O‘zbekiston Respublikasi Bank-moliya akademiyasi faoliyatini takomillashtirish maqsadida Vazirlar Mahkamasi qaror qiladi:

1. Quyidagilar:

O‘zbekiston Respublikasi Bank-moliya akademiyasining tuzilmasi 1-ilovaga muvofiq;

O‘zbekiston Respublikasi Bank-moliya akademiyasining ustavi 2-ilovaga muvofiq tasdiqlansin.

2. O‘zbekiston banklar uyushmasi, shuningdek uning muassislari tomonidan, ilgari O‘zbekiston Respublikasi Tashqi iqtisodiy faoliyat milliy banki tomonidan O‘zbekiston banklar uyushmasi ustav fondiga ulush sifatida kiritilgan, Toshkent shahri, Movarounnahr ko‘chasi, 16-uy manzilida joylashgan binoni va inshootlarni (keyingi o‘rinlarda bino deb ataladi) yondosh hududi bilan O‘zbekiston Respublikasi Bank-moliya akademiyasiga bepul berish to‘g‘risida qaror qabul qilinganligi ma’lumot uchun qabul qilinsin.

3. O‘zbekiston banklar uyushmasi va O‘zbekiston Respublikasi Bank-moliya akademiyasining binoni O‘zbekiston Respublikasi Bank-moliya akademiyasiga operativ boshqarish huquqi bilan davlat mulki sifatida bepul berish to‘g‘risidagi taklifiga rozilik berilsin.

4. O‘zbekiston banklar uyushmasi va O‘zbekiston Respublikasi Bank-moliya akademiyasi bir oy muddatda ushbu qarorning 2-bandida ko‘rsatilgan binoning belgilangan tartibda berilishini-qabul qilinishini ta’minlasinlar.

5. Toshkent shahri hokimligi ilgari O‘zbekiston banklar uyushmasiga birkitilgan binoga yondosh hududdagi maydoni 0,75 gektar bo‘lgan yer uchastkasidan O‘zbekiston Respublikasi Bank-moliya akademiyasiga doimiy foydalanish huquqini belgilangan tartibda bersin.

6. O‘zbekiston Respublikasi Yer resurslari, geodeziya, kartografiya va davlat kadastri davlat qo‘mitasi O‘zbekiston Respublikasi Bank-moliya akademiyasining ushbu qarorning 5-bandida ko‘rsatilgan yer uchastkasiga bo‘lgan huquqlarini davlat ro‘yxatidan o‘tkazishni belgilangan tartibda amalga oshirsin.

7. O‘zbekiston Respublikasi Hukumatining 3-ilovaga muvofiq ayrim qarorlariga o‘zgartirish va qo‘shimchalar kiritilsin.

8. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosari R.S. Azimov zimmasiga yuklansin.

1. O‘zbekiston Respublikasi Bank-moliya akademiyasi (keyingi o‘rinlarda Akademiya deb ataladi) O‘zbekiston Respublikasi Prezidentining “O‘zbekiston Respublikasining Bank-moliya akademiyasini tashkil etish to‘g‘risida” 1996-yil 2-maydagi PF–1460-son Farmoniga muvofiq tashkil etilgan hamda o‘z faoliyatini O‘zbekiston Respublikasi Vazirlar Mahkamasining “O‘zbekiston Respublikasi Bank-moliya akademiyasining faoliyatini tashkil etish masalalari to‘g‘risida” 1996-yil 17-maydagi 180-son, “O‘zbekiston Respublikasi Bank-moliya akademiyasi magistraturasiga qabul qilish tartibi to‘g‘risidagi Nizomni tasdiqlash haqida” 2013-yil 16-sentabrdagi 255-son qarorlari va ushbu Ustav asosida amalga oshiradi.

2. Akademiya bank, moliya, soliq tizimlari va iqtisodiyotning real sektori tarmoqlarining boshqaruv kadrlari va mutaxassislarini tayyorlash, qayta tayyorlash va ularning malakasini oshirish, oliy malakali ilmiy va ilmiy-pedagogik kadrlar tayyorlash bo‘yicha, shuningdek ko‘rsatib o‘tilgan sohalarda ilmiy-tadqiqot faoliyatini amalga oshiruvchi davlat oliy ta’lim muassasasi hisoblanadi.

3. Akademiya o‘z oldida turgan vazifalarni bajarish doirasida O‘zbekiston Respublikasi Konstitutsiyasiga, O‘zbekiston Respublikasi qonunlariga, O‘zbekiston Respublikasi Oliy Majlisi palatalarining qarorlariga, O‘zbekiston Respublikasi Prezidentining farmonlari, qarorlari va farmoyishlariga, Vazirlar Mahkamasining qarorlari va farmoyishlariga, shuningdek ushbu Ustavga amal qiladi.

Akademiya o‘z faoliyatida O‘zbekiston Respublikasi Vazirlar Mahkamasiga hisobot beradi va bo‘ysunadi.

4. Akademiya o‘z faoliyatini O‘zbekiston Respublikasi Moliya vazirligi, Iqtisodiyot vazirligi, Markaziy banki, Davlat soliq qo‘mitasi, Oliy va o‘rta maxsus ta’lim vazirligi, O‘zbekiston banklar uyushmasi, davlat va xo‘jalik boshqaruvi boshqa organlari, mahalliy davlat hokimiyati organlari, oliy ta’lim va ilmiy-tadqiqot muassasalari, shuningdek nodavlat notijorat tashkilotlari bilan o‘zaro hamkorlikda amalga oshiradi.

5. Akademiya yuridik shaxs hisoblanadi, mustaqil balansga, O‘zbekiston Respublikasi Moliya vazirligining G‘aznachiligida shaxsiy hisob raqamlariga, milliy va xorijiy valyutalardagi bank hisob raqamlariga, o‘z nomi davlat tilida ko‘rsatilgan, O‘zbekiston Respublikasining Davlat gerbi tasviri tushirilgan muhrga, muhrlarga, shtamp va boshqa atributlarga, shuningdek o‘z faoliyati uchun zarur bo‘lgan boshqa rekvizitlarga egadir.

Akademiyaning to‘liq rasmiy nomi:

davlat tilida — “O’zbekiston Respublikasi Bank-moliya akademiyasi”;

ingliz tilida — “Banking and Finance Academy of the Republic of Uzbekistan”;

rus tilida — “Bankovsko-finansovaya akademiya Respubliki Uzbekistan”.

Akademiyaning pochta manzili (joylashgan joyi): Toshkent shahri, Movarounnahr ko‘chasi, 16-uy.

6. Akademiya faoliyatning quyidagi yo‘nalishlarini amalga oshiradi:

“magistr” darajasi bergan va davlat namunasidagi diplom topshirgan holda magistraturaning ikki yillik o‘quv rejalari bo‘yicha oliy ta’lim davlat ta’lim standartlariga muvofiq boshqaruv kadrlarini tayyorlash;

belgilangan namunadagi diplom bergan holda to‘rt oygacha davrga mo‘ljallangan va kadrlarning buyurtmachilari bilan kelishilgan ta’lim dasturlariga muvofiq bank, moliya va soliq tizimlari, shuningdek iqtisodiyotning real sektori tarmoqlari boshqaruv kadrlari va mutaxassislarini, shu jumladan yuqori lavozimlarga ko‘tarish uchun zaxiradagi xodimlarni qayta tayyorlash;

belgilangan namunadagi sertifikat bergan holda bir oygacha bo‘lgan davrga mo‘ljallangan va kadrlarning buyurtmachilari bilan kelishilgan o‘quv rejalari va dasturlari asosida manfaatdor vazirliklar, idoralar va boshqa tashkilotlarning boshqaruv kadrlari va mutaxassislari malakasini oshirish;

qonun hujjatlarida belgilangan tartibda Akademiyaga biriktirilgan mutaxassisliklar bo‘yicha, oliy ta’limdan keyingi ikki darajali tizimga muvofiq ilmiy darajali oliy malakali ilmiy va ilmiy-pedagog kadrlar tayyorlash;

Ustavdagi vazifalarni bajarish doirasida o‘quv, metodik, ma’naviy-ma’rifiy, ilmiy-tadqiqotning barcha turlari, shuningdek axborot-tahliliy faoliyat;

bank ishi, moliya, soliq ishi va investitsiyalar sohasida boshqaruv kadrlari va mutaxassislarni tayyorlash, qayta tayyorlash va ularning malakasini oshirish sohasida xalqaro va xorijiy moliya institutlari, xalqaro va xorijiy ta’lim, ilmiy-tadqiqot tashkilotlari va dasturlar bilan hamkorlikni amalga oshirish;

tahririyat-noshirlik faoliyati.

Akademiya qonun hujjatlarida taqiqlanmagan faoliyatning boshqa turlarini ham amalga oshiradi.

7. Akademiya magistraturasiga tinglovchilarni qabul qilish O‘zbekiston Respublikasi Vazirlar Mahkamasi tomonidan tasdiqlanadigan O‘zbekiston Respublikasi Bank-moliya akademiyasi magistraturasiga qabul qilish tartibi to‘g‘risidagi Nizomga muvofiq, davlat granti va pulli-kontrakt asosida bank, moliya va soliq tizimlari, shuningdek iqtisodiyotning real sektori tarmoqlarining kamida ikki yil mehnat stajiga ega bo‘lgan boshqaruv kadrlari va mutaxassislari jumlasidan amalga oshiriladi.

Boshqaruv kadrlari va mutaxassislarni qayta tayyorlash va ularning malakasini oshirish Akademiya ta’minoti uchun ajratiladigan O‘zbekiston Respublikasi respublika budjeti mablag‘lari hisobiga hamda vazirliklar, idoralar va boshqa tashkilotlar bilan tuzilgan to‘g‘ridan-to‘g‘ri kontraktlar asosida amalga oshiriladi.

8. Bank, moliya, soliq tizimi hamda iqtisodiyotning real sektori tarmoqlari uchun boshqaruv kadrlari va mutaxassislarni tayyorlash, qayta tayyorlash va ularning malakasini oshirishning samarali tizimini tashkil etish, oliy malakali ilmiy va ilmiy-pedagog kadrlar tayyorlash, shuningdek ko‘rsatilgan sohalarda ilmiy tadqiqotlar o‘tkazish Akademiyaning asosiy maqsadlari hisoblanadi.

9. Quyidagilar Akademiyaning asosiy vazifalari hisoblanadi:

zamonaviy menejment, moliyaviy-iqtisodiy jarayonlarni strategik rejalashtirish va prognozlashtirish metodlarini egallagan, bank ishi, moliya, soliq ishi va investitsiyalar sohasida xo‘jalik yuritishning bozor sharoitlarida boshqaruv qarorlari qabul qilish nazariyasi va amaliyotiga asoslangan tegishli bilimlar va amaliy ko‘nikmalarga ega bo‘lgan boshqaruv kadrlari va mutaxassislarni tayyorlash, qayta tayyorlash va ularning malakasini oshirish;

tinglovchilarda davlatning iqtisodiy siyosati va uning amalga oshirilishini ta’minlash, xalqaro moliya bozorlari institutlari rivojlanishining zamonaviy tendensiyalari, davlat va korporativ moliyalarni boshqarish, xalqaro va milliy bank, soliq, investitsiya, sug‘urta va pensiya ishi va monetar fiskal va valyuta siyosati, strategik menejment va marketing, korporativ boshqaruv sohalarida tinglovchilarda mustahkam bilimlarni shakllantirish, shuningdek ularning tanlangan mutaxassislik bo‘yicha boshqaruv ko‘nikmalarini egallashi;

professor-o‘qituvchi kadrlar, ilmiy xodimlar va tinglovchilarning tahliliy va kreativ salohiyatini mustahkamlash, muhim ilmiy va ilmiy-innovatsion yo‘nalishlar bo‘yicha ularning ilmiy-amaliy faoliyatni yuritishga bo‘lgan ehtiyojlari va manfaatlarini rivojlantirish va rag‘batlantirish, davlat hamda xalqaro ilmiy va ilmiy-tadqiqot dasturlariga muvofiq ilmiy ishlarni izchil rivojlantirish, ularning natijalarini amaliyotga joriy etish;

ilmiy tadqiqotlarning bank ishi, moliya, soliq ishi va investitsiyalar sohalarida dolzarb fundanmental, amaliy va innovatsion loyihalarga yo‘naltirilganligini ta’minlash, ular natijalarining iqtisodiyot fani va amaliyotiga chuqur integratsiya qilinishini amalga oshirish;

bank ishi, moliya, soliq ishi va investitsiyalar sohalarida islohotlarning natijalarini, O‘zbekiston bank-moliya tizimining xalqaro moliya bozorida egallayotgan mustahkam o‘rni va nufuzi to‘g‘risida qiziqqan auditoriyani xabardor qilish, vazirliklar, idoralar va tashkilotlarda, aholining keng qatlamlari o‘rtasida targ‘ib qilish bo‘yicha tushuntirish ishlarini o‘tkazishda faol ishtirok etish.

10. Akademiya o‘ziga yuklangan vazifalarni bajarish maqsadida quyidagi funksiyalarni amalga oshiradi:

ilg‘or xalqaro ta’lim standartlari va talablarini, shuningdek ularni o‘qitishning zamonaviy shakllari va usullarini, amaliyotda muvaffaqiyatli sinab ko‘rilgan pedagogik, axborot-kommunikatsiya va innovatsiya texnologiyalaridan foydalanishni hisobga olgan holda zamonaviy ta’lim va tadqiqot shakllari va usullarini qo‘llash vositasida o‘quv, o‘quv-metodik, ma’naviy-ma’rifiy va ilmiy-tadqiqot jarayonlarini tashkil etadi;

ta’lim va tadqiqotlar ixtisosligi bo‘yicha o‘quv jarayonini zarur o‘quv, ilmiy va qo‘shimcha adabiyotlar, mahalliy va xorijiy davriy nashrlar, o‘qitishning zamonaviy vositalari, kompyuter va o‘quv-prezentatsiya texnikasi bilan ta’minlaydi;

o‘quv va ilmiy-metodik ishlar, maslahatlashuvlar va mahorat darslari o‘tkazish uchun xorijiy mamlakatlardan yuqori malakali olimlar va mutaxassislarni kontrakt asosida jalb etadi;

o‘quv rejalariga va ilmiy tadqiqotlarning dasturlariga muvofiq bank, moliya va soliq tizimi tashkilotlarida, iqtisodiyot real sektori tarmoqlari tuzilmasida, oliy ta’lim va ilmiy-tadqiqot muassasalarida, shu jumladan O‘zbekiston Respublikasi Oliy va o‘rta maxsus ta’lim vazirligi bilan kelishuv bo‘yicha Akademiya rektori tomonidan tasdiqlangan tartibga muvofiq xorijiy mamlakatlarda amaliyot va stajirovkadan o‘tishi uchun ilmiy xodimlar va tinglovchilarni tashkil qiladi va yuboradi;

respublikaning yetakchi ta’lim va ilmiy muassasalari negizida, bank, moliya va soliq tizimlari tashkilotlarida, iqtisodiyotning real sektori tarmoqlari tuzilmasida, shu jumladan xorijiy mamlakatlarda professor-o‘qituvchilar tarkibini, ilmiy kadrlar, boshqa xodimlarni qayta tayyorlashni hamda ularning malakasini oshirishni tashkil qiladi;

real amaliyot, bajarilgan magistrlik va doktorlik dissertatsiyalarining asosiy mazmuni va xulosalarini amaliyotda qo‘llash bilan o‘zaro bog‘liq holda nazariy va ilmiy-metodik tayyorlashni integratsiyalashni amalga oshiradi;

zamonaviy shakllarni, metodlarni va axborot-kommunikatsiya texnologiyalarini qo‘llagan holda tinglovchilarning mustaqil ta’lim olishini tashkil etadi, magistrlik va doktorlik dissertatsiyalari yoki o‘rganilayotgan predmet mavzulari bo‘yicha ilmiy tadqiqotlar o‘tkazish uchun zarur o‘quv, ilmiy-tadqiqot va axborot resurslarini tashkil qiladi;

davlat ta’lim standartlari talablari bajarilishini hisobga olgan holda manfaatdor vazirliklar, idoralar va boshqa tashkilotlar bilan o‘zaro aloqalarni yo‘lga qo‘yadi, ta’limni rivojlantirish, kadrlar tayyorlashning o‘quv rejalari va dasturlari mazmunini takomillashtirish, ilmiy-tadqiqot ishlarini bajarish, tinglovchilarning amaliyot va stajirovkani o‘tashini tashkil etish, shuningdek magistrlik dissertatsiyalarini tayyorlash masalalari bo‘yicha ularning takliflari va tavsiyalarini o‘rganadi;

bank ishi, moliya, soliq ishi va investitsiyalar sohasida boshqaruvning dolzarb muammolari bo‘yicha kompleks ilmiy va ilmiy-innovatsiya tadqiqotlarini o‘tkazadi;

bank, moliya, soliq tizimlarida va iqtisodiyotning real sektoridagi investitsiyalar sohasida innovatsiya va axborot-kommunikatsiya texnologiyalaridan samarali foydalanish bo‘yicha ilg‘or xalqaro tajribani o‘rganadi hamda takliflar ishlab chiqadi;

boshqaruv kadrlari va mutaxassislarni ma’naviy-axloqiy tarbiyalashning samarali metodlarini ishlab chiqadi, tinglovchilarda huquqiy, siyosiy madaniyat va o‘z huquqlarini bilishni rivojlantiradi, vatanparvarlik, ijtimoiy-ma’naviy va axloqiy sifatlarni, yuklangan vazifalar va majburiyatlarni bajarish yuzasidan mas’uliyat hissini, mamlakat taqdiri, uning mustaqilligini mustahkamlash uchun daxldorlik va mas’uliyatni shakllantiradi va rivojlantiradi;

magistratura bitiruvchilari mehnat faoliyati va kasbiy o‘sishining doimiy monitoringini amalga oshiradi, bank, moliya, soliq tizimlari va investitsiyalar sohasi boshqaruv kadrlarini tayyorlash, tanlash, tarbiyalash va ishga joylashtirish samaradorligini oshirish bo‘yicha takliflar tayyorlaydi.

11. Akademiya faoliyatini boshqarish qonun hujjatlariga va ushbu Ustavga muvofiq amalga oshiriladi.

12. Akademiya faoliyatining asosiy masalalarini ko‘rib chiqish uchun rektor (Kengash raisi) boshqaradigan Akademiya kengashi (keyingi o‘rinlarda Kengash deb ataladi) tashkil etiladi. Kengash tarkibi rektor tomonidan tasdiqlanadi.

Kengash o‘z faoliyatini Akademiya rektori tomonidan tasdiqlanadigan Nizomga muvofiq amalga oshiradi.

Kengash tarkibiga prorektorlar, dekanlar, ilmiy kotib, kafedralar mudirlari, alohida tarkibiy bo‘linmalar tarkiblari, yetakchi professor-o‘qituvchi kadrlar va ilmiy xodimlar, mahalliy ta’lim va ilmiy-tadqiqot muassasalarining, shuningdek yetakchi moliya va bank tashkilotlarining vakillari kiradi.

Kengashning vakolatlariga quyidagilar kiradi:

o‘quv, metodik, ilmiy-tadqiqot, axborot-tahliliy va tahririyat-noshirlik ishlarining muhim masalalarini, boshqaruv kadrlari va mutaxassislarni tayyorlash va qayta tayyorlash, shuningdek Akademiya bo‘linmalari faoliyati muhim masalalarini hal etish;

Akademiyani boshqarish tuzilmasini takomillashtirish, uning faoliyatini rivojlantirishning kompleks dasturlarini qabul qilish, yuqori malakali boshqaruv kadrlari va mutaxassislar, ilmiy va ilmiy-pedagog kadrlar tayyorlashning yangi mutaxassisliklarini ochish bilan bog‘liq bo‘lgan masalalarni ko‘rib chiqish va tegishli qarorlar qabul qilish;

boshqaruv kadrlari va mutaxassislarni tayyorlash, qayta tayyorlash va ularning malakasini oshirish bo‘yicha o‘quv rejalari va dasturlarini belgilangan tartibda ko‘rib chiqish va tasdiqlash;

Akademiyaning fakultetlari, kafedralari, o‘quv, metodik, ilmiy-tadqiqot, axborot-tahliliy va boshqa bo‘linmalarini tashkil etish va tugatish to‘g‘risida qarorlar qabul qilish;

tarkibiy bo‘linmalar rahbarlarining hisobotlarini eshitish;

“O‘zbekiston Respublikasi Bank-moliya akademiyasining faxriy doktori” darajasi berish to‘g‘risida qaror qabul qilish.

13. Rektor, prorektorlar va dekanlar Akademiyaning rahbarlar tarkibi lavozimlariga kiradi.

14. Akademiya faoliyatiga umumiy rahbarlikni Akademiya rektori amalga oshiradi. Akademiya rektori bo‘lmagan vaqtda uning vazifalarini O‘quv va ma’naviy-ma’rifiy ishlar bo‘yicha birinchi prorektor vaqtincha bajaradi.

15. Akademiya rektori:

barcha davlat organlarida va boshqa tashkilotlarda Akademiya nomidan vakillik qiladi;

Kengashning tuzilmasi va nizomini, tarkibiy bo‘linmalarning, shuningdek Akademiyaning ustavidagi vazifalarning bajarilishini ta’minlash uchun tashkil etiladigan boshqa organlarning nizomlari va ish rejalarini tasdiqlaydi;

fakultetlar dekanlarini, o‘quv, metodik, ilmiy-tadqiqot, axborot-tahliliy bo‘linmalar va Akademiyaning boshqa tarkibiy bo‘linmalari rahbarlarini lavozimga tayinlaydi.

Akademiyaning tashkiliy va moliyaviy faoliyati masalalarini hal qiladi;

Akademiyaning mol-mulki va mablag‘larini boshqarish va tasarruf etish bo‘yicha belgilangan tartibda qarorlar qabul qiladi, moliyaviy, to‘lov, hisob-kitob hujjatlari va boshqa hujjatlarni imzolaydi;

Akademiyaning barcha xodimlari va tinglovchilari uchun bajarilishi majburiy bo‘lgan buyruqlar va farmoyishlar chiqaradi;

Akademiya xodimlari bilan mehnat shartnomalarini tuzadi va to‘xtatadi;

qonun hujjatlariga muvofiq Akademiya xodimlarini moddiy rag‘batlantiradi, shu jumladan har oylik ustamalar va mukofotlarni taqsimlaydi;

Akademiyaning shtat jadvallarini va ta’minoti xarajatlari smetasini tasdiqlaydi;

Akademiyaning professor-o‘qituvchi kadrlarining o‘quv yuklamasini, shuningdek o‘quv va ilmiy faoliyatining normativ-metodik hujjatlarini tasdiqlaydi;

qayta tayyorlash va malaka oshirish kurslarida o‘qish uchun to‘lov miqdorlarini, shuningdek Akademiya tomonidan ko‘rsatiladigan ishlar va xizmatlarga narxlar hamda tariflarni tasdiqlaydi;

o‘zining ayrim vakolatlarini Akademiya prorektorlari o‘rtasida taqsimlaydi.

Akademiya rektori qonun hujjatlariga, shuningdek ushbu Ustavga muvofiq boshqa vakolatlarni ham amalga oshirishi mumkin.

16. Akademiya rektori xodimlarning cheklangan belgilangan soni va mehnatga haq to‘lash fondi miqdori doirasida Akademiya tuzilmasiga o‘zgartirishlar kiritish huquqiga ega.

17. Akademiyada Homiylik kengashi tashkil etiladi, uning tarkibi O‘zbekiston Respublikasi Vazirlar Mahkamasi tomonidan tasdiqlanadi. Homiylik kengashi to‘g‘risidagi Nizomni Homiylik kengashining o‘zi tasdiqlaydi.

18. Akademiyada ta’lim jarayoni mamlakatni modernizatsiyalash va iqtisodiyotni erkinlashtirishning ustuvor vazifalarini, ilg‘or xalqaro ta’lim standartlari va talablarini hisobga olgan holda zamonaviy pedagogika texnologiyalari va axborot-kommunikatsiya texnologiyalaridan faol foydalanish negizida, magistratura mutaxassisliklari bo‘yicha davlat ta’lim standartlariga hamda malaka talablariga muvofiq ishlab chiqilgan o‘quv rejalari va dasturlari asosida tashkil etiladi.

Magistratura mutaxassisliklari bo‘yicha malaka talablari Akademiya tomonidan, respublika iqtisodiyotining bank-moliya sektori uchun boshqaruv kadrlari tayyorlashning maqsadli xususiyatini hisobga olgan holda ishlab chiqiladi hamda O‘zbekiston Respublikasi Oliy va o‘rta maxsus ta’lim vazirligi tomonidan tasdiqlanadi.

19. Davlat ta’lim standartlariga muvofiq va buyurtmachilarning ehtiyojlari hisobga olingan holda ishlab chiqilgan magistratura o‘quv rejalari O‘zbekiston Respublikasi Oliy va o‘rta maxsus ta’lim vazirligi, shuningdek boshqa manfaatdor vazirliklar, idoralar va boshqa tashkilotlar bilan kelishgan holda Akademiya rektori tomonidan tasdiqlanadi.

20. Boshqaruv kadrlari va mutaxassislarni qayta tayyorlash va ularning malakasini oshirish bo‘yicha ta’lim jarayoni davlat ta’lim talablariga va qonun hujjatlariga muvofiq belgilangan tartibda amalga oshiriladi.

21. Akademiya davlat ta’lim standartlariga, shuningdek buyurtmachilar talablariga muvofiq o‘quv rejalari va dasturlar talablaridan kelib chiqib magistraturaning tegishli mutaxassisliklari bo‘yicha boshqaruv kadrlarini mustaqil tayyorlaydi.

Magistratura mutaxassisliklari, boshqaruv kadrlari va mutaxassislarni qayta tayyorlash va ularning malakasini oshirish kurslari bo‘yicha o‘quv rejalari fanlarining o‘quv dasturlari Akademiya rektori tomonidan tasdiqlanadi.

22. Magistraturada boshqaruv kadrlarini tayyorlash, shuningdek qayta tayyorlash va malaka oshirish kurslarida boshqaruv kadrlari va mutaxassislarni qayta tayyorlash va ularning malakasini oshirish ishlab chiqarishdan ajralgan holda amalga oshiriladi.

23. Akademiyada magistratura mutaxassisliklari bo‘yicha ta’lim dasturlarini o‘zlashtirish davlat yakuniy attestatsiyasi hamda O‘zbekiston Respublikasi Oliy va o‘rta maxsus ta’lim vazirligi tomonidan tasdiqlangan Nizomga muvofiq bitiruvchilar tomonidan magistrlik dissertatsiyalari himoya qilinishi bilan tugallanadi.

24. Akademiya magistraturasi mutaxassisliklari bo‘yicha ta’lim dasturlarini davlat tomonidan akkreditatsiya qilish O‘zbekiston Respublikasi Vazirlar Mahkamasiga belgilagan tartibda amalga oshiriladi.

25. Ilmiy-tadqiqot va innovatsion ishlar davlat ilmiy dasturlari doirasida tanlov asosida ajratiladigan grantlar, Akademiyaning ilmiy grantlari, xo‘jalik yurituvchi subyektlar bilan shartnomalar, xalqaro va xorijiy tashkilotlarning grantlari va ular bilan tuzilgan shartnomalar asosida amalga oshiriladi.

Ilmiy-tadqiqot ishlarini bajarishdan olingan mablag‘lardan qonun hujjatlarida belgilangan tartibda foydalaniladi.

26. Akademiyada oliy malakali ilmiy va ilmiy-pedagogik kadrlarni tayyorlash qonun hujjatlarida belgilangan oliy ta’limdan keyingi ikki darajali tizimga muvofiq amalga oshiriladi.

27. Akademiya magistraturasiga, qayta tayyorlash va malaka oshirish kurslariga qabul qilish tartibi O‘zbekiston Respublikasi Vazirlar Mahkamasi tomonidan belgilanadi.

28. Tinglovchilar o‘quv rejasida nazarda tutilgan topshiriqlarni belgilangan muddatlarda bajarishga, Akademiyaning Ustaviga va ichki tartib-qoidalariga rioya qilishga majbur.

29. O‘qish davrida o‘quv va ilmiy-tadqiqot faoliyatida yuqori ko‘rsatkichlarga ega bo‘lgan tinglovchilar O‘zbekiston Respublikasi respublika budjeti mablag‘lari, Akademiyaning budjetdan tashqari mablag‘lari, shuningdek xalqaro va xorijiy tashkilotlar grantlari hisobiga xorijiy mamlakatlarning yetakchi ta’lim va ilmiy-tadqiqot, bank va moliya muassasalariga stajirovkaga yuboriladi.

30. Akademiyaning magistraturasi, qayta tayyorlash va malaka oshirish kurslari tinglovchilariga ularning o‘qish davrida ularning lavozimi va asosiy ish joyi bo‘yicha o‘rtacha ish haqi saqlanadi. Boshqa joylardan kelgan tinglovchilarga asosiy ish joyi bo‘yicha o‘qish joyiga kelishgacha va undan ketishgacha yo‘lkira (bir yilda ko‘pi bilan bir marta) to‘lanadi.

31. Magistratura tinglovchilari O‘zbekiston Respublikasi Oliy va o‘rta maxsus ta’lim vazirligi tomonidan tasdiqlangan Nizomga muvofiq akademik ta’til olish huquqiga egadirlar.

32. Akademiyaning ichki tartib-qoidalarini buzganligi uchun tinglovchilarga hayfsan va Akademiyadan chetlatish shaklida belgilangan tartibda jazo choralari qo‘llanishi mumkin.

33. Akademiyada professor-o‘qituvchilar tarkibi, boshqaruv, ilmiy, o‘quv-yordamchi, xizmat ko‘rsatuvchi va texnik xodimlar lavozimlari nazarda tutiladi.

34. Professor-o‘qituvchilar tarkibiga kafedra mudiri, professorlar, dotsentlar, katta o‘qituvchi, o‘qituvchi (assistent), o‘qituvchi-stajyor lavozimi kiradi.

35. Professor-o‘qituvchi kadrlarni Akademiyaga ishga qabul qilish O‘zbekiston Respublikasi Vazirlar Mahkamasi tomonidan tasdiqlangan Nizomga muvofiq tanlov asosida amalga oshiriladi.

Oliy ta’lim va ilmiy-tadqiqot muassasalari, vazirliklar, idoralar va respublika boshqa tashkilotlarining yetakchi mutaxassislari o‘rindoshlik bo‘yicha yoki qonun hujjatlarida belgilangan tartibda soatbay ish haqi to‘lash shartlarida o‘qituvchilik va ilmiy-tadqiqot ishlariga jalb etilishi mumkin.

Xorijiy mamlakatlarning olimlari va mutaxassislari Akademiyaga o‘quv va ilmiy-metodik ishlarni olib borish uchun shartnoma asosida, Akademiyaning budjetdan tashqari mablag‘lari hisobiga haq to‘lagan holda jalb etilishi mumkin.

36. Professor-o‘qituvchi kadrlar quyidagi huquqlarga ega:

Akademiyaning ilmiy, o‘quv, ijodiy va ishlab chiqarish faoliyati bilan bog‘liq muhim masalalari muhokamasida qatnashish;

Akademiyaning o‘quv zallari, auditoriyalari, kabinetlari, shuningdek axborot va resurs markazlari xizmatlaridan foydalanish;

tinglovchilarning o‘ziga xos individual xususiyatlariga javob beradigan va o‘quv jarayonining yuqori sifatini ta’minlaydigan o‘qitish metodlari va vositalarini tanlash.

37. Professor-o‘qituvchi kadrlar quyidagilarga majbur:

o‘quv jarayonining yuqori samarali bo‘lishini ta’minlash;

tinglovchilarda tashabbuskorlikni, ijodiy qobiliyatni, ilmiy izlanishga intilishni rivojlantirish;

tinglovchilarda yuksak ma’naviyat va madaniyatni, Vatanga muhabbatni, vatanparvarlik va fuqarolik nuqtai nazarini shakllantirish;

jumladan ta’lim mazmunining yuqori saviyada bo‘lishini ta’minlash maqsadida ilmiy tadqiqotlarni olib borish, ilmiy faoliyat bilan shug‘ullanish;

Akademiyaning ustavi va ichki tartib-qoidalariga rioya qilish.

38. Boshqaruv, ilmiy, o‘quv-yordamchi, xizmat ko‘rsatuvchi va texnik xodimlarning huquq va majburiyatlari Akademiyaning ichki tartib-qoidalarida va lavozim yo‘riqnomalarida belgilanadi.

39. Akademiya bank, moliya va soliq tizimlari tashkilotlarida, shuningdek xorijiy mamlakatlarning oliy ta’lim va ilmiy muassasalarida professor-o‘qituvchi kadrlar, ilmiy va boshqa xodimlar hamda tinglovchilarning stajirovkasini belgilangan tartibda tashkil etadi.

40. Akademiya professor-o‘qituvchilar, kadrlar, ilmiy va boshqa xodimlar hamda tinglovchilarning o‘quv-metodik va ularning xalqaro grantlarda, loyihalarda va ayirboshlash dasturlarida, xalqaro ilmiy-metodik konferensiyalarda ishtirok etishini moddiy va tashkiliy jihatdan qo‘llab-quvvatlaydi.

41. Professor-o‘qituvchi kadrlar, xodimlar va tinglovchilarning xorijiy stajirovkasi, ularning turli xalqaro ta’lim va tadqiqot dasturlarida ishtirok etishi xalqaro shartnomalar, xalqaro va xorijiy tashkilotlarning grantlari, Akademiyaning xorijiy sheriklar bilan shartnomalari asosida amalga oshiriladi.

42. Quyidagilar Akademiya faoliyatini moliyalashtirish manbalari hisoblanadi:

Akademiyaning joriy ta’minotiga, unga yuklangan vazifalar va funksiyalarni bajarish bo‘yicha tadbirlarni amalga oshirishga, shuningdek Akademiyaning moddiy-texnika bazasini mustahkamlashga ajratiladigan O‘zbekiston Respublikasi respublika budjeti mablag‘lari;

Innovatsion rivojlanish vazirligi tomonidan davlat ilmiy dasturlari doirasida o‘tkaziladigan grant tanlovlari natijalari bo‘yicha ajratiladigan mablag‘lar;

magistratura tinglovchilarini pulli-kontrakt asosida tayyorlashdan, boshqaruv kadrlari va mutaxassislar malakasini shartnomalar asosida qayta tayyorlash va ularning malakasini oshirishdan tushadigan mablag‘lar;

O‘zbekiston Respublikasi Davlat soliq qo‘mitasi soliq organlarini rivojlantirish jamg‘armasi mablag‘lari;

vazirliklar, idoralar va boshqa tashkilotlar bilan tuzilgan to‘g‘ridan-to‘g‘ri kontraktlar asosida bajarilgan o‘quv, metodik va ilmiy-tadqiqot loyihalarini, axborot-tahliliy va tahririyat-noshirlik ishlarini, ta’lim xizmatlarini va xizmatlarning boshqa turlarini bajarishdan tushumlar;

mahalliy va xorijiy tashkilotlarning, loyihalar va dasturlarning xayriya ehsonlari;

qonun hujjatlarida taqiqlanmagan boshqa manbalar.

43. Akademiya quyidagi huquqlarga ega:

bank, moliya, soliq tizimi va iqtisodiyotning real sektoridagi dolzarb masalalar bo‘yicha davriy ilmiy jurnal (shu jumladan elektron formatda) chiqarish;

Akademiyaga ajratilgan mablag‘lar yoki o‘zining fondlari hisobiga zarur asbob-uskunalar va boshqa moddiy resurslarni xarid qilish, ijaraga olish;

Akademiyaga tegishli bo‘lgan mol-mulkka, xo‘jalik yoki boshqa faoliyat natijasida olingan intellektual mulk obyektlariga, daromadlarga, shuningdek qonun hujjatlarida nazarda tutilgan boshqa asoslarda sotib olingan mol-mulkka belgilangan tartibda egalik qilish, ulardan foydalanish va ularni tasarruf etish;

Akademiya tomonidan ko‘rsatiladigan ishlarga, xizmatlarga tariflar, narxlar va baholarni qonun hujjatlariga muvofiq mustaqil ravishda belgilash.

44. Magistratura tinglovchilarini pulli-kontrakt asosida o‘qitishning qiymati, miqdori va to‘lash tartibi O‘zbekiston Respublikasi Moliya vazirligi bilan kelishgan holda Akademiya rektori tomonidan tasdiqlanadi.

45. Akademiyaning budjetdan tashqari mablag‘larini shakllantirish va sarflash qonun hujjatlariga muvofiq amalga oshiriladi.

46. Rahbar va professor-o‘qituvchi kadrlarning lavozim maoshlari oliy ta’lim muassasalari tegishli xodimlarining bazaviy lavozim maoshlari miqdorlarida belgilanadi.

Boshqa xodimlarga lavozim maoshlari davlat boshqaruvi organlari xodimlari uchun qonun hujjatlarida nazarda tutilgan mehnatga haq to‘lash razryadlariga muvofiq belgilanadi.

47. Akademiyada, budjet muassasalari va tashkilotlari xodimlarini moddiy rag‘batlantirish maxsus jamg‘armasi bilan bir qatorda, budjet va budjetdan tashqari mablag‘lar hisobiga Boshqaruv, professor-o‘qituvchilar, ilmiy, o‘quv-yordamchi, texnik va xizmat ko‘rsatuvchi xodimlarni ular mehnatiga haq to‘lash fondining 50 foizigacha miqdorida moddiy rag‘batlantirish uchun maxsus jamg‘arma (keyingi o‘rinlarda Maxsus jamg‘arma deb ataladi) tashkil etiladi.

Maxsus jamg‘arma mablag‘lari shtatdagi boshqaruv, professor-o‘qituvchilar, o‘quv-yordamchi, texnik va xizmat ko‘rsatuvchi xodimlarga o‘quv, o‘quv-metodik, ma’naviy-ma’rifiy, ilmiy-tadqiqot va tashkiliy xo‘jalik faoliyati darajasini oshirishda, uning xalqaro nufuzini mustahkamlashda erishgan yuqori muvaffaqiyatlari uchun tarif stavkasining 100 foizigacha miqdorida har oylik ustamalar belgilashga yo‘naltiriladi.

Maxsus jamg‘arma mablag‘larini shakllantirish va ulardan foydalanish tartibi, shuningdek Akademiya xodimlariga har oylik ustamalar belgilash mezonlari Akademiya Kengashi tomonidan tasdiqlanadigan nizomda belgilanadi.

Maxsus jamg‘arma mablag‘lari budjet muassasalari va xodimlarini moddiy rag‘batlantirish maxsus jamg‘armasini hisoblashda Akademiyaning mehnatga haq to‘lash jamg‘armasiga kiritiladi.

48. Akademiya o‘z faoliyati natijalarining buxgalteriya hisobini belgilangan tartibda amalga oshiradi, moliya va statistika hisobotlarini yuritadi.

49. Akademiyani qayta tashkil etish yoki tugatish qonun hujjatlariga muvofiq amalga oshiriladi.

1. Vazirlar Mahkamasining “O‘zbekiston Respublikasi Bank-moliya akademiyasining faoliyatini tashkil etish masalalari to‘g‘risida” 1996-yil 17-maydagi 180-son qarorida:

a) qarorning 1-bandi va 1, 1a, 1b va 2-ilovalar o‘z kuchini yo‘qotgan deb hisoblansin;

b) 2 va 3-bandlar quyidagi tahrirda bayon qilinsin:

“2. Belgilab qo‘yilsinki, O‘zbekiston Respublikasi Bank-moliya akademiyasi (keyingi o‘rinlarda Akademiya deb ataladi):

bank, moliya, soliq tizimlari va iqtisodiyotning real sektori tarmoqlarining boshqaruv kadrlarini tayyorlash, qayta tayyorlash va ularning malakasini oshirish, oliy malakali ilmiy va ilmiy-pedagog kadrlar tayyorlash bo‘yicha, shuningdek ko‘rsatib o‘tilgan sohalarda ilmiy-tadqiqot faoliyatini amalga oshiruvchi davlat oliy ta’lim muassasasi hisoblanadi;

“Magistr” darajasi bergan va davlat namunasidagi diplom berilgan holda magistraturaning ikki yillik o‘quv rejalari bo‘yicha oliy ta’lim davlat ta’lim standartlariga muvofiq boshqaruv kadrlarini tayyorlashni maqsadli amalga oshiradi;

o‘z faoliyatida O‘zbekiston Respublikasi Vazirlar Mahkamasiga bo‘ysunadi.

3. Belgilansinki, Akademiyada:

bank, moliya va soliq tizimlari, shuningdek iqtisodiyotning real sektori tarmoqlari boshqaruv kadrlari va mutaxassislarini qayta tayyorlash belgilangan namunadagi guvohnoma berilgan holda to‘rt oygacha bo‘lgan davrga mo‘ljallangan ta’lim dasturlariga muvofiq amalga oshiriladi;

manfaatdor vazirliklar, idoralar va boshqa tashkilotlarning boshqaruv kadrlari va mutaxassislari malakasini oshirish belgilangan namunadagi sertifikat berilgan holda bir oygacha bo‘lgan davrga mo‘ljallangan o‘quv rejalari va dasturlar asosida amalga oshiriladi;

qonun hujjatlarida belgilangan tartibda Akademiyaga biriktirilgan mutaxassisliklar bo‘yicha oliy malakali ilmiy va ilmiy-pedagog kadrlar tayyorlanadi”;

v) 5-band o‘z kuchini yo‘qotgan deb hisoblansin;

g) 7-band quyidagi tahrirda bayon qilinsin:

“7. Quyidagilarga:

Akademiyaning rahbarlik qiluvchi va professor-o‘qituvchilar tarkibiga — oliy ta’lim muassasalari tegishli xodimlarining bazaviy lavozim maoshlari miqdorida;

akademiyaning qolgan xodimlariga — davlat boshqaruvi organlari xodimlari uchun qonun hujjatlarida nazarda tutilgan mehnatga haq to‘lash razryadlariga muvofiq lavozim maoshlari belgilansin”;

d) 8-bandda:

birinchi xatboshi quyidagi tahrirda bayon qilinsin:

“Akademiyada budjet mablag‘lari va budjetdan tashqari mablag‘lar hisobiga mehnatga haq to‘lash fondining 50 foizigacha miqdorda Boshqaruv xodimlarini, professor-o‘qituvchilarni, ilmiy, o‘quv-yordamchi, texnik va xizmat ko‘rsatuvchi xodimlarni moddiy rag‘batlantirish maxsus jamg‘armasi (keyingi o‘rinlarda moddiy rag‘batlantirish maxsus jamg‘armasi deb ataladi) tashkil etilishi nazarda tutilsin”;

to‘rtinchi xatboshidagi “yuqori malakali professor-o‘qituvchilarga, ilmiy-tadqiqotchi va ma’muriyat xodimlariga” so‘zlari “boshqaruv xodimlariga, professor-o‘qituvchilarga, ilmiy, o‘quv-yordamchi, texnik va xizmat ko‘rsatuvchi xodimlarga” so‘zlari bilan almashtirilsin;

e) 9 va 10-bandlar quyidagi tahrirda bayon qilinsin:

“9. Belgilab qo‘yilsinki:

Akademiyaning magistraturasi, qayta tayyorlash va malaka oshirish kurslari tinglovchilari uchun ularning o‘qish davrida asosiy ish joyi bo‘yicha lavozimi va o‘rtacha ish haqi saqlab qolinadi. Boshqa joylardan kelgan tinglovchilarga asosiy ish joyi bo‘yicha o‘qish joyigacha va undan qaytib kelish joyigacha bir martalik yo‘l haqi (bir yilda bir martadan ko‘p emas) to‘lanadi;

o‘qish va ilmiy-tadqiqot faoliyatida yuqori ko‘rsatkichlarga ega bo‘lgan tinglovchilar o‘qish davrida O‘zbekiston Respublikasi respublika budjeti mablag‘lari va Akademiyaning budjetdan tashqari mablag‘lari hamda xalqaro va xorijiy tashkilotlar grantlari hisobiga xorijiy mamlakatlarning yetakchi ta’lim va ilmiy-tadqiqot, bank va moliya tashkilotlariga stajirovkaga yuboriladi.

10. Quyidagilar Akademiya faoliyatini moliyalashtirish manbalari etib belgilansin:

Akademiyaning joriy ta’minoti, unga yuklangan vazifalar va funksiyalarni bajarishga doir tadbirlarni amalga oshirish, shuningdek Akademiyaning moddiy-texnika bazasini mustahkamlash uchun ajratiladigan O‘zbekiston Respublikasi respublika budjeti mablag‘lari;

davlat ilmiy-texnik dasturlari doirasida Fan va texnologiyalar agentligi tomonidan o‘tkaziladigan grant tanlovlari natijalari bo‘yicha ajratiladigan mablag‘lar;

pulli-kontrakt asosida magistratura tinglovchilarini tayyorlashdan, shartnomalar asosida boshqaruv kadrlarini va mutaxassislarni qayta tayyorlash va ularning malakasini oshirishdan tushadigan mablag‘lar;

O‘zbekiston Respublikasi Davlat soliq qo‘mitasining Soliq organlarini rivojlantirish jamg‘armasidan ajratmalar;

vazirliklar, idoralar va boshqa tashkilotlar bilan tuzilgan shartnomalar asosida o‘quv, metodik va ilmiy-tadqiqot loyihalarini, axborot-tahlil va tahririyat-noshirlik ishlarini bajarishdan, ta’lim va xizmatlarning boshqa turlarini bajarishdan tushumlar;

mahalliy va xorijiy tashkilotlarning, loyihalar va dasturlarning xayriya ehsonlari;

qonun hujjatlarida taqiqlanmagan boshqa manbalar”.