Oʻzbekiston Respublikasining “Fuqarolarning davlat pensiya taʼminoti toʻgʻrisida”gi Qonuniga, Oʻzbekiston Respublikasi Prezidentining 2009-yil 30-dekabrdagi PF-4161-son “Fuqarolarning pensiya taʼminoti tizimini yanada takomillashtirish chora-tadbirlari toʻgʻrisida”gi Farmoniga va Oʻzbekiston Respublikasi Prezidentining 2009-yil 30-dekabrdagi PQ-1252-son “Oʻzbekiston Respublikasi Moliya vazirligi huzuridagi budjetdan tashqari Pensiya jamgʻarmasining tashkiliy tuzilmasini shakllantirish chora-tadbirlari toʻgʻrisida”gi qaroriga muvofiq buyuraman:

1. Oʻzbekiston Respublikasi moliya vazirining 2015-yil 30-yanvardagi 6-son buyrugʻi (roʻyxat raqami 2657, 2015-yil 5-mart) (Oʻzbekiston Respublikasi qonun hujjatlari toʻplami, 2015-y., 9-son, 105-modda) bilan tasdiqlangan Oʻzbekiston Respublikasi Moliya vazirligi huzuridagi budjetdan tashqari Pensiya jamgʻarmasi tomonidan pensiya, nafaqa va boshqa toʻlovlarni toʻlashni tashkil etish tartibi toʻgʻrisidagi yoʻriqnomaga ilovaga muvofiq oʻzgartirish va qoʻshimchalar kiritilsin.

2. Mazkur buyruq rasmiy eʼlon qilingan kundan eʼtiboran kuchga kiradi.

1. 1-bandning ikkinchi xatboshisidagi “mazkur Yoʻriqnomaning 1-ilovasiga muvofiq shaklda rasmiylashtiriladigan hujjat” degan soʻzlar “elektron hujjat” degan soʻzlar bilan almashtirilsin.

2. 4-band “shaxsiy kartochkani” degan soʻzlaridan keyin “axborot tizimida” degan soʻzlar bilan toʻldirilsin.

3. 7, 9, 12, 13, 14, 18, 60 va 75-bandlar oʻz kuchini yoʻqotgan deb topilsin.

4. 8-bandidagi “monitoring guruhi rahbari va Pensiya jamgʻarmasi boʻlimi boshligʻi tomonidan imzolanadi hamda Pensiya jamgʻarmasi boʻlimining muhri bilan” degan soʻzlar “axborot tizimida” degan soʻzlar bilan almashtirilsin.

5. 11-bandning birinchi xatboshisi quyidagi tahrirda bayon etilsin:

“11. Shaxsiy kartochkaga qoʻshimcha maʼlumotlar quyidagi hollarda kiritiladi:”.

6. 16-bandda:

birinchi xatboshisidagi “unga yopilish sababi toʻgʻrisida tegishli yozuvlarni va axborot tizimiga zarur” degan soʻzlar “axborot tizimiga yopilish sababi toʻgʻrisida” degan soʻzlar bilan almashtirilsin;

ikkinchi xatboshisidan “shaxsiy kartochka va axborot tizimidagi” degan soʻzlar chiqarib tashlansin.

7. 24-bandi quyidagi tahrirda bayon etilsin:

“24. Pensiya va nafaqalarning bank plastik kartochkalari orqali toʻlash uchun mablagʻlarni oʻtkazish Pensiya jamgʻarmasi boʻlimlari tomonidan axborot tizimi orqali elektron shaklda taqdim etilgan toʻlov topshiriqnomasi va qaydnoma asosida amalga oshiriladi.

Haqiqatda moliyalashtirilgan mablagʻlar toʻlov topshiriqnomasi va qaydnoma elektron shaklda taqdim etilgan kundan boshlab keyingi ish kunidan kechiktirilmay xizmat koʻrsatuvchi tijorat bank filiali tomonidan pensioner yoki nafaqa oluvchi uchun ochilgan 22617–“Pensionerlarning plastik kartochkalari boʻyicha majburiyatlari” hisobvaragʻiga kirim qilinadi.”.

8. 27-bandning ikkinchi xatboshisidagi “shaxsiy kartochka va axborot tizimiga tegishli yozuvlar” degan soʻzlar “shaxsiy kartochkaga tegishli maʼlumotlar” degan soʻzlar bilan almashtirilsin.

9. 29-band quyidagi tahrirda bayon etilsin:

“29. Pensiya va nafaqalar toʻlovi shaklini oʻzgartirish toʻgʻrisidagi va toʻlovni davom ettirish haqidagi ariza, shuningdek unga ilova qilingan hujjatlar (ishga qabul qilinganligi (fuqarolik-huquqiy shartnoma nusxasi) va mehnat shartnomasi bekor qilinganligi toʻgʻrisidagi buyruqdan koʻchirma (bajarilgan ishlar dalolatnomasini), shuningdek ishonchnoma nusxasi) monitoring guruhi inspektori tomonidan roʻyxatga olinadi va pensiya yigʻmajildiga tikish uchun pensiya va nafaqalarni tayinlash guruhining tegishli inspektoriga pensiya taqdim etiladi.”.

10. 51-bandning birinchi xatboshisidan, 58-bandning birinchi va ikkinchi xatboshilaridan, 59-bandning ikkinchi va beshinchi xatboshilaridan “va axborot tizimiga” degan soʻzlar chiqarib tashlansin.

11. 64-bandning uchinchi xatboshi “8-sanasiga qadar” degan soʻzlardan keyin “axborot tizimi orqali” degan soʻzlar bilan toʻldirilsin.

12. 65-band quyidagi mazmundagi xatboshilar bilan toʻldirilsin:

“Pensioner va nafaqa oluvchining bank plastik kartochkalariga mablagʻlar kirim qilingan sana, pensiya va nafaqalar toʻlangan sana deb hisoblanadi.

Bank plastik kartochkalariga mablagʻlar pensionerlar va nafaqa oluvchilar vafot etgan sanadan soʻng kirim qilingan hollarda, Pensiya jamgʻarmasi boʻlimlari ularni Pensiya jamgʻarmasi hisobvaragʻiga vafot etgan pensionerlar va nafaqa oluvchilarning hisobvaragʻidagi qoldiq mablagʻlar hisobidan qaytarish toʻgʻrisida tegishli tijorat banklari filiallariga xat yuborish orqali qaytarish choralarini koʻradi.”.

13. 66-bandning birinchi xatboshisidagi “alohida yigʻmajildda saqlanayotgan” va “va axborot tizimiga” degan soʻzlar chiqarib tashlansin.

14. 68-banddagi “va tijorat banki filiallari” degan soʻzlar chiqarib tashlansin.

15. 69-bandning birinchi xatboshisi quyidagi tahrirda bayon etilsin:

“69. Chop etilgan qaydnomalar monitoring guruhi inspektori, rahbari va Pensiya jamgʻarmasi boʻlimi boshligʻi (uning vazifasini bajaruvchi) tomonidan imzolanadi, Pensiya jamgʻarmasi boʻlimi muhri bilan tasdiqlanadi va pochta aloqasi obyektlariga kuryer orqali taqdim etiladi.”.

16. 74-band quyidagi tahrirda bayon etilsin:

“74. Talabnomalar joriy oyning 13-sanasidan kechiktirilmasdan Pensiya jamgʻarmasi boʻlimi boshligʻi (uning vazifasini bajaruvchi) tomonidan axborot tizimida tasdiqlanadi.”.

17. 76-bandning birinchi xatboshisi quyidagi tahrirda bayon etilsin:

“76. Pensiya va nafaqa toʻloviga tuzilgan talabnomalarni oʻrganish boʻyicha Pensiya jamgʻarmasi hududiy boshqarmasi ishchi guruhiga (bundan buyon matnda Pensiya jamgʻarmasi boshqarmasi ishchi guruhi deb yuritiladi) quyidagi tarkibda tuziladi:”.

18. 79 va 80-bandlari quyidagi tahrirda bayon etilsin:

“79. Jamlanma talabnomalar toʻlov oyining 15-sanasidan kechiktirmasdan Pensiya jamgʻarmasi boshqarmasi boshligʻi (uning vazifasini bajaruvchi) tomonidan axborot tizimida tasdiqlanadi.

80. Pensiya jamgʻarmasi ijro etuvchi apparati tomonidan axborot tizimida tasdiqlangan jamlanma talabnomalar asosida joriy oyning 17-sanasidan kechiktirmasdan respublika boʻyicha umumiy talabnomalar shakllantiriladi.

Pensiya jamgʻarmasining axborot tizimida tasdiqlangan talabnomalar Pensiya jamgʻarmasining ijro etuvchi apparati, hududiy boshqarmasi va tuman (shahar) boʻlimi tomonidan moliyalashtirish uchun asos hisoblanadi.”.

19. 90-band quyidagi tahrirda bayon etilsin:

“90. Pensiya jamgʻarmasi boʻlimida hisobda turgan pensionerlar va nafaqa oluvchilarning monitoringi har oyda tanlov asosida mazkur Yoʻriqnomaning 91-bandida nazarda tutilgan tartibda tasdiqlangan grafik asosida oʻtkaziladi.”.

20. 91-bandda:

birinchi xatboshisi quyidagi tahrirda bayon etilsin:

“91. Har oyning boshida Pensiya jamgʻarmasi boʻlimi boshligʻi (uning vazifasini bajaruvchi)ning buyrugʻi bilan monitoring oʻtkazish grafigi tasdiqlanadi.”;

toʻrtinchi xatboshisidagi “kamida 40 — 50” degan soʻzlar “kamida 10 — 30” degan soʻzlar bilan almashtirilsin.

21. 94-bandda:

uchinchi xatboshisi chiqarib tashlansin;

toʻrtinchi — oʻn ikkinchi xatboshilar tegishlicha uchinchi — oʻn birinchi xatboshilar deb hisoblansin.

22. 102-band quyidagi tahrirda bayon etilsin:

“102. Pensiya jamgʻarmasi boʻlimlari har oyda pochta aloqasi obyektlari bilan moliyalashtirilgan, toʻlangan va toʻlanmagan pensiya va nafaqalar boʻyicha oraliq va yakuniy solishtirma dalolatnomalar tuzadilar.”.

23. 105-banddagi “va tijorat banki filiali” degan soʻzlar chiqarib tashlansin.

24. 107-bandda:

birinchi xatboshisidagi “va tegishli tijorat banklari” degan soʻzlar chiqarib tashlansin;

ikkinchi xatboshisidagi “va tijorat banklarining” degan soʻzlar chiqarib tashlansin.

25. 1, 2 va 4-ilovalar oʻz kuchini yoʻqotgan deb topilsin.

26. Mazkur oʻzgartirish va qoʻshimchalar Oʻzbekiston Respublikasi Markaziy banki va “O`ZBEKISTON POCNTASI” AJ bilan kelishilgan.