O‘zbekiston Respublikasi Prezidentining “Davlat ulushi ustuvor bo‘lgan aksiyadorlik jamiyatlarida korporativ boshqaruvni yanada takomillashtirish chora-tadbirlari to‘g‘risida” 2016-yil 17-oktabrdagi PQ-2635-son qarorini bajarish yuzasidan Vazirlar Mahkamasi qaror qiladi:
1. O‘zbekiston Respublikasi Hukumatining ilovaga muvofiq ayrim qarorlariga o‘zgartirish va qo‘shimchalar kiritilsin.
2. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosari R.S. Azimov zimmasiga yuklansin.
O‘zbekiston Respublikasi Hukumatining ayrim qarorlariga kiritilayotgan o‘zgartirish va qo‘shimchalar
1. Vazirlar Mahkamasining 2006-yil 16-oktabrdagi 215-son qarori (O‘zbekiston Respublikasi QT, 2006-y., 10-son, 77-modda) bilan tasdiqlangan Davlat korxonalari to‘g‘risidagi Nizomning 17-bandida:
oltinchi, yettinchi va sakkizinchi xatboshilar tegishli ravishda beshinchi, oltinchi va yettinchi xatboshilar deb hisoblansin;
oltinchi xatboshiga “(shu jumladan qurilishi tugallanmaganlarni)” so‘zlaridan keyin “shuningdek davlat korxonasiga tegishli aksiyalarni (ulushlarni)” so‘zlari qo‘shilsin;
yettinchi xatboshiga “(shu jumladan qurilishi tugallanmaganlarni)” so‘zlaridan keyin “shuningdek davlat korxonasiga tegishli aksiyalarni (ulushlarni)” so‘zlari qo‘shilsin.
2. Vazirlar Mahkamasining 2015-yil 27-maydagi 137-son qarori (O‘zbekiston Respublikasi QT, 2015-y., 5-son, 41-modda) bilan tasdiqlangan Ustav fondida (ustav kapitalida) davlat ulushi 50 foizdan ortiq bo‘lgan zarar ko‘rib ishlayotgan, past rentabelli va quvvatlardan past darajada foydalanayotgan sanoat va qurilish sohasidagi korxonalarning aksiyalari davlat paketlarini (ulushlarini) “nol” xarid qiymati bo‘yicha sotish tartibi to‘g‘risidagi Nizom 2-bandining ikkinchi xatboshi quyidagi tahrirda bayon qilinsin:
“aksiyalarning davlat paketi (ulush) — ustav fondida (ustav kapitalida) davlat ulushi 50 foizdan ortiq bo‘lgan zarar ko‘rib ishlayotgan, past rentabelli va quvvatlardan past darajada foydalanayotgan korxonalardagi (keyingi o‘rinlarda korxonalar deb ataladi) davlat boshqaruvi organlari, mahalliy davlat hokimiyati organlari, davlat unitar korxonalari va davlat muassasalari, O‘zbekiston Respublikasi Markaziy banki, Tiklanish va taraqqiyot jamg‘armasi timsolida mulk huquqi asosida davlatga tegishli bo‘lgan aksiyalar (ulush)”.