Xoʻjalik yurituvchi subyektlar oʻrtasidagi hisob-kitoblar mexanizmini takomillashtirish, soliqlar va majburiy toʻlovlar oʻz vaqtida tushishi, budjetga va budjetdan tashqari fondlarga toʻlovlar boʻyicha oʻz vaqtida toʻlanmagan toʻlovlar miqdorini qisqartirish, muddati oʻtkazib yuborilgan debitorlik va kreditorlik qarzlari yigʻilib qolishiga yoʻl qoʻymaslik boʻyicha ishlarni tashkil etish darajasi va samaradorligini yanada oshirish maqsadida Vazirlar Mahkamasi qaror qiladi:

1. Quyidagilar:

Hisob-kitoblar mexanizmini takomillashtirish va budjetga toʻlovlar intizomini mustahkamlash boʻyicha Hukumat komissiyasining yangilangan tarkibi 1-ilovaga* muvofiq;

Hisob-kitoblar mexanizmini takomillashtirish va budjetga toʻlovlar intizomini mustahkamlash boʻyicha Hukumat komissiyasi toʻgʻrisidagi Nizom 2-ilovaga muvofiq tasdiqlansin.

2. Hukumat komissiyasi tarkibida:

3-ilovaga* muvofiq tarkibda budjetga toʻlovlar intizomini mustahkamlash boʻyicha kichik komissiya;

4-ilovaga* muvofiq tarkibda muddati oʻtkazib yuborilgan debitorlik va kreditorlik qarzlarini qisqartirish boʻyicha kichik komissiya tuzilsin.

3. Budjetga toʻlovlar intizomini mustahkamlash va muddati oʻtkazib yuborilgan debitorlik va kreditorlik qarzlarini qisqartirish boʻyicha kichik komissiyalar toʻgʻrisidagi Nizomlar 5 va 6-ilovalarga muvofiq tasdiqlansin.

4. Belgilansinki, mazkur qarorning 2-bandida koʻrsatilgan kichik komissiyalar tomonidan ularning vakolatlari doirasida qabul qilingan qarorlar vazirliklar, idoralar, mahalliy hokimiyat va boshqaruv organlari, tijorat banklari, mulkchilik shakllaridan qatʼi nazar, xoʻjalik yurituvchi subyektlar va ularning birlashmalari (xoʻjalik uyushmalari), mansabdor shaxslar va fuqarolar tomonidan bajarilishi majburiy hisoblanadi.

5. Hisob-kitoblar mexanizmini takomillashtirish va budjetga toʻlovlar intizomini mustahkamlash boʻyicha Hukumat komissiyasi:

komissiya tarkibida tuzilgan kichik komissiyalar ishi natijalarini muntazam ravishda eshitib borsin;

Oʻzbekiston Respublikasi Moliya vazirligi va Adliya vazirligi bilan birgalikda xoʻjalik yurituvchi subyektlar oʻrtasidagi oʻzaro qarzlarni surishish bayonnomalarini rasmiylashtirish va ijro etish tartibini ikki hafta muddatda ishlab chiqsin va belgilangan tartibda tasdiqlasin;

budjetga toʻlovlar boʻyicha oʻz vaqtida toʻlanmagan toʻlovlarni undirish, shuningdek muddati oʻtkazib yuborilgan debitorlik va kreditorlik qarzlarni qisqartirish bilan bogʻliq ishlarning ahvolini har oyda koʻrib chiqsin hamda korxonalar va tashkilotlarning intizomsiz rahbarlariga nisbatan qatʼiy choralar koʻrsin. Zaruriyat boʻlganda Vazirlar Mahkamasiga tegishli takliflar kiritsin.

6. Quyidagilar:

Oʻzbekiston Respublikasi Vazirlar Mahkamasining 1998-yil 10-oktabrdagi 495-f-son farmoyishi;

Oʻzbekiston Respublikasi Vazirlar Mahkamasining 1998-yil 22-iyuldagi 309-son qarori 1-bandining 1 va 3-xatboshilari oʻz kuchini yoʻqotgan deb hisoblansin.

7. Mazkur qarorning bajarilishini nazorat qilish Oʻzbekiston Respublikasining Bosh vaziri Oʻ.T. Sultonov zimmasiga yuklansin.

1. Hisob-kitoblar mexanizmini takomillashtirish va budjetga toʻlovlar intizomini mustahkamlash boʻyicha Hukumat komissiyasi (bundan keyin Komissiya deb ataladi) oʻz faoliyatini xoʻjalik yurituvchi subyektlar oʻrtasidagi hisob-kitoblar mexanizmini takomillashtirish, soliqlar va majburiy toʻlovlarni budjetga hamda budjetdan tashqari jamgʻarmalarga oʻz vaqtida tushirish, iqtisodiy va maʼmuriy tusdagi chora-tadbirlar kompleksini amalga oshirish yoʻli bilan toʻlov muddati oʻtgan debitorlik va kreditorlik qarzlarning va budjetga toʻlovlar boʻyicha oʻz vaqtida toʻlanmagan qarzlarning yigʻilib qolishiga yoʻl qoʻymaslik maqsadida amalga oshiradi.

2. Komissiya oʻz faoliyatida Oʻzbekiston Respublikasi Konstitutsiyasiga, Oʻzbekiston Respublikasi qonunlariga, Oʻzbekiston Respublikasi Prezidentining farmonlariga, Oʻzbekiston Respublikasi Vazirlar Mahkamasining qarorlari va farmoyishlariga, shuningdek, mazkur Nizomga amal qiladi.

3. Komissiya tarkibida quyidagi ikkita kichik komissiya (bundan keyin Kichik komissiyalar deb ataladi) tuziladi:

budjetga toʻlovlar intizomini mustahkamlash boʻyicha;

toʻlov muddati oʻtgan debitorlik va kreditorlik qarzlarni qisqartirish boʻyicha.

4. Qoraqalpogʻiston Respublikasida, viloyatlar va Toshkent shahrida tegishli mintaqaviy komissiyalar tuziladi. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklarining taqdimnomasiga koʻra Komissiya mintaqaviy komissiyalar tarkibini tasdiqlaydi.

Mintaqaviy komissiyalar oʻz faoliyatini mazkur Nizomga va Komissiya qarorlariga muvofiq amalga oshiradi.

5. Komissiya va uning Kichik komissiyalarining oʻz vakolatlari doirasida qabul qilgan qarorlarining vazirliklar, idoralar, mahalliy hokimiyat va boshqaruv organlari, tijorat banklari, mulkchilik shakllaridan qatʼi nazar, xoʻjalik yurituvchi subyektlar va ularning birlashmalari (xoʻjalik uyushmalari), mansabdor shaxslar va fuqarolar tomonidan bajarilishi majburiydir.

6. Quyidagilar Komissiyaning asosiy vazifalari hisoblanadi:

iqtisodiyot tarmoqlari va sektorlarida hisob-kitoblar mexanizmini takomillashtirish hamda barcha xoʻjalik yurituvchi subyektlar va tijorat banklarining toʻlov intizomini mustahkamlash, hisob-kitoblarning oʻz vaqtida qilinishi, soliqlar va majburiy toʻlovlarning toʻliq toʻlanishi boʻyicha amaldagi qonun hujjatlari normalariga qatʼiy rioya qilishlari ustidan taʼsirchan nazoratni taʼminlash;

korxonalarning debitorlik qarzi holatini tahlil qilish, xoʻjalik yurituvchi subyektlarning toʻlov muddati oʻtgan debitorlik va kreditorlik qarzlarini, budjetga oʻz vaqtida toʻlanmagan qarzlarini qisqartirish, shuningdek, amaldagi qonun hujjatlariga muvofiq toʻlanishi kerak boʻlgan soliqlar va majburiy toʻlovlarning toʻliq undirilishini taʼminlash boʻyicha taʼsirchan chora-tadbirlar ishlab chiqish va koʻrish;

korxonalar va tashkilotlar aylanma mablagʻlarining, shu jumladan tayyor mahsulotlar zaxiralariga hamda tugallanmagan qurilishga yoʻnaltirilishi sabablarini aniqlash va ularni qisqartirishga doir takliflar ishlab chiqish.

7. Komissiya quyidagi huquqlarga ega:

vazirliklar, idoralar, tijorat banklari, soliq organlari, xoʻjalik uyushmalari, korxonalar va birlashmalar, davlat boshqaruvi mahalliy organlari rahbarlarining debitorlik va kreditorlik qarzlarning ahvoli, soliq hamda toʻlov intizomi masalalari boʻyicha hisobotlarini eshitish va xalq xoʻjaligida hisob-kitoblarni yuritishning belgilangan tartibi va soliq qonunchiligi buzilishida aybdor boʻlgan mansabdor shaxslarni jinoiy javobgarlikkacha boʻlgan javobgarlikka tortish toʻgʻrisida tegishli organlarga takliflar kiritish;

oʻz vaqtida toʻlanmagan qarzlarni toʻlashni kechiktirish va (yoki) boʻlib-boʻlib toʻlash uchun muddat berish, penyalar yozishni toʻxtatish, soliqlar va budjet hamda budjetdan tashqari jamgʻarmalarga toʻlovlar boʻyicha penyalarni hisobdan chiqarish toʻgʻrisida qaror qabul qilish;

Moliya-xoʻjalik faoliyatini amalga oshirmayotgan va qonunchilikda belgilangan muddatlarda oʻzlarining ustav jamgʻarmalarini shakllantirmagan tugatilayotgan korxonalarning budjet va budjetdan tashqari jamgʻarmalar oldidagi qarzlarini Oʻzbekiston Respublikasi Davlat soliq qoʻmitasi taqdimnomasiga koʻra hisobdan chiqarish toʻgʻrisida qarorlar qabul qilish

toʻlov muddati oʻtgan debitorlik va kreditorlik qarzlarni qisqartirish boʻyicha Kichik komissiya tomonidan kiritiladigan toʻlov muddati oʻtgan debitorlik va kreditorlik qarzlarni toʻlashga qaratilgan xoʻjalik yurituvchi subyektlar oʻrtasidagi oʻzaro qarzlar bayonlarini tasdiqlash;

moliya, soliq va bojxona organlari faoliyatini belgilangan tartibda tekshirishni tashkil etish, vazirliklar, idoralar, uyushmalar, davlat boshqaruvi mahalliy organlaridan Komissiya zimmasiga yuklangan vazifalarning bajarilishini taʼminlash uchun zarur boʻlgan axborotlarni olish;

Korxonalar bankrotligi va sanatsiyasi masalalari boʻyicha Hukumat komissiyasiga korxonalarni sanatsiyalash toʻgʻrisida qarorlar qabul qilish yuzasidan takliflar kiritish yoki toʻlov muddati oʻtgan debitorlik va kreditorlik qarzlarga muntazam ravishda yoʻl qoʻyayotgan korxonalar va tashkilotlarni bankrot deb eʼlon qilish uchun materiallarni xoʻjalik sudiga berish;

Vazirlar Mahkamasiga respublika qonunchiligini takomillashtirish boʻyicha xalq xoʻjaligida soliq solish va hisob-kitoblar tizimini yaxshilashga qaratilgan takliflar kiritish.

8. Komissiya ishlari Komissiya raisi tomonidan tasdiqlangan ishlar rejasiga muvofiq har oyda kamida bir marta majlislar oʻtkazish asosida amalga oshiriladi.

9. Komissiyaning shaxsiy tarkibi Oʻzbekiston Respublikasi Vazirlar Mahkamasi qarori bilan tasdiqlanadi.

10. Komissiyani rais – Oʻzbekiston Respublikasining Bosh vaziri boshqaradi. Rais komissiya ishiga rahbarlik qiladi, uning majlisini olib boradi, Kichik komissiyalarning ishlarini muvofiqlashtirib boradi.

Komissiya raisining topshirigʻiga koʻra ayrim masalalar boʻyicha majlislar Komissiya raisining oʻrinbosari tomonidan oʻtkazilishi mumkin.

11. Komissiya oʻz majlislarida oʻz tarkibida tuzilgan Kichik komissiyalarning ishlari natijalarini muntazam ravishda eshitib boradi.

12. Komissiya ishlarining natijalari Komissiya raisi yoki uning topshirigʻiga koʻra majlisni oʻtkazgan Komissiya raisining oʻrinbosari tomonidan tasdiqlanadigan bayon shaklidagi qarorlar bilan rasmiylashtiriladi.

13. Komissiya oʻz faoliyati toʻgʻrisida Oʻzbekiston Respublikasi Vazirlar Mahkamasiga hisobot beradi.

1. Hisob-kitoblar mexanizmini takomillashtirish va budjetga toʻlovlar intizomini mustahkamlash boʻyicha Hukumat komissiyasining budjetga toʻlovlar intizomini mustahkamlash boʻyicha kichik komissiyasi (bundan keyin Kichik komissiya deb ataladi) oʻz faoliyatini budjetga va budjetdan tashqari fondga soliqlar va majburiy toʻlovlarning oʻz vaqtida tushishini taʼminlash, iqtisodiy va maʼmuriy tusdagi kompleks chora-tadbirlarni ishlab chiqish va amalga oshirish yoʻli bilan budjetga toʻlovlar boʻyicha vaqtida toʻlanmagan qarzlarni qisqartirish maqsadida amalga oshiradi.

2. Kichik komissiya oʻz faoliyatida Oʻzbekiston Respublikasi Konstitutsiyasiga, Oʻzbekiston Respublikasi qonunlariga, Oʻzbekiston Respublikasi Prezidenti farmonlariga, Oʻzbekiston Respublikasi Vazirlar Mahkamasi qarorlari va farmoyishlariga Hisob-kitoblar mexanizmlarini takomillashtirish va budjetga toʻlovlar intizomini mustahkamlash boʻyicha Hukumat komissiyasi (bundan keyin Hukumat komissiyasi deb ataladi) toʻgʻrisidagi Nizomga, shuningdek mazkur Nizomga amal qiladi.

3. Kichik komissiyaning oʻz vakolatlari doirasida qabul qilgan qarorlarining vazirliklar, idoralar, mahalliy hokimiyat va boshqaruv organlari, mulkchilik shakllaridan qatʼi nazar, xoʻjalik yurituvchi subyektlar va ularning birlashmalari (xoʻjalik uyushmalari), mansabdor shaxslar va fuqarolar tomonidan bajarilishi majburiy hisoblanadi.

4. Quyidagilar Kichik komissiyaning asosiy vazifalari hisoblanadi:

barcha xoʻjalik yurituvchi subyektlar va tijorat banklari tomonidan toʻlov intizomini mustahkamlash boʻyicha amaldagi qonun hujjatlari normalariga qatʼiy rioya qilinishi, soliqlar va majburiy toʻlovlarning oʻz vaqtida va toʻliq toʻlanishi ustidan taʼsirchan nazoratni taʼminlash;

xoʻjalik yurituvchi subyektlarning budjet va budjetdan tashqari fondlarga toʻlovlari boʻyicha oʻz vaqtida toʻlanmagan qarzlarining holatini tarmoqlar va respublika mintaqalari boʻyicha tahlil qilish va amaldagi qonun hujjatlariga muvofiq undirilishi kerak boʻlgan soliqlar va majburiy toʻlovlarning toʻliq undirilishini taʼminlash boʻyicha aniq chora-tadbirlar koʻrish;

ayrim xoʻjalik yurituvchi subyektlarning budjetdan qarzlarini tarkibiy oʻzgartirish toʻgʻrisida takliflar ishlab chiqish.

5. Kichik komissiya quyidagi huquqlarga ega:

vazirliklar, idoralar, banklar, xoʻjalik uyushmalari, korxonalar va birlashmalar, mahalliy hokimiyat va boshqaruv organlari rahbarlarining soliq intizomining ahvoli masalalari boʻyicha hisobotlarini eshitish hamda soliq qonunchiligi buzilishida aybdor boʻlgan mansabdor shaxslarni jinoiy javobgarlikkacha boʻlgan javobgarlikka tortish toʻgʻrisida tegishli organlarga takliflar kiritish;

oʻz vaqtida toʻlanmagan qarzlarni kechiktirish va (yoki) boʻlib-boʻlib toʻlash uchun muddat berish, penya yozishni toʻxtatish, soliqlar va budjetga va budjetdan tashqari fondlarga toʻlovlar boʻyicha penyalarni hisobdan chiqarish haqida Hukumat komissiyasiga takliflar taqdim etish;

vazirliklar va idoralar, xoʻjalik uyushmalari, davlat boshqaruvi mahalliy organlaridan Kichik komissiya zimmasiga yuklangan vazifalarning bajarilishini taʼminlash uchun zarur boʻlgan axborotlarni belgilangan tartibda olish;

oʻz vakolati doirasida moliya, soliq va bojxona organlari faoliyatini qonun hujjatlarida belgilangan tartibda tekshirishni tashkil qilish;

soliq qonunchiligini takomillashtirish boʻyicha takliflarni Hukumat komissiyasiga koʻrib chiqish uchun kiritish.

6. Kichik komissiya quyidagilarga majbur:

toʻlov intizomini mustahkamlash sohasidagi qonun hujjatlariga qatʼiy rioya qilish, xoʻjalik yurituvchi subyektlarning budjet bilan hisob-kitoblar uchun javobgarligini oshirish;

vazirliklar, idoralar, tijorat banklari, xoʻjalik uyushmalari, korxonalar va birlashmalar, davlat boshqaruvi mahalliy organlari tomonidan Hisob-kitoblar mexanizmini takomillashtirish va budjetga toʻlovlar intizomini mustahkamlash boʻyicha Hukumat komissiyasining budjetga toʻlovlar intizomini mustahkamlashga doir qarorlarining ijro etilishi ustidan nazoratni amalga oshirish;

Hisob-kitoblar mexanizmini takomillashtirish va budjetga toʻlovlar intizomini mustahkamlash boʻyicha Hukumat komissiyasiga amalga oshirilayotgan ishlar natijalari toʻgʻrisida muntazam ravishda axborot berib borish.

7. Kichik komissiya:

oʻz zimmasiga yuklangan vazifalarning soʻzsiz bajarilishi;

ayrim xoʻjalik yurituvchi subyektlarning budjetdan qarzlarini tarkibiy oʻzgartirish boʻyicha takliflarning sifatli ishlab chiqilishi;

Hisob-kitoblar mexanizmini takomillashtirish va budjetga toʻlovlar intizomini mustahkamlash boʻyicha Hukumat komissiyasining budjetga hamda budjetdan tashqari fondlarga toʻlovlar intizomini mustahkamlashga doir qarorlarining ijro etilishi uchun javob beradi.

8. Kichik komissiya ishlari zaruratga koʻra, biroq har oyda kamida bir marta oʻtkaziladigan majlislar asosida amalga oshiriladi.

9. Kichik komissiyaning shaxsiy tarkibi Oʻzbekiston Respublikasi Vazirlar Mahkamasining qarori bilan tasdiqlanadi.

10. Kichik komissiyani Hisob-kitoblar mexanizmini takomillashtirish va budjetga toʻlovlar intizomini mustahkamlash boʻyicha Hukumat komissiyasi raisining oʻrinbosari hisoblanadigan rais boshqaradi.

11. Kichik komissiya raisi quyidagi huquqlarga ega:

Kichik komissiyaning rejali va rejadan tashqari majlislarini chaqirish;

Kichik komissiya majlislari bayonlarini imzolash;

Hisob-kitoblar mexanizmini takomillashtirish va budjetga toʻlovlar intizomini mustahkamlash boʻyicha Hukumat komissiyasi raisi oʻrinbosari sifatida korxonalarning budjetga va budjetdan tashqari fondlarga qarzlarini tarkibiy oʻzgartirish, penyalar yozishni toʻxtatish va ularni hisobdan chiqarish toʻgʻrisidagi qarorlarini imzolash;

Kichik komissiya vakolatiga kiruvchi masalalar boʻyicha shoshilinch qarorlar qabul qilish, keyinchalik ulardan kichik komissiya aʼzolarini xabardor qilish.

12. Kichik komissiya raisi quyidagilarga majbur:

Kichik komissiyaning oʻz vakolatiga kiruvchi masalalar boʻyicha aniq va kelishilgan holda faoliyat koʻrsatishini taʼminlash;

Kichik komissiya zimmasiga yuklangan vazifalarning bajarilishi uchun shaxsan javob berish;

Kichik komissiya majlislarining muntazam oʻtkazilishini taʼminlash.

13. Kichik komissiya ishlarining natijalari Kichik komissiya raisi tomonidan tasdiqlanadigan bayon shaklidagi qarorlar bilan rasmiylashtiriladi.

14. Kichik komissiya oʻz faoliyati toʻgʻrisida Hukumat komissiyasiga hisobot beradi va uni amalga oshirilgan ishlar toʻgʻrisida muntazam ravishda xabardor qilib boradi.

1. Hisob-kitoblar mexanizmini takomillashtirish va budjetga toʻlovlar intizomini mustahkamlash boʻyicha Hukumat komissiyasining Toʻlov muddati oʻtgan debitorlik va kreditorlik qarzlarni qisqartirish boʻyicha kichik komissiyasi (bundan keyin Kichik komissiya deb ataladi) oʻz faoliyatini toʻlov muddati oʻtgan debitorlik va kreditorlik qarzlarni, xoʻjalik yurituvchi subyektlar oʻrtasidagi oʻzaro toʻlanmagan qarzlarni qisqartirishga doir aniq chora-tadbirlarni ishlab chiqish hamda ularning bajarilishini nazorat qilish maqsadida amalga oshiradi.

2. Kichik komissiya oʻz faoliyatida Oʻzbekiston Respublikasi Konstitutsiyasiga, Oʻzbekiston Respublikasi qonunlariga, Oʻzbekiston Respublikasi Prezidenti farmonlariga, Oʻzbekiston Respublikasi Vazirlar Mahkamasi qarorlari va farmoyishlariga, Hisob-kitoblar mexanizmini takomillashtirish va budjetga toʻlovlar intizomini mustahkamlash boʻyicha Hukumat komissiyasi toʻgʻrisidagi Nizomga, shuningdek mazkur Nizomga amal qiladi.

3. Kichik komissiyaning oʻz vakolatlari doirasida qabul qilgan qarorlarining vazirliklar, idoralar, mahalliy hokimiyat va boshqaruv organlari, mulkchilik shakllaridan qatʼi nazar, xoʻjalik yurituvchi subyektlar va ularning birlashmalari (xoʻjalik uyushmalari), mansabdorlar shaxslar hamda fuqarolar tomonidan bajarilishi majburiydir.

4. Quyidagilar Kichik komissiyaning asosiy vazifalari hisoblanadi:

xoʻjalik yurituvchi subyektlar oʻzaro hisob-kitoblarining amaldagi mexanizmini tahlil qilish hamda ularning, shuningdek banklarning toʻlov intizomini mustahkamlash boʻyicha amaldagi qonunchilik normalariga qatʼiy amal qilishlari va hisob-kitoblarni oʻz vaqtida amalga oshirishlari ustidan taʼsirchan nazoratni taʼminlash;

xoʻjalik yurituvchi subyektlar tomonidan Hukumatning toʻlov muddati oʻtgan debitorlik qarzlarning toʻplanib qolishiga yoʻl qoʻymaslik va aylanma mablagʻlarning saqlanishini hamda oʻz vaqtida toʻldirilishini taʼminlash boʻyicha qarorlarining bajarilishini nazorat qilish;

xoʻjalik yurituvchi subyektlarning debitorlik va kreditorlik qarzlari holatini oʻrganish, korxonalar va tashkilotlarning toʻlov muddati oʻtgan qarzlarini solishtirib chiqishni muntazam tashkil etish, ularni qisqartirish boʻyicha taʼsirchan chora-tadbirlar ishlab chiqish va koʻrish;

toʻlovga qodir boʻlmagan isteʼmolchilarga va buyurtmachilarga mahsulot sotilishiga, ular uchun ishlar bajarilishiga va xizmatlar koʻrsatilishiga yoʻl qoʻymaslik ustidan nazoratni taʼminlash xoʻjalik yurituvchi subyektlar oʻrtasida oʻzaro hisob-kitoblar mexanizmini qisqartirish boʻyicha taʼsirchan chora-tadbirlar ishlab chiqish;

korxonalar va tashkilotlar aylanma mablagʻlarining tayyor mahsulotlar zaxiralariga, tugallanmagan qurilishga yoʻnaltirilishi sabablarini aniqlash, ularni qisqartirishni taʼminlovchi aniq chora-tadbirlar koʻrish;

bankrotlik belgilariga ega boʻlgan xoʻjalik yurituvchi subyektlarning moliyaviy ahvolini oʻrganish va korxonalarni sanatsiyaga qoʻyish toʻgʻrisida qaror qabul qilish yuzasidan Korxonalar bankrotligi va sanatsiyasi masalalari boʻyicha Respublika komissiyasiga takliflar tayyorlash yoki toʻlov muddati oʻtgan debitorlik va kreditorlik qarzlarga muttasil yoʻl qoʻyayotgan korxonalar va tashkilotlarni bankrot deb eʼlon qilish uchun materiallarni xoʻjalik sudiga berish.

5. Kichik komissiya quyidagi huquqlarga ega:

vazirliklar, idoralar, banklar, xoʻjalik uyushmalari, korxonalar va birlashmalar, mahalliy hokimiyat va boshqaruv organlari rahbarlarining debitorlik va kreditorlik qarzlarning holati masalalari boʻyicha hisobotlarini eshitish hamda xalq xoʻjaligida hisob-kitoblarni yuritishning belgilangan tartibi buzilishida aybdor boʻlgan mansabdor shaxslarni jinoiy javobgarlikkacha boʻlgan javobgarlikka tortish toʻgʻrisida tegishli organlarga takliflar kiritish;

korxonalar, tashkilotlar, vazirliklar va idoralarda debitorlik va kreditorlik qarzlarning holatini solishtirib chiqishni tashkil qilish, ulardan Kichik komissiya zimmasiga yuklangan vazifalarning bajarilishini taʼminlash uchun zarur boʻlgan axborotlarni belgilangan tartibda olish;

vazirliklar, idoralar, xoʻjalik birlashmalari va korxonalarning oʻzaro hisob-kitoblar tizimini takomillashtirishga qaratilgan takliflarini koʻrib chiqish hamda oʻz vakolati doirasida ular yuzasidan qarorlar qabul qilish;

Budjetga toʻlovlar intizomini mustahkamlash boʻyicha Kichik komissiya koʻrib chiqishi uchun budjetga oʻz vaqtida toʻlanmagan, undirib olinishi ishonchli boʻlmagan qarzlarni tarkibiy oʻzgartirish yoʻli bilan korxonalarning debitorlik va kreditorlik qarzlarini qisqartirish yuzasidan takliflar kiritish;

Hisob-kitoblar mexanizmini takomillashtirish va budjetga toʻlovlar intizomini mustahkamlash boʻyicha Hukumat komissiyasiga respublikaning xalq xoʻjaligida hisob-kitoblar tizimini yaxshilashga qaratilgan qonun hujjatlarini takomillashtirish boʻyicha takliflar kiritish;

xoʻjalik yurituvchi subyektlarning oʻzaro qarzlarini, shu jumladan budjetdan qarzlarini eng yuqori darajada qisqartirish uchun tijorat banklari kreditlari hisobidan oʻzaro hisob-kitoblarning aniq maqsadli sxemalarini tasdiqlash;

xoʻjalik yurituvchi subyektlar oʻrtasidagi oʻzaro qarzlarni surishishning toʻlov muddati oʻtgan debitorlik va kreditorlik qarzlarni toʻlashga qaratilgan bayonlarini ishlab chiqish hamda Hisob-kitoblar mexanizmini takomillashtirish va budjetga toʻlovlar intizomini mustahkamlash boʻyicha Hukumat komissiyasiga tasdiqlash uchun taqdim etish.

6. Kichik komissiya quyidagilarga majbur:

toʻlov intizomini va oʻzaro hisob-kitoblar tizimini mustahkamlash sohasidagi qonun hujjatlariga qatʼiy rioya qilish, xoʻjalik yurituvchi subyektlarning budjet bilan hisob-kitoblar qilish yuzasidan masʼuliyatini oshirish;

Hisob-kitoblar mexanizmini takomillashtirish va budjetga toʻlovlar intizomini mustahkamlash boʻyicha Hukumat komissiyasiga amalga oshirilgan ishlar toʻgʻrisida muntazam ravishda axborot berib borish.

7. Kichik komissiya:

xoʻjalik yurituvchi subyektlar oʻrtasidagi oʻzaro qarzlarni surishish yuzasidan oʻzi ishlab chiqayotgan bayonlar uchun, ular Hisob-kitoblar mexanizmini takomillashtirish va budjetga toʻlovlar intizomini mustahkamlash boʻyicha Hukumat komissiyasi tomonidan tasdiqlangandan keyin esa – ularga rioya qilish boʻyicha nazoratni taʼminlash uchun;

xoʻjalik yurituvchi subyektlarning oʻzaro qarzlarini, shu jumladan budjetdan qarzlarini eng yuqori darajada qisqartirish uchun tijorat banklari hisobidan oʻzaro hisob-kitoblarning ishlab chiqilayotgan aniq maqsadli sxemalari, shuningdek ularga rioya etilishini nazorat qilish uchun javob beradi.

8. Kichik komissiya ishlari zaruratga koʻra, biroq har oyda kamida bir marta oʻtkaziladigan majlislar asosida amalga oshiriladi.

9. Kichik komissiyaning shaxsiy tarkibi Oʻzbekiston Respublikasi Vazirlar Mahkamasi qarori bilan tasdiqlanadi.

10. Kichik komissiyani Hisob-kitoblar mexanizmini takomillashtirish va budjetga toʻlovlar intizomini mustahkamlash boʻyicha Hukumat komissiyasi raisining oʻrinbosari hisoblanadigan rais boshqaradi.

11. Kichik komissiya raisi quyidagi huquqlarga ega:

Kichik komissiyaning rejali va rejadan tashqari majlislarini chaqirish;

Kichik komissiya majlislari bayonlarini imzolash;

Kichik komissiya vakolatiga kiruvchi masalalar boʻyicha shoshilinch qarorlar qabul qilish, keyinchalik ulardan Kichik komissiya aʼzolarini xabardor qilish.

12. Kichik komissiya raisi quyidagilarga majbur:

Kichik komissiyaning oʻz vakolatiga kiruvchi masalalar boʻyicha aniq va kelishilgan holda faoliyat koʻrsatishini taʼminlash;

Kichik komissiya zimmasiga yuklangan vazifalarning bajarilishi uchun shaxsan javob berish;

Kichik komissiya majlislarining muntazam oʻtkazilishini taʼminlash.

13. Kichik komissiya ishlarining natijalari Kichik komissiya raisi tomonidan tasdiqlanadigan bayon shaklidagi qarorlar bilan rasmiylashtiriladi.

14. Kichik komissiya oʻz faoliyati toʻgʻrisida Hisob-kitoblarni takomillashtirish va budjetga toʻlovlar intizomini mustahkamlash boʻyicha Hukumat komissiyasiga hisobot beradi va unga amalga oshirilgan ishlar toʻgʻrisida muntazam ravishda axborot berib boradi.