Oʻzbekiston Respublikasi Prezidentining “Oʻzbekiston Respublikasi Bosh prokuraturasi huzuridagi Majburiy ijro byurosi faoliyatini tashkil etish toʻgʻrisida” 2017-yil 30-maydagi PQ-3016-son qarorini bajarish yuzasidan Vazirlar Mahkamasi qaror qiladi:

1. Quyidagilar:

Oʻzbekiston Respublikasi Bosh prokuraturasi huzuridagi Majburiy ijro byurosining elektr energiyasi va tabiiy gaz yetkazib beruvchilar bilan oʻzaro hamkorlik qilish tartibi toʻgʻrisidagi nizom 1-ilovaga muvofiq;

Isteʼmolchilarni elektr va gaz tarmoqlaridan uzib qoʻyish tartibi toʻgʻrisidagi nizom 2-ilovaga muvofiq tasdiqlansin.

2. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari Gʻ.I. Ibragimov zimmasiga yuklansin.

1. Ushbu Nizom Oʻzbekiston Respublikasi Bosh prokuraturasi huzuridagi Majburiy ijro byurosining (keyingi oʻrinlarda Byuro deb ataladi) “Oʻzbekenergo” AJ va “Oʻztransgaz” AK, shuningdek ularning boʻlinmalari bilan Byuroga yuklangan vazifalarni amalga oshirish masalalari boʻyicha oʻzaro hamkorlik qilish tartibini belgilaydi.

2. Ushbu Nizom yetkazib berilgan elektr energiyasi va tabiiy gaz uchun qarzdorligi mavjud isteʼmolchilarni elektr va gaz tarmoqlaridan uzib qoʻyish sohasida oʻzaro hamkorlik qilish tartibiga tatbiq etilmaydi.

3. Ushbu Nizomda quyidagi asosiy tushunchalardan qoʻllaniladi:

isteʼmolchi — elektr va gaz taʼminoti shartnomasiga muvofiq elektr energiyasi va tabiiy gazdan ishlab chiqarish va (yoki) maishiy ehtiyojlar uchun foydalanadigan yuridik yoki jismoniy shaxs;

energiya resurslarini yetkazib beruvchilar — “Oʻzbekenergo” AJ, “Oʻztransgaz” AK va ularning boʻlinmalari, shuningdek isteʼmolchilarga elektr energiyasi va tabiiy gazni yetkazib berishni taʼminlovchi, ishonchli boshqarish toʻgʻrisidagi shartnoma asosida faoliyat yurituvchi boshqa tashkilotlar.

4. Byuro va uning hududiy boʻlinmalari elektr energiyasi va tabiiy gazdan foydalanish qoidalarini buzish holatlarini aniqlash, bartaraf etish va ularning oldini olish, shu jumladan elektr va gaz tarmoqlariga noqonuniy ulanish hamda ularni talon-toroj qilish yoʻllarini tezkor aniqlash maqsadida zarur mutaxassislarni jalb etish uchun energiya resurslari yetkazib beruvchilarga yozma soʻrovlar yuborishga haqli.

Aniqlangan holatlar boʻyicha zudlik bilan qaror qabul qilish talab etiladigan alohida holatlarda energiya resurslari yetkazib beruvchilarning xodimlarini jalb etish ogʻzaki soʻrov boʻyicha amalga oshirilishi mumkin.

5. Soʻrov, qoida tariqasida, energiya resurslari yetkazib beruvchilarning hududiy joylashuv prinsipi boʻyicha yuboriladi. Soʻrovda energiya resurslari yetkazib beruvchilar xodimlarining yetib kelish vaqti va joyi, shuningdek ularni jalb etishning nazarda tutiladigan davri koʻrsatiladi.

6. Energiya resurslari yetkazib beruvchilarning xodimlarini jalb etish ularning ish joyi boʻyicha ish haqi va boshqa toʻlovlar toʻliq hajmda saqlab qolingan holda amalga oshiriladi.

7. Ish yakunlari boʻyicha tegishli xodimning faoliyati haqida dalolatnoma tuziladi, uning nusxasi tegishli energiya resurslari yetkazib beruvchilarga yuboriladi.

8. Energiya resurslari yetkazib beruvchilar Byuro tomonidan taqdim etilgan, “Oʻzbekenergo” AJ va “Oʻztransgaz” AKning billing tizimiga kiritilgan koʻrsatkichlar asosida har bir isteʼmolchining shaxsiy hisob raqami boʻyicha yakuniy hisob-kitoblarni amalga oshiradilar hamda natijasi boʻyicha foydalanilgan elektr energiyasi va tabiiy gaz uchun qarzdorligi mavjud boʻlgan isteʼmolchilar reyestrini shakllantiradilar, keyinchalik ushbu maʼlumotlar Byuroga taqdim etiladi.

9. Energiya resurslari yetkazib beruvchilar har oyning oʻn birinchi sanasidan boshlab har kuni Byuroning tuman (shahar) boʻlimlariga foydalanilgan elektr energiyasi va tabiiy gaz uchun qarzdorligi mavjud boʻlgan isteʼmolchilarning elektron reyestrlarini yuboradi.

10. Byuroning tuman (shahar) boʻlimlari reyestrlarda koʻrsatilgan maʼlumotlarni Byuroning axborot tizimlari, maʼlumotlar bazalari va resurslaridagi maʼlumotlar bilan solishtiradi.

11. Byuro va uning hududiy boʻlinmalari “Oʻzbekenergo” AJ va “Oʻztransgaz” AKning billing tizimlariga majburiy tartibda ulanadi.

12. Energiya resurslari yetkazib beruvchilar Byuro bilan birgalikda har oyning oʻn beshinchi sanasiga qadar bevosita isteʼmolchilar tomonidan foydalanilgan elektr energiyasi va tabiiy gaz hajmi hamda tegishli uchastkalar chegaralaridagi tarmoqlarga yetkazib berilgan hajm oʻrtasida tafovutlar mavjudligini aniqlaydilar.

13. Bevosita isteʼmolchilar tomonidan foydalanilgan elektr energiyasi va tabiiy gaz hajmi hamda tegishli uchastkalar chegaralaridagi tarmoqlarga yetkazib berilgan hajm oʻrtasida tafovut mavjudligi haqidagi maʼlumotlar belgilangan tartibda rasmiylashtiriladi.

14. Olingan maʼlumotlar asosida Byuro energiya resurslari yetkazib beruvchilar bilan birgalikda tafovutning yuzaga kelishi sabablarini, shu jumladan elektr va gaz tarmoqlariga noqonuniy ulanish, ularni talon-toroj qilishning mumkin boʻlgan yoʻllarini topish orqali aniqlash boʻyicha belgilangan tartibda choralar koʻradi.

15. Har bir hisobot yili yakunlari boʻyicha “Oʻzbekenergo” AJ va “Oʻztransgaz” AK elektr energiyasi va tabiiy gaz balansida yuzaga kelgan tafovutlar boʻyicha qonun hujjatlarida belgilangan tartibda tegishli qarorlar qabul qiladilar.

16. Elektr energiyasi va tabiiy gaz isteʼmolini hisobga olish priborlarini oʻrnatish energiya resurslari yetkazib beruvchilarning xodimlari tomonidan Byuro tuman va shahar boʻlimlarining elektr energiyasi va tabiiy gazdan foydalanish tartibini nazorat qilish boʻyicha davlat inspektorlari ishtirokida amalga oshiriladi.

17. Elektr energiyasi va tabiiy gaz isteʼmolini hisobga olish priborlari energiya resurslari yetkazib beruvchilarning xodimlari tomonidan Byuro tuman va shahar boʻlimlarining elektr energiyasi va tabiiy gazdan foydalanish tartibini nazorat qilish boʻyicha davlat inspektorlari ishtirokida tashqi taʼsirdan yuqori darajali himoya hamda farqlovchi belgi bilan plombalanadi.

18. Isteʼmolchilarga elektr energiyasi va tabiiy gaz isteʼmolini hisobga olish priborlarini oʻrnatish hamda ularni plombalash isteʼmolchilar ishtirokida amalga oshiriladi.

19. Elektr energiyasi va tabiiy gaz isteʼmolini hisobga olish priborlarini oʻrnatish va plombalash haqida uch nusxada dalolatnoma tuziladi, u energiya resurslari yetkazib beruvchilar va Byuroning masʼul xodimlari hamda isteʼmolchi tomonidan imzolanadi.

20. Isteʼmolchilarning foydalanilgan elektr energiyasi va tabiiy gaz haqini oʻz vaqtida hamda toʻliq toʻlash madaniyatini oshirish maqsadida Byuro va uning boʻlinmalari tomonidan energiya resurslari yetkazib beruvchilar bilan birgalikda tushuntirish ishlarini amalga oshirish boʻyicha har chorakda rejalar tuziladi.

21. Tushuntirish ishlari rejalarida quyidagilar nazarda tutiladi:

elektr energiyasi va tabiiy gaz isteʼmolchilari, fuqarolar yigʻinlari raislari (oqsoqollari) va ularning maslahatchilari, tegishli hududda joylashgan tashkilotlar xodimlari bilan muntazam uchrashuvlar oʻtkazish;

ommaviy axborot vositalarida chiqishlar qilish va materiallar chop etish;

davlat organlari va tashkilotlari vakillarini jalb etish, shuningdek yuklangan vazifalarni samarali bajarishga doir boshqa tadbirlarni amalga oshirish.

22. Byuro oʻziga yuklangan vazifalar va funksiyalardan kelib chiqqan holda, energiya resurslari yetkazib beruvchilar bilan faoliyatning boshqa yoʻnalishlari boʻyicha ham hamkorlik qilishi mumkin.

23. Ushbu Nizom talablari buzilishida aybdor boʻlgan shaxslar belgilangan tartibda javob beradilar.

1. Ushbu Nizom shartnomaviy majburiyatlarni, Oʻzbekiston Respublikasi Bosh prokuraturasi huzuridagi Majburiy ijro byurosining (keyingi oʻrinlarda Byuro deb ataladi) koʻrsatmalarini bajarmaganlik uchun, shuningdek ushbu Nizomda nazarda tutilgan boshqa holatlarda isteʼmolchilarni elektr va gaz tarmoqlaridan uzib qoʻyish tartibini belgilaydi.

2. Ushbu Nizomda quyidagi asosiy tushunchalardan foydalaniladi:

isteʼmolchi — elektr va gaz taʼminoti shartnomasiga muvofiq elektr energiyasi va tabiiy gazdan ishlab chiqarish va (yoki) maishiy ehtiyojlar uchun foydalanadigan yuridik yoki jismoniy shaxs;

energiya resurslarini yetkazib beruvchilar — “Oʻzbekenergo” AJ, “Oʻztransgaz” AK va ularning boʻlinmalari, shuningdek isteʼmolchilarga elektr energiyasi va tabiiy gazni yetkazib berishni taʼminlovchi, ishonchli boshqarish toʻgʻrisidagi shartnoma asosida faoliyat yurituvchi boshqa tashkilotlar.

3. Isteʼmolchilarni elektr va gaz tarmoqlaridan uzib qoʻyish quyidagi holatlarda amalga oshiriladi:

shartnoma majburiyatlari bajarilmaganda, shu jumladan hisob-kitoblar oʻz vaqtida amalga oshirilmaganligi oqibatida foydalanilgan elektr energiyasi va tabiiy gaz uchun qarzdorlik mavjud boʻlganda;

Byuro talabnomalari ijro etilmaganda, shu jumladan uning vakillariga elektr energiyasi va tabiiy gaz isteʼmolini hisobga olish priborlariga koʻrsatkichlarni olish uchun ruxsat etilmaganda;

elektr va gaz tarmoqlariga noqonuniy ulanish, talon-toroj qilish yoki elektr energiyasi va tabiiy gazdan foydalanish qoidalarini buzishning boshqa holatlari aniqlanganda;

elektr energiyasi va tabiiy gaz isteʼmolini hisobga olish priborlari qasddan buzilganda, koʻrsatkichlarni oʻzgartirish maqsadida ularga tashqaridan aralashilganda.

4. Isteʼmolchilarni elektr va gaz tarmoqlaridan uzib qoʻyish hamda ularni qayta ulash Byuro tomonidan amalga oshiriladi, ushbu Nizomning 5 — 7-bandlarida nazarda tutilgan holatlar bundan mustasno.

5. Avariya holatida isteʼmolchilarni elektr va gaz tarmoqlaridan uzib qoʻyish energiya resurslarini yetkazib beruvchilar tomonidan, Byuroni xabardor qilgan holda amalga oshiriladi.

6. Isteʼmolchini uning arizasiga (talabiga) binoan elektr va gaz tarmoqlaridan uzib qoʻyish energiya resurslarini yetkazib beruvchilar tomonidan amalga oshiriladi.

7. Alohida toifadagi elektr energiyasi isteʼmolchilarini kuchlanishi 6 — 10 kV va undan yuqori boʻlgan tarmoqdan uzib qoʻyish Byuroning majburiy taqdimnomalari boʻyicha elektr energiyasi yetkazib beruvchi tomonidan ushbu Nizomda nazarda tutilgan tartibda amalga oshiriladi.

8. Byuro xodimlari va ular tomonidan jalb etiladigan mutaxassislar isteʼmolchilarni elektr va gaz tarmoqlaridan uzib qoʻyish hamda ularni qayta ulash ishlarini oʻtkazishda zarur xavfsizlik choralarini koʻrishlari shart.

9. Oʻzbekiston Respublikasi Vazirlar Mahkamasining 2004-yil 5-fevraldagi 57-son qaroriga 5-ilovada, shuningdek Oʻzbekiston Respublikasi Vazirlar Mahkamasining 2004-yil 1-noyabrdagi 511-son qarori bilan tasdiqlangan Elektr energiyasi isteʼmolchilari va hududiy elektr tarmoqlari korxonalari oʻrtasidagi oʻzaro hisob-kitoblar tartibi toʻgʻrisidagi nizomning 18-bandida koʻrsatilgan korxonalar faqat sudning qarori boʻyicha uzib qoʻyilishi mumkin.

10. Byuro isteʼmolchilarni elektr va gaz tarmoqlaridan uzib qoʻyishda, ularni qayta ulashda, shuningdek ular tomonidan elektr energiyasi va tabiiy gazdan foydalanish qoidalariga rioya etilishini aniqlash maqsadida isteʼmolchilar binolarini koʻzdan kechirishda “Oʻzbekenergo” AJ, “Oʻztransgaz” AK va ularning boʻlinmalari mutaxassislarini belgilangan tartibda jalb etish huquqiga ega.

11. Isteʼmol qilingan elektr energiyasi va tabiiy gaz uchun qarzi mavjud boʻlgan isteʼmolchilar roʻyxati energiya resurslarini yetkazib beruvchilar tomonidan har oyning oʻn birinchi sanasidan boshlab har kuni shakllantiriladi hamda yagona elektron idoralararo axborot tizimi orqali Byuroga taqdim etiladi.

12. Byuro elektr energiyasi va tabiiy gaz isteʼmoli uchun qarzlari mavjud boʻlgan isteʼmolchilarning energiya resurslarini yetkazib beruvchilar tomonidan shakllantirilgan va taqdim etilgan roʻyxatlari asosida isteʼmolchilarni qarzni besh kun muddatda toʻlash zarurligi toʻgʻrisida xabardor qiladi.

13. Byuro isteʼmolchilar xabardor qilingan paytdan boshlab besh kun muddat oʻtgandan keyin qarzlarni majburiy, shu jumladan qonun hujjatlarida belgilangan tartibda isteʼmolchilarni elektr va gaz tarmoqlaridan uzib qoʻyish yoʻli bilan undirish choralarini koʻradi.

14. Elektr energiyasi va tabiiy gazdan foydalanish qoidalarini buzish holatlari aniqlangan taqdirda Byuroning tumanlar (shaharlar) elektr energiyasi va tabiiy gazdan foydalanish tartibini nazorat qilish guruhi (shuʼbasi)ning davlat nazoratchisi ularni elektr va gaz tarmoqlaridan darhol uzib qoʻyish, elektr energiyasi va tabiiy gazdan foydalanish qoidalarini buzgan shaxslarni qonun hujjatlarida belgilangan javobgarlikka tortish choralarini koʻradi.

15. Elektr energiyasi va tabiiy gaz isteʼmolchilari uzib qoʻyilgan elektr va gaz tarmoqlari manbalari Byuro xodimlari tomonidan nazorat tartibida majburiy plombalanishi shart.

16. Byuroning tumanlar (shaharlar) elektr energiyasi va tabiiy gazdan foydalanish tartibini nazorat qilish guruhi (shuʼbasi)ning davlat nazoratchisi tomonidan isteʼmolchi elektr va gaz tarmoqlaridan uzib qoʻyilganda tarmoqdan uzib qoʻyish haqida ikki nusxada dalolatnoma rasmiylashtiriladi, uning bir nusxasi isteʼmolchiga beriladi.

17. Isteʼmolchi dalolatnomani imzolashdan bosh tortgan taqdirda dalolatnomaga bu haqda tegishli yozuv kiritiladi. Bosh tortish ikki nafar guvoh yoki fuqarolarning oʻzini oʻzi boshqarish organi vakili tomonidan tasdiqlanishi lozim. Bunda isteʼmolchi dalolatnomada uning mazmuni boʻyicha tushuntirish va eʼtirozlarni, shuningdek imzolashdan bosh tortish sabablarini bayon etish huquqiga ega.

18. Byuroning tumanlar (shaharlar) elektr energiyasi va tabiiy gazdan foydalanish tartibini nazorat qilish guruhi (shuʼbasi)ning davlat nazoratchisi tomonidan elektr va gaz tarmoqlaridan uzib qoʻyilgan isteʼmolchilar haqidagi maʼlumotlar yagona elektron idoralararo maʼlumotlar tizimiga kiritiladi.

19. Isteʼmolchilar quyidagi hollarda elektr va gaz tarmoqlariga qayta ulanadi:

elektr energiyasi va tabiiy gazdan foydalanishda yoʻl qoʻyilgan qoidabuzarliklar bartaraf etilganda;

isteʼmol qilingan elektr energiyasi va tabiiy gaz uchun qarzlar toʻlanganda;

qayta ulash uchun ushbu Nizomning 23-bandida belgilangan miqdordagi summa toʻlanganda.

20. Isteʼmolchilarni elektr va gaz tarmoqlariga qayta ulash ular Byuroning tegishli hududiy boʻlinmasiga, shu jumladan axborot-kommunikatsiya texnologiyalaridan foydalanish yoʻli bilan murojaat qilganda amalga oshiriladi.

Byuro tomonidan isteʼmolchilarni elektr va gaz tarmoqlariga qayta ulash qarzlar toʻlangandan keyingi kundan kechiktirmay amalga oshiriladi.

21. Elektr energiyasi va tabiiy gazdan foydalanish qoidalari buzilganligi uchun isteʼmolchilar tarmoqdan uzilganda, ularni tarmoqqa qayta ulash Byuro tomonidan elektr energiyasi va tabiiy gazdan foydalanish qoidalarini buzish sabablari va sharoitlari bartaraf etilganligi nuqtai nazaridan isteʼmolchilarning binolari koʻzdan kechirilgandan keyin amalga oshiriladi.

22. Qayta ulash yakuni boʻyicha ikki nusxada dalolatnoma tuziladi, uning bir nusxasi isteʼmolchiga beriladi.

23. Elektr va gaz tarmoqlaridan ilgari uzib qoʻyilgan shaxslarni qayta ulashda isteʼmolchi — jismoniy shaxslardan eng kam oylik ish haqining ikki baravari miqdorida, isteʼmolchi — yuridik shaxslardan eng kam oylik ish haqining oʻn baravari miqdorida toʻlov undiriladi, ushbu mablagʻlar qayta ulashni amalga oshirgan Byuro boʻlinmasi hisob raqamiga oʻtkaziladi.

24. Ushbu Nizomning 5 va 6-bandlariga muvofiq elektr energiyasi va gaz tarmoqlaridan uzib qoʻyilgan, shuningdek elektr energiyasi va tabiiy gaz nazorati va hisobining avtomatlashtirilgan tizimlariga ulangan isteʼmolchilarni elektr va gaz tarmoqlariga qayta ulash uchun toʻlov undirilmaydi.

25. Ushbu Nizom talablari buzilishida aybdor boʻlgan shaxslar belgilangan tartibda javob beradi.