Innovatsion texnologiya yechimlarini tatbiq etish asosida foydali qazilma ruda konlarini oʻzlashtirishga yoʻnaltirilgan ilmiy-tadqiqot va loyiha-qidiruv ishlarining samaradorligi va natijadorligini yanada oshirish, shuningdek, yer qaʼrini geologik oʻrganish, oqilona foydalanish va muhofaza qilish tizimini yanada takomillashtirish maqsadida:

1. Oʻzbekiston Respublikasi Iqtisodiyot vazirligi, Moliya vazirligi, Oʻzbekiston Respublikasi Davlat geologiya va mineral resurslar qoʻmitasi, Oʻzbekiston Respublikasi Davlat arxitektura va qurilish qoʻmitasi hamda Oʻzbekiston Respublikasi Xususiylashtirilgan korxonalarga koʻmaklashish va raqobatni rivojlantirish davlat qoʻmitasining “OʻzGEORANGMETLITI” DUKni Oʻzbekiston Respublikasi Davlat arxitektura va qurilish qoʻmitasi tizimidan Oʻzbekiston Respublikasi Davlat geologiya va mineral resurslar qoʻmitasi (keyingi oʻrinlarda — Davlat geologiya qoʻmitasi) tizimiga topshirish toʻgʻrisidagi taklifi qabul qilinsin.

2. Oʻzbekiston Respublikasi Davlat geologiya qoʻmitasi “OʻzGEORANGMETLITI” DUKning asosiy vazifalari va faoliyat yoʻnalishlari etib quyidagilar belgilansin:

foydali qazilma ruda konlarini, birinchi galda qimmatbaho va rangli metallar, shuningdek, uranni qazib olish va ishlash boʻyicha konchilik va metallurgiya sanoati obyektlari uchun loyiha oldi va loyiha-qidiruv hujjatlarini ishlab chiqish;

konchilik va metallurgiya sanoatiga yuqori texnologik uskunalar va zamonaviy texnologiyalarni tatbiq etish monitoringini olib borish, ularning ishlab chiqarish-texnik va moliyaviy-iqtisodiy koʻrsatkichlarini baholash;

jahon fani va amaliyoti yutuqlarini tahlil qilish asosida qiyin togʻ-geologik sharoitlarida konlarni kompleks oʻzlashtirish sohasida samarali loyiha yechimlarini ishlab chiqish;

mineral xomashyoni qazib olish texnologiyasi sohasida amaliy va innovatsion ilmiy-tadqiqot ishlarini oʻtkazish hamda asosiy va qoʻshilib chiqadigan qimmatbaho komponentlarning yuqori darajada chiqarib olinishini hisobga olgan holda ularni kompleks ravishda qayta ishlash;

respublika kon-metallurgiya kombinatlarining investitsiya loyihalarida nazarda tutilgan loyiha yechimlarini toʻliq va sifatli amalga oshirish boʻyicha mualliflik nazoratini olib borish;

institutni modernizatsiya qilish va texnik qayta jihozlash tadbirlarini amalga oshirish hamda zamonaviy axborot-kommunikatsiya texnologiyalarini joriy etish;

loyiha-qidiruv ishlari sohasida kadrlarni, jumladan, yetakchi xorijiy oliy oʻquv yurtlarida va oʻquv markazlarida tayyorlash, qayta tayyorlash va malakasini oshirish, ular mehnatini ragʻbatlantirishning samarali choralarini joriy etish;

3. Quyidagilar belgilansin:

Oʻzbekiston Respublikasi Davlat geologiya va mineral resurslar qoʻmitasi “OʻzGEORANGMETLITI” DUKning taʼsischisi hisoblanadi:

“Navoiy KMK” DK va “Olmaliq KMK” AJga investitsiya loyihalarining loyihaoldi va loyiha hujjatlarini ishlab chiqishda “OʻzGEORANGMETLITI” DUK bosh loyihachi hisoblansin;

“OʻzGEORANGMETLITI” DUK doimiy asosli va investitsiya loyihasi amalga oshiriladigan butun davr mobaynida tasdiqlangan loyiha yechimlariga rioya qilinishi monitoringini amalga oshiradi va loyiha tashabbuskori bilan birgalikda mineral xomashyoni qazib olish va qayta ishlash texnologiyasini yanada takomillashtirish ishlarini olib boradi;

Oʻzbekiston Respublikasi Prezidentining 2017-yil 2-maydagi “Loyiha-qidiruv tashkilotlari faoliyatini yanada takomillashtirish chora-tadbirlari toʻgʻrisida”gi PQ-2946-son qarorida yetakchi loyiha-qidiruv tashkilotlari uchun nazarda tutilgan imtiyoz va preferensiyalar “OʻzGEORANGMETLITI” DUKga nisbatan saqlab qolinadi.

4. Belgilansinki, “OʻzGEORANGMETLITI” DUKning faoliyatini muvofiqlashtirish Davlat geologiya qoʻmitasi raisining birinchi oʻrinbosari tomonidan amalga oshiriladi.

5. Oʻzbekiston Respublikasi Davlat geologiya qoʻmitasi bir oy muddatda:

Oʻzbekiston Respublikasi Davlat arxitektura va qurilish qoʻmitasi bilan birgalikda “OʻzGEORANGMETLITI” DUKning tegishli binolari, inshootlari va boshqa mulkini operativ boshqarish huquqi bilan qabul qilish-topshirishni;

“OʻzGEORANGMETLITI” DUKning yangilangan ustavini tasdiqlash va uni davlat roʻyxatidan oʻtkazishni;

Institutni modernizatsiya qilish va texnik qayta jihozlash hamda zamonaviy axborot-kommunikatsiya texnologiyalarini joriy etish chora-tadbirlari kompleksini tasdiqlashni;

“OʻzGEORANGMETLITI” DUKni Toshkent shahri, Bobur koʻchasi, 15-uyga joylashtirishni taʼminlasin.

6. “OʻzGEORANGMETLITI" DUKga, texnik zarurat boʻlganda, loyiha oldi va loyiha hujjatlarini ishlab chiqishga yetakchi xorijiy loyiha va injiniring tashkilotlarini hamda yuqori malakali mutaxassislarni jalb etishga ruxsat berilsin.

7. “OʻzGEORANGMETLITI” DUK direktori Oʻzbekiston Respublikasi Vazirlar Mahkamasi huzuridagi Foydali qazilmalar zaxirasi boʻyicha davlat komissiyasi aʼzosi hisoblanishi belgilab qoʻyilsin.

8. Quyidagilar:

Oʻzbekiston Respublikasi Prezidentining 2017-yil 24-maydagi “Oʻzbekiston Respublikasi Davlat geologiya va mineral resurslar qoʻmitasi tizimida yagona geologiya xizmatini tashkil etish chora-tadbirlari toʻgʻrisida” PQ-3004-son qarori 6-bandining ikkinchi xatboshi, shuningdek, qarorning 3-ilovasi.

Oʻzbekiston Respublikasi Prezidentining 2010-yil 27-avgustdagi “Geologiya-razvedka ishlarini tashkil etish va olib borish tizimi samaradorligini yanada oshirish chora-tadbirlari toʻgʻrisida”gi PQ-1396-son qarorining 4-ilovasi oʻz kuchini yoʻqotgan deb hisoblasin.

9. Oʻzbekiston Respublikasi Davlat geologiya va mineral resurslar qoʻmitasi Oʻzbekiston Respublikasi Adliya vazirligi va boshqa manfaatdor vazirliklar, idoralar hamda xoʻjalik uyushmalari bilan birgalikda ikki oy muddatda belgilangan tartibda qonun hujjatlariga ushbu qarordan kelib chiqadigan oʻzgartirish va qoʻshimchalar toʻgʻrisida Oʻzbekiston Respublikasi Vazirlar Mahkamasiga takliflar kiritsin.

10. Mazkur qarorning ijrosini nazorat qilish Oʻzbekiston Respublikasi Bosh vazirining oʻrinbosari Gʻ.I. Ibragimov va Oʻzbekiston Respublikasi Davlat geologiya va mineral resurslar qoʻmitasi raisi I.B. Toʻramurotov zimmasiga yuklansin.