Meva-sabzavot mahsulotlari yetishtirish hajmlari koʻpaytirilishini taʼminlash, ularni tayyorlash, saqlash, qayta ishlash va eksport qilish, ichki bozorda narxlarni barqaror saqlash, dehqon xoʻjaliklarining salohiyatidan yanada samarali foydalanish va ular faoliyatining bozor mexanizmlarini rivojlantirish, qishloq aholisining daromadlarini oshirish maqsadida Vazirlar Mahkamasi qaror qiladi:

1. Oʻzbekiston Respublikasi Tashqi iqtisodiy faoliyat milliy bankining 2016-yil 10-dekabrgacha Surxondaryo viloyatining har bir tumanida Kichik biznes subyektlari, xususiy tadbirkorlik va fermer xoʻjaliklari eksportini qoʻllab-quvvatlash jamgʻarmasi (keyingi oʻrinlarda Jamgʻarma deb ataladi) va “Oʻzagroeksport” aksiyadorlik jamiyati ishtirokida masʼuliyati cheklangan jamiyat shaklidagi agrofirmalar tashkil etish toʻgʻrisidagi taklifi qabul qilinsin.

2. Quyidagilar yangidan tashkil etiladigan agrofirmalarning asosiy vazifalari va faoliyati yoʻnalishlari etib belgilansin:

dehqon xoʻjaliklarining yer va mehnat resurslaridan samarali foydalanishni taʼminlash maqsadida ular bilan oʻzaro hamkorlikni tashkil etish, eksport salohiyatini koʻpaytirish va qishloq aholisi bandligini oshirish;

ichki va tashqi bozorlarda talab yuqori boʻlgan meva-sabzavot mahsulotlari yetishtirishga buyurtmalarni joylashtirish;

dehqon xoʻjaliklarini urugʻlik fondi, ekish materiallari, mineral oʻgʻitlar va boshqa moddiy-texnika resurslari bilan taʼminlash;

meva-sabzavot mahsulotlarini tayyorlash, saqlash, qayta ishlash, saralash, kalibrlash, oʻrab-joylash, shuningdek eksportdan oldin tayyorlash;

dehqon xoʻjaliklari bilan birgalikda issiqxonalar va sovutish kameralari, shuningdek qishloq xoʻjaligi mahsulotlarini qayta ishlovchi quvvatlarni tashkil etish;

“Oʻzbekoziqovqatxolding” xolding kompaniyasi bilan birgalikda respublika shaharlarida va tashqi sotish bozorlarida meva-sabzavot mahsulotlarini sotish tizimini tashkil etish.

3. Oʻzbekiston Respublikasi Tashqi iqtisodiy faoliyat milliy banki:

Jamgʻarma va “Oʻzagroeksport” aksiyadorlik jamiyati bilan birgalikda agrofirmalar tuzilmasida meva-sabzavot mahsulotlarini tayyorlash, saqlash, qayta ishlash, oʻrab-joylash, yengil konstruksiyali issiqxonalarda ekish materiallari va urugʻlik tayyorlash boʻyicha quvvatlar tashkil etilishini nazarda tutgan holda Agrofirmalar faoliyati tartibi toʻgʻrisidagi nizomni bir hafta muddatda ishlab chiqsin;

agrofirmalarga ular tashkil etilgandan keyin bir oy muddatda ularning samarali faoliyat koʻrsatishi, shu jumladan aylanma mablagʻlar shakllantirilishi uchun ularning har biriga kamida ikki mlrd soʻmdan kam boʻlmagan miqdorda imtiyozli kreditlar ajratsin;

import boʻyicha asbob-uskunalar, texnologiyalar xarid qilish va qoʻshimcha xizmatlar uchun haq toʻlashga kreditlar berish uchun hukumatlararo shartnomalar va davlat dasturlari doirasida Oʻzbekiston Respublikasining davlat kafolatlari berilmasdan jalb etilgan xorijiy kredit liniyalari mablagʻlarini yoʻnaltirsin;

Oʻzbekiston Respublikasi Qishloq va suv xoʻjaligi vazirligi, Jamgʻarma bilan birgalikda dehqon xoʻjaliklarida 2 sotixdan 10 sotixgacha maydonda yengil konstruksiyalardan foydalanib issiqxonalar tashkil etish boʻyicha namunaviy biznes-rejani ikki oy muddatda ishlab chiqsin va belgilangan tartibda tasdiqlasin, ularda Surxondaryo viloyatining tuproq-iqlim sharoitlarini hisobga olgan holda eksportga yoʻnaltirilgan meva-sabzavot ekinlarini ustuvor joylashtirishni, navlarni sifatli tanlashni, urugʻlik va ekish materiali yetishtirishning prognoz hajmlarini belgilashni nazarda tutsin;

agrofirmalarni tashkil etish va ularning keyingi faoliyatini ragʻbatlantirish ishlarini samarali tashkil etish maqsadida Oʻzbekiston Respublikasi Tashqi iqtisodiy faoliyat milliy bankining Toshkent shahri tuman filiallari va boʻlimini ilovaga* muvofiq Surxondaryo viloyatining har bir tumaniga biriktirsin.

4. Jamgʻarma va “Oʻzagroeksport” aksiyadorlik jamiyati tomonidan tashkil etiladigan agrofirmalarga ularning ustav fondi miqdoridan qatʼi nazar, meva-sabzavot mahsulotlari, poliz mahsulotlari va uzum bilan ulgurji savdo qilish faoliyatini amalga oshirish huquqi berilsin.

5. Oʻzbekiston Respublikasi Qishloq va suv xoʻjaligi vazirligi, Oʻzbekiston Qishloq xoʻjaligi ilmiy ishlab chiqarish markazi, “Oʻzbekoziqovqatxolding” xolding kompaniyasi seleksiya navlarini tanlash hamda sabzavot, poliz ekinlari va boshqa ekinlarni ekish, shuningdek har bir tumanning tuproq-iqlim sharoitlarini hisobga olgan holda agrotexnika tadbirlarini oʻtkazish boʻyicha tavsiyalarni bir oy muddatda ishlab chiqsinlar va dehqon xoʻjaliklariga yetkazsinlar.

6. Surxondaryo viloyati hokimligi:

Oʻzbekiston Respublikasi Yer resurslari, geodeziya, kartografiya va davlat kadastri davlat qoʻmitasi bilan birgalikda joriy yilning oxirigacha agrofirmalarni va ularning ishlab chiqarishlarini joylashtirish uchun har bir tumanda bepul foydalanish huquqi bilan binolar va yer uchastkalari ajratilishini;

Oʻzbekiston Respublikasi Tashqi iqtisodiy faoliyat milliy banki bilan birgalikda agrofirmalar tashkil etilgandan keyin oʻn kun muddatda agrofirmalar faoliyatiga samarali rahbarlik qilish uchun malakali boshqaruv kadrlari tanlanishini taʼminlasin.

7. Agrofirmalarning samarali ishlashini taʼminlash uchun ular faoliyatini umumiy muvofiqlashtirish Jamgʻarmaga va “Oʻzagroeksport” aksiyadorlik jamiyatiga yuklansin.

8. Mazkur qarorning bajarilishini nazorat qilish Oʻzbekiston Respublikasi Vazirlar Mahkamasining Qishloq va suv xoʻjaligi, qishloq xoʻjaligi mahsulotlarini qayta ishlash hamda isteʼmol tovarlari masalalari axborot-tahlil departamentiga, Oʻzbekiston Respublikasi Tashqi iqtisodiy faoliyat milliy banki boshqaruvi raisi B.S. Rahimov va Surxondaryo viloyati hokimi T.M. Mamaraimov zimmasiga yuklansin.