Oʻzbekiston Respublikasi Prezidentining “Kommunal xizmat koʻrsatish sohasida iqtisodiy islohotlarni chuqurlashtirishning yangi bosqichi toʻgʻrisida” 2001-yil 17-apreldagi PF-2832-son Farmoniga muvofiq hamda uy-joy mulkdorlari shirkatlarining samarali faoliyat koʻrsatishi uchun zarur shart-sharoitlar yaratish, aholiga koʻrsatiladigan kommunal xizmatlar sifatini oshirish, kommunal xizmatlar haqining toʻliq va oʻz vaqtida toʻlanishi yuzasidan kollektiv masʼuliyatni kuchaytirish maqsadida Vazirlar Mahkamasi qaror qiladi:

1. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari:

tasdiqlangan jadvallarga muvofiq uy-joy mulkdorlari shirkatlari tashkil etilishiga koʻra uy-joylardan foydalanish boshqarmalari va tashkilotlarini tugatsinlar yoki ularni uy-joy mulkdorlari shirkatlari bilan shartnomalar boʻyicha uy-joylarga xizmat koʻrsatuvchi xususiy va boshqa nodavlat pudrat tashkilotlariga aylantirsinlar;

uy-joy mulkdorlari shirkatlari tashkil etishning tasdiqlangan jadvallari amalga oshirilishini taʼminlash uchun 1991-yilgacha qurilgan koʻp kvartirali uy-joylarni dastavval mukammal taʼmirlash chora-tadbirlarini koʻrsinlar, taʼmirlashni mahalliy budjet va budjetdan tashqari manbalar hisobiga mablagʻ bilan taʼminlasinlar;

uy-joy mulkdorlari shirkatlarini omborxonalar va xoʻjalik ehtiyojlari uchun zarur boʻlgan turar joyga moʻljallanmagan binolar, shuningdek moddiy-texnika resurslari va jihozlar bilan taʼminlashga koʻmaklashsinlar;

ikki oy muddatda faoliyat koʻrsatayotgan har bir uy-joy mulkdorlari shirkati yer uchastkasi chegaralarini belgilasinlar va ularga belgilangan tartibda uchastkadan foydalanish huquqi yuzasidan davlat dalolatnomasi bersinlar. Belgilab qoʻyilsinki, yangi tashkil etilgan uy-joy mulkdorlari shirkatlariga yer uchastkalaridan foydalanish huquqi yuzasidan davlat dalolatnomasi ular davlat roʻyxatidan oʻtkazilgandan keyin ikki oy mobaynida beriladi.

Toshkent shahar hokimligi 2001-yil mobaynida shahardagi tumanlar kommunal-foydalanish boshqarmalarini tugatsin va ular negizida uy-joy mulkdorlari shirkatlariga, korxonalar va tashkilotlarga shartnoma asosida xizmat koʻrsatuvchi xoʻjalik hisobidagi avariya-tiklash xizmatlari tashkil etsin.

2. Belgilansinki:

yangidan tashkil etilayotgan uy-joy mulkdorlari shirkatlari roʻyxatdan oʻtkazilayotganda va hisobga qoʻyilayotganda belgilangan yigʻimlar va toʻlovlardan ozod etiladilar;

uy-joy mulkdorlari shirkatlari balansida boʻlgan turar joyga moʻljallanmagan binolarni va boshqa mol-mulkni ijaraga berishdan, shuningdek uy-joy mulkdorlari shirkatlariga tegishli boʻlgan hududdagi yakka tartibdagi garajlar va boshqa imoratlar egalaridan foydalanish xarajatlari uchun tushadigan mablagʻlar, ulardan keyinchalik aylanma mablagʻlarni toʻldirishda, uy-joyni mukammal tuzatish uchun moddiy-texnika resurslari zaxirasini yaratishda foydalanish uchun shirkatlarning depozit hisob raqamlariga oʻtkaziladi.

3. Tijorat banklariga uy-joy mulkdorlari shirkatlariga joriy va mukammal taʼmirlashni amalga oshirish uchun zarur boʻlgan moddiy-texnika resurslari, asbob-anjomlar va jihozlar sotib olish uchun Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari kafilligi ostida imtiyozli kreditlar berish tavsiya etilsin.

4. Mamlakatning barcha hududi uchun kommunal xizmatlar tarif siyosatining yagona prinsiplarini joriy etish maqsadida “Oʻzkommunxizmat” agentligi Oʻzbekiston Respublikasi Moliya vazirligi, Makroiqtisodiyot va statistika vazirligi bilan birgalikda:

bir oy muddatda kommunal xizmatlarga tariflarni shakllantirishda xarajatlar tarkibini aniqlash metodikasini qayta ishlab chiqsin va belgilangan tartibda tasdiqlasin;

2002-yil 1-yanvargacha boshqa manfaatdor tashkilotlar bilan birgalikda gaz, suv, issiqlik taʼminoti, markaziy isitish va kanalizatsiya xizmatlari koʻrsatishda texnologik nobudgarchiliklarning cheklangan normativlarini ishlab chiqsin va belgilangan tartibda tasdiqlasin.

Vazirlar Mahkamasining 2001-yil 29-yanvardagi 47-f-son farmoyishiga muvofiq Vazirlar Mahkamasining Axborot-tahlil boshqarmasi huzurida tashkil etilgan kommunal xizmatlarga tarif siyosati boʻyicha doimiy ishlovchi ishchi guruh Oʻzbekiston Respublikasi Moliya vazirligi bilan birgalikda mahalliy boshqaruv organlari tomonidan tasdiqlanadigan uy-joy kommunal xizmatlarga tariflar, shuningdek kommunal xizmatlar koʻrsatuvchilarga tariflardagi farqni qoplash uchun budjetdan ajratiladigan mablagʻlardan maqsadli foydalanilishi ustidan doimiy monitoring olib borilishini taʼminlasin.

5. Uy-joy kommunal xizmatlar uchun hisob-kitob qilish mexanizmini takomillashtirish maqsadida uy-joy mulkdorlari shirkatlari, uy-joylardan foydalanish xizmatlari va kommunal xizmatlar koʻrsatuvchi tashkilotlar;

schyot kvitansiyalarda xizmatlarning har bir turi qiymatini alohida koʻrsatgan holda aholi bilan oʻzaro hisob-kitob qilish;

fuqarolar tomonidan ularning ish joyidagi ish haqidan tegishlicha ushlab qolish yoʻli bilan uy-joy-kommunal xizmatlar uchun haq toʻlanishini tashkil etish amaliyotini keng qoʻllasinlar.

6. Quyidagilar sud daʼvolari boʻyicha davlat boji toʻlashdan ozod qilinsin:

foydalanish xarajatlariga va kommunal xizmatlarga haq toʻlash boʻyicha qarzlarni undirib olish toʻgʻrisidagi daʼvolar boʻyicha uy-joy mulkdorlari shirkatlari, kommunal-foydalanish tashkilotlari;

tuzilgan shartnomalar shartlari aholiga uy-joy-kommunal xizmatlar koʻrsatuvchi korxonalar tomonidan bajarilmasligi yoki sifatsiz bajarilishi tufayli yetkazilgan zararni qoplash toʻgʻrisidagi daʼvolar boʻyicha uy-joy mulkdorlari shirkatlari, kommunal-foydalanish tashkilotlari, shuningdek fuqarolar.

7. Belgilansinki, uy-joy mulkdorlari va uy-joyni ijaraga oluvchilar:

kommunal xizmatlar uchun avans sifatida toʻlangan toʻlovlarga, ushbu davrda tegishli tariflar koʻpaygan taqdirda qoʻshimcha haq toʻlashdan ozod etiladilar (oʻn ikki oydan ortiq boʻlmagan davr uchun);

mavjud qarzlar ular tomonidan 2001-yil 1-iyulgacha boʻlgan davrda toʻlangan taqdirda muddati oʻtkazib yuborilgan toʻlovlar summasidan penya toʻlashdan ozod etiladilar;

uy-joy-kommunal xizmatlar uchun 2001-yil 1-yanvargacha vujudga kelgan qarzlarni “Indeksatsiya” maxsus hisob raqamlaridan omonatlarni muddatidan oldin olish hisobiga toʻlashlari mumkin, ushbu mablagʻlar tegishli bank tomonidan omonatchilarning belgilangan namunadagi toʻlov topshiriqnomasi asosida naqdinasiz hisob-kitob yoʻli bilan uy-joy-kommunal xizmatlar koʻrsatuvchi hamda elektr energiyasi yetkazib beruvchi korxonalarga oʻtkaziladi.

8. Quyidagilar:

Uy-joyning umumiy foydalaniladigan joylariga texnik xizmat koʻrsatish va kommunal xizmatlar koʻrsatish boʻyicha namunaviy shartnoma (kontrakt) 1-ilovaga muvofiq;

Uy-joy-kommunal xizmatlarga haq toʻlash boʻyicha aholiga imtiyozlar berish tartibi toʻgʻrisidagi Nizom 2-ilovaga muvofiq tasdiqlansin.

9. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari “Oʻzkommunxizmat” agentligi va fuqarolarning oʻzini oʻzi boshqarish organlari (mahalla qoʻmitalari) bilan birgalikda:

Nukus shahrida, viloyat markazlarida va Toshkent shahrida uy-joy mulkdorlari shirkatlari xodimlari va aholi bilan kommunal xizmat koʻrsatish sohasini isloh qilish, shirkatlar faoliyatini tashkil etish va ularning aholiga kommunal xizmatlar koʻrsatuvchi korxonalar bilan oʻzaro munosabatlari masalalari boʻyicha doimiy ishlovchi seminarlar tashkil etsinlar;

uy-joy-kommunal xizmatlar uchun oʻz vaqtida hisob-kitob qilish yuzasidan kollektiv masʼuliyat tizimi samarali faoliyat koʻrsatayotgan tumanlarning toʻplangan ijobiy tajribasini ommalashtirishga doir kechiktirib boʻlmaydigan chora-tadbirlar koʻrsinlar.

10. Hukumatning 3-ilovaga muvofiq ayrim qarorlari oʻz kuchini yoʻqotgan deb hisoblansin.

11. Oʻzbekiston Respublikasi Adliya vazirligi “Oʻzkommunxizmat” agentligi, boshqa manfaatdor vazirliklar va idoralar bilan birgalikda amaldagi qonun hujjatlariga mazkur qarorga muvofiq tegishli oʻzgartirish va qoʻshimchalar kiritish toʻgʻrisida bir oy muddatda takliflar kiritsin.

12. Mazkur qarorning bajarilishini nazorat qilish Oʻzbekiston Respublikasining Bosh vaziri Oʻ. T. Sultonov zimmasiga yuklansin.

Keyingi oʻrinlarda “Buyurtmachi” deb ataladigan _________________ ________________uy-joy mulkdorlari (Yagona buyurtmachi xizmati, Uy-joy mulkdorlari shirkati) bir tomondan, Ustav asosida va uy-joy fondidan foydalanish korxonasi nomidan ish koʻruvchi, keyingi oʻrinlarda “Bajaruvchi” deb ataluvchi_____________________ikkinchi tomondan, mazkur shartnoma (kontrakt)ni quyidagilar toʻgʻrisida tuzdilar.

1.__________________________shahar,__________________tuman____________________________koʻchasi, ______________________uydagi manzilda joylashgan umumiy maydoni_________kv.m. boʻlgan uy-joyning umumiy foydalaniladigan obyektlarini texnik xizmat koʻrsatish uchun dalolatnoma boʻyicha “Buyurtmachi” topshiradi, “Bajaruvchi” esa qabul qilib oladi.

2. Texnik xizmat koʻrsatiladigan umumiy foydalaniladigan obyektlar:

tom;

yoʻlaklar;

lift xoʻjaligi;

texnik yertoʻlalar;

bittadan ortiq kvartiraga xizmat koʻrsatuvchi muhandislik-texnik asbob-uskunalar va tarmoqlar;

shaxtalar — (lift, axlat oʻtish, gaz oʻtish shaxtalari).

3. Kvartiralar ichidan oʻtuvchi muhandislik-texnik asbob-uskunalar va tarmoqlarning xizmat koʻrsatish chegaralari:

joʻmrakkacha suv quvurlari shahobchalari;

radiatorgacha isitish tizimi;

gaz tarmoqlari, shu jumladan gaz plitasi;

joʻmrakkacha issiq suv taʼminoti tarmogʻi.

4. “Bajaruvchi” quyidagilarni oʻz zimmasiga oladi:

turar joydan texnik foydalanishning yagona qoidalari va normalariga rioya qilgan holda umumiy foydalaniladigan obyektlarga texnik xizmat koʻrsatilishini taʼminlash;

umumiy foydalaniladigan joylarni, uy ichki va kvartira ichki muhandislik tarmoqlarini (sovuq suv taʼminoti, issiq suv taʼminoti, kanalizatsiya, issiqlik tirgaklari va tarmoqlari, tom va zinapoya kataklari) zarur holatda saqlashni taʼminlovchi mukammal va joriy tuzatish ishlarini bajarish;

“Buyurtmachi”dan asbob-uskunalar nosozligi toʻgʻrisida yozma buyurtma tushganda:

a) sovuq va issiq suv taʼminoti va isitish asbob-uskunalarini 4 soatdan kechikmay tuzatish;

b) tomdan chakka oʻtishini bir kecha-kunduzda tuzatish;

v) umumiy foydalaniladigan joylardagi elektr uskunalari nosozligini 1 kecha-kunduzda tuzatish;

g) avariya tusidagi nosozlikni darhol tuzatish;

kommunal xizmatlar (issiq va sovuq suv berish, kanalizatsiya, isitish, gaz, axlatni chiqarish) oʻz vaqtida koʻrsatilishini taʼminlash;

turar joyning yertoʻlasiga va tomiga begona shaxslarning kirishini toʻsish;

ish sifatining kafolatlangan darajasi va miqdori buzilishi munosabati bilan “Bajaruvchi”ning aybi bilan kelib chiqqan zararlarni “Buyurtmachi”ga qoplash.

5. “Burtmachi” quyidagilarni oʻz zimmasiga oladi:

mazkur shartnoma boʻyicha umumiy foydalaniladigan joylarga texnik xizmat koʻrsatish ishlari bajarilganligi, kommunal xizmatlar koʻrsatilganligi uchun oʻz vaqtida, biroq hisobot oyidan keyingi oyning 10-kunidan kechikmay haq toʻlash;

turar joylardan texnik foydalanishning yagona qoidalari va normalariga hamda turar joylardan va uy atrofidagi hududdan foydalanish qoidalariga muvofiq umumiy foydalaniladigan joylardan foydalanish;

kvartirada yoki turar joyga kirish joylarida oʻrnatilgan barcha oʻlchov priborlarining saqlanishi va uzluksiz ishlashini taʼminlash, ular ishdan chiqqan taqdirda bir kecha-kunduzdan kechikmay “Bajaruvi”ga yozma ravishda xabar berish;

muhandislik kommunikatsiyalarini ivirsitmaslik va ularning oldini toʻsib qoʻymaslik hamda sanitariya va yongʻinga qarshi talablarga rioya qilishini taʼminlash;

avariya vaziyatida istalgan vaqtda “Bajaruvchi”ga turar joyga kirish imkoniyatini berish.

6. “Buyurtmachi” quyidagi huquqlarga egadir:

mazkur shartnomaga muvofiq ishlar notoʻliq va sifatsiz bajarilgan taqdirda umumiy foydalaniladigan joylarga texnik xizmat koʻrsatish boʻyicha koʻrsatilgan xizmatlar uchun haq toʻlash summasi qayta hisoblab chiqilishini “Bajaruvchi”dan talab qilish;

ishlar “Bajaruvchi” tomonidan oʻz vaqtida bajarilmagan taqdirda ushbu ishlarni oʻz kuchlari bilan bajarish, xarajatlarni esa “Bajaruvchi”ning hisobiga oʻtkazish;

umumiy foydalaniladigan joylarga texnik xizmat koʻrsatishga va koʻrsatilgan kommunal xizmatlarga yoʻnaltirilgan pul mablagʻlaridan foydalanish toʻgʻrisidagi hisobotni talab qilish;

“Bajaruvchi” bilan kelishmovchiliklar kelib chiqqan taqdirda sudga murojaat qilish.

Oʻz majburiyatlari muddatida bajarilmaganda yoki zarur darajada bajarilmaganda “Bajaruvchi” “Buyurtmachi”ga muddati oʻtkazib yuborilgan har bir kun uchun xizmat koʻrsatish yoki xizmatlar qiymatining 1 foizi miqdorida penya toʻlaydi. Undirilgan penya miqdori ishlar (xizmatlar)ning umumiy qiymatidan ortiq boʻlishi mumkin emas.

7. “Bajaruvchi” quyidagi huquqlarga egadir:

materiallar, energiya manbalari, yoqilgʻi va hokazolar narxlari oshgan taqdirda umumiy foydalaniladigan joylarga texnik xizmat koʻrsatish uchun haq toʻlash tarifini qayta koʻrib chiqish toʻgʻrisidagi taklif bilan, biroq bir yilda bir martadan koʻp emas, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklariga murojaat qilish;

muddati oʻtkazib yuborilgan har bir kun uchun kechiktirilgan toʻlovlar summasining 0,5 foizi miqdorida penya hisoblash;

ikki oy va undan koʻp vaqt davomida kommunal xizmatlar uchun haq toʻlanmagan taqdirda (uzishdan 3 kun oldin isteʼmolchini suv va gaz taʼminoti manbalaridan uzib qoʻyish, “Buyurtmachi” hisobidan haq toʻlangandan keyin ulash;

“Buyurtmachi” bilan kelishmovchiliklar kelib chiqqan taqdirda Oʻzbekiston Respublikasi qonun hujjatlarida belgilangan tartibda sudga murojaat qilish.

8. Mazkur Shartnoma 200____ yil “______” _________dan 200_____yil “_____”___________gacha muddatga tuzildi.

9. Mazkur Shartnoma imzolangan paytdan boshlab kuchga kiradi.

10. Mazkur Shartnoma shartlari, agar ushbu oʻzgarishlar uchinchi shaxslarning huquqlari va qonuniy manfaatlariga zarar yetkazmasa, tomonlarning kelishuviga binoan Oʻzbekiston Respublikasi qonun hujjatlariga muvofiq oʻzgartirilishi mumkin.

11. Shartnoma bir xil yuridik kuchga ega boʻlgan ikki nusxada tuzildi.

Bir nusxa “Buyurtmachi”da ikkinchi nusxasi “Bajaruvchi”da qoladi.

1. Ushbu Nizom uy-joy-kommunal xizmatlar uchun haq toʻlash boʻyicha aholiga imtiyozlar berishni tartibga solish maqsadida ishlab chiqilgan va u 2001-yil 1-iyuldan boshlab amalga kiritiladi.

2. Ushbu Nizom uy-joy fondini saqlash va taʼmirlash boʻyicha foydalanish xarajatlarini (keyingi oʻrinlarda foydalanish xarajatlari deb ataladi) hamda kommunal xizmatlar (ichimlik suv, kanalizatsiya, issiq suv va isitish, tabiiy gaz va elektr energiya) haqini toʻlash boʻyicha ijtimoiy qoʻllab-quvvatlash va muhofaza qilish maqsadida amaldagi qonun hujjatlari bilan imtiyozlar belgilangan aholining ayrim toifalariga qoʻllanadi.

Berilayotgan imtiyozlar miqdori (stavkasi) respublikada amalda boʻlgan qonunchilik bilan belgilangan.

3. Ushbu Nizomga muvofiq imtiyozlar:

kommunal xizmatlar uchun haq toʻlash boʻyicha xususiy, munitsipal, idoraviy uy-joy fondi va maqsadli foydalanishdagi kommunal uy-joy fondi uylarida;

foydalanish xarajatlari uchun haq toʻlash boʻyicha xususiy uylarda (fuqarolarning xususiy mulki boʻlgan yakka tartibdagi uy-joylardan tashqari), munitsipal, idoraviy uy-joy fondi va maqsadli foydalanishdagi kommunal uy-joy fondi uylarida beriladi.

4. Foydalanish xarajatlari va kommunal xizmatlar uchun haq toʻlash boʻyicha imtiyozlar kim uy, kvartira egasi yoki yollovchisi hisoblanishidan qatʼi nazar, beriladi.

5. Agar fuqaro foydalanish xarajatlari va kommunal xizmatlar uchun haq toʻlash boʻyicha amaldagi ikkita (va koʻproq) turli hujjatlarda nazarda tutilgan imtiyozlarni olish huquqiga ega boʻlsa, u holda imtiyoz unga imtiyozning eng yuqori miqdori nazarda tutilgan qonun hujjatiga muvofiq beriladi.

Uyda, kvartirada qonunchilikka muvofiq uy-joy-kommunal xizmatlar uchun imtiyozli tarif boʻyicha haq toʻlash huquqi berilgan bir nechta kishi yashagan taqdirda ovqat pishirish uchun tabiiy gazdan foydalanish, sovuq va issiq suv taʼminoti hamda kanalizatsiya uchun toʻlovlarni hisoblashda haq toʻlash boʻyicha imtiyoz har bir imtiyozli fuqaroga respublikada amalda boʻlgan qonunchilikda belgilangan miqdorda beriladi, isitish uchun tabiiy gazdan foydalanganlik, markaziy isitish xizmatlari va foydalanish xarajatlari uchun toʻlovlar esa eng yuqori imtiyoz miqdori boʻyicha hisoblanadi.

6. Foydalanish xarajatlari va kommunal xizmatlar uchun haq toʻlash boʻyicha imtiyozlar amaldagi qonunchilikda ularni berish nazarda tutilgan shaxsga, shuningdek faqat u bilan birga yashaydigan mehnatga layoqatsiz, mustaqil daromadlar* manbaiga ega boʻlmagan va uning qaramogʻida boʻlgan oila aʼzolariga beriladi (respublikada amalda boʻlgan qonunchilik bilan haq toʻlash boʻyicha imtiyozlar faqat uning oʻziga berilgan va uning oila aʼzolariga tatbiq etilmaydigan fuqarolar toifalaridan tashqari).

Foydalanish xarajatlari va kommunal xizmatlar uchun haq toʻlash boʻyicha imtiyozlar oilaning halok boʻlgan harbiy xizmatchi uchun boquvchisini yoʻqotganlik boʻyicha pensiya olishadigan, ushbu huquq ularga qonunchilik bilan berilgan barcha aʼzolariga beriladi.

Imtiyozlar doimiy (roʻyxatdan oʻtgan) yashash joyi boʻyicha beriladi.

7. Foydalanish xarajatlari va kommunal xizmatlar uchun haq toʻlash boʻyicha imtiyozlar berish hisob-kitobi yashovchi tomonidan uning imtiyozlar olishga boʻlgan huquqini tasdiqlovchi tegishli hujjatlar uy-joy mulkdorlari shirkatiga yoki uy-joy fondidan foydalanishni amalga oshiruvchi boshqa tashkilotga (keyingi oʻrinlarda boshqaruvchi tashkilot deb ataladi) taqdim etilgan kundan boshlab amalga oshiriladi.

Foydalanish xarajatlari va kommunal xizmatlar boʻyicha qayta hisob-kitoblar faqat 1941—1945-yillardagi urush nogironlariga, qatnashchilariga va ularga tenglashtirilgan shaxslarga, baynalmilal jangchilarga va halok boʻlgan harbiy xizmatchilarning tegishli normativ hujjat amalda joriy etilgan vaqtdan boshlab imtiyozlarga ega boʻlgan oilalariga, agar ular koʻrsatilgan davr uchun imtiyozlarga ega boʻlishgan boʻlsa, imtiyozlar olish huquqini beruvchi hujjatlar boshqaruvchi tashkilotga berilgan vaqtdan qatʼi nazar, amalga oshiriladi, ortiqcha olingan summa esa kelgusidagi toʻlovlar hisobiga qoʻshiladi.

8. Foydalanish xarajatlari va kommunal xizmatlar uchun haq toʻlash boʻyicha imtiyozlar olish huquqiga ega boʻlgan fuqarolar tasdiqlovchi hujjatlarni har yili bir marta boshqaruvchi tashkilotga majburiy tartibda taqdim etadilar.

Pensiyalar va ijtimoiy nafaqalar, stipendiyalar, alimentlar, bolali oilalarga nafaqalar va kam taʼminlangan oilalarga moddiy yordam mustaqil daromadlarga kirmaydi.

9. Foydalanish xarajatlari uchun haq toʻlash boʻyicha imtiyozlar ushbu Nizomning 6-bandida koʻrsatilgan fuqarolar egallab turgan umumiy maydon hisobiga, imtiyoz olish huquqiga ega boʻlgan har bir kishi hisobiga uy-joy maydonining ijtimoiy normasi doirasida beriladi.

10. Uy-joy maydonining ijtimoiy normasi Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari tomonidan, lekin bir kishi uchun umumiy maydon oʻn olti kvadrat metrdan kam boʻlmagan hajmda, oʻrindiqli aravachada harakatlanuvchi nogiron uchun esa kamida yigirma uch kvadrat metr hajmida belgilanadi.

11. Foydalanish xarajatlari uchun haq toʻlash boʻyicha imtiyoz, maydon belgilangan uy-joy umumiy maydoni normasidan ortiq boʻlgan taqdirda, bir xonali kvartira amalda egallagan maydon uchun beriladi.

12. Ortiqcha maydon uchun foydalanish xarajatlari uchun amaldagi tariflarga muvofiq toʻliq miqdorda haq toʻlanadi.

13. Ushbu Nizomning 6-bandida koʻrsatilgan shaxslar toifalariga kommunal xizmatlar uchun toʻlov qiymatidan chegirishlar Oʻzbekiston Respublikasi Vazirlar Mahkamasi (elektr energiya, tabiiy gaz), Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari (sovuq va issiq suv, kanalizatsiya, markaziy isitish) tomonidan tasdiqlanadigan kommunal xizmatlardan foydalanish normativlari doirasida, markaziy isitish tarmogʻiga ega boʻlmagan uylarda yashovchilar uchun esa belgilangan normalar doirasida sotib olinadigan yoqilgʻi uchun toʻlov boʻyicha belgilangan (imtiyozlardan foydalanuvchi fuqarolar uchun imtiyozli tariflar boʻyicha tabiiy gaz va koʻmirdan foydalanish normalari ushbu Nizomga 1-ilovada keltirilgan).

14. Balansida oʻz (idoraviy) uy-joy fondiga ega boʻlgan vazirliklar, idoralar, birlashmalar, korxonalar va tashkilotlar foydalanish xarajatlari va issiqlik taʼminoti xizmatlari uchun haq toʻlash boʻyicha imtiyozlar berishdan yoʻqotiladigan daromadlarni oʻz moliyaviy resurslari hisobiga qoplaydilar.

15. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari boshqaruvchi tashkilotlari va issiqlik taʼminoti korxonalarining hamda belgilangan tartibda respublika hukumati qarorlariga binoan aholiga issiqlik taʼminoti xizmatlari koʻrsatuvchi boshqa korxonalarning foydalanish xarajatlari va issiqlik taʼminoti uchun haq toʻlash boʻyicha fuqarolarning ayrim toifalariga imtiyozlar berish natijasida yoʻqotilgan daromadlari taqdim etilgan hisob-kitoblarga muvofiq (ushbu Nizomning 14-bandida nazarda tutilganlardan tashqari) mahalliy budjetdan qoplanadi.

16. Kommunal xizmatlarning qolgan turlari (sovuq suv taʼminoti, kanalizatsiya va elektr energiya) boʻyicha ushbu xizmatlarni imtiyozli tariflar boʻyicha koʻrsatuvchi korxonalarning yoʻqotilgan daromadlari ulgurji foydalanuvchilar oladigan daromadlar hisobiga qoplanadi.

17. “Oʻzkommunxizmat” agentligi “Boshkommungaz” korxonasining aholining ayrim toifalariga imtiyozli tariflar boʻyicha gaz sotishdan yoʻqotishlarini qoplash yetkazib beruvchidan gaz sotib olish tariflarini shakllantirishda hisobga olinadi.

18. Agar koʻrsatilgan uy-joy-kommunal xizmatlar uchun toʻlovlar uy-joydan foydalanish korxonalari, boshqaruvchi tashkilotlar orqali amalga oshirilsa, u holda ushbu tashkilotlar xizmatlar koʻrsatuvchi kommunal korxonalar schyotlarini ushbu Nizomning 6-bandida nazarda tutilgan fuqarolar toifalari uchun chegirishlar summasini ushlab qolgan holda toʻlaydilar.

19. Kommunal xizmat koʻrsatish boshqaruvchi tashkilotlari va korxonalarining qishloq joylarda yashaydigan va ishlaydigan pedagog xodimlarga foydalanish xarajatlari va kommunal xizmatlar uchun toʻlov boʻyicha yuz foizli imtiyozlar berishdan yoʻqotilgan daromadlarini qoplash tegishli budjet muassasalari smetalarida nazarda tutiladi hamda boshqaruvchi tashkilotlarga va kommunal xizmatlar koʻrsatuvchi korxonalarga majburiy ravishda oʻtkaziladi.

20. Shaharlarda yashaydigan hamda shaharlarda va qishloq joylarda ishlaydigan pedagog xodimlarga foydalanish xarajatlari va issiqlik taʼminoti xizmatlari uchun toʻlov boʻyicha ellik foizli imtiyoz berish munosabati bilan yoʻqotiladigan daromadlar boshqaruvchi tashkilotlarga va issiqlik taʼminoti korxonalariga mahalliy budjetlar mablagʻlari hisobidan qoplanadi.

21. Xizmatlarning qolgan turlari boʻyicha pedagog xodimlarga gaz, ichimlik suv, kanalizatsiya, elektr energiyadan foydalanganlik uchun ellik foizli chegirish ushbu xizmatlarni koʻrsatuvchi korxonalar tomonidan ulgurji foydalanuvchilardan olinadigan daromadlar hisobiga, tabiiy gaz boʻyicha esa ushbu Nizomning 17-bandiga muvofiq qoplanadi.

22. Korxonalarning qishloq joylarda yashaydigan va shaharlarda ishlaydigan pedagog xodimlarga foydalanish xarajatlari va kommunal xizmatlar uchun toʻlov boʻyicha yuz foizli imtiyozlar berilishi munosabati bilan yoʻqotiladigan daromadlari ushbu Nizomning 21-bandida nazarda tutilgan tartibda qoplanadi.

23. Boshqaruvchi tashkilotlar har bir kvartira uchun ochiladigan shaxsiy hisob varaqlarida foydalanish xarajatlari va kommunal xizmatlar uchun haq toʻlash boʻyicha imtiyozlarga ega boʻlgan fuqarolar hisobini olib borishadi, ularda imtiyozlar olish huquqini tasdiqlovchi taqdim etilgan hujjatlar asosida yozuvlar qayd etiladi (guvohnomalar nusxalari va belgilangan shakldagi maʼlumotnomalar shaxsiy hisob varagʻiga tikib qoʻyiladi).

24. Boshqaruvchi tashkilotlar har yili 1-iyungacha, foydalanish xarajatlari va issiqlik taʼminoti xizmatlari uchun haq toʻlash boʻyicha imtiyozlar olish huquqiga ega boʻlgan fuqarolarni hisobga olish maʼlumotlari asosida tuman va shahar moliya boʻlimlariga uy-joy tashkilotlari va issiqlik taʼminoti korxonalarining toʻlov boʻyicha imtiyozlar berish munosabati bilan yoʻqotiladigan daromadlarini qoplash uchun mablagʻlarga boʻlgan ehtiyoj hisob-kitoblarini taqdim etadi (ushbu Nizomning 14-bandida nazarda tutilganlardan tashqari).

25. Tuman va shahar moliya boʻlimlari qoplash uchun mablagʻga boʻlgan ehtiyoj hisob-kitoblarini ikki hafta muddatda koʻrib chiqadilar va Qoraqalpogʻiston Respublikasi Moliya vazirligiga, viloyatlar hokimliklarining moliya boshqarmalariga hamda Toshkent shahar hokimligining moliya bosh boshqarmasiga taqdim etadilar.

26. Qoraqalpogʻiston Respublikasi Moliya vazirligi, viloyatlar hokimliklari moliya boshqarmalari va Toshkent shahar hokimligi moliya bosh boshqarmasi taqdim etilgan hisob-kitoblarni ikki hafta muddatda koʻrib chiqadilar va Oʻzbekiston Respublikasi Moliya vazirligiga koʻrsatilgan maqsadlar uchun mahalliy budjetdan talab qilinadigan qoplov summasi toʻgʻrisida taklif kiritadilar.

27. Uy-joy tashkilotlari va issiqlik taʼminoti korxonalarining aholining alohida toifalariga foydalanish xarajatlari va issiqlik taʼminoti xizmatlari uchun toʻlov boʻyicha imtiyozlar berishdan yoʻqotiladigan daromadlarini qoplashga mahalliy budjet parametrlari bilan nazarda tutilgan joriy yil uchun ajratmalar qonunchilikda nazarda tutilgan tartibda tasdiqlangandan keyin ikki hafta muddatda mintaqaviy moliya organlari tomonidan boshqaruvchi tashkilotlarga va issiqlik taʼminoti korxonalariga yetkaziladi.

28. Fuqarolarning alohida toifalariga foydalanish xarajatlari va issiqlik taʼminoti xizmatlari uchun haq toʻlash boʻyicha imtiyozlar berishdan yoʻqotilgan daromadlarni qoplash uchun tegishli moliya organlari joriy oyning 25-kunidan kechiktirmay budjetda joriy chorak uchun nazarda tutilgan ajratmalar summasining uchdan bir qismini uy-joy fondidan foydalanishni amalga oshiruvchi boshqaruvchi tashkilotlarga va issiqlik taʼminoti korxonalariga avans tarzida oʻtkazadilar.

29. Boshqaruvchi tashkilotlar va issiqlik taʼminoti korxonalari tegishli moliya organlariga hisobot choragidan keyingi oyning 20-kunigacha foydalanish xarajatlari va kommunal xizmatlar uchun haq toʻlash boʻyicha fuqarolarga imtiyozlar berishdan koʻrilgan yoʻqotishlarning ushbu Nizomga 2, 3 va 4-ilovalarga muvofiq hisob-kitobini taqdim etadilar.

30. Hisob-kitoblarda budjet mablagʻlaridan foydalanishga doir koʻrsatkichlar yil boshidan boshlab ortib boruvchi yakun bilan aks ettiriladi.

31. Uy-joydan foydalanish boʻyicha xizmatlar koʻrsatuvchi tashkilotlar va issiqlik taʼminoti korxonalarining yoʻqotilgan daromadlarini budjetdan qoplash yuzasidan taqdim etilgan hisob-kitoblarning toʻgʻriligi uchun ularning rahbari va bosh buxgalteri shaxsan javob berishadi.

32. Moliya organlari boshqaruvchi tashkilotlar va issiqlik taʼminoti korxonalari tomonidan taqdim etilgan hisob-kitoblar asosida 5 kun mobaynida budjet mablagʻlariga boʻlgan haqiqiy ehtiyojni (ilgari oʻtkazilgan avanslarni hisobga olgan holda) aniqlaydilar.

33. Oʻtkazilgan avans hisob-kitoblar boʻyicha aniqlangan haqiqiy ehtiyojdan ortiqcha boʻlgan taqdirda, ortiqcha oʻtkazilgan summa keyingi xarajatlarni moliyalash hisobiga qoʻshiladi va aksincha, xarajatlarning avans bilan qoplanmagan qismi mahalliy budjetdan qoplanadi.

34. Yuqorida koʻrsatilgan maqsadlarga yoʻnaltirilayotgan davlat budjeti mablagʻlaridan belgilanmagan maqsadda foydalanishga yoʻl qoʻygan mansabdor shaxslar amaldagi qonunchilikda belgilangan tartibda maʼmuriy yoki jinoiy javobgarlikka tortiladilar.

35. Budjet mablagʻlaridan belgilanmagan maqsadda foydalanish hollari aniqlangan taqdirda moliya organlari va hududiy kommunal-foydalanish birlashmalari ularni bartaraf etish hamda belgilanmagan maqsadda foydalanilgan mablagʻlarni budjetga qaytarish boʻyicha shoshilinch chora-tadbirlar koʻrishga majburdirlar.

1. Tabiiy gaz uchun haq toʻlash boʻyicha imtiyozlardan foydalanuvchi shaxslarga imtiyozli tariflar boʻyicha tabiiy gazdan foydalanish normalari 1 kishi uchun kub metr hisobida belgilangan:

2. Uy-joylarni isitish uchun imtiyozli tariflar boʻyicha tabiiy gazdan foydalanish normalari, oilaning imtiyozga ega boʻlgan aʼzolari sonidan qatʼi nazar, har bir oila uchun kub metr hisobida, isitiladigan xonaning 108 kub metri hisobiga belgilangan:

Isitiladigan xonaning normadan ortiqcha hajmi uchun haq amaldagi tarif boʻyicha toʻlanadi.

Tabiiy gaz sarfini hisoblash priborlari bilan jihozlangan uylarda, kvartiralarda imtiyozli tarif boʻyicha tabiiy gaz berish quyidagi tartibda normalanadi:

Isitishga — isitish mavsumining noyabrdan martgacha (besh oy) davom etadigan belgilangan uzunligini hisobga olgan holda, imtiyozli tarif boʻyicha haq toʻlanadigan isitishga gaz berishning ushbu davr uchun oylik normasi: Qoraqalpogʻiston Respublikasi va Xorazm viloyati uchun 648 kub metr (3240 : 5 = 648), qolgan viloyatlar va Toshkent shahri uchun 622,1 kub metr (3110,4 : 5 = 622,1) hajmida belgilangan.

Ovqat pishirishga va gaz vositasidagi suv isitgichlar yordamida issiq suv bilan taʼminlashga — Uy-joy-kommunal xizmatlar uchun haq toʻlash boʻyicha aholiga imtiyozlar berish tartibi toʻgʻrisida Nizomning 6-bandida koʻrsatilgan shaxslarga imtiyozli tariflar boʻyicha tabiiy gaz berishning yuqorida koʻrsatilgan normalaridan kelib chiqqan holda belgilangan.

Imtiyozli tariflar boʻyicha haq toʻlanadigan, isitishga, ovqat pishirishga va issiq suv bilan taʼminlashga tabiiy gaz berishning ushbu normalar boʻyicha belgilangan hajmi (kub metr) gaz sarfini hisoblagichning amaldagi koʻrsatkichlari boʻyicha aniqlangan hajmdan chegiriladi va qolgan tafovut (imtiyozli tariflar boʻyicha haq toʻlanadigan hajmdan ortiqchasi) uchun haq, gaz sarfini hisoblagichlar mavjud boʻlganda, kommunal-maishiy ehtiyojlarga tabiiy gazdan foydalanganlik uchun belgilangan amaldagi tarif boʻyicha toʻlanadi.

3. Imtiyozdan foydalanish huquqiga ega boʻlgan fuqarolarga imtiyozli tariflar boʻyicha suyultirilgan gaz berish yiliga bitta oila hisobiga 283,8 kg miqdorida belgilangan.

4. Imtiyozdan foydalanish huquqiga ega boʻlgan va markaziy isitish tarmogʻiga ega boʻlmagan uylarda yashaydigan fuqarolarga yoqilgʻi berish yiliga bitta oila hisobiga 1 tonna koʻmir miqdorida belgilangan.

1. Oʻzbekiston Respublikasi Xalq Komissarlari Sovetining “Oʻzbekiston SSR shaharlarida dvorniklar toʻgʻrisidagi Nizomni tasdiqlash toʻgʻrisida” 1943-yil 31-maydagi 649-son qarori.

2. KPSS Markaziy Komiteti va SSSR Ministrlar Sovetining “Mamlakatda sogʻliqni saqlashni yanada yaxshilash va meditsina fanini rivojlantirish tadbirlari toʻgʻrisida” 1968-yil 5-iyuldagi qarori yuzasidan Oʻzbekiston Kompartiyasi Markaziy Komiteti va Oʻzbekiston SSR Ministrlar Sovetining 1968-yil 8-avgustdagi 386-son qarori (OʻzSSR QT, 1968y., 6-son, 42-modda) 12-bandining “v” kichik bandi.

3. SSSR Ministrlar Sovetining “Shaxsiy pensiyalar toʻgʻrisidagi Nizomni tasdiqlash haqida” 1977-yil 19-dekabrdagi 1128-son qarori yuzasidan Oʻzbekiston SSR Ministrlar Sovetining 1978-yil 14-yanvardagi 11-son qarori (OʻzSSR QT, 1978-y., 1-son, 2-modda)ga ilova qilingan Shaxsiy pensiyalar toʻgʻrisidagi Nizomning 27-28-bandlari.

4. KPSS Markaziy Komiteti va SSSR Ministrlar Sovetining “Ulugʻ Vatan urushi qatnashchilarining moddiy-maishiy sharoitlarini yanada yaxshilash tadbirlari toʻgʻrisida” 1978-yil 10-noyabrdagi 907-son qarori yuzasidan Oʻzbekiston Kompartiyasi Markaziy Komiteti va Oʻzbekiston SSR Ministrlar Sovetining 1978-yil 11-dekabrdagi 738-son qarori (OʻzSSR QT, 1978-y., 12-son, 44-modda) 2-bandining “d” kichik bandi.

5. SSSR Ministrlar Sovetining “harbiy xizmatchilar, harbiy xizmatdan isteʼfoga chiqarilgan shaxslar va ularning oilalari uchun imtiyozlar toʻgʻrisidagi Nizomni tasdiqlash haqida” 1981-yil 17-fevraldagi 193-son qarori yuzasidan Oʻzbekiston SSR Ministrlar Sovetining 1981-yil 2-martdagi 179-son qaroriga ilova qilingan harbiy xizmatchilar, harbiy majburiyatlilar, harbiy xizmatdan isteʼfoga chiqarilgan shaxslar va ularning oilalari uchun imtiyozlar toʻgʻrisidagi Nizomning 25-26-bandlari.

6. SSSR Ministrlar Sovetining “Vatan urushi nogironlari va halok boʻlgan harbiy xizmatchilarning oilalari uchun imtiyozlar toʻgʻrisidagi Nizomni tasdiqlash haqida” 1981-yil 23-fevraldagi 209-son qarori yuzasidan Oʻzbekiston SSR Ministrlar Sovetining 1981-yil 2-martdagi 182-son qaroriga ilova qilingan Vatan urushi nogironlari va halok boʻlgan harbiy xizmatchilarning oilalari uchun imtiyozlar toʻgʻrisidagi Nizomning 17-bandi.

7. Oʻzbekiston SSR Ministrlar Sovetining 1981-yil 7-iyuldagi 544-son qarori (OʻzSSR QT, 1981-y., 7-son, 21-modda) bilan tasdiqlangan Vatan urushi invalidlariga va boquvchisidan judo boʻlganligi sababli halok boʻlgan harbiy xizmatchi uchun pensiya olayotgan oilalarga turar joy maydoni va kommunal xizmatiga haq toʻlash, shuningdek, Vatan urushi invalidlariga passajir transportida qatnash yuzasidan imtiyozlar berish tartibi toʻgʻrisidagi Nizomning I boʻlimi.

8. Oʻzbekiston SSR Ministrlar Sovetining “Oʻzbekiston SSRda Vatan urushining invalidlari va halok boʻlgan harbiy xizmatchilarning oilalari uchun belgilangan imtiyozlar toʻgʻrisida hamda SSSR Ministrlar Sovetining 1981-yil 23-fevraldagi 209-son qarorida koʻrsatilgan imtiyozlarni qoʻllanish tartibi haqida” 1981-yil 11-maydagi 407-son qarori (OʻzSSR QT, 1981y., 5-son, 15-modda) bilan tasdiqlangan Vatan urushi invalidlari va halok boʻlgan harbiy xizmatchilarning oilalari uchun belgilangan imtiyozlar roʻyxati III boʻlimining 3-bandi va IV boʻlimi.

9. KPSS Markaziy Komiteti va SSSR Ministrlar Sovetining “Ulugʻ Vatan urushi qatnashchilarining, halok boʻlgan harbiy xizmatchilarning oilalari, Sovet Ittifoqi qahramonlari va Shuhrat ordenining uchala darajasi bilan mukofotlangan kishilarning moddiy-maishiy sharoitlarini yanada yaxshilash masalasi boʻyicha” 1984-yil 26-iyuldagi 812 va 813-son qarorlari yuzasidan Oʻzbekiston SSR Ministrlar Sovetining 1984-yil 4-sentabrdagi 456-son qarori 1-bandi “i” kichik bandining beshinchi xat boshi, “k” va “l” kichik bandlari va 2-bandining “g” kichik bandi.

10. KPSS Markaziy Komiteti va SSSR Ministrlar Sovetining “Ulugʻ Vatan urushi qatnashchilari uchun tayinlangan imtiyozlarni Leningrad shahri qamalda boʻlgan davrda shaharning korxonalari, muassasalari va tashkilotlarida ishlagan hamda “Leningrad mudofaasi uchun” medali bilan mukofotlangan grajdanlarga joriy etish toʻgʻrisida” 1985-yil 14-maydagi 416-son qarori yuzasidan Oʻzbekiston SSR Ministrlar Sovetining 1985-yil 14-iyundagi 311-son qarori (OʻzSSR QT, 1985y., 6-son, 26-modda) 1-bandining “a” kichik bandi.

11. KPSS Markaziy Komiteti va SSSR Ministrlar Sovetining “Aholi salomatligini yanada yaxshilash va sogʻliqni saqlashning moddiy-texnika bazasini mustahkamlash chora-tadbirlari toʻgʻrisida” 1988-yil 20-iyundagi 764-son qarori yuzasidan Oʻzbekiston SSR Ministrlar Sovetining 1988-yil 31-oktabrdagi 392-son qarori 19-bandi “j” kichik bandining toʻrtinchi xatboshi.

12. Oʻzbekiston SSR Ministrlar Sovetining “Oʻzbekiston Koʻrlar jamiyatining moddiy-texnika bazasini mustahkamlash va uning sotsial sohasini rivojlantirish choralari toʻgʻrisida” 1990-yil 28-iyundagi 251-son qarori (OʻzSSR QT, 1990y., 6-son, 21-modda)ning 7-bandi.

13. Oʻzbekiston SSR Ministrlar Sovetining “Ulugʻ Vatan urushi yillaridagi mehnat fronti qatnashchilariga imtiyozlar berish toʻgʻrisida” 1990-yil 21-sentabrdagi 315-son qarori (OʻzSSR QT, 1990y., 9-son, 32-modda) 1-bandining ikkinchi xatboshi.

14. Oʻzbekiston SSR Prezidenti huzuridagi Vazirlar Mahkamasining “Oʻzgalarning parvarishiga muhtoj boʻlgan yolgʻiz pensionerlarni ijtimoiy himoya qilish yuzasidan qoʻshimcha chora-tadbirlar toʻgʻrisida” 1991-yil 28-maydagi 145-son qarori (OʻzSSR QT, 1991-y., 5-son, 16-modda) bilan tasdiqlangan Oʻzgalarning parvarishiga muhtoj boʻlgan yolgʻiz pensionerlarga imtiyozlar berish tartibi toʻgʻrisida Nizomning 4-bandi.

15. Oʻzbekiston SSR Prezidenti huzuridagi Vazirlar Mahkamasining “Oʻzbekiston SSR Energetika va elektrlashtirish vazirligi tizimidagi hamda SSSR Energetika va elektrlashtirish vazirligining Oʻzbekiston SSR hududida joylashgan korxonalaridagi kadrlarni mustahkamlash boʻyicha ayrim chora-tadbirlar toʻgʻrisida” 1991-yil 1-iyundagi 152-son qarori.

16. Oʻzbekiston Respublikasi Prezidenti huzuridagi Vazirlar Mahkamasining “Pensiyalar, stipendiyalar va noishlab chiqarish soha xodimlarining lavozim maoshlari miqdorlarini oshirish toʻgʻrisida” 1992-yil 8-yanvardagi 3-son qarori 5-bandining turar joy-kommunal xizmatlar boʻyicha imtiyozlarni joriy qilishga oid qismi.

17. Oʻzbekiston Respublikasi Prezidenti huzuridagi Vazirlar Mahkamasining “Oʻzbekiston Respublikasi Prezidentining “Respublika oliy va oʻrta maxsus oʻquv yurtlarining professor-oʻqituvchilari tarkibiga, ilmiy xodimlariga va oʻquv-yordamchi xodimlariga qoʻshimcha imtiyozlar berish haqida” 1992-yil 5-fevraldagi Farmonini bajarish choralari toʻgʻrisida” 1992-yil 13-martdagi 128-son qarori 1-bandining uchinchi xatboshi.

18. Oʻzbekiston Respublikasi Vazirlar Mahkamasining “Kommunal xizmatlarning oʻz xarajatlarini oʻzi qoplashiga bosqichma-bosqich oʻtishi toʻgʻrisida” 1994-yil 7-fevraldagi 54-son qarorining 2-bandi.