʻyin tashkilotchisi (tashkilotchilari)ning nomi, uning (ularning) toʻliq manzili;

oʻyinning nomi;

oʻyinda qatnashish qiymati;

tirajning oʻtkazilish sanasi va vaqti (tirajli lotereyalar uchun);

yutuq fondining miqdori (tirajli va lahzali lotereyalar uchun — qoʻshimcha ravishda yutuqlarning umumiy soni va miqdorlari);

yutuqlarni toʻlash muddatlari va joyi;

razryadlar, seriyalar, tartib raqamlari va Shartlarda nazarda tutilgan boshqa rekvizitlar.

9. Tashkilotchi tomonidan muayyan oʻyinni oʻtkazishga faqat faoliyatning litsenziyalanadigan turi bilan shugʻullanish huquqini beruvchi litsenziya va litsenziyalovchi organ tomonidan tasdiqlangan mazkur oʻyinni oʻtkazish Shartlari mavjud boʻlgandagina yoʻl qoʻyiladi. Oʻyinlarni oʻtkazish Shartlarini tasdiqlamasdan oʻyinlar yoki yutuqlar tiraji oʻtkazilishi litsenziyalanadigan faoliyat turini litsenziyasiz amalga oshirishga tenglashtiriladi.

10. Tashkilotchi tomonidan lotereyalarning navbatdagi chiqarishlari (turlari) Shartlarini tasdiqlash uchun taqdim etilgan hujjatlar litsenziyalovchi organ tomonidan faqat tashkilotchi tomonidan oʻtkazilayotgan oʻyinlar natijalari toʻgʻrisida har choraklik hisobotlar muntazam taqdim etilgan hamda litsenziya talablari va oʻyinlarni oʻtkazish Shartlari qoʻpol ravishda buzilmagan hollardagina koʻrib chiqiladi.

11. Oʻyinlarni oʻtkazish Shartlarini tasdiqlash uchun tashkilotchi tomonidan litsenziyalovchi organga quyidagi hujjatlar taqdim etiladi:

tashkilotchining Shartlarni tasdiqlash toʻgʻrisidagi arizasi;

oʻyinni oʻtkazishning tashkilotchilarning rahbari imzosi bilan tasdiqlangan ikki nusxadagi Shartlari (u mazkur Nizomga 1-ilovaga muvofiq shakl boʻyicha ishlab chiqiladi);

oʻyinlar biletining ikki nusxadagi namunasi (maketi);

tashkilotchi (tashkilotchilar)ning oʻyinni oʻtkazish toʻgʻrisidagi qarorining tasdiqlangan nusxasi, tashkiliy qoʻmita tarkibi (ushbu Nizomning 4-bandiga muvofiq), tashkiliy qoʻmita aʼzolari oʻrtasida vazifalarning taqsimlanishi albatta koʻrsatilgan holda. Bunda, agar oʻyin bir nechta tashkilotchilar tomonidan oʻtkazilsa, qoʻshimcha ravishda tashkilotchilar oʻrtasidagi ularning moliyaviy va boshqa majburiyati hajmlari taqsimlangan holdagi shartnoma nusxasi taqdim etiladi;

tayyorlovchi korxonalar bilan oʻyin biletlarini tayyorlash va ularning haqiqiyligi boʻyicha ekspertizasini oʻtkazish yuzasidan shartnomalar nusxalari;

tayyorlovchi korxonalar, savdo yoki boshqa tashkilotlar bilan buyum (yoki boshqa pul boʻlmagan) yutuqlar sifatida Shartnomalarda nazarda tutilgan tovarlarni yetkazib berish (xizmatlar koʻrsatish) toʻgʻrisidagi (agar zarur boʻlsa) shartnomalar nusxalari;

boshqa tashkilotlar bilan oʻyin biletlarini tarqatish va ular boʻyicha yutuqlar berish yuzasidan shartnomalar nusxalari (agar zarur boʻlsa);

belgilangan toʻlovlar va bojlar toʻlanganligi toʻgʻrisidagi toʻlov hujjatlari nusxalari;

oʻyinni taʼminlash uchun tashkilotchining oʻz sarmoyasi yetarli boʻlmaganda moliya institutlarining kafolatnomasi (agar zarur boʻlsa);

xizmat koʻrsatuvchi bankning oʻyin tashkilotchisining budjetga va budjetdan tashqari fondlarga majburiy toʻlovlar, banklar kreditlari boʻyicha, boshqa yuridik va jismoniy shaxslarga toʻlov muddati oʻtkazib yuborilgan qarzi yoʻqligi toʻgʻrisidagi maʼlumotnoma;

sonli lotereyalar tiraji oʻtkazilishini toʻgʻridan-toʻgʻri efirda translyatsiya qilish yuzasidan televideniye bilan tuzilgan shartnomalar nusxalari.

12. Taqdim etilgan Shartlarni koʻrib chiqishda litsenziyalovchi organ Shartlarning alohida qoidalari va koʻrsatkichlarining toʻgʻriligiga oʻz bahosini berishga haqlidir. Baholashda litsenziyalovchi organ chiqarish koʻrsatkichlari, istalgan asosiy va yordamchi axborot kelishib olinganligini va oʻyin tashkilotchisi oʻz zimmasiga majburiyatlar oladigan summani baholaydi.

13. Oʻyin turiga va tashkilotchining moliyaviy ahvoliga koʻra, litsenziyalovchi organ tomonidan amaldagi qonun hujjatlariga va normativ hujjatlarga muvofiq oʻyin tashkilotchilariga litsenziya talablari va shartlari, shuningdek tashkilotchilar tomonidan oʻyinlar qatnashchilari oldidagi majburiyatlarning bajarilishini taʼminlovchi oʻyin parametrlari yuzasidan normativlar belgilanishi mumkin.

14. Litsenziyalovchi organ amaldagi qonunchilikka muvofiq rasmiylashtirilgan (ushbu Nizomning 11-bandida koʻrsatilgan) hujjatlar olingan kundan boshlab oʻttiz kundan oshmaydigan muddatda Shartlarni tasdiqlash yoki tasdiqlashni rad etish toʻgʻrisida qaror qabul qiladi.

Tasdiqlangan Shartlarga oʻzgartirish va qoʻshimchalar faqat litsenziyalovchi organning ruxsati bilan kiritilishi mumkin.

Shartlarga qoʻshimchalar va oʻzgartirishlarni tasdiqlash uchun tashkilotchi litsenziyalovchi organga quyidagi hujjatlarni taqdim etadi:

shartlarga qoʻshimchalar va oʻzgartirishlar kiritish toʻgʻrisida ariza;

oʻyinlar tashkilotchisi (yoki tashkilotchilari)ning Shartlarga oʻzgartirishlar va qoʻshimchalar kiritish toʻgʻrisidagi qarori;

qoʻshimchalar va oʻzgartirishlar kiritish zarurligining asoslanganligi;

Shartlarga oʻyinning barcha tashkilotchilari tomonidan kelishilgan va tasdiqlangan oʻzgartirishlar va qoʻshimchalar, ikki nusxada;

oʻyin biletlarining namunalari (maketlari), ikki nusxada (agar qoʻshimchalar va oʻzgartirishlar oʻyin biletlariga kiritilsa);

belgilangan toʻlovlarning toʻlanganligi toʻgʻrisidagi toʻlov hujjati nusxasi.

15. Tiraj lotereyalari boʻyicha Shartlarga oʻzgartirishlar va qoʻshimchalar faqat tiraj oʻtkazilgungacha kiritilishi mumkin. Bunda tirajni oʻtkazish muddatlarining oʻzgartirilishiga yoʻl qoʻyilmaydi.

16. Litsenziyalovchi organ tomonidan tasdiqlangan Shartlarga oʻyinlarni oʻtkazishning qatnashchilarga nisbatan shartlarini yomonlashtiruvchi oʻzgartirishlar va qoʻshimchalarning (tirajni oʻtkazishning tasdiqlangan yoki eʼlon qilingan muddatlari, tiraj yutuqlarining tasdiqlangan soni hamda roʻyxati va boshqalar) kiritilishiga yoʻl qoʻyilmaydi.

17. Oʻyinning uning konsepsiyasi va texnologiyasini oʻzgartiruvchi shartlari oʻzgartirilgan taqdirda bunday oʻyinni oʻtkazish Shartlari yangi shartlar sifatida tasdiqlanishi kerak.

18. Shartlarni yoki ularga oʻzgartirishlar va qoʻshimchalarni tasdiqlashni rad etish uchun quyidagilar asos boʻlishi mumkin:

zarur darajada rasmiylashtirilmagan hujjatlarni taqdim etish;

maʼlumotlarning toʻliq emasligi va taqdim etilgan hujjatlar mazmunining amaldagi qonunchilik va ushbu Nizom talablariga muvofiq emasligi;

tashkilotchining litsenziya talablariga va amaldagi qonunchilikda belgilangan shartlarga muvofiq emasligi;

tashkilotchi tomonidan oʻyinni oʻtkazish boʻyicha mualliflik ishlanmalari yuzasidan boshqa tashkilotchilar huquqlarining buzilishi;

oʻyin nomining, uning shiorining, oʻyin bileti maketining ilgari roʻyxatdan oʻtkazilgan oʻyinga oʻxshashligi.

19. Shartlarni tasdiqlash uchun hujjatlarni koʻrib chiqish bilan bogʻliq xarajatlarni qoplash uchun oʻyin tashkilotchisi oʻtkaziladigan oʻyin hajmining 0,1 foizi miqdorida yigʻim toʻlaydi. Yigʻim litsenziyalovchi organning hisob raqamiga toʻlanadi. Ilgari tasdiqlangan Shartlarga oʻzgartirishlar va qoʻshimchalar kiritilganda (chiqariladigan lotereyalar umumiy summasining oʻzgartirilishi va toʻldirilishidan tashqari, bunda yigʻim toʻliq miqdorda toʻlanadi) yigʻim ushbu Shartlarni tasdiqlash uchun toʻlangan summaning yarmi miqdorida toʻlanadi.

20. Tashkilotchining mansabdor shaxslari Shartlardagi mavjud maʼlumotlarning toʻgʻriligi, shuningdek oʻyinni oʻtkazish shartlariga rioya qilinishi uchun javob beradilar.

21. Litsenziyalovchi organ oʻyinni oʻtkazishning qonunchilikda va ushbu Nizomda belgilangan shartlari va tartibiga rioya qilinishi ustidan nazoratni amalga oshiradi.

22. Litsenziyalovchi organ oʻyinning oʻtkazilishini toʻxtatib qoʻyish yoki muddatidan oldin toʻxtatish huquqiga ega. Quyidagilar oʻyinlarning oʻtkazilishini toʻxtatib qoʻyish yoki toʻxtatish uchun asos boʻlishi mumkin:

taqdim etilgan hujjatlardagi maʼlumotlarning haqiqiy emasligi;

litsenziyada belgilangan faoliyat turiga rioya qilinmaganlik;

oʻyin tashkilotchisining litsenziya talablari va shartlariga nomuvofiqligi;

oʻyinni oʻtkazishning tasdiqlangan Shartlari va tartibining buzilishi;

tashkilotchining oʻyin qatnashchilari oldidagi majburiyatlari bajarilmasligiga olib keluvchi moliyaviy ahvolining yomonlashishi;

litsenziyalovchi organ koʻrsatmalarining bajarilmasligi.

Oʻyinlarni oʻtkazish amaldagi qonunchilikda nazarda tutilgan boshqa asoslar boʻyicha ham toʻxtatib qoʻyilishi yoki toʻxtatilishi mumkin.

23. Oʻyinni oʻtkazishni toʻxtatib qoʻyish yoki toʻxtatish toʻgʻrisidagi qaror yuzasidan tashkilotchi iqtisodiy sudga shikoyat qilishi mumkin.

24. Oʻyin biletlari qimmatli qogʻozlar tayyorlash uchun litsenziyaga ega boʻlgan korxonalarda tayyorlanishi hamda qalbakilashtirishdan kamida olti darajali himoyaga ega boʻlishi kerak. Lotereyalarning aktiv turlarini biletlarini qatnashchi tomonidan tanlangan tiraj natijalarini roʻyxatdan oʻtkazgan holda shakllantirishni nazarda tutuvchi oʻyinlarni oʻtkazishda oʻyin biletlari blankalari himoyalashning kam darajalari bilan, oʻyinlar biletlarini roʻyxatdan oʻtkazishda himoyalashning zarur darajasiga biletlarda maxsus kodlarni yoki belgilarni koʻrsatish yoʻli bilan erishish shartlariga rioya qilgan holda tayyorlanishi mumkin. Tayyorlovchi korxonalar tomonidan oʻyinlar biletlarini tayyorlashga faqat tashkilotchida faoliyatning litsenziyalanadigan turi bilan shugʻullanish huquqini beruvchi litsenziya va litsenziyalovchi organ tomonidan tasdiqlangan Shartlar mavjud boʻlgan taqdirdagina yoʻl qoʻyiladi.

25. Oʻyinlar biletlarini saqlash maxsus jihozlangan binolarda, biletlar saqlanishini taʼminlash boʻyicha albatta zarur chora-tadbirlar koʻrilgan holda amalga oshiriladi.

26. Oʻyinlar biletlari qayta sanab chiqilmasdan va tayyorlovchi korxonalarga, yetkazib beruvchilarga yoki tashuvchilarga nisbatan eʼtirozlar oʻz vaqtida bildirilmasdan qabul qilingan hollarda oʻyin biletlarining yetishmasligi yoki yaroqsizlanganligi yuzasidan moddiy javobgarlik oʻyin biletlarini qabul qilib olishning belgilangan tartibiga amal qilishni taʼminlamagan oʻyin tashkilotchisiga yuklanadi.

27. Oʻyin biletlarini tarqatish uchun berish, hisobga olish va hisobot masalalari tashkilotchining vakolatiga kiradi va uning ichki hujjatlari bilan tartibga solinadi.

28. Oʻyin biletlari chiqarish summasini va sonini koʻpaytirib yuborishga, shuningdek Shartlarda belgilangan oʻyinda qatnashish qiymatini oʻzgartirishga yoʻl qoʻyilmaydi.

29. Oʻyinlar biletlarini tarqatishga, oʻyin boʻyicha faqat litsenziya olingandan va Shartlar litsenziyalovchi organ tomonidan tasdiqlangandan keyingina yoʻl qoʻyiladi.

30. Oʻyinlar biletlarini tarqatish, oʻzining tarqatuvchilar tarmogʻi orqali yoki shartnoma asosida boshqa yuridik va jismoniy shaxslarni jalb etish yoʻli bilan amalga oshiriladi.

31. Aholi oʻrtasida lotereya biletlarini tarqatish, ixtiyoriylik prinsipiga majburiy rioya etilgan holda amalga oshiriladi.

Lotereya biletlarini balogʻatga yetmagan shaxslarga tarqatish taqiqlanadi.

32. Oʻyinni oʻtkazish boʻyicha reklama kompaniyasi Shartlar litsenziyalovchi organ tomonidan tasdiqlangandan keyingina boshlanadi. Oʻyinni oʻtkazish boʻyicha reklama kompaniyasi Shartlar litsenziyalovchi organ tomonidan tasdiqlanmasdan oldin oʻtkazilganda javobgarlik reklama beruvchi zimmasiga yuklanadi.

Oʻtkazilishi tugallangan, taqiqlangan yoki toʻxtatib qoʻyilgan oʻyinning reklama kompaniyasi tegishli ravishda toʻxtatib qoʻyilishi yoki toʻxtatilishi kerak.

Oʻyin reklamasi uni oʻtkazish shartlarini buzmasligi kerak.

Lotereyalar reklamasida balogʻatga yetmagan shaxslarning reklama qilinayotgan lotereyada qatnashishiga yoʻl qoʻymaslik toʻgʻrisidagi ogohlantirish mavjud boʻlishi kerak.

33. Oʻyinlarni oʻtkazish faqat yutuqli biletlarni tasodifiy tanlab olish jarayoniga inson omilining biron-bir taʼsirini toʻliq istisno qiluvchi texnologiyalar va jihozlarni qoʻllagan holda amalga oshiriladi. Jihozlarning soz holatda boʻlishi uchun oʻyin tashkilotchisi javob beradi.

34. Tiraj lotereyalari oʻyini litsenziyalovchi organning normativ hujjatlarida belgilangan tartibda oʻtkaziladi. Boshqa oʻyinlar boʻyicha oʻyinlarni oʻtkazish va oʻyin yakunlarini litsenziyalovchi organga taqdim etish tartibi ushbu oʻyinlarni oʻtkazish Shartlarida belgilanadi.

35. Oʻyin televideniye orqali olib koʻrsatilgan taqdirda tashkilotchilar yutuqlarni aniqlash tartibotini namoyish etgan holda bevosita efirda tirajning oʻzini olib koʻrsatilishini taʼminlaydilar.

36. Har qaysi oʻyin uchun alohida jihozlar, bezaklar, rekvizitlardan foydalaniladi.

Rekvizitdan (sharlar, bochonkalar komplektlari va boshqalardan) oʻyin mobaynida bir marta foydalaniladi.

37. Quyidagilar oʻyinlar boʻyicha yutuqlar boʻlishi mumkin:

pul mablagʻlari;

buyum yutuqlari, bunda yutuq egasi uning qiymatini naqd pul bilan olish huquqiga ega (agar Shartlarda boshqacha tartib nazarda tutilmagan boʻlsa). Bitta buyum yutugʻini uning egasi roziligisiz boshqasi bilan almashtirishga yoʻl qoʻyilmaydi;

koʻchar va koʻchmas mulk tarzidagi yutuqlar;

nomoddiy tusdagi yutuqlarning boshqa turlari, koʻchmas mulklar, ayrim tovarlar va xizmatlar, turistik sayohatlar, sanatoriy va dam olish uylariga yoʻllanmalar sotib olish boʻyicha imtiyozlar.

38. Oʻyinning Shartlarda koʻrsatilgan va oʻyin qatnashchilari mablagʻlarining taqsimlanmagan qismidan iborat boʻlgan yutuq fondi oʻyin tashkilotchisining aktivi hisoblanmaydi va uning tomonidan, qatnashchilarga yutuqlarni toʻlash yoki berishdan tashqari, boshqa hech qanday maqsadlarda foydalanilishi mumkin emas.

Yutuq fondi oʻyin tashkilotchisining mulki hisoblanmaydi va undan tashkilotchi majburiyatlari boʻyicha qarzlar undirib olinishi mumkin emas.

39. Oʻyinlarning yutuq (mukofot) fondlari quyidagi miqdorlarda belgilanishi kerak:

tirajli va lahzali lotereyalar uchun — lotereya biletlarini tarqatishdan olingan pul mablagʻlari summasidan qatʼi nazar, chiqarilgan lotereyalar hajmining kamida 40 foizi miqdorida;

lotereyalarning boshqa turlari uchun — tarqatilgan lotereya biletlari umumiy summasining kamida 40 foizi miqdorida;

40. Buyum yoki boshqa pul boʻlmagan yutuqlarni nazarda tutuvchi oʻyinlarni oʻtkazishda tashkilotchilar oʻyinlarni oʻtkazish boshlangungacha koʻrsatilgan toifadagi yutuqlarni sotib olishga majburdirlar. Alohida hollarda (tirajli lotereyalardan tashqari) oʻyin xususiyatlariga koʻra litsenziyalovchi organning ruxsati bilan yutuqlarning bir qismi oʻyin oʻtkazilgandan keyin, lekin oʻyinning oʻtkazilish sanasidan boshlab 15 kundan kechikmay sotib olinishi mumkin. Bunday hollarda tashkilotchilar litsenziyalovchi organga yetkazib berish yuzasidan shartnomalarni va (yoki) oʻyin tashkilotchisi tomonidan oʻz majburiyatlarining oʻz vaqtida bajarilishini tasdiqlovchi boshqa hujjatlarni taqdim etishi shart.

41. Yutuq fondining qarz olingan mablagʻlar hisobiga shakllantirilishiga yoʻl qoʻyilmaydi.

42. Yutuq fondi mablagʻlarini saqlash tartibi har xil tirajlar yutuq fondlarining alohida saqlanishini taʼminlashi kerak.

43. Oʻyin biletlarini tarqatishdan tushgan mablagʻlar, qonunchilikda belgilangan majburiy toʻlovlar amalga oshirilgandan keyin, birinchi navbatda oʻyinning yutuq fondini shakllantirishga, yutuqlar boʻyicha toʻlovlarni (buyum yutuqlarini berishni) taʼminlashga yoʻnaltiriladi.

Pul shaklidagi yutuq fondini shakllantirish oʻyin biletlarini tarqatishdan olingan mablagʻlarning bir qismini kamida yutuq fondi ulushi miqdorida zaxira qilib qoʻyish yoʻli bilan amalga oshiriladi.

44. Talab qilib olinmagan pulsiz shakldagi yutuqlar tashkilotchida yoxud ushbu maqsad uchun shartnoma asosida maxsus jalb etilgan yuridik shaxsda yutuqni toʻlash muddati tugagungacha saqlanadi. Yutuqni toʻlash muddati tugagandan keyin talab qilib olinmagan yutuq fondi ijtimoiy-xayriya maqsadlariga, shu jumladan aniq tarzdagi ijtimoiy dasturlarni qoʻllab-quvvatlashga (bolalar bogʻchalari, maktablar, shifoxonalar, poliklinikalar va shu kabilarga moliyaviy yordam uchun) yoʻnaltiriladi, ularning aniq yoʻnalishlari oʻyinni oʻtkazish Shartlarida nazarda tutiladi.

45. Oʻyinning tarqatilmagan biletlarini yoʻq qilish litsenziyalovchi organ, jamoatchilik va oʻyin tashkilotchisi vakillaridan iborat boʻlgan maxsus komissiya tomonidan amalga oshiriladi. Tirajli lotereyalarni oʻtkazishda maxsus komissiya tiraj oʻtkazilishidan kamida besh kun oldin tuziladi.

46. Oʻyin biletlari:

tiraj oʻtkaziladigan paytga kelib oʻyin biletlarining bir qismi tarqatilmay qolgan (tirajli va sonli lotereyalarning ayrim turlarida);

oʻyin oʻtkazishni tugallash paytiga kelib biletlarning bir qismi foydalanilmay qolgan;

tashkilotchi tomonidan tayyorlovchidan tayyor biletlarni olishda yoki oʻyinni oʻtkazish jarayonida oʻyin biletlarida oʻyinni Shartlar va litsenziyalovchi organ talablariga muvofiq tegishli tarzda oʻtkazishga xalaqit qiluvchi brak (nuqson) aniqlangan;

oʻyinni oʻtkazish amaldagi qonunchilikka muvofiq muddatidan oldin toʻxtatilgan hollarda yoʻq qilinadi.

47. Tirajli va sonli lotereyalarning ayrim turlarini oʻtkazishda tarqatilmagan oʻyin biletlari komissiya tomonidan yoʻq qilish dalolatnomasi tuzilgan holda tiraj oʻtkazilgunga qadar (oʻyin Shartlarida belgilangan muddatlarda) yoʻq qilinadi. Yoʻq qilish dalolatnomasi yoʻq qilingan biletlarning barcha rekvizitlari albatta koʻrsatilgan holda toʻrt nusxada tuziladi. Dalolatnomaning bir nusxasi tiraj oʻtkazilgunga qadar majburiy tartibda litsenziyalovchi organga taqdim etiladi, dalolatnomaning ikkinchi nusxasi oʻyin biletlarini yoʻq qilish komissiyasi raisida, uchinchi nusxasi — oʻyin tashkilotchisida qoladi, toʻrtinchi nusxasi litsenziyalovchi organning belgisi bilan tiraj boshlangunga qadar bevosita tiraj komissiyasi raisiga taqdim etiladi, bu tirajni oʻtkazish uchun asos hisoblanadi.

48. Tashkilotchilarga bogʻliq boʻlmagan ayrim sabablarga koʻra tarqatilmagan oʻyin biletlari tirajni oʻtkazish boshlangunga qadar yoʻq qilinmay qolgan hollarda komissiya oʻyin biletlarini muhrlab qoʻyadi va yoʻq qilinadigan oʻyin biletlarining barcha rekvizitlarini, shuningdek ularning yoʻq qilinishiga xalaqit bergan sabablarni koʻrsatgan holda tegishli dalolatnoma tuzadi. Muhrlash (plombalash), Shartlarda boshqacha hol nazarda tutilmagan boʻlsa, litsenziyalovchi organ vakili boʻlgan komissiya aʼzosi tomonidan amalga oshiriladi. Dalolatnomaning bir nusxasi tiraj oʻtkazilgunga qadar majburiy tartibda litsenziyalovchi organga taqdim etiladi, dalolatnomaning ikkinchi nusxasi oʻyin biletlarini yoʻq qilish komissiyasi raisida, uchinchi nusxasi — oʻyin tashkilotchisida qoladi, toʻrtinchi nusxasi litsenziyalovchi organning birinchi nusxa olinganligi toʻgʻrisidagi belgisi bilan tiraj boshlangunga qadar bevosita tiraj komissiyasi raisiga taqdim etiladi, bu tirajni oʻtkazish uchun asos hisoblanadi.

49. Bir lahzali lotereya biletlari seriyalar (chiqarishlar, razryadlar, turkumlar) boʻyicha, ularda ishlab chiqarish braki va boshqa nuqsonlar aniqlangan, yutuqlar belgilangan oʻyin chizigʻining himoya qoplami yoki maxsus tanib olish kodlari zonalari qisman yoki toʻliq buzilgan, lotereya biletlari qalbakilashtirishdan himoya qilish talablariga muvofiq boʻlmagan, shuningdek lotereya biletlari rekvizitlari Shartlarda tasdiqlangan rekvizitlariga muvofiq boʻlmagan istisno hollarda, ushbu seriya (chiqarish, razryad, turkum) tarqatilmasdan, yoʻq qilinadi.

50. Bir lahzali lotereyalarning oʻynalmagan biletlari mazkur Nizomning 46-bandida nazarda tutilgan tartibga oʻxshash tartibda yoʻq qilinadi. Tashkilotchi tomonidan toʻlovga taqdim etilgan yutuq chiqqan biletlarning yoʻq qilinishiga faqat yutuq chiqqan bilet egasi boʻlgan qatnashchiga yutuq toʻliq toʻlangandan keyin yoʻl qoʻyiladi. Bunda mayda yutuq chiqqan oʻyin biletlari ularning toʻplanishiga qarab, yutuq toʻlangan sanadan boshlab kamida bir oydan keyin yoʻq qilinadi, yirik yutuq chiqqan oʻyin biletlari esa yutuqni toʻlash (berish) sanasidan boshlab daʼvo arizasi berish muddatidan oldin yoʻq qilinishi mumkin emas.

51. Boshqa oʻyinlar biletlari oʻyinni oʻtkazishning tasdiqlangan Shartlarida nazarda tutilgan tartibda yoʻq qilinadi.

52. Yutuqlarni toʻlash (berish) tartibi, muddatlari va shartlari litsenziyalovchi organ tomonidan tasdiqlangan Shartlarga muvofiq belgilanadi.

53. Yutuq chiqqan oʻyin biletlarini litsenziyalovchi organga (yoki uning vakolatli vakiliga) taqdim etishning Shartlarda belgilanadigan muddati tiraj oʻtkazilgan yoki oʻyinni oʻtkazish tugagan kundan boshlab uch oydan kam boʻlmasligi kerak.

Yutuqlarni toʻlash (berish) muddati yutuq chiqqan bilet toʻlovga taqdim etilgan sanadan boshlab uch oydan ortiq boʻlishi mumkin emas.

Yutuq chiqqan biletlarni toʻlovga taqdim etishning Shartlarda belgilangan muddatlari oʻzgartirilishiga yoʻl qoʻyilmaydi.

54. Qalbakilashtirishning oldini olish maqsadida tashkilotchining yoki litsenziyalovchi organning xohishiga koʻra oʻyinning haqiqiyligiga shubha tugʻilgan har qanday bileti tegishli ekspertizadan oʻtkazilishi mumkin.

55. Oʻyinning yutuq chiqqan biletlari ekspertizasi oʻyin tashkilotchisi yoki, zarurat boʻlganda, tayyorlagan korxona tomonidan yutuq chiqqan bilet toʻlovga taqdim etilgan kundan boshlab bir oydan ortiq boʻlmagan muddatda amalga oshiriladi.

56. Oʻyinlarni oʻtkazishning buxgalteriya hisobi Oʻzbekiston Respublikasining buxgalteriya hisobi va hisoboti toʻgʻrisidagi qonunchiligida belgilangan tartibda yuritiladi.

57. Tashkilotchi tomonidan har chorakda, hisobot davri tugagandan keyin 30 kundan ortiq boʻlmagan muddatda litsenziyalovchi organga hisobotlar taqdim etiladi (2-ilova).

Oʻyinlarni oʻtkazish Shartlarida, oʻtkazilayotgan oʻyinning xususiyatiga qarab litsenziyalovchi organga tirajlar va oʻyinlarni oʻtkazish natijalari, muayyan razryadlar, seriyalar, chiqarishlar yakunlari toʻgʻrisida Shartlarda kelishilgan muddatlarda va shaklda majburiy tartibda qoʻshimcha axborot (oraliq hisobot) taqdim etish tartibi nazarda tutilishi mumkin.

Oʻyinni oʻtkazish yakunlari toʻgʻrisidagi hisobotni imzolagan mansabdor shaxslar undagi maʼlumotlarning toʻgʻriligi uchun qonunchilikda belgilangan tartibda javob beradilar.

58. Litsenziyalovchi organ istalgan maʼlumotlarni, shu jumladan maxfiy maʼlumotlarni ham (bir lahzali lotereyalar uchun — garovnomani, tarqatilmagan yoki yaroqsiz biletlarni yoʻq qilish, sotilgan biletlar va miqdori, tarqatish uchun berilgan oʻyin biletlari miqdori, yutuqlarni toʻlash (berish), tashkilotchilarning moliyaviy ahvoli va boshqalar), oʻyinni oʻtkazish bilan bogʻliq materiallarni talab qilib olishi, shuningdek biletlarni tarqatish va oʻyinni oʻtkazish joylarida belgilangan tartibda tekshirishlar oʻtkazishi mumkin.

59. Litsenziyalovchi organ amaldagi qonunchilikning va ushbu Nizomning buzilishiga yoʻl qoʻymaslik maqsadida oʻyinlarni oʻtkazishning borishi ustidan nazoratni taʼminlashga majburdir.

60. Litsenziyalovchi organ oʻyin qatnashchilarining, oʻyinlarni oʻtkazish jarayoni qatnashchilarining amaldagi qonunchilikning yoki oʻyinni oʻtkazishning ushbu Nizomda belgilangan tartibining yoxud litsenziyalovchi organ tomonidan tasdiqlangan Shartlarning oʻyin tashkilotchilari tomonidan buzilishlariga oid shikoyat va arizalarini qabul qiladi.

61. Litsenziyalovchi organ oʻyinni oʻtkazish jarayoni qonunchilik, ushbu Nizom yoki litsenziyalovchi organ tomonidan tasdiqlangan Shartlar buzilgan holda oʻtkazilgan taqdirda oʻyinni oʻtkazish jarayonini toʻxtatishga, litsenziyaning amal qilishini toʻxtatib qoʻyish yoki toʻxtatishga haqlidir.

Oʻyinni oʻtkazish jarayoni toʻxtatib qoʻyilgan taqdirda tashkilotchi toʻxtatib qoʻyishga sabab boʻlgan buzilishlarni 30 kun muddatda bartaraf etishga majburdir, shundan keyin oʻyinni oʻtkazish jarayoni litsenziyalovchi organning maxsus ruxsatnomasiga binoan davom ettirilishi mumkin.

Aks holda litsenziyalovchi organ litsenziyaning amal qilishini toʻxtatib qoʻyish (toʻxtatish) huquqiga ega va tegishli faoliyat toʻxtatiladigan muddatni belgilaydi.

62. Litsenziyaning amal qilishi toʻxtatib qoʻyilgan yoki toʻxtatilgan hollarda litsenziyalovchi organ tashkilotchidagi mavjud sotilmagan biletlarni olib qoʻyishi, litsenziyalovchi organ tomonidan belgilanadigan, sotilgan (shu jumladan boshqa yuridik va jismoniy shaxslarda tarqatishda boʻlgan) oʻyin biletlari, hamda toʻlovga taqdim etilgan yutuqlar summasidan ortiq boʻlmagan summadagi pul mablagʻlarini soʻzsiz undirib olishi, ularni vakolatli banklarda ochilgan maxsus hisob raqamlariga oʻtkazishi mumkin.

Tashkilotchidan aholi oʻrtasida tarqatilmagan oʻyin biletlarini olib qoʻyish biletlarni qayta sanash va roʻyxatga olish yoʻli bilan amalga oshiriladi, keyinchalik ular taxlanadi, plombalanadi va saqlash uchun qoʻyiladi.

Tarqatilgan oʻyin biletlari va mablagʻlarni qaytarish ularning egalarining litsenziyalovchi organga yoki uning vakolatli vakiliga biletlar taqdim etilgan arizalari asosida amalga oshiriladi. Mablagʻlar litsenziyalovchi organ tomonidan belgilanadigan miqdorlarda va muddatlarda, maxsus hisob raqamida jamlangan summadan kelib chiqqan holda qaytariladi. Bilet egalarining mablagʻlarni qaytarish toʻgʻrisidagi arizalari fuqarolik qonunchilikda belgilangan daʼvo arizasi muddatlari doirasida qabul qilinadi. Daʼvo bildirish muddatlari oʻtib ketgan taqdirda talab qilib olinmagan mablagʻlar qoldigʻi respublika budjeti foydasiga undiriladi.

Tashkilotchidan olib qoʻyilgan va xaridorlardan olingan biletlar litsenziyalovchi organ tomonidan belgilangan tartibda, litsenziyalovchi organ rahbari yoki uning topshirigʻiga binoan litsenziyalovchi organning masʼul xodimi imzolaydigan tegishli dalolatnoma tuzilgan holda yoʻq qilinadi

1. Tashkilotchining yuridik shaxs sifatidagi maqomi, uning roʻyxatdan oʻtkazilgan toʻliq va qisqartirilgan nomi. Roʻyxatdan oʻtkazilgan sana va tartib raqami, roʻyxatdan oʻtkazgan organning nomi.

2. Tashkilotchi joylashgan joy (pochta manzili), bank rekvizitlari, telefoni.

3. Oʻyinni tashkil etish toʻgʻrisida qaror qabul qilingan sanadagi tashkilotchi rahbarlarining familiyasi, ismi, otasining ismi, egallab turgan lavozimi, telefon raqamlari koʻrsatilgan holdagi roʻyxati.

4. Lotereya tashkil etish va oʻtkazishdagi oldingi tajribalar toʻgʻrisida qisqacha maʼlumot.

1. Tashkilotchi mol-mulkining qisqacha tavsifi va faoliyatining asosiy turlari.

2. Korxonaning buxgalteriya balansi, oxirgi hisobot sanasidagi foydalar va koʻrilgan zararlar toʻgʻrisidagi hisobot.

3. Tashkilotchida soliqlarga oid va boshqa imtiyozlar mavjudligi toʻgʻrisidagi maʼlumotlar.

4. Tashkilotchida hujjatlarni litsenziya beruvchi organga taqdim etish paytidagi soliqlar va budjetdan tashqari jamgʻarmalarga majburiy toʻlovlar boʻyicha muddati oʻtkazib yuborilgan qarzlar mavjudligi toʻgʻrisidagi maʼlumotlar.

5. Bank kreditlari boʻyicha qarzlar toʻgʻrisidagi maʼlumotlar, shu jumladan:

bankning qisqa muddatli kreditlari (jumladan, toʻlov muddati oʻtkazib yuborilganlari);

toʻlov muddatlari boʻyicha taqsimlangan holdagi bankning uzoq muddatli kreditlari (shu jumladan toʻlov muddati oʻtkazib yuborilganlari);

kreditorlik qarzlarining umumiy summasi (shu jumladan toʻlov muddati oʻtkazib yuborilgan qarzlar).

6. Tashkilotchiga oxirgi uch yil mobaynida davlat boshqaruv organlari yoki sud tomonidan solingan maʼmuriy va iqtisodiy sanksiyalar toʻgʻrisidagi maʼlumotlar. Bunday maʼlumotlarda quyidagilar boʻlishi kerak:

sanksiya solingan sana;

sanksiya solgan organ;

sanksiya solish sabablari;

sanksiyalarning turi;

sanksiyalar miqdori;

sanksiyalarning oʻyinni tashkil etish toʻgʻrisida qaror qabul qilingan paytdagi bajarilishi darajasi.

1. Oʻyin toʻgʻrisidagi umumiy maʼlumotlar:

oʻyin turi;

oʻyinni oʻtkazish maqsadi;

oʻtkaziladigan oʻyinning umumiy hajmi;

chiqariladigan biletlarning soni, ularning tartib raqamlari (razryadlarga, seriyalarga, tartib raqamlariga taqsimlangan holda va boshqalar);

oʻyinda qatnashish (lotereya bileti) qiymati;

yutuq fondining summasi;

buyum, pul yutuqlari yoki boshqa xil yutuqlarning toʻliq roʻyxati, ularning qiymati, soni, miqdorlari va summalari bilan birga.

2. Oʻyinlarni oʻtkazish qoidalari:

a) Biletlarni tarqatish (masʼul ijrochilar koʻrsatilgan holda):

biletlarni tarqatish muddatlari;

oʻyinni oʻtkazish moʻljallanayotgan hudud hamda biletlarni sotish shoxobchalarini tashkil etish, joylashtirish, ularning ishini rejalashtirish tartibi;

oʻyin biletlarini tarqatish tartibi (bu tartib naqd pulsiz hisob-kitob boʻyicha biletlarni sotib olishni xohlovchi tashkilotlarga sotish tartibini, biletlarni aholiga sotish tartibini oʻz ichiga oladi);

biletlarni tarqatuvchilarni tanlash, oʻyin boʻyicha tushgan tushumlarni saqlash, topshirish va inkassatsiya qilish (banklarga topshirish) tartibi;

xarajatlar smetasini ilova qilgan holda biletlarni tarqatganlik uchun haq toʻlash miqdori va tartibi;

b) Oʻyinlarni oʻtkazish (masʼul ijrochilar koʻrsatilgan holda):

oʻyinni oʻtkazish muddatlari;

oʻyinlarni oʻtkazish qoidalari (keltirilayotgan qoidalar Nizomning 2-bandiga muvofiqligini tushuntirgan holda);

tirajni oʻtkazish sanasi va joyi. Bir lahzalik lotereya oʻyinlari oʻtkazilgan hollarda lotereya biletlarini sotish muddatlari koʻrsatiladi;

sotilmay yoki yaroqsiz boʻlib qolgan biletlarni yoʻq qilish tartibi va muddatlari;

yutuqlar tirajini oʻtkazish tartibi (tirajli lotereyalar uchun — lotereya tiraji litsenziyalovchi organning yoʻriqnomalariga koʻra, boshqa lotereyalar uchun — lotereyani oʻtkazish shartlarida keltirilgan tartibga muvofiq oʻtkaziladi;

yutuqlarni olish muddatlari, joyi, shartlari va tartibi.

3. Oʻyinlar oʻtkazilishini taʼminlash (masʼul ijrochilar koʻrsatilgan holda);

biletlarni tayyorlash va ularni ekspertizadan oʻtkazish shartnomasining asosiy shartlari;

tovarlar va boshqa xil boyliklarni sotib olish tartibi (buyum yoki pul-buyum yutuqlari oʻyinlari oʻtkazishda yutuqlar roʻyxati oʻyin shartlariga kiritilgan taqdirda);

lotereyalarni tarqatuvchilar bilan namunaviy shartnoma;

hujjatlarni rasmiylashtirish, biletlarni tayyorlash va tarqatish, reklama qilish hamda texnik xizmat koʻrsatish, oʻyinni oʻtkazish boʻyicha boshqa tashkiliy-texnik masalalar bilan bogʻliq tadbirlar kompleksini amalga oshiruvchi tashkilotchilar oʻrtasida vazifalarni taqsimlash.

4. Mablagʻlardan foydalanish va hisobot:

biletlarni sotish bilan bogʻliq operatsiyalar boʻyicha hisob va hisobot tartibi, oʻyin boʻyicha litsenziyalovchi organga hisobotlar taqdim etish sanasi;

oʻyinni oʻtkazish natijasida olingan daromadni taqsimlash tartibi (uni oʻtkazish bilan bogʻliq barcha xarajatlarni koʻrsatgan holda);

tegishli asoslash bilan birga muayyan maqsadga qaratilgan, xayriya lotereyalari uchun lotereyalar chiqarish yoʻli bilan jalb qilinadigan mablagʻlardan foydalanish yoʻnalishlari. Agar loyiha birorta ixtisoslashtirilgan tuzilmalarda ekspertizadan oʻtgan boʻlsa, u holda ushbu ekspertizani hujjat bilan tasdiqlash zarur;

oʻyinni tashkil etish va oʻtkazishda faol qatnashgan xodimlarni ragʻbatlantirish uchun mukofot jamgʻarmasini tashkil etish tartibi. Mukofot jamgʻarmasidan toʻlov faqat oʻyin tiraji oʻtkazilgandan (bir lahzali lotereyalar razryadi yoki seriyasi sotib boʻlingandan) soʻng amalga oshiriladi.

200____ yilning (choragi/ yil) _______uchun

litsenziya egasining nomi;

oʻyin oʻtkazishga asos boʻlgan litsenziyaning tartib raqami va berilgan sanasi;

oʻyinni oʻtkazish shartlari tasdiqlangan sana;

lotereya biletlarini tayyorlagan tashkilot (korxona)ning nomi;

tayyorlangan lotereya biletlarining soni va summasi;

sotilgan biletlar (hisobot davrida va chiqarila boshlangandan buyon reja boʻyicha hamda amalda);

biletlarni sotishdan tushgan tushum (hisobot davrida va chiqarila boshlangandan buyon reja boʻyicha hamda amalda).

oʻtkazilgan oʻyinlar (oʻtkazilgan sanalar, oʻyinga qoʻyilgan lotereyalarning soni va turlari, bekor qilingan, yoʻq qilingan yoki olib qoʻyilgan lotereyalar soni va turlari);

tirajlarni oʻtkazish komissiyasi tarkibi va javobgar shaxslar;

tirajni oʻtkazish natijalari boʻyicha komissiyaning hisoboti;

chiqqan yutuqlar soni va turlari (mukofotlar va summalar koʻrsatilgan holda);

berilgan yutuqlar (mukofotlar va summalar koʻrsatilgan holda);

talab qilib olinmagan yutuqlar (mukofotlar va summalar koʻrsatilgan holda);

biletlarni yoʻq qilish yoki bekor qilish komissiyasi tarkibi;

biletlarni yoʻq qilish yoki bekor qilish komissiyasining hisoboti.

tarqatilgan biletlar soni va tarqatishdan tushgan umumiy tushum;

oʻyinni oʻtkazishga oid xarajatlar, shu jumladan:

biletlarni tayyorlash, transportda tashish, yetkazib berish va saqlash uchun (hisob-kitob narxlariga solishtirganda);

mukofotlarni xarid qilish va yutuqlarni toʻlash uchun (har bir turi boʻyicha mukofotlarni xarid qilishning hisob-kitob va amaldagi narxlariga solishtirganda);

biletlarni tarqatuvchi shaxslarga haq toʻlash uchun (rejalashtirilgan toʻlovlarga solishtirganda);

reklama uchun (smeta boʻyicha xarajatlar bilan solishtirganda);

tirajlarni oʻtkazish xarajatlari;

mukofot toʻlovlari;

boshqa xarajatlar va majburiy toʻlovlar;

toʻlangan va toʻlanishi kerak boʻlgan soliqlar hamda boshqa yigʻimlar, ularning summasi, toʻlash muddatlari;

sof foyda;

foydadan maqsadli foydalanish toʻgʻrisidagi hisobot (maqsadli oʻyinlar uchun).