Oʻzbekiston Respublikasi Suv xoʻjaligi vazirligi nasos stansiyalarini elektr bilan uzluksiz taʼminlash, ekin maydonlarini sugʻorish uchun foydalaniladigan suv resurslarini olish va toʻplash hamda foydalanilgan elektr energiyasi uchun hisob-kitob qilish maqsadida Vazirlar Mahkamasi qaror qiladi:

1. Suv resurslarini toʻplash, ekin maydonlarini sugʻorish uchun nasos stansiyalarini elektr bilan taʼminlash hamda isteʼmol qilinadigan elektr energiyasi uchun hisob-kitob qilish tartibi ilovaga muvofiq tasdiqlansin.

2. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosarlari B.M. Olimjonov va V.Y. Otayev zimmasiga yuklansin.

Mazkur Tartib Suv xoʻjaligi vazirligining nasos stansiyalarini elektr energiyasi bilan uzluksiz taʼminlash, ekin maydonlarini sugʻorish uchun ishlatiladigan suv resurslarini olish va toʻplash hamda foydalanilgan elektr energiyasi uchun hisob-kitob qilish maqsadida ishlab chiqilgan.

1. Suv xoʻjaligi vazirligi belgilangan muddatlarda “Oʻzbekenergo” davlat-aksiyadorlik kompaniyasiga keyingi 3 yilda haqiqatda isteʼmol qilingan elektr energiyasining oʻrtacha yillik miqdoridan va qoʻshimcha ravishda foydalanishga topshirilayotgan nasos stansiyalari ehtiyojidan kelib chiqib choraklar boʻyicha hamda irrigatsiya tizimlari havza boshqarmalari, Amu — Buxoro mashina kanali, Qarshi magistral kanali boshqarmalari va “Mirzachoʻl” birlashmasi boʻyicha keyingi yilga elektr energiyasi berishga yigʻma buyurtmanoma beradi.

2. Moliya vazirligi Makroiqtisodiyot va statistika vazirligi tomonidan ajratilgan elektr energiyasi isteʼmoli limitlariga muvofiq elektr energiyasi uchun haq toʻlash uchun keyingi yilga respublika budjetida Suv xoʻjaligi vazirligiga mablagʻ ajratishni nazarda tutadi.

3. Suv xoʻjaligi vazirligi navbatdagi yil choragi boshlanishidan 15 kun oldin “Oʻzbekenergo” davlat-aksiyadorlik kompaniyasiga mazkur Tartibning 1-bandida koʻrsatilgan boʻlinmalar boʻyicha elektr energiyasi isteʼmoli yil choragi limitini oylar boʻyicha taqdim etadi.

4. Suv xoʻjaligi vazirligi keyingi oy boshlanishidan 10 kun oldin “Oʻzbekenergo” davlat-aksiyadorlik kompaniyasiga Amu — Buxoro, Amu — Zang, Jizzax magistral kanallari nasos stansiyalari va Sherobod nasos stansiyasi ishining oylik jadvalini taqdim etadi, qolgan nasos stansiyalarining navbatdagi oydagi ish rejimlari esa irrigatsiya tizimlari havza boshqarmalari bilan elektr tarmoqlarining tegishli korxonalari oʻrtasida elektr energiyasini isteʼmol qilishning belgilangan oylik limitlari doirasida kelishiladi.

5. Suv xoʻjaligi vazirligi zarur hollarda “Oʻzbekenergo” davlat-aksiyadorlik kompaniyasi bilan birgalikda isteʼmol qilish limitiga yil choraklari doirasida har oyda (shu jumladan, boʻlinmalar boʻyicha) shu oyning 20-kunigacha tuzatish kiritadi. Bunda chorak mobaynida koʻpi bilan ikki marta tuzatish kiritilishi mumkin. Joriy oy uchun foydalanilmagan elektr energiyasi limiti keyingi oyga oʻtkazilmaydi.

6. Suv xoʻjaligi vazirligi “Oʻzbekenergo” davlat-aksiyadorlik kompaniyasi bilan birgalikda har oyning 5-kunidan kechiktirmay Moliya vazirligiga oyning 1- kunidagi holatga koʻra nasos stansiyalari tomonidan elektr energiyasidan foydalanilishi toʻgʻrisidagi qiyoslash dalolatnomasini taqdim etadi.

7. Moliya vazirligi taqdim etilgan qiyoslash dalolatnomalari asosida oyning 10-kunidan kechiktirmay budjetda nazarda tutilgan ajratmalar doirasida Suv xoʻjaligi vazirligiga mablagʻlar oʻtkazadi.

Suv xoʻjaligi vazirligi ikki kun muddatda xarajatlar smetasida nazarda tutilgan doiradagi mablagʻlarni amalda foydalanilgan elektr energiyasi uchun hisob-kitob qilish uchun “Oʻzbekenergo” davlat-aksiyadorlik kompaniyasi korxonalari bilan shartnomalar tuzgan oʻziga boʻysunuvchi budjet tashkilotlarga yetkazadi.

8. Suv xoʻjaligi vazirligi bilan kelishmasdan Qarshi, Amu — Buxoro, Amu — Zang, Jizzax va Sherobod magistral kanallarining nasos stansiyalari, melioratsiya nasos stansiyalarining “Oʻzbekenergo” davlat-aksiyadorlik kompaniyasi tomonidan energiyadan oʻchirib qoʻyilishiga yoʻl qoʻyilmaydi.

9. Zarur boʻlganda (tabiiy ofatlar, qishloq xoʻjaligi ekinlarini qayta ekish) Suv xoʻjaligi vazirligi elektr energiyasiga qoʻshimcha limitlar va ularga haq toʻlashga mablagʻlar ajratish uchun asoslangan hisob-kitoblarni Makroiqtisodiyot va statistika vazirligiga va Moliya vazirligiga taqdim etadi. Mazkur masala boʻyicha qaror 10 kun mobaynida qabul qilinadi.