Yosh avlodning ehtiyojlari va qiziqishlarini hisobga olgan holda, ularning ijodiy qobiliyatlarini yanada rivojlantirish va qo‘llab-quvvatlash, o‘quvchi-yoshlarda mehnatsevarlikni va kasb tayyorgarligining dastlabki ko‘nikmalarini shakllantirish, bo‘sh vaqtlarini yanada mazmunli tashkil etish, shuningdek har tomonlama yetuk va barkamol shaxslarni voyaga yetkazish maqsadlariga yo‘naltirilgan maktabdan tashqari ta’lim tizimini yanada rivojlantirish maqsadida Vazirlar Mahkamasi qaror qiladi:

1. O‘zbekiston Respublikasi Hukumatining ilovaga muvofiq ayrim qarorlariga o‘zgartirish va qo‘shimchalar kiritilsin.

2. Vazirliklar va idoralar o‘zlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsinlar.

3. Mazkur qarorning bajarilishini nazorat qilish O‘zbekiston Respublikasi Vazirlar Mahkamasining Ta’lim va ilm-fan masalalari axborot-tahlil departamentiga yuklansin.

1. Vazirlar Mahkamasining “Maktabdan tashqari ta’lim tizimini yanada takomillashtirish chora-tadbirlari to‘g‘risida” 2011-yil 28-fevraldagi 50-son qarorida (O‘zbekiston Respublikasi QHT, 2011-y., 9-son, 89-modda):

a) 5-bandning uchinchi xatboshidagi “0,5 stavka bo‘yicha hisob-kitobdan kelib chiqib kontrakt” so‘zlari “o‘tilgan mashg‘ulotlar hajmiga proporsional ravishda soatbay haq to‘lagan holda shartnoma” so‘zlari bilan almashtirilsin;

b) 8-band quyidagi tahrirda bayon etilsin:

“8. “Barkamol avlod” bolalar markazlarida o‘qiganlik uchun ota-onalardan olinadigan to‘lovlar oyiga eng kam oylik ish haqiga nisbatan quyidagi miqdorlarda belgilanadi:

Qoraqalpog‘iston Respublikasining Nukus va Xorazm viloyatining Urganch shaharlarida — 5 foiz, Qoraqalpog‘iston Respublikasi va Xorazm viloyatining qolgan tuman (shahar)larida — 2,5 foiz;

viloyatlar markazlari va Toshkent shahrida — 10 foiz;

respublikaning qolgan tuman (shahar)larida — 5 foiz;

Imkoniyati cheklangan bolalar uchun ixtisoslashtirilgan ta’lim muassasalari o‘quvchilari va ichki ishlar organlarining profilaktik hisobiga olingan o‘quvchilar “Barkamol avlod” bolalar markazlarida o‘qiganlik uchun ota-onalar to‘lovidan ozod qilinadi.

Ota-onalar to‘lovidan tushgan mablag‘lar:

to‘garak faoliyati uchun zarur bo‘lgan xom ashyo va materiallar, moddiy boyliklar (mebel, asbob-uskuna va jihozlar, kompyuter texnikasi va boshqalar) xarid qilishga;

madaniy-ommaviy tadbirlarni o‘tkazish va ularda qatnashish bilan bog‘liq xarajatlarga;

o‘quvchilari respublika miqyosida o‘tkaziladigan ko‘rik-tanlovlar va festivallarda 1, 2, 3-o‘rinlarni egallagan to‘garak rahbarlarini tegishincha eng kam oylik ish haqining besh, to‘rt, uch barobari miqdorida moddiy rag‘batlantirishga yo‘naltiriladi.

O‘zbekiston Respublikasi Moliya vazirligi manfaatdor vazirliklar va idoralar bilan birgalikda bir oy muddatda “Barkamol avlod” bolalar markazlarida bolalar o‘qiganligi uchun ota-ona to‘lovini undirish va undan foydalanish tartibini ishlab chiqsin va tasdiqlasin”;

v) 2-ilovaning matni quyidagi tahrirda bayon etilsin:

g) 3-ilovaning matni quyidagi tahrirda bayon etilsin: