O‘zbekiston Respublikasi Bojxona kodeksining 65-moddasiga muvofiq, Vazirlar Mahkamasi qaror qiladi:

1. Bojxona bojlari va soliqlarni to‘lashdan shartli ozod qilish tadbiq etiladigan vaqtincha olib kiriladigan tovarlar ro‘yxati, ozod qilish shartlari, shuningdek, imtiyozlarning amal qilish muddatlari ilovaga muvofiq tasdiqlansin.

2. Vazirliklar va idoralar bir oy ichida o‘zlari qabul qilgan normativ-huquqiy hujjatlarni ushbu qarorga muvofiqlashtirsin.

3. Ushbu qarorning ijrosini nazorat qilish O‘zbekiston Respublikasi Bosh vazirining birinchi o‘rinbosari R.S. Azimov zimmasiga yuklansin.

1. O‘zbekiston Respublikasi Bojxona kodeksining 65-moddasiga muvofiq vaqtincha olib kirishda bojxona bojlari va soliqlardan shartli ravishda ozod qilish tartibi:

a) O‘zbekiston Respublikasi hududidagi xorijiy davlatlarning diplomatik vakolatxonalari, konsullik muassasalari va ularga tenglashtirilgan vakolatxonalarning normal faoliyatini ta’minlash uchun zarur bo‘lgan, shuningdek, O‘zbekiston Respublikasi hududida doimiy yashash joyiga ega bo‘lmagan ushbu vakolatxonalarning diplomatik agentlari, ma’muriy-texnik xodimlari va ularning oila a’zolari tomonidan shaxsiy ehtiyojlar uchun olib kiriladigan tovarlar;

Avtotransport vositalarining vaqtincha olib kirilishiga ruxsat etiladi:

ushbu bandning birinchi xatboshida ko‘rsatilgan vakolatxonalar uchun — har bir xodim uchun 1 (bir) dona transport vositasi;

ushbu kichik bandning birinchi xatboshida ko‘rsatilgan jismoniy shaxslar tomonidan shaxsiy foydalanish uchun – vakolatxonaning bir xodimi va uning voyaga yetgan oila a’zosiga 1 ta (bitta) avtotransport vositasi, biroq bir oilaga 2 tadan (ikkitadan) ko‘p bo‘lmagan avtotransport vositasi.

O‘zbekiston Respublikasi va boshqa davlatlar o‘rtasida erishilgan kelishuvlar asosida, shuningdek, paritet shartlarida yoki gumanitar va texnik ko‘mak loyihalarini amalga oshirish uchun vaqtincha olib kiriladigan avtotransport vositalarining soniga qo‘yilgan cheklovlar o‘zgartirilishi mumkin. Ushbu cheklovlarni o‘zgartirish bo‘yicha qaror akkreditatsiya organining birinchi rahbari tomonidan qabul qilinadi va keyinchalik bu haqda O‘zbekiston Respublikasi Vazirlar Mahkamasiga ma’lumot beriladi.

b) Xorijiy davlatlar ommaviy axborot vositalarining korrespondentlik markazlari va akkreditatsiyadan o‘tgan korrespondentlari tomonidan shaxsiy ehtiyojlar uchun olib kiriladigan avtotransport vositalari.

Har bir akkreditatsiyadan o‘tgan korrespondentlar va xorijiy davlatlar ommaviy axborot vositalari korrespondentlik markazlari xodimlari uchun 1 (bir) dona avtotransport vositasini vaqtincha olib kirishga ruxsat etiladi;

v) O‘zbekiston Respublikasi qonunchiligida vaqtinchalik olib kirish bojxona rejimi ostiga joylashtirishda bojxona bojlari va soliqlaridan ozod qilish to‘g‘ridan-to‘g‘ri nazarda tutilgan tovarlar;

g) Ko‘rgazma, yarmarka, xalqaro uchrashuvlar va shunga o‘xshash boshqa tadbirlarda namoyish etish uchun mo‘ljallangan tovarlar (olib kirilgan tovarlarni sotish maqsadida ishlab chiqarish yoki boshqa tijoriy faoliyat amalga oshiriluvchi joyda o‘tkaziladigan ko‘rgazmalar bundan mustasno) shuningdek, ushbu tadbirlarda foydalanish uchun mo‘ljallangan yordamchi uskunalar va materiallar;

d) faqat shu turdagi tovarlarga buyurtmalar olish maqsadlari uchun mo‘ljallangan va raqamli, harfli va boshqa markirovkalar, yirtish, teshish yoki boshqacha usullar bilan shikast yetkashish orqali boshqa maqsadlarda foydalanish uchun yaroqsizligi ta’minlangan, tovar na’munalarining soni har bir tur, marka, model, artikul, fason, bo‘yoq va boshqalar bo‘yicha ikki nusxadan oshmaydigan tovar namunalari;

e) xorijiy shaxslar tomonidan olib kiriladigan reklama materiallari (kataloglar, preyskurantlar va tijorat prospektlari, modellar, plakatlar, planshetlar, broshyuralar) — agar har bir qabul qiluvchi uchun ushbu materiallar ko‘pi bilan ikki nusxada yoxud ularning umumiy og‘irligi brutto bo‘yicha 50 kilogrammdan oshmagan holda olib kirilganda;

j) reklama filmlari, shuningdek, tovarlarning xususiyatlarini yoki nimaga mo‘ljallanganligini ochib beruvchi axborotning reklama kompyuter tashuvchi vositalari, agar bu filmlar va axborot tashuvchilar chet ellik shaxsning mulkida qolsa, chet ellik shaxs taklif etayotgan chet el tovarlariga taalluqli bo‘lsa, faqat tovarlarni sotib olishi mumkin bo‘lganlarga ko‘rsatish uchun mo‘ljallangan bo‘lsa, bir nusxada va ulardan foydalanish daromad olishni ko‘zlanmagan hola olib kirilsa;

z) sinovlar, tekshiruvlar, eksperimentlar o‘tkazish hamda xossalari va xususiyatlarini namoyish etish uchun mo‘ljallangan tovarlar — ulardan foydalanish daromad olish maqsadini ko‘zlanmagan hollarda;

i) kasbiy foydalanish uchun mo‘ljallangan uskunalar (sanoat ishlab chiqarishda, tovarlarni qadoqlashda yoki tabiat resurslarini ekspluatatsiyasi uchun, yer ishlarini bajarish, binolarni, qurilishlarni, inshootlarni qurish va ta’mirlash yoki shu kabi boshqa ishlarni amalga oshirishda foydalaniladigan uskunalar bundan mustasno) va asboblar (shu jumladan yordamchi apparatlar va taalluqli buyumlar) — agarda vaqtincha olib kiriladigan kasbiy foydalanish uchun mo‘ljallangan uskunalar va asboblar xorijiy shaxsning mulkida qolsa, xorijiy shaxs tomonidan olib kirilsa hamda O‘zbekiston hududida belgilangan muayyan ishlarni bajarish uchun zarur bo‘lsa;

y) ishlab chiqarish kooperatsiyasi doirasida olib kiriladigan chizmalar, rejalar, modellar, shtamplar, matritsalar, klishelar, bosma shakllar va shunga o‘xshash predmetlar, nazorat-o‘lchov priborlari va asboblar — agar ko‘rsatilgan tovarlar asosan eksportga mo‘ljallangan tovarlarni ishlab chiqarish maqsadida foydalanilsa, xorijiy shaxsning mulki bo‘lib qolsa, lekin O‘zbekiston Respublikasining yuridik yoki jismoniy shaxsi foydalanishi uchun mo‘ljallangan bo‘lsa.

k) ilmiy tadqiqot, ta’lim, madaniyat va kinomatografiya sohalarida foydalanish uchun mo‘ljallangan uskunalar (shu jumladan qayta ta’mirlangan) va materiallar, vaqtincha olib kirilgan uskunalar va materiallarni, unga aloqador buyumlarni ta’mirlash uchun ehtiyot qismlar, shuningdek, ushbu uskuna va materiallarni sozlash, nazorat qilish va ta’mirlash uchun zarur bo‘lgan asboblar — agarda vaqtincha olib kirilgan uskunalar, materiallar, ehtiyot qisimlar, aloqador buyumlar va asboblar xorijiy shaxs mulkida qolsa va ularning ishlatilishi tijorat maqsadlarida bo‘lmasa;

l) teatr (sirk, kino) kostumlari, sahna uskunalari, partitura, musiqa asboblari va boshqa teatr (sirk) rekvizitlari. Ushbu rekvizitlar kinosuratga olish, spektakllar, namoyishlar va shunga o‘xshash tadbirlarni o‘tkazish uchun vaqtincha olib kirilishi mumkin. Ular madaniyat muassasalari va kinomatografiya tashkilotlariga vaqtincha tekin foydalanish uchun berilishi kerak;

m) kino va video mahsulotlar (kino va video filmlar, slaydlar, fotosuratlar, plakatlar, montaj va dialog varaqalari hamda boshqa tasvir yozilgan axborot tashuvchilar). Agar ushbu mahsulotlar foto va kino tanlovlarida, kinofestivallarda, kinohaftalarda va boshqa shunga o‘xshash tadbirlarda namoyish qilish uchun mo‘ljallangan bo‘lsa, vaqtincha olib kirishga ruxsat beriladi. Ushbu mahsulotlar tijorat maqsadida foydalanilmasligi kerak;

n) sport musobaqalari, ko‘rgazmali sport tadbirlari yoki mashg‘ulotlar uchun mo‘ljallangan tovarlar. Ushbu tovarlar xorijiy shaxs mulkida qolishi va faqat belgilangan sport tadbirlari uchun zarur bo‘lgan miqdorda olib kirilishi kerak;

o) kurort va turizm sohasiga oid tanishtiruv materiallari, ushbu materiallar xorijiy shaxs mulkida qolishi va faqat maqsadiga mos miqdorda vaqtincha olib kirilishi mumkin.

p) madaniy boyliklar (san’at asarlari, kolleksiyalash va antikvariat buyumlari bo‘lgan tovarlar, shuningdek olib chiqilishi va olib kirilishi O‘zbekiston Respublikasi qonun hujjatlari bilan tartibga solinadigan boshqa tovarlar) — agar bunday tovarlar chet ellik shaxsning mulkida qolsa vaqtincha olib kirishga ruxsat beriladi;

r) kitoblar, davriy nashrlar, ilmiy va madaniy nashrlar hamda hujjatlar, bunga bosma nashrlar bilan bir qatorda boshqa usulda ko‘paytirilgan ilmiy va ta’lim materiallari ham kiradi. Agar ushbu tovarlar xorijiy shaxs mulkida qolsa, vaqtincha olib kirishga ruxsat beriladi.

s) O‘zbekiston Respublikasi Favqulodda vaziyatlar vazirligining va (yoki) o‘q-dorilar va atom energetikasini ishlab chiqish, ishlab chiqarish va utilizatsiya qilish sohasida davlat siyosatini amalga oshiruvchi, atom energiyasidan foydalanish sohasida davlat boshqaruvini amalga oshiruvchi boshqa vakolatli organning asoslantirilgan taqdimnomalariga ko‘ra, shuningdek O‘zbekiston Respublikasi qonunlarida, O‘zbekiston Respublikasi Prezidentining hujjatlarida va O‘zbekiston Respublikasi Vazirlar Mahkamasining qarorlarida belgilangan hollarda, boshqa ijro etuvchi hokimiyat organlarining ushbu sohadagi faoliyatini muvofiqlashtirgan holda, — agar vaqtincha olib kirilgan tovarlar va transport vositalari chet ellik shaxsning mulkida qolsa, O‘zbekiston Respublikasi Favqulodda vaziyatlar vazirligining va (yoki) atom energetikasi sohasida davlat siyosatini amalga oshiruvchi, atom energiyasidan foydalanish sohasida davlat boshqaruvini amalga oshiruvchi boshqa vakolatli organning asoslantirilgan taqdimnomalariga ko‘ra, chet ellik shaxs tomonidan olib kiriladigan, tabiiy va texnogen xususiyatli favqulodda vaziyatlarning oldini olish va oqibatlarini tugatish uchun mo‘ljallangan, davlat organlari va davlat muassasalariga vaqtincha foydalanishga bepul beriladigan tovarlar, shu jumladan transport vositalari, agar vaqtincha olib kirilgan tovarlar va transport vositalari chet ellik shaxsning mulki bo‘lib qolsa, quyidagilarni o‘z ichiga oladi:

transport vositalari bilan birga olib kiriladigan, ishlab chiqaruvchi tomonidan ko‘zda tutilgan konstruktiv idishlardagi yonilg‘i-moylash materiallari, suv, boshqa suyuqliklar, ehtiyot qismlar, mazkur transport vositalarining oddiy jihozlari va uskunalari, shu jumladan yuklarni yuklash, tushirish, qayta ishlash va himoya qilish uchun maxsus jihozlar, konteynerlar va boshqa transport uskunalari, agar bunday transport vositalari xorijiy davlat hududida ro‘yxatdan o‘tkazilgan bo‘lsa va chet el shaxsi tomonidan olib kirilsa;

tovarlarni tashish, yer qazish ishlari, binolar, imoratlar va inshootlarni qurish, ta’mirlash va ulardan foydalanish hamda boshqa shunga o‘xshash ishlarni bajarish uchun mo‘ljallangan uskunalar va asboblar, shu jumladan yordamchi qurilmalar, agregatlar, ehtiyot qismlar va jihozlar ham vaqtincha olib kirilishi mumkin;

t) Qutqaruv, davolash va boshqa tibbiyot muassasalariga vaqtincha tekin foydalanish uchun beriladigan qutqaruv, tibbiy va laboratoriya uskunalari, agar ushbu uskunalar gumanitar, qutqaruv, diagnostika yoki davolash maqsadlarida foydalanish uchun mo‘ljallangan bo‘lsa va xorijiy shaxs mulkida qolsa, vaqtincha olib kirishga ruxsat beriladi. Ushbu uskunalarning olib kirilishi O‘zbekiston Respublikasi Vazirlar Mahkamasi qaroriga asosan amalga oshiriladi;

u) Xorijiy fuqaro aviatsiyasi ekipaj a’zolarining ijtimoiy-maishiy ehtiyojlarini ta’minlash uchun mo‘ljallangan tovarlar, ushbu tovarlar xorijiy shaxs mulkida qolishi va faqat madaniyat, ta’lim, dam olish, diniy yoki sport ehtiyojlari uchun foydalanilishi kerak. Tijorat maqsadida foydalanish taqiqlanadi;

f) Kasbiy foydalanish uchun mo‘ljallangan kinomatografiya, matbuot, radio va televideniye uskunalari, ushbu uskunalar xorijiy shaxs mulkida qolishi, uning o‘zi tomonidan olib kirilishi, O‘zbekiston hududida aniq belgilangan ishlarni bajarish uchun zarur bo‘lishi kerak;

x) Xorijiy shaxs mulkida qoladigan hayvonlar quyidagi maqsadlar uchun vaqtincha olib kirilishi mumkin: oziqlantirish, o‘rgatish, tayyorlash, ko‘paytirish va veterinariya muolajalari, sinovlar, turistik tadbirlar, gumanitar va qutqaruv operatsiyalari, maxsus vazifalar (masalan, militsiya otlari va xizmat itlari, qidiruv itlari, ko‘zi ojizlarga yordam beruvchi itlar), ko‘rgazmalar, tanlovlar, musobaqalar, namoyishlar, spektakllar, shoular va boshqa shunga o‘xshash tadbirlar, agar ulardan daromad olish ko‘zda tutilmagan bo‘lsa, tibbiy maqsadlar uchun, chegara hududlarida foydalanish uchun ishchi hayvonlari bilan birga olib kiriladigan maxsus jihozlar.

s) Texnika va texnologik uskunalar, agar ushbu texnika va uskunalar xalqaro moliyaviy institutlar va xorijiy hukumat moliyaviy tashkilotlari ishtirokidagi loyihalarni amalga oshirish uchun mo‘ljallangan bo‘lsa, vakolatli ijrochi agentlik yoki organ taqdimnomasi asosida vaqtincha olib kirishga ruxsat beriladi. Agar ushbu texnika va uskunalar belgilangan loyiha doirasidan tashqari foydalanilsa, ularga belgilangan tartibda bojxona to‘lovlari qo‘llaniladi.

sh) O‘zbekiston Respublikasida ishlab chiqarilmaydigan, ijara (lizing) shartnomalari doirasida olib kelinadigan havo kemalari, maxsus texnika, texnologik asbob-uskunalar va jihozlar, aviadvigatellar va ularning qismlari, fuqaro aviatsiyasida foydalanish uchun yordamchi asboblar va jihozlar.

Maxsus texnika va texnologik asbob-uskunalardan ko‘rsatib o‘tilgan loyihalarni amalga oshirish doirasidan tashqarida foydalanish hollari aniqlangan taqdirda, bojxona to‘lovlari belgilangan tartibda undiriladi.

2. Tovarlar va transport vositalarini vaqtinchalik olib kirishda bojxona bojlari va soliqlarini to‘lashdan ozod qilish quyidagi muddatlarga beriladi:

Ro‘yxat 1-bandining “a” va “b” kichik bandlarida ko‘rsatilgan tovarlar va transport vositalari uchun — ushbu kichik bandlarda ko‘rsatilgan shaxslarning akkreditatsiya muddatiga;

Ro‘yxat 1-bandining “v” kichik bandida ko‘rsatilgan tovarlar uchun — O‘zbekiston Respublikasi qonunchiligida bojxona bojlari va soliqlarini to‘lashdan ozod qilish uchun nazarda tutilgan muddatga;

Ro‘yxat 1-bandining “g” — “x” kichik bandlarida ko‘rsatilgan tovarlar uchun — bir yilgacha muddatga;

Ro‘yxat 1-bandining “s” kichik bandida ko‘rsatilgan tovarlar uchun — xalqaro moliya institutlari va xorijiy hukumat moliya tashkilotlari ishtirokidagi loyihalarni amalga oshirish muddatiga;

Ro‘yxat 1-bandining “sh” kichik bandida ko‘rsatilgan tovarlar uchun — ijara (lizing) shartnomasining amal qilish muddatiga.

Ushbu bandning birinchi qismida ko‘rsatilgan muddatlar tugagandan so‘ng, ko‘rsatilgan tovarlar va transport vositalariga vaqtinchalik olib kirishning keyingi muddati uchun davriy bojxona to‘lovlari qo‘llaniladi.

3. Chet ellik jismoniy shaxs tomonidan notijorat maqsadlarda olib kirilayotgan transport vositasi bir kalendar yil mobaynida to‘qson kalendar kungacha bo‘lgan muddatga vaqtincha olib kirilgan taqdirda, bojxona bojlari va soliqlar to‘lashdan shartli ozod etiladi. Transport vositasining qaytarib olib chiqilishini nazorat qilish maqsadida ushbu transport vositasining haydovchisi tomonidan taqdim etilgan haydovchining shaxsini tasdiqlovchi hujjat va transport vositasining texnik pasporti asosida kirish bojxona posti tomonidan transport vositasini qaytarib olib chiqish to‘g‘risidagi majburiyat rasmiylashtiriladi, uning tartibi O‘zbekiston Respublikasi Iqtisodiyot va Moliya vazirligi huzuridagi bojxona qo‘mitasi tomonidan belgilanadi.