Qoraqalpogʻiston Respublikasi va Xorazm viloyatining iqtisodiyotini jadal rivojlantirish, tadbirkorlik faoliyatini amalga oshirish va eksport salohiyatini kengaytirish uchun yanada qulay sharoitlar yaratish, shuningdek, investitsiya loyihalarini oʻz vaqtida va samarali amalga oshirish maqsadida:

1. Belgilansinki, Qoraqalpogʻiston Respublikasi va Xorazm viloyatida roʻyxatdan oʻtgan va tadbirkorlik faoliyatini olib borayotgan yuridik shaxslar oʻzlari ishlab chiqarayotgan sanoat tovarlarini eksport qilish qismida valyuta tushumini majburiy sotishdan ozod etiladi, Oʻzbekiston Respublikasi Prezidentining “Tovarlar (ishlar, xizmatlar) eksportini ragʻbatlantirish boʻyicha qoʻshimcha chora-tadbirlar toʻgʻrisida” 1997-yil 10-oktabrdagi PF-1871-sonli Farmoni 2-ilovasiga kiritilgan xom ashyo tovarlari bundan mustasno.

2. Qoraqalpogʻiston Respublikasi va Xorazm viloyatida roʻyxatdan oʻtgan, farmatsevtika tovarlari va preparatlari, elektrotexnika mahsulotlari (kabel-oʻtkazgich mahsulotlaridan tashqari), shuningdek, pardozlash qurilish materiallari ishlab chiqarishga ixtisoslashgan yuridik shaxslar 2017-yilning 1-aprelidan 2022-yilning 1-yanvarigacha boʻlgan davrda mulk soligʻi, yer soligʻi, obodonlashtirish va ijtimoiy infratuzilmani rivojlantirish soligʻi, shuningdek, Oʻzbekiston Respublikasi Vazirlar Mahkamasi huzuridagi Respublika yoʻl jamgʻarmasiga majburiy ajratmalar toʻlashdan ozod etilsin.

Hisobot yili natijalari boʻyicha sotuvning umumiy hajmida ushbu mahsulotlarni sotishdan tushadigan sof tushumning ulushi 60 foizdan kam boʻlmagan miqdorni tashkil etuvchi yuridik shaxslar mazkur bandning birinchi xatboshida koʻrsatilgan mahsulotlarni ishlab chiqarishga ixtisoslashgan yuridik shaxslar jumlasiga kirishi belgilansin.

3. Oʻzbekiston Respublikasi Iqtisodiyot vazirligi Moliya vazirligi, Sogʻliqni saqlash vazirligi, Davlat soliq qoʻmitasi, “Oʻzfarmsanoat” AK, “Oʻzeltexsanoat” AK va “Oʻzqurilishmateriallari” AJ bilan birgalikda 2017-yilning 1-apreligacha mazkur qarorda nazarda tutilgan soliq imtiyozlari tatbiq etiladigan farmatsevtika mahsulotlari va preparatlari, elektrotexnika mahsulotlari, shuningdek, pardozlash qurilish materiallariga taalluqli boʻlgan mahsulotlarning aniq roʻyxatini belgilangan tartibda ishlab chiqsin va tasdiqlasin.

4. “Oʻzbekiston temir yoʻllari” AJ Qoraqalpogʻiston Respublikasi va Xorazm viloyatida roʻyxatdan oʻtgan va ishlab chiqarish faoliyatini amalga oshirayotgan eksportyor yuridik shaxslar uchun respublika doirasida ichki yuk tashishga amaldagi tarif stavkalari boʻyicha yuklarni Oʻzbekiston Respublikasi Davlat chegarasigacha yetkazib berishga temir yoʻl tariflarini qoʻllasin.

5. Oʻzbekiston Milliy axborot agentligi, Oʻzbekiston Milliy teleradiokompaniyasi va boshqa ommaviy axborot vositalari ushbu qarorni yoritish boʻyicha keng tushuntirish ishlari olib borilishini taʼminlasin.

6. Mazkur qarorning ijrosini nazorat qilish Oʻzbekiston Respublikasi Bosh vazirining birinchi oʻrinbosari — “Oʻzbekiston temir yoʻllari” AJ raisi A. Ramatov va Oʻzbekiston Respublikasi Bosh vazirining oʻrinbosari R. Azimov zimmasiga yuklansin.