O‘zbekiston Respublikasi Prezidentining “Madaniyat va sport sohasida boshqaruv tizimini yanada takomillashtirish chora-tadbirlari to‘g‘risida” 2017-yil 15-fevraldagi PF-4956-son Farmonini bajarish yuzasidan hamda Jismoniy tarbiya va sport davlat qo‘mitasining samarali faoliyat yuritishini ta’minlash maqsadida:

1. Quyidagilar:

O‘zbekiston Respublikasi Jismoniy tarbiya va sport davlat qo‘mitasining tashkiliy tuzilmasi 1-ilovaga* muvofiq;

O‘zbekiston Respublikasi Jismoniy tarbiya va sport davlat qo‘mitasi markaziy apparatining boshqaruv xodimlari cheklangan umumiy soni 37 nafardan iborat tuzilmasi 2-ilovaga* muvofiq;

Qoraqalpog‘iston Respublikasi Jismoniy tarbiya va sport davlat qo‘mitasining tuzilmasi, viloyatlar va Toshkent shahri jismoniy tarbiya va sport boshqarmalarining namunaviy tuzilmalari 3-5-ilovalarga* muvofiq tasdiqlansin.

O‘zbekiston Respublikasi Jismoniy tarbiya va sport davlat qo‘mitasi raisiga, zarur hollarda, Jismoniy tarbiya va sport davlat qo‘mitasi markaziy apparatining, Qoraqalpog‘iston Respublikasi Jismoniy tarbiya va sport davlat qo‘mitasi, viloyatlar va Toshkent shahri jismoniy tarbiya va sport boshqarmalarining tasdiqlangan tuzilmasiga xodimlarning belgilangan umumiy cheklangan soni doirasida o‘zgartirishlar kiritish huquqi berilsin.

2. O‘zbekiston Respublikasi Xalq ta’limi vazirligi hamda Oliy va o‘rta maxsus ta’lim vazirligining O‘zbekiston Respublikasi Xalq ta’limi vazirligi huzuridagi Bolalar-o‘smirlar sport maktablari xodimlarini qayta tayyorlash va malakasini oshirish markazini O‘zbekiston davlat jismoniy tarbiya instituti huzuridagi Jismoniy tarbiya va sport bo‘yicha mutaxassislarni ilmiy-metodik ta’minlash, qayta tayyorlash va malakasini oshirish markaziga birlashtirish yo‘li bilan uni qayta tashkil etish, mazkur markazlarning shtatlar sonini optimallashtirish hamda birkitib qo‘yilgan binolar, inshootlar va boshqa mol-mulklarni ularda saqlab qolish to‘g‘risidagi taklifi qabul qilinsin.

3. O‘zbekiston Respublikasi Axborot texnologiyalari va kommunikatsiyalarini rivojlantirish vazirligi ilgari O‘zbekiston Respublikasi Madaniyat va sport ishlari vazirligi uchun o‘rnatilgan aloqa vositalari, shu jumladan, hukumat aloqa vositalarining sportga taalluqli qismini O‘zbekiston Respublikasi Jismoniy tarbiya va sport davlat qo‘mitasida saqlab qolsin.

4. O‘zbekiston Respublikasi Davlat budjetining mablag‘lari O‘zbekiston Respublikasi Jismoniy tarbiya va sport davlat qo‘mitasi faoliyatini moliyalashtirish manbai etib belgilansin.

5. O‘zbekiston Respublikasi Vazirlar Mahkamasi ikki hafta muddatda O‘zbekiston Respublikasi Jismoniy tarbiya va sport davlat qo‘mitasi to‘g‘risidagi nizomni tasdiqlasin.

6. O‘zbekiston Respublikasi Jismoniy tarbiya va sport davlat qo‘mitasi bir oy muddatda o‘zining hududiy boshqarmalari to‘g‘risidagi namunaviy nizomlar belgilangan tartibda ishlab chiqilishi va tasdiqlanishini ta’minlasin.

7. O‘zbekiston Respublikasi Jismoniy tarbiya va sport davlat qo‘mitasining markaziy apparati Toshkent shahar, Amir Temur ko‘chasi, 17-uyda joylashtirilsin.

8. O‘zbekiston Respublikasi Jismoniy tarbiya va sport davlat qo‘mitasi Moliya vazirligi, Iqtisodiyot vazirligi, manfaatdor vazirliklar va idoralar bilan birgalikda uch oy muddatda:

O‘zbekiston davlat jismoniy tarbiya instituti huzuridagi Jismoniy tarbiya va sport bo‘yicha mutaxassislarni ilmiy-metodik ta’minlash, qayta tayyorlash va malakasini oshirish markazi faoliyatini takomillashtirish va optimallashtirish bo‘yicha Hukumat qarori loyihasini;

jismoniy tarbiya va sport muassasalari faoliyatini yanada takomillashtirish va moddiy-texnika bazasini mustahkamlash to‘g‘risidagi takliflarni Vazirlar Mahkamasiga kiritsin.

9. O‘zbekiston Respublikasi Jismoniy tarbiya va sport davlat qo‘mitasi Adliya vazirligi, manfaatdor vazirliklar va idoralar bilan birgalikda ikki oy muddatda:

qonun hujjatlariga ushbu qarordan kelib chiqadigan o‘zgartish va qo‘shimchalar to‘g‘risida Vazirlar Mahkamasiga takliflar kiritsin;

ilgari qabul qilingan normativ-huquqiy hujjatlarni ushbu qarorga muvofiqlashtirsin.

10. Mazkur qarorning ijrosini nazorat qilish O‘zbekiston Respublikasining Bosh vaziri A.N. Aripov zimmasiga yuklansin.